Exo 37 | XteSC | STEP | Allah er si Yahwehdi, “Ange kunkamrume, ange men kunkamrume,” peipudi, sekra deiamu upu, kipra derina tep, co bekin Peti Perjanjian pumbonda, Bezaleeldi betapra dopu. Ada, akasia co di deipra dopu. Aco bekin er lyomda, 110 sentimeter deiki di betaipu. Ton er pala cap, udini itara lyom (tinggi) capda, 66 sentimeter kunupra deipudi dopu.

Exodus 37

Allah Yahweh pedina upu kipra, derin bekin co pum, Peti Perjanjian betamna tep, pepu upu

1 Allah er si Yahwehdi, “Ange kunkamrume, ange men kunkamrume,” peipudi, sekra deiamu upu, kipra derina tep, co bekin ^{▼▼co bekin – Aca di co bekin sekmupkada, ada, Indonesia upu deiki di ‘Peti Perjanjian,’ penunge. Akeca pumbonda, Allahdi, “Ukupkamrume,” pepra deiamu upu, gel pala deiki sekudi, Musa kareamupa, Musadi agel doupra aco bekin pumbon dongopudi, Allah er si eremna tep tenda ati, Pio Telep Lengna Ati neitamai deiamupa, dakuramu. Ange kael kemna tep, Keluaran 25:11 dinkurume.} Peti Perjanjian pumbonda, Bezaleeldi betapra dopu. Ada, akasia co di deipra dopu. Aco bekin er lyomda, 110 sentimeter deiki di betaipu. Ton er pala cap, udini itara lyom (tinggi) capda, 66 sentimeter kunupra deipudi dopu. 2 Apeti co pum, neitamai tara pe, bol deiki tara pe yumada, kunumna weik gat keca, emas pio telep nge dipapu, palepra deipudi betaipu. Abetapunge deiki dinin, pirman tara yumada, emas dipapu deipra gwatepdongopu.

3 Tonda, apeti co parep dana-danada, urasin telep keca emas di, bukep deriramengtopu keca, tonda cincin utopu kupra, dumbari petupra keteneipu. Ada, butene ton dana tara parep, ton butene ton dana tara parepra keteneipu. Abetaipu ngeda, lyom pela co abon dongopra, doua bana tep keteneipu. 4 Apedina upu kina co pum, Peti Perjanjian pela lyom co di dopra bana tep nengeda, Bezaleeldi akasia co dipapu dopra keteneipu. Ukupudi apela lyom co bol deikida, ‘Urasin telep kupkamre’ tenen, kunumna weik keca emas dipu palepra deipu. 5 Apela lyom co doprapudi, apedina upu kidin co peti, er sida Peti Perjanjian pumbon, parep dana-dana di, bukep utopu kupra, petupra keteneiamu bonpu dongopra deipu. Ada, apeti co bekin, Peti Perjanjian dubana tep kupu.

6 Ukupu dingeda, apeti co bekin, er si Peti Perjanjian deiki tara buplan singidongona tep nengeda, emas pio telepnge deiki di betapu. Abuplan er lyomda, 110 sentimeter. Abuplan er palada, 66 sentimeter kunupra, deipudi dopu. 7 Ukupu dingeda, apeti buplan singina deikida, dana siri-siri derina tep, malaikat urasin utopu keca, er sida Kerub, ^{▼▼kerub – Akeca gambar dina tep, Keluaran 25:18 dinkurume.} petupra deipu. Ton tara tenpu, ton tara tenpu deipu. AKerub kecada, emas di dopu dinin, emas deiki yuma, ‘Urasin telep kupkamre’ tenen, gat keca palu di, taik-taik pepra, keteneipudi dongopu.

