Exo 36 | XteSC | STEP | Musadi sun Israel nesala yuma tep pepu. “Uda, Bezaleel cap, Aholiab cap, tonda, sun kayapu neng, akeca-keca yuma pel dona tep ila kael nengdi, Allah er si eremna tenda ati dona tep ketenepmengedi, apel gonga kepkamenge. Aneng yumada, nun nai Allah Yahwehdi, ‘Pio telep pel donkameng’ tenen, pel dona deiyo keca cap, ‘Ukupra dotepe’ tenen, ila kael kemna deiyo keca cap, konum weika di kareamupa, ila kael neng kununge. Atep nengeda, aneng dipapu Allah cap, nimi cap, antamdana tenda ati pel dopkamenge. Allah Yahwehdi, ‘Ukupra, ukupra apel donkamrume,’ pepra lap peipseutopu, angepu talepra, pel donkamenge.” Musadi pepu.

Exodus 36

Israel nesala, sun talerami keca pio weika di bupra derirami upu

1 Musadi sun Israel nesala yuma tep pepu. “Uda, Bezaleel cap, Aholiab cap, tonda, sun kayapu neng, akeca-keca yuma pel dona tep ila kael nengdi, Allah er si eremna tenda ati dona tep ketenepmengedi, apel gonga kepkamenge. Aneng yumada, nun nai Allah Yahwehdi, ‘Pio telep pel donkameng’ tenen, pel dona deiyo keca cap, ‘Ukupra dotepe’ tenen, ila kael kemna deiyo keca cap, konum weika di kareamupa, ila kael neng kununge. Atep nengeda, aneng dipapu Allah cap, nimi cap, antamdana tenda ati pel dopkamenge. Allah Yahwehdi, ‘Ukupra, ukupra apel donkamrume,’ pepra lap peipseutopu, angepu talepra, pel donkamenge.” Musadi pepu. 2 Aupu konum pepkopda, Musadi, Bezaleel cap, Aholiab cap, tonda, sun kayapu neng, sun pel dona tep ila kael neng yuma tep upupupa, yai. Ada, aneng butene cap, uda yuk pel deiyo keca ila kael neng cap, kange deiprapidi, ‘Nun peda, Allah er si eremna ati melipra dopkamepe’ tenen, ketenepi neng cap yai. Apel dona neng yumada, Allah Yahwehdi, pio telep pel dona deiyo keca cap, ila kael kemna deiyo keca cap, konum kareamu neng kuramidi, apel gonga kepi. 3 Apel gonga kepi taruda, Israel nesala yuma, sundi, bulupra derirami keca yala-yala yumada, Musadi akeca dopra, sun ila kael neng deiki deipu. Ada, ‘Sundi, Yahweh er si eremna dodin opkal ati dopkameng’ tenen, karepu. Konum keteneipinge yumada, Musadi karepu dinin, Israel nesala men tapi. Atumi di gonga kepidi, sun kange dipapu, atumi-atumi yuma, sun talerami keca yuma neitamai di, ‘Akati dona tep karepkupe,’ teneramidi, kange deiprapidi, ipna taru yuma, akeca-keca yuma doupra, tali kareryakanapu kurami.

4 Ange yuma doupra kareryakaramipa, sun ila kael nengdi, Allah er si eremna tenda ati pel donmange ngeda, keana tep, apel taprapidi, Musa damai yana pepi. 5 Sun apel dona nengdi, Musa tep upepi. “Naio, nun akati dona tep, Allah Yahwehdi, ‘Ukupra kareryakankamnerume,’ peipunge, sun Israel nesala yumadi, bulupra deiyami keca yala yumada, Allahdi peamum ngeda, konum bisiprapidi, ila weika di dekanmange,” pepra, Musa damai bena lap pepi. 6 Aupu pepipa, Musa gekepudi, ‘Aupu perberume,’ peipupa, er melimna nengdi, Israel nesala sun tenda bol ati deipra kuramyai beidi, sun gekena tep bena pepi. “Ada, sundi Allah Yahweh er si eremna ati, ki dona tep bupra deiprum keca yala-yala yumada, pio weika di konum deipmaruma cadi, nimi pe, nerapu peda, yuk keca ton doupra men duyakankamrume,” pepra lap pepipa, Israel nesala gekepi. Atep nengeda, ataru di dipra, dortaruda, taprapidi, akeca-keca ton cap men duyakarami.

