Exo 34 | XteSC | STEP | Allah er si Yahwehdi Musa tep pepu. “Pumun taru nedi mambul upu sekrap, gel butene karepkesi dinin, kandi agel pala dokotepra copmume. Atep, pumun nge utopu kange di cakrapmemdi, konum ketenepmamempa, ne mambul upu ton cap, agel deiki sekeipkamkene. Ada men di peipkesi upupu, agel butene deiki sekeipkamkene. Sekeipnepa pumun taru akaputopu kupkamre,” Yahwehdi pepu.

Exodus 34

Ukupu gel butene deiki, Allahdi mambul upu sekra karepu upu

1 Allah er si Yahwehdi Musa tep pepu. “Pumun taru nedi mambul upu sekrap, gel butene karepkesi dinin, kandi agel pala dokotepra copmume. Atep, pumun nge utopu kange di cakrapmemdi, konum ketenepmamempa, ne mambul upu ton cap, agel deiki sekeipkamkene. Ada men di peipkesi upupu, agel butene deiki sekeipkamkene. Sekeipnepa pumun taru akaputopu kupkamre,” Yahwehdi pepu.

2 “Ketekeipmamemdi, ketenepra kupmamempane, ambutumi ipnada, Sinai mutu deiki welepkurume. Mutu dup welepra yana tekmamempa, antapkamaneme. 3 Amutu welepkumem taruda, yuk neng ton cap tapakra men yatenge. Kan cap tenpu ngebo pe, melipra welena pio gume. Tonda nimi tenpu peda, ormutu damai jenek kemna cap, amutu damai yakana capda, pio meme. Domba bisam pe, sapi bisam pe yumada, amutu damai, mutmuta jena gume,” Allahdi Musa tep pepu.

4 Upepu pangeda, Musadi pumun gel pala butene kwamutopu, ukupunge peda, gel pala butene keteneipmaunge dopra, ipna taru Sinai mutu dup welepu. Ada, Allah er si Yahwehdi pumun taru, pepmemeutopu, agel butene er pe buru di talepra, Sinai mutu deiki welepu. 5 Sinai mutu welepu pangeda, Allah dua kan-kan kwerepudi, Musa tekmauai yaudi, “Ne sida Yahweh kunune,” pepra, Musa tep yan pepu. 6 Allahdi Musa tekmauai urasin tara yaudi pepu. “Ne sida Yahweh, Allah kunune. Ne sida Yahweh kunedi nimi tep bicau tenepra, weika di melimsenune. Mali kupmenga peda, berbera di yu men kunerure. Tonda berbera dipu men wenemsenune. Ange gum dinin, nedi, ‘Ukunkamsene,’ peipsisitopu, nimi tep bicau tenena cap, tamna gum dipapu makuna cap, weika di melimsenune.

7 Ne nyapu tep denge pio weik, men nukmanto beribu-ribu tep, tamna gum dipapu, pio bicau tenenune. Sun mali kunge keca tep, tupa-tupa kaukemnune. Ne nyapu tuai nesaladi, mali kupmengenge cap, ne tep ‘Nun songe,’ tenepmengedi, ne upu yanipmengedi mali kupmenga peda, kange di ton cap tupa kaukemsenune. Akeca yuma tep, menmena di tulum kunerepa, men wenemsenune.

Dinino, sun dipru pio mali neng, tupa-tupa mali kunung nesala men kaukemkamne. Sun pio mali dipru kunge nesalada wenemkamne. Ada, sundi mali kupmenge pangeda, aneng cap, sundi deipkameng nyapu cap, anyapudi gerekbangedi, deipkameng nyapu cap, sundi deipra dadaeipdanen, deipbankameng nyapu cap, weneri gerekdankaminge cap, dumbari gerekdankaminge cap, sun yuma tep wenepkamne. Ada sun nai yapudi mali kuraminge tepa,” Allahdi pepu.

