Exo 35 | XteSC | STEP | Musadi, Israel nesala tep, “Bulupkurume,” pepupa, sun yuma bulupra yai pangeda, aupu pepu. “Allah er si Yahwehdi, sun tep peipmasere ngeda, adano.

Exodus 35

Pel dona gum dipapu, beipye peingna tumi, Sabat tumi kuna tep, pepu upu

1 Musadi, Israel nesala tep, “Bulupkurume,” pepupa, sun yuma bulupra yai pangeda, aupu pepu. “Allah er si Yahwehdi, sun tep peipmasere ngeda, adano. 2 Ngangtan bari (6) tumi neitamai yumada, tali kange doupra, sun pe pelpu donkamrume. Dinin, yoneitam (7) tumida, pel yala-yala yuma pio men donkamrume. Sun pe pel tapra, sun adipapu beipye peingkamrume. Atumida, ne Allah Yahweh si eremna tep, ketenepra deipsi tumi cadi, sundi, ‘Atumida, pio mambul telep tumi, Allah er tumipu,’ teneprumudi, ne sipu eremkamnerume. Dinino, ware ngebo do yuma, yoneitam tumi neitamai pel donmare ngeboda, wenepra ponkamrume. 3 Atumi neitamai yumada, sun ati pumbon peda, uku pio men sengkamrume, peipmasere.” Musadi pepu.

Allah Yahweh cap, nimi cap antamdana tep, keana dodina tenda ati neitamai kareryakana tep, pepu upu

4 Musadi, sun Israel nesala yuma tep, aupu ton dukdongopra pepu.

“Allah Yahwehdi, ‘Ukupkamrume,’ pepra, deipmaser upu pepkusene. 5 Ada, sun Israel nesala yumadi, Allah er si eremna tep, tenda opkal bol ati ketenemna tep, sun talerum keca pe, kurum keca pe, akeca neitamai di doupra, ‘Nun nai Allah Yahweh tep, kange deipra karepkup’ tenen, akeca-keca kareryakankamrume. Ada, ware nesala do yuma, sun pe dipru neitamai di, ‘Nun talenup kecada, Allah Yahweh tep karepkupe,’ tenepmenge nengda, sun adipapu doupra kareryakankamnunge. Akareryakankameng kecada, urasin pio telep kunumna weik keca, er si emas cap, boun kunumna keca, er si perak cap, telep gat keca, er si perunggu cap doupra, Allah tep kareryakankamnunge. 6 Tonda, boun nunul kain, er si lenan cap, tonda kain wol, er urasinda, mirin dinin, singkalumange (warna biru) cap, mirin ungu tuange cap, yapi binge cap, tonda kambing bisam potong di wipra derirameng kain utopunge capda, sundi doupra kareryakankamrume.

7 Utopu tonda, jem domba bisam popra, bol gongokra opkal wipmantonge doupra, yapi bi keca lingdiramenge nge cap, tonda laut mokon pumbon kuramre gam kure keca, er si lumba-lumba, er bol boun nunulnge di, deipra wiramenge nge cap, tonda akasia co cap, doupra kareryakankamrume. 8 Tonda, lampu weica una tep, saitun co du minyak me doupra kareryakankamrume. Tonda, Allah er si eremna ati pumbon kure keca, telep kudina tep nengeda, nintong telep keca, er si rempah-rempah ton keteneipmumdi, telep minyak me mokon cap tapakra ketenemdinung nge cap, tonda siltong telep pena tep, uku dongonkamnung keca cap, doupra kareryakankamrume. 9 Tonda, urasin telep mirin gel, er si delima cap, yuk urasin telep kunumna weik gel cap, dopra kareryakankamrume. Agel yumada, efod opkal deiki palepra deipkamrume. Ada, sun imam neng, sun ila deiyo ngebo, er nong deiki lyom opkal kenengkamrenge cap, er taram deiki teng utopu kupra kenengamre Efod opkal cap, ange deiki, ‘Allahdi tenesere keca kael kemna cap, tenena cap, kunkamep’ tenen, betapra gekena tep kecada, ange yuma doupra, Allah tep kareryakankamrume. Musadi pepu.

Allahdi, er si eremna ati pumbon pel don keca ketenemdina tep, pepu upu

10 Sun kikiman kumum neng neitamaida, Allah Yahweh er si eremna tenda ati dona tep, “Ukupra-ukupra donkamnerume,” peipseunge yala yuma, ila kael keamidi donung nengda, sun dipapu, akati doryankamnunge. Allahdi, ‘Akati keca donkamnerume,’ peipseu ngeda ake.