8 Kerub butene keteneprapudi, apeti buplan singina tep, deiki deipmau ngeda, ton nge atara sirik, ton ngeda atara sirik, ton ngeda ortara sirik deipu dinin, abuplan cap, aKerub butene capda, nong tenpu dukdongopra deipu. 9 Ukupra deipupa, aKerub butene sun polda, apeti bekin co deikida, ortara di, atara di meneng damaipu dipdongopdarei. Ukupupa, aKerub sun pol sirik-sirikda, yana dipdongopdareidi, meneng damaipu kupdarei. AKerub pol ortara di, atara di dipdongopdaprei ngeda, Allahdi, “Angeda ukunkamrume, angeda, pio men kunkamrume,” pepra deipudi, sekeipu upu, Musadi, apeti co bekin, Peti Perjanjian pumbon dongopunge deikida, lelipdongoprei. Apel yumada, Bezaleeldi dopu.

Roti kwaneng dapra, derinai meja co betamna tep, pepu upu

10 Tonda, Bezaleeldi roti kwaneng dapra derina tep, meja coda, akasia co dipapu betapra deipu. Ameja er lyomda, 88 sentimeter. Tonda, er palada, 44 sentimeter kunupetepra dopu. Tonda, utara di tengdina tep nengeda, ameja er lyomda (tinggi), 66 sentimeterpu kunupra dopu. 11 Ameja co deikida, urasin pio telep gat keca emas, pio telepnge dipapu, palepra deipudi dopu. Tonda, ameja co sirik-sirik yumada, urasin telep gat keca, emas dipu deiprapudi, ongopra gwatepdongopu. 12 Ameja co piriripa tara er palada, 7,5 sentimeter deipra dopu. Ukupudi, ameja co deiki sirik tara yumada, urasin telep gat keca, emas dipu deiprapudi, gwatepra ongopdongopu. 13 Ange konum kupu dingeda, urasin telep gat keca emas di, bukep wiramenga utopu kupra, dumbari petupra, aco gum-gum tara deipu. Ameja deiyo tara parep dana-dana sirik yumada, bukep utopu kupra, keteneipu ngeda, pela lyom co dongopra deipu.

14 Aemas bukep utopu wipu ngeda, ameja co pirman tara barimna tep, dekdongopu. Ada ameja dubana tep, pela lyom co di doupra, doua ban taruda, ‘Ange di talepra dubankamenge’ tenen, kupu. 15 Ameja pela lyom co doupra bana tep coda, er si akasia co dipapu dopra keteneipu. Ukupudi, apela lyom co deikida, urasin telep gat keca, emas dipu palepra deipu. 16 Ukupu dingeda, jen keca lukra derina tep keca, er sida piring-piring cap, metek me mau, er sida cangkir cap, tonda, me dikra derina tep, weik lyom me mau er sida, kendi cap, me gwepra jen mau mangkok cap, yuma keteneipu. Ada, Allah tep, karenkameng anggur me dikra derina tep, keteneipu. Akeca yumada, urasin telep gat keca, emas pio telepnge deiki dipapu, betapra deipu.

Lampu weica deiyo dona tep, pepu upu

17 Bezaleeldi, lampu weica deiyo dopu. Ada, alampu weica deiyo deipmengepa, talenange cap, yakra derinange capda, emas pio telepnge dipapu, gat keca palu di, taik-taik pepra keteneipudi, betaipu. Adeikida, co kait popkurya tep, buke kemamrenge utopunge cap, bangku utopunge capda, urasin telep gat keca emas di, petupra deipupa, tenpu kepu. 18 Alampu weica neitamaida, deiyo tenpu welepu dinin, ange deiki kwa ngangtan bari (6) keteneipudi deipu. Ada, dana parep tara kwa weneri deipudi, utopu dana parep tara, kwa weneri ton ketenepra deipu. Akwa ngangtan bari (6) cap, neitamai deiyonge cap, nong tenpu kupu. 19 Akwa ketenepra deipkai talena tep nengeda, kait keca er si bunga badam, dumbari (4) petupra deipu. Ukupudi, adumbaringe yumada, er kait laramre utopunge cap, er buku kemamrenge cap, er bangu cap, yuk-yuk ketenepra deipu. Ange utopu, ngantan bari (6) kwa neitamai deiyonge di, belepunge yumada, akait keca urasin utopu keca petuprapudi deipu. 20 Alampu weica kwa kwakunge damaida, bunga badam utopunge, dumbari keteneipu dingeda, er kait kepkurya tep buku kemamrenge cap, er bangu cap, ketenepra deipu.

