Exo 28 | XteSC | STEP | Allahdi, Musa tep pepu. Israel nesala kan-kan di, kan dubo Harun cap, tonda, er nyapu ada, Nadab cap, Habiu cap, Eliasar cap, tonda Itamar cap yuma tep, anengdi Allah cap, nimi cap antamdina tep, ‘Er si eremna ati pumbon pel donkameng’ tenen, kandi anengpu wepra deipkamrume. Ukupmemnyopda, sun anengda, ne Allah si eremna ati pumbon, ne damai mambul pel don nengpu kunkamenge.

Exodus 28

Imam-imam neng, sun kemne opkal tep, pepu upu

1 Allahdi, Musa tep pepu.

Israel nesala kan-kan di, kan dubo Harun cap, tonda, er nyapu ada, Nadab cap, Habiu cap, Eliasar cap, tonda Itamar cap yuma tep, anengdi Allah cap, nimi cap antamdina tep, ‘Er si eremna ati pumbon pel donkameng’ tenen, kandi anengpu wepra deipkamrume. Ukupmemnyopda, sun anengda, ne Allah si eremna ati pumbon, ne damai mambul pel don nengpu kunkamenge. 2 Musa kan adipapu pepmempa, ne Allah Yahweh si eremna ati, pel dona deiyo nengdi kemkameng opkalda, Harun er kemna tep, telep opkalpu wipra deipkamenge. Ukupmempa, Harundi aopkal kenekrepa, nimi yuma epmengedi, ‘Erda, Allah si eremna ati pel dona deiyo ngebo kurura cadi, erda mambul ngebo’ tenen, er tep gispal donkamenge. 3 Musa kandi, opkal wina tep, ila kael neng tep upupmempa yangopda, kandi, sun aneng tep pepmempa, sundi ne Allah si eremna ati pel dona deiyo neng kemamemng opkal, Harun er kemna tep wipkamnunge. Nedi aopkal wina neng tep, ila kael kemna deiyo keca konum kareamsipa, opkal pio telep kupra winunge. Atep, kandi aneng tep, ‘Ukupkurume,’ pepra, lap pepmempa, sun akael nengdi, Harun er kenengkamre opkal wipkamenge. Ada, ‘Harundi Allah er si eremna ati pel talepredi, gonga kepra dopbankamre’ tenen, erepra deipkamrum tumida, Harun erdi kenekamre opkal wipkamenge.

4 Tonda, kandi sun aopkal wina kael neng tep pepmempa, wipra keteneipkameng opkalda ake. Tenpu ngeda, nong yuma lelimna tep, lyom opkal ton wipkamenge. Awipmenge opkal deiki kenekamre ngeda, taram daramna tep keca ton ketenepkamenge. Adeikida, kunumna weik gel du ton, palepra deipmengedi, akeca er si Efod ^{▼▼Efod – Akeca er si Efod, angeda sun imam neng, sun deiyo ngebodi akeca dopra, er nong urasin tara dinin, er taram deiki kenengamu. Akeca Efod deikida, urasin pio telep gel warna-warna yuk-yuk 12 akapunge palepra deiami. Yuk gelda, er si Urim, ton gelda, er si Tumin kwamu. Agel-agel yuma dipeteramipa, Allah er puto deiki di, agel warna yuk kepra deiamnga deiki di, sun imam nengdi, ‘E, Allah Yahweh, erdi nun tep, ‘Ukupkurume, tek sisi ngeda ake, sun kael kepkurum ngeda ake, sun kunkamrum ngeda ake,’ pepra deipserada akonuma’ tenen, akeca deiki moupra kael kemamidi, Israel tara nesala yuma tep lap perami. Atep nengeda, akeca Efod deiki deiami gel, Urmin cap, Tumin cap, diramya deiki di, peten kemna tep keca kupka cadi, adeiki di sun kunkami keca kael keami.} ton ketenepkamenge. Tonda, telep boun opkal di kemeja ton wipkamenge. Tonda, topi giso galuna utopunge, lyom opkal di giso geterameng nge, er si serban cap, opkal deiki deiyoteng derinange cap, yuma betaipkamenge. Ada, sun imam neng kenengna tep, lyom opkal wipmenge ngeda, kan dubo Harun cap, er nyapu cap, sun kemna tep, adipu wipra ketenepkamenge. Ukupmengepa, sun anengda, ne Allah si eremna ati pumbon, ne damai yangedi, akati talepra, apel dona deiyo neng kunkamenge.

