Exo 40 | XteSC | STEP | Allah Yahwehdi, Musa tep, pepu.

Exodus 40

Allah Yahweh cap, nimi cap antamdina ati dona tep, pepu upu

1 Allah Yahwehdi, Musa tep, pepu.

2 Kan adipapu, ne Allah Yahweh si eremna tep, ne cap, nimi cap, antamdina tep ati, lyom opkal bol di keana tenda dodin ati dopkunerume. Ada, war tenpunge kepre taru, awarpu, nukra tanggal 1 tumi deiki di, apepmaken keana tenda opkal bol atipu keteneipmamum ngeda, atumi dipapu dopkunerume. 3 Ne si eremna tep dopmamem ati dinin, pio pumbon butenenge wilipra dopmamem ati er sida, Pio Telep Lengna Ati pumbon, ne Allah Yahwehdi, sun tep, “Angeda ukupkamrume, angeda pio men kupkamrume,” pepra, pedina upu deiyo peipsisinge, gel pala butene deiki sekeipsi ngeda, co bekin, er sida, Peti Perjanjian ^{▼▼Peti Perjanjian – Akeca kael kemna tep, Keluaran 39:35 dinkurume.} pumbon deipmum ngeda, kandi ange doropmemdi, adoprumnya ati neitamai, Pio Telep Lengna Ati pumbonpu bena deipkurume. Ukupmemdi, akati wilimna tep, aupu deipmamumnya urasin tarada, lyom opkal er si gorden di, gerekra kapkotepmempa, dolopredi aco deikida, lelipdongopkurume.

4 Tonda, ne si eremna tep dopmamem ati dinin, menmena wilipra doprum ati, er sida, Telep Lengna Ati pumbon, roti kwaneng derinai tep, tenpu meja betapra deiprumnge cap, nedi peipsisipa ameja deiki deipkamrum keca cap, tonda weica deiyo cap, weica lana tep keteneiprumnge cap, ange yumada, ne Telep Lengna Ati pumbon bena deipkurume. Ada, kandi pedina upu Peti Perjanjian kipra deipmamumnyai dinin, lyom opkal gorden gerekotepmamumnyai, atarapu bena dopra deipkurume. 5 Tonda, menmena wilipra dopmamem ati, Telep Lengna Ati pumbon dinin, ne Allah Yahwehdi, “Angeda kunkamrume, angeda pio men kunkamrume,” pepra, pala gel deiki sekeipsisi upu kipra deiprum co bekin, Peti Perjanjian er urasin dam tarapu, siltong pio telep keca uku dongonkamrum keca, er si mesba deipkurume. Ada, kandi pedina upu Peti Perjanjian kipra deipmamemnyai dinin, lyom kain gorden gerekotepmamemnyai, atara menmena wilipra dopmamem ati, metek mesba dopra, agorden damaipu bena deipkurume. Tonda, ametek mesba, er urasin telep kuna tep, kunumna weik keca emas di dopra, amesba nong deiki palepra deiprum ngeda, Musa kandi bena dopra, Telep Lengna Ati pumbon deipkurume. Amesba deikida, ne Allah karena tep, siltong pio telep keca dopra uku dongonkamrume. Ukupmemnyopda, ne si eremna ati dinin, bura tara buplan bisi, menmena wilipra doprum ati wengna tep, akati wilimna tep nengeda, lyom opkal gorden di, deripkotepmempa, kepdongopyopda adeiki di, akati wilipronkamrure.

6 Ne Allah Yahweh cap, nimi cap antamdina tep ati, ne si eremna ati urasin tarapu, ‘Allahdi nun mali kunup keca kaukepra daepkamser’ tenen, yapi keca popra yangedi, uku dongona tep, gat keca perunggu di, segi empat kupra keteneipidi, akeca neitamai ton, kawat deiyamya deiki, ‘Uku sengkamep’ tenen, keteneipi mesbada, acapu deipkurume. Ada, ne Allah cap, nimi cap antamdana tep ati damai dinin, bura tarapu, akati urasin tara amesba deipkamenge. Tonda akatida, pio telep lengnai cadi, er wengbana tep ban bisi buplan damai, yuk lyom kain, er si gorden di, derikotemna tep, acapu bena deipkurume.

7 Utopu tonda, ne Allah cap, nimi cap, antamdana tep tenda ati, bura tara dinin, ne si eremna tep, yapi keca popra yangedi, uku dongonkamengaida, atara, aopkal bol di dondin tenda ati ortara, daneitamai dinin, akati er urasin tarapu, me mau er sida bak, ton bena dopra deipkamrume. Ame mokonda, sun imam nengdi, sun yan cap, buru cap, me kuna tep, aceipu me gwepra yana dingdongonkamrume.

