Exodus 31

Allahdi Besaleel cap, Aholia cap wepra deipu upu

1Allah er si Yahwehdi Musa tep pepu. 2“Konum epreme, nedi Yehuda yala ngebo, er si Besaleel konum wepra deipne. Besaleelda, Uri er mi kurure. Urida, er naida, Hur kuramu. Sun yumada, Yehuda yala neng pua,” pepu.

3Upepudi, ange ton pepu. “Besaleelda, ne puto karepnya deiki di, ne Sambala konum karepsipa, er dipru wekroue. Atep, ware keca do yuma, telep kupra kael kepredi, pel yala-yala yuma betapra dopbankamre. 4Yuk taru pel donkamre ngeda, gat keca kunumna weik keca, er sida emas deiki cap, perak deiki cap, tembaga cap dopropredi, pio telep keca petupra donkamre.

5Tonda, ila gel dopropredi betamamyane kamo telep kupyopda, ati dela cap, beilya cap, telep kupra donkamre. Tonda, co deiki di ati pum keca cap, yuk-yuk keca cap, betapredi kamo pio telep keca, yala-yala weike ketenepra deipkamre. 6Angepu gum dinin, er melimna ngebo tep nengeda, nedi Dan yala ngebo, er si Ahisamak, er mi Oholiab wepra deipsi. Ada, er melimna tep ila kael kemna deiyo keca pel donkamenge nge tep karepsi. Ange utopu, sun yuk pel don neng ton, ila kael kemna deiyo keca karepsipa, aneng peda, ne pepkesi keca, ‘Ange donkamrume, ange ton ketenepkamrume,’ pepkesi keca donkamkenge,” Allahdi pepu. 7Aupu pepu dingeda, aupu ton pepu.

Sun donkameng keca yumada, nedi pepkamnetopu gekepmengedi donkamenge. Ada, ne si eremna opkal bol di domum ati cap, akati pumbon deipkamenge Peti Perjanjian cap, ne peipsi upu dopra, bekin pumbon deipkamenge nge cap, abekin deiki buplan betaipkamenge cap, donkamenge. Abekin buplan deikida, Israel nesala sun mali kun keca daemna tep, yapi gege pepnepa, dourbena palepkamrenge tep pepne. Ange-ange yumada, nedi pepkamnetopu donkamenge.

8Tonda, ne si eremna ati pumbon deipkameng co pala meja cap, ameja deiki deipkamenge keca cap, tonda kunumna weik keca, emas di betaipkamenge lampu upna derin keca cap, alampu pel don keca cap, silong telep keca, uku dongopkamenge nge cap, ange yumada, nedi pepnetopu betaipkamenge.

9Tonda, ne Allah karena tep, pala gel taplakra yakeipmengedi, gam keca popnedi, uku dongopkamengai cap, akeca damai pel don keca yala-yala yuma cap, buru me kuna tep yangdin keca cap, ayangdin keca deipkamenge nge cap, betaipkamenge.

10Tonda, Allah ne si eremna ati pumbon, pel dona deiyo ngebo Harun cap, er nyapu cap, akati donkameng taru kenengkameng opkal peda, nedi pepnetopu betaipkamenge. Ne si eremna ati pumbon pel donkameng nengda, Allah cap, nimi cap antamdina deiyo neng kunkamenga cadi, sun pel donkameng taru aopkalpu kenengkamenge.

11Tonda, ne si eremna ati pumbon dinin, pio lek memai pumbon, siltong telep keca, uku dongopkameng nge cap, tonda nimi wepra derina tep, giso deiki dikeipkamenge minyak cap, ange yuma nedi pepnetopu betaipkamenge. Ange tep nengeda, akati keca yala-yala yuma, ne pepnetopu gekepmemdi, lap pepmem pangeda, nedi wepra deipsi pel don neng gekepmengedi, kamo pio telep kupra betaipkamenge. Allahdi Musa tep pepu.

Allah er beipye peingne tumi tep, pepu upu

12Allah er si Yahwehdi Musa tep pepu. 13“Kandi Israel neng tep aupu pepkurume. Ne si eremna tumi, pel dona gum dipapu beipye penkamrum tumida, pio moupra tenenkamrume. Atumi deikida, pel pio men donkamrume. Ukupmumnyopda, atumida peten kemdina keca utopu kunkamsere. Ange tep nengeda, sun cap, sundi deipmumpa dadeipbankamenge nesala cap, ‘E Allah er si Yahwehda, nun mali kun keca daepseredi, dumsisi kemdiserur ngebo kurure,’ tenen, kael kepkamruma tep, amambul tumi deiki di pel pio men donkamrume.” Allahdi pepu.

14Upepu dingeda, aupu ton pepu. “Sun adipapu teneprumdi, atumi deiki di bepe peikra, ne si eremkamrume. Ada tali tep gum dinin, sundi, ‘Atumida ila telep mengne tumi, ▼
▼Mengne tumi ‘Ila telep mengne tumi,’ sekmupkada, ada sun Indonesia upu deiki di, ‘Hari besar yang suci,’ perameng nge tep sekmupke. Ato tumi tep nengeda, ‘mambul tumi’, tonda, ‘pio telep tumi’, tonda, ‘ila telep tumi’ sengnupe.
 pio mambul tumi,’ tenepra pio kunkamrume. Ange tep nengeda, ware ngebo do yuma, nedi meme pepsi tumi bisbisa kapra, pel doramredi, atumi mali kudiramre ngeboda, sun kumumnya kan-kan di dokotepra tapmumpa, nedi angebo wenepra poptapkamne.

15Deiyoda ake. Ue ngantan bari tumi deikida, sun pel dopra kunkamrum dinino, ue yoneitam tumida, ne Yahweh, ne mambul tumi cadi, atumi konum wepra deipsa tep, atumi deiki di bepe peikra, pel men donkamrume. Ware ngebo do yuma, atumi pel doramre ngeboda, adipapu wenepra taprumu pangeda, nedi poptapkamne.” Allahdi pepu. 16Upepudi, aupu ton pepu. “Israel yala nesala, sun dadeipgerekdanen, deipbankameng nesala yuma tep, ‘Atumida ila mambul tumi’ tenen, pel dona gum dipapu, gispal donkamnerume. Ada nedi sun tep, ‘Ukunkamrume,’ pepra, konum deipsisa tep, angeda upu talepdamepudi, tenpu kange doupra deipmepu upu kurura cadi, ange pio men tamkamrume.

17Abeipye peingna tumi, Sabat tumida, peten kemdina keca utopu pio kunkamre. Ange pio men tamkamrume. Deiyoda, komuni ngantan bari tumi deiki di, im cap, tu cap, akeca-keca yala-yala yuma cap, neda Allah ne si Yahwehdi ketekepra deipsi dinin, yoneitam tumida, ne bepe peiksi. Neda Yahwehdi pepkene,” Allahdi Musa tep pepu.

18Uda, Allah er si Yahweh cap, Musa cap, Sinai mutu deiki upu sisingmareiya, konum gawal darei dingeda, Allahdi, ‘Ukunkamrume, angeda men kunkamrume,’ peramu upu yuma, gel pala butene doupra, agel deiki er pe buru di dana-dana sekudi, Musa tep karepu.
Copyright information for XteSC