5 Aopkal winada, sun adipapu, opkal win tapu, er si wol tapu, er urasinda, mirin singkalumange cap, mirin ungu cap, yapi binge cap di dopra wipkamenge. Tonda urasin telep keca, emas deiki di betamameng opkal win tapu di, dopra wipkamenge. Tonda, pio telep boun opkal, er si lenan, aopkal wina tep dopra wipkamenge.

Allahdi Musa tep pepu.

Allah si eremna ati deiyo ngebo kenengkamre keca, Efod tep, ‘Ukupra ketenepkamrume,’ pepu upu

6 Allahdi Musa tep upepu.

Allah er si eremna ati pumbon pel dona deiyo ngebo, er taram deiki kenekamre keca, er si Efod tep, ukupra wipra ketenepkamrume. Pio telep boun opkal, er si lenan dopra, Efod wipkamrume. Er urasin telep kuna tep, opkal win tapu, er si wol tapu, er urasinda, mirin singkaluma cap, mirin nge ungu cap, yapi binge cap di dopra wipkamenge. Tonda, urasin telep keca, emas deiki di betamameng opkal win tapu di dopra wipkamenge. Ange yumada, ila kael opkal wina ila kael nengdi, aopkal winkamenge. 7 Allah er ati pel dona deiyo ngebo, taram lelimna tep betamkamre keca, er si Efod, ange morokyo deiki sirik dana-danada, tapu weleprepa takol deiki koudongona tep, tapu ton ketepra wipkamenge. 8 Tonda, aketeneipmamum keca, er si Efod, er deiyoteng ton wipkamenge. Ukupkamenga tep, telep boun opkal lenan dipu, wipkamenge. Adeiyoteng cap, Efod cap, dukdongopra tenpu utopu kupkamrure. Aopkal winada, sun adipapu, opkal win tapu, er si wol tapu, er urasinda, mirin singkaluma cap, mirin ungu cap, yapi binge cap di dopra wipkamenge. Tonda, urasin telep keca, emas deiki ketkemameng opkal win tapu di, dopra wipkamenge. Tonda, pio telep boun opkal, er si lenan, aopkal di winkamenge. Ange betaipmumpa, er urasin tenpu kupredi, telep kupkamre.

9 Efod ^{▼▼Efod – Aupu deiyoda, Efod perami opkalda, Imam deiyo neng Allah karerbarami ati wengbenkoi taruda, atumi-atumi yuma kengengami opkal tep Efod perami. Tonda, itarada, kunumna weik gel urasin utopunge dinin, gel 12 yuk-yuk deipipa akwamu. Agel dopra, aopkal deiki palepra deiaminge di, petenkemna pel doraminge peda, nun yambul walwale. Dinino, Allahdi peten kemnange kareamupa, agel 12 ngeda, urasin yuk kupupa, ange dipeteramya deiki di, ‘E, Allahdi teneserur ngeda, ake. Tonda, nundi kupkamnup ngeda, ake,’ tenepra kael keami.} deiki palepra deipkamrum ngeda, ukupra ketenepkamenge. Menmenada, urasin pio telep mirin gel, er si batu delima butene dopra keteneipkurume. Agel butene deiki, sun apu bo Yakub, er si ton ngeda, Israel, erdi deiamu neng, sun si yumada, yuk-yuk kepra, agel deiki sekeipkurume. 10 Israel, erdi deiamu neng, sun si yuma, amirin gel deiki sekamrum ngeda, menmena deiamu ngebo, er si sekra deipmemdi, angebo dinin, amenda taru deipyakaramu neng yuma, sun si ton yuk-yuk sekra deipkamrume. Ange utopu, dana tara gel deiki ngantan bari (6) nyapu sun si sekmem dingeda, ortara gel deiki sun ngantan bari (6) neng amenda taru deiamu neng, sun si ton yuk-yuk sekamrume. 11 Yakub er si ton ngeda, Israel, erdi deiamu nyapu, sun yumada, 12 neng cadi, sun si peda, 12 kupra sekamrum ngeda, kunumna weik urasin telep gel deiki, ila kael nengdi, nimi urasin utopu kupra sengamengtopu kupra, asi yuma sengkamrume. Asi konum sekmum dingeda, agel butene dana-dana, kunumna weik keca, er si emas dopra, urasin telep keca, er si bingkai di petuprapmemdi, akeca dopra, agel butene sirikai palepra deipkamrume. Ukupmemnyopda, urasin pio telep kupkamre.

