Eze 1 | XteSC | STEP | Uda ataruda, keteng tamun denge weik tiga puluh (30) kupu. Ware dumbari tanggal lima kupu taruda, Ataruda, Babel mutu ila nimi deiyo ngebo Raja Nebukadnezar cap, er jen talen neng capdi, Israel nesala tomopra ateng koupidi, Babel mutu dubenamseipa, dakuramepupane, keteng tamun pamu bari konum kupupa, me si Kebar me pirmanai kunmasi. Ada ne Yeheskiel cap, Babel mutu nengdi yuk Israel nesala doupra deribenami nesala cap, Kebar me damai kunmapu. Ataruda, Allahdi im deiki buplan paktapupa, ila mambul keca ton katuai keipseupa, nedi dinmasi.

Ezekiel 1

Pumun taru Allah er upu lap pena deiyo ngebo, er si Yeheskieldi, Allah er ila dirine tenpunge epudi, pepu upu

1 Uda ataruda, keteng tamun denge weik tiga puluh (30) kupu. ^{▼▼keteng tamun 30 – Ibrani upu ila kael nengdi, ton nengda, upenunge. ‘Ada, Yeheskiel er pe gam kuramu keteng tamun umur 30 kupka tep, ange pepra seku,’ penunge.} Ware dumbari tanggal lima kupu taruda, ^{▼▼war dumbari tanggal 5 – Ibrani upu ila kael nengdi, ton nengda upenunge. ‘Ada, Yesus kapul men yau taru keteng tamun 593, war Juli tanggal 5 tepa,’ penunge.} Ataruda, Babel mutu ila nimi deiyo ngebo Raja Nebukadnezar cap, er jen talen neng capdi, Israel nesala tomopra ateng koupidi, Babel mutu dubenamseipa, dakuramepupane, keteng tamun pamu bari konum kupupa, me si Kebar me pirmanai kunmasi. Ada ne Yeheskiel cap, Babel mutu nengdi yuk Israel nesala doupra deribenami nesala cap, Kebar me damai kunmapu. Ataruda, Allahdi im deiki buplan paktapupa, ila mambul keca ton katuai keipseupa, nedi dinmasi. 2 Ibrani nengdi nungameptopu, war dumbari deiki tanggal lima kupu taru dipapu, akeca dinmasi. Ada, Babel mutu nengdi, nun Israel nesala taleamseu ila nimi deiyo ngebo, er si Yoyakin tomopra ateng koupidi dubenamipane, keteng tamun pamu bari konum kupu taruda, akeca epsi pepne.

3 Ne nai bo er sida Busi. Ne nai Busida, Allah er si eremna ati pumbon pel don ngebo kuramutopu, neda er mi Yeheskieldi, apelpu donune. Allah er si Yahwehdi, er puto karepneua deiki di, mambul keca katuai kunmaupa epsi. Akuramsi taruda gekenmasipa, Allahdi mambul upu ton pepneu. Allah er si Yahwehdi, ^{▼▼Yahweh – Allah er pe si, tek sisi ngeda, ‘Yahweh’ kurure. Allahdi Musa tep, er si katuai di lap pepu (Keluaran 3:14). Allahdi Musa tep, “Ne si ‘Yahweh’ kael keprumudi, asipu erepra, ne tep gispal donkamnerume,” pepka cadi, nundi asi sekmepu. Yahweh pena peda, telepe pua. Tonda, abuku neitamai 3:27 dinkurume.} mambul upu pepneuaida, ada Babel mutu neitamai dinin, me si Kebar me damai kunmasi taruda, aupu pepneu. Peipneudi, Allahdi ne tep, ‘Ne upu lap perbenkamre’ tenen, er puto ne nong deiki deipneue.

4 Allahdi upu pepneu taruda, nedi tek sisi dinmasipa, ila kumanya puto weiknge ton, utara di pung pepupa, ila puto dua gatnge weika di doupdara yau. Adua deikida, ila uku bu weika di lang-lang penmaupa, adua dana-dana tara yuma cap, im deiki tara yuma capda, dirine pio weik kupu. Auku neitamai, ukupmanto ngeda, gat keca uku neitamai dongopmengepane, bupu pio weik kupredi, bi kupra mereng-mereng peramretopu kupu.

