Exo 33 | XteSC | STEP | Amenda taruda, Allah er si Yahwehdi Musa tep pepu. “Ukutaru, amutu tapmumdi, Israel neng yuma, Mesir duyanamum neng doupra, nedi peiamsisi mutu dubememdi, wengbenkamrume. Amutuda, sun co puna neng Abraham cap, Isak cap, Yakub cap tep, ‘Amutuda sun nyapu karepkamsene,’ pepra, mambul upu deiki di sun tep pediramsi. Tonda, sundi deipipa, adeipgerekdarami nesala yuma tep, ‘Atelep mutu karepkamsene,’ pediramsi. Atep, ukutaru adipapu amutu wengberume,” Allahdi pepu. Upepudi aupu ton pepu.

Exodus 33

Allahdi pepupa, Israel neng Sinai mutu di tapra, yukai bei upu

1 Amenda taruda, Allah er si Yahwehdi Musa tep pepu. “Ukutaru, amutu tapmumdi, Israel neng yuma, Mesir duyanamum neng doupra, nedi peiamsisi mutu dubememdi, wengbenkamrume. Amutuda, sun co puna neng Abraham cap, Isak cap, Yakub cap tep, ‘Amutuda sun nyapu karepkamsene,’ pepra, mambul upu deiki di sun tep pediramsi. Tonda, sundi deipipa, adeipgerekdarami nesala yuma tep, ‘Atelep mutu karepkamsene,’ pediramsi. Atep, ukutaru adipapu amutu wengberume,” Allahdi pepu. Upepudi aupu ton pepu.

2 “Nedi malaikat tenpu ton wepra deipnepa, er cap berumupa, ne puto deiki erdi makunkamsere. Amalaikat menepra beredi, orbenkamrum mutu neitamai kunge nesala, Amori yala neng cap, Het yala neng cap, Feris yala neng cap, Hewi yala neng cap, Yebus yala neng cap yuma tep, bisbisa kapra popnedi, amutu neitamai di dokotepkamne,” Allahdi pepu.

3 “Sun ukutaruda, pio telep mutu benkurume. Ware telep keca do yuma, mong me cap, sapi bisam moum teyung susu ^{▼▼Sapi bisam moum teyung susu cap, mong mokon cap kure mutu,’ perami ngeda, ada Ibrani upu deiki domona upu perami dinin, aupu deiyoda, ‘Amutu neitamai ware telep keca do yuma, yala-yala yuma weika di akurure’ tenen, adomon upu perami.} cap, uda akeca-keca yuma, telep keca yala-yala yuma, amutu neitamai weik akurure. Dinino, ne cap kikiman men benkamepe. Deiyoda, sun Israel nesala, kika weik kunge nesala cadi, ne dabal kupneryopda, bisi neitamai di yu kupnerepa, ‘Sun poptapsenun’ tenen, kware kunmanera tep, ne cap kikiman men benkamepe,” Allahdi pepu.

4 Allahdi aupu pepupa gekepi dingeda, sun mambul kange doupra, engenmaidi, ataru neitamai yuma, tenpu ngebo peda kwirip keca ton men keami. 5 Ange deiyoda, Allah er si Yahwehdi, “Sun kika kurum nesala cadi, sun kwirip keca kwiliptapra berume. Bisi benkurum taruda, aneng tep, dabal kupneryopda, ‘Aneng popkamne do, gum do?’ tenenkamsena tep, ‘Sun popsenun’ tenen, ne cap kikiman men benkamepe,” pepu. Tonda Allahdi, “Sun Israel nesala kika weik kuruma cadi, ne dabal kupneryopda, ‘Bisi neitamai di yu kupnerepa, sun poptapsenun’ tenen, kware kunmanera tep, ne cap kikiman men benkamepe. Sun berum tarupu, amenda kupkamsen ngeda, tenenkamne,” Allahdi pepu. Upepka tep, Israel nesala yuma, mambul kange doupra, sun adipapu darapra barami.

6 Tonda, Allahdi upepka tep nengeda, ataruda Israel nesala Horeb mutu kunmaiyaipu, sun kurip-kurip keca yuma, kwiliptapra talipu banmai. Akeca ton men keamidi bei.

Musa lyom opkal di doupra, keana domu dodin ati, Allah cap upu talepkamingai tep, pepu upu

7 Horeb mutu kurami taruda, nimi weik kuramyai kan-kan gum dinin, Musa lyom opkal bol di dodin tenda ati doprapudi, ‘Allah er si Yahweh cap upu talenkamepe’ tenena tep, yambul karenai dopra deipu. Dopudi pepu ada, “Akatida, Allah cap, nimi cap, antapmepedi, upu talena tep bura ati dopne,” pepu. Ware nesala do yuma, ‘Allahdi ne ikin kunere keca upu bokeipnetue’ tenen, putapne nengda, akati dam yakarami. Adodin atida, sun Israel nesala kuramyai damai gum dinin, yambul karenai dopu.

8 Musa adodin lyom opkal ati benamu taruda, Israel neng sun pe opkal bol di keana dodin ati buplan dam teknedi, beta dinmanpa, Musa orkaren ati, Allah cap upu talen ati wengbaramu. 9 Musa konum wekne pangeda, im deiki di, sipen dua bum ayomnya utopu kupra yandi, Allah er si eremna tep, opkal boldi keana dodin ati buplan damai, adua yana dim pepnepa, adua kan-kan Musa cap, Allah er si Yahweh cap, tonpa upu taleramrei.

