Exodus 4

Allah puto Musa deiki deipu upu

1Musadi Allah tep pepu. “Sun Israel nesala ne upu men gekepnetengedi, men teka tenepnetenge. ‘Allah er si Yahweh, kan damai yana tekupa men epmume,’ pepnetengopda, ware kupkamne do?” pepu. 2Upepupa, Allah er si Yahwehdi tamupra Musa tep pepu. “Kan buru talepmaremada, ware keca kwapmaker do?” pepra asipetepupa, Musadi, “Ada ne maca pua,” pepu.

3Upepupa, Yahwehdi pepu, “Adoupmarem maca tuai tapo,” pepupa, Musadi dopra tapupa, adipapu amaca bal daupa, Musa er kware tep, kurapra beu. 4Ukupupa, Allah er si Yahwehdi ton cap pepu. “Tamupra yamemdi, abal amu taleprume,” pepu. Upepka tep, Musadi abal amu talepupa, adipapu abal tamupra macapu daue.

5Macapu daupa, Allah er si Yahwehdi aupu ton pepu. “Akupkamre ngeda, ukupmempa Israel nesala epmengopda, ‘E teka, nun nai bo Allah, Musa damai yan tekupa epka tep, tek pepmasere. Tek sisi Allah er si Yahwehdi, nun co puna neng Abraham cap, Isak cap, Yakub cap tep, kalekra melipyakaramu Allahda, Musa damai konum yan tekupa epke,’ utenepra, kael kepkamenge.” Allahdi pepu.

6Upepu dingeda, Allah er si Yahwehdi Musa tep aupu ton pepu. “Kan buruda, nong deiki kenekmarem opkal pumbon dongopo,” pepu. Upepupa, Musa buru er opkal pumbon dongopupa, er buru adipapu kot suse utopu, pu si kusta kupka cadi, dena keca utopu lek kupu. 7Ukupupa, Allahdi Musa tep pepu. “Uda, kange di ton cap, kan buru kan opkal pumbon dongopo,” pepu. Upepupa, Musa apeputopu buru dongopupa, er buru adipapu kusta pu gum kupupa, er nong yuma telep kuputopu, kange di ton cap er buru peda, teleppu kupu.

8Ukupupa, Allah er si Yahwehdi pepu. “Uda, Israel nesaladi, ‘Gume Allahdi pel dopmasere’ tenen, nimi men kupmanto keca, maca bal dakamrenge kupmempa, Israel nesala teka men tenepkengopda, amenda taru nimi men kupmanto keca butenenge, kupetepkamrume. Buru kwetenange kupkamrume. Ada, Israel nesaladi, ‘Gume, Allahdi apel dopmasere’ tenepkamenge. Ukupmempa, kunupsek pen pel abutenenge epmengopda, teka tenepkameng do, gum do?

9Israel nesaladi, ‘Gume Allahdi apel dopmasere’ tenen, ne kunupsek pen pel karepkamken butenenge kupmempa, epkameng dinin, kan upu teka men tenepmengedi, men gekepkengopda, Nil me yambulanun gweprapmemdi, gelal tuai yana diktapmempa, ame tamupra yapi kupkamre,” Allahdi pepu.

10Musadi Allah er si Yahweh tep pepu. “Naio, kanda akeca-keca yuma talepra, ila puto weik ngebo kurume. Apenmanerem dinin, ne upu penada, pumun taru di dipdongopra ataru, kandi aupu pepmanerem taru peda, ne sipyal cap, lyemu cap, ikin kunerepa, upu telep kupra men penune. Atep, yuk neng ne upu men gekepkamnenge,” pepu. 11Upepupa, Yahwehdi tamupra pepu. “Ware ngebodi nimi sipyal cap, upu pena deiyo keca cap karerur do? Ware ngebodi nimi amul kinina cap, upu men pepmanto kuna deiyo keca cap karerur do? Ware ngebodi nimi asuru dina cap, asuru puna deiyo keca cap karerur do? Gume, ange-ange yumada, mali kudina cap, telep kudina cap yumada, ne dipapu karenune. Neda Yahweh, neda Allah, ne Yahwehpu kununa cadi, ware ngebodi ton, akeca kuptu do? Gume nimi tenpunge peda men kuptue.

12Atep nengeda, ataru benkurume. Kandi pepkamremnge yumada, nedi melipra peterepkenepa, penkamrume,” pepu. 13Upepu dinin, Musadi ton cap tamupra pepu. “Naio, kanda akeca-keca yuma talepra, ila puto weik ngebo kurume. Nedi ukutaru aupu pepkene. Ne dorodina gume, yuk neng doproipkurume,” pepu.

14Upepupa, Allah er si Yahwehdi Musa tep, yu tenepudi, pepu. “Lewi yala ngebo Harun, ada kan du bo dano? Ne kaile, erda upu pena ila kael ngebo tek sisa. Er bisi neitamai yakara cadi, antapdarerumu dingeda, erdi kan tep kange deipkukere,” pepu. 15Upepudi, aupu ton pepu. “Amenda taruda, kandi er tep peipmemnyopda, erdi penkamre. Nedi kan tep peipkesi utopu pepkurume. Tonda, sun upu pen kamrerumnge cap, pel don kamrerumnge cap yumada, nedi melimsene pangeda, sun pel dopra upu penkamrerume.

