Eze 14 | XteSC | STEP | Israel yala nesala, sun nimi deiyo-deiyo neng, ware kuprap nengdi, Israel mutu talepra kurami neng yumadi, ne Yeheskiel damai yaidi, Allah Yahweh er teneramunge tep yana asimyanei.

Ezekiel 14

Isok si eremami nesala tep, Allahdi wenepkamrenge tep, pepu upu

1 Israel yala nesala, sun nimi deiyo-deiyo neng, ware kuprap nengdi, Israel mutu talepra kurami neng yumadi, ne Yeheskiel damai yaidi, Allah Yahweh er teneramunge tep yana asimyanei. 2 Ukupipa, Allah Yahwehdi ne Yeheskiel tep upepneu.

3 “Uo, Yeheskiel, kanda nimi sisa dipapu deipkeipa kurume. Kanda, sun ayana asimakeng nengda, sun pe dipru neitamai yumada, tali keca isok si eremenge neng kununge. Anengda, sun si eremenge keca dopra, sun asuru dinai deipmengedi, tupa-tupa si eremnunge. Amali kunge keca deiki di, tupa mali kudidanapu kununge. Ukupmantoda, nimidi bisi embandenkap, gel di yan giso dukpeprepa, saka dourbaramengtopu kununge. Ukununga tep sundi ne tep yana asipetepnetenga peda, ware keca deiyo tep, sun anengdi moropkamneng upuda, gekenkamne do? 4 Ange tep nengeda, sun aneng yuma tep upepkurume.

Ada Allah Yahweh ^{▼▼Yahweh – Acada, Ibrani upu di, ‘Yahweh Adonay’ pepra sekya cadi, sun kael kemna tep, nundi aupu ‘Adonay’ deiyonge jenek kupra sekmupu.} pio deiki tara erepra, akeca-keca yuma talepra, ila puto kurur deiyo ngebo erdi upepmasere. Sun Israel nesala yumadi, ‘Nun nai bo ake’ tenen, sun tali keca si eremenge isok tep, pio teka tenepmengedi, aisok dopra sun kange dipru neitamaida, pio dongonung nesalada, pio malipu tupa kununge. Ukununga cadi, anesala kankan di, tenpu ngebo, ne upu lap pena deiyo ngebo, tek sisi nabi damai yaredi, ne tep moropneryopda, ne Allah dipapu, er tep tamupra lap pepra deipkamne upuda, ‘Isok si eremna neng gekeptenge’ tenen, sun wenemna tep, aupupu peipkamne.

5 Ukupra peipkamna deiyoda ake. Ada, Israel yala nesala kankan di, isok si eremami nengdi kunge keca deiki di, ne damai di gopra, yukaipu kununge. Ne damai yana, ne sipu men eremnenunge. Ukununga cadi, isok si eremenge nengdi, ne nabi neng damai yana moropnengopda, ne penkamne upu deiki di, isok damaida, nedi ne nyapu sisa dopra, gopra yukai deipkamne. Ukupkamna deiki di, ne nyapu sisa sun puda, isok-isok tep talepra kunge ngeda, tapmengedi, kange di tamupra, ne damaipu deipnepa, ne damaipu yakankamnenge.

6 Ange tep nengeda, kanda Yeheskieldi, sun Israel yala nesala yuma tep lap pepkurum upuda ake. Sun nai bo Allah Yahweh, pio deiki tara erepra, akeca-keca yuma talepra ila puto deiyo ngebo kuredi, sun tep pepsere. Ada sun mali-mali kumum keca yumada, adipapu taprumudi, amnyo karikra, tamupra ne damaipu yankurume. Ukuprumudi, sun si eremrumu isok cap, patung petupra derirum keca cap, akeca tep, pio mali-mali kun keca pio weika di tali kurumunge cap yumada, adipapu taprumudi, ne damai tamupra yakankamrume.

7 Uda, angeda tali tep men pepsene. Sun moupra gekepneso. Ware nesala do yuma, sun Israel yala nesala do, yuk mutu di yana, sun cap kikiman kunge nimi bo neng do? Sunda, ne tep pio karen mutu utopu kurumudi, isok cap, akeca si eremna tep keca, er sida patung petupra, sun dinai deipmumdi, si eremrumudi, akeca dopra sun kange dipru neitamai dongoprumudi, akeca tep pio teka tenerumu nesala tep pepsene. Sun kankan di, ne upu tek sisi lap pena deiyo ngebo, nabi ngebo er damai yaredi, ‘Allah tenerur ngeda, lap pepneo,” pepra, moronengedi, kunung nengda, ne Allah dipapu sun tep, lap pepra deipkamne.

