Exo 39 | XteSC | STEP | Bezaleel cap, Aholiab cap sundi, imam neng sun opkal kenekra Allah er si eremna ati pumbon dinin, Pio Telep Lengna Ati pumbon pel dona taru kemna tep, opkal wiprei. Aopkal er urasinda, pio telep lenan opkal kupu. Ada, kain wol er urasinda, mirin warna birunge cap, ungu tuange cap, yapi binge cap, deiki di deipra wiprei. Angeda, Allah Yahwehdi, Musa tep, “Imam neng, sun deiyo ngebo Harun, er kenekamre opkal ton, ukupra-ukupra wipkamrume,” peiamutopu kupra wiprei.

Exodus 39

Allah er si eremna ati pumbon pel dona deiyo neng, sun imam-imam neng, sun kenengami opkal tep, pepu upu

1 Bezaleel cap, Aholiab cap sundi, imam neng sun opkal kenekra Allah er si eremna ati pumbon dinin, Pio Telep Lengna Ati pumbon pel dona taru kemna tep, opkal wiprei. Aopkal er urasinda, pio telep lenan opkal kupu. Ada, kain wol er urasinda, mirin warna birunge cap, ungu tuange cap, yapi binge cap, deiki di deipra wiprei. Angeda, Allah Yahwehdi, Musa tep, “Imam neng, sun deiyo ngebo Harun, er kenekamre opkal ton, ukupra-ukupra wipkamrume,” peiamutopu kupra wiprei. 2 Harun er Efod opkal wina tep nengeda, kain lenan telep boun nge di kwanepdongopra wiprei. Awipreinge deiki ngeda, kain wol er urasinda, emasnge cap, singkaluma warna birunge cap, mirin warna ungu tuange cap, yapi binge cap, dopra deipredi wiprei. 3 Bezaleel cap, Aholiab cap sundi, kunumna pio weik keca, er si emas dopra, palu di taik-taik pepreipa, pio yambul kupkopda, ange yuma sekreipa, pio metek benang tapu utopu kupu pangeda, ange dopropreidi, kain lenan deiki deipra wiprei. Awiprei tapu er urasinda, singkaluma warna birunge cap, mirin warna ungu tuange cap, yapi binge cap deiki di deipra wiprei. Awina pel yumada, opkal wina ila kael ngebo dipapu, wipra deipu.

4 Ange konum kuprei dingeda, er dungdongon keca butene ton, Efod opkal dangol deiki dana-dana di dukdongopra deipreidi geteprei. Ada, efod opkal, er urasin yambulanun teng utopu kupra, taram dam deipra, daramdongona tep, Efod opkal parep dana-dana yana deipra dukdongoprei. 5 Imam deiyo ngebo Harun, er deiyoteng derina tep, boun opkal lenan, pio telepnge di kwanepdongopra wiprei. Opkal win keca di deipra wiprei ngeda ake. Ada, kain lenan boun nge di wiprei. Awipreinge deikida, kain wol er urasinda, gat keca er si emasnge cap, mirin singkalumange warna birunge cap, mirin warna ungu tuange cap, yapi binge cap, dopra deipreidi wiprei. Awiprei ngeda, Efod opkal deikipu bena tapakra deipreipa, aopkal cap, adeiyoteng cap, opkal urasinda, tenpu utopu kupra wiprei. Ange yumada, Allah Yahwehdi Musa tep, “Ukupra imam deiyo ngebo kenekamre opkal wipkamenge,’ pepra deiputopu, sun aneng butenedi apeiputopu kupra wiprei.

6 Sun anengdi, urasin pio telep gel butene, er sida delima gel dopropreidi, pio urasin telep kupra deiprei dingeda, gat keca er sida, emas deiki di gwatepra ongopdongopra deiprei. Tonda, sun apu bo Yakub, er si ton Israel, erdi deiamu nyapu dua belas nengda, sun si yuk-yuk dinin, agel deiki dana-dana sekra deiprei. 7 Ukuprei dingeda, agel buteneda, Efod opkal kepra daramdongona tep, tapu dangol deiki di kwerepmau tapu deikipu wipdongopra deiprei. Ada, ‘Nun Israel yala nesala, nun apu yapu yumada, dua belas yala neng di deipseipa, deipdanen yakanup nesala kunupe, tenenkameng’ tenen, angeda wipdongopra deiprei. Ange yumada, Allah Yahwehdi Musa tep, “Ukupra-ukupra ketenepkamrume,” pepra peiamutopu, dopra ketenepra deiprei.