7 Akati dona tep keca yala yumada, sun Israel nesala yumadi, bulupra kareryakarami keca yala-yala yumada, pio weike konum kupka cadi, akatida ange dipapu dopra, gawal dakmanto konum kuramya cadi, akeca ton cap tapakra men duyakarami.

Allah Yahweh er ki dodina si eremna ati tep, pel doraminge tep lap pepu upu

8 Uda, sun ila kael keami neng kan-kan neitamai di, nimi ton, Allah er ki dodina si eremna ati dona tep, opkal wina tep, ila kael neng wepra deipipa, adodina ati dona tep nengeda, pio telep lyom kain er si lenan, morokyo di utara yuma (10) wipra keteneipi. Ada, pio telep opkal win tapu, er si wol, mirin singkaluma warna birunge cap, mirin ungu tuange cap, yapi binge cap, yuma di aopkal deiki gambar utopu keca wipra Keteneipi. Ada, alyom kain deikida, Malaikat utopu keca er sida, Kerub urasin utopunge wipra deipi. 9 Akati kapkotepkami lenan lyom kain bol sengnada, kikiman utotopu kupra sekami. Ange yuma er lyomda, utopu 12 meter kunupra sengami. Ange utopu, er palada 2 meterpu kunupra sekami. 10 Alyom kain pamubari sekami ngeda, tenpu kepra deipidi, wiprapipa, er palada, tenpu kepu. Ange utopu, ton pamubaringe peda, wiprapipa, er pala utopu tenpu kepu.

11 Apala lyom kain dana tara sirik ngeda, telep kain er kamo miringe singkaluma warna birunge di, akain er piripaida, gwarepra talen keca betapra wiprapidi keteneipi. 12 Ada, alyom kain di, pala yuk-yuk butene wipra deipinge piriripa di, gwarepra talena tep kecada, ton tarange lima puluh (50), ton tara peda, lima puluh (50) wiprapidi, ketekeipi. Ada, ‘Ukupmapya di ton nge cap, ton nge cap, dukra deipnepa, tenpu kepkamrura’ tenen, kupi. 13 Ange konum kupi dingeda, dana-dana tara lyom opkal dungdongona tep, arekra talena keca tep, kunumna weik telep gat keca emas di, lima puluh ton (50) petupra betapi. Ange konum kupmaidi, ‘Alyom weik lenan kain pala buteneda, tenpu nong utopu kepkur’ tenen, er sirik-sirik talena tep, dukdongopra deipidi, arekra talen keca di getepdongopi.

14 Ange yuma konum kupi dingeda, sun anengdi, adodina tenda bol ati er amnyabo dona tep nengeda, kambing potong di wirami kain, sebelas sekra wipra keteneipidi, wiprapi. 15 Atenda bol opkal ati amnyabo utopu ngeda, sekaminge yumada, er kunumna tenpu utotopu kunupetepidi seki. Er lyomda 13 meter kunupra sekami. Tonda er palada 2 meterpu kunupetepra sekami. 16 Akambing potong di wiprapi lyom kain, akati amnyabo kuna tep, pamubari (5) seki ngeda, tenpu kepra deipi. Er lyomda tenpu kepu. Autopu ton ngangtan bari (6) ton sekinge peda, utopu wipra, tenpu kepra deipi. Ange peda, er pala tenpu kepu.

17 Tonda, alyom kain er gwarepra talena tep kecada, lima puluh (50) ton bulat keprapidi, menmena pala kain, er sirik-sirik ketenepra deipi. Utopu ton tarange peda, gwarepra talena tep keca, lima puluh ton, er sirik-sirik talena tep, bulat kepra wipidi ketenepra betaipi. 18 Dana-dana tara kambing potong di wipi opkal, er tapu gwarepra kouna tep kecada, telep gat keca er si perunggu di, lima puluh (50) betapra keteneipi. Ukupya deiki di, apala kain buteneda, yan dukdongopya deiki di, akati ayomna bo donada ketenepi. 19 Ange konum kupiyopda, Allah er dodina si eremna ati lelimdongomna tep, jem domba bisam bol doropra, wipidi, ange bol deiki bi keca likra deipipa, yapi bipu kupu. Ange doupra, akati ayomna bo utopu kemna tep, deipi. Tonda, ange deikida tenpunge ton deipi. Angeda, laut mokon pumbon kure keca, er si lumba-lumba, er bol doropra betamipa, kain utopu kupupa, ange ton dopra, akati ayomna bo deiki butenenge deipi. Yapi bi ngeda, amutara kupra deipi. Lumba-lumba bol di keteneipi ngeda, yapi binge deiki tara kupra deipi. Aketenepi ngeda, adodina si eremna tenda ati yana galupdongopi.

