Exodus 8

Allah er si Yahwehdi, Mesir mutu korye weik karepu upu

1Uda dakuramipane, Yahwehdi Nil me mali kupra deipu tumi di nukra, yoneitam tumi konum kupupa, Allahdi, Musa tep pepu. Kanda Firaun damai bememdi, upepkurume. “Allah er si Yahwehdi, upepkere. ‘Israel nesaladi, ne si erepkamneng’ tenen, kandi anesala tep lopra tapmempa, nimi gum mutu katuai mutu neitamai benkamenge, pepkesi.” 2“Atep, kanda ne upu men gekepnememdi, ‘Bana gume,’ pepnememnyopda, ukupmem pangeda, nedi sun Mesir mutu neitamai yuma, korye pio weik karepkamsene.

3Nil me pumbon di korye men nukmanto pio weik kupredi, me pumbon di korye weike welepredi, Firaun kan ila ngebo ati bungnai cap, kan manai cap, korye weika di dinikamkere. Kan amutara pel deiyo neng sun ati pum cap, Mesir mutu nesala sun jen danai cap, sun jen ketenemnai cap, sun kunai yumada, korye weik wekamre,” pepu. 4“Korye ayuma bulupra kan damai weik yana wekmengopda, kan cap, kan pel dona deiyo neng cap, Mesir mutu nesala yuma cap, sun nong deiki welesengepa, sun yuma mali kange doupkamarume.” Allahdi Musa tep, konum pepra deipudi, “Firaun damai perberume,” pepu.

5Amenda taru Allah er si Yahwehdi, Musa tep, pepu. “Kandi, Harun tep pepkurume. Kan buru deiki doupmum maca doupra, Mesir mutu me deiki yuma gweiptopkurume. Ada tali embarur me deiki cap, sengdongomamre mokon deiki cap, metek me mokon yuma cap, ame yuma deiki gweiptopmempa, korye weik welepredi, Mesir mutu yuma dinikamre,” pepu. 6Upeiputopu, Musadi Harun tep pepupa, Harun er douramu maca di, Mesir mutu neitamai kwamu me cap, mokon cap yuma deiki gweiptopupa, korye weik welepudi, Mesir mutu yuma diniku. 7Ukupupane, sun Mesir mutu neitamai nimi men kuptenge keca, asuru kwa ila kael nengdi, sun peda utopu, isok puto deiki mali pel dopipa, korye pio weik Mesir mutu yuma diniku.

8Ukupu pangeda, Firaundi, Musa cap, Harun cap tep, kongpepupa, sun konum yarei pangeda, upepu. “Sundi Allah er si Yahweh tep moroprerumpa, korye yuma gum kupkamre. Ne damai cap, ne nyapu damai capda, gum kupre pangeda, nedi kan nyapu Israel nesala tapnepa, sun butene cap, betenge. Berum dingeda, Allah Yahweh, er si eremna tep, sundi gam keca popra, sun nai Allah tep karepkamrume,” pepu. 9Firaundi upepupa, Musadi, tamupra pepu. “Kanda ila ngebo kuruma cadi, kandi, ‘Atumi telepe’ tenen, wepra pepnememnyopda, nedi Allah moropkamane. Ukupnepa, kan pel dona deiyo neng cap, kan cap, Mesir mutu nesala yuma cap, sun ati cap, taliyai yuma cap, korye pio weik kupmar ngeda, gum kupredi, tamupra Nil mekinpu wengbenkamenge,” pepu.

10Musa upepupa, Mesir mutu nimi deiyo ngebo Firaundi, pepu. “Ambutumi Allah moropkamanerum do?” pepu. Upepupa, Musadi tamupra pepu. “Kan pepmanerema utopu kupkamane. Ada, Allah yuk ton men kurure. Kandi, ‘Uo, Israel nesala, sun nai Yahweh, Allah er tenpu kurura’ tenen, kael kepkamruma tep, Allah moropkamakene. 11Allah moropnepa korye gum kupkamre. Ange tep nengeda, damai sun ati cap, sun damai cap kupmarada, kan cap, kan pel dona deiyo neng cap, Mesir mutu nesala ati pum kupmarenge yuma cap, mepropkamare. Ayuma gopra, Nil mekinpu tamupra wengbenkamange,” Musadi pepu.

