Exo 3 | XteSC | STEP | Musada er yamal bo sida, Yitero kuramu. Yiteroda, Midian mutu nesala tep, Allah karena deiyo ngebo kuramu. Ataruda, Musa er yamal bo makuna tep, Yitero er domba bisam Midian mutu neitamai peiramu. Utopu gopra, amutu nesala men kurami mutu ortara bena, mutu si Horeb mutu yana domba bisam peirbeu. Amutuda, Allahdi upu peamseu mutu dam perami. Aca bena domba bisam peiramu.

Exodus 3

Allahdi Musa wepra deiamu upu

1 Musada er yamal bo sida, Yitero kuramu. Yiteroda, Midian mutu nesala tep, Allah karena deiyo ngebo kuramu. Ataruda, Musa er yamal bo makuna tep, Yitero er domba bisam Midian mutu neitamai peiramu. Utopu gopra, amutu nesala men kurami mutu ortara bena, mutu si Horeb mutu yana domba bisam peirbeu. Amutuda, Allahdi upu peamseu mutu dam perami. Aca bena domba bisam peiramu. 2 Ukupra Allah, er sida Yahweh, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Tonda lap pena upu nomor 49 dirume.} er im deiki pel dona deiyo ngebo, malaikat amutu dam yana tekmaupa, co mutmuta uku bu jento kunmaupa, angebo co mutmuta neitamai, uku bu jenmaua kan-kan tekmaupa, Musadi epu. Musa epu dinin, uku bu epu dinin, uku bu di aco mutmuta men jepropu. 3 Musadi, ‘Uo akupmare ngeda kange mune. Uku jenmar dinin, ware keca deiyo tep, co mutmutada men jenmara tep, damai benedi dipetepkune,’ tenepu.

4 Utenepra bena dirbeu. Bena dirbeupa, Allah er si Yahwehdi epudi kael kepka tep, co mutmuta neitamai di Musa tep upepu. “Musa, Musao,” pepra, Allah er si Yahwehdi upupupa, Musadi, “Ne adano,” pepu. 5 Upepupa Allahdi Musa tep, “Acapu teko. Damai ton men yatume. Kanda, ne damai men yanapmem taruda, kan yan bol deiki getepmarum ngeda, sandal kwiriptaprume. Deiyoda, kan tekmaremai, ne kunmanaida, ila mambulai, pio lengnai tep, acada tali lupra men yatume,” pepu.

6 Upepu dingeda, Allahdi Musa tep aupu ton pepu. “Neda kan co puna neng Abraham cap, Isak cap, Yakub cap tep, sun melipra peipyakaramsi ngeboda, ne pua.” Upepupa Musadi, ‘Uo’ tenen, er urasin lelipdongopu. Ukupka deiyoda, ‘Gume Allahda, ne kware. Allah kururai men eptene’ tenen, er urasin lelipdongopu. Er kware weik tepa.

7 Ataruda, Allah er si Yahwehdi Musa tep upepu. “Ne nyapu Israel nesalada, Mesir mutu neitamai ikin weik kunmangada, ne dinedi kael kemnune. Ada, Mesir nengdi ikin pel dimengepa, kange mun pel donge ngeda, konum dinune. Israel nesala engenge ngeda, ne kaele. Tonda ikin kunmanga tep, ne mambul kange dounune.

8 Ange tep nengeda, Mesir mutu nengdi talengepa, sun ikin kure ngeda lyepra dopropnedi, amutu neitamai di lyepra dopropkamsene. Ukupnedi dopra, dubena pio telep kupredi, go weik kwamu mutu, sun tep karepkamsene. Amutu tep, “Uo amutu neitamaida, susu cap, mong me cap ^{▼▼Susu cap, mong me cap weika di akurure, pepu ngeda, domon upu di pepu. Deiyoda, ‘Akeca-keca yuma, telep keca yala-yala yuma weik akurure’ tenen, pepu.} weika di pio akurure,” penunge. Upenunga deiyoda, ake. Ada, akeca-keca yuma, telep keca yuma amutu neitamai weik kurura cadi, upenunge. Amutu kunge neng sun sida ake. Kanaan neng cap, Het neng cap, Amori neng cap, Feris neng cap, Hewi neng cap, Yebus neng cap, anesala-anesala yuma, amutu neitamai kununge. Sun mutuda, pio telep cadi, amutupu karepkamsene.

9 Uda, ataruda, ne nyapu Israel nesaladi, “Uo, ikin pel donupe,” pepra engenungada, konum gekenune. Tonda, sun Mesir mutu nengdi, Israel nesala pio ikin keca weik, sun nong deiki derinungada, ange ton tupa dinune. 10 Ukunga tep nengeda, nedi dokotepkenepa, Musa kandi Mesir mutu nesala, sun ila nimi deiyo ngebo, Firaun, er damai bememdi, ‘Allah er nyapu, Israel nesala doupra, yuk mutu dubenkamne,’ pepkurume.” Allahdi, Musa tep pepu.

11 Upepupa, Musadi tamupra Allah tep upepu. “Uo, neda ware utopu ngebodi peptenepa, Mesir neng sun deiyo ngebo gekepnetudi taptupa, Israel nesala yuma doupra betene do? Neda tali ngebo pua,” pepu. 12 Upepupa, Allahdi, “Gume, ne cap pio kikiman kunkamneme, pio men tapkamkene. Kanda, ‘E tek sisi, Allah er dipu dokotepneue,’ tenepra, ‘Kael kepkamrem’ tenen, mambul peten kemna keca tenpu karepkamkene. Nedi kan melipkenepa, Mesir mutu neitamai di, Israel nesala yuma doupra konum duberumnyopda, ataruda, Horeb mutu, tonda amutu si Sinai mutu deiki, ne sipu erepkamrume,” pepu.