5 Ukupu taru, auku neitamai dinmasipa, gam kure keca dumbari kunmaipa dinmasi. Akeca dumbari yumada, sun kamo nimi urasin utopu kunmaipa nedi epsi. ^{▼▼gam keca – Akecada, Yeheskieldi ‘gam kecapu’ peramu dinin, ton kael nengdi, ‘Malaikat epu do? Malaikat er si Kerub epu do?’ pepunge. Dinino, nun yumada, yambul walwale kuserure.} Agam keca dumbaringe, sun urasinda yambulanun nimi urasin utopu kunmaipa nedi epsi. 6 Adumbari gam kecada, yambulanun nimi urasin utopu kupmai dinin, adumbari keca sun nongda tenpu dinin, sun urasinda, yuk-yuk dumbaripu kupmai. Sun nongda tenpu-tenpu kupmai dinin, tenpu nongda giso cap, urasin capda dumbari kuputopu, sun pol peda yuk-yuk dumbari kupu. Sun nong deiki yuma kuamu polda, ma pol utopu kupupa nedi epsi.

7 Tonda agam keca, sun yan yumada kwiryepu kupu. Ange kupupa, sun yan yumada, sapi bisam yan gala kuramretopu kupu. Ada sun yan yumada, gat keca er sida, tembaga ukupu ketekepmange taru, urasin telep kuramretopu, dirin weik kupu. 8 Adumbari gam keca, sun pol kupkupai dumbari tara yuma dinin, sun pol iriamu tarada, nimi buru utopu buru ton kupu. Agam kuramu keca dumbarida, yuk-yuk dinin, sun nimi urasin utopu kupunge cap, sun ma pol utopunge capda, sun yuma utotopu kupupa nedi epsi. 9 Agam keca kunmainge, sun pol yumada utotopu, lang-lang penmai teptabanmaipa, epsi. Sun pol kupkup sirikai yumada, bepdanen banmai. Sun banmai taruda, dumsisi bisipu banmaidi, dana-dana tara pio men embenmai, kwirye bisipu banmaipa epsi. Sun banmai taruda, sun nong yuma tamurtona pio gum dipapu, kwiryepu banmaipa nedi epsi.

10 Atep, akeca sun urasin epsi ngeda lap pepkune. Sun gam kun keca dumbari dinin, sun kamoda utotopu kupu. Sun nongda tenpu dinin, sun urasin yuk-yuk dumbari kupu. Dinino, tenpu urasinda nimi urasin utopu kupu. Ton urasin dumsisi tara ngeda, bura kuramre ila yu pus, er sida singa utopu kupu. Sun urasin tebalal tara ngeda, sapi bisam utopu kupu. Tonda, sun amnyo tara urasinda, ila seng-seng pena ma utopu kupupa nedi epsi.

11 Sun nong deiki dana-dana tara, dumbari kupunge yumada, ma pol utopu kupu pangeda, sun pol yuma erepra taledanmai. Sun nong yuma pol butene di dipdongopdai pangeda, ton pol butene dingeda dokoteptapipa, sun nonge yuma getepdongopupa epsi. Atep, tenpu gam kuramu keca, er mening damai tekmau gam kecada, sun pol bepdana kunmarei. Ton tara pol butene di, sun nong yuk-yuk dinin, sun pe nongpu getepra inipdongopi. Sun yuma utopu kunmaipa nedi epsi. 12 Sun agam kunmai keca yuma, pol yuk-yuk dingeda, sun bisi dumsisipu bana tep keteneipidi banmai. Ada, ‘Sambaladi peipseretopu embankup’ tenen, ketenepidi, sambala banmautopu, sun peda banmai. Sun banmai taruda, kwiryepu banmai, dana-dana tara lerekra bana pio gume. Dumsisipu banmaiya tep, ‘Tamupra men yatepe,’ tenepi.

