Exo 30 | XteSC | STEP | Allahdi, Musa tep pepu. Ne Allah si karena tep, siltong telep keca, uku dongonai er sida mesba , gat co er sida, Akasia co di, betaipkurume.

Exodus 30

Siltong telep keca uku dongonai, er si mesba tep, pepu upu

1 Allahdi, Musa tep pepu.

Ne Allah si karena tep, siltong telep keca, uku dongonai er sida mesba ^{▼▼mesba – Allah er si eremna ati damaida, mesba butene doami. Tenpu ngeda, akati dam dinin, bura tara di pala gel yakra deiamidi, ange deiki gat keca, er si perunggu di, segi empat keca ton keteneipidi, amesba deiki di, ‘Nun mali kunup kecada, Allahdi gum kupra deipkamser’ tenen, gam keca popra, uku dongorami. Dinino, atenda ati pumbon neitamaida, metek mesba ton dopi. Angeda, ‘Nun nai Allah tep, moropmepepa, nun moronkamnup keca gekenkamser’ tenen, ametek mesba deiki di, siltong telep keca dongoramidi, uku sengami.}, gat co er sida, Akasia co di, betaipkurume. 2 Asiltong telep keca, uku dongonaida, er lyomadi, kumun dana-dana ketenepra betaipkurume. Tonda, akeca er lyom cap, er pala capda, kunupra kikiman utopu, 45 sentimeter kunupra keteneipkurume. Utopu tonda, adinin tengdin co, er tinggi lyomda, 90 sentimeter kunupra ketenepkurume. Ukupmumdi, siltong telep keca, uku dongonaida, kumun sirik dumbari (segi empat) keteneipmamumnyai yumada, sapi bisam giso takke beleramra utopu keca, betaprum ngeda, bena tapakra deipmumpa, atakke cap, mesba nong cap tenpu kepkamrure. 3 Abetaipmamumnge, itara kumun dumbari sirik tara yumada, sapi bisam giso takke utopu kupra, betaipmarumdi, tapakra tenpu keipkurume. Ukupmumdi, er akeca yuma deikida, urasin telep gat keca, emas pio telepnge dipapu, palepra deipkurume. Tonda, akeca sirik-sirik yumada, kunumna weik keca emas di, ‘Urasin telep kupkamre’ tenen, er si bingkai di betaipmemdi, gwatepra ongopdongopkurume.

4 Siltong telep keca uku dongonai, er si mesba tep, betamrumnge, parep tara dana-dana di, pela lyom co dongona tep, cincin utopu kupra, talen keca bukep butene utopu kupra, betaipmumdi keteneipkurume. Acincinda, ada mesba doupra dubana tep kupkamrume. Tonda, pela lyom co dongona tep, acincin utopu kecada, urasin telep keca, er si bingkai gwatepra ongopdongopmamumnyai, amutara deipkurume. 5 Talepnedi asiltong keca uku dongonai, doupra embana tep, gat co er si akasia dipapu dopkamnunge. Ukupmenge dingeda, aco deikida, kunumna weik telep keca, emas di palepra deipkurume. 6 Asiltong telep keca uku dongonai tep, keteneamum ngeda, Allahdi Musa tep, “Angeda ukunkamrume, angeda pio men kunkamrume,” pepra, pedina upu peipupa, co bekin, er si Peti Perjanjian ^{▼▼Peti Perjanjian – Peti Perjanjian kael kemna tep, Keluaran 25:11 dinkurume.} pumbon di kipra deiprum ati bo, Pio Telep Lengna Ati pumbon bena deipkurume. Akati wilipra lelimna tep, lyom kain kapkotemumnyai dinin, ati bo tara bena deipkurume. Tonda, aco bekin ^{▼▼co bekin – Aco bekin seki ngeda, ada Peti Perjanjian tep seki. Aco bekin pumbonda, Allahdi, “Angeda kunkamrume, angeda pio men kunkamrume,” pepra, pala gel deiki sekra deiamu mem upu dopra abekin pumbon dongopi. APeti Perjanjian co bekinda, Allah er si eremna tenda ati, Pio Telep Lengna Ati pumbon deiami.} pumbon, Peti Perjanjian er buplan deikida, yapi keca popmengedi, yapi burupra lingdinkamengai, akeca urasin tara, siltong telep keca uku dongonai betapmamumnge doupra, acapu bena deipkurume. Ukupmempa, akati pumbon acapu, ne cap, imam deiyo ngebo cap antamkamneme.

