Exo 26 | XteSC | STEP | Allah Yahwehdi, Musa tep, upepu. Ne si eremna tep, ne cap, nimi cap antamdana tep ati dopkamnerume. Akatida, opkal bol di er sida, lenan, pio telepnge, morokyo di (10) sekra keteneipkamnerume. Ada, pio telep boun opkal, er si kain lenan cap, tonda, opkal win tapu miringe dinin, singkalumange cap, warna ungu tuange cap, tonda yapi binge cap, yuma Ketenepkamrume. Aopkal deiki yumada, malaikat utopu keca, er si Kerub ton, wina ila kael kemami nengdi, Kerub urasin utopu kupra, aopkal deiki wipmengedi, gambar deipmenge ngepu ketenepkamrume.

Exodus 26

‘Allah Yahweh, er si eremkameng’ tenen, opkal bol di dodin tenda ati dona tep, pepu upu

1 Allah Yahwehdi, Musa tep, upepu.

Ne si eremna tep, ne cap, nimi cap antamdana tep ati dopkamnerume. Akatida, opkal bol di er sida, lenan, pio telepnge, morokyo di (10) sekra keteneipkamnerume. Ada, pio telep boun opkal, er si kain lenan cap, tonda, opkal win tapu miringe dinin, singkalumange cap, warna ungu tuange cap, tonda yapi binge cap, yuma Ketenepkamrume. Aopkal deiki yumada, malaikat utopu keca, er si Kerub ton, wina ila kael kemami nengdi, Kerub urasin utopu kupra, aopkal deiki wipmengedi, gambar deipmenge ngepu ketenepkamrume. 2 Apepman tenda kain kapkotepkamengeda, opkal bol di keteneipkamrum ngeda, akati pumbon wilimna tep, lyom opkal er sida gorden ketenepkamrume. Alyom kain gorden yumada, lyom utotopu, 12,5 meter kunupra sengkamrume. Tonda, er palada, 2,8 meterpu kunupra sengkamrume. 3 Opkal tenda bol di keteneipkamrum ati pumbonda, ati yuk-yuk wilimna tep, kapkotepra keteneipkameng lyom gorden opkal ngeda, morokyo (10) di yuk-yuk sekra wipkamrum dinin, ange yuma neitamai di bokra, ton tara pamubari (5) dopra, dukdongopra wipmumpa, tenpu lyom weiknge kupkamre. Ton tara pamubaringe peda utopu, dukdongopra wipmumpa, lyom weiknge butenenge kupkamre. Ukupmum dingeda, er pala kemdina tep nengeda, antapra butene wipkurume.

4 Ukuprumnyopda, menmena sekropmamum singkaluma (warna biru) opkal, lyom weiknge butene kupkamra cadi, abutene lyom opkal utopu, opkal siriknge dinin, er pirman tara yumada, opkal singkalumange warna biru dopra, giso neng kilina bumatonun kepmumdi, er talen keca ton wipra keteneipkurume. Ada, deiki tara di dukdongopra, daneitamai yuma wipbanmamemnyanen, dutara peda, er talen kecada, giso neng kilina bumatonun wipkamrume. 5 Akain lenan opkal lyom weiknge, sirik itara di dukdongopra, dutara dokotepkamrumnge, sirikai di, alyom opkal, er talena tep kecada, lima puluhpu (50) wipra ketenepmumdi, deipkurume. Ange utopu, ortara deipkamrum lyom opkal peda, er talena tep kecada, 50 wipra ketenepmumdi, deipkurume. Dana tara opkal cap, dana tara opkal cap, murum kepra wipkamrum talen keca konum keteneipmumnyopda, agorden opkal buteneda, urasin tara damaipu deipra, ketenepkamrume. Ukupmumpa tenpupu, dukdongopdankamre.

6 Ange konum keteneipmum dingeda, alyom lenan opkal dana-dana dungdongona tep nengeda, arekra talen keca ton ketenepkamrume. Ada atara di deipmumpa, ortarange dukdongopra derina tep, arekra talen kecada, urasin pio telep kunumna weik keca, er sida emas di, 50 betapra keteneipkurume. Ukupmum dingeda, atarange cap, ortarange cap, dukdongopra tenpu denepra deipmumpa, tenpupu kepkamre. Ukupkamruma deiki di, ne si eremna tep, opkal bol di keana dodin atida, nong tenpupu kepkamre. 7 Akati dodina tenda, opkal bol ati deiki tara deipkamrum kecada, amnyabo utopu dona tep nengeda, kambing bisam potong di winung opkal bol, sebelas di (11) ketenepkamrume. 8 Akambing potong di wipkameng opkal dopra sekamrum ngeda, er lyom yuk-yuk kunupeteprumdi, er lyomda 13,5 meter kunupra sekamrume. Er palada, utopu kupra kunupetepmumdi, 2,8 meterpu kiklipra sekamrume.