11 Ada, Allah er si eremna ati dona tep, akati tenda bol cap, akati amnyabo kemna tep singinange cap, gwarepra talenange cap, tonda, akati ayomna co cap, wiringdin co yuma cap, tonda dana-dana tara deipra, tengdina co cap, ‘Aco tu beprur’ tenen, alyom co amutara derin gat keca cap, doupra yankurume. 12 Tonda, Pio Telep Lengna Ati pumbon kupkamre keca, Allahdi pedina upu peipupa, kipra deiamrum peti bekin co pumbon cap, apeti co doupra embankamrum taru doupra bana tep, pela lyom co butene ton ketenepra deipkurume. Tonda, apeti buplan utopu kemna tep, apeti co pum deiki singina tep nengeda, ‘Allahdi nun mali kun keca daepkamser’ tenen, yapi lingdinkamepai cap, ketenepra deipkurume. Tonda, apeti bekin co, er si Peti Perjanjian ^{▼▼Peti Perjanjian – Peti Perjanjian kael kemna tep, Keluaran 25:11 dinkurume.} deipkamrumai, ‘Tali nengdi weknung’ tenen, er lelimdongona tep nengeda, lyom opkal kain lenan ton keteneipra kapkotepkurume. 13 Ange utopu, atara Telep Lengna Ati pumbonda, roti kwaneng dapra derin keca derinai tep, co di meja betamumnge cap, ameja pela co deiki di doupra bana tep, lyom co butene cap, keteneipkurume. Ukupmumdi, ameja deiki derina keca, ‘Allah erda nun damai akunkamre’ tenen, tumi-tumi yuma dapra derinkamrum roti kwaneng 12 peda, menmenange ketenepra deipkurume.

14 Tonda, Allah er si eremna ati pumbon deipkamrum lampu weica lankamre keca, er derina deiyonge cap, alampu weica pel don keca yala-yala yuma cap, ketenepra deipkurume. Ukupmum dingeda, weica lanange cap, minyak me cap, keteneipkurume. 15 Tonda, Allah er si eremna tep pel dona taru, nintong telep pena tep, uku dongonkamrum keca cap, ‘Akecada, Allah erngepu kurure’ tenen, likeipkamrum minyak me cap, tonda anintong telep pen keca, uku dongopkamrum keca doupra bana tep, pela lyom co butene ketenepra deipkurume. Tonda, Allah er si eremna tep tenda ati, bura tara buplan lelimna tep, kapkotepra deipkamrum ila pala lyom opkal cap, keteneipkurume. 16 Tonda, ‘Allahdi nun mali kunup keca kaukepseredi, daepkamser’ tenen, yapi keca popmumdi, yapi likeipkamrumnge cap, ayapi keca uku dongonai cap tep, gat keca, er si perunggu di akeca neitamai betapra deipkamrumnge cap, akeca pela lyom co deiki di doupra bana tep, lyom co cap, adeiki pel dona tep sikop cap, lungdin keca cap, yuk alat keca yuma cap, ketenepkamrume. Tonda, Harun cap, er nyapu cap, sun yane, buru me kuna tep deiprum me mau cap, ame mau talena tep, deipkamrum deiyo keca cap, ketenepra deipkurume.

17 Tonda, Allah er si eremna ati, piripa dana-dana tara yuma, ongopgenepra deipkamrum beilya wipkamrum co cap, ‘Acoda, tu beprur’ tenen, amutara yakra deipkamrum gat keca perunggu di keteneipkamrumnge cap, adeipmumya deikida, lyom opkal di gerekotepkamrumnge cap, ketenepkamrume. Tonda, akati dana-dana tara, piripa ongopgenepra derinkamrum lyom opkal neitamai, buplan kemna utopu tep, potokmumdi, abeilya buplan lelimdongona tep, ila pala lyom kain cap yuma, keteneipkurume. 18 Tonda, Allah er ke tep dodina tenda ati dona tep, tapu bepekra derina tep, ikamrum co cap, akati dopmumdi, beilya wipkamrumnge, er tapu bepekra derina tep, ikamrumnge cap, tapke capda, ketenepkamrume. Ada, atenda ati cap, abeilya lyom opkal cap, co ikra tapu gerekra kunupetepmumdi dona tep, keteneptapra deipkurume.

