Exodus 29

Allahdi, “Ne si eremna ati talepra pel dona tep, Harun cap, er nyapu cap, wepra deipkurume,” pepu upu.

1Allahdi Musa tep upepu.

Kandi, ne Allah Yahweh si eremna ati talepra, pel don kameng neng, sun Imam-Imamda, ada Harun cap, er nyapu cap, kapul men wepmem taruda, ‘Anengda, Allah damai bena, er gispal dona tep pel donkamenga cadi, sun nong telep kudinkup’ tenen, apepkesinge utopu kupmemdi, sun aneng wepra derinkamrume. Ada, jem sapi bisam tenpu kapul nenmarenge cap, tonda, jem domba bisam konum nenmarenge butene cap, sun nong bol mali kuna gumnge, pio telepnge doupra yamumdi ponkamrume. 2Tonda, aduyamem tarupu, roti dana deiyo keca, er si tepung terigu pio telepnge doupra, roti kwaneng dapkamrume. Dinino, aroti kwanengda, nena deiyo keca, er sida ragi ton tapakra dana gume. Roti kwaneng nena gumngepu dapkamrume. Tonda, ukupkumem taruda, saitun co du minyak me mokon cap, aroti bun neitmai tapakurume. Ukupmem dingeda, ange dipapu ton wilipra minyak saitun di likra deipmemdi roti ton er si kue nge ton dapkurume. Tonda, nena gum roti pio meteknge ton keteneipmemdi dapkurume. Dapmemnyopda, saitun minyak me di likra deipkurume. 3Aroti kwaneng yuma konum dapmem dingeda, tapudi, win keca ersi keranjang pumbon kipra deipkurume. Ukumumdi, akeranjang derin keca cap, tonda aroti kwaneng dapmamemnge yuma cap doupra, ne si eremna tep kareryankurume. Ukupmem tarupuda, jem sapi bisam popmamemnge cap, tonda, jem domba bisam butene popmamemnge cap doupra, ne damai kareyankunerume.

4Ukupmem dingeda, kandi, Harun cap, er nyapu cap doupra, sun adipapu Allah Yahweh cap, nimi cap, antamna ati buplan damai dubenkurume. Konum yangopda, ‘Aneng Allah er damai benkung’ tenen, kandi sun aneng sun nong yumada, kandi me kweipkurume. 5Sun nong me kuipmemnyopda, kandi ne si eremna ati pel dona tep deiyo ngebo, ‘Iman Harundi mambul pel donkure’ tenen, adipapu sun Imam neng kenengameng lyom opkal kenekra deipkurume. Ada kemeja cap, Efod amutara kenengameng lyom opkal cap, aopkal deiki dinin, taram damai derin keca, ersi Efod cap Harun nong deiki kenekra deipkurume. Uda er Efod ngeda, sun ila kael nengdi telep tapu di wirami deiyo teng, daramdongon keca di er nong deiki gerekurume. Ange yuma, Harun er nong deiki kenekra deipkurume. 6Tonda, imam pel dona deiyo ngebo, er kenengkamre ngeda, lyom opkal di giso deiki geterameng topi utopu kenengameng nge, er si serbanda, Harun er giso deiki getepra deipkurume. Ukupmemdi, aserban urasin telep kuna tep, urasin telep gat keca er si emas di, telep kupra petupra deiamenge, er si jamang di, er serban deiki palepra darapdongopkurume. Apetuipmemdi sekeipkamrum upuda ake. ‘Allah Yahweh, ernge pua,’ pepra, petupra sekeipmemdi, er serban deiki palepra darapdongopkurume. Ada, ‘Allah Yahweh er ati pumbon, pio telepai wengkamre,’ tenena tep, angebo er tepapu ukweipkurume.