12Musa cap, Harun cap, ila ngebo Firaun tapra yukai bereidi, Musadi Yahweh tep, moropu ada, ‘Firaun damai korye weike karepmumpa, weik kupu ngeda, gum kupra deiptume,’ pepra, moropu. 13Moropua, Allah er si Yahweh gekepudi, ange yuma ketenepra Musa pepmautopu kupu. Ukupka deiki di, damai weik ati pumbon kupunge cap, ati dam kupunge cap, sun wai dam kupunge cap, bura tara tali kupunge cap, ayuma akunmaiyaipu depi.

14Mesir mutu nesala kuramyai di korye weik depi. Korye pio weik depipa, amutu anesaladi, depi korye sun nong bulupra deipipa, pio weik kupka tep, konum lyupudi amutu-mutu yuma tong weik belepudi, tong weik peramu. 15Ayuma ukupu dinino, ila ngebo Firaundi korye yuma konum depipa epu. Epu dingeda, ‘Ae, ukuda kanam kupkasere,’ tenepudi, Allahdi kupmaunge men tenepudi, er dipru tupa balila kupu. Ada men di, Allah Yahwehdi, “Firaun balila kupkamre,” peiputopu, Musa cap, Harun cap, sun peprei upu men gekepu. Tupa balilapu kupu.

Allahdi, Mesir mutu kwiriamnya weik karepu upu

16Allah er si Yahwehdi Musa tep pepu, “Kandi Harun tep pepmempa, er maca tu deiki bongoprepa, Mesir mutu neitamai kapu buta sepmenga yumada, kwiriamnya dankamre,” pepu. 17Upepupa, Harun er maca di, tu bongopupa, Mesir mutu kuramu kalkal tu sepmenga yuma kwiriamnya dau. Kwiriamnya daudi, Mesir mutu yuma kwiriamnya pio weik karepupa, dinipudi, dekpepu. Dekpepupa, nesala cap, sun peirami keca cap, ayuma amupu.

18Ukupupa, akeca-keca yuma, asuru kwa ila kael nengdi, ‘Nun peda, utopu kupmepepa, tu kel-kel di kwiriamnya dankamre’ tenen, sun peda isok puto deiki di kupetepipane, men kupu. Piripterepi dinin, kwiriamnya men kupu. Sun mali pel deiki gum dinin, amutu yuma neitamaida, nesala cap, sun peirami keca cap, kwiriamnya weika di amurami.

19Ukupka tep, sun ila kael nengdi Firaun tep, pepi. “Uo, teka Allah puto ngebo er buru deiki di amali keca karepmaserpa kuserure,” pepi. Upepi dinino, Firaun tupa dipru balila kupudi, ‘Allahdi peipupa Musa cap, Harun cap, perenge upuda, men gekepkune’ tenepu. Ada Allah er si Yahwehdi, “Firaun balila kupkamre,” peiputopu kupu.

Allahdi karepupa, Mesir mutu neitamai yuma deibum weik weku upu

20Allah er si Yahwehdi Musa tep, pepu.

Ambutumi ipna bukromemdi, ila ngebo Firaun mekin damai bere taruda, kan peda bememdi, Firaun epmem dingeda, pepkurume. Upepkurume, “Allah er si Yahwehdi, upepkere. ‘Israel nesaladi, ne si erepkamneng’ tenen, kandi anesala tep lopra tapmempa, benkamenge. 21Kanda balila kupmemdi, ne upu men gekepnememdi, ‘Israel nesala bana gume,’ pepmemnyopda, nedi sun mutu neitamai yuma deibum weike karepkamane. Karepnepa, kan cap, kan pel dona deiyo neng cap, sun amutara kunge nesala yuma cap, Mesir nesala sun ati neitamai yuma cap, sun kunge mutu yuma cap, deibum weik karepnepa dinipredi, weike kupkamre. Allahdi peipmakere. Allahdi Musa tep, aupu Firaun damai perberume,” pepu.

