Exo 9 | XteSC | STEP | Amenda taru, Allah er si Yahwehdi, Musa tep pepu. Kanda Firaun damai bememdi, upepkurume. “Allahdi, upepkere. Ne Allahdi pepkene. Ibrani nesaladi, ne si eremnenung Allahdi pepkene. Israel nesala tep bicau tenenedi, kalekra melimnune. Kandi anesala tep loptapmempa, yukai bena, ne si erepkamnenge, pepkene.

Exodus 9

Allahdi Mesir mutu bisam dena karepu upu

1 Amenda taru, Allah er si Yahwehdi, ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} Musa tep pepu.

Kanda Firaun damai bememdi, upepkurume. “Allahdi, upepkere. Ne Allahdi pepkene. Ibrani nesaladi, ne si eremnenung Allahdi pepkene. Israel nesala tep bicau tenenedi, kalekra melimnune. Kandi anesala tep loptapmempa, yukai bena, ne si erepkamnenge, pepkene.

2 Atep kandi, ‘Sun anesala tapnepa men benkunge,’ tenepmemdi, tupa talepmemnyopda, ne Allahdi ikin weik keca karepkamkene. 3 Ada, ne Allah Yahwehdi, yu kupnerepa, Mesir mutu nesaladi, peirameng keca deiki dena deiyo keca deipkamane. Aila di pirinkamre kecada, kuda bisam cap, keledai bisam cap, unta bisam ^{▼▼unta – Akeca gambar dina tep, Kejadian 12:16 dinkurume.} cap, sapi bisam cap, domba bisam cap, kambing bisam cap, akeca yuma deiki dena deiyo keca karepkamane.

4 Ne Allah Yahwehdi ukupkaman dinin, nedi apeirinung keca yuma bokra yuk-yuk deipnepa, ukupkamare. Ada, Mesir nesala sun peirameng keca yumada depkamare. Israel nesala sun peinge kecada, tenpu peda men depkamare.” Allahdi Musa tep pepu. Upepudi, ange ton pepu. “Firaun damai bememdi, ‘Allahdi upepkere,’ pepra, apepmaken upu pepkamarume,” Allahdi Musa tep pepu.

5 Ange tep nengeda, Allah Yahwehdi pepu. “Ambutumida tek sisa apepmantopu, Mesir mutu neitamai yuma ukupkamane,” pepu. 6 Sun mapmaiya, konum bereku pangeda, Allah Yahwehdi arup taru pepmautopu kupu. Mesir nesalada, sun bisam yala-yala yumada, depnapu kupu dinino, Israel nesala sun bisam yala-yala yumada, tenpunge peda men depu, yuma gam tupa kupu.

7 Ukupupa, Firaundi, ‘Israel nesala peinung bisam yala-yala yuma, tenpunge peda men depmare,’ pepmanengada, ‘Tek do, telel do?’ tenen, nimi ton wepra dokotepupa, sun dirbei taruda, tek sisa sun Israel nesala peirami bisam tenpunge peda, ton men depupa epi. Ange epidi lap perbeipa, Firaun gekepu dinino, er kange dipru tupa balila kupudi, “Gume, Israel nesala tapnepa, men benkunge,” pepu.

Allahdi, Mesir mutu nesala nong deiki toro weik karepu upu

8 Allah Yahwehdi Musa cap, Harun cap tep, pepu. “Sundi, ati uku sengamengai bererumdi, uku kalum cap, sikke cap, bena dopropkurerume. Doproprerumdi, Firaun er dinai adipapu Musa doproprepa, asikke but welepredi, weik kupkamre. 9 Atep asikke dopra, Musa im deiki doprepa, asikke but welepredi, Mesir mutu yuma embendankamre. Embendaredi, Mesir mutu neitamai yuma embendankamre. Ukuprepa, Mesir mutu nesala nong deiki cap, sun bisam nong deiki cap amuprepa, ila toro deipredi, suse jenkamre,” Allahdi pepu.

10 Upepupa, Musa cap Harun cap, sundi sikke dopra, Firaun damai bereidi, Musadi, sikke yamupra donokupa, asikke embendau. Embendaudi, Mesir mutu kurami nesala sun nong deiki cap, sun bisam nong deiki cap deipupa, toro pio weika di deipudi, susi weik jeramu. 11 Ukupupa, Mesir mutu sun asuru kwa ila kael nengda, adipapu Musa damai men bena tekmanto kupi. Ada sun nong deiki ila toro weika di depudi, ikin weike kupupa, men bentekmanto kupi. Ange utopu, Mesir nesala yuma, sun nong deiki peda, toro weik kupu.