7 Tumi-tumi yuma, Harun ipna taru di, lampu weica ketenemdina tep yakankamre taruda, Harun er adipapu siltong telep keca uku dongona danai yaredi, uku dongonkamre. 8 Ipna taru kupmarya utopu, sintara peda utopu, lampu weica lana tep yakankamre taru yumada, asiltong telep keca dana damai yaredi, uku dongonkamre. Angeda ataru di dipra, doryankamre taru yumada, Allah Yahweh er damaida, apel yuma utopu donkamrure. 9 Siltong telep keca uku dongonai deikida, siltong telep kecapu uku dongonkamrure. Ware yuk keca do yuma, akeca deiki ton, pio men derinkamrure. Ada, yuk yala yapi keca do, roti kwaneng dana deiyo keca, terigu do, asiltong keca uku dongonai deiki, pio men derinkamrure. Tonda, ange utopu, ne Allah karena tep, anggur me peda amesba deikida, pio men dingdiryakankamrure. Amesba deikida, siltong telep kecapu, uku dongoryakankamrure.

10 Dinino, tenpu keteng tamun neitamai, ue tenpu tumi ton, Harundi, yapi keca popredi, yapi burupra, asiltong keca uku dongonai, amesba er dana-dana tara takke keca kupmarai deike, yapi likeipkamrure. Ada tali gam keca ponange gum dinin, ayapida sun Israel nesala tep, ‘Nun mali kunup keca kaukepseredi, daepkamsere’ tenen, gam keca popra yankamre taru, ue tenpu taruda, ayapi dopra, sapi bisam giso takke utopu keca betapra deiamengai deiki, bena likra derinkamrure. Apel donkamre ngeda, aketeng tamun, aketeng tamun yuma dinin, ue tenpu tumi di, apelpu donkamrure. Tonda, apel donkamenge ngeda, ataru di dipra, doryankamre taru peda, tupa donkamenge. Ukupra dongepa, akeca cap, apel dona capda, pio teleppu kunkamrure. Ukupmenge pangeda, ne Allah Yahwehdi, ‘Ange yumada, pio teleppu kurure. Mali ngeda, pio men kwapmare,’ tenepnedi, kange derinkamsene. Allahdi Musa tep pepu.

Allah Yahweh er si eremna ati pel melimna tep, co bo karenkamenge nge tep, pepu upu

11 Allah er si Yahwehdi, Musa tep aupu pepu.

12 ‘Israel yala nesalada, ware kupra kunung do?’ tenen, sun yuma nukmemdi, sun si sengna pel dopkumum taru yumada, Israel nesala yuma, nimi pe, nerapu peda, sun pedi, ‘Nun nong depnup’ tenen, sun yo pununa tep, kunumna co bo ton, ne Allah Yahweh tep karenkamnenunge. Ukuprumya deiki di, sun nong yuma nukmemdi, sun si sengkamrum taruda, ila kange mun pu, sun nong deiki ton pio men derinkamsene. 13 Israel nesala nukmemdi, sun si sengkamrum taruda, ware nimi do yuma, konum nukmengedi, sun si doropmenge nengda, sun aneng adipu ange kunumna tep, gel uang er si syikal karenkamnunge. Ne si eremna ati neitamai karena tep, ‘Agel uang er ikinda, 20 gerah nukra karenkamnenunge,’ pepra, konum lap peipsipa kununga utopu kupra, agel uang syikal neitamaingepu (setengah syikal) karenkamnunge. Ange karenkamnenge gel uangda, ne Allah Yahweh, nenge sisa tep, akeca bulupra derinkamnenge. 14 Israel nesala, sun si sengna pel donkamrum taru di, konum nukameng nengda, keteng tamun dua puluh tahun itara nengpu nukamnunge. Ukupra nukamenge nengda, sunda tamna gum dipapu, co bo gel uang er si sikal bulupra, neda Allah Yahweh, ne si eremna ati derinange tep, ketenepra kareryakankamnenunge.