13 Agam kunge keca, sun nong neitamai di kupu kecada, uku sekmengepa, uku jenmaredi, kalum lereng-lereng pepredi, bi laramretopu kupupa epsi. Tonda, sun dumbari dinin, sun kan-kan neitamaida weica upmengepa, dirine weik kuramretopu kupupa, nedi epsi. Auku bu neitamai yumada, dirine weik kupu. Tonda auku bu neitamai di, perenglang pena weika di pepupa gweka embendau. 14 Ukupu pangeda, sun dumbari gam kunmai keca yumadi, perenglang peramretopu kuprapidi, menmena lakra embandanmaipa epsi. Sun dumbari gam kun kecada, ortara benapna, atara yanapna kemaipa, nedi epsi.

15 Akunmai taruda, tek sisi nedi dinmasipa, sun dumbari gam kun keca yuk-yuk dinin, sun yan roda dumbarida, sun tekmaiyaipu, tu deikipu kupmaupa epsi. Sun nong tenpu dinin, urasinda dumbari kupka tep, tenpu gam kun kecada, er nong iriamu tarada roda tenpu kupupa epsi. Sun gam keca dumbari kunmaitopu, roda peda dumbari kupupa nedi epsi. 16 Akupmau yan roda, sun kamoda, dirin weik kupredi, melang-melang peramre kunumna weik gel, er sida permata perameng gel utopu kupu. Sun yan roda yumada, tenpunge pe, yuknge pe yuma, wisipra neitamaipu ketenepra deiamipa nedi epsi. Ton yambul rodada, weik roda neitamaipu deipipa kupu.

17 Tonda, sun yumadi aroda yuma dopropidi, sun dumbari gam kunmai keca urasin dinmai tarapu banmai. Sun yuma, ‘Atara benkun’ tenepne tarapu, tali lupra embarami dinin, ton tara banmai taruda, men tamupra yai. Sun nong cap, urasin capda, men tamupra dinmai. Dumsisipu banmai. 18 Aroda koupra ongopdongopinge yumada, asurupu deknapu kupupa nedi epsi. Aroda ongopdongopi ngeda, ila lyom weik kupupa, akeca epsa cadi, ‘Uo angeda, ila mambule,’ tenepsi. Sun dumbari gam kun keca yuma, sun roda pirimanai yumada, asurupu weik kwamu. 19 Uda, sun gam kunge keca yuma embandanmai taruda, sun ayan roda yuma peda embandanmai utopu, bena yana kemai. Tonda, agam kun keca yuma lakrap, itara welerbenmaitopu, ayan roda dumbari yuma peda, abisipu welerbanmai.

20 Tonda agam keca dumbarida, sun sambalada sun roda dumbari neitamai kupu. Atep nengeda, sun sambaladi, ‘Atara benkun,’ tenepnetopu, sun gam kurami keca yuma peda, abisipu embarami. Utopu sun ayan roda peda, utopu kupra barami. Tonda, ayan rodada neitamai kurami sambaladi, ‘Embankup’ tenepnetopu, sun gam kun keca dumbari abisipu kikiman embanmai. 21 Asambala embanmai taruda, agam kunge keca yuma cap, sun roda peda abisipu embanmai. Sun sambala tapne pangeda, sun gam kun keca cap, sun roda capda, tamna pua. Sun tuai di im neitamai welepne taruda, sun gam kun keca peda welena pua. Ange tep nengeda, agam kun keca yumada, sun sambalada, sun yan roda neitamaipu kuramya tep, kikimanpu embanmai.

22 Tonda, agam kun keca dumbari, sun giso deiki tara, im neitamai utopuda, ati arum utopu keca kwamu. Er urasinda, keteng deiprepa, es me deiki, melang peramretopu, kupupa epsi. ‘Akecada, keteng deipredi, dirine weik kurepa, ila ati arum melang peramrenge utopu keca kupre,’ tenepsi. 23 Amelang peramre keca iriamu tarada, agam keca dumbari sun polda, dumsisi bepektalepipa, sun pol sirikaida, bepdai. Sun pol ton butene di, sun pe nongpu getepra inipdongopi. Sun yuma utotopu kunmaipa nedi epsi.