8 Ada ne dipapu, ne upu deiki di aneng tep bisipnedi, wenepkamsene. Tonda, ‘Yuk nengdi ton, aneng mali kunge keca epmengedi, utopu kupnung’ tenen, ila ikin keca, sun nong deiki deipnepa, peten kemna utopu keca kweipkamsene. Ukupnepa, yuk nengdi ange epmengedi, ‘Gume, ange utopu kupserur’ tenen, ‘Isok si pio men eremkamepe,’ tenenkamenge. Tonda, ukupkamne taruda, nedi anesala doprapnedi, ne nyapu sisa sun Israel yala nesala damai di, dopra deipnedi, popra gawal dakamne. Ukupne pangeda, ne nyapu sisa, sun Israel neng yumadi, ‘Uo, teka nun nai bo Allah Yahwehda, tek sisi akurure’ tenen, sundi ne tep kael kepkamnenge.

9 Tonda, Israel nesala wenemna tep, tek sisi ne nabi ngebo dinin, nedi ‘Upepkurume,’ peprepa, tenpu ngebo gekepredi tali upu perya deiki di, tali-tali upupu lap pepra deiptua peda, sundi, ‘Gume, Allah erdi angebo dipru neitamai peiputopu penmare,’ tenenkamrume. Ada, sun Israel nesala mali kunge nge, wenemna tep, ne dipapu tali upu pepra derinune. Dinino, atali upu pertamrur nabi ngeboda, wenepnedi poptapkamne. Ne nyapu sisa, sun Israel yala nesala damai di dokotepkamne. 10 Pio telep ngeda, ukupkamna deiki di, isok si eremne ngebo, ne damai yana moropmare ngebo pe, anabi ngebodi, ayanmare ngebo tep, lap penkamre ngebo peda, sun butene utopu, wenepnedi, poptapkamne ja! Ada, ila ikin wenemna keca utotopunge tep, dopropkamenge.

11 Ange yumada ukupkamna deiki di, sun Israel yala nesala yumada, kange di ton cap, ne damai di gopra yukai ton pio men benkamenge. Ukupmengedi, nedi, “Angeda kunkamrume, angeda pio men kunkamrume,” pepra deipsi upu tep, ton cap men yaniptapkamenge. Ukupmengedi, tupa mali-mali men kunkamenga cadi, neda sun damai di gopra, yukai men benkamne. Sunda teleppu kungopda, nedi sun tep, ‘Sunda, telepepu kununga cadi, kange di ton cap ne damai yatenge,’ tenenkamne ja. Mali kun keca ton bena dopra, men kunkamenge. Ange tep nengeda, sun Israel nesalada ne nyapu sisa kunkamenge. Sunda ukunge pangeda, neda, sun nai bo Allah kunkamne. Neda Allah Yahweh, pio deiki tara erepra kunedi, akeca-keca yuma talepra, ila puto weik deiyo ngebodi pepsene.

Allahdi tuai mutu nesala yuma wenemna tep, pepu upu

12 Amenda taruda, Allah Yahwehdi ne Yeheskiel tep pepneu. Aupuda ake.

13 Uo, kanda nimi sisadi deipkei ngebo kurume. Ware mutu nesala do yumada, amutu neitamai kuramtenge nesala yumadi, malipu kuramtengedi ne tep, ‘Erda pio teka men tenenupa cadi, erdi pesere upu talepra, pio men kunkamepe’ pepra, tamamnetenge teptoda, ne adipapu amutu neitamai kuramtenge nesala yuma tep wenepra, ila ikin keca sun deiki deipkamne. Ange ukupnedi, ne puto buru di adipapu wa kourami keca yuma, gum kupra deipnedi, sun jen keca ketenepra derinung nge yuma peda, mali kupra deipkamne. Ukupne dingeda, ila kange mun jen putana taru karepnepa, yankamre. Tonda, amutu yuma mali kweipnyopda, amutu neitamai kunge nimi yuma popnepa depmengopda, sundi buru talepra peinung gam kure keca yuma peda, popra gawal dakamne. Ukupnepa, ataruda yuk mutu nimi peda, amutu men yana kunkamenge. Amutuda walangyopu kupkamre.