Taram dam kemdongona opkal tep, pepu upu

8 Uda Bezaleel cap, Aholiab cap, sundi taram damai lelimdongona tep opkal ton wipra keteneiprei. Ada, Efod opkal deiki kenengna tep, dinin aopkalda, teng urasin utopu kupra, wiprei opkal tepa. Tonda, teng utopu ngeda, Efod opkal wipreitopu kupra, ketenepra deiprei. Ange wipreidi keteneiprei ngeda, Efod deiki palepra deipmareiya utopu keca dipapu dopra, wipreidi keteneiprei. Ada mirin singkalumange warna birunge cap, mirin warna ungu tuange cap, yapi binge cap, dopra deipreidi wiprei. Tonda, akeca deiki wipreidi, petupra deipreinge peda, akupmarei keca dipapu dopra deiprei. 9 Taram deiki lelimdongona keca, er urasin teng utopu ngeda, er urasin telep kuna tep nengeda, sirik dana-dana talepra, neitamai di butene kepra, gwinikrapreidi getepdongopreipa, segi empat kupu. Tonda, segi empat konum kupkopda, er lyom pe, er pala pe, yuk-yuk dinin, kunumpetenada, utotopu 22 sentimeter kupra, kunupetepra deiprei.

10 Taram dam lelimdongona keca, er urasin teng utopu keca deikida, sun anengdi urasin pio telep gelda, gang-gang dumbari baris ketenepra deiprei. Ukupra empat baris deipreiopda, urasin pio telep gel dopra, yuk-yuk dinin, tenpu-tenpu kupra dumbari deiprei. Ukupreidi, taram damai kenengna tep, aopkal deiki agel palepra deiprei. Ada, baris tenpunge palepra deiprei gelda, leng-leng pere gel, er si delima binge cap, topas gel cap, tonda baiduri gel cap, baris menmenange neprapreidi, dopra deiprei. 11 Gang-gang baris butenenge tep, nepra deiprei gelda ake. Teng utopu keca deiki, nemna baris butenenge derina tep gelda, Zamrud gel cap, Nilam gel cap, Intan gel cap di, palepra deiprei. 12 Gang-gang baris weneringe nepra deiprei gelda, er sida ake. Lazuardi gel cap, Akik gel cap, Kecubung gel cap di, paleprapreidi nepra deiprei. 13 Tonda, gang-gang baris dumbaringe tep, nepra deiprei gelda, ake. Pirus gel cap, Yakut gel cap, Ratna Cempaka gel cap di deiprei. Aurasin telep kupra deiprei gel amul di dutamna, (12) yumada, kunumna weik keca emas dipapu dopra, palepra ongopgenepra bingkai ketenepreidi deiprei.

14 Urasin telep kupra deiprei gel deiki yumada, sun apu bo Yakub, er si ton Israel kuramu. Erdi deiamu nyapu, agel 12 deiki di, sun si yuk-yuk sekra deiprei. Asekra deiprei ngeda, ‘Nun Israel yala nesala, nun apu yapu, sun tep tupa tenenkamep’ tenena tep, sekra deiprei. 15 Tonda, taram deiki lelimdongon keca, teng urasin utopu ngeda, rantai tapu utopunge buteneda, gat keca emas di deipra doprei. Ada, alen tapu orameng utopu kupra, deipreidi, doprei. 16 Tonda, sundi, gat keca emas di, bukep urasin utopunge butene ketenepra deiprei. Ange utopu, emas di cincin urasin utopu keca ton betapra deiprei. Ukupreidi, ataram deiki derin opkalda, teng urasin utopunge cap, acincin utopunge cap dopra, akeca itara sirik dana-dana deipreidi geteprei. 17 Rantai tapu emas di doprei ngeda, cincin urasin utopunge kupra keteneipmareidi, teng utopu keca deiki sirik dana-dana keteneipmarei ngeda, emas rantai tapu di, acincin bon dongopra deiprei. 18 Tonda, yukai kupkup sirik butene kapmau rantai tapuda, urasin telep gat keca emas di gwatepra deipmareiyaipu, yana koupdongoprei. Ukuprei dingeda, bukep utopu wipmarei emas ngeda, dukdongopreidi, Efod opkal, er bali tara kapmauaipu, yana dukdongopra deiprei. Ukupreiya tep, emas rantaida, Efod opkal dinin, morokyo deiki dana-dana tara dukdongopra deiprei. Ada Efod opkal er taram tamnge cap, bali tamnge cap, emas rantai tapke keteneipreinge di, dukdongoprei.