9 Tenda opkal bol, mirin nge, ton tara tep nengeda, pamubari dopra, er talena tep ongopdongopra keteneipmamum keca deiki, bena dukdongopra deipdongopmumdi, keteneipkurume. Ange utopu dinin, ortara kunkamre kain bolda, lyom opkal ngantan bari (6) dopra, er talena tep keteneipmamum keca deiki, bena dukdongopra deipdongopmumdi, keteneipkurume. Ukupmumnyopda, atara pamubaringe (5) pe, ortara ngantan baringe (6) peda, dukra tenpu kepra deipmumpa, pala tenpu kepkurure.

Tonda, ortara deipkamrumnge, angantan bari (6) opkal keteneipmamum ngeda, siriknge dopra, gwinikra butene keipmumdi, kemdongonkamrume. Angangtan nge tenpu, gwinikra butene deipmamum ngeda, ne si eremna tep, tenda bol di dodin ati dopmamumyai, urasin tara deipmumnyopda, er bisi buplan utopu kemdongona tep, kapkotepkamrume.

10 Akain lenan lyom weiknge, dana-dana tara konum dukdongopra deipmum dingeda, alyom opkal sirik tarada, itara di dukdongopra, dutara dokotepkamrumnge, sirikai di, alyom opkal er talena tep kecada, ongopdongopra deipmumdi, lima puluh 50 wipra ketenepmumdi, deipkurume. Angetopu, ortara deipkamrum lyom opkal peda, er talena tep kecada, bulat kepmumdi, 50 wipra ketenepmumdi, deipkurume. Dana tara opkal cap, dana tara opkal cap, sirik dana-dana bulat kepra deia wipkamrum talena keca konum keteneipmumnyopda, alyom gorden buteneda, urasin tara neitamai dukdongopmemdi, dekdongopkamrume.

11 Ukupmum dingeda, aopkal bol dana-dana tara dukdongopra dengdongona tep, urasin telep gat keca, er si tembaga di, arekra talen keca ton, nukra lima puluh (50) di ketenepkamrume. Ukupmum dingeda, alyom kain lenan nge deiki, sirikai mirin opkal di, bulat kepra wipmamum talen keca neitamai, ukupu tembaga di keteneipmamum arekra talen kecada dopra, atara lyom opkal cap, ortara lyom opkal cap, gwarepdongopra deipmumdi, akati buplan utopu kupra, dekdongopkamrume. 12 Tonda, alyom opkal yuma konum dukdonopra deipmumpane, daneitamai weik tara ton, tupa akapmare ngeda, atenda ati er amnyo tara neitamaipu, kemdongona tep, acapu deipkurume. 13 Atenda bol ati dopmumpa, dum dam tara siri-siri, tupa bisipronmaredi, bomare ngeda, er lyomda 50 sentimeter cadi, akati er amnyo tara neitamaipu, kemdongona tep, acapu tamkamtume.

14 Uda, adodina opkal tenda ati, er amnya bo utopunge tep, bura tara singidongon kecada, pio lyomnge butene ketenepra deipkamrume. Tenpu ngeda, jem domba bol pio telepnge, koptapmumdi, weika di bulupra deipkamrume. Ada, domba bolpu dinin, bi keca likra deipmengedi, dukdongopra wipmenge ngedi, ketenepkamrume. Adeiki tarada er amnya bo butene utopunge tep, laut mokon pumbon kuramre mekina, er si Lumba-lumba, er bol telep nge ton koptapmumdi, ange peda weika di doprapmumdi, akati amnya bo deiki tara ngeda, singidongonkamrume.

Akati lyom co ikra donange tep, pepu upu

15 Akati yopra donada, dumsisikra teleppu kupra dopkamrume. Ada, akasia co lyomnge dipapu keteneipmumdi, ikra dopkamrume. 16 Allah cap, nimi cap antamdana ati dona tep, adinin utara tengdina tep, ayumna co, er lyomda, 4,5 meter kunupetepra keteneipkurume. Tonda, akati dona tep, er ikmengedi tekeipkameng co, er si ranka, er palada, kunupetepmemdi, 66 centimeterpu kunuprapmumdi, dopkurume. 17 Akati dukra dopbanai yumada, co bon butene yuk-yuk potokra keteneip embenkamrume. Ukuamumyadi, ton tarange di, ton tarange yana deipra, dukdongonkamrume.