8 Upepupa, adipapu Musa kware weik cap, Allah er gispal dona cap tep, tu deiki mapra, Allah si erepudi pepu. 9 “Uo ne Nai Allah ^{▼▼Allah – Ayat 9 neitamaida, Allah er si tep, Ibrani upu deiki di, ‘Adonay’ ton pepra seki. Aupu deiyo ngeda, ‘Allahda, akeca-keca yuma talerura deiki di, ila puto weik ngebo kurure,’ tenena tep, seki. Atep, sun kael kemna tep, aupu jenek kupra sekmepu.}, kanda akeca-keca yuma talepra, ila puto weik ngebo kurume. Tek sisi kan pingping kange, ne deiki deipnetum dingeda, pio telepe. Kange deipnemem dingeda, kan cap, nun Israel nesala yuma cap, kikiman betepedi makupsetumnyopda, pio telepe. Israel nengda, kika pio weik neng kunung dinin, sun mali kunge keca cap, mali tenenge keca cap, kaukepserume naio. Kaukepsetumdi, kandi, ‘Ne mawa nesala kurume,’ tenesetumnyopda, pio telepe. ‘Naio ukupsetum’ tenen, moropkene,” Musadi pepu.

10 Upepupa, Allah er si Yahwehdi Musa tep pepu. “Ataruda, nedi, ‘Ukunkamrume,’ pepra, deipsene upu deiki di, pedina upu ton karepsene. Ada, Israel nesala dinaipu kunupsek pen keca kupkamne. Sun damai kunkamne ngeda, yuk mutu-mutu yuma men kapupa men epi dinin, sun damai ila mambulnge kupne pangeda, sun damai kunkameng neng epmenga adeiki di, kael kepkamenge. Ada, ‘Uo Allah er si Yahwehdi, sun Israel nesala makuna tep, sun neitamai mambul pel dore ngeda, pio telepe’ tenen, kael kepkamnenge,” Allahdi pepu.

11 Upepudi, aupu ton pepu. “Atep, atumi di ne mambul upu pepmasen ngeda gekepra, pingpinga di, sun moupra talepmum pangeda, ne puto deiki Amori yala neng cap, Kanaan mutu kunge neng cap, Het yala neng cap, Feris yala neng cap, Hewi yala neng cap, Yebus yala neng cap, Kanaan mutu neitamai di enepra dokotepkamne. Ada ne puto deiki melipsenedi, amutu neng yuma popra enepkamrume,” Allahdi pepu.

12 “Amutu bemum dingeda, ‘Sun amutu neitamai kunge neng cap makudankamepe’ tenen, ‘Ukupkamsepe, ukupkamserume,’ pepra, pedina upu ton men pepdankamrume. Deiyoda, ukupmum pangeda, anengdi mali-mali kuramenga utopu, ‘Sun peda utopu ukuprum’ tenen, pepsene,” Allahdi pepu.

13 “Cadi angeda ukuna gume dinino, sundi amutu bemumdi sun isok si Asyera, si eremna tep dopi ati cap, co deiyo ingaminge cap, gam keca popra isok karena tep gel pala dopra, pala gel taplakra yakeipinge cap, uda sun isok si eremna tep petupra derirami keca yuma cap, kweptapkurume,” Allahdi pepu. 14 “Sun si eremrum Allahda, ne Yahweh tenpua kununa tep nengeda, yuk keca tep, ‘Allah utopua,’ pepra, si eremna pio meme. Ukupmumnyopda, ne yu weik kunerure. Ukupmumnyopda, akeca tep, ‘Dakwapye,’ pio men peptene. Neda Allah ne tenpua tepa,” Allah er si Yahwehdi pepu.

15 Upepu dingeda, aupu ton pepu. “Amutu bemum dingeda, ‘Sun amutu neitamai kunge neng cap men popdankamepe. Makudanapu kunkamepe’ tenen, ‘Men popdankamepe,’ pepra, aneng cap pedina upu ton men pepdankamrume. Deiyoda, ukupmum pangeda, anengdi sun isok si eremna tep, tu deiki maipmengedi, sun isok karena tep telep gam keca popra karepmenge taru, upepkamsenge. ‘Sun tonpa nun cap jepkupe,’ pepmengepane, sun Israel nengdi, sun isok tep karepi keca jepmumnyopda, ada pio mali tepa. Ada, sun mali kuramenga utopu, ‘Sun peda utopu ukuprum’ tenen, moupra kunkamrume, pepsene,” Allahdi pepu.

16 “Ange utopu, sun Israel nengdi, sun nyapu ner dona tep, amenda benkamrum mutu tengyakan neng, sun ner nyapu dopropmumdi, sun nyapu karepmumpa, dopmengopda, amenda taru ne tapnengedi, sun nerapudi si eremenge isok kecapu, ‘Sun Israel nengdi, akeca tep si erepnung’ tenen, pepsene. Ada sun nyapudi, yuk mutu nerapu dopmengedi, anerapu upu gekepmengedi, anerapu sun talenung isok tep, Israel nengdi aisok si erepmengedi, mali kupnunga tep, kange moupkamrume, pepsene,” Allahdi pepu.