19 Tonda, telep gat keca emas di, cincin urasin utopu kupra, butene ton petupra deiprei. Ada, taram dam lelimna tep opkal utara dinin, dana-dana tara koupdongoprei. Acincin utopu ngeda, taram dam lelimna opkal utara konum dukdongopreipa, Efod opkal damai kupu. Ange kupreinge deiyoda, Efod opkal cap, ange deiki kenekamenge, teng utopu keca cap, kikiman darapdongopkamreiya tep kuprei. 20 Ange konum kuprei dingeda, gat keca emas di, cincin urasin utopu keca ton, butene petupra deiprei. Ukuprei dingeda, Efod opkal urasin dam tara dinin, morokyo deiki dana-dana tara koupdongoprei. Ada teng utopunge cap, Efod opkal cap, utara sirik daramdongona tep, acincin ketenepra deiprei. Tonda, aketenepra deiprei ngeda, Efod opkal deiki tara cap, dutara cap dukdongopra wipreia amutara, deiyoteng derina damai dinin, deiyoteng deiki tara deiprei. 21 Ange konum kuprei dingeda, Efod opkal er daramdongon tapu tep nengeda, teng utopu keca er cincin cap, Efod morokyo damai kapu cincin cap, dukdongopra kouna tep nengeda, mirin singkaluma warna biru tapu di bena getepdongoprei. Ukupreipa, ataram damai lelimna tep opkal, teng urasin utopu ngeda, deiyoteng derina deiki tara, deiprei. Ada, ‘Deiyoteng deipmangepa, men kwiripra sakamre’ tenen, koupdongoprei. Apel dopreinge yumada, Allah Yahwehdi, Musa tep, “Ukupkamrume,” pepra deiamutopu kuprei.

Imam-imam neng, sun kemna tep opkal, yuknge ton wina tep, pepu upu

22 Tonda, Musadi peipupa, sun Israel yala ila kael keami nengdi, imam deiyo ngebo, Efod ton kenengamu dinin, ange iriamu tara, er nong damaipu lyom kurun lenan opkal ton, er si juba kenengamu. Ange deiki tarada, yuk lyom opkal ton, lenan kain, er urasin mirin singkalumange (warna biru) dipapu wipinge kenengamu. Ajuba deiki tarada, Efod ton kenengamu. Uda, lyom opkal juba, warna biru ngeda, opkal win tapu mirin singkalumange (warna biru) dipapu wipu. Apel yuma dopyada, opkal wina ila kael neng dipapu wipi. 23 Lyom opkal mirin singkaluma warna biru ngeda, wipi taruda, kum dam derina tep nengeda, kain sekropa, gatnge di deipra wipi. Angeda, ‘Juba warna birunge kum damaida gweleprur’ tenena tep, adipapu men gwelepmantonge, taplakra deipidi wipi. 24 Ange utopu alyom opkal warna birunge wipi taruda, aopkal dari tara sirik ngeda, urasin telep kuna tep, pio telep co du er sida, delima urasin utopu kupra, wipra dukdongopra deiprei. Ada, kain lenan boun nge dinin boupinge cap, opkal wina tep, wol tapu mirin singkaluma warna birunge cap, ungu tuange cap, yapi binge cap, deiki di delima co du urasin utopu keca wipra deipi.

25 Ange konum kupi dingeda, kunumna weik keca emas di doupra, lelim pen keca, er si lonceng pio meteknge ton, petuprapidi, ketenepra deipidi gerekotepbei. Ada, juba warna biru opkal utara sirik dari tara yuma, delima co du utopunge gerekotepmaidi, adinin daneitamai di pio metek lonceng ton gerekdongopra banmananen, ukupra akeca butene-butene kupra deripkotepra beidi, gawal daki. 26 Ukupya tep, juba warna biru opkal, utara sirik dari tara yuma, menmena delima co du utopunge gerekotepmaidi, adinin daneitamaida, lelim pen keca, pio meteknge, er si lonceng ton, gerekotep banmananen, ange yuma gawal daki. Uda, apel dopinge yumada, Allah Yahwehdi Musa tep, “Ukupkurume,” peiamu utopu kupi.

