Eze 10 | XteSC | STEP | Uda ne Yeheskieldi mapmsidi, ken deiki utopu dinmasipa, Kerub butene, sun pol ortara atara di dimdongodaramreng keca dinin, sun Kerub butene, sun giso deiki belepra katuai kwamunge epsi. Ada, pio urasin telep kunumna weik gel, er sida batu nilam, ange deiki pio telep nimi deiyo bungne keca dopra deipinge, er si tahkta h urasin utopu keca, katuai kupupa, nedi epsi.

Ezekiel 10

Allah Yahwehdi, er cap, er dirine cap, er si eremna ati pumbon di tapra bendopka tep, pepu upu

1 Uda ne Yeheskieldi mapmsidi, ken deiki utopu dinmasipa, Kerub ^{▼▼Kerub – Kerubda, ada im deiki gam kure keca, malaikat urasin utopu kurur. Tonda, Allah er si eremna ati pumbon dinin, Pio Telep Lengna Ati pumbon, akeca urasin utopu keca petupra deipi. Ada Peti Perjanjian deiki deipi ngeda, emas di dopra, malaikat urasin utopu keca butene petupra deipidi, sun pol dumbarida atara, ortara di aneitamai dipdongopra antapi. Akeca deiki tarada, Allah er pe dirine weik kwamu.} butene, sun pol ortara atara di dimdongodaramreng keca dinin, sun Kerub butene, sun giso deiki belepra katuai kwamunge epsi. Ada, pio urasin telep kunumna weik gel, er sida batu nilam, ange deiki pio telep nimi deiyo bungne keca dopra deipinge, er si tahkta h urasin utopu keca, katuai kupupa, nedi epsi. 2 Ange dinmasi taruda, Allah Yahwehdi pio telep kain opkal lenan kenekmau ngebo tep pepu. “Ortara tekmange Kerub-Kerub, sun yan amutara akupmar bisi di, wekromemdi roda-roda akupmara neitamai bena wekurume. Aca wekmem dingeda, uku kalum akapmara neitamai di kalum ton dopropmemdi, kan buru di talepkurume. Akalum dopropmem ngeda, doprapmemdi amutu Yerusalem mutu deiki tara, im neitamai di, utara yamuptapmempa, Yerusalem deiki sakamre,” pepu. Upepupa, adipapu peipmautopu, angebodi ukunmaupa, neda moupra dinmasi.

3 Konum adipapu peipmautopu, kain lenan kenekmau ngebodi, aweku dingeda, akeca er si Kerub-Kerubda iknapi dam tara, Allah Yahweh er si eremna ati dam tara, arah selatan tara tekmai. Sun atekmaipa, angebodi Allah er ati damai weku pangeda, Allah er si eremna ati dam tara yumada, dua bum tenpu yanmaudi dekpepra dinikmaupa epsi. 4 Ukupmau taruda, Allah er pe ila dirineda, pio melalang peramre ngeda, gopra yukai benmau. Ada, menop taru, Pio Telep Lengna Ati pumbon, Peti Perjanjian deipinge deiki tara, Kerub urasin utopu keca butene petupra deipi keca deiki di Allah er dirine kuramngai di gopra, Allah er si eremna ati bura tara di wengna tep, bisi buplan potokra deiamyai aca bena teku. Ukupu pangeda, aduada Allah er si eremna ati pumbon yuma dekpepu. Tonda, akati bura tara dinin, akati damaida, Allah er telep kuna cap, puto cap petenkemna keca, er pe ila dirineda, weik kupupa, akati damai yuma dikdikmaupa, ila dirineda melang-lang penange weik kupmaua di dinikupa, epsi.

5 Maliakat urasin utopu keca, er si Kerub pol dana-dana di lang-lang penmaiya deiki di, ila lelim penmaupa, Allah er ati pumbon neitamai pe, bura tara ati damai dinin, yambul karenai yuma peda, lelim weik kupmaupa gekepsi. Alelim gekenmasi ngeda, Allah Yahweh, ^{▼▼Allah Yahweh – Acada, Ibrani upu deiki di, Allah er si tep, ‘Allah Yahweh Shadday’ pepra seki. Aupu ‘Yahweh’ kael kemna tep, Keluaran 3:14 deiki kael kepkurume. Aupu, ‘Shadday’ pepra seikinge deiyoda, sundi, ‘Allahda akeca-keca yuma talepra, pio deiki tara kuredi, Ila Puto Deiyo Ngebo kurure,’ tenena tep, ‘Shadday’ pepra seki. Sun Ketengban kael kemna tep, angeda konum jenek kupra sekmepu.} akeca-keca yuma talepra, pio deiki tara kuredi, pio Ila Puto Deiyo Ngebo kurur ngebodi, er upu peramrepa, lelim peramretopu penmaupa gekenmasi. 6 Allah Yahwehdi, pio telep kain lenan opkal kenekmau ngebo tep, pepu. “Kanda uku kalum dinin, uku bo di jenmaunge tenpu ton dopropkurume. Ada, sun malaikat urasin utopu keca Kerub-Kerub, ortekmangai dinin, sun yan amutarada, roda-roda kupmarai di doupra benkurume,” pepu. Upepupa, angebo erda adipapu orbena roda tenpu damai bena teku. 7 Acapu tekmau taruda, Kerub tenpungedi, er buri tenpu di, uku jenmaua neitamai kan-kan di er buru dongopu. Er buru ukupra dongopmauai, adipapu uku kalum duda, nukrapudi ware kupra du nukra, adipapu dopropu dingeda, lenan opkal kenekmau ngebopu tep karepupa, erdi ange doprapudi beu. 8 Tonda, ange dopropudi beu taruda, nedi epsi ngeda ake. Ada, aKerub-Kerub yuma, sun pol amutara di kwamu keca epsi ngeda, nimi buru urasin utopu keca kwamupa epsi.