8 Ukupmemnyopda, ne Allah Yahweh cap, nimi cap antamna tep Pio Telep Lengna Ati, urasin din damai tara dinin, akati dana-dana tara yumada, lyom opkal kain di, beilya ton dopra deipkamrume. Alyom opkal gorden di, gwatepra ongopdongopmemdi, koupdongopkurume. Tonda, ‘Tali nengdi, ne Telep Lengna Ati damai bena weknung’ tenen, akati damai wengbana tep, abeilya buplan wengban bisi peda, lyom opkal gorden di gerekotepmempa, dolopredi, lelipdongopkamrure.

9 Ange yuma konum kupmemnyopda, ne si eremna tep, tenda bol dodina ati konum dopmemnge cap, tonda adodina ati neitamai deipmamem keca yala yuma capda, ‘Akeca yumada, Allah er mawangepu kunkamrure,’ tenena tep nengeda, peten kemdina tep, adipapu minyak saitun me mokon telepnge dopra, akati deiki cap, akati pumbon keca deiki yuma cap, minyak me di likra deipkurume. Ukupkamruma deiki di, ne Allahdi akeca-keca yuma, pio telep kupra deipkamne. Ukupnyopda, akati cap, akati pumbon kupkamre keca yala-yala yuma cap, pio telep, lek kecapu kunkamrure. 10 Akupmemtopu, ne Allah karena cap, yapi keca popra uku dongona cap tep, gat keca perunggu di, segi empat kupra keteneipidi, akeca neitamai ton, kawat deiyamya deiki, ‘Uku sengkamep’ tenen, keteneipi mesba cap, tonda akeca damai pel dona tep ketenepra deipmamum pel don alat yala-yala yuma cap, kandi telep minyak me gwepra, akeca deiki yuma likra deipkamrume. Ukupkamruma deiyoda, ‘Ange yumada, Allah er mawangepu kunkamrure,’ tenena tep, apelda dopkamrume. Ukupkamruma deiki di, ne Allahdi akeca-keca yuma, pio telep kudinkamne. Ukupnyopda, amesba cap, amesba pel don keca alat yala-yala yuma capda, pio telep lek kecapu kunkamrure.

11 Tonda, akati bura tara deipmamum me gwepra derinai, er si bak, sun imam neng buru cap, yane cap me kuna tep, me derin keca, er si bak dopra deipmamum me derinai cap, er amutara yan peda, utopu kupra, ‘Akeca yumada, Allah er mawange kunkamrure,’ tenena tep, minyak me gwepra, akeca deiki likra deipkamrume. Ukupkamruma deiki di, ne Allahdi akeca-keca yumada, pio telep kupra deipnepa, pio lek kecapu kunkamrure.

12 Apel yuma konum dopmemnyopda, kandi Harun cap, er nyapu cap tep, “Allah Yahweh er si eremna cap, nimi cap, Allah cap antamdana tep ati dinin, atelep lengna ati neitamai wengna tep, bisi buplan damai beso,” pepmempa, sundi acapu yangopda, kandi ketenepra deipmamem me mokon bak damai yangopda, Musa kandi sun yan cap, buru cap, me kupra deipkurume. 13 Tonda, kandi Harun tep nengeda, upepkamrume. “Allah Yahweh er Telep Lengna Ati pumbon neitamai pel talepra dona tep, imam-imam neng, sun deiyo ngebo kunkamreme,” pepra, wepra deipkurume. Ukupmem dingeda, telep minyak me gwepra, Harun er giso deiki likra deipkurume. Ada, ‘Allah er si eremna ati pumbon pel dona deiyo ngebo kunkamra cadi, Allah erngepu kunkamre,’ tenena tep, er peten kemna tep, minyak me mokon gwepra, er giso deiki likeipkamrume. Ukupmemnyopda, Harun erda, ne ati pel talepra donkamre taru, kenengkamre lyom opkal, pio telep lengnange dopra, er nong deiki kenekra deipkurume. 14 Ukupmemnyopda, kandi Harun er nyapu peda, imam pel don neng kunkamenga tep, “Sun deiyo ngebo Harun damai beso,” pepmempa, er damai yangopda, kandi, sun aneng peda, imam neng kenengameng lyom opkal, er si juba, sun nong deiki kenekeipkurume.