17 “Gat keca dopropmumdi, tali-tali keca urasin telep kweipra, akeca tep si eremnada, pio meme,” Allahdi pepu. 18 “Nena gum roti jena kalemne tumi pio tenenkamrume. Atumi kepyopda, ue yoneitam bari tumi neitamai yumada, roti nena keca men dongopmenge ngeda, dapra jenkamrume. Ada nedi pemsisitopu kunkamrume. War sida, Abi war neitamai dinin, ne wepra deipsi tanggal deiki gonga kepkamrume. Deiyoda, awar neitamai di Mesir mutu tapra yanamruma war tep, awar neitamai gonga kepkamrume pepsene,” Allahdi pepu.

19 “Gam kun keca do, nimi do, sal mi menmena deipkamenge nge cap, deipkamrumnge cap yumada, ne mawange kupkamnere. Ada sun weni nyapu cap, sun sapi bisam weninge cap, sun ma keca weninge cap, weni mi jem ngeda, menmena deipkamenge yumada, ne mawange cadi, ange yuma dopra karenkamnerume. Ne damai yankumum taru yumada, talipu men yankamrume. Weni keca dopra duyankamrume,” Allahdi pepu.

20 “Keledai bisam mi menmena deipre ngeda, ‘Men popkupe,’ tenepmumnyopda, akeledai mi kunumna tep, adipapu domba bisam mi dopra popmum dingeda, ne tep karenkamnerume.

Akeledai bisam mi tep, ne kunumna keca men karepnemumnyopda, adipapu akeledai mi, kum yo copmumpa depkamre. Sun sal mi menmena deipkarumnge yumada, ne mawa keca cadi, sun yo pununa tep, kunumna keca karenkamnerume. Ne mawa keca yo pununa tep nengeda, ne damai yakanada mesumpu men yankamrume. Kunumna keca kipra dekankamnerume,” Allahdi pepu.

21 “Uwe ngantan bari tumida, sun pel donkamrume. Dinino, ue yoneitam bari tumida, pel dona gume. Atumida beipye peinkamrume, apua. Wa pen taru pe, wa kin taru peda, yoneitam bari tumida pel men donkamrume. Ne gispal dona tep, beipye peingnapu kunkamrume,” Allahdi pepu. 22 “Sun wa peramumya menmena weninge kipkumum taruda, kailya kalemkamnerume. Ataruda, sun gandum wa peramumya du menmenange konum popyopda, du menmenange kipra ne tep karenkamnerume. Tonda keteng tamun tenpunge gawal dakure taruda, akeca-keca yuma, sun wa kin keca siriknge gawal dangkumum taruda, kailya ton kalemkamnerume. Ada ne si erepra kailya kalemkamnerume,” Allahdi pepu.

23 “Tenpu keteng tamun neitamaida, ue weneri taru, Israel nimi yuma Allah ne si Yahweh, ne damai yakankamenge. Ada Israel nesala, sun nai bo Yahwehdi kalekra melimsenun Allah, ne damai Israel neng yangedi, si eremkamnenge. Neda, akeca-keca yuma talepra ila deiyo ngebo kununa tepa,” Allahdi pepu.

24 “Nedi pepsenetopu, tenpu keteng tamun neitamai, ue weneri taru ne damai bemumdi, ne si Yahweh eremnerumnyopda, nedi ukunkamsene. Tenpu ngeda, yuk mutu nesala yala-yala yuma enepra donoknepane, amutuda, sun Israel nesalapu talenkamrume. Butene ngeda, sun talenkamrum mutu, weika di ton cap tapakra karenkamsene. Weneri ngeda, ne kaleksenepane, yuk mutu nesala yumadi, sun Israel nesala kunkamrumai yuma, ‘Uo angeda nunpuda doproptepe’ tenen, men putapkamre. Ne pepsisitopu, ne si erepnemumnyopda, ange yuma tep melipra karepkamsene,” Allah er si Yahwehdi pepu.

25 “Gam keca popra, yapi dopropmumdi, ayapi keca ne si eremna tep karepkumum taruda, roti nena deiyo keca cap tapangna pio meme. Tonda, ‘Mesir mutu kuramepu taru, Allah er malaikatdi nun weni nyapu men poptapseue’ tenena tep, Kaplamna Kalemna taruda, gam keca popra karenkamnerum dinin, sundi dapra jenkamrum ngeda, kwal derina meme. Popra dapmum ngeda, alukunda dipapu gawal dakra yuma jenkamrume. Tenpu pe ton deipmamumya, ‘Ortumi jenkamape’ tenen, mawa derina meme,” Allahdi pepu.