18 Allah er si eremna tep, opkal bol di dodin ati, ‘Dela co deipkameng’ tenen, itara (arah selatan) deipra pepkamrum ayomna co, er si rankada, dua puluh (20) co sekra ketenepkamrume. 19 Dela pena tep ayomna coda, er si ranka, dua puluh (20) ketenepra deipmumdi, dopmumnyaida, ‘Aco tu baprur’ tenen, aco iriamu tarada, er paledina tep, urasin pio telep boun keca, er si perak, 40 keteneiamenge nge di, palepra deipmumdi dopkamrume. Tonda dela pena tep ayomna co, er si rangka, er deiyo tarada, telep boun keca er si perak di, er paledina tep, butene-butene keteneipmengepa, palepra deipmumdi dopkurume. 20 Ange utopu, Allah er si eremna tep, tenda ati utara pirman tara, dela ayumnya deipra pepkumum ayomna co yuma peda, dua puluh (20) co sekra keteneipkurume.

21 Tonda, adela pena tep, ayomna co, er si rangka, ‘Tu beprur’ tenen, er iriamu tara paledinge tep, urasin pio telep boun keca, perak di, 40 petupra keteneipkurume. Ange utopu, tonda adela ayomna co, rangka deiyo tara palepra derina tep nengeda, perak di er paledina tep, 40 ketenepra deipkurume. Ada, ayomna co deiyo tara, butene-butene derina tep, moupra ketenepra deipkamrume. 22 Tonda, Allah er si eremna tep, er opkal bol tenda ati, keteng dangban tara dinin, bura tara dona tep nengeda, er ayomna coda, ngangtan bari (6) deiki di, rangka ketenepra deipmumdi, dopkamrume. (Ayomna co deikida, lyom kain lenan kapkotepkamengai tep, ange lyom co iki).

23 Ukupmumnyopda, akati sirik tara, kumunai dana-dana tarada, ayomna deiki di ayomna co butene ton, tapakra keteneipmumdi, ton tarada tenpu, ton tarada, tenpu deipmumdi dopkurume. 24 Akati kumunai dana-dana tara butene kupkamraida, tengdin ayomna coda, butene deipmamumnge deiyo tara, utara pe itara peda, tenpu wisipra deipdongopmumdi, takke keteneipkurume. Ada, jen tapu barimna tep keca, er si deklopa utopu keca di, itara pe, utara pe, keteneipmamumnyaipu, deipkurume. Ukupmum ngeda, ‘Ada akeca sirik dungdongonai tep kupmange,’ tenenkamrume. 25 Atep, ayomna co yumada, banbari di (8) keteneipkurume. Tonda, ‘Aco deiyo tara tu baprur’ tenen, urasin pio telep boun keca, er si perak di, paledongona tep, 16 petupra betaipmumdi, ketenepkamrume. Aketenepmamum perak ngeda, tenpu ranka ayomna co iriamu tarada, dana di, dana di, paledin keca perak ngedi, deipdongopra paleipkurume. Ada, banbari (8) ranka ayomna co iriamu tara, er alasnge yuma tep, butene-butene kepra, deipdongopra paleipkurume. Aranka yumada, utopu kupra dopkurume.

26 Tonda, sundi Allah er si eremna ati, sengdina tep, deipkumum coda, akasia copu, 15 di keteneipkurume. Aketeneipkumum coda, tenpu tarapu, pamubari (5) wirikra deipmumdi, lyom opkal di doupra, akati dela tep, ayomna co deiki deipra kapkotepkamrume. 27 Awirikra deipkamrumtopu, Allah er si eremna ati, ortara peda utopu, ayomna co, er si rangka sengdina tep, co pamubari (5) ton sekra deipkurume. Tonda, ange utopu, keteng dangban tara pe utopu, sengdin co pamubaripu ketenepra deipkurume. 28 Ukupmum dingeda, kolongne co, neitamai deipkamrum ngeda, adela co neitam-neitampu deipkamrume. Allah cap, nimi cap antamdana ati neitamai yumada, autopu kupra, deipmumdi dopkamrume.

29 Akati dona tep, ikameng ayomna co deipra, dela pepkamrumnge cap, er sengdin co cap deipkamrumnge yumada, urasin pio telep gat keca, er si emas di, aco bol deiki yuma palepra deipkamrume. Ange utopu, akati sengdina co deipmumpa, er talena tep kecada, bukep utopu keca wina tep nengeda, urasin telep keca, emas dipu wipkurume. 30 Ne Allah Yahwehdi, ne si eremna tep, nimi cap, ne cap antamdana ati dona tep nengeda, nedi Musa kan tep, ‘Ukupkamrume,’ pepra, lap pepkesitopu, sun adipapu akati dopkurume. Ada, Sinai mutu deiki di, upu sisiknumu taru di pepkesitopu, akatida dopkamrume.

