Exodus 38

Allah er si eremna tep, yapi keca popra, uku dongonai betamna tep, pepu upu

1Bezaleeldi, gat co er sida akasia co doprapudi, Israel nesalada, ‘Allahdi nun mali kunup keca kaukepserdi, daepkamser’ tenen, Allah er karena tep, yapi keca popra uku dongonai, er sida mesba dopra deipu. Amesba dona tep, kumun dana-dana kunupetepudi, er lyom cap, er pala cap yumada, sun yuk-yuk dinin, er kunumnada tenpu, ada 2,2 meter kunupra sekra dopu. Tonda, amesba er adi itara tengdin co, er lyomda 1,3 meter kunupra seku. 2Yapi keca popra uku dongonai, er si mesba, betaipu taruda, er kumun itara dana-dana yumada, sapi bisam giso takke beleramre keca utopu kupra, betapra deipu. Adopra deipunge yumada, nong tenpu kupra dukdongopra deipudi, urasin telep gat keca, er si perunggu di palepra deipudi dopu. 3Tonda, Besaleeldi, yapi keca popra, uku dongonai mesba betapra deipu dingeda, tu keca gamna tep, er sida kuali ton keteneipu. Tonda, uku sikke luna sikop cap, yapi burupra lingdina mau mangkok cap, tonda tu lukra doron keca, er si garpu cap, tonda uku sengnai cap yuma betapu. Akeca yuma betamna tep nengeda, urasin telep gat keca, perunggu deiki dipapu petuprapudi, akeca yuma dopra keteneipu. 4Tonda, uku dongon co derinai tep, perunggu di betaipudi mesba deiki deipu. Tonda, yapi keca popra, uku dongonai amutara, yakra derina tep nengeda, kawat tapu di wiramengtopu, perunggu di dopra, wiprapudi betaipu. Ange wipu dingeda, akecada mesba betapra deipka neitam-neitampu dopra, bena deipdongopu.

5Besaleeldi, ange ukupu dingeda, pela lyom co di, akeca dongopra doupra bana tep, utara parep dana-danada, bukep urasin pio telep kupra wiramengtopu kupra, urasin telep gat keca, er sida perunggu dipapu deipra dopu. Ange utopu, buri du dengameng keca, er sida cincin utopunge, dumbari di petupra keteneipudi, amesba dana-dana tara butene dukdongopra deipu. 6Pela lyom co doupra bana tep nengeda, akasia co di betapra deipu. Ukupu dingeda, aco bol deikida, urasin telep gat keca, perunggu di palepra deipu. 7Apela lyom co butene ketenepra deipu ngeda, bukep utopu kupra, dana-dana wipra keteneipu bon, acapu aco dopra dongopu. Ada, amesbada pela lyom co deiki di, doupra bana tep, apel dopu. Ayapi keca popra, uku dongonai betamna tep nengeda, pala co dipapu deipra dopudi, aco deiki yumada, gat keca perunggu di palepra deipu dinin, aco pumbon neitamai yumada, tali pumpu kupu.

Perunggu deiki di, me derin keca betamna tep, pepu upu

8Besaleeldi, “Ukupkurume,” pepra deipupa, bak me derinaida, urasin telep gat keca perunggu deiki dipapu betaipi. Tonda, amau amutara tekra derina tep nengeda, utara di dipra, itara tengdin keca peda, perunggu dipapu deipra dopi. Adeipra dopi perungguda, Allah cap, nimi cap, antamdana tep, bol di dodin tenda ati, akati bisi buplan damai melimami nerapudi, sun damai deipra urasin dirami keca, er sida cermin, akecada perunggu di keteneiamya cadi, aperunggu dipapu, dopra betaipi.

