Eze 11 | XteSC | STEP | Ange yuma konum kupupa epsopda, adingeda, Allah er Lek Sambaladi ne Yeheskiel tep erepra dubeneudi, yambul ortara deipneu. Erdi deipneuaida, Allah Yahweh er si eremna tep ati damai dinin, keteng yakan tarada, gel di lyom beilya wipra deiamidi, akati damai wengna tep buplan bon potokeiami ngeda, abuplan damai tara deipneu. Aceida nedi dinmasipa, abuplan damai bulupra tekmai neng ton epsi. Ada, aneng yumada, dua puluh lima (25) neng kunmaipa epsi. Akunmaiya kan-kan neitamaida, sun amutu taleamrei nimi deiyo neng butene epsi. Ada, nimi si Azur erdi deiamu ngebo, Yaazanya cap, tonda Benaya, erdi deiamu ngebo, Pelaca cap, kupmaipa, nedi epsi.

Ezekiel 11

Israel nesala sun deiyo-deiyo neng yumada, Allahdi wenepkamra tep, pepu upu

1 Ange yuma konum kupupa epsopda, adingeda, Allah er Lek Sambaladi ne Yeheskiel tep erepra dubeneudi, yambul ortara deipneu. Erdi deipneuaida, Allah Yahweh er si eremna tep ati damai dinin, keteng yakan tarada, gel di lyom beilya wipra deiamidi, akati damai wengna tep buplan bon potokeiami ngeda, abuplan damai tara deipneu. Aceida nedi dinmasipa, abuplan damai bulupra tekmai neng ton epsi. Ada, aneng yumada, dua puluh lima (25) neng kunmaipa epsi. Akunmaiya kan-kan neitamaida, sun amutu taleamrei nimi deiyo neng butene epsi. Ada, nimi si Azur erdi deiamu ngebo, Yaazanya cap, tonda Benaya, erdi deiamu ngebo, Pelaca cap, kupmaipa, nedi epsi. 2 Ataruda, Allahdi ne Yeheskiel tep upepneu, “Uo, Yeheskiel kanda nimi sisadi deipkei ngebo, Yerusalem mutu neitamai tep, amutu nesala damai yana mali-mali upu pererung nengda adano, kandi anengda dinmareme. Tonda, sun anengdi, ‘Ila mali kun keca kuptepe’ tenen, amutu nesala damai yarengedi, ‘Ukupkamep, ukupkamep,’ pepra, mali upu cap, tali upu cap weika di pererunge.

3 Ada sun abutene nengdi upererunge. “Gume, men di nun pona tep nengdi, amutu ati-ati yuma uruptapra sikke buktapi dinin, nun kangeda, ukutaru dipapu amutu ati-ati yumada, menmena tamupra doptepe. Ada Yerusalem mutu ila ati arumda, dana-dana tara ongopdongopra ila lyom gel beilya wipra dominge neitamai kunupa cadi, ukupmanmtoda, ila besi me mau pumbon utopu kunmape. Atep, ukupmanto ngeda, nimidi pio telep tu keca dopra, ‘Mawa deipkamep’ tenen, besi mau gamamenga pumbon dongoramengtopu, nunda amutu neitamai konum akunmapa cadi, nunda pio teleppu kunupe. Aca neitamaida, ikin keca ton nun damai men yasetue,” pepra, mok upupu penunge.

4 Abutene nengdi, amutu nesala gekenmangai di tali upu pererunga tep nengeda, ne Allahdi amenda taru, amutu nesala tep, ila ikin keca karepkamnengeda, wenemna upu pepra deipkene upu yumada, kandi gekepmemdi, amutu nesala tep lap perbenkurume. Yeheskiel kanda nimi sisa dipapu deipkei ngebo kuruma cadi, kandi atali upu pererung neng tep, wenemna upu lap perbenkamrume,” pepneu.

5 Upepneupa, adipapu Allah Yahweh er Lek Sambalda ne damai yana wekra dinikneudi, ne nong talepra melipneupa, Allahdi pepneu upu gekepsi. Allah Yahwehdi pepneu upuda ake.

Neda Allah Yahweh kununa cadi, sunda ne nyapu Israel yala nesalao. Sun yumadi, sun kange dipru neitamai tenerum keca yuma peda, ne konum moupra kael kemnune. Sun dingeda, ‘Gume, Yerusalem mutu neitamai konum yana kunmapa cadi, amenda taruda, ikin keca ton cap, nun damai men yankamsere,’ tenerum dinin, ne Allahdi tek sisinge pepkusene. Ada ake.

