Exodus 5

Musa cap, Harun cap, Mesir mutu deiyo ngebo damai berei upu

1Amenda taruda, Musa cap, Harun cap, Mesir mutu deiyo ngebo Firaun damai bereidi upeprei. “Nun Israel nesala, nun nai bo Allah er si Yahwehdi pepmaker upu pepkuneme. Ada, ‘Kandi Israel nesala tep, “Telepe,” pepmempa, amutu tapra nimi men kungai katuai mutu bengedi, ne Allah gispal dona tep kalemna kalepmengedi, ne si eremkamnenunge.’ Allahdi upepra deipkeue,” peprei.

2Upepreipa, Firaundi tamupra pepu. “Allah er si Yahweh pepmarerum ngeboda, wareto puto ngebo kurura tep, aupu pepnererum do? Tonda, erdi, ‘Firaun ne upu gekeptudi Israel nesala taptu’ tenen, penmaner do? Gume. Sun pepmarerum ngebo Yahwehda, angebo ne walwale. Atep nengeda, Israel nesala taptenepa men betenge. Ange men kupkamne,” pepu.

3Firaundi upepupa, Musa cap, Harun capdi tamupra peprei. “Nunda Ibrani kunup nesala, nun nai bo Allah, er sida Yahweh. Nun cap tonpa antapra upu talepmepu. Atep nengeda, kandi, ‘Telepe,’ pepra tapsemempa, nimi kuna gumai, katuai mutu bana tep, komuni weneri bisi mapra bepe dingeda, nun nai bo Allah Yahweh er si eremna tep, gam keca popra, er tepapu karenkamepe. Ange men kupmepyopda, Allahdi nun wenemna tep, nun koripu dena deiyo keca karepkamser do? Agum dingeda, ‘Erdi peiprepa, nun podan nengdi, parang ya doupra poryankamseng do?’ tenen, kange mun kuserya tep, pepkeneme,” peprei.

4Upepreipa, Firaundi Musa cap, Harun cap tep pepu. “Ware deiyo tep aupu peprerum do? ‘Israel neng, nedi karepsisi pel tapra, sun pel men donkameng’ tenen, peprerum do? Sun butene bereso, sun pe pel dona tep, pel dorberume,” pepu. 5Firaundi aupu pepudi, aupu ton dukdongopra pepu. “Israel nesala amutu weik konum kunung dinin, sun butene di upu weik penmareruma taru neitamai di, Israel nesalada pel tapra talipu kunmange. Nedi karepsisi pel men donmange. Telep ngeda, ikin pelpu donkamenge,” pepu.

6Ukupra tenepka tep, atumi dipapu, Mesir mutu deiyo ngebo Firaundi er melimna neng tep upu karepu. Ada, Israel neng pel dona tep, Mesir mutu kalengna neng cap, pel dona upu bongna dina deiyo neng cap tep, Firaundi upu karepudi aupu peipu. 7“Sundi Israel nesala yuma tep, ‘Batu tehel dopkameng’ tenen, manmaneng bumdiramruma gume. Ukutaruda, sun taprumpa, kela-kela keca sun pe yuk eprapmengedi, gel pala betaipkununge,” pepu. Upepudi aupu ton pepu.

8“Batu tehel gel pala dona tep, sun pe yuk manmaneng erbenkameng dinino, dimumpa batu tehel gel palada, pumun taru betamamya utopu betaipkamenge. ‘Metekanunpu betaipkamnunga,’ tenena tep, moupra kalengkamrume.

Deiyoda, Israel neng sun pel dona dabal tep nengeda, sundi ataru yuma mali pepmengedi, ‘Uo, Firaundi telepe pepsetupa betepedi, nun nai bo Allah er si ereptepe,’ penmange. 9Ange tep nengeda, men di ikin pel dorami dinin, ukutaruda, ikin pel weik ton cap tapakra, sun nong deiki deipmumpa, sun Israel nesalada, apelpu donkameng taru neitamai di, tali-tali pemenge upu ton cap men gekenkamenge. Sun pel gawal dangnengepu tenenkamenge.” Firaundi pepu.

10Firaundi upepka tep nengeda, Israel neng pel dona tep, Mesir mutu kalengna deiyo neng cap, pel dona deiyo neng cap beidi pepi. “Nimi deiyo ngebo Firaundi pepmaserada, ‘Batu tehel gel dona tep, manmaneng kelkela keca sun tep tupa men karenkamsene. 11Ange tep wareto mutu do, sun pe yuk kel-kel keca erberume. Dinino, sun pel donkamrum ngeda, yambulanun peda, men tapkamrume. Men di batu tehel weik betaipra deipmarumtopu, tupa weika di betaipkamrume.’ Firaundi pepmasertopu, apelpu dopra kunkamrume,” pepi.

12Upepya tep nengeda, Israel neng Mesir mutu dana-dana yuma beidi, ‘Uo, batu tehel betaimna tep, kelkela keca dan cei eptepedi, doproptepe do?’ tenen, pio erbaramidi, manmaneng utopu keca bupra deipidi, batu tehel gel weika di betamami. 13Apel domi taru yumada, Mesir mutu pel dona kalengna nengdi pepi. “Kelkela keca kwamu taruda, gel betamna pele, ue tenpu deiki weika di doramrum utopu, tupa weika di betaipkamrume. ‘Metekanunpu betaipkamep’ tenena meme,” pepi.