31 Ne Allah si eremna ati buplan tep, gerengkotena ngeda, er urasin telep kuna tep, alen win tapu, er si wol tapu, er urasinda, mirin singkalunge (biru) cap, ungu tuange cap, yapi binge cap di, pio telep lyom kain, er si lenan, pio boun nge wipkurume. Ukupmumnyopda, aopkal er bol deikida, malaikat urasin utopu keca, er si Kerub, gambar kepra opkal wina ila kael nengdi, wipra deipkamnunge. 32 Tonda, buplan damai derina tep, coda akasia co lyom ngeda, dumbari (4) keteneipmumdi, ikurume. Aco deikida, kunumna weik gat keca, er si emas di palepra deipkamrume. Ukupmumdi, aco deikipu, kamkotemna keca, emas di betapra ketenepkamrume. Tonda, alyom co amutara, namen kuna tep, kunumna boun keca, er si perak di, petupra deipkamrume. Ukuamumyaipu, alyom lenan opkalda, akati buplan dengna tep, acapu kamkotenkamrume.

33 Yahweh, er Pio Telep Lengna Ati, aco rangka dopmumya deiki, gwaremna tep kecada, tembaga di keteneiamum areng talen kecada, lyom opkal di gwarepkotepmumpa, dolopkamrure. Akain dolopredi, lelepya neitamaida, ne Allahdi Musa tep, ‘Angeda kunkamrume, angeda pio men kunkamrume,’ pepra, deipsidi, pedina upu pepsidi, gel pala butene deiki sekeipsi ngeda, aPeti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Tonda, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu dopra, apeti pumbon dongopi. Peti Perjanjian kael kemna tep, Keluaran 25:11 dinkurume.} co pum neitamai kiprum ngeda doupra, agorden iriamu tara dinin, akati neitamai deipkurume. Alyom kain dolopkotepkamrumnge deiyoda, akati bokra, ati butene kupkamrura cadi, alyom opkal gorden dolopkotepkamrume. Atara atida, Telep Lengna Ati penkamrume. Alyom opkal ortara, pio pumbon kupkamre atida, Pio Telep Lengna Ati penkamrume. Ataru-ataru yuma, Allah cap antamdana ati buteneda, neitamai wilimna tep, lyom opkal er si lenan, gorden di dolopkotepkamrume. 34 Allah Yahwehdi, Musa tep, “Angeda kunkamrume, angeda pio men kunkamrume,’ tenen, pedina upu pepra deiamunge, kipra deiprum peti co, er si Peti Perjanjian pumbonda, er buplan betapra singipdongopmumdi, acapu deipkamrume. Abuplan deikida, ‘Sun Israel nesala mali kuprumu kecada, Allahdi kaukepseredi, daepkamser’ tenen, yapi keca popra, imam deiyo ngebodi, ayapi burupra, aco pum buplan deiki likeipkamrure. Atep nengeda, apeti co, Peti Perjanjianda, akati neitamai dinin, Allah er Pio Telep Lengna Ati pumbon deipkamrume.

35 Allah Yahweh tep karen keca, karepmengepa, dopra derinai tep, betamamum mejada, Allah Yahweh er Telep Lengna Ati pumbon, mali keca pio gum kururai atep, pio lekaida, men deipkamrume. Angeda gum dinin, alyom kain lenan, er si gorden, bura tara utopu tara, tumi-tumi yuma, yapi keca popmengedi, ayapi kareryakankameng ati, utarapu deipkurume. Ada, Allah cap, nimi cap, antamdana ati dinin, utarapu deipkurume. Ukupra deipmumnyopda, weica lana deiyo tep, betaipmum ngeda, akatipu dinin, itara (arah selatan) bena deipkurume. Ukupmumnyopda, ameja utara, aweica deiyonge itara, (arah selatan) kunkamrure. Akatida, Telep Lengna Ati penkamrume. 36 Akati butene wilipra deipkamruma cadi, Telep Lengna Ati atara, Pio Telep Lengna Ati ortara, daneitamai wilimna tep, pio telep lenan opkal, er si gorden ton wipkamenge. Akati butene neitamai buplan utopunge tep, gerengkotena ngeda, alen win tapu, er si wol tapu, er urasinda, singkaluma warna birunge cap, ungu tuange cap, yapi binge merah cap di, pio telep lyom opkal, er si lenan, pio boun nge wipkamenge. Ada, opkal wina ila kael nengdi wipmengopda, ange dopra, akati butene wilimna tep, daneitamai kapkotepkamrume.

37 Tonda, akati buplan damai welena tep coda, akasia co pamubari (5), sekra keteneipkurume. Aco deikida, kunumna weik gat keca, er si emas di, palepra deipkamrume. Ukupmumdi, aco deikipu, arekra talena tep, kamkotemne keca, emas di betapra ketenepkamrume. Tonda, aco namen kuna tep, gat keca er sida, perunggu di paledina tep keteneipmengepa, akeca dopra aco iriamu tara deipkamrume. Ukuamumyaipu, lyom opkal gordenda, buplan dengna tep, acapu kamkotenkamrume.

Allahdi Musa tep lap pepu.