12 Agel butene konum keteneipmengopda, ange dopra, Efod opkal takol deiki bena deipkamrume. Ada, Israel nesaladi, agel deiki sekamrum si yuma epmengedi, ‘Uo, sun anengda, nun apu yapudi deipipa, dadeipdanen yakaramipa, nun peda dua belas yala neng kunupe’ tenen, kael kemkamenge. ‘Ukupkameng’ tenen, agel cap, aEfod cap betapra deipkurume. Efod konum keteneipmemnyopda, Harundi akeca kenengkamre. Efod kenengkamre taru yumada, agel er morokyo deiki, katuai kuprepa, sun apu yapu neng si ton katuai kuprepa epnyopda, ne Allah Yahwehdi, sun apu yapu cap, sun Israel yala nesala yuma cap tep, tupa tenenkamsene. 13 Yuknge butene ton, urasin telep kunumna weik gat keca, emas di gwatepra deipmange nge ton dopropkamnunge. Dopropmengedi, aemas di urasin telep keca, er si bingkai petupra ketenepkamrume. 14 Tonda, kunumna weik gat keca, emas ton dopra, gat tapu rantai butene ton betaipkamrume. Angeda, bisam turya bomamenga urasin utopu kupra, betaipkamrume. Arantai emas tapu konum ketenepmengopda, arantai butene dopra, urasin telep keca, er si bingkai deiki palepra deipmemdi, aEfodda, morokyo deiki wipra dukdongopkamrume.

Yahweh er ati pel dona deiyo ngebo imam, er taram dam kemna opkal tep, pepu upu

15 Allah er si eremna ati, pel dona neng, sun deiyo ngeboda, ‘Allah er tenerengepu, betapra gekepnedi kael kepkamne’ tenen, kunkamre taru yumada, akeca kael kemna deiyo keca ton, ila kael nengdi ketenepkamenge. Ada, Efod opkalda, taram damai kemkamrur opkal keteneipmamumtopu, akeca peda, utopu kupra wipkamrume. Ada, aopkal winada, sun adipapu, opkal win tapu, er si wol tapu, er urasinda, mirin singkaluma (warna biru) cap, warna ungu cap, yapi binge cap di dopra wipkamenge. Tonda, urasin pio telep keca, emas deiki di betamameng opkal win tapu di dopra wipkamenge. Tonda, pio telep boun opkal, er si lenan, aopkal wina tep dopra wipkamenge. Ukupmemnyopda, taram damai kenekamre keca cap, Efod opkal cap, urasin pio telep keca dipapu dopra, telep kupra wipkamrume. Angeda, Efod deiki gerengkotemkamre. 16 Allah tenere keca kael kemna tep melimna kecada, telep lenan opkal dopra, sirik-sirik ketenepra deipmumdi, wipkumum dingeda, dana-dana yuk-yuk butene gwinikdongopra deipkurume. Konum ukupmumnyopda, aopkal er lyom cap, er pala capda, yuk-yuk wipkamrum dinin, kiklinada utotopu 22 sentimeterpu kunupetepra keteneipkurume.