14 Ukupmantoda, pio ikin keca weik akuramu dinin, ne tamna gum di, pio dumsisipu kurami neng, sun co puna neng weneri nengda, Nuh cap, Daniel cap, Ayub cap yumada, amutu neitamaipu kuramtenga peda, sun aweneri neng, sundi pio telep kunkamenga deiki dipapu, sun pe nong yo sisapu lyepra deiptene dinin, yuk keca ton telep men kweiptene. Yuk nesala cap, yuk keca yuma capda, gum kupra deiptene. Neda Allah ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu deiyonge jenek kupra sekmupu.} Yahweh, pio deiki tara erepra, akeca-keca yuma talepra, ila puto weik kununa deiyo ngebodi pepsene.

15 Ukupmantonge ton pepkukene. Teka ato mutu tep nengeda, ne adipapu bura tara, yuk gam keca yu weiknge ton, sun sida binatang buas dopra deiptenepa, ayu weik gam kurur kecada, yu kam do, ila yu singa pus do, yuk yala keca do, yatengedi, amutu neitamai kunge nesala yuma popra jeptenge. Amutu nesala yuma popra jeptengepa, yuk mutu nesala, dana-dana tara kunge nesala, tenpu ngebo peda, amutu neitamai men benmanto kuptengepa, amutuda ka di ton cap telep men kuptue. Amutuda pio walangyopu kuptue.

16 Tonda, ato mutu kuptupa, menop taru pio dumsisipu kurami nengda, Nuh cap, Daniel cap, Ayub cap yumada, amutupu yana kutenga peda, yuk nesala yuma pio men lyepra deiptenge. Sun meneng nyapu peda, men lyepra deiptenge. Agum dinin, sun pe tepapu lyepdatenge. Ada, sun pe nong tepapu, nedi lyepra deiptene.

Tonda, amutu neitamai kunge nesala yumada, adipapu popra gawal daknyopda, denapu kunkamenge. Anengdi deiamtenge nyapsilip peda, men lyepra deiptenge. Amutu yumada, walangyopu kupkamre. Neda Allah Yahweh, pio deiki tara erepra, akeca-keca yuma talepra, ila puto weik kununa deiyo ngebodi pepsene. Tonda, neda, pio gampu kunun ngebodi pepsena tep, ange yumada, tek sisi nongpu kupkamre.

17 Ukuptuada, telepe. Ukupmantonge ton pepkune. Ange utopu, arup lap pepmanu mutu utopu kuptuopda, ne dipapu, “Amutu neitamaida, nimi pona tep yu jen neng dopra deipnedi, dokotepnyopda, amutu neitamai yumada, nimi yuma popra gawal dangkamenge. Ada nimi yuma cap, sundi peinung gam keca cap, tali bura tara gam kure keca cap yumada, popra gawal daktenge.

18 Ukupra kuptenepa, sun menop taru pio dumsisipu kurami neng weneri, Nuh cap, Daniel cap, Ayub cap, amutu neitamai kutenga peda, sundi yuk nesala yuma pio men lyepra deiptenge. Tonda, sun meneng nyapu peda men lyepra deiptenge. Agum dinin, sun pio dumsisi kunga deiki di, sun pe nong tepapu lyepdatenge. Tek sisi ngeda, sun pe nong tepapu, ne dipapu lyepra deiptene. Neda, Allah Yahweh, akeca-keca yuma talepra, ila puto weik deiyo ngebo kunedi, pepmasena cadi, angeda tenepnedi, peptenyopda, tek sisi nong kupkamre ja!

19 – 20 Ange utopu ton. Ukupmantoda, ne Allahdi yu weik kupnetupa, ila kange mun sangdana puda, amutu neitamai dokoteptenepa, nimi weik men nukmanto depmangpanen, kange di amutu neitamaipu, nimi cap, sundi talepra peinung gam keca cap yumada deptengepa, akeca yuma gum kupra deiptene.