7Ange yuma konum kupmem dingeda, ‘Angeboda, Allah er ati pel dona deiyo ngebo, imam konum telep kweipnepa, Allah er si eremna ati pumbon wekra pel donkamrure,’ tenena tep, minyak saitun co du me, telepnge konum keteneiamemnge dopra, angebo er giso deiki dikra deipmemdi, likeipkurume. Ada, ‘Angeboda, Allah er ati pumbon, pio telep lekai pel donkamra tep, konum erepra deipne,’ tenepkurume. 8Imam neng, sun deiyo ngebo Harun tep, ange yuma konum kupmemnyopda, Harun er nyapu yuma peda, upupmempa, sun yuma yange pangeda, kandi er nyapu yuma peda, sun nong bol deiki kenengkameng telep opkalda, kemejapu doupra kenekra deipkurume. 9Tonda, sun deiyoteng cap, sun giso geterameng keca, serban topi cap, kenengdinkamrume. Ange yuma tep, “Ukupkurume,” pepra, deipmasentopu konum kupmemnyopda, ‘Anengda, imam pel donkamenga tep, Harun cap, er nyapu cap, wepra konum deipmandi, erepra deipne,’ tenenkamrume. Ada, Harun cap, er nyapu cap, ‘Sunda Allah cap, nimi cap antamdina tep, Allah er si eremna ati pel dona deiyo neng kunkameng’ tenen, ‘Konum wepra deipne,’ tenenkamrume. Tonda, ne Allahdi aupu konum pepra deipsena tep, pio men tapkamrume. Ukupmem pangeda, ataru di dipra dorkunkamre taru neitamai yumada, Harun cap, er nyapu cap, sundi deipmengepa, dadeipdanen bankameng neng, ada sun Lewi yala neng yuma peda, imam pelpu talepra pio dopbankamenge.

10Apel yuma konum dopmem dingeda, jem sapi bisam keteneipmamem ngeda, kan adipapu ne Allah cap, nimi cap antamdana tep tenda ati buplan damai duyankurume. Ukupmemnyopda, Harun cap, er nyapu cap, sun yumada, asapi bisam giso deiki sun buru derinkamenge. 11Ukupra buru deipropmengopda, kandi ajem sapi bisam popmemdi, ne damai duyankunerume. Ada, ne Allah Yahweh cap, nimi cap antamdina tep tenda ati, ne si eremna ati wengban bisi buplan damai dubemem dingeda, ajem sapi bisamda popkurume. Ukupra apel dopkumem taruda, ne Allah Yahwehdi, acapu dinkamsene pepsene. 12Apopmem sapi bisam er yapida, ton wipra dopropmemdi, adoropmem yapida, kan buru du di, ayapi wipropmemdi, ne Allah Yahweh si eremna tep, gam keca popnedi uku dongonai tep, gel pala taplakra yakra keteneipmarumai, dana-dana takke belepka deiki likra deipkurume. Ada sundi, ‘Allah Yahweh erda, nun mali kupe keca kaukepkamser’ tenen, er karena tep, gam keca popra, uku dongona tep, gel pala taplakra yakra keteneipmum keca, er sida mesba, adeiki tara dana-dana takke belepka deikida, ayapi likra deipkurume. Tonda, ayapi tupa akwapre pangeda, kandi doprapmemdi, agel pala taplakra yakra keteneipmamumai, mesba deiyo tara dikra deipkurume.

13Ange yuma konum kupropmemnyopda, asapi bisam kop cap, deiplyu irinange cap, tonda gel du butene cap, dipru irina poyo cap, pio telep-telepngepu, kandi wepra doropmemdi, ne Allah karena tep, gam keca popra, gel pala deiki uku dongona tep, keteneipmum keca, er sida mesba, akeca damai dubememdi, akeca yuma bena uku dongopkurume. Uku di akeca yuma jepropkamre. 14Dinino, ajem sapi bisam er tu cap, bol cap, tonda er deiplyu cap yumada, kandi doupra, sun Israel nesala derirum opkal dodin tenda ati di tapra, yambul bura tara bememdi, adipapu uku dongopmempa, uku di jepra gawal dakurure. Alap pepmasen pel yuma dopmemdi, akeca doupra bura tara bena uku dongopkumemnge deiyoda, ne Allahdi sun imam neng cap, sun Israel yala nesala yuma cap, sun mali kurum keca kaukepnedi, daepkamna tep, apel donkamrume.