17 Ukupra deipmumnyopda, urasin pio telep gel dopra, yuk-yuk dinin, leleprapmumdi nepra, dumbari deiki di, taram damai kenengna opkal deiki ketenepra wipkurume. Ada, lelepra derina tep, tenpunge palepra deipkamrum gelda, leng-leng peredi, mereng peramre gel, er si delima merah cap, topas cap, tonda baiduri cap, dopra leleipmumdi betaipkurume. 18 Akeca deiki lelemdina butenenge derina tep gelda, Zamrud cap, Nilam cap, Intan cap di, deipra palepra betaipkurume. 19 Akeca deiki lelemdina weneri derina tep gelda, Lazuardi cap, Akik cap, Kecubung gel cap di, deiprapmumdi, palepra betaipkurume. 20 Nemdina dumbaringe, palepra derina tep gelda, Pirus cap, Yakut cap, Ratna Cempaka cap, palepra deipmumdi keteneipkurume. Urasin telep dua belas gel dana-dana yumada, kunumna weik gat telep keca emas di betaipmenge nge, er si bingkai petupra deipmumdi betaipkamrume.

21 Aurasin telep gel, dua belas (12) deiki yumada, Yakub, er si ton ngeda, Israel, erdi deiamu neng, aneng sun si yuk-yuk sekeipkamrume. Ton ngeboda, er si ton gel deiki, ton ngeboda, er si yuk gel deiki sekmemdi, ukupra sekbanmamemnyanen, gawal dakamrume. Ada, Israel nesaladi, agel deiki sekamrum si yuma epmengedi, ‘Uo, sun anengda, nun apu yapudi deipipa, dadeipdanen yakaramipa, nunda adua belas yala nengpu kunupe’ tenen, kael kepkamenga tepa. 22 Tonda, taram damai lelimdongona tep, kenekameng opkal getena tep, urasin telep keca emas di, dopra metek rantai tapu butene ketenepkamrume. Arantai betamna tep nengeda, bisam turya tapu bomamengtopu kupra, opmumdi keteneipkurume. 23 Ukupmum dingeda, akeca buteneda, taram dam lelimna tep, kemna opkal konum ketenepmumnyopda, akeca getena tep nengeda, kunumna weik telep keca emas deiki di, cincin utopu keca, tonda bukep utopu kepra wipmemdi ongopra betaipkurume. Ukupmum dingeda, ataram deiki kenekamre opkal, itara sirik dana-dana buteneda, wipra deipkurume.

24 Ukupmum dingeda, kunumna weik keca emas di konum ketenepmamum rantai tapu butene dopra, emas deiki di cincin utopu keca, bukep ongopra wipmumdi, ange utopu kepra betapmamumnge, taram deiki kenengkamre keca dinin, deiki tara sirikai wipmum ngeda, gat tapu er si rantai tapu di dukdongopkamrume. Acincin keteneipmamum bonpu, arantai bena dongopra deipkurume. Ada taram deiki kenekamrenge, sirik dana-dana deiki tara bena, dongopra deipkurume. 25 Tonda, arantai tapu sirik yuk tarange dingeda, Efod opkal konum keteneipmamum ngeda, morokyo deiki emas keca di wipra deipmumnyaipu, arantai tapuda koupdongopkamrume. Ada, Efod urasin tara koupdongopkamrume. Ukupmumpa, taram damai lelimna tep kenengameng opkal, yambulanun teng utopu ngeda, bali amnyo tara di dokotepra, iribo tara yan dukdongopkurume. 26 Tonda, urasin telep keca emas deiki di, cincin utopu keca butene wipkurume. Wipmum dingeda, taram lelimna tep, opkal betapmamumya iriamu tara, wipra deipkurume. Ada, Efod opkal kapmarya meneng damai aupu deipkurume.