19 Tonda, imam neng, sun deiyo ngebo Harun cap, er nyapu capdi, Allah er Telep Lengna Ati cap, Pio Telep Lengna Ati cap, apio telep ati pumbon wekra, pel donkunge taru kenengna tep, pio telep opkal ^{▼▼opkal – Aopkal gambar dina tep, Keluaran 28:4 dinkurume.} ton wiprapmumdi, keteneipkurume. Ada, Harun cap, er nyapu cap, ‘Sunda, Allah er pelpu talepra donkameng’ tenen, sunpu kenengkameng opkal ton, yuk-yuk ketepra deipkurume. Musadi sun Israel nesala tep pepu.

“Sun Israel nesala yumadi, Allah er si eremna tep, telep keca kareryakankamrume,” pepu upu

20 Musadi aupu konum pepu pangeda, sun Israel nesala yuma, Musa er damai yana, bulupra wekmaiyane, aupu yuma konum gekepi dingeda, sun adipapu tamupra yukai bei. 21 Beidi, dakunmaiyanen, amenda taru, ware ngebo do yuma, er pe kange tenepredi, Allah Yahweh er si eremna tep, nimi cap, Allah cap, antamdana tep tenda ati pel dona cap, akati deiyo neng kenengkameng opkal cap, akati neitamai pel dona cap tep, ‘Akeca karepkune,’ tenepne ngeboda, akeca-keca yuma doupra kareryakanmai. Ada, ‘Akeca yumada, Allah Yahweh er tepapu karepkupe’ tenen, akeca yala-yala yuma doupra kareryakanmai. 22 Ange utopu, ware nesala do, anesala yumada, nimi pe, nerapu pe, er pe kange dipapu, ‘Akecada, Allah Yahweh tep, karepkune,’ tenepne ngeboda, kareryakanmai. Ada, sundi kareryakanmai kecada ake. Ada, kunumna weik keca, er si emas di betapra deiami keca, anting-anting amul bon potokra dongoramnung keca cap, cincin buru du deiki kemnung keca cap, tonda, kum dam garangnung keca, er si kalung cap, kareryakanmai. Ukupra kareryakanmai taruda, ‘Nun nai Allah dinkuser’ tenen, akeca yuma ereptalepra duyakanmai.

23 Nimi sun yuk-yuk talerami keca ada, boun opkal kain lenan cap, opkal win tapu er si kain wol, er nong kamo mirin dinin, singkaluma warna birunge cap, miringe ungu tuange cap, yapi binge cap, tonda kambing potong di deipra wirami opkal utopunge cap, jem domba bisam popra, er bol di wiramidi, yapi bi keca lingdiraminge cap, laut mokon pumbon kure keca, er si lumba-lumba bol di wirami nunul boun nge cap, ange yumada, akaputopu, Israel nesaladi, akeca yuma doupra kareryakarami. 24 Ange utopu, nimi yumadi, yuk-yuk bulupra deriryakanmai kecada, kunumna telep boun keca perak cap, telep gat keca perunggu cap, doupra deriyakanmai. Aneng yumadi, ‘Nun nai Allah Yahweh tepapu, akeca doupra yakanmape,’ teneramidi kareryakarami. Tonda, akasia co akwamu nengda, ‘Allah Yahweh er ati dona tep, putapretopu karepkupe’ tenen, akeca peda, doupra duyakanmaidi karepi. 25 Ware nerapu do, tapu ona ila kael nerapu yumada, sundi urasin telepnge ada, opkal win tapu, er si wol, er kamoda mirin dinin, ton ngeda, singkaluma warna biru nge cap, mirin ungu tuange cap, yapi binge cap, sun anerapudi konum ketenepi dingeda, akeca peda doupra kareryakanmai.

26 Tonda, ware nerapu do yuma, ‘Apelda, ne kaele cadi, ne ton winkamne,’ tenerami nerapu yuma, sun anerapu dipapu, kambing bisam potong dopropidi, aopkal utopunge ton wiprapidi, yana karerami. 27 Tonda, Israel nesala, sun nimi deiyo kepra talerami nengda, sundi urasin pio telep gel, kunumna weik gel, er si delima cap, yuk urasin telep-telep gel yuma cap doupra, yana kareramidi, sun kael nengdi, Imam neng sun deiyo ngebo, er nong deiki kenekamre opkal cap, ‘Allah tenere keca kael kepkun’ tenena tep, ‘Er taram deiki derinkamre opkal, er si Efod cap, palepra deipkameng’ tenen, urasin telep kunumna weik gel ton, bulupra dekaramidi, karepi.