15Uda, apel ton donkamrume. Ada, jem domba bisam, konum nemre neng butene keteneipmange ngeda, tenpu ton dopra yankurume. Duyamemnyopda, Harun cap, er nyapu cap, sun buru dopra, adipapu ajem domba bisam giso deiki deipkununge. 16Ukupmengopda, ajem domba bisamda, adipapu popkurume. Popmemnyopda, kandi ayapi doropmemdi, ne Allah karena tep, gam keca popra, uku dongona tep, gel pala taplakra yakra keteneipmamum keca, er si mesba damai dubememdi, agel sirikai yuma bena, dana-dana yuma, kan buru du di ayapi gege pepmempa, dourbena palepkurure. 17Ajem domba bisamda, adipapu sekra yuk-yuk galepra deipkurume. Ukupmem dingeda, domba bisam deiplyu cap, yan cap, kail yo cap, giso cap, kandi doprapmemdi, telep kupra me kupkurume. Me kupmemnyopda, adipapu akeca yuma, domba deiplyu cap, yan cap, giso cap, tenpaipu deipkurume. Ada, galemna yuknge, metek-meteka di sekmamemnge yuma dopra, arup domba bisam galemna deipmamemyaipu, acapu ton tapakra deipkurume.

18Ajem domba bisam galepmamumnge yumada, kandi, ne Allah si eremna tep, gam keca popra, uku dongona tep, gel pala taplakra yakra ketenepra deipnerumaipu, er si mesba, adeiki bena deipkurume. Abena deipmemnyopda, kan adipapu dopra, ukupu dongonkamrume. Ukupmempa, uku jeredi, siltong telep ngepu welerepa, ne Allah Yahwehdi, asiltong telepnge gekepnyopda, ne kange pio telep kunkamnere. Ukupmempa uku jeredi, siltong telep ngeda, ne damai welerepa, ne Allah Yahweh gekenedi, kange derinkamsene. 19Ange yuma konum pel dopmemnyopda, arup taru keteneipmamum dinin, tapmamem jem domba bisam butene ngeda, ange peda dopra yankurume. Ukupmemdi, upu peipmempa, ne Allah si eremna ati pumbon pel dona tep, wepra deipmamem neng tep pepmempa, yangopda, Harun cap, er nyapu cap, sun yumadi ajem domba bisam, er giso deikida, sun buru adipapu deipkununge. 20Ange yuma konum ukupropmengopda, kan adipapu, ajem domba bisamda popkamrume. Popmemnyopda, er yapi yambulanun kan buru du di wipropmemdi, Harun cap, er nyapu cap, sun dumsisi amul damai iriamu tara, adeiki likra deipkurume. Tonda, sun dumsisi tara buru pamunge deiki likra deipkurume. Ange utopu, sun dumsisi tara yan du ilange deiki peda, likra deipkurume. Ange konum kupmumnyopda, ayapi ton tupa akapyopda, kandi ange dopra ne si eremna tep, yapi keca popnedi, uku dongona tep, gel pala taplakra yakeipmumdi, ketenepra deipmamumaipu, er si mesba, agel deiki dana-dana tara yuma, yapi gege pepembemempa, dourbena palepkurure.

