Ezekiel 15
Allahdi, ‘Yerusalem mutu nesala wenepkamne’ tenen, ukupmanto upu deiki di, co cap, anggur tapu teru cap tep, pepu upu
1Allah Yahwehdi ne Yeheskiel tep pepneu upuda ake. 2Uo, Yeheskiel kanda nimi sisa dipapu deipkeipa kurume. Nedi asipetepkukene. Moupra tenepetepkurume. Ada, anggur du, er yambul teru ngeda, nimidi ayambul teru sektapmengedi, aco dopra pio telep keca ton dopra derinung do? Tonda, yuk yala co yumada, bura tara tali paramre coda, yala-yala weik tengrure. Nimidi aco yala-yala yumada, kerakrapmengedi, aco dopropmengedi, yuk telep keca ton ketekepra donung do? Nimidi wareto tenenung do? Anggur tapu, er yambul-yambul teru sengtamnup ngeda, pio telep dinin, yuk co yala-yala yuma, bura tara tali paramre gat co yumada, aco bongopra deipmepedi, yuk telep keca men doptepe,’ tenenung do? Gume, kan kaele, ange men tenenunge. 3Ukupmantoda, sun amutu neitamai kunge nesala yumadi, anggur tapu yambul teru ton sektapra dopropnedi, telep keca ton ketekepra derinung do? Sun opkal do, yuk bung keca do, ‘E, ayambul teru deiki di, nun bung keca kapkotepra derinaida, aco di ton ketekepra deiptepe,’ tenenung do, gum do? 4Ange utopu, sun amutu nesalada, sun ati co uku dongona tep, anggur tapu teruda, yambulnge sektapmengedi, dubengopda, sun ati pumbon uku dongonung dinin, uku di ametek co teru gum-gum dana-dana tara yumada, uku jepra gawal dakyopda, aco teru neitamai, tupa kupkamre coda, doproptengedi, telep keca ton dopra derinung do? Gume, angeda pio men kununge. Tonda, ange utopu, anggur teru yambul nong gutam neitamai peda, uku di jepra gawal dakyopda, kalum bukamrengeda, ukuptu ngeda, dopraptengedi, telep keca ton doptenge do? Gume ange peda men kununge. Ayambul co teruda, uku di konum jepra gawal dakyopda, sikkepu bungtamrure. 5Tonda, anggur tapu co teru sektapmengedi, uku kapul men dongopmenge taruda, ayambul co dopra, telep keca ton men donunge. Ange utopu ton, ametek co konum uku dongopmengepa, uku di konum jepra gawal dakyopda, kalum bukamrengeda, ware ka di, akalum dopra, ange di telep keca ton doptenge do? Gume, ange peda men kupmanto. 6Ange tep nengeda, neda Allah Yahweh, ila di erepra, akeca-keca yuma talepra, ila puto weik deiyo ngebo kunedi pepsene. Nimidi, anggur tapu coda, yambul teru sektapmenge nge cap, bura tara paramre co cap, toupmengedi, adipapu uku dongoramenge nge yumada, nedi, ‘Sun uku dongopkameng’ tenen, aco yuma kareamsisi. Ange ukuramsi utopu, sun Yerusalem mutu neitamai gam tupa kunung nesala yuma peda, utopu kupkamne! Ada, anesala tapnepa, sun Babel mutu nengdi yana, popra bisipmengedi, sun pe mutu tamupra dubenkamenge. 7Nedi sun amutu neitamai tupa kunung nesala yuma tep wenepkamne. Ada Babel mutu neng tep go karepnepa, ila uku jeramretopu, ayu nengdi Yerusalem mutu yana, anesala pio weika di popra gawal dakamenge. Ukupkamna tep, sun anesalada uku jenmaryai neitamaida, tenpu ngebo pe pio men benmanto kupkamenge. Ila uku di co yuma jepra gawal dangamretopu, Babel mutu nengdi, sun anesala yumada popmengedi, bisbisa kapkamenge. Ange yumada, sun Yerusalem mutu gam tupa kunge nesala tep, ila di wenepnyopda, ukupne pangeda, sun cap, anesala yuma capdi, ‘Uo, teka nun nai bo Allah Yahwehda, tek sisi akurure’ tenen, kael kepkamnerume. 8Amutu neitamai gam tupa kunge Israel yala nesala yumadi teka men teneramneidi, ‘Allahdi pesere upu yumada, pio men gekepra talenkamepe,’ teneramidi, yanirtamnapu kuramnei. Ukupra mali weik kuramya tep nengeda, amutu tu yumada, ne pe buru deiki di, mali kupra deipnepa, nimidi kounung keca yumada, pio men bolongkamre. Amutu kunge nesala cap, sundi doami ati-ati yuma capda, gum kupra deipnepa pio walangyopu kupkamre. Neda Allah Yahweh, ila di erepra, akeca-keca yuma talepra, ila puto weik deiyo ngebo kunedi pepsene. Atep nengeda, apepmasen upu yumada, tek sisi nongpu kupkamre ja! Allahdi nabi Yeheskiel tep aupu yuma pepupa, gekepudi sekra deipu.
Copyright information for
XteSC