Eze 12 | XteSC | STEP | Allah Yahwehdi ne Yeheskiel tep, aupu ton cap lap pepneupa gekepsi. Ada ake.

Ezekiel 12

Allah Yahwehdi, ‘Israel nesala ikin weik kunkamre ngeda, petenkemna keca tep, lap pepu upu

1 Allah Yahwehdi ne Yeheskiel tep, aupu ton cap lap pepneupa gekepsi. Ada ake.

2 “Uo Yeheskiel kanda nimi sisa dipapu deipkei ngebo kurume. Kanda mali kunge nesala kankan neitamai di kurume. Ada, sun Israel nesaladi ne Allah tep moupra men tenenengedi, ne upu tupa-tupa yaninenunge. Kan cap aneng cap kikiman kurume. Atep, sun Israel nesalada asuru akurur dinino, sun moupra men dinunge. Utopu, sun amul akurur dinin, pio moupra men gekenenunge. 3 Sundi ne kune keca kupnepa, men dinunga cap, ne penun upu men gekenenunga cap, deiyoda, sun anesala yumadi ne tep, moupra men talepra kunenunge. Sundi, ‘Allahda nun dabale’ tenen, yanirtamnapu kunenunge.

4 Ange tep nengeda, ‘Israel yala nesala kael kepkameng’ tenen, nedi kan Yeheskiel tep, petenkemna keca utopu konum dopra deipkene. Ange tep nengeda, ukupkamrume. Ada, keteng komuni tupa akwapre taru dipapu, kan bung keca yumada, moupra geteprapmemdi, sun anesala dinmangai di, dopra embankamrume. Ada, ton tara nengdi, yuk mutu neng tep, popra bisbisa kapmengedi, ‘Nun pe mutu tamupra dubenkamep’ tenen, “Ketenepnalume!” pepmengepa, apopmenge nengdi, nimi bo nesala kemna utopu kupra, sun bung keca getepmengedi, dopra debaramengtopu, kan Yeheskiel peda, utopu kupropkamarume.

Ukupmemnyopda, keteng sintara pe, idona taru pe, lukunda taru peda, ataru yumada, adipapu ange kupkurume. Ada, ton tara nengdi, ton tara neng tep, poptapmengepa, sun amutara kunkameng nesaladi sun bung keca getepmengedi, badoramengtopu, kan peda utopu kupkurume. 5 Tonda, ataru peda, sun anesala dinmangaipu, akati arum dominge, dana-dana tara yuma, ongopdongopra wiami lyom gel beilya damai bememdi, bura tara ban bisi tep, bon ton potokeipkurume. Bon potokeimem pangeda, sun anesala yumadi epra kael kepkamenge. Tonda, kan keca kandi moupra dongopmemdi geteamem getenada, douprapmemdi, abeilya neitamai potokeiamem bisi bon di, dubenkamrume.

6 Kan morokyo deiki di ato getena kecada, abon potokeiamem bisi bon di benkurume. Ada, ipmare taru pe, tonda benkamrum lukunda taru peda, pio adipapu benkamarume. Ataruda, ‘Ne benkaman bisida, pio men dinkamne’ tenen, kan asuru yumada, opkal di lelipdongopmemdi benkamrume. Ada, ‘Ataru abenkaman bisi banada, men kael kepkamane’ tenen, peten kemna tep kupkamarume. Ada, kandi akunmamemnge yuma tep nengeda, sun Israel mutu neitamai di tapra, pio pera karen mutu bena kunkameng nesaladi, dinkamenga tep pepkene. Ukupmempa, sundi, ‘Uo, Yeheskieldi kupmartopu, nun peda, amenda taru ukupkamep ja. Tonda, yuk mutu nesaladi dubena deipkamseng mutuda, men kael keptepe!’ tenen, ‘Kael kepmengedi, moupra tenenkameng’ tenena tep pepkene.