Allah cap, nimi cap, antamdana tep ati, akeana dodina ati dam beilya wina tep, pepu upu

9Bezaleeldi, Allah cap, nimi cap, antamdana tep, er keana tep dodin ati dam yumada, telep boun kain, er si kain lenan dipapu, beilya tep nengeda, adipapu keteneipu lyom co deiki di kapkotepudi, akati dana-dana yuma ongopdongopu. Ada, ongopdongopu ngeda, lyom kain lenan ila palange, kain gorden deiramengtopu kupra, wipdongopudi kapkotepu. Agorden iknapi selatan tamna wina tep, kain lenan er lyomda, 44 meter kunupetepra deipu. 10Abeilya ayumnya co yumada, akaia co 20 di ikra deipu. Tonda, ‘Aco tu baprur’ tenen, aco amutara, gat keca perunggu di, aco alasnge petupra keteneipu. Tonda, akain lenan gorden gwarepra talena keca cap, akeca amutara cincin utopu keca cap, alyom co deiki deipu. Ada, dana-dana di dungdongonai, talena tep kecada, kunumna weik keca, perak di betaprapudi, alyom co deiki koupdongopra deipu. 11Utara tamna peda, ange dopra arup deipinge utopu kupra, betapra deipu. Ada, abeilya ayumnya co yumada, akaia co 20 di tekra deipudi, ‘Aco tu baprur’ tenen, aco amutara, gat keca perunggu di, aco er alas keca petupra keteneipu. Tonda, alenan kain gorden kapra talena tep keca cap, akeca amutara cincin utopu keca cap, alyom co deiki deipu. Ada, gorden talena tep kecada, kunumna weik keca, perak di betaprapudi, alyom co deiki koupdongopra deipu.

12Tonda, keteng wengban tara lelimna tep, kain lenan pio telepnge, er lyomda, 22 meter kepungepu, dopra deipu. Tonda, alyom ayumnya co, 10 cap tekra deipudi, ‘Aco tu baprur’ tenen, aco amutara yakra derina keca, er alasnge 10 cap, perunggu di petupra deipu. Tonda, aco deiki gorden dungnai talena keca cap, akeca amutara cincin utopu keca cap, dukra derinai betamna keca cap yumada, kunumna telep keca perak dipapu betapra deipudi, alyom co deiki koupdongopra deipu. 13Tonda, keteng yakan tara buplan potokeipi tarada, pala kain lenan gorden, er lyom peda, utotopu 22 meterpu kunupetepra deipu. Atep, keteng wengban tara cap, keteng yakan tara capda, er lyom cap, er urasin cap utotopu kupra keteneipu. 14– 15Abuplan dam tebalal tara pe, dumsisi tara pe, dana-dana tara yumada, adipapu lyom pala weik kain lenan di deipu. Adeipu kain kiklipetepupa, er lyomda, 6,6 meter kiklipra sekudi deipu. Ange derina tep nengeda, ayumnya co weneri cap, tonda, ‘Akayumnya co tu bol baprur’ tenen, er amutara yakra derina tep, er alas keca weneri tep, perunggu di, petuprapudi, ketenepra deipu. 16Akati dam beilya wipra ongopdongopudi, abeilya co deiki kapkotepu lyom kain lenanda, pio telep boun nge dipapu wiprapipa, deipu.