26 “Keteng tamun, keteng tamun yuma, sun wa pemumya, wisiprepa, du cap, nong cap, menmena weni ngeda dopra, sun nai bo Allah Yahweh karena tep, er ati karerbankamrume. Tonda, ‘Kambing bisam mi popra tu gapkup,’ tenepmumnyopda, kambing bisam tu cap, akambing er nin moum teyung cap, tapakra gamna gume,” Allah er si Yahwehdi pepu.

27 Allah er si Yahwehdi aupu yuma konum pepu dingeda, Musa tep pepka. “Apepne upu yuma sekurume. Deiyoda, aupu deiki di, Ne cap, kan cap, Israel neng cap, ‘Telep kupra kikiman kunkamepe. Nedi sun kalekra melimkamsene’ pepra, pedina upu konum pepra deipsene. ‘Allahdi peamseu ngeda aca,’ pio tenenkamruma tepa,” Allahdi Musa tep pepu.

Musa Sinai mutu di kwerepu taruda, er urasin dirine weik kupu

28 Musa cap, Allah er si Yahweh cap, tonpa kuramreidi, upu sisingamrei taruda, ue denge weik dumbari, 40 tumi cap, lukunda cap kikiman kuramrei. Musada, akuramu taruda, jen bulungpu kuramudi, jene cap, me cap pio men jeramudi, mesumpu kuramu. Tonda, ataru neitamaida, Allahdi, ‘Angeda ukunkamrume, angeda men kunkamrume,’ peprapudi, er mem upu, morokyo deiki dutara (10) peramunge yuma, gel pala butene deiki sengamu. Tonda, aupuda, Allahdi Israel nesala tep, “Ukupmumnyopda, nedi pio kalekra melimkamsene” pepra pedina deipu upu, deiyo upu tepa.

29 Allahdi aupu konum seku dingeda, Musa karepupa, Musadi dopra, tamupra Sinai mutu deiki di kwerepu. Kwerepu taruda, Allah er mem upu sekeipmaunge, gel pala butene doupra yau. Er kwerepu taruda, keteng deriramretopu, er urasin deikida Allah dirine kupmau. Ange deiyoda, er nai Yahweh cap, upu taleramreiya tepa. Dinino er urasin dirine weik kupmau ngeda, Musa men kael kepmaue. 30 Ataruda Harun cap, Israel neng capdi, Musa epi taruda, Musa er urasin deikida Allah er dirine kuamupa, sun kware weike kupka tep, er damai men benmai.

31 Musa er urasin dirin weik kupu dinino, Musadi sun aneng tep upupupa, Harun cap, Israel nesala sun deiyo neng yuma capda, er damai yaipa, sun tep upu pepu. 32 Konum upu sisingmai pangeda, Israel neng yuma bupra er damai yana wekipa, Allah er si Yahwehdi, “Angeda ukunkamrume,” pepra, Sinai mutu peramu upu yuma Musadi sun tep lap pepu.

33 Aupu konum pepu dingeda, Musadi opkal dopra er urasin yuma lelipdongopu. Deiyoda, ‘Ne urasin dirin kupnere ngeda, gum kupbarepa, anesala epnenung’ tenen, kupu. 34 Ukupu dinino, Musa cap, Allah er si Yahweh cap, upu sisingkurei tara yumada, Musa er urasin opkal di lelipmau ngeda, kwiripra deipnedi upu sisingmareipa, ka di kepdongopra bura bendi, Allahdi, “Angeda ukunkamrume,” pepra deipmau upu yuma, sun Israel neng tep lap peramu.

35 Ware taru do yuma, Musa Allah kunmauai di, bura yanmau taru yumada, Israel nesaladi Musa er nong bol deiki dinmai pangeda, er urasin dirinda, keteng deipnedi diriramretopu kupne pangeda, epi. Konum epi pangeda, Musa adipapu ka di opkal bol di, er urasin lelipdongopu. Dakuramnganen, er cap, Allah er si Yahweh cap upu sisingkurei taru yumada, ka di ton, er urasin lelipdongopmau opkal kwiriprapudi, Allah damai beupa, sun upu taleramrei.