15 Harun er nyapu yuma tep, kemeja opkal lyomnge konum kenekeipmem dingeda, sun aneng deiki peda, sun deiyo ngebo Harun, er giso deiki minyak me likeipmamumtopu, er nyapu yuma peda, sun giso deiki minyak me likra deipkurume. Ukupmempa, sun peda, ne Allah si eremna ati pumbon neitamai, pel dona tep, imam-imam neng kunkamenge. Tonda, kandi Harun cap, er nyapu cap tep, minyak me likra derin pel dopmem ngeda, sun anengdi deipmengepa, dadeipdanen bankameng Lewi yala neng yuma peda, ne Allah si eremna ati neitamai pel donada, sun yala neng dipapu talepbankamenga tep, peten kemdina tep ukupra deipkurume. 16 Allah Yahwehdi, Musa tep, “Apel yumada, ukupra-ukupra dopkamrume,” peipunge yumada, Musadi aupu peiputopu kupra, apel yuma dopu.

Allah er si eremna tep, opkal ati dopi upu

17 Amenda taruda, Israel nesala Mesir mutu tapra yanamidi adinen, war tenpunge, tanggal satu deiki di, Musadi peipupa, Israel nesaladi, opkal bol di keana dodin ati tekra deipi. Akatida, Allah si eremna ati tep, opkal cap, co cap doprapidi, ketenepra deipi. Ataruda, Mesir mutu taprapidi, banmaiyanen, keteng tamun butene tahun konum kupu pangeda, akati tekra deipi.

18 Musadi Allah si eremna ati, opkal ati dopkami atep, Musadi peipupa apel domi. ‘Akati dela akeca deiki kamkwetepkamre’ tenen, gat keca doprapidi, ati dela deiyo keca ketenepra tuai deipi. Akeca deiki di, ati dela co ton, sirik-sirikai deipi. Tonda, aco deikida, adine ortara derin co ton deipidi, ayumnya co ton ikra deipi. Ada amenda taru akati opkal, akeca deiki kapkotepkamenga tep, akeca ton keteneipi.

19 Ange yuma konum keteneipi dingeda, konum keteneipmai pala opkal, ati pum ngeda doprapidi, aco deiki galupra deipi. Akati neitamai cap, bura tara cap, yuma dopi dingeda, Allahdi peiputopu, akeca yuma deiki tara, gat opkal ton dopra, galupdongoprapi. Ange yumada, Allah Yahwehdi Musa tep, “Angeda ukupkurume,” peiputopu kupu.

20 Ukupudi Allahdi, ‘Angeda ukunkamrume,’ peiamu upu doupra, Allah upu gel pala butene deipsekeiamu ngeda, emas di domi co bekin, er sida Peti Perjanjian pumbon dongopra, buplan dekdongopu. Abuplanda, ‘Allahdi nun mali keca daepserure’ tenen, emas di keteneipinge tep pepne. Abekine konum ketenepu dingeda, abekine eremna tep, dana-dana tara lyom co dinin, aco deiki emas deipi ngeda, getepdongopudi, erepra Allah si eremna ati, opkal ati neitamai dubena deipu.

21 Ukupu dingeda, aco bekin, er sida, Peti Perjanjian dana-dana yuma, ‘Tali nengdi men epkamenge’ tenen, peten kemdin opkal, lyom opkal pio telepnge kapkwetepudi, peten kupra deipu. Ange yumada, Allah Yahwehdi Musa tep “Angeda, ukupkurume,” peiamutopu kupu. 22 Allah cap, nimi cap, antamdana tep tenda ati, Allah er si eremna ati, opkal bol di domi tenda ati pumbon dinin, peten kemdina tep, lyom opkal kapkwetepmai opkal bura tarada, Musadi meja tenpu deipu. Adeipu ngeda, akati pum dinin, utara deipu. Allah er si eremna ati neitamai, utara deiami bungna keca damai, lyom opkal kapkotemyai deipu.

23 Allah si eremna ati neitamai meja deipudi, ameja deiki roti kwaneng deipu. Ange peda, Allah Yahwehdi Musa tep peiputopu kupu. 24 Allah cap, nimi cap, antamdana tep, tenda ati neitamai meja deipu ngeda, utara deipu dinin, ameja atara kupupa, itarada, dirin kuna tep, weica derina keca deipu. Aweica derinaida, weica weike, yoneitam bari kupra akapu. 25 Weica derinai konum ketenepudi, Allah Yahwehdi Musa tep, “Angeda, ukupkurume,” pepra deiputopu, weica ton deipu.