27 Ukupidi, sun opkal wina ila kael keami neng dipapu Harun cap, er nyapu cap tep, sun nong deiki kemkameng lyom opkalda, kurun kemeja opkal ton wipra deiprei. 28 Tonda, imam ila deiyo ngebo, er giso getena keca tep, er si serban, pio telep kain lenan lyomnge doprapidi, topi utopunge ketenepra wipi. Ange utopu, er melimna neng, akati pumbon pel donkameng neng peda, sun giso geten kain lenan ton ketenepra wipi. Tonda, sun opkal pumbon dinin, bun pumbon dongon celana dalam utopunge cap, tapakra akeca wina tep nengeda, kain lenan telepnge di, dopra wipi. 29 Ukupi dingeda, imam neng, sun deiyo ngebo kenengkamre deiyoteng daramna tep nengeda, kain lenan, pio telep boun nge cap, opkal wina tep wol tapu, mirin singkalumange birunge cap, ungu tuange cap, yapi binge cap deiki di, urasin pio telep kupra wipra deipi. Ange peda, opkal wina ila kael neng dipapu wipi. Ange yumada, Allah Yahwehdi, Musa tep, “Ukupra-ukupra kupkamrume,” peiamutopu kupi.

30 Tonda, ‘Imam deiyo ngebo, er giso geten keca deiki deipmepepa, kenengkamre’ tenen, kunumna weik gat keca, er sida emas, pio telepngepu doupra, paku dangne keca, palu di taik-taik pepipa, yambulanun pala ton cap, kupra ketenepra deipi. Ukupi dingeda, apala emas keca deiki di, aupu petuprapidi sekra deipi. Aupuda, ake. “Angeboda, Allah Yahweh er ngepu, pio telep lengnapu kurure,” pepra seki. Ukupra akeca ton ketenepra deipi. 31 Tonda, apala emas keca deikida, aupu konum sekidi keteneipmai ngeda, ‘Imam neng, sun ila deiyo ngebo, akeca kenengkamre’ tenen, ange dopra, er giso geten keca, serban urasin tarapu deipi. Aderina tep nengeda, kain wol mirin singkalumange, warna biru di dopra, aemas keca er giso deiki getenange serbanda, urasin tara gerekdongopi. Ange yumada, Allah Yahwehdi, Musa tep, “Ukupra-ukupra kupkurume,” peputopu kupi.

Apel yuma dopra gawal dakinge tep, lap pepu upu

32 Allah Yahweh cap, nimi cap, antamdana tep ati, tonda Allah er si eremna tep opkal bol di dodin tenda ati dona tep, akeca-keca yala-yala yuma konum ketenepra deipidi, doramyanen dopra gawal daki. Ada Allah Yahwehdi, Musa tep, “Ukupkamnerume,” peiputopu, sun Israel nesala yumadi, apeiamutopu konum kupi. 33 Allah er si eremna tep, keana dodin tenda ati konum dopidi, gawal dakyopda, akeca-keca yuma dopra, Musa damai deriryai. Aderiryanmai kecada ake. Alyom kain tenda ati cap, deripkotepnepa talen keca cap, ayumnya co cap, wiringdin co cap, tonda, akati ayumnya co, ‘Tu beprur’ tenen, iriamu tara baripnedi, yakra derin kecada, Musa damai duyana karepi. 34 Tonda, akati singidongona tep kambing bisam popra, bol komopmengedi, bi keca likra deipnedi wiraminge cap, tonda ange deiki galuna tep, laut mokon pumbon kuramre keca, er si lumba-lumba mekina popra, er bol di deipra wiraminge cap yumada, akati pumbon neitamai yuk-yuk wilimna tep, lyom kain er si gorden cap, ange yuma dopra, Musa damai duyana karepi.