21Tonda, ukupmumnyoda, apel ton dopkurume. Ne Allah karen keca uku dongona tep, gel pala taplakra ketenepra deiprumai, er si mesba, acapu bememdi, agam keca popmamumnge tupa ton akapmare yapida, yambula dipu dopropkurume. Tonda, minyak saitun co du me mokon cap, ayapi cap tapakurume. Akeca butene kan buru du di, yambula di burupropmem dingeda, Harun cap, er nyapu cap, sun nong deiki yapi gege pepmempa, ayapi sun nong deiki dourbena palepkurure. Ange utopu, sun kenekmange opkal deiki, kan buru du di ayapi burupra gege pepmempa, dourberedi, sun opkal deiki palepkamre. Ukupmemnya deiki di, ‘Sun aneng yumada, Allah er si eremna ati pumbon talepra, nun mali kun keca daemna tep, pel donkamseng,’ tenena tep kupkurume. Tonda, Harun cap, er nyapu cap, sun opkal deiki ton ukupra likeipkamrema deiyoda, ne ati pumbon pel don neng telep kudina tep kupkamarume.

22Jem domba bisam butenenge popmem dingeda, Harun cap, er nyapu cap, ‘Allah er si eremna ati pel donkameng’ tenen, erepra deipmem taru, sun pel gonga kemna taru popkamrum jem domba tep, adomba galemnada, ukupkamrume. Kandi, ajem domba bisam popmamem ngeda, meta telepaipu doropkurume. Ada, amu damai kuramre meta cap, deiplyu irinai paleramre meta cap, gel du butene cap, agel du damai paleramre kop cap, dipru irinange lyom tara cap, tonda dumsisi tara yan sekropa cap, ange yuma doropkurume. 23Tonda, Allah Yahweh ne si eremna tep, nena gum roti kwaneng karepmangepa konum dapmengedi, kipra derin keca, er si keranjang alen pumbon deipmanguai neitamai di, dopra deipkurume. Tonda, aroti neitamai di, nena gum roti kwaneng tenpunge cap, saitun co du me minyak di likrapmamemdi dapmamum roti utopunge cap, tonda roti jen keca pio yambul kue utopungepu dapmamemnge cap, tenpu-tenpu dopropkurume. Ada, Allah Yahweh er dina tep, er ati pumbon, er damai deipmamemnge di dopropkurume. 24Aroti kwaneng yuma cap, jem domba bisam galemna cap, konum doropmem dingeda, kan adipapu doupra, Harun cap, er nyapu cap, sun buru deiki deipmemdi, “Nun nai Allah Yahweh dinkuser’ tenen, er damai doupra beso,” pepmempa, sun anengdi, ne kange derina tep, buru tang deiki deipra, erepdoupmengedi, tek sisi ne Allah Yahweh teppu tenepra, yana karepkunenunge.

25Ukupmengopda, kan adipapu, sun aneng buru deiki di aroti kwaneng yuma cap, jem domba bisam galemna cap yuma, doupmange ngeda, dopropkurume. Doropmem dingeda, ne karena tep, gel pala taplakra ketenepra deiprumaipu, ‘Akeca dopra uku dongoryakankamrume,’ peipsipa, keteneiprumaida, er si mesba damaipu duyamemdi, ayakra deipi gel deiki uku jenmare damai dongopkurume. Ukupmempa, uku jepredi, siltong telep welerepa, ne Allah Yahweh gekepnedi, kange telep kunkamnere. 26Tonda, ajem domba bisampu, er taram tuda, ‘Nun nai Allah epkuser’ tenen, ne Allah Yahweh, ne si eremna tep, ne dam tara, buru tang deiki deipra, erepra yana doupmengedi, ‘Tek sisi Allah Yahweh dinmaserpa, er tep konum karepmepe,’ tenepkamenge. Utenepmenga deiki di, ajem domba bisam taram karepkamneng ngeda, amenda sun pe jena tepnge cadi, sun pepu tamupra dubemumdi, jenkamrume. 27Tonda, ne Allah si eremna ati pel dona tep, imam neng sun deiyo ngebo, Harun cap, er nyapu cap wepmamumnyanen, ‘Atumida, aneng ereipmepepa, tek sisi apelpu gonga kepra donkamenge’ tenen, wepkumum taruda, saitun co du me, aminyak di, sun giso deiki konum dikmemnyopda, sun aneng tep karepkamrum jem domba bisam galemna yuma dopra, ‘Angeda, pio telepnge, Allah ernge utopu kurure’ tenen, domba bisam galemnada, wepra deipkurume. Ada, Allah si eremna tep, jem domba bisam taram cap, yan cap, sekra keteneipmamum ngeda, kan buru di ne damai duyana erepra doupmamumdi, ‘Allah er dinmaserpa, er tep konum karepmape’ tenen, erepra lap pepmanerumnge yumada, ‘Akeca yuma mali keca ton men kupmaredi, pio telepngepu kurura cadi, angeda, Allah erngepu kurure,’ tenepmemdi, ne ati pel don neng tep karepkurume.