9 – 10 Ne Yeheskieldi ange dipetepsipa, aKerub-Kerub yuma dinin, yuk-yukda, er bisi embana tep keca, er si roda, er yan tenpu-tenpu pirman tara kwamupa epsi. Epsi ngeda, Kerub sun yan damaida, roda dumbaripu epsi dinin, sun urasinda utoto pua. Aroda urasinda, pio telep lingne me di likmangepa, melalang peramredi, urasin pio telep kuramretopu kupmaupa epsi. Er yan roda ngeda, yuk-yuk tenpu-tenpu kwamu dinin, yan tenpu ngeda neitam-neitamai sisa ortara di, atara neitamai ton kwamupa, butene utopu kwamupa epsi. 11 Ange roda empat yumada, aKerub-Kerub yumada, sun urasin tara epidi, ‘Atara benkun’ tenen, tenepidi embanmai tarada, aroda peda atarapu banmai. Sun dumbari roda ngeda, yuk-yuk bisi bokra men embenmai. Ada sun Kerub-Kerub urasin ton gwlirtona gum dipapu kwiryepu benmaitopu, aroda dumbari peda utopu kwiryepu bei.

12 Sun aKerub-Kerub yumada, sun nong yuma dana-dana cap, sun amnyo tara cap, sun buru cap, sun pol cap, tonda sun bisi embana tep yan roda cap yumada, asuru weika di dek pemu. 13 Tonda, ne Yeheskieldi gekepsi ngeda, ayan roda yuma tep nengeda, “Akecada menmena sepra bana keca kurure,” pepipa gekepsi. 14 AKerub yuma dinin, sun yuk-yukda, sun nongda tenpu dinin, sun urasinda dumbari yuk-yuk kwamu. Urasin menmena ngeda, malaikat atonun, Kerub urasin kwamu. Butene urasinda, nimi sisa urasin utopu kwamu. Weneri ngeda, bura tara kuramre ila pus, er sida singa, er urasin utopu kwamu. Tonda, dumbari urasinda, maplye ma, sing-sing peramre ma (Rajawali) urasin utopu kwamu.

15 Uda amenda taruda, sun aKerub-Kerub yumada, erepra sun pol deiki di lakra embanmai. Ange yuma moupra dipetepsidi, kael kepmasi. Ada, ‘Uo, angeda pumun taru Kebar me pirman tara di konum emsinge pua’ tenen, betapra kael kepsi. 16 AKerub yuma embanmai taruda, sun nong damai dinin, amutara kwamu roda peda, abisipu embanmai. Tonda, angetopu, sun Kerub-Kerubdi, sun pol deiki erepra lakra embanmai taru peda, sun yan damai kwamu roda keca peda, melipra embanmai. Mening damaipu kikiman tonpa kunmai. 17 Atep, sun yuk-yuk ebana gume. Sun Kerub-Kerubdi tenpaipu dim peprap tekmai taruda, sun roda peda acapu kunmai. Angetopu, sun Kerub-Kerub im alau tara lakra welepnedi, kange di tamupra, yanapna benapna kemai taruda, sun roda peda utopu kikiman melipra embanmai. Yuk-yuk men embanmaiya deiyoda, aKerub sun pe sambalada, sun yan roda neitamai yuma peda, asambalapu kuramu.

18 Uda, ange yuma dinmasipanen, Allah Yahweh, er pio telep kuna cap, puto cap peten kemnange, er ila dirine perenglang penmau ngeda, Allah er si eremna ati wengna bisi buplan damai dinin, deiki tara kunmauai di tapra, ortara bura tara, sun Kerub-Kerub kunmaiyai deiki tarapu gopda pepra deipu. 19 Ukupmaupa, Ne Yeheskieldi dinmasi taruda, aKerub-Kerub epsinge yumada, sun pol puto di lakra erepra banmaidi, pol lelim pio weik penmainge cap, tonda lakdaro banmaidi, sun akurami mutu tu neitamai yuma tapra, sun adipapu bendopi. Sun benmai taruda, sun yan roda-roda peda melipra bendopi. Yambulanun ortara bendopi dingeda, Allah Yahweh er si eremna ati wengbana tep, bisi buplan damai, keteng yakan tara ngeda, bena dim pepra teki. Acapu bena dim pepra teki taruda, Allah er pe ila dirineda, sun aKerub-Kerub deikipu yana kunmau.

20 Ukupu pangeda, nedi moupra dipetepmasidi, kange di tamupra tenepsidi, betapra kael kepsi. ‘Uo, ange gam kure keca, er si Kerubda, pumun taruda, Kebar me kunmasi taru emsi kecapu kurure,’ tenepsidi kael kepsi. Ange Kerub-Kerubda, pumun taru Kebar me damai, Israel nesaladi si eremnung Allah, er amutara kwamu keca emsi ngeda, akonuma, sun peda aKerub-Kerub apu epsi. 21 AKerub-Kerub yuma peda, yuk-yuk dinin, urasin dumbari kwamu. Tonda, sun pol peda butene ortara, atara di kupka cadi, yumada dumbari kwamu. Tonda ange utopu, nimi buru urasin kuramretopu kwamu ngeda, sun pol amutara kwamupa epsi. 22 Atep, Allah er si eremna ati damai epmasi Kerubda, sun urasin peda utopu kwamu. Ada menop taru, Kebar me embenamnga pirmanai di emsi ngepu, kange di tamupra ton cap ataru peda epmasi. AKerub yumada, sun yuk-yuk dinin, utopu tenpu bisi dumsisi kwiryepu embanmaipa epsi.