12 Dinino, Allah Yahwehdi Firaun tep karepupa, er dipru gat kupra balila kupudi, tupa men gekepu. Ada Allahdi, ‘Ukupkamre’ peiputopu, men gekepmanto kupka tep, Allahdi pepupa, Musa cap, Harun cap, sun upu pepreiya peda men gekepu.

Allahdi, Mesir mutu ila mul duduya mo, bul weik keca karepu upu

13 Amenda taru, Allah er si Yahwehdi, Musa tep pepu.

Ambutumi ipna, bukromemdi, kanda Firaun damai bememdi, upepkurume. “Allahdi, peipmakere. Ibrani nesaladi, si eremnenung Allahdi pepkene. Israel nesala tep, bicau tenepnedi, kalekra melimnune. Kandi anesala tep loptapmempa, yukai bena ne si erepkamnenge pepkene.

14 Upepmaken dinin, kanda balila kupmemdi, ne upu men gekepnememdi, ‘Israel nesala bana gume,’ pepmemnyopda, sun mutu neitamai yuma, ne puto deiki di kange mun keca pio weika di karepkamasene. Ada, kan cap, kan pel dona deiyo neng cap, sun amutara kunge nesala yuma cap, ikin weik kunkamrume. Ukupkamna deiyoda, kan cap yuk nesala yuma cap, ‘Uo, Allahda tuai mutu ban-ban yuma neitamaida, er utopunge ngebo ton men kurure’ tenen, kael kepkamneruma tepa.” Allahdi Musa tep, “Aupu dopra, Firaun damai lap perberume,” pepu.

15 Allahdi aupu ton pepu. “Ada tali tep men pepkene. Ne tenepnedi, Firaun kan cap, kan mutu nesala yuma cap, ikin weik pu karepnepa, kan pe, kan amutara kunge nesala yuma pe tep, ila pu jerepa, dena deiyo keca konum karepmasetenepa, tek sisi konum depra gawal dakmatume. Angeda adipapu konum kupmatene dinin, kapul men kupmasene.” Allahdi pepu. Ange ton pepu.

16 “Konum poptapra gawal dakmasetene dinin, nedi kan wepra deipkesa deiyoda pepkune. Ada, tupa gam kumemyada, ‘Nedi puto weik keca karepnepa, Firaundi epkamre,’ tenepkesi. Tonda, ayuma ukupnepa, nesala tuai mutu ban-ban yumadi, ‘Uo, Allahda ila mambule’ tenen, mambul kange doupra, ‘Ne si cap, ne kune keca cap tep, lap perbankamenge’ tenen, men poptapsi. 17 Uda, kanda kika deipra, dipru eremnapu kupkerepa, ‘Anesala tapnepa, men benkunge,’ tupa tenememdi, balila kurume.”

18 “Atep nengeda, tek sisi ambutumi ipna, akunmanem ketengtopu, nedi ila mul duduya mo karepkamakene. Akecada, ne damai di dopra dokotepkamane. Dokotepnepa, ila ikin keca Mesir mutu neitamai gonga kemne taru di dipra, aneitamai yuma men kuramu keca kupkamane. 19 Ange tep nengeda, nedi pepkene. Kandi kan amutara kunge nesala yuma tep upepkamrume, ‘Amutu peirum keca yala-yala yuma cap, sundi talepra peirum bisam yuma cap, bura tara peirumnge pe, katuai peirumnge pe, akeca yuma bulupra ati pumbon do, sun damai do, dopra deriyankurume. Ati pumbonpu dongopmumpa wekununge,’ pepra deipkamarume.

Deiyoda, ambutumi mul duduya mo dokotepnepa, bura tara cap, katuai cap kure keca yuma poprepa depkamange. Ada nimi pe, sun peirum keca yuma peda, mul duduya mo di poprepa, akeca yuma depkamange.” Allahdi Musa tep, “Firaun damai upepkurume,” pepra deipu.

20 Allah Yahwehdi peipmau upu, Musadi upepupa, Firaun cap, er nyapsilip cap yuma gekepi dingeda, Firaun damai pel dorami neng dinin, Allah peramu upu tep ‘Mambule’ tenen, kwar kupu nesala yumada, sundi sun melimna nesala cap, sun peirami keca cap yuma dopra, ati dongopi. 21 Kwar kupupa kurami nesaladi ukupi dinin, ware kupra nesala do yuma, Allah Yahwehdi pepmau upu gekepi dinin, ‘Gume, tonda dakwapye’ tenepmai nesalada, sun melimna neng cap, bisam cap yuma, tali kange doupra bura kunmai.