20 Apel konum dopi dingeda, sun anengda, Allah er si eremna tep, er cap, nimi cap antamdana ati, ‘Er kwirye tekredi, gat kupkamre’ tenen, Akasia co di akati yuma tep, udini kwirye tekamre co cap, adinor getemna co cap, ketenepra iki. 21 Akati er lyom tep, tengdin co lyomda, 4 meter kunupra sekrapidi keteneipi. Tonda, akati opkal kapkotemna tep, keteneipi co er palada, 66 sentimeter kunupra keteneipi. 22 Akati lyom tep ikra deipi co yumada, ton tarange pe, ton tarange peda, bon potokra keteneipi. Keteneipmaidi, ton co pe, ton co pe yumada, dana-dana tarada, akati ayomna barimna co ton ketenepidi, dukdongopra deipi. 23 Adodina tenda ati, er dela utopunge tep, lyom opkal kapkotemna tep nengeda, utamna arah selatan tara dona tep, ingna co, er si rankada, dua puluh (20) ketenepra deipi. 24 Akati er dela utopunge tep nengeda, rangka co dua puluh (20) ketenepinge yuma, bon yuk-yuk potokra deipinge neitamai dongomna tep, co lupra deipinge, abon dongopra, ton atamna dela kain cap, ton ortamna dela kain cap, dukra derina tep talena ngeda, urasin telep boun keca perak dopra, aingna co amutara, er alas derina tep nengeda, 40 ketenepra deipi. Ada, tenpu ingna co yumada, ‘Tu beprur’ tenen, aco amutarada, tebalal tara pe, dumsisi tara peda, kunumna weik keca er si perak di, alas keca ton yangapra deipi.

25 Ange utopu, atenda ati itara, (arah bagian utara) tamna peda, dela utopunge ton deipi. Ada, akati er dela lyom kain kapkotemna tep, co dopropidi, akeca er si rangka, ingna co dua puluh (20) ton, ketenepra deipi. Atep, akati utamna (arah bagian utara) cap, tonda itamna, (arah bagian selatan) capda, utotopu ketenepra deipi. 26 Ange konum kupi dingeda, arangka ingna co yumada, ‘Tu beprur’ tenen, aco yumada, amutara yangdina derina (alasnge) tep nengeda, kunumna weik keca perak di, akeca empat puluh (40) ketenepra deipi. Ukupi dingeda, tenpu kain dela rangka co iriamu tara, er yangdina (alas) tep nengeda, butene-butene kepra deipi. Aingna co yuk-yuk dinin, aco yuma amutarada, alasnge butene deipidi, ton yangdina ngeda, tebalal tara, ton yangdina ngeda dumsisi tara deipi.

27 Tonda, adodina tenda ati, er keteng dangban tara damaida, dela pena tep nengeda, dela utopunge er lyom kain rangkada, co ngangtan bari (6) ketenepra deipi. Sundi ingami co yuma, ‘Er kwirye tekredi, gat kupkamre’ tenen, akasia co di, kwirye ikrap tekamu co cap, adinor getemna co cap, co ngangtan bari (6) ketenepra deipi. Ikami co amutarada, ‘Tu beprur’ tenen, aingna co tebalal tara pe, dumsisi tara peda, yangdina tep, alasnge butene yakra deipi. 28 Tonda, adodina tenda ati, keteng dangban tara dinin, er kumun-kumunai dutara ngeda, co di rangka butene ton ketenepra deipi. Ton ngeda dana tara, itara (bagian selatan) ton ngeda utara (bagian arah utara) ikra deipi. 29 Akati kumun-kumunai pena tep, co rangka butene ketenepidi, arangka butene doupra, dutara di deiki tara yuma men dukdongopra deipi. Ada, rangka butene ketenepi dinin, iki co tuai tarada, yuk-yuk ikra deipi. Dinino, aiki co urup tarada, dukdongopidi, geteprapipa, nong tenpu kupu. Ukupi ngeda, arangka co urup tarada, tenpu bulat keca, er si cincin ketenepra deipidi, aco butene urup tara kikiman dukdongopi. Ukupidi arangka coda, akati kumunai deipi. Arangka iki coda, akati keteng dangban tara dinin, ton rangka coda itara, ton ngeda utara deipi.