27 Ange yuma konum kupmum dingeda, urasin telep keca emas deiki di, cincin utopunge, bukep ongopdongopra wiramengtopu, butene wipkurume. Awipmum ngeda, Efod opkal morokyo deiki keteneipmamum mirin gel buteneda, akeca iritara wipra deipkurume. Ada emas tapu butene keteipmamum ngeda, er kouna tep, iritara yan koupdongopkurume. Ukupmemnyopda, Efod opkal urasin tara dinin, deiyo teng gerekamemnyai itara bena, dukra deipkurume. Ada taram deiki lelipkamre keca kouna tep, mirin singkaluma tapu di, dimdongona amutara yan dukdongopra deipkurume. 28 Akupkamruma deiyoda ake. Ada, taram daramna tep, emas cincin amutara ngeda, adipu mirin singkaluma tapu di, Efod opkal emas cincin gerekamengaipu, bena dukra deipkurume. Ukupmum dingeda, atapu di, Imam ngebo kenengkamre deiyoteng ben dukdongopra deipkurume. Ukupmumpa, goki damai kemdongona tep aopkal deiki, gel 12 palepra deipkamrum ngeda, deiyoteng itara kupkamra cadi, ‘Taram deikipu tupa akapkamre ngeda, kwiripra men sakamre’ tenen, kupkamrume.

29 Ataru-ataru yuma, Harundi, Allah er si eremna tep, Telep Lengna Ati ^{▼▼Telep Lengna Ati – Aupu deiyoda, sunda moupra tenenkamrume. Atenda aik pumbon, ati butene wilipra deiami. Akati buteneda ‘Allah erngepu kurure,’ teneramya tep, sun imam-imam neng dipapu akati wengbarami. Tenpu ngeda, jen derina meja cap, weica laramre keca derinai cap, deiamya cadi, akati er sida, Telep Lengna Ati kuramu. Akati dinin, ortara pumbonda, lyom opkal er si gorden ton kapkotepi. Gorden ortarada, ati butenenge ton wilipra deiami. Akati sida, ‘Pio Telep Lengna Ati’ kuramu. Akatida ‘Tali imam neng ton wengnung’ tenen, telep lyom opkal, er si gorden kapkoptepi. Akati pio pumbonaida, imam neng, sun ila deiyo ngebopu akati wengbaramu. Akati pumbonda, ‘Allahdi Israel nesala, sun mali kun keca daepredi, gum kupra deipkamre’ tenen, gam keca popinge, yapi doupra, akati pumbon dubenamudi, Peti Perjanjian deiki tara gege pepra deiamu.} wengyakankamre taru yumada, Harun adipapu, Israel nesala sun 12 yala deiyo neng, sun si sekra deamenge gelda, er taram deiki kenekamre opkal kenekredi, akati wengbankamrure. Aopkal deiki di, ‘Allah er tenere keca betapra tenepnedi, kael kepkaman’ tenen, kenengkamre. Ukupra, akati wekyopda, ne Allah Yahwehdi, Israel nesala sun co puna deiyo neng, 12 yala deiyo neng, sun si yuma epnyopda, sun Israel nesala tep, ‘Sunda, ne nyapu sisi kununge,’ tenepnedi, tupa tenenkamne. 30 Tonda Harundi, Telep Lengna Ati wengyakankamre taruda, ne Allah Yahweh damai utopu yakankamra cadi, er taram damai lelimna tep kemna opkal amutarada, Urim cap, Tumim ^{▼▼Urim cap, Tumin cap – Akeca buteneda, ‘Gel do, wareto keca do?’ tenen, nun yumada walwalpu kunupe. Dinino, sun imam nengdi, ‘Allahdi, nun kunkamep ngeda lap pepkamser’ tenen, akeca butene dipeteramya deiki di, ‘E, Allahdi upepsere-upepsere, angepu kunkamepe,’ teneramidi, moupra kael keamidi, Israel nesala tep lap perami. Tonda, Bilangan 27:21; Ulangan 33:8 dinkurume.} cap, deipredi, wengbankamrure. Akeca buteneda, er taram deiki lelipkamre opkal, amutara dinin, er kemeja deiki, er dipru damai deipkamre. Ukupra yare dingeda, Harun erda, ‘E, Allahdi nun Israel nesala tep, ange kuptenge, ange men kuptenge’ tenen, betapra kael kepkamrure. Kael kepredi, Israel nesala tep, lap perbankamre.