35 Ukupi dingeda, Allah erdi, “Angeda kupkamrume, angeda pio men kupkamrume,” pepra, deiamu pedina upuda, asekamu gel butene kipra deiami peti co pum, er sida Peti Perjanjian, ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Aco deiki yumada, emas dopra palepra deipi. Aco peti pumbon neitamaida, ila mambul keca weneri deipi. Ada, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu cap, Harundi taleamu maca cap, Allahdi Israel nesala tep kareamu im deiki kwaning, er si mana metekanun cap dopra, apeti pumbon dongopi. Sun Israel nesalada, ‘APeti Perjanjian damaida, Allah Yahweh, er Sambala cap, er puto cap, er dirine cap, er pio telep kurenge yuma capda, aPeti Perjanjian deiki tara pio akunkamsere,’ tenerami.} ange cap, apeti er pela lyom co doupra emban co cap, tonda, apeti co pum deiki tara buplan, ‘Allahdi nun mali kunup keca daepkamser’ tenen, yapi burupra, apeti er buplan singidongonange deiki lingderinkaminge cap, aketeneiaminge yumada, Musa er damaipu duyana deipi. 36 Tonda, meja betapra deiyaminge cap, ameja deiki derin keca yuma cap, tonda, ‘Allah nun damai akurure’ tenen, roti kwaneng 12, ameja deiki derinange cap, Musa er damai doupra yana deipi. 37 Tonda, upna lana deiyonge, er urasin telep gat keca emas telepnge di dominge cap, upna lanange pel dona tep betaminge cap, aupna deiki kun keca yala yuma cap, tonda, upna lana tep minyak me cap, keteneamidi, Musa damai doupra yana deipi. 38 Utopu tonda, ‘Allah gekepredi, kange deipkamser’ tenen, siltong telep pen keca, uku dongonaida, urasin telep keca, emas di dominge cap, tonda, ‘Allah er pel don neng wepra derina tep, apel don taru lingna minyak me cap, siltong telep pen keca cap, Allah cap, nimi cap antamdana ati, buplan dam bura tara derina tep, ila lyom pala kain cap, keteneiamidi, Musa damai yana deipi.

39 Tonda, ‘Allahdi nun mali keca daepkamser’ tenen, er karena tep yapi keca popra, uku dongonai mesba cap, telep gat keca perunggu di kawat wirameng utopu kupra, deiaminge cap, akeca damai pel dona tep, alat yala-yala yuma cap, tonda, akeca doupra bana tep, pela lyom co cap, tonda, sun imam neng buri cap, yan cap, me kuna tep ketenepra deiami me mau cap, ame mau amutara dukdongopra derinange cap, keteneiamidi, Musa er damaipu doupra yana deipi. 40 Tonda, Allah er si eremna ati dinin, bura tara ongopgenepra deipra wiami beilya utopunge tep, lyom opkal wipra kapkotepkami kain cap, akain beilya ayumnya co cap, akayumnya co, ‘Tu beprur’ tenen, er iriamu tara gat keca er si perunggu di palepra derinange cap, tonda, akati dam beilya buplan dam kamkotena tep, pala kain cap, kain gerengna tapu cap, tonda, adodin ati bepekra derina tep, takke co cap, ange yuma dopra, Musa er damai duyana deipi. Ange yumada, Allah er si eremna tep ati, ada Allah cap, nimi cap, antamdana tep, lyom opkal bol tenda ati pumbon kupkamu keca yala-yala yumada, konum ketenepra, Musa er damai duyana deiami. 41 Ange yuma konum deipropyopda, Allah er si eremna tep, Telep Lengna Ati talepra pel dona neng, imam nengdi apel donkameng taru, sun kemna opkal ton, wipra keteneiamidi, Musa damai duyana deipi. Ada imam neng sun ila deiyo ngebo Harun cap, tonda, er melimna tep, er nyapu cap, sun imam pel talepra don neng kenengkameng opkal tep, wipra ketenepra deiamidi, Musa er damai doupra yana deipi.

42 Sun Isarel yala nesala, ila kael keami neng yumadi, apel yuma konum dopra gawal daki. Ada, Allah Yahwehdi, Musa tep, “Ukupra-ukupra dopkamrume,” peiputopu, ange yuma pel dopbaramyanen, konum gawal dakidi, akeca yuma Musa tep doupra karepi. 43 Ange yuma konum kupi pangeda, Musadi, ‘Apel dopinge yuma dipetepudi, ‘Uda, ange yumada, tek sisi Allah Yahwehdi, “Apelda ukupra dopkamrume,” peiamu utopu kupra dopi. Apel yuma konum dopya tep, Musadi sun Israel neng yuma tep, ‘Allahdi anesala telep kweipkamre’ tenen, upu weika di telep pepra deipu.