7 Uda, ne Yeheskielda, adipapu Allahdi, “Angeda kupkurume,” pepra, deipneutopu konum kupsi. Ada atumida, adipapu, keteng komuni taru dipapu, ne bung keca yumada, doprapsidi, getepra sengpepsi. Ada, ton tara nengdi, ton tara neng tep, poptapmengedi, sun pe mutu dubengepa, anengdi kungetopu, ne peda ukupsi. Utopu, lukunda taru konum kupu pangeda, amutu tapra bura tara bisi banai tep, agel beilya neitamaida, ne pe buru deiki dipapu bon potokra deipsi. Ukupra deiamsa dipapu, ne bung keca yuma getepra deipmasi ngeda, ne morokyo deiki di topra bendopsi. Ukupsi pangeda, sun anesala yumadi moupra epneidi, kael kepi. 8 Ukupsidi, mapmasa bereku pangeda, ambutumida, Allah Yahwehdi ne Yeheskiel tep, ne damai peipneu upuda ake.

9 “Uo, Yeheskiel kanda, nimi sisadi deipkei ngebo kurume. Kandi apel yuma dopmamumpa, sun Israel yala nesala, akaren mutu neitamai tupa kunge neng yumada, ne Allah tep, ‘Erda nun ila nimi deiyo ngebo, nun nai akurure’ tenen moupra men tenenung nesala kununge. Atep, sundi kan pel dopmamumnge epkeidi, kan tep konum asipetepkei be? Teka, sundi, ‘Uo, kanda Yeheskielo, kandi apel donmamum ngeda, ware keca deiyo tep, apel dopmamum do?” pepra, konum asipetepmakenge.

10 Ange tep nengeda, kandi sun Israel nesala yuma cap, sun nimi deiyo-deiyo neng cap tep, nedi pepkuken upuda, ada sun anesala yuma tep pepkene. Atep, kan Yeheskieldi apeipkuken upu dopra, apepmaken nesala yuma tep, lap perbenkamarume. Aupuda ake.

Neda, “Allah Yahweh, ^{▼▼Yahweh – Ayat 10 neitamaida, Allah er si tep, Ibrani upu deiki di si butene pepra seki. Tenpu ngeda, Allah er pe si sisa ngeda, ‘Yahweh’ pepra seki. Butene ngeda, ayat 19, 23, 25, 28 neitamaida, ‘Adonay’ pepra seki. Sun kael kemna tep, aupu ‘Adonay’ deiyoda, jenek kupra sekmupu.} ila di deiki tara erepra, akeca-keca yuma talepra, ila puto weik deiyo ngebo kunune. Ukununa cadi, Yerusalem mutu neitamai kurumu Israel yala nesala cap, sun yuma tep talepra deiyo-deiyo kepra kurumu ila deiyo-deiyo neng cap tep, apu pepsene. 11 Allahdi, ne Yeheskiel dopra, sun tep, petenkemna keca keipneua cadi, sun moupra teneprumudi, kael kepkurume. Nedi, apel donmanupa, dinmanerumunge yumada, Allahdi ange utopu, sun wenemna tep, utopu kupkamsere. Ada amenda taru ikin keca yana, sun deiki deipkamserurnge tep, pepsene.

Ada, Israel mutu neitamai kunge nesala dinin, Yerusalem mutu neitamai kunkameng nesalada, Babel mutu yu nengdi yana, popsengedi, sun pe mutu tamupra dubenkamsenga tep pepsene. Babel mutu tara kunge nesaladi, sun tep yana popra tapsengopda, tupa gam kunkameng nesalada dopra, sun pe mutu dubena wenemnai deipkamsenga tepa. Atep, sun moupra tenenkamrume.

12 Teka, ataruda, sun Israel yala nesala kankan neitamai kunkameng deiyo-deiyo nengda, sundi talenge bung keca yuma getepra deipmange nge, lukunda taru konum yare pangeda, adipapu abung keca dopra, sun morokyo deiki topmengedi, adipapu benkamenge.