30 Atep nengeda, aco di keteneipi rangka co yumada, nukrapidi banbari (8) ketenepra iki. Tonda, aco yumada, ‘Tu beprur’ tenen, aingna co iriamu tara, yangdina keca (alas) tep nengeda, telep boun keca perak dopura, aingna co yangdina (alas) nukrapidi, 16 ketenepra deipi. Tenpu rangka ingna co iriamu tarada, kunumna weik keca perak di keteneipi, yandina alas keca tep nengeda, butene-butene kupra, yakra deipi. Ton ngeda, tebalal tara, ton ngeda, dumsisi tara yakra deipi. 31 Adodina tenda ati, adinor wiringdina tep nengeda, sun anengdi akasia co doprapidi, wiringna coda, pamubari (5) ketenepra deipi. Aketepra deipi co pamubarida, adodina tenda ati tenpu tarapu pamubari wirikra deipi. 32 Ange utopu ton, yuk pamubari wiringdina coda, adodina tenda ati, adinor wiringdina tep nengeda, ton akati ortara wirikra deipi. Ange utopu, ton pamubarida, adodina tenda ati dum dam tara pe, keteng dangban tara peda, ton pamubari co wirikra deipi. Awiringna co yumada, nukra 15 co deipi. 33 Allah er si eremna tep, dodin tenda ati, er amnya bo arum erepra talena tep, ati pum tara dinin, keteng yakan tara cap, Keteng dangban tara cap, neitam bisi wirikra derin coda, dana-dana tara akati dela neitamaipu wirikra deipi.

34 Allah er si eremna tep, ki dodina tenda ati neitamai, tekeipidi welepi co yuma cap, wiringdin co yuma capda, ‘Urasin pio telep kupkamre’ tenen, kunumna weik telep gat keca, emas di palepra deipi. Akati co yuma, tengdin co cap, adeiki di adinor derin wiringna co cap, dukdongona talena tep, aco neitam-neitamaipu yumada, urasin telep gat keca emas dipapu, bukep do, cincin do, akeca urasin utopu keca, bulat kepra keteneipidi, getepra deipi. 35 Uda, sun apel don neng dipapu, atenda ati buplan dam lelimna tep, lyom kain pio urasin telepnge, er si kain lenan boun nge wipra, gorden ton ketenepra deipi. Akain gorden wina tep nengeda, urasin telep tapu, er si wol tapu, mirin singkaluma warna birunge cap, mirin ungu tuange cap, yapi binge cap yuma di, opkal wina ila kael nengdi, agorden opkal deiki gambar utopu keca wipra Keteneipi. Ada, alyom kain deikida, malaikat urasin utopu keca er sida, Kerub, wipra deipi.

36 Alyom kain buplan, er si gorden, gerengkotemna tep nengeda, akasia co dumbari ketenepra deipi. Aco bol deikida, urasin telep kuna tep, kunumna weik gat keca, emas di palepra deipi. Tonda, aco deiki tarada, gwarepra kamkotemna tep, arekra talen keca ton, emas dipapu betapra deipi. Tonda, aco dumbari, ‘Tu beprur’ tenen, er amutara yangdina alasnge tep, telep boun keca, er si perak di, aco amutara derin keca, dumbari ton petupra deipi.

37 Ange konum kupi dingeda, Allah er si eremna tep, ki dodina tenda ati pumbon wengban bisi buplan damai, lelimdongona tep keca, er si gorden ton ketenepi. Angeda, urasin telep kain lenan, boun pio telepnge doupra, opkal win tapu er si wol tapu, er urasinda, mirin singkaluma warna birunge cap, ungu tuange cap, yapi binge cap deiki di, betapra wiprapidi, alyom kain gorden, er urasin pio telep kupra deipi. 38 Tonda, akati buplan dam co pamubari (5) ikami co deikida, gwarepra talena tep keca, pamubari ketenepra deipi. Aikami lyom co gum-gum sirikaida, bulat utopu keca, er si cincin ton, emas di petupra deipi. Tonda, aco deiki yumada, urasin telep gat keca emas di palepra deipi. Dinino, apamu bari lyom co, ‘Tu baprur’ tenen, aco amutara yangdina derina tep nengeda, telep gat keca perunggu di, alas keca petuprapidi, yakra deipi.