26 Ukupu dingeda, ‘Allahdi nun morona upu gekenkamser’ tenen, metek bekine utopunge dinin, ange deikida, siltong telep keca uku dongorami ngeda, ange ton akati pumbon deipu. Abekinda, emas kunumna weik keca di ketekepi. Akeca derinaida, Allah cap, nimi cap, antamdana tep tenda ati neitamai dinin, peten kemdina tep lyom opkal kapkwetemaiyai, bura tara acapu deipu. 27 Emas bekine deipu dingeda, akeca deiki uku sekrap Musadi nintong telep keca uku dongoramu. Akupu ngeda, Allah Yahwehdi peiputopu kupu.

28 Ange konum kupu dingeda, Allah si eremna ati, bura tara dinin, wengbana bisi tep buplanaida, lyom opkal ton kapkwetepu. Ada, ‘Tali nengdi akati pumbon men eptenge’ tenen, lyom opkal buplanai kapkwetepu.

29 Ukupu dingeda, Allah cap, nimi cap, antamdana tep tenda ati damai dinin, bura tara bisi buplan damaida, tenpu keca don deipu. Ada, ‘Mali kupmepepa, nun kaukepkamser’ tenen, ‘Gam keca popra, dopropnedi bena, akeca deiki uku dongopkamepe’ tenen, pala gel taplakra yakeipu. Tonda, akeca deiki di, Allah karena tep, gandum jen keca ton dopra, uku dongorami. Ange yumada, Allah Yahwehdi er tep, ‘Angeda ukupra pel dopkamrume,’ pepra deiputopu kupu.

30 Tonda sun buru cap, yan cap, me kuna tep, yangdina keca ton deipu. Ayangdin keca deipuaida, Allah cap, nimi cap, antamdana tep tenda ati ortara, gam keca popra uku dongopkaminge tep pala gel taplakra yakeipuai atara, daneitamaida, buru me kuna tep, yangdina keca deipu. 31 Ukuami ngeda, Musa cap, Harun cap, Harun er nyapu cap, sun buru cap, yane cap, me kupnedi akati wengbana tep, ame derin keca aca deipi.

32 Allah cap, nimi cap, antamdana tep tenda ati, opkal ati wengbenkoi taru cap, tonda, ‘Allahdi nun mali keca tep kaukepsetue’ tenen, gam keca popra uku dongoraminge tep, pala gel taplakra yakeipka damai benkoi taru cap, sun buru cap, yane cap me kurami. Ange kuraminge yumada, Allah Yahwehdi peiputopu kurami. 33 Allah si eremna ati, opkal ati cap, gam keca popra uku dongona tep, pala gel taplakra yakeipkai cap, akeca-keca bura tara yumada, lyom opkal dopropudi, beilya utopu kemna tep, kapkwetepudi, wipra ongopdongopu. Ukupu dingeda abeilya buplanaida, lyom opkal ton kapkwetepu. Ukupkopda, Musadi pel dopra gawal daku. Ton cap pel men doramu. Ange yumada, Allahdi peiputopu pel dopu.

Ila dua di, Allah si eremna ati yuma keprou upu

34 Allah er si eremna ati cap, akati pumbon keca cap, bura tara kwapu keca cap, pel yuma konum dopu pangeda, ila dua kwerepudi, akati yuma keprou. Ton ngeda, akati neitamaida, Allah Yahweh wekupa, er dirin weike kupu. 35 Ukupu taruda, Musa peda akati pumbon men wengbenmanto kupu. Ada, Allah cap, nimi cap, antamdana tep tenda ati dominge tepa. Deiyoda, ila dua akati kepropa, Allah Yahweh er dirine weik, akati neitamai wekra kunmaua tep, Musa men wekmanto kupu.

36 Ataru-ataru yuma, Israel nesala amutu neitamai embarami taru yumada, Allah er si eremna ati, opkal ati deiki di, ila dua welenapu kupupa, sun Israel nesala akati uruprapidi, yukai bena dopi. 37 Dinino, ila dua akati deiki men welepu taruda, acapu tupa kunmai. Yukai men embarami. Adua welepu tarupuda, ka di ton, akati uruptaprapidi dopra embarami.

38 Ange tep nengeda, ataru Israel nesala embandarami taru yumada, keteng komuni taruda, Allah Yahwehdi ila dua karepupa, akati deiki tara tekamo. Tonda lukunda neitamaida, adua kan-kan di, ila uku bu jeramudi dirine weike kuramu. Akeca yuma tupa kuramupa, Israel nesala yumadi dirami.