28Apepmasen ngeda, ne Allahdi, sun Israel nesala tep, ‘Angepu kunkamrume,’ tenepsisa tep, tek sisi ajem domba bisam taram tu cap, kail yo tu cap dopra, Harun cap, er nyapu cap tep, akeca pio karenkamrume. Ange yumada, pio men tamkamrume. Ada, ne nyapu sun Israel nesala, sun mali kupmange nge tep, ‘Nun nai bo Allahdi, nun mali keca kaukepseredi, er cap, telep kupra kikiman kunkamepe,’ tenepmengedi, yapi keca popra kareyakankamneng taru yumada, pio telep keca yumada dopra, Harun cap, er nyapu cap tep, karenkamrume. Sun tep karenkamrum dinin, tonda, ne Allah Yahweh tep, kareryakankamnerume. Ada, sun Israel nesala yumadi, ‘Angeda, nun mali kupmupu ngeda, Allah daepseredi, nun cap, er Allah cap, telep kupra kikiman kunkamepe,’ tenepmengedi kunkamenge. Utenepra kareryakankamneng domba bisam taram cap, yan capda, ne si eremna ati pel don neng, sun teppu, ketenemdinkamrum dinin, ne Allah Yahweh tep, akeca yuma, ne si eremna tep, kareryakankamnenge. Dinino, ne si eremna ati pumbon pel dona deiyo neng, sun imam neng dipapu atu keca yumada jenkamnunge.

29Ne Allah si eremna ati talepra, pel dona ila deiyo ngebo, imam Harundi, ne si eremna ati pumbon pel tupa men doptuopda, er kemrur lyom opkal juba cap, deiyoteng cap, Efod capda, aopkal yuma kwiripra, er nyapu yo punupkameng neng karepmempa, er nyapudi aopkalpu kemengedi, kenekra kunkamenge. Ukuramenganen, erdi deiprepa, dadeipdana bankameng neng yumada, aopkalpu kenekra kupbankamenge. Ada, ‘Anengda, Allah er ati pumbon pel talepra, gonga kepmengedi, pel dopkameng’ tenen, erepra derinkamrum taru yuma, aopkalpu kenekmengepa, saitun co du me minyak gwepra, sun giso deiki diktaprumudi, aneng wepra ereipkamrume. Angeda pio tep, ukunkamrume. 30Harun er nyapu neitamai dinin, er nai bo Harun tep, yo punupkamre ngebodi, ne si eremna ati bo neitamai wekredi, apel talepra pel donkamrure. Tonda, Harun er yo punupkamre ngeboda, ne si eremna tep, sun nimi cap, ne cap, antamdina tep tenda ati neitamai dinin, telepai er si Telep Lengna Ati, akati neitamaipu wengkamrure. Ukunkamre taruda, ue yoneitam bari (7) tumi neitamai yumada, aopkalpu kemkamrure.