22 Allah Yahwehdi Musa tep, pepu. “Kan buru erepra im deiki bupukmempa, ila mul duduya mo, Mesir mutu sakamare. Sakredi nesala cap, nimi peinge keca cap, tonda sun wa dam paramre keca cap, tali bura paramre keca cap, adeiki yuma sakamare. Tonda, Mesir mutu neitamai yuma sakamre.” Allahdi Musa tep pepu. 23 Upepupa, Musa er maca im deiki bupukupa, Allah Yahwehdi ila kulman cap, perenglang pena cap, ila mul duduya mo cap, tapakra tuai mutu dokotepu. Allahdi Mesir mutu ila mul duduya mo dokotepupa, Mesir mutu yuma weika di diniku.

24 Ton ngeda, ila mul duduya mo pe, perenglang pena pe, ange-ange yuma tapakra weika di dokotepu. Angeda, Mesir mutu neitamai ton, menop taru di dipra, aneitam taru yuma kuramunge utopu men kupu. Ataru di kupu ngeda, ila ikin weik kupu.

25 Allahdi mul duduya mo dokotepupa, amutu sakudi popu. Ada akeca-keca yuma bura paramre keca cap, nesala cap, nimidi perami keca cap, nimidi kourami keca yuma cap, popupa mali kupu. Tonda co yala-yala yuma, mul duduya mo saka popudi, co bo yuma gum kupra deipu. 26 Israel nesala kuramyai puda, Gosen mutuda, ila mul duduya mo tenpu pe pio men saku. Israel nesala kunmai mutu, Gosen mutu neitamai yumada telep kupu.

27 Ukupupa, Firaundi Musa cap, Harun cap tep, kongpepu. Sun yareipa, Firaundi pepu. “Ukutaruda nedi mali kupmanu. Allah, er si Yahwehdi ikin keca ne deiki deipmaner ngeda, tek sisi teleppu kupmanere. Dinin ne cap, ne amutara kunge nesala capdi mali kunupe. 28 Nun damai ikin keca weik, kulman cap, mul duduya mo cap weik kupmaserpa, dabal kupmasera tep, ‘Akeca yuma gum kupkamre’ tenen, Allah Yahweh tep moropserume. Nedi sun tapsenepa, ne mutu tapra yukai benkamrume. Ton cap talepsenepa, amutu pio men kunkamrume,” Firaundi pepu.

29 Musadi tamupra Firaun tep pepu. “Ne menmena amutu ila kota neitamai di bena, karenai benyopda, ne buru erepra, nedi Allah tep moropnepa, kulman cap, mul duduya mo cap, adipapu gum kupkamre. Ukupkerya deiki kandi kael kepkamareme. Ada, ‘Teka mutu-mutu yumada, Allah er sida Yahweh, er dipu talepra kurure’ tenen, kael kepkamarume. 30 Ange upkupkamne dinin, ne kaele, kan cap, kan pel dona deiyo neng cap, sun yumada, ‘Allah, er puto weik kurure’ tenen, er Yahweh tep kware men kusurure.” Musadi Firaun tep pepu.

31 Uda Allahdi mul duduya mo dokotepu taruda, Mesir mutu nengdi wa pepra koupi keca yuma cap, tali paramre keca sikkel cap mali kupu. Ada, paramrepa dopra jerameng keca, er si jelai cap, bongopra du moupudi, weik kupupa, mul duduya mo sakudi popu. Tonda sikkel utopu keca, er si rami bongopudi, kait popu taruda, mul duduya mo saka popudi mali kupu. 32 Dinino bolokredi du mouramre kecada, gandum cap, yuk yala keca cap, men popua cadi, gum men kupu. Ada, li taru kapula tepa.

33 Musa er upu yuma konum pepudi, Firaun damai tapra, kota mutu di taprapudi, bura mutu karenai beu. Beudi, er buru ereprapudi, Allah Yahweh tep moropupa, ataruda, kulman cap, mul duduya mo cap, tali mo cap, tuai mutu ton men dokotepu. 34 Ataru peda, Firaun dinmaupa, ila mul duduya mo cap, tali mo cap, kulman cap, adipapu dimpepupa epu. Epu dipapu kika deipra mali kupu. Ada, er cap, er amutara pel dona deiyo neng cap, pio balila kupra dipru gat kupi.

35 Firaun kika deipra er dipru gat kupka cadi, Allah Yahwehdi peipupa, Musadi pepka utopu, Firaun men gekepudi, ‘Israel nesala tapnepa men benkamenge,’ tenepudi pepu.