Ada, ‘Nun pona tep nengdi, popsenung’ tenen, kware kuprepa, sun ati arum dana-dana tara ila gel dopra wiami beilya neitamai di, sun pe buru di, bon potokra deipmengedi, apotokameng bisi bonda, adipapu animi deiyo nengda, gupsaka benkamenge. Ataruda, sun asuru yumada, lelipdongopmengedi benkameng taruda, sun benkameng bisi cap, mutu capda, men epra kael kepkamenga tepa. Sunda, tali lupra benkamenge.

13 Anengda, ‘Sepdara bepedi, lyepdankamep’ tenen, benkamenge. Dinino, ukupmantoda, ne Allahdi sun ila nimi deiyo ngebo Raja, er tomona tep keca er sida jala deipkamne. Ada mekina tomopra pona tep keca utopu ngeda, ketenepra deipkamne. Ukupnedi, Israel yala nesala, sun ila nimi deiyo ngebo Raja tomopra, Babel mutu doupra dubenkamep’ tenen, bisi benkamenge. Dinino, ukupkamne taruda, er tep ateng koupra dubenkameng mutu, Babel mutuda, er pe asuru di men epkamre. Abena deipkamne mutu neitamaipu dadepkamre.

14 Tonda, ataruda, ne Allahdi, er taleamu mutu neitamai kurami nesala cap, er melimami deiyo-deiyo neng cap, er jen talena neng yuma cap yumada, sun wenemna tep, enepra dopkotepne pangeda, mutu sirik, im sirik yuk-yuk mutu neitamai dabendopkamenge. Dinino, nedi go karepnepa, yuk mutu yu nengdi, sun deiyo ngebo Raja amutara pel dopra melimami neng yuma tep, domnapu kuramenganen, adipapu aneng yuma, yu parang ya di popra gawal dakamenge. Ange yumada, ne Allah dia!

15 Sun mutu talepra kuramu Raja cap, amutu nesala cap, sun talepra kunung nimi deiyo-deiyo neng cap yuma dopkotepnepa, yuk mutu neitamai dabendopkameng taruda, sun yumadi ne tep, ‘Uo, Allah erda, tek sisi, ila puto weik ngebo Allah Yahweh kurure’ tenen, kael kepkamnenge.

16 Sun Israel nesala kankan neitamai di, nesala dengeda yambulanunpu bokra mawa deipnepa, gam tupa kunkamenge. Sun anesalada, podankameng taru cap, ila kange mun jen putankamre taru cap, ila kange mun pu yala jenkamre taru cap, anesala bokrapnedi, lyepra telep kupra deipkamne. Ukupnepa, sun yuk pera karen mutu neitamai, nimi bo neng utopu kupra kunkamenge. Ataru neitamaida, anesala yuma, sun ikin weik kunkamenge yuma cap, pio mali keca sun damai yarepa, ikin weik kunkamenge yuma cap tep nengeda, amenda taru sundi lap peryankamenge. Ukupmengopda, sun Israel yala nesala yumadi, ne tep nengeda, ‘Uo, Allah Yahwehda, erda tek sisi deiki tara erepra, ila puto weik ngebo kurure’ tenen, kael kepkamnenge.

Allahdi nabi Yeheskiel kange di ton cap upu ton dukdongopra pepunge tep seku upu

17 Amenda taruda, kange di ton cap, Allah Yahwehdi ne Yeheskiel tep upu ton pepneu. Upepneuada ake.

18 Uo Yeheskiel kanda, nimi sisa dipapu deipkei ngebo kurume. Ataruda, kandi jen keca dopra jenkamrem taruda, kan nong yumada, moropsemkamkere. Ange utopu, kan me dopra jenkamrem taruda, kandi, ‘Uo, ila ikin kecada, ware keca ton nun damai yankamser do?’ tenen, kware pio weik kupkerepa, kan nong yumada, moropsemkamkere. 19 Ukupkeryopda, kandi amutu neitamai tupa gam kunge Israel nesala yuma tep, sun damai bena, aupu lap penkamrume. Ada, Allah Yahweh pio deiki tara erepra, akeca-keca yuma talepra, ila puto weik deiyo ngebo kuredi, sun Yerusalem mutu, ila ati arum dominge neitamai tupa kurumu nesala tep, upepsere.