21 Akwa yuk-yuk kwakra welepkai yumada, bunga badam buku kemamra utopunge, ketenepra deipunge di, deipra welepu. Ada, ton kwa butene welepkainge amutara, tenpu bunga badam buku kemamra utopunge deipu. Ange utopu, ton kwa butene welepkainge amutarada, tenpu bunga badam buku kemamra utopunge deipu. Ange utopu, kwa weneringe amutara ton deipu. Kwa welepunge yumada, ngangtan baripu (6) kupu. 22 Lampu weica neitamai kupu deiyo cap, bunga badam buku kemamra utopunge cap, er teru utopu cap yuma, nong tenpu kupra deipu. Ange yuma betamna tep nengeda, urasin telep gat keca, emas di dopra, taik-taik pepra betapudi, ketenepra deipu. 23 Alampu weica deiyo tenpu welepu dinin, er weica lana tep nengeda, yoneitam bari (7) keteneipu. Ada, dana-dana tara weneri (3) dinin, neitamai ngeda yoneitam baringe kupu. Ukupu dingeda, weica uku jenmareyane, uku di er tapu jeprepa, gat kupyopda, atapu sengna keca cap, uku gama sakrenge daemna tep keca cap, emas di betapu. Ada, alampu weica pel don keca yumada, kunumna weik keca, telep gat keca emas di betapra deipu. 24 Lampu weica deiyo cap, er kwa welepunge yuma cap betamna tep nengeda, urasin telep gat keca, emas er ikinda, 35 kilogram, pio telep ngepu keteneipra deipu.

Siltong telep keca dopra, uku dongonai betamdina tep, pepu upu

25 Allah er karena tep, siltong telep keca uku dongomnaida, Bezaleeldi, akasia co di betapra dopu. Ange betamna tep nengeda, kumun-kumun ketenepra deipu. Akumun keteneipunge, er lyom cap, er pala capda, utotopu 45 sentimeter kupra deipudi betaipu. Ange udi itengdin coda, 90 sentimeter keteneipu. Asiltong telep keca, uku dongona tep betapra deipkai, urup tarada, sapi bisam giso takke beleramretopu kupra, takke betapra deipupa belepu. Ukupudi akeca deikipu tapakra deipupa, nong tenpu kupu. 26 Itara kumun damai dumbari, sirik-sirik welepmarya deiki, sapi bisam giso takke beleramra utopu kupra deipu ngeda, urasin telep gat keca, emas di palepra deipudi betaipu. Tonda, sirik tara dana-dana yumada, urasin telep keca, emas di gwatepra ongopdongopu.

27 Tonda, siltong telep keca, uku dongona tep, betapra deipunge, parep tarada, bukep utopunge, urasin telep gat keca, emas di butene yuk-yuk, dana-dana wipra keteneipu. Ada, akeca pela lyom co deiki doupra, ban taru talena tep, betapra deipu. 28 Asiltong keca uku dongonai tep, pela lyom co dopra bana tep, akasia co dipapu, dopra keteneipu. Ukupudi, apela lyom co deikida, urasin telep keca, emas dipu palepra deipu.

29 Bezaleel er dipapu, Allah si eremna tep, siltong telep keca, uku dongopmengepa, nintong telep peramre keca cap, ‘Angeda Allah erngepu kupkamrure’ tenen, minyak me telepnge, lingkamenge nge cap, ange yuma tapakrapudi, betaipudi deipu.