15 Tonda, sun isomka nengda, gel uang co bo pio weika di men karenkamenge. Utopu, sun kankan nesala peda, sun nong tep kunumna karenkameng taruda, yambulanun karena gume. Sun isomka neng pe, kankan nesala peda utotopu, gel uang er si syikal neitamai ngepu bulupra, ne tep karenkamnunge. Ada, “Allah Yahwehdi, ‘Nun mali kunup keca tep, wenepra popserur’ tenen, sun yo pununa tep, agel uang karenkamnenunge,” pepne. 16 Israel yala nesala yumadi, bulupra deipmenge gel uang yumada, ne si eremna tep, nimi cap, ne cap, antamdana tep tenda ati pumbon duyamumdi, ne ati neitamai kun keca cap, akati pel dona cap tepapu, agel uang doronkamrume. Ange yumada, sun pe nong kunumnange tepapu kunkamenge. Ukupmengedi, ne Allah Yahweh tep karepnengopda, adeiki nedi sun Israel nesala yumadi mali kunge keca yuma gum kupra deipkamne. Atep, sun anesala wenepra men popkamsene. Pio tupa tenesenedi melimkamsene. Allahdi Musa tep pepu.

“Buru me kunange tep, me derina tep keca, perunggu pio telepnge di, ketenepra deipkamrume,” pepu upu

17 Allah er si Yahwehdi, Musa tep aupu pepu.

18 Me derina tep keca tenpu ton, telep gat keca perunggu deiki di betaipkurume. Ukupmumnyopda, er deiki paledinange peda, perunggu dipapu, palepra deipmumdi betaipkurume. Konum betapmengopda, akeca dopra, Allah er si eremna tep, nimi cap, er cap antamdana tep tenda ati ortara, yapi keca popra uku dongona tep, gel yakra taplakra deipmamumai atara kuprepa, daneitamai bena, ame mau derin keca, acapu deipkamrume. Ame mau cap, er derina cap, konum ketenepra deipmemnyopda, me gwepra amau pumbon dingdongonkamrume. 19 Adingdongonkamrum meda, Harun cap, Harun er nyapu yuma cap, sun dipapu ame dopropmengedi, sun buru cap, sun yan cap, telep kupra me kunkamenge. 20 Allah ne si eremna tep, nimi cap, ne cap antamdana tep tenda ati wengbenkunge taru pe, tonda, ‘Allah karena tep, yapi keca uku dongopkup’ tenen, yapi keca popra, ne Allah Yahweh karena keca, uku dongona tep, ketenepra deipyai damai dubenkunge taru peda, Harun cap, er nyapu capdi, sun yane cap, buru capda, adipapu me kunkamnunge. 21 Sun anengdi, ange kupmengopda, nedi sun tep wenepra popnepa, men depkamenge. ‘Angeda ukunkamrume,’ pepra deipmaken upuda, Harun cap, erdi deipu nyapudi deipmengepa, dadeipdanen bankameng neng yuma peda, angepu moupra talepmengedi, pio tep kupbankamenge. Angeda men tamkamenge. Tapmengopda, nedi wenepra popnepa, sun depkameng ja. Allahdi Musa tep pepu.

Akecada, telep kudina tep, telep minyak me deiki di lingna tep, pepu upu

22 Allah er si Yahwehdi, Musa tep pepu.

23 Ukutaruda, nintong pio telep keca yala-yala yumada, tenpunge er si mur me mokon, er ikinda, 6 kilo cap, tonda nintong pio telep perur co, er sida kayu manis 3 kilo cap, tonda gwei nintong telep peramrenge, 3 kilo cap, tonda co si teja co, 6 kilo cap dopra keteneipkurume. 24 Ukupmum dingeda, akeca yumada, ne si eremna tep, keana dodin ati pumbon karena tep, ‘Kunumna gel uang er si syikal, ukupra ikin nukamrume,’ pepra lap pepsitopu, atelep keca kunupkamrume. Tonda saitun co du taikmengepa, er minyak me mokon, empat liter ton tapakurume. 25 Anintong telep keca yuma konum bulupra keteneipmemnyopda, siltong telep keca ketenemna ila kael neng tep karepmempa, akeca yuma tapakrapmengedi, lingdin minyak me mokon, pio telepnge ketenepkamenge. Ukupmengopda, akecada, nimi wepra deipnedi, petenkemna tep pel donkamrume. Alingdinkameng minyak meda, ada nintong telep peramrenge betapmumdi, ketenepra deipkurume. Aminyak meda, ne Allah nengepu kupkamnerura cadi, nedi akeca pio telep kudinkamne. Aminyak meda, ‘Anengdi ila mambul pel donkameng’ tenen, nimi erepra derin tumida, aneng sun giso deiki lingdikamrume. Ange utopu, ware pel don keca do yuma, ‘Angeda, Allah erngepu kunkamrure’ tenen, aminyak me mokon dopra, akeca deikida, likeipkamrume.