31‘Harun cap, er nyapu cap, sun yuma ne Allah si eremna atipu, tek sisi pel donkameng’ tenen, wepra deipmum tumida, konum peipmakentopu, jem domba bisampu ponkamrume. Apopmamum domba bisam er tuda, pio mali kunange yumada, dubana meme. Pio telepngepu dopra keteneipmamumngepu, dubemumdi, abisam tu yumada, dankamrume. ‘Acada, mali keca pio gumai, telepai kunkamre’ tenen, konum keteneipmamumaipu, adomba tu dapra ketenepra deipkurume. 32Ajem domba bisam tu pio telepai dapmamum ngeda, ne Allah cap, nimi cap, antamdana tenda ati neitamai wengbana tep, akati bisi buplan damai dubengepa, Harun cap, er nyapu cap, sunpu jenkamnunge. Tonda, ataruda, nena gum roti kwaneng dapra, kin keca er sida keranjang, ange pumbon kipra deipmangepa, tupa akapkamrenge cap, dopra jenkamnunge. 33Sun adipapu, ne ati pumbon neitamai pel dona tep, wepra deipkamrum neng, sun imam-imam nengpu, adomba bisam galemna dapmamumnge cap, keranjang pumbon dongopmamum roti kwaneng cap, jenkamnunge. Yuk neng ton akeca men jeptenge. Akeca yumada, ‘Nun nai bo Allah Yahwehdi, nun mali keca yuma kaukepra daepseredi, lyemdonkamsere’ tenen, ne Allah tep konum karepmamume. Ada, ‘Harun cap, er nyapu capdi, Allah er si eremna ati pumbon pel talepra donkameng’ tenen, sun wepra derin tumi tep, ‘Atumi cap, apel cap, telep kupkamre’ tenen, konum karepmanerume. Tonda, Harun cap, er nyapu cap, ‘Allah er pelpu pio donkameng’ tenen, aneng wepra deipmamum taru, karepmanerum jem domba bisam galemna cap, tu cap, roti kwaneng capda, anengpu jenkamnunge. Sun imam pel talepra donkameng nengpu, jena telepe. Dinin, yuk nengda, pio gume. Deiyoda, ajen keca yumada, ne mawangepu kurura tep, yuk tali nengdi ange jenada, pio meme pepsene.

34Tonda, ajem domba bisam galemna cap, nena gum roti kwaneng cap, sun imam nengdi atumi deiki dipu jenmangyane, men karepmamumnge tupa akapmare ngeda, anengdi ipna taru ton pio men jenkamenge. Akwal tapmamum ngeda, ipna taru yamumdi epmumnyopda, sun adipapu dopra, ukupu dongopmumpa uku di jepra, gawal dangkamrure. Deiyoda, ne Allah tep konum karepmanerumnge cadi, ne mawa pio lek telep keca utopu kupmarura tep, yuk tumi ton sun tamupra yamumdi, men jenkamrume. Ada meme pepsene. Ukupu dongopmumnyopda, uku bo di jepra gawal dangkamrure. 35Nedi, Musa kan tep, ‘Ukupra kunkamrume,’ peipkesitopu, Harun cap, er nyapu yuma cap, ‘Allah er si eremna ati pumbon pel donkameng’ tenen, wepra derinkamrum taruda, tenpu tumi di dipra, ue yoneitam bari (7) tumi neitamai yumada, nedi ‘Apel donkamrume,’ peipkesitopu, adipapu, apelpu pio donkamrume.