14Mesir mutu deiyo ngebo, er nyapsilipdi, ‘Israel nesala pel weik donkameng’ tenen, Israel neng kankan dinin, pel kalengna deiyo neng wepra deipi. Ada Israel neng wepra deipi dinin, ‘Sun tara nengpu moupra dinkameng’ tenen, deipi. Israel pel don nesala kalengna tep wepra deiami nengda, Firaun er nyapsilipdi balena dopra, sun nong deiki bongopra poramidi, aupu pepra asipi. “Sunda warya tep do? ‘Batu tehel gel pala ukupra-ukupra dopkamrume,’ pepmeputopu, men betamarume. Ataru neitamai yuma, atumi pe, ambutumi peda, metekanunpu dopmarumdi men gawal dakmarumada, ware keca deiyo tep do? Nun pepmeputo weika di men betaipmaruma tep, warya tep do? Men di kuramruma utopu pua,” pepra wenemami.

15Ukupra dakuramipane, apopinge tep, Israel nesala, sun pel dona deiyo neng, sun Mesir mutu deiyo ngebo damai beidi, aupu pepi. “Naio nunda kan amutara kupedi, kan pelpu donup neng cadi, ware keca deiyo tep pepmarempa, kan melimna nengdi nun tep popmaseng do,” pepra asipetepi. Tonda upepi. 16“Naio, kan pelpu dokenup dinin, ataruda kelkela keca men buipsenge dipapu, kan pel deiyo nengdi, ‘Gel pala weika di betaipkurume,’ pepra pesenungada, ware keca deiyo tep do? Talipu bongopra posenung dinin, nun mali kuna gume. Kan mutu neng dipu mali kupmang dipapu posenunge,” pepi.

17Upepi pangeda, Firaundi, “Teka ne kaele, sunda pel dona dabal nesalapu kurume. Sundi, ‘Uo naio, telepe pepsetumpa, amutu tapra yukai betepedi, nun nai bo Allah er si eremna tep, gam kun keca popra, Allah tep kareptepe’ pepra, tupa moronerum dinin, sunda pel dona dabal kuruma deiki dipu, aupu penerume.

18Atep nengeda, aupu yapso. Ataru dipapu bura bererumdi, ne deipsisi pel dorberume. Batu tehel gel pala deiki betaimna tep, kelkela keca ton cap men karepkamseng dinin, gel pala deiki petumnada pumun taru weika di betamamruma utopu, amenda taru peda tupa kupkamrume. ‘Meteka dipu batu tehel gel betaimkamepe,’ tenena meme,” Firaundi pepu. 19Upepupa, Israel pel dona deiyo nengdi kael kepidi, ‘Uo, teka nunda kange mun deiki di, gel pala weika di betaimkamepe. Firaundi, ‘Pumun taru weika di betamamrum utopu, tupa weika di betaimkamrume,’ pepmasera tep nengeda, ikin weik kunkamepe,’ tenepi.

20Firaun damai di tapra bei taruda, Musa cap, Harun cap dinmareiyai beipa antapi. 21Israel pel dona deiyo nengdi, sun butene neng tep pepi. “Nun putapser ngeda ake. Ada sun kurum kecada, Allah er si Yahwehdi kael kemserur cadi, Allahdi sun butene tep weneptue, pepsepe. Deiyoda sun pererum upu cap, sun kurerum keca cap deiki di, Firaun cap, er melimna neng capdi, nun Israel nesala yuma tep, ‘Nun song’ tenen, dabale tenesenunge. Ukutaruda, nun popmanto kusenunga deiyoda sun butene ja,” pepi.

Allahdi, “Ne mawa nesala loptapra lyepkamne,” pepra deipu upu

22Musa tamupra, Allah er si Yahweh damaito beudi, Allah morona deiki di upepu. “Uo naio, kanda akeca-keca yuma talepra, ila puto weik ngebo kurume. Naio, ware keca deiyo tep, Israel neng damai, kange mun keca weik deipmaserem do? Tonda kandi, ‘Musada Firaun damai upu pepre pangeda, Israel neng sun nong deiki ikin keca weik ton cap deipkamre’ tenen, wepra deipnemum do?

23Ne kan si deiki, Mesir mutu deiyo ngebo, Firaun damai perbesi taru di gonga kepra, adinen dipra, aneitam taru yumada, Firaundi ikin pel tupa dimseredi, kange mun keca kareserure. Tonda, nun Israel nesalada, kan nyapu kunup dinin, kandi men makupra lyepmaserempa, ikin weik tupa kunmape.” Musadi Allah tep pepu. 24Upepupa, Allahdi Musa tep tamupra pepu.

“Ukutaruda, nedi Firaun tep, wenepra kupkamne kecada, epkamrume. Ne ila puto pio weik kununa cadi, ne buru puto deiki mambul pel dopnepa, Firaundi Israel nesala loptapkamre. Firaundi, ‘Ne song,’ tenepredi balila kupkamre dinin, ne puto buru deiki pel dopnepa, erdi Israel nesala tapra, er mutu neitamai di dombenkamre.” Allahdi pepu.