6 Menop taru neitamaida, sundi yuk nesala pio weika di konum pomrume. Nimi weik konum popmum pangeda, amutu neitamai embandange bisi-bisi yumada, sun apoptaprum neng, sun gemnada, pio weika di diningrure. 7 Ange tep nengeda, Neda, pio deiki tara erepra, akeca-keca yuma talenedi, ila puto weik nimi deiyo ngebo Allah ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu deiyonge jenek kupra sekmupu.} Yahweh kunune. Atep, sun amutu nesala yuma tep upepsene. Teka Yerusalem mutu neitamai, ila ati arum dorami ngeda, ila besi gamna mau utopu kurure.

Dinino, ukupmantoda, abesi mau pumbon neitamaida, tu keca utopu akapmar dinin, ada sun Israel yala nesala tep gume. Amau pumbon tupa kwamre tu keca utopu ngeda, ada sun men di nimi weik poprumdi, tamamrum neng, sun galemna tepa. Atep nengeda, nedi sun yumada, amutu di enepra dopkotepsenepa, pio karen mutupu benkamrume! 8 Tonda, sun amutu kurum Israel yala nesalada, ‘Uo, nun posenung nengda, dan taru yangedi, sun yu parang ya di poptapkamseng do?’ tenen, pio kware weik kurume. Atep, ne Allahdi, akeca-keca yuma talepra, ila puto weik deiyo ngebo kunedi, sun kware weik teneramrum keca dopra, sun deiki deipkamsene. Ukupkamsena cadi, yuk mutu yu nengdi, sun ila yu parang ya dopra poryankamsenge. Teka, nedi pepnepa, ayu nengdi, sun damai yana poryankamsenge.

9 Sun amutu kurum nesalada, ne Allahdi adipapu doprapsenedi, amutu neitamai di yuk karen mutu dubenkamsene. Ukupsenedi, yuk mutu nimi bo neng tep dopra karepkamsene. Ukupsene dingeda nedi sun wenemna cap, dena cap tep, ila kange mun wenemna keca dopra, sun deiki adipapu deipkamsene. 10 Ukupsenepa, yu nimi bo nengdi yana, sun amutu kurumu nesala weika di, poptapkamenge. Ada, sun yu parang ya di, sun amutu kurum neng, denge weika di popra gawal dangkamenge. Popsenge pangeda, weika di depkamrume. Teka, sun amutu atara, yuk karen mutu ortara, daneitamaida, mutu yuk-yuk petenkemna tep, wilimdona damaida, nedi sun atara kurumu nesala wenepsenedi, weika di poptapkamsene.

11 Atep nengeda, akati arum Yerusalem mutu neitamaida, sun tali kange deipra men kunkamrume. Sundi, ‘Gume, akati arum neitamaida, ila besi mau pumbon utopu kurura cadi, nunda nimidi mawa derinung tu keca, besi mau pumbon kuramretopu kunmapa cadi, ikin keca nun damai men yasetue,’ tenerume. Dinino, ne Allahdi tek sisinge pepkusene. Sunda, amutu neitamaida, pio telep bouna di dakra men kunkamrume. Besi me mau pumbon tu keca moupra deipmengepa kuramretopu, pio men kunkamrume. Nedi, sun wenemna tep, pio domamsenyanen, adipapu upu bokeipsenedi, popkamsene.

12 Ukupsene pangeda, sun adipapu kael kepkamnerume. Ada, sundi, ‘Uo, tek sisi Allah Yahwehda akurure. Erda akeca-keca talepra ila puto weik deiyo ngebo kurure,’ tenen, moupra kael kemkamnerume. Teka, neda ila puto weik deiyo ngebo kunedi, sun tep, “Angeda kunkamrume, angeda pio men kunkamrume,” pepra, deiamsisi upu yumada, sundi yanirtamnapu kunerume. Nedi, “Telep kuna ngeda, ake. Mali kuna ngeda, meme,” pepra, sekra kareamsisi upuda mopra pio men gekenerume. Sundi tali tapnapu kuamrume. Angepu gum dinin, tonda sun mutu dana-dana tara di ongopdongomseu mutu neitamai kunge nesala yala-yala yuma, sun pe kange dipapu, ‘Teka’ tenepra taleramenge upuda, angepu taleamrumdi, kuramrume. Ange tep nengeda, ne Allahdi sun Israel yala nesala yuma tep, wenepsenedi, ikin keca sun deiki derinkamsene. Allahdi ne Yeheskiel, ne kange dipru neitamai peipmaneupa, aupu tupa penmasi taruda, mambul keca ton kupupa, epsi.