36Ayoneitam bari (7) tumi neitamai yumada, sun imam neng cap, Israel nesala yuma, ‘Sun mali kunung keca, Allahdi kaukepra daepseredi, lyemdonkamser’ tenen, tumi-tumi yuma, jem sapi bisam tenpu popra, ne Allah damai kareryakankamnerume. Akeca karenerumnya deiki di, sun mali kun keca yuma kaukepnedi gum kupra derinkamne. Aponkamrum jem sapi bisam cap, yapi likra derinkamrumnge cap, ne Allah karena tep, gel pala taplakra yakra keteneiprumaipu, ada uku sengkamrumai, er si mesba, telep kudinkamrume. Ada, asapi bisam er tu cap, yapi capda, doropmumdi, uku dongonkamrume. Ada, Allah er karena tep, gel taplakra yakra keteneipmumai mesbada, ‘Telep kemdina tep kunmape,’ tenenkamrume. Tonda, saitun co du me minyak mokon telel kuramre ngedi, gel pala taplakra yakra keteneiprumaipu, amesba deiki diktapkamrume. Ukupmum dingeda, ‘Agel deipmupkai, amesbada, Allah erngepu kurure’ tenenkamrume. Ukupmum dingeda, ne si eremna tep, gel yakra keteneipmarumaida, telep kudinkamrume. Adeiki di, ne kange pio telep kunkamnere.

37Apepmasen ngeda, tenpu tumi di gonga kepra, kupbanmamumyane, yoneitam tumi (7) konum kupre pangeda, apel gawal dangkamrume. Ukupmum pangeda, ne si eremna tep, doupra kareryakan keca derinaida, agel taplakra yakra keteneiprumaida, mali keca pio men kuredi, ‘Pio telep kupra lengnaipu kunkamre,’ tenenkamrume. Ukupkamrumnya deiki di, ne karena keca derinaida, pio telep lengnai utopu kunkamre. Tonda, aderinaida, pio telep kunkamra cadi, ware neng do yuma, ne si eremna tep, agel taplakra yakra deiprumai, amesba yana talepkamre ngebo peda, amesba talepkamra deiki di, angebo telep kudinkamre. Pio telep ngebopu kunkamre. Ange utopu, agel taplakra yakra deipmamumai, konum telep kunkamra cadi, ware keca do yuma, amesba deiki derinkamnerum keca yuma peda, amesba bol bepkamra cadi, akeca peda, teleppu kunkamre. Ada, yuk tali keca, apio telep mesba bol bepyopda, adeiki di teleppu kunkamre. Amesbada, pio lengnai kurura tep pepne.

Tumi-tumi yuma ipna taru cap, idona taru cap yumada, yapi keca popra kareryakana tep, pepu upu

38Tonda, aketeng tamun, aketeng tamun neitamai yuma, tenpu tumida, ne karena tep, gam keca popra, gel pala taplakra, yakra keteneiprum keca, amesba deiki, uku dongonkamruma tep, domba bisam mi butene, keteng tamun tenpungepu konum kupyopda, ne gispal dona tep, uku dongoryakankamrume. 39Ada, domba bisam tenpu, popkumumnyopda, bokra tenpu ngeda, ipna taru popmumdi, karenkamnerume. Ton tenpu ngeda, sintara taru keteng orwengbenkure taruda, ne karena tep, tenpu bisam mi ton popra karepnemumdi, uku dongopmumyopda, ne si eremkamnerume. 40Tenpu domba bisam mida, ipna taru popmumdi, ne si eremna tep, gel pala taplakra yakeiprumdi, keteneiprumaipu, yana uku dongonkamrume. Atarupu, akeca cap tapakra karenkamnerume. Ada, roti kwaneng dana tep deiyo keca, er sida tepung terigu, pio telepnge nukra, er ikineda 1 kilogram cap, tonda, saitun co du me minyak mokon pio telepnge, satu liter cap, tapakmumdi akecada karepkamnerume. Tonda atarupu, anggur tapu du mokon nukramumdi, anggur me mokon satu liter cap, doupra yamumdi, ne karena tep uku dongonkamrume.