17Akati dam deipu ayumnya co yumada, ‘Tu bol baprur’ tenen, aco amutara yakra derinada, er alas tep nengeda, telep gat keca perunggu di betapra deipu. Tonda, gorden gwarepra talena tep keca cap, dungdongonai cincin utopu derina keca cap, ayumnya co deiki tara cap yumada, kunumna telep boun keca, perak dipapu doprapudi deipu. Beilya iku co yuma ton nge di, ton nge di, dukdongopra talena tep nengeda, perak dipapu betapu. 18Akati dam wengbana tep, buplan bisi damaida, ila pala kain lenan boun nge ketenepra deipu. Aketenepra deipu kain lenanda, wol tapu, er urasinda, singkaluma warna birunge cap, mirin ungu tuange cap, yapi binge cap, ketenepra deipu. Akain er lyomda, 9 meter keteneipu, adi itara derina tep nengeda, 2 meter ketenepra deipu. Tonda, beilya deiki derina tep, ila pala kain peda utopu kupra kunupetepudi keteneipu. Aketenepra deipu kain deikida, ‘Urasin telep kupkamre’ tenen, wina deiki di, petupra deipu. 19Abuplan dam deipu kain talena tep nengeda, ayumnya co dumbari (4) keteneipu. Tonda, akayumnya co ‘Tu bol baprur’ tenena tep, aco amutara deipnepa, talena tep nengeda, perunggu di er alas keca dumbari di betapra deipu. Utopu tonda, co sirik-sirik, dana-dana talena tep keca cap, gwaremdongona keca cap yumada, kunumna telep boun keca perak dipapu betapra deipu.

20Dinino, Allah cap, nimi cap, antamna tep, er keana dodin tenda bol ati, bepekra derin tapu getena tep, ikami takke keca cap, akati dam dana-dana tara yuma ongopgenepra deipi lyom kain, gorden bepekra derin tep, tapu getena tep, ikami takke keca peda, gat keca perunggu dipapu, petupra deipi.

Allah er keana dodina ati dopi taru, kunumna weik keca yana karerami keca tep, pepu upu

21Allah cap, nimi cap antamdana tep ati, er si eremna tep keana dodin tenda bol ati dona tep nengeda, kunumna keca weika di kareramya deiki di akati dopi. Akati pumbonda, Allahdi, ‘Angeda kunkamrume, angeda, pio men kunkamrume,’ pepra, deiamu pedina upu, erdi seku gel pala butene ketenepra deipu ngeda, akati pumbon neitamaipu deipi. Akati dona tep nengeda, Musadi, “Kunumna weik keca, ukupra karepkamrume,” pepka utopu kupra karepi. Akeca karepi taruda, Musadi sun Lewi yala neng tep, “Akarenmang keca nukmumdi, ange yuma sekra deipkurume,” peputopu, ange yuma sekra deipi. Ange yuma seki taruda, imam Harun er mi Itamardi, deiyo kepupa, apelda dopi. 22Hurdi deipu ngebo er si Huri, er mi Bezaleelda, Yehuda yala ngebo kuramu. Allah Yahwehdi Musa tep, “Ukupra pel dopkurume,” pepra, deipunge yumada, Bezaleel er dipapu apel yuma dopu. 23Tonda, Ahisamak er mi Aholiabda, Dan yala ngebo kuramu. Ukuramudi erda, Bezaleel er pel melimna ngebo kuramu. Angebo Aholiabda, petumna pel dona deiyonge cap, moupra tenepetepnedi, kuna deiyonge cap, tonda, kain lenan urasin pio telep kupra winada, pio ila kael ngebo kuramu. Ada, kain wol er urasin mirin birunge cap, mirin ungu tuange cap, binge cap, wina kael ngebo kuramu.

24Allah cap, nimi cap, antamdana tep ati, er si eremna ati dona tep nengeda, Israel nesaladi bulupra kareryakarami emas yuma, er ikinda, denge pio weik, 1.000 kilogram keamu. Ange yumada, Allah er karena tep, akeca erepra doupnedi, “Allah tep karepkupe,” pepra kareryakarami. Doupra kareryakarami kilogram nukra seki ngeda, men taru Allahdi Musa tep, “Ne ati neitamai di, ‘Angeda, er ikin ware kuprap do?’ tenena tep, ikin kael kemna tep, akeca timbang kepmengedi, ikin ukupra-ukupra penkamengeda ake,” pepra, deiamutopu nukra, kareryakaramipa, derirami. 25Tonda, ‘Israel nesala, ware kupra kunung do?’ tenena tep, sun si sengna pel don taru di, bulupra derirami kunumna weik keca, er si perak kareryakaraminge yumada, tiga ribu, empat ratus tiga puluh (3.430) kilogram bulupra deiami. Ange deiaminge peda, ikin dorona tep, er timbang kemnada, men taru Allahdi Musa tep, “Ne ati neitamai di, ‘Angeda, er ikin ware kuprap do?’ tenena tep, ‘Timbang kepmengedi, ikin ukupra-ukupra,’ penkamengeda ake,” pepra, deiamutopu nukra, kareryakaramipa, timbang kepidi, “Er ikin ukupra kupmare,” pepra, sekra deipi.