26 Asiltong telep minyak me konum moupra deipmamum ngeda, sundi akeca dopra, ‘Akecada, Allah erngepu kunkamre’ tenen, ne si eremna tep, nimi cap, ne cap, antamdana tep ati, lyom opkal bol di domum tenda ati deiki likra deipkurume. Ange utopu, ne Allahdi Musa tep, ‘Sun Israel nesalada, angeda kunkamenge, angeda pio men kunkamenge,’ pepra deipsi pedina upu dopra, Peti Perjanjian co peti pumbon dongopmum keca, Pio Telep Lengna Ati neitamai deipmum ngeda, aco bekin Peti Perjanjian ^{▼▼Peti Perjanjian – Peti Perjanjian kael kemna tep, Keluaran 25:11 dinkurume.} deiki, aminyak me likra deipkurume. 27 Tonda, Telep Lengna Ati neitamai deipmamum meja co cap, ameja deiki deiprum keca yuma cap, tonda lampu weica deiyo cap, aweica deiyo deiki kapunge yuma cap, er pel don keca cap, tonda akati pumbon siltong telep keca uku dongonai meteknge, er si mesba cap, aketeneipmarumnge deiki yuma, aminyak me likra deipkurume. 28 Ange utopu, ‘Allahdi nun mali kunup keca kaukepseredi, gum kupra deipkamser’ tenen, yapi keca popnedi, uku dongonai, er si mesba cap, akeca deiki derin keca cap, akeca pel don keca yala-yala yuma capda, aminyak me likra deipkurume. Tonda, sun imam nengdi, sun buru cap, yan cap me kuna tep, me gwepra derina tep keteneiprumai cap, er talena tep ketenepra deipmum keca cap yumada, asiltong telep minyak me di likra deipkurume. Ukupkamruma deiki di, ‘Akeca yumada, Allah ernge sisapu kunkamrure’ tenen, apel dopkamrume.

29 ‘Akeca yumada, Allah ernge sisa kunkamrure’ tenen, apel doprum keca yumada, nenge tepapu ketenepra deipkamnerume. Ukupmumnyopda, nedi akeca yuma telep kupra deipnepa, pio telep lengnapu kunkamre. Atep nengeda, ware keca do yuma, akeca er si mesba damai kapkamre ngeda, telep lekpu kupkamrure. Ada ne Allahda, ne mawa keca, pio lengnange damai kurura cadi, akeca peda, nedi pio telep kudinkamna tep, pepne. 30 Tonda, Harun cap, er nyapu yuma cap, ‘Allah er ati pumbon neitamai pel talepra donkamenga tep, Allah erngepu kunkamenge’ tenen, sun tep wepra deipmemdi, atelep minyak me mokon, sun giso deiki dikra deipmempa, imam yala neng kepmengedi, ne pel pio donkamenge. 31 Tonda, sun Israel yala nesala yuma gekena tep, upenkamrume, ‘Yuk taru yumada, atelep minyak meda, tali kecapu men kurure. Ada, Allah erngepu kurure,’ pepra, katuai dipapu lap penkamrume. Ne Allah tepapu pel donkamnerume. Ada ataru di dipra, dorkunkamre keteng tamun yuma peda, atelep minyak me keteneipkamrum ngeda, nengepu kunkamrura cadi, angeda men tapkamrume.