Ada, sun anesala yuma jen jenkarumu taru yumada, kware pio weik kupserepa, sun nong yuma moropsemkamre. Angetopu, sun me dopra jenkamrumu taru yumada, ‘Uo, ikin weik keca nun damai yankamsera tep, ware kuptepe do?’ tenen, kange tenimtonapu kupserepa, sun nong bol yumada, buma bol teleleng pepserepa, sun nong yuma moropsemkamre.

Ukupkamengada, tali tep gum dinin, deiyoda ake. Ada, amenda taru neitamaida, sun kunkameng mutu cap, amutu neitamai kure keca cap yuma peda, pio malipu kunkamre. Deiyoda, ataruda sun mutu neitamai kunkameng nesala yumadi, pio yu weik kupredi, ‘Nun songe,’ tenedanapu kupmengedi, pio tupa-tupa malipu kunkamenge. Ukunkamenga cadi, nimi podana cap, pangdana cap, mali kudidana cap, upula dona cap kunkamenga deiki di, amutu telep kure keca yumada, pio gum kupkamre.

20 Ataru neitamaida, Israel yala nesala kurumu mutu-mutu neitamai yumada, pio mali kupyopda, walangyopu kupkamre. Sun ila ati arum doramrumai yuma peda, yuk mutu yu nesaladi yana popnedi, sikke bukra tapkamenge. Angetopu, sun wa perumu tu yuma peda, adipapu mali kupra deipnepa, akeca-keca yuma gum mutu kupneto kupkamre. Sun wenemna tep, ukupra deipkamsen ikin keca yuma tep nengeda, sun gam tupa kunkamrum nesala yumadi, ‘Uo, Allah Yahweh erda tek sisi akeca-keca yuma talepra, ila puto weik deiyo ngebo kurure’ tenen, kael kemkamnerume.

Allahdi, “Amenda taru ukupkamsene,” pepra, penkamre upu yumada, tek sisi nong kupkamra tep, pepu upu

21 Amenda taru, Allah Yahwehdi ne Yeheskiel tep pepneu upuda ake.

22 Uo, Yeheskiel kanda, nimi sisadi deipkei ngebo kurume. Ware keca deiyo tep, sun Israel yala nesala yumadi aupu, ukupmanto upu tep tupa tenengedi, si pio tupa-tupa penung do? Sundi penungada ake. “Allahdi pere upu gekepmengedi, lap penunga deiyo nengda, sun nabi-nabi nengdi pesenung upu yumada, tali-tali pertamsenunge. Keteng tamun denge weik kunkamtepya peda, sundi pesenung upu yumada, nong pio men kunkamre,” pepra, mali penunge. 23 Sun Israel yala nesaladi, aupu tupa penunga tep nengeda, kandi anesala tep upenkamrume.

Allah Yahweh pio deiki tara erepra, akeca-keca yuma talepra, ila puto weik deiyo ngebodi aupu pepsere.

Sundi amali upu perumu ngeda, gum kupra deipkamne. Angeda tupa men penkamrume. Israel yala nesala kunge mutu neitamai yumada, aupu pio kiliptapkamne. Aupu pio gum kupra deipkamna tepa. Dinino, anesala damai tep upenkamrume. Allahdi ange yo punupnedi, apepkusen upupu penkamrume. Ada ake.

Ukutaruda, gawal dangne taruda, konum damai kupsere. Atep, ne Allahdi, ken mana deiki di sun nabi-nabi neng tep, upu karenyopda, ange yumada tek sisi nong kupkamre. Nong kupre pangeda, sundi adipapu dinkamrume. Sun nabi-nabi nengdi pepra deriraminge cap, penkamenge capda konum dukdongopnedi, katuaipu deipkamne.