26Sun Israel nesala, si sengna pel dorami taru di sengamitopu, akeca yuma weika di doupra yakarami. Ada, sun aneng yumada, men di, “Ukupra karenkamrume,” peiamutopu, sun ataruda, nesala gam kuramitopu nukra, tenpu-tenpu dinin, 5,5 gram nukra karerami. Tonda, men taru, Allahdi, “Ne ati karena tep keca, er ikinda, ukupra-ukupra nukmumdi, doronkamrume,” peiamutopu kupra dororami. Atep, nimi si sengna pel donmai taru di, Yordan me ortara di me goupra, Kanaan tara bana tep, yai neng, sun nimi si seki nengda, denge weik, enam ratus tiga ribu, lima ratus lima puluh (603.550) neng, si seki. Asi seki neng, sun keteng tamun umurda, 20 tahun itara kurami nengpu, sun si seki. Adinin dutara umur nengda, si men seki.

27Akunumna weik keca perak, tiga ribu empat ratus (3.400) kilogram ketenepra deipinge dipapu, Allah er si eremna ati dona tep, akati ayumnya co cap, lyom kain gorden cap, aco derina tep, aco amutara yakra derin keca, alas ngeda, seratus di betapra deipi. Tonda, buplan wengbanai lyom kain kapkotepi co, er alasnge yuma peda, aperak di betapra deipu. Aco amutara yakra derinange peda, yuk-yuk dinin, er ikinda, 34 kilogram deiki di ketenepra deipi. 28Aperak tupa kapmaunge, er ikinda, 30 kilogram akapu. Ukupmaupa, Bezaleeldi aperak doprapudi, itara tengdin co dungdongona keca, cincin urasin utopunge cap, kain lenan kapkotepnepa, talena tep keca cap, tonda ayumnya co itara singina keca cap, dopra deipu. 29Tonda, urasin pio telep gat keca, er si perunggu, Allah er karena tep, doupra ereprapidi, kareryakaraminge yumada, dua ribu empat ratus dua puluh lima (2,425) kilogram akapu.

30Adoupra yan derirami perungguda, Allah er si eremna tep, opkal bol di domi dodina tenda ati buplan dam, er tengdin co, ‘Tu bol baprur’ tenen, aco amutara yakra derin keca, er si alas ton petupra deipi. Tonda, ‘Allahdi nun mali keca kaukepseredi, daepkamser’ tenen, yapi keca popra, uku dongonai derina tep nengeda, telep gat keca er si perunggu di, amesba dopu. Tonda, amesba pel don keca, kawat tapu wirameng utopu kupra, deipunge cap, tonda, yapi keca popra uku dongonai, pel don keca yala-yala yuma ketenepra deipu. 31Tonda, Allah er si eremna tep, keana dodin tenda ati dam, ongopgenepra wiami beilya deiki deipi lyom kain lenan opkal deripra kamkotena tep, iki coda, ‘Tu bol baprur’ tenen, adinin itara tengdin ayumnya co amutara baripra derina nge, er alas yuma cap, tonda akati buplan wengban bisi dam, tekra deipidi iki co, er amutara derinange alas cap, tonda akati lyom kain bepekra derina tep, tapu getena tep, takke keca ikinge yuma cap, akeca yuma dona tep, Bezaleeldi aperunggu doprapudi, akeca yuma petupra keteneipu.