22Upepudi, aupu ton pepu. “Deibum weik karepkamne taruda, nedi Israel nesala kunge mutu, mutu si Gosen mutu neitamaida, deibum weika di men karepkamne. Firaun kan pe mutupu karepkamkene. Ukupne deiki di kanda, ‘E tek sisi Allah er sida Yahweh, nun mutu neitamai pel donmasere’ tenen, kael kepkamnereme.

23Ange tep nengeda, nedi pel yuk-yuk bokra deipkamane. Israel nesala cap, Firaun kan amutara kunge nesala cap tep, utopu men kupkamne. Firaun kan amutara nesala kungaida, deibum weik kupkamre. Israel nesala kungaida, deibum men kupkamre. Akeca, ambutumi nimi men kupmanto keca ne dipapu kupkamane. Ukupnepa nimi yumadi, ‘E tek sisa Allah dipapu apel dopmasere’ tenen, kael kepkamenge. Tonda, kan Firaundi epkamareme,” Allahdi Musa tep peipupa, Musa gekepudi Harun tep lap pepupa, Harundi Firaun tep perbeu.

24Allah er si Yahwehdi peipmautopu kupu. Ada amutu deibum weika di, karepupa, Firaun er ila ati nimi deiyo ati cap, er amutara pel dona deiyo neng sun ati cap, Mesir mutu dana-dana yuma deibum pio weika di karepupa, Mesir mutu yuma pio mali kupu. 25Ukupu pangeda, Firaundi, Musa cap, Harun cap tep, kongpepu. Kongpepudi, upepu, “Uda konuma, yuk mutu gum dinin, ne mutu neitamaipu berumdi, sun Allah si eremna tep, gam kun keca popra Allah tep karepkamarume,” pepu.

26Upepupa, Musadi tamupra pepu. “Kan pepmaremada, nundi men kuptepe. Nun Israel nengdi, Allah si eremna tep gam keca popra, Allah Yahweh tep karepkamep ngeda, Mesir nesaladi, ‘Uo, pio malinge kunmange,’ tenepmengedi, yu kuprepa, gel dopra popsetengopda, ware kuptepe do? Mali tenepsengopda, men popkamseng do?” pepu. 27“Nun adipapu amutu tapra bepedi, katuai mutu dinin, karenai nimi kuna gum mutu, u weneri tumi deiki betepe dingeda, nun nai bo Allah si eremna tep, gam keca popra er tep kareptepe. Allah er si Yahwehdi nun tep, ‘Angeda ukuprume,’ peseretopu, kupbankamepa tepa,” Musadi pepu.

28Upepupa, Firaundi tamupra pepu. “Jo telepe. Nedi sun tapnepa, nimi men kunge mutu neitamai benkamrume. Ukupra bemumdi, Yahweh er si eremna tep, gam keca popra karepkamrume. Bankamrum dinin, sun adipapu pio karen mutu men benkamrume. Damai bana pua telepe. Tonda, sun nai bo Allah er si Yahwehdi, ‘Firaun melipkamre’ tenen, sundi ne tep, Allah er si Yahweh moronkamnerume,” Firaundi Musa tep pepu.

29Upepupa, Musadi tamupra pepu. “Ange konum dingeda, nun benkamepa tep, kan damai konum tapra benyopda, nedi Yahweh moropnepa, ambutumida, deibum yuma kan damai cap, kan pel dona deiyo neng cap, sun amutara kunge nesala yuma kapu ngeda, gum kupkamare. Upepra moropkamaken dinino, kandi nun tep tali pertamsememdi, ‘Israel nengda, Allah Yahweh, er si eremna tep men benkamenge,’ pesememnyopda, ikin kupkamkere,” Musadi Firaun tep pepu.

30Akonum pepu dingeda, Musadi Firaun damai tapra, yuk karenai beudi, Allah er si Yahweh tep moropu. 31Musadi, Yahweh moropupa, Musa moroputopu, deibumda, Firaun damai cap, er pel dona deiyo neng cap, sun amutu kurami neng cap yumada, sun damai di gopra deibum bendopi. Akeca tenpunge pape ton men kupu. 32Dinino, ataru peda, Firaundi, ange pe men gekepudi, er dipru tupa balila kupu. Kupudi upepu. “Anesalada, pio men benkamenge,” Firaundi pepu.