13 Upepupa, Musadi Allah tep tamupra pepu. “Naio, nedi Israel nesala damai benedi, ‘Uda, sun co puna neng meliamu Allahdi, sun makuna tep, ne ton dopra sun damai dokotepneue,’ pepkamne. Upepnepane, sun dingeda, ‘Uda, atep nengeda, Allah er sida ware ngebo do?’ pepra, ne tep asipetepnengopda, ware upu peptene do?” Musadi pepu.

14 Upepupa, Allahdi, “Neda akunune, tonda pio kunkamne. Atep, ne sida Yahweh. ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ‘YHWH’ sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} Asi deiyoda, Ne akunune. Ne kunkamne ngeda, pio kunkamne. Neda Allah pua. Atep nengeda, kandi Israel nesala tep, upepkamrume. ‘Gume, Allah er sida, Yahweh, ‘Ne akunune,’ perur Allahdi dokotepneua deiki di, sun damai yane.’ Upepkamrume.” Allahdi Musa tep pepu.

15 Upepu dingeda, aupu ton cap pepu. Musa, kanda Israel neng damai bememnyopda, upepkamrume. “Nun nai Allah er sida, Yahwehdi, ne dokotepneupa, sun damai yane. Nun co puna neng Abraham cap, Isak cap, Yakub cap, kalekra meliamupa, er si eremami Allahda, ne damai yaudi upepneu. ‘Israel nesala damai berume,’ pepra deipneu.”

Allahdi upepu dingeda, aupu ton pepu. “Gume, ne si Yahweh pepmakenada, ada ne si pua. Ne tep nengeda, asipu tenepra penkamnerume, yuk si ton gume. Atep, dadeipdanen bankamrum taru yumada, asipu tenepra erepbankamenge.” Allahdi Musa tep pepu.

16 Upepu dingeda, aupu ton pepu. “Uda, bememdi Israel wisi deiyo neng yuma bupra deipmemdi upepkurume. Nun co puna neng Abraham cap, Isak cap, Yakub cap, kalekra meliamupa, er si eremami Allah er si Yahwehdi, ne damai yaudi upepneu. Uda, sun Mesir mutu nesaladi, ikin keca weik sun nong deiki deriramipa, mambul kange douamrum ngeda, ne tupa dinuna cadi, ne kaele.

17 Tonda, ne upu konum pepra deipsene. Sun kange mun tenerum ngeda lyepropkamne. Lyepsenedi, telep mutu karepkamsene. Amutu tep, ‘Uo amutu neitamaida, susu cap, mong me cap weike pio akurure,’ penunge. Ada, akeca-keca yuma, telep keca yala-yala yuma amutu neitamai weik kurura cadi, mun penunga tepa. Amutu kunge neng, sun si, Kanaan neng cap, Het neng cap, Amori neng cap, Feris neng cap, Hewi neng cap, Yebus neng cap, anesala-anesala yuma kunge mutu karepkamsene. Sun mutuda pio telep cadi, amutupu karepkamsene.” Allahdi pepu. Tonda, upepu.

18 “Upu pepmempa, sun Israel wisi-wisi neng, upu bongdina deiyo nengda gekepkamkenge. Gekepmengopda, Israel wisi neng cap, kan cap tonpa, Mesir neng sun deiyo ngebo damai bena upepkurume. ‘Allah er si Yahweh, Ibrani neng nun Nai Allah yana pepmasera tep, nun moropkepe. Ada, kandi nun tep tapsemempa, nun nai bo Allah er gudina tep, komuni weneri deiki di, bisi mapbepedi, nimi gumai neitamai bena, Allah er si eremna tep, gam keca popra karenkamepe.’ Upepkamrume,” Allahdi Musa tep pepu. Aupu ton pepu.

19 Allahdi pepu. “Ne kaele, Mesir mutu deiyo ngeboda adipapu, ‘Jo, dabenkurume,’ pepra men pepkamasere. Gume, ne ila puto deiki ila ikin keca, er nong deiki men deipnyopda, er gekepredi men tapkamsere. 20 Ange tep nengeda, ne ila puto deiki di wenemna cap, nimi men kupmanto keca cap, sun mutu neitamai pel dopkamne deiki di, Mesir mutu nesala wenepra popkamne. Ange yuma konum kupnyopda, ataru dipapu tapserepa benkamrume.” Allahdi pepu.

21 Upepu dingeda, aupu ton cap pepu. “Nedi sun dipru neitamai pel dopnepa, Mesir mutu neng, sun Israel nesala yuma tep, sun kange deipra kunkamenge. Ukupne deiki di, sun tapsengepa benkamrum taruda, tali men benkamrume. Doun keca peda talepra dubenkamrume.

22 Tonda, ukunkamrume. Israel nerapu yumadi, sun damai kunge Mesir nerapu tep, ‘Ka nero, opkal cap, kunumna weik keca perak cap, emas cap, yala-yala yuma karepkamnerume,’ pepra moropkamenge. Tonda ange utopu, akati-akati kunge Mesir nerapu yuma tep, ange utopu moropkamenge. Moropmengepa, akeca-keca yuma konum karepsengopda, sun nyapu cap, sun ner nyapu cap tep karenkamrume. Kareprumpa, sun kenekamenge.

Ukupkamruma deiki di, sun Mesir mutu nesala talenge keca yuma tep, dalupra dubenkamrume. Akeca yuma, sun pe keca kupkamre. Bunga weik talepra isomka nesala kunkamruma tepa.” Allahdi Musa tep pepu.