“Ne ati pel dona tep, imam-imam neng opkal yuknge ton keteneiprume,” pepu upu

31 Ne ati pumbon pel dona deiyo ngebodi kenekamre lyom opkal ^{▼▼lyom opkal – Imam ngebo kenengamu opkalda ake. Ada, er nong damaida amu lenan opkal ton kenengamu. Ange deiki tarada, kurun opkal juba ton kenengamu. Ange deiki tara ton, juba ton dinin, mirin singkaluma (biru) nge ton kenengamu. Ange yuma deiki tara, er taram deikida, Efod opkal ton kenengamu. Efodda, sun Israel nesala, sun co puna neng 12 kuramitopu, sun si ton, agel 12 deiki di sekra deiami.}, ada Efod amutara kenekamre ngeda, alyom opkal betamna tep nengeda, wol tapu er urasinda, mirin singkalumange (warna biru) di dopra wipkamrume. 32 Alyom opkal mirin singkaluma (warna biru) ngeda, er kum damaida, opkal bol gatnge di, adine ordeipra wipdongopmumpa, darap pepya deiki di, menmena men dakmanto kunkamrure.

33 Ukupmumdi, alyom opkal mirin singkaluma (warna biru) ngeda, pirman dutara yumada, urasin telep kuna tep, adipapu, wol tapu er urasinda, mirin singkalumange cap, ungu tuange cap, binge cap di, co du er si delima, co du mouramretopu kupra, wipra deipkurume. Ukupmum dingeda, gat keca emas di, metek lelim peramre keca, er si geling-geling ton, petupra gerekotep embenkamrume. 34 Ukupkumum taruda, alyom opkal mirin singkalumange (warna biru), pirman dutara yumada, menmena co du delima utopunge wipra deipmumnyopda, amenda go kupmaryaida, lelim peramre keca, geling-geling keteneipmamumnge gerekurume. Ange utopu kupra, akeca butene wipmumdi, aopkal sirikai yuma, gerekdongopmumdi, ongopgenepra gerekdongopkamrume.

35 Alyom opkal mirin tua (warna hitam) ngeda, Harun er Imam pel donkamre taru yumada, adipapu kenengkamrure. Tonda, Harundi, ne Allah Yahweh damai, ne Telep Lengna Ati yan wekra pel donkunerya tep, wengyankure taru pe, tonda yan pel donmaryanen, benkure taru peda, Harun er lyom opkal utara sirik dolopkotep embenamenge keca, er si geling-geling di, bena lelim pepre pangeda, ne gekepkamne. Ange gekepnyopda, Harun men depkamre. Ange men kupyopda, Harun depkamre ja. Atep nengeda, ‘Harun er akati, Telep Lengna Ati pumbon pel donmare taruda, Allah Yahweh er damai kunkamrura cadi, Harun deprur’ tenena tep, alyom opkal mirin singkalumange (warna biru), lelim pen keca geling-geling gerekdongopra, dolopkotepkamrum ngeda, pio akenengkamrure. Ange men tamkamrure. 36 Tonda, urasin telep kunumna weik keca, emas deiki di, yambul co lase utopunge ketenepkamrume. Ange deiki di, meterai utopu keca kupra, apepkuken upu sekra, peten kepra deipkurume. Aupuda ake. ‘Allah Yahweh, kan mawange, pio teleppu kurure’ pepra sekeipkurume. Ange deiyoda, ‘Akeca kenekamre ngeboda, Allah erngepu kurure. Tonda, mali keca tenpu peda men kapmarepa, pio teleppu kurure’ tenen, aemas keca deiki di, aupu peten kepra sekeipkurume.