16Erdi kan makuna tep penkamre. Ada kan si deiki, nimi yuma gekenai, Harundi upu peprepa, sun yuma gekenkamkenge. Kandi er tep pepremnge yuma gekepra, ‘Allahdi upu pepnere’ tenepra, Harun gekenkamkere. 17Atep nengeda, kandi amaca doupra embamemdi, nimi men kupmanto keca kuramempa, nimi yuma kael kepkamenge. Ada Israel nesaladi, ‘Gume, Allahdi apel doserure,’ tenenkamenga tep pepkene,” Allahdi Musa tep pepu.

Musadi Mesir mutu tapra, yuk mutu beu upu

18Musa tamupra er yamal bo Yitero damai beudi pepu. “Ataru kandi ne tep, “Telepe,” pepmanerempa, ‘Ne kayapu neng tupa kunung do?’ tenen, Mesir mutu dirbenkamne,” pepupa, “Jo, telepe, adipapu dabeo. ‘Dayuma telep kupkamker’ tenen, Allah moronkamkene,” pepu. 19Uda, Allah er si Yahwehdi Musa tep amenda taru aupu konum peramu. “Midian mutu yankumum taruda, peamkesitopu tamupra Mesir mutu benkurume. ‘Musa popkamepe,’ teneramkei neng yumada, konum depi,” pepu.

20Upepka tep, Musa er ner cap, er nyapu cap, er nyapsilip yuma cap, keledai bisam deiki bukra, Mesir mutu tamupra bei. Sun bai taruda, Allahdi peramu utopu, Musadi er maca cap doupra, Mesir mutu tamupra beu.

21Allah er si Yahwehdi Musa tep pepu.

‘Kunupsek pen pel donkamre’ tenen, ne puto kan deiki kareramkesi cadi, kan Mesir mutu bemem taruda, nimi men kupmanto keca yuma, Mesir mutu neng sun deiyo ngebo Firaun damai bena kunkamrume. Ukupkamrem dinin, nedi er tep kika keca karepnepa, erdi, ‘Jo telepe. Israel nesala Mesir mutu tapra betenge,’ pio men pepkamre. Sun talenapu kunkamsere.

22Ukupra balila kupre pangeda, kandi Firaun tep aupu pepkamrume. “Firauno, Allah er si Yahwehdi upepkere. Israel nesalada, Allah er nyapu du mi utopua kununge. 23Nedi pepkesi. Anesalada, ne du mi utopu tep, tapmempa sun bendopkamenge. Bemengopda, ne si erepkamnenga tep, sun tapkamrume, konum pepkesi. Konum pepkesi dinin, kanda balila weik kupkeupa, ne nyapu Israel nesala tep, ‘Gume, men tapkamne,’ pepmaruma tep, nedi kan du mi peda popkamne. Allahdi Musa tep, Firaun damai aupu perbenkurume,” pepu.

24Allahdi upepupa, Musa bisi banmau taru, bisi neitamai, yuk neng ati domyai mapkou taruda, Allah er si Yahweh yanapudi, ‘Musa popkune’ tenen, keteneipu. 25Utenepudi, popkou taru dipapu, er ner Siporadi si weik gel doprapudi, sun mi er den bam bol deiki tarange sekrapudi, Musa er yan deiki deipudi pepu. “Tek sisi, kanda ne nenge. Ada, nun nai Allahdi kan tep, ‘Popkune,’ tenepmaker dinin, nun pe mi er yapi deiki di lyepmaken adano,” pepu. Ada, Siporadi aupu pepka deiyoda, Israel nesala, sun nyapu den bam bol sengna tenena tep, ‘Kanda ne akengebo, nun pe yapi adano,’ pepu.

26Siporadi aupu pepka deiki di, ataruda Allah er si Yahwehdi Musa tep, ‘Popkaman,’ tenepmau ngeda tapu. 27Ataruda, Allah er si Yahwehdi Harun tep upepu. “Kanda nimi men kunge mutu neitamai bememdi, kan weit bo Musa cap antapdankamrerume,” pepu. Upepka tep, Allahdi peiputopu Harun gekepudi, amutu bena Allah amenda taru yantekamu mutu damai beupa, Musa cap atapdareidi, Israel nesala kuramitopu, sun telepe pena tep, Musa tep mutupu.

28Antapdareipa, Musadi Harun tep, Yahwehdi, ‘Upenkamrume,’ peipmau upu yuma lap pepu. Tonda, Allah er si Yahwehdi, ‘Kunupsek pen pel dopkamrum ngeda, ange ton, ange ton,’ peipunge yuma peda, Musadi Harun er gekena tep lap pepu.

29Konum kuprei dingeda, Musa cap, Harun capdi, Sinai mutu tapra, Mesir mutu ka tamupra bereidi, Israel nesala sun wisi neng, upu deiyo neng yuma upupreipa, yai. 30Yai pangeda, Allah er si Yahwehdi Musa tep peipmau upu yumada, Harundi sun Israel deiyo neng tep lap pepu. Lap pepupa, anesala yuma dinmaiyaipu, Musadi Allah karepmau puto deiki di, nimi men kupmanto keca, kunupsek pen pel dopupa, sun yuma epidi, ‘E tek sisa Musada, Allah er puto deiki di apel dopmasere’ tenepi.

31Sun epya deiki di, teka tenepi. Tonda, Musa cap, Harun capdi, “Gume, Allah er si Yahwehdi, nun ikin kuserenge cap, kange mun kange douramepunge capda, ange yuma Yahweh konum kael keamudi, nun tep bicaue tenepmaserdi, makunkamsere,” pepra, lap pepreipa, gekepi dingeda, sun Israel nesala yumadi gutam tu dipdongopra. Allah er si Yahweh tep, er si erepi.