24 Sun agam keca yuma, pol deiki di lakdara embanmaipa, pol lelim weika di penmaupa gekepsi. Ada ila melum sangamredi, lelim peramretopu pepu. Tonda, jen talen nengdi, ‘Yuk neng porbenkup’ tenen, jen lelim weika di peramengtopu pepi. Tonda Allah Yahweh, akeca-keca yuma taleredi, Ila Puto Weik Deiyo Ngebo, ^{▼▼Ngebo – Acada, Ibrani upu deiki di, Allah er si tep, ‘Allah Shadday’ pepra seki. Aupu ‘Shadday’ deiyoda, sundi, ‘Allahda akeca-keca yuma talepra, pio deiki tara kuredi, pio Ila Puto Weik Deiyo Ngebo kurure,’ tenena tep, aupu ‘Shadday’ pepra seki. Sun Ketengban nesala kael kemna tep, angeda konum jenek kupra sekmepu.} er upu ila di perepa, lelim weik peramretopu, sun lakra embanmai taruda, sun pol lelim weik pepi. Ukupmantoda, jen talen neng weika di bulupmengedi, upu ila di pengepa, lelim weik peramengtopu, embanmai taruda, ukupra ila lelim penmai. Dinino, sun dimpepra kunmai taruda, sun polda tuai tara deipipa, sun pol lelim dimpepi pangeda, ayuma dimpepu.

25 Ange utopu, sun giso deiki tara, ila melang peramre keca, ati arum utopu keca, im deiki tara di, nimi upu utopu upu penmaupa, sun adipapu gekepidi, dimpepra, ton cap men embanmai. Ukupra dimpepi taruda, sun polda, tuai deiki deipipa, sun pol peda lelim pio men penmau. 26 Itara kapu keca, ati arum utopu keca deiki tarada, ila nimi deiyo neng bungameng keca utopu keca kupu. Abungna keca er urasinda, kunumna weik gel, er sida batu nilam, er kamo warnada, im kalum utopu kupu. Tonda, abungna keca deiki tara kupu kecada, nimi urasin utopu gam kun keca ton kupmaupa epsi. Agam kun kecada, nimi kamo utopu kupupa nedi epsi.

27 Tonda, animi urasin utopu kupmau keca dinmasipa, er deiyo tara di dipra, er nong deiki tara yumada, dirinda besi keca uku dongopmengepane, bupu weik kuprepa, dirineda bi weik kuramretopu kupu. Tonda, kulman perenglang peramretopu kuramudi, er deiyo tara di dipra, er nong dutara ngeda, uku bu jeramretopu kupudi, dirin weik kunmaupa epsi. Ukupupa, dana-dana tara yumada, keteng asuru dirine weik kuramretopu kupu.

28 Ange utopu dinmasipa, angebo er nong dana-dana tara yumada, dirine pio weik kupu. Ukupmantoda, er dirin kamoda, mo cepkure taru ambuka dua deiki deipredi, jen tapu di mamamretopu kupupa, nedi epsi. Allah er si Yahweh, er dirineda, ambuka deipredi, keteng asuru deiki doprepa, melang peramrenge utopu kupupa epsi.

Adirin cap, akeca-keca yuma cap epsi taruda, ‘Allah er akunmara tep, tali lupra men eptene’ tenen, er gispal dona tep, giso genepdongopsidi, tuai dipdongopra mapmasi. Ukupra genepdongopra tuai mapsi taru dipapu, nimi upu utopu upu deiki di penmaupa gekepsi. Ada, Allahdi, ‘Yeheskiel erda, ne upu lap perbenkamre’ tenen, upupneupa gekepsi.

Allah er upu lap pena deiyo ngebo, nabi Yeheskieldi pepu.