13 Ne Yeheskieldi, adipapu aupu yuma tupa penmasi taruda, dato-dato di adipapu tenpu ngebo er si Benayadi deiamu ngebo, Pelaca, erda tu deiki loka dourbeudi, adipapu depu. Er konum depkopda, ne peda kware weik kupneua deiki di, adipapu tu deiki saka dourbenmasidi, ila upu deiki di pepsi. Ada, “Uo ne nai Allah, kanda akeca-keca yuma talepra, ila puto weik deiyo ngebo kurume! Nun Israel yala nesalada, yambulanunpu tupa gam akunmap neng yuma tep nengeda, adipapu ataru di poptapsememdi, gawal dangkuserem do?” pepra, ngoloksidi mali pepsi.

Allahdi wangaptapnenga utopu kuamu neng tep, “Ukupkamsene,” pepra deipu upu

14 Allah Yahwehdi ne Yeheskiel tep ton cap yuk upu dukdongopra pepneu. Allahdi pepneu upuda ake.

15 Uo Yeheskiel, kanda nimi sisa dipapu deipkei ngebo kurume. Kan cap, kan kayapu neng cap, kan nyapsilip cap, tonda Israel yala nesala pio weik capda, yuk mutu yu nengdi yana popseidi, ateng koupra, sun pe mutu tamupra dubenamseipa, keteng tamun weika di, dakuramrumanen, ukutaruda, Yerusalem mutu tamupra konum yanmarume. Ataruda, wangapnetopu kwamseuanen, ukutaruda, konum tamupra yanmarume.

Dinino, ataruda, Yerusalem mutu ila ati arum neitamai kunge nesaladi, sun men taru yu nengdi dubenamsei neng tep, aupu pesenunge. Aupuda adano, “Gume, pio pera yuk karen mutu neitamai dubenami nengda, menop taruda, Allahdi peramu upu yuma yanitamnapu kuramya tep, sun wenemna tep, Allahdi yu kupupa, go karepu tarupu, yuk yu nesaladi yana, anesala popra dubenami.

Atep nengeda, Israel mutu neitamai tu tep nengeda, nun nai bo Allahdi, nun ataru acapu tupa kunup nesala tep, konum dopra nun tep kareamseupa, ukutaruda, nun dipapu atu talenupe. Ada nun mawangepu kurure.” Upepra penunge.

16 Ukutaru amutu kunge nengdi, aupu penunga cadi, kan Yeheskieldi amutu neng tep upepkurume.

Gume, akeca-keca yuma talepra, ila puto weik kurur deiyo ngebo Allahda, aupu pepsere. Tek sisi ngeda, men taruda, sun yala neng cap, sun kayapu neng cap, weika di, yuk pera karen mutu, dawangaptapneto kurami. Nedi sun wenemna tep, anesala dopra dubenamsidi, pio karen mutu, yuk-yuk mutu neitamai dadeipsipa, dakurami.

Ukurami dinino, sunda yuk mutu nesala neitamai dakurami taru yumada, ne dipapu sun Israel nesala yuma tep, pio melipra kalengnapu kuramsi. Sun wenemna tep, keana taru tep, pera karen mutu neitamai deipsipa dakurami dinin, ukutaruda, sun dopra, ka tamupra sun pe mutu sisapu, duyakasenune.

17 Ange tep nengeda, kan Yeheskieldi, upepra lap penkamrume. Neda, Allah Yahweh akeca-keca yuma talepra, pio deiki tara erepra, ila puto weik deiyo ngebo kunedi, pepsene. Ne mawa nesala, sun Israel yala nesala yumada, sun yuk pera karen mutu neitamai dubena deiamsisi nengda, ukutaru nedi sun anesala yuma, yuk-yuk mutu dakuramrumai di bupra deipkamne. Sun tupa gam kurum Israel yala nesala dopra, sun tep kareamsisi mutu sisa, Israel mutu neitamaipu yana tamupra dopra deipkamsene.

18 Sun yuk-yuk karen mutu neitamai di dopra duyanedi, tamupra acapu konum deipnyopda, anesala yumadi, Yerusalem mutu yumada, ka tamupra telep kudinkamenge. Ada, amutu damai konum tamupra yangopda, sun ataru kurum nesaladi, ‘Nun nai ake’ tenen, tali keca talepra si eremrum isok cap, isok si eremna tep, dopra deiamrum keca cap, ati cap, patung cap, pio mali upu perumunge cap, yu kange tenerumnge capda, gum kupra derinkamenge. Ada, ne Allahdi, ‘Akeca yumada ne pio songe,’ tenenun keca yumada, ataru yankunge nengdi, akeca yuma popra sikke buktapkamenge. Sundi akeca yumada adipapu tapronkamenge.