10 Ataruda, Israel neng dinmanpa, Musa bura tara keana dodin ati pumbon weknepa, akati buplan dam, adua yankepne panenda, sun Israel nesala adipapu sun pe opkal ati damai, yuk-yuk tekra dinmaiyane, Allah er si eremami.

11 Musa cap, Allah er si Yahweh cap, upu sisingamrei taruda, nimi ton er kabo cap, upu tonpa didarengedi sisingamrenga utopu kuprei. Upu konum taleprei pangeda, Musa tamupra Israel nesala kuramyai baramu dinin, er melimna ngebo, Nukdi ^{▼▼Nuk Ibrani upu deiki di, angebo er si tep, ‘Nun’ perami dinin, ‘Asi sekmepyopda, Ketengban nesala aupu gekepmengedi, wang-wang peprur’ tenen, angebo er si tep, ‘Nuk’ sekmepu.} deipu mi, akaber ngebo er si Yosuada, Allah cap antapra upu sisingna ati dampu tekra kuramu.

Musadi Allah er dirine epka tep, pepu upu

12 Tenpu tumi ton, Musadi Allah er si Yahweh tep pepu. “Kandi ne tep peamnemumada, ‘Aneng doupra, nedi peramsi mutu dubenkamreme,’ peamnumum dinino, aneng dubana tep, melipkamner ngeboda, ware ngebo weipkamrem do? Angebo si kapul men pepnemume. Tonda Allah kandi peamnemumada, ‘Nedi kan si kael kepkesidi, ne pingpingda kan deiki deipkesi,’ peamnemume.

13 Atep ataruda, kandi ne deiki kan pingping konum deipnemumnyopda, kandi kurem keca peterepnetume. Peterepnetumpa, adeiki di ne kael kepketene. Tonda, kan tenenemem bisi dumsisingepu pepnemempa, nedi kan tep betapra kael kepkamkene. Ukupne pangeda, kan pingpingda, ne deiki tupa derinkamnereme. Ange moropmakenada, tali tep guma. Ne dubenkamne nesala, sun Israel nesalada, kan pengepu kunkamenge,” Musadi Allah tep pepu.

14 Upepupa, Allah er si Yahwehdi tamupra pepu. “Nedi kan damai yankupnedi, kikiman benkamneme. Nedi kan tep, telep kange doupra, boun kuna deiyo keca tupa karepkenepa, kange mun kange doupra, men kunkamreme. Teleppu kunkamrume,” Allahdi Musa tep pepu. 15 Upepupa, Musadi tamupra Allah tep pepu. “Naio, kan cap, nun cap, kikiman men bepyopda, nun men melipsemem dingeda, ‘Amutu tapra yuk mutu beso,’ penada gume,” pepra moropu.

16 “Kan cap, nun cap, kikiman men bepyopda, ware kupra deiki di, yuk nesala epsengedi, ‘E Musa cap, sun Israel nesala capda, Allah er pingpinga sun deiki derirure’ tenen, kael keptenge do? Ange utopu, ne cap, Israel neng cap, kan cap, kikiman men bepyopda, ware kupra yuk nesala yumadi, ‘E sun Israel nesalada, tek sisi Allah er mawa nesala kununge’ tenen, kael keptenge do? Sundi nun yuma tep, ‘Gume, aneng peda, tali nesala pua. Sunda, tuai kunge nesala, yuk nesala yala-yala yuma utopu kununge. Sunda nimi kuna neitamai di, ila mambul nesala tek sisi men kununge. Sunda tali nesala pua,’ tenenkamsenge.” Musadi pepu.

17 Upepupa, Allah er si Yahwehdi Musa tep pepu. “Kan moropmanerem ngeda, angepu nedi makupkamsene. Deiyoda, ne kael kepkesidi, ne pingpinga kange, kan deiki deipkesa tepa,” pepu. 18 Upepu pangeda, Musadi tamupra Allah tep moropu. “Ukutaruda, kan pe dirineda, ‘Ne eptene’ tenen, ne tep jenek kupra deipneo,” pepu.

19 Upepupa, Allah er si Yahwehdi tamupra pepu. “Ne puto cap, pio telep kune keca cap, ila mambulnge cap, kan damai kupbanedi, ne pe si Yahweh jenek pepkamakene. Tonda, ne pingping keca cap, ne kange telepnge cap, bicau tenenkamnenge capda, ne wepra deipkamne nesala tep, akeca karepkamne. Ange utopu, sun mali kupmengepane, adipapu poptaptene dinin, bicau tenepnedi, kaukepkamne nesala peda, ne pedipapu wepkamne. Neda Allah kununa tep pepkene,” Allahdi pepu.

20 Upepu dingeda, aupu ton pepu. “Ne dirine cap, ne telep kun keca cap, epkamarem dinin, ne urasinda kandi jenek kupra men epnetume. Ada tali tep gume. Deiyoda, ne urasin jenek kupra epnetu ngeboda, ware kupra gam tupa kuptu do? Gume, angeboda depna pua,” Allahdi pepu.

21 Upepu dingeda, Allah er si Yahwehdi aupu ton pepu. “Musao, ne akunmana damai dinin, ortara mutu bememdi, gel si dam deiki tekmemdi dinkanerume. 22 Ukupmaumempane, ne dirin cap, puto cap, kan damai jenek kupra yanepa, epkumem dingeda, nedi kan dopra, amutu dam gel imir pumbon dongopkenedi, ne buru di lelipdongopkenyopda, banapra embankamken ja. 23 Kan kupmaumumyai konum bisipra bene dingeda, ne buru gopropnepa, ne bali tarapu epkamnerem dinino, ne urasinda pio men epnetume,” Allahdi pepu.