28 Tonda, sun aneng dipapu, nintong telep pena tep keca, er si rempah-rempah cap, lampu weica lana tep, saitun co du minyak me cap, dekarami. Ada, ‘Anintong telep keca cap, minyak me cap dopra yandi, ‘Angeboda Allah er pelpu donkamre’ tenen, nimi nong deiki likeipkami minyak mokon cap, tonda, siltong telep pen keca uku dongonkamenge nge cap, keteneipkameng’ tenen, kareryakarami. 29 Sun Israel yala nesala yumadi, Allah Yahweh er si eremne ati pel dona tep, sundi talerami keca neitamai di, dana tara bokra, Allah karena tep, Musa damai doupra kareryakarami. Ada, sun pe kange dipapu, ‘Allah karepkupe’ tenen, kange deipra kareryakarami. Ange yumada, ‘Allahdi Musa tep, ‘Ukupmumdi, ne ati dopkamnerume,’ pepra deiputopu, ‘Angepu kupkamep’ tenen, akeca duyakaramidi, karerami.

Allah Yahweh er ati pel dona tep, Bezaleel cap, Aholiab cap, wepra deipi upu

30 Israel nesaladi, ange yuma konum kupi pangeda, Musadi Israel nesala tep pepu.

Allah Yahwehdi, er ati pel dona tep, Hurdi deiyamu ngebo Uri, er mi Bezaleel, ada Yehudadi deiamupa, dadeipdanen yakarami nengdi deipi yala ngebo, erpuda konum wepra deipmare. 31 Angeboda, Allah Yahweh, er Lek Sambala weika di karepupa, er dipru wekra dekpepka deiki di, ila kael kemna deiyo keca cap, pel dopmanto deiyo keca cap, urasin telep keca petupra pel dona deiyo keca cap, tali karepupa, angeboda, ila kael keamu. Ange yuma tenenange cap, kael kemnange cap, ‘Angeda ukupra-ukupra kuptenepa, urasin telep kuptue,’ tenenange cap, deiyo keca karepupa, ila kael ngebo kurure.

32 Angebo Belazeel kael keamu ngeda, ake. Ada, ‘Ange deiki di, ukupra-ukupra doptene’ tenen, kunumna weik telep gat keca emas cap, urasin telep gat keca perunggu cap, kunumna telep boun keca perak cap deiki di, akeca-keca yuma petuprapredi, telep kupra derirure. 33 Tonda, apel dona tep nengeda, urasin telep gel yala-yala yuma, gat keca di, petupra deipredi, urasin pio telep keca betapra ketenemderirure. Tonda, ila kael kemna deiki di, co deiki di betamrenge peda, pio telep kupra pel dorure. Tonda, yuk-yuk pel yala dopkamrenge yumada, urasin pio teleppu kunkamrure.

34 Angepu gum dinin, Allahdi Belazeel cap, tonda Dan yala ngebo, Ahisamak er mi Aholiab cap tep, ila kael kemna deiyo keca cap, tonda yuk neng tep peteremna deiyo keca cap weika di kareamu. Allah Yahwehdi animi butene tep, aila kael kemna deiyo keca kareamnga deiki di, pio telep kupra pel dorurunge. Tonda, yuk neng tep, telep kupra peteremrurunge.

35 Uda, Allah Yahwehdi, sun aneng tep, ila kael kemna deiyo keca kareamnga deiki di, apel don keca, yala-yala yuma, pio telep kupra talepra doramrei. Ada, co doupra petumna pel dona cap, tonda, ‘Angeda ukupkamne-ukupkamne,’ tenenange cap, boun opkal, lenan winange cap, wol tapu er nong kamo mirin dinin, singkaluma birunge cap, miringe ungu tuange cap, yapi binge cap, tonda yuk yala kain cap, ‘Ukupra wipnedi, ketenepra pel dopkamneme,’ tenererunge. Sun anengdi, ‘Angeda ukupra-ukupra dopkamneme,’ tenena deiyonge kael kepreiya deiki di, ange yuma pel dorunge. Tek sisi, Bezaleel cap, Aholiab cap, yuk neng cap, sun tep nengeda, Allah Yahwehdi, pel dona tep, ila kael kemna deiyo keca kareamu. Ukuramnga deiki di, Allah Yahweh er si eremna ati dona tep, kun keca yala-yala yuma pel dopkamrenge. Sun aneng yumada, tek sisi ila kael keami neng cadi, akeca peteremna deiyo neng kununge.

Musadi sun Israel nesala tep lap pepu.