32 ‘Ukupra ketenepkamrume’ pepkesi ngeda, telep minyak me mokonda, tali-tali neng, sun nong deikida, pio men dingdinkamrume. Tonda, ‘Aminyak me telep kupkamre’ tenen, ‘Akeca yuma bulupra tapakmemdi, telep minyak me ketenepkamrume,’ pepkesi minyakda, yuk minyak me mokon nge cap di, atelepnge neitamaida, pio men tapangkamrume. Ne Allahdi aminyak meda, konum telep keipnepa, pio lengna mepu kurura tep pepkene. Atep sun yumadi, ‘Gume, aminyak me mokonda, Allah er telep lengne kecapu kurure,’ tenenkamrume. 33 Anintong telep minyak me mokon, utopu me ketekepra derinung neng cap, tonda, imam pel talepra dona yala neng gum dinin, yuk tali dakunge neng, sun nong deiki dikra deipmengopda, akupmange nengda, Israel nesala kankan neitamai di dopra, bura tara enepra dokotemkamrume. Angeda pio meme pepsene. Akupmange nengda, ne nyapu sisa utopu pio men kunkamnunge. Tapnedi, wenepra popkamne. Allahdi Musa tep pepu.

Siltong telep keca uku dongonkameng nge tep, pepu upu

34 Allah er si Yahwehdi, aupu pepu dingeda, aupu ton dukdongopra, Musa tep pepu. Ne karena tep, nintong telep-telep peramre keca, ukupra dopra ketenepkamrume. Ada, Damar co, er pe cap, tonda, Lokan co er bol cap, tonda, Rasamala co er pe cap, tonda nintong pio telep peramre keca, er si dupa ton dopra keteneipkurume. Akeca-keca yuma, er ikinda utotopu nukra, ketenepra deipkurume. 35 Anintong pio telepnge yumadi tapakra, uku dongonange tep, siltong telep pena tep keca betaipkurume. Tonda, siltong telep kuna tep keca betapkamengeda, ila kael neng dipapu, akeca ketenepkamenge. Ange konum keteneipmengopda, garam uwa cap tapakamrume. ‘Angeda pio telep, murni kupkamre’ tenen, yuk keca ton pio men tapakamrume. Akeca konum betaipmumpa, nedi telep kupra deipnepa, akeca pio teleppu kunkamre. Ukuprepa sundi, ‘Gume, akecada, pio lengna telep keca kurura cadi, Allah erngepu kunkamrure,’ tenenkamrume.

36 ‘Ukupra keteneipkurume,’ pepkesi siltong telep pen keca yumada, konum tapakra keteneipmumnyopda, ange neitamai di ton wilipra dopropmemdi, taingne keca di taingmamumpane, uku sikke utopu konum telep kupre pangeda, adipapu ne cap, nimi cap antamdana tep opkal bol di dodin tenda ati damai doupra yamumdi, Pio Telep Lengna Ati wekamrume. Akati neitamaida, ne Allahdi Musa tep, ‘Angeda kunkamrume, angeda pio men kunkamrume,’ pepra, pedina upu pepra deipsipa, Musadi aseksi upu kipra deipu bekin co, Peti Perjanjian pumbon kupmaryaida, er urasin tara yana deipkurume. Aceida, ne cap sun imam neng, sun deiyo ngebo cap, antapnemedi, upu sisingkamneme. Asiltong telep kecada, ‘Angeda Allah erngepu kurura cadi, pio telep lengna keca kurure,’ tenenkamrume.

37 Asiltong pio telep keca utopu ngeda, pio men betaipkamrume. Ware neng do yuma, ‘Nun penge ton keteneipmepedi, nun tenepmepetopu uku dongopkamepe,’ pio men tenenkamenge. Angeda pio meme pepsene. Sun Israel yala nesala yumadi, asiltong telep keca tep, ‘Gume, angeda nun nai Allah Yahweh, erngepu kurura cadi, pio telep lek keca kunkamrure,’ tenenkamrume. Nintong telep peramre keca tep, utopu kupra betamnung nengda, ne nyapu sisa utopu pio men kununge. 38 Ware neng do yuma, asiltong pio telep pena tep keca, utopu kupra betamnung nengda, ne nyapu sisa, utopu pio men kunkamenge. Anengda, sun Israel yala nesala kankan neitamai di, enepra dokotepmamumpa, nedi amali kupmenge nengda, wenepra popkamne.