37 Ange yuma konum kupmemnyopda, giso galun kecada, mirin singkalumange (biru) tapu di, Harun er giso deiki kenekamre lyom opkal, urasin tarapu koupdongopkamrume. 38 Tonda, urasin telep keca, emas di peten kemna tep, apepmaken upu sekra deipmumdi, Harundi, akati pel donkamre taru yumada, er giso deiki getepkamre keca, er si serban urasin tara, koupdongopmemnyopda, akeca pio kenengkamrure. Aupu sekra betaipmamum kecada, Harun er giso galuna dinin, er aso deiki tara derinkamrure. Ukupra deipre pangeda, sun Israel nesaladi mali kunung keca deiyo ngeda, er Harun deiki kupkamrure. Ada, Israel nesaladi, ‘Allahdi nun mali kun keca kaukepseredi, daepkamser’ tenen, gam keca popra, ne tep kareryakankamneng keca, yala-yala weik akapkamre dinin, sun mali kunange deiyoda, Harun er deikipu deipnepa, akupkamre. Atep nengeda, peten kemna tep, emas deiki amambul upu sekra deipmempa, Harun er giso deiki kenengkamre ngeda, ne Allah Yahweh, aupu epnedi, sun yuma tep, ‘Telepe, Israel nesala sun mali keca daepkamne ja. Atep, ne damai yatenge,’ tenenkamne. Tonda, adeiki di, sun Israel nesala mali kun keca akapmarepapu, telep karen keca, ne Allah Yahweh damai kareryakankamnerumnge yuma peda, ‘Telepe,’ tenepnedi, doronkamne.

39 Harun er nong damai kenengkamre kemeja opkalda, lyomnge opkal lenan urasin telepnge di wipra ketenepkamrume. Tonda, ange utopu, er giso galun keca, er si serban topi peda, boun telep opkal lenan nge di wipra betaipkurume. Er deiyotengda, opkal wina ila kael ngebo dipu, urasin telep kupra wipkamre. 40 Ange utopu, Harun er nyapu peda, sun kemna tep kemeja opkal cap, deiyoteng derina cap, tonda giso geten opkal cap, betapra keteneipkurume. Ukupmumpa, Israel nesala aneng epmengopda, ‘Uo, sun aneng peda, mambul pel dona neng ton kunmange,’ tenepmengedi, aneng tep gispal donkamenge. 41 Aopkalda, kan du bo Harun cap, er nyapu cap, sun tep kepra deipkurume. Konum Kepra deipmemnyopda, minyak saitun co du me dopra, sun yuk-yuk dinin, sun giso deiki dikra deipkurume. Ukupmemnya deiki di, sun aneng wepra deipmempa, ne si eremna ati neitamai talepra, pel dona tep, imam neng kunkamenge. Tonda, ukupmemnya deiki di, sun aneng tep telep kudinkamrume. Ukupmemnyopda, ne Allah damai yatengedi, ne si eremna ati pumbon pel talepra doptenge.

42 Tonda, sun aneng kenengna tep, sun nong damai kenengkameng opkal utopunge wipkumum ngeda, (yambula di celana dalam lyomnge utopu ngeda), kain lenan dopra wipmumdi, ketenepra deripkurume. Abum celana er lyomda, der damai di dipra, kail damai ben deipra kupkamra cadi, ange utopu kupra, yambul lyoma di wipkurume. Ukupra wipmumpa, kenengkameng taruda, akati pum pel donge taru, ali kupmanto ngeda, lelimdongonkamre. 43 Sun, aimam nengda, ne Allah si eremna tep opkal bol di domum tenda atida, ne karen keca uku dongona damai wekunge taru cap, ne Allah karena tep, telep lek ati neitamai dinin, akati sida, Telep Lengna Ati wekunge taru capda, ange amu opkal cap, yuk lyom opkal juba cap kenekmengedi wengkamnunge. Sun nong damai dinin, amu opkal men kenekmengopda, mali kuna deiyo keca, sun nong deiki tupa akapmarepapu cadi, nedi sun tep wenepra popkamne.

Uda, ne Allahdi, ‘Aopkal kenengkamenge,’ pepra deipmaken upu yumada, Harun cap, er nyapu cap, sundi pio kunkamenge. Tonda, sundi deipmengepa, dadeipdanen bankameng neng yuma peda, ne ati pumbon pel don taru yumada, angepu talepra, pio kupbankamenge. Ataru di dipra, dorkunkamre keteng tamun neitamai yumada, Israel nesaladi aupu pio men taptenge.

Allahdi Musa tep aupu yuma lap pepu.