41Ange utopu, ne si eremna tep, domba bisam mi butene ngeda, sintara ponkamrume. Ada, ipna taru kupmamumnya utopu kupra, apelpu donkamrume. Ada, roti kwaneng dana tep, tapakra darameng keca, er si tepung terigu, pio telepnge, er ikinda nukra, 2 liter cap, tonda saitun co du me minyak mokon pio telepnge, satu liter cap tapakmumdi, akecada karepkamnerume. Tonda atarupu, anggur tapu du me mokon nukra, satu liter cap, doupra yamumdi, ne karena tep, uku dongonkamrume. Ange yumada, ipna taru kupmamumnya utopu, sintara peda, apelpu dopmumdi, ne karena tep angepu kunkamrume. Ukupmum pangeda, uku jeredi, siltong telepnge, ne Allah Yahweh damai weleryarepa, gekepnyopda, ne kange pio telep kunkamnere. 42‘Akeca yuma popra ne karena tep, uku dongonkamnerume,’ peipmasen ngeda, sun imam deiyo nengdi, pio kunkamrume. Ada, sundi deipmumpa, dadeipdanen bankameng imam yala neng yuma, apel utopu dopra kungedi, ne Allah Yahweh tep, kareryakankamnenge. Akunkamengenge yumada, ne si eremna tep, ne Allah cap, sun nimi cap, antamdana tep tenda ati buplan damaipu, yamumdi apel donkamrume. Tonda, acapu ne Allah Yahweh cap, ne si eremna tep tenda ati pumbon pel dona deiyo neng, sun Imam neng cap, antapmepedi, upu talenkamepe.

43Apepmasenaipu ne cap, ne nyapu sisa Israel yala nesala yuma cap, akati damaipu antamkamepe. Atep aceida, ne Allah Yahweh, ne ila dirin deiki di, akati pio telep lengnapu kunkamre. Atep, mali keca tenpu peda, akati pumbon pio men kupkamre. 44Ne si eremna tep, tonda nimi cap, ne Allah cap antamdana tep, lyom kain bol di dopkamrum tenda ati cap, tonda, ne si eremna tep, gel pala taplakra yakra deiprumdi, yapi keca popra, uku dongonkamrumai cap, Harun cap, er nyapu cap tep, ange yumada, ne dipapu telep kudinkamne. Ada, ‘Ne pio mambul pelpu talepra donkameng imam nengdi, akati pumbon imam pel donkamenge.

Tonda, yapi keca popmengopda, amesba gel deiki di, uku dongongedi, karenkamneng’ tenen, ne dipapu aneng cap, akeca yuma cap tep, pio teleppu kudinkamne. Atep, nedi ‘Harun cap er nyapu yuma cap tep, telep kudinkamne. Yuk neng ton wepra men deipkamne. Sun aLewi yala neng dipapu, ne si eremna ati pumbon pel talepmengedi, imam neng kunkamenge.

45Ukupra kunedi, neda, ne nyapu sisa Israel nesala, sun kunga kan-kanpu kunkamne. Ne cap, sun cap, kikiman kunkamepe. Neda ukupra kunedi, sun nai bo sisa, Allah Yahweh kunepa, sunda ne nyapu sisa kunkamenge. 46Ukupra kunepa, sun Israel nesaladi ne tep, ‘Tek sisi, nun nai bo Allah Yahwehda, er tenpu kurure’ tenen, kael kemkamnenge. Tonda, ‘Allah Yahweh er dipapu, nun Mesir mutu neitamai kuramepupa, ikin pel dimamseipa, ila kange mun kange doupra kuramepupane, er ila puto deiki di doupra yanamseue’ tenen, kael kemkamenge. Mesir mutu neitamai di duyanamsa deiyoda, tali tep gume. Ada, ‘Neda, sun deiyo ngebo Allah Yahweh, sun kankan neitamai kunepa, sunda ne nyapu sisa kunkamenge. Neda, sun nai bo Allah Yahweh kunkamne,’ teneamsa tep, Mesir mutu neitamai di, Israel nesala lyepra duyanamsi. Neda, tek sisi sun nai bo Allah Yahweh kunune. Sunda, ne nyapu sisa kunkamenge.

Allah Yahwehdi Musa tep upepra deipupa, Musadi sun Israel nesala tep, lap peipu.