Ukuptenepa, sun menop taru pio dumsisipu kurami neng weneri, Nuh cap, Daniel cap, Ayub cap, amutu neitamai kutenga peda, sundi yuk nesala yuma pio men lyepra deiptenge. Tonda, sun meneng nyapu peda, men lyepra deiptenge. Agum dinin, sun pio dumsisi kunga deiki di, sun pe nong tepapu lyepdatenge. Tek sisi ngeda, sun pe nong tepapu, ne dipapu lyepra deiptene. Neda, akeca-keca yuma talepra, ila puto weik ngebo kunune. Tonda, neda Gam Pio Kuna Deiyo Ngebo kununa cadi, akonum pepmasen upuda, ‘Ukuptue,’ tenepnyopda, tek sisi angepu kupkamre ja!

21 Uda, ne Allahdi, sun mutu ila kange mun sangdana pu kareptenepa, nimi men nukmanto deptenge dinin, angeda yambulanunpu kuptue. Dinino, nimida denge pio weik, men nukmanto depkamtengada ake. Ada, ne Allah Yahwehdi, ila di erepra, akeca-keca yuma talepra, ila puto weik deiyo ngebo kununa cadi, nedi ila kange mun wenemna kecada, dumbari di dokoteptene pangeda, nimi men nukmanto deptenge. Ada, pio ila kange mun ngeda, Yerusalem mutu neitamaipu adumbari wenemna keca dokoteptenepa, amutu neitamai kunung nesala cap, sundi peinung gam keca cap yuma gum kupra deiptene.

Awenemna kecada ake. Ada, yuk mutu ila yu neng wepra sun damai dokoteptenepa, sundi Yerusalem mutu neitamai kurum nesala tep adipapu poryasetenge. Tonda, ila jen putana deiki di, nimi weik deptenge, tonda, ila yu tali bura tara dakurenge di, nimi weik ton popra jeptenge. Tonda, ila kange mun sakdanen pu Yerusalem mutu neitamai dopra deiptenepa, nimi weika di deptenge.

Ukuptenya deiki di, nimi men nukmanto cap, gam kure keca cap, weika di popnedi, gum kupra deiptene. Tek sisi ngeda, sun Yerusalem mutu neitamai tupa kunge nesala, mali-mali weik kununga cadi, sun wenemna tep, akange mun keca yuma dopra, sun deiki deipkamne ja!

22 Ukupne pangeda, nimi pio weik depkameng dinin, Yerusalem mutu neitamai di, Israel yala nimi cap, nerapu cap, nyapu capda, yambulanunpu lyepra deipkamne. Ada, sun Babel mutu neitamai kurum nesaladi menop taru konum deiamrum nyapu cap, nerapu cap tep pepsene. Ataruda, sun nyapu yambulanunpu konum lyepra deipnepa, Babel mutu damai yangepa, sun amutu konum kurumu nesaladi, moupra dinmarumudi, angeda kael kepkamrume.

Ada, Yerusalem mutu neitamai kunung nesaladi mali-mali weik kunge keca konum kael kepmum dingeda, sundi, ‘Uo, uktaruda nun konum kael kepmepe. Allahdi anesala tep, ila yu kupupa wenepudi, ila kange mun keca sun deiki deriramudi, nesala weik konum popkada, walito konum popke,’ tenemumdi, kael kepkamrume. Ukutaru sundi, ‘Uo, ware keca deiyo tep, nun nai Allahdi, nun tara nesala ila di wenepra popu do?’ tenenmarumada, ataru dipu tapkamrume.

23 Teka, ataruda, sun Babel mutu kurumu nesalada, amenda taruda, Yerusalem mutu neitamai kunge nesaladi, pio mali-mali weik kurami keca tep konum gekeprumudi, moupra kael kepmumnyopda, sundi, ‘Uo, tek sisi Allahdi anesala wenepra popkada, dumsisipu kupu,’ tenepmumdi, kael kepkamrume. Atep, neda Allah Yahweh, ila di erepra, akeca-keca yuma talepra, pio puto weik deiyo ngebo kunedi pepsene. Nedi, sun Yerusalem mutu neitamai tupa gam kurami nesala, mali-mali weik kuraminge tep, deiyo akapka cadi, anesalada ila di wenepra popsi ngeda, pio dumsisipu kupsi.

Allahdi Yeheskiel tep lap pepupa, Yeheskieldi seku.