24 Ange tep nengeda, ataru di dipra, dorkunkamre taru neitamai yumada, sun Israel yala nesala yuma tep, tali upu pertamnung nabi nengdi ton, pio men tekra penkamsenge. Tonda, sun mok upu penge nabi nengdi, ‘E, amok upu pepnepa, amutu nesaladi, ne tep, kange derinkamnenga cadi, tali upupu pertamkamne’ tenen, mok upu ton cap pio men penkamenge. Amok upu penge nabi neng yumada, gum kupra deipkamna tepa. 25 Nabi-nabi nengdi, tali-tali upu ton pio men penkameng dinin, neda, Allah Yahwehdi, sun Israel nesala tep, tek sisi upupu penkamsene. Nedi penkamsen upu yumada, nedi pel dopnepa, ange yuma tek sisi nongpu kupkamre ja. Tonda, “Kange di ortumi, atumi nong kepkamre. Amenda tarupu nong kupkamre,” pepra, men penkamsene. Ange gum dinin, nedi, ‘Ukupkamre,’ pepnetopu, adipapu, sun gam tupa kunkamrum taru neitamaipu tek sisi nongpu kupkamre ja! Atep gekepneso. Uo, sunda ataru kurumu nesalao. Sunda moupra men tenepra kurume. Sundi ne tep, ‘Gume, Allahdi pesere upu yumada, nun dabale,’ tenenupa cadi, ‘Angeda pio talepra men kunkamepe’ tenen, yanitamnapu kunerume!

Dinino, ataru di dipra, dorkunkamre taruda, nedi, “Ukupnepa, ange-ange ton kupkamre,” penkamne upuda, ne adipapu angepu tek sisi kupkamne. Neda, Allah Yahweh pio deiki tara erepra, akeca-keca yuma talepra, ila puto weik deiyo ngebo kunedi aupu konum pepmasena tep, tek sisi nongpu kupkamsere! Allahdi pepu.

26 Upepneupa, amenda taru ton, Allah Yahwehdi ne Yeheskiel tep pepneu. Aupuda ake.

27 Uo, Yeheskiel kanda nimi sisa dipapu deipkei ngebo kurume. Sun ataru kunge Israel yala nesala, amutu neitamai kunung nesala yumada, kandi peprum upu tep, ukupra pekenunge. “Gume, Yeheskielda ken mapna deiki di kael kepudi, ataru peserur upuda, akapmar dinin, aupu nong kupkamre taruda, ukutaru gume.

Ada, nun ataru kunup nesala deiki ikin keca men yana kunkamser dinin, pio dorkunkamre taru neitamaipu katuai kuprepa, nong kupkamre. Atep nengeda, nun pe kange deiki di tenenup kecapu, tupa talepra kunkamepe,’ tenekengedi, pekenunge.

28 Ange tep nengeda, sun anesala yuma tep, upepkurume. Allah Yahweh pio deiki tara erepra, akeca-keca yuma talepra, ila puto weik deiyo ngebo kuredi, aupu konum pepmasera tep, tek sisi ataru dipapu nongpu kupkamsere! Allah Yahwehdi konum pepra deipsere upu yumada, tek sisi ataru neitamaipu nong kupkamre. Atep, sundi, ‘Gume, ada ortumi, orketeng tamun, amenda dorkunkamre tarupu kupkamre,’ tenena gume. Ange gume dinin, nedi pepsene. Atumi ton pepne upuda, adipapu pel dopnepa, tek sisi katuai kuprepa, nong kupkamre!

Neda, Allah Yahweh, pio deiki tara erepra, akeca-keca yuma talepra, ila puto weik deiyo ngebo kunedi, aupu konum pepmasena tep, tek sisi ataru dipapu nongpu kupkamsere! Akonum pepmasene.

Yeheskiel, kandi aupu gekepmemdi, sun Israel yala nesala yuma tep, lap perbenkamrume, pepkene. Allahdi pepu.