19 Ukupra konum kupmengopda, ataruda nedi aIsrael nesala, sun dipru kange tenena nge yumada, ukupungepu karepkamne. Tonda sun dipru tenena ngeda, pio telep lengna ukupungepu karepnyopda, sun yumada tenpu kange dipru talepra kikiman kunkamenge. Tonda, tenpu lek sambala dopra, sun dipru neitamai yumada dongopkamsene.

Men taru, sun dipru neitamaida, gat gel utopu kuramu ngeda, adipapu nedi dopropkamne. Ukupnedi, ukupu kange dipru ngepu yo punupra deipkamne. Ukupne pangeda, sun dipru neitamai yumadi, ne tepapu teka tenengedi, ne upu gekenkamnenge.

20 Ange yuma kunkamna deiyoda ake. Ada, sun anesalada, ne Allahdi, “Angeda ukunkamrume, angeda pio men kunkamrume,” pepra deipsi upu yumada, pio pe deipra talepra kungedi, moupra tenenkamenge. Tonda angepu talepra, moupra kunkamenge. Ukupra, telep kudisenepa, dumsisi kupmengopda, sunda tek sisi ne nyapu sisa kunkamenge. Tonda, ne Allahda, sun nai bo sisa pio kunkamne. Sunda, ne sipu erepra kunkamenge.

21 Dinino, ware nesala do yuma, sun anesaladi tupa-tupa ‘Nun nai ake’ tenen, tali keca talepra si eremnung isok cap, isok si eremna tep dopra derinung keca cap, akeca si eremna ati cap, patung cap, pio mali upu penung nge cap, yu kange tenenunge nge capda, akeca yuma pio talepra kunkameng nesala tep nengeda, ila di wenepkamsene. Ada, sundi pio mali-mali kunga deiki di, ila kange mun keca dopra, sun giso deiki derinkamsene. Ukupkamna deiki di, sun malipu kunge nesala tep, wenepnedi, yawa poptapkamne ja! Neda Allah Yahweh, akeca-keca yuma talepra, deiki tara erepra, ila puto weik deiyo ngebo kununa cadi, ange pepmasentopu, tek sisi nong kupkamre ja, pepsene.

Allahdi upepupa, ne Yeheskieldi gekepsi.

Allahdi Yerusalem nesala damai tapu dinin, tamupra yaua tep, pepu upu

22 Ange yuma konum kupkopda, sun pol dana-dana tara kwamu malaikat, sun sida Kerub-Kerub, sunda gonga kepra, sun pol di eremdonmaidi, di lakra benmai. Tonda, sun damaida, yanda bisi embana tep keca, er sida roda-roda yuma peda, embandanmai. Ukunmai taruda, Israel nesaladi si eremami Allah, erdi, ‘Israel yala nesala cap, ne cap kikiman acei akunkamepe’ tenen, peten kemna tep keca, er pio telep ila dirinda, sun aKerub-Kerub damai deiki tara deipmaupa, angeda jenek kupupa, ne Yeheskieldi epsi. 23 Ange konum kupkopda, Allah Yahweh er ila telep dirinda, Yerusalem mutu ila ati arum dominge neitamai deipmaunge yumada, adipapu gopdapepra, amutu damaipu dinin, keteng yakan tara, mutu dup bukamngaipu bendopmaudi, amutu buma deiki bukupa epsi.

24 Adirinda, katuai kepra deipmau taruda, Allah er Lek Sambaladi ne Yeheskiel ereprapneudi, ken mapsa deiki di, adipapu tamupra Babel ^{▼▼Babel – Amutu si perami ngeda, weneri kwamu. Ada, ‘Kasdim mutu’, tonda, ‘Kaldea mutu’, tonda, ‘Babel mutu’ pepra peramitopu, tupa penupe. Dinino, amutuda tenpu mutupu kurure.} mutu neitamai dinin, menop taru sun Babel mutu jen talena nengdi, Israel nesala yuma popra tapidi, ton tara neng tep, ateng koupra, sun pe mutu, Babel mutu tamupra dubena deiamipa, nimi bo nesala utopu kupra kuramyaipu, amalaikat ngebodi, ne dopra dubena deipneu. Ukupneu dingeda, ange eipmanu ken mana utopu keca yumada, adipapu gum kupu. 25 Babel mutu neitamai dinin, Israel nesala nimi bo neng utopu kurami nesala damai deipneu pangeda, nedi sun Israel nesala tep, Allah Yahwehdi, “Amenda dorkunkamre taru kupkamre kecada ake, ake,” pepra, ukupu lap peipmaneu keca yumada, sun anesala wekra gekenmaiyai di yana, lap pepra nuksipa, gekepnei.