Eze 16 | XteSC | STEP | Allah Yahwehdi ne Yeheskiel tep ton cap pepneu.

Ezekiel 16

Yerusalem mutu neitamai kurami nengdi, ne tep teka tenepra, ne upu men dombararamya tep, pepu upu

1 Allah Yahwehdi ne Yeheskiel tep ton cap pepneu.

2 Uo, kanda nimi sisadi deipkei ngebo, kandi Yerusalem mutu neitamai kunung nesala yumadi, mali-mali kunge keca yumada, kandi katuai lap perbemempa, gekepkamenge. Ada, nedi, ‘Angeda ne pio songe,’ tenemsidi, ‘Angeda pio meme,’ pemsi keca dinin, sundi ange talepra mali kuraminge tep pepkene. 3 Tonda, kandi upepkamrume. ‘Sun Yerusalem mutu kurum nesalao, sun nai bo Allah, ^{▼▼Allah – Acada, Ibrani upu di, Allah er pe si sisa, ‘Yahweh’ cap, tonda ‘Adonay’ cap pepra seki. Sun kael kemna tep, aupu ‘Adonay’ deiyo ngeda, jenek kupra sekmepu.} er si Yahweh, akeca-keca yuma taleredi, ila di erepra, ila puto weik deiyo ngebo kurya di, ne Yeheskiel tep pepneu upuda, ake. Ada sun Yerusalem mutu kurum nesala tep, domon upu deiki di pepneu upuda pepkusene.

Ada, ‘Sun Yerusalem mutu ila ati arum neitamai kurum nesala yumada, sun damai adomon upu doupra lap pepsene. Uo, sun Yerusalem mutu neitamai kurum nesalao, sun deiamsei mutu neitamaida, Kanaan tara mutu-mutu tepa. Sun co puna ngeboda, Amori mutu ngebodi deiamseue. Tonda sun deiamseu nerda, Het mutu nerdi deiamseue,’ pepneu. 4 Tonda sun Yerusalem nesala deipkotepsei taruda, sun nin yapudi, sun tep, ‘Ukupu deipmap milo nyapuda, nun song cadi, dakwapye, dadepkameng ja,’ tenemidi, ukupi. Ada, sun num tapu ton men sekamsei. Tonda, sun nin yapudi sun deipsei taruda, me ton gekra men deipsei. Ange utopu, sun nong ton iripra deipsei taru di, ‘Sun nong bol gat kupkamre’ tenen, bedak utopu keca dinin, sun nin yapudi garam ^{▼▼garam – Adumbari kecada, pumun taru sun Israel yala nesaladi, sun ukupu deiami nyapu tep, ‘sun puto kepmengedi, gam kunkameng’ tenen, apel dumbari dorami. Apel men kupi ngeda, ada, ‘Anyapu, nun songe, dadepkamenge’ tenen, tamami.} dopra, sun nong deiki men likra deiamsei. Tonda, ‘Sun buru cap, yang cap, telep kupra dumsisi nepkamre’ tenen, kain opkal bol pakupra men geteiamseie. Ange men kuramsei deiyoda, ‘Anyapu nun songe, dadepkamenge’ tenen, tamamsei.

5 Ange tep nengeda, ware neng do, tenpu ner peda sun tep, bicau tenen ton men meliamseie. Ange tep nengeda, sun deipsei taruda, nerapu yumadi sun tep, bicau tenen men meliamsei dinin, anerapudi sun dopra, tali bura mutu mutmuta kwamnga neitamai di dokotepra tapsei. Ada, tali tep gume. Sun deiamsei taru dipapu, ‘Aner nyapuda, nun pio songe,’ teneramseia deiki di ukurami. 6 Sun nin yapudi, tamamsei dinino, ne dingeda gume. Nedi sun bisikrosisidi, dinmasisipa, sun deiptapmaseipa, sun yapi sakmaudi deipmauai neitamaipu, kunmamumpa epsisi. Ne dinmasisidi, ‘Anyapu dakwapye’ tenen, men epra kaukepropsisi dinin, nedi sun tep epra kael kepsisidi, “Sunda gam bukroso!” pepra, gam bukeipsisi.

7 – 8 – 9 Atep sun ukupu deipkotepmasei taruda, sun nong deiki palepmaseu yapi me kuna tep, me gweprapsidi, sun nong yuma, me kupra deipsisi. Utopu, nedi minyak Zaitun me mokon di dopra, sun nong deiki yuma, minyak zaitun likra deipsisi. Ukupsisi pangeda, ukupmantoda, tali bura tara menmena paramre keca, bongoramredi, ila di neramretopu kupra, amenda taru sun nong nepbaramrumpa, urasin pio telep kaber nerapu ^{▼▼kaber nerapu – Aupu pepkada, ada domon upu deiki di pepu. Aupu ‘kaber nerapu’ pepka deiyo, nong neitamai ngeda, ada Yerusalem mutu kurami nesala yuma tep pepu. Tonda, Israel yala nesala yuma tep adomon upu pepu. Ada nerapu sunpu tep men pepke.} kuramrume. Sunda pio moupra neramrumdi, nong lyom cap, potong cap, moum cap telep kupupa, urasin pio telep nerapu kuramrume. Urasin pio telep kaber nerapudi, telep kupra neramengtopu kurumpa epsisi. Ne Allahdi epsisi dinino, ukupmantoda, sunda pio banangapu kuramrume. Ukupra ukuramrumpa, amenda taru kange di ton cap, nedi abisipu tamupra embenamsi taruda, sun ton dinmasisidi, sun cap, ne cap, mun pedaramupkanen, ner dona taru damai konum kupupa, ‘Anerapuda, ne konum dopropkune,’ pepra pedina upu deiki di pepsisi.

Upepsisa tep, sun Israel nesaladi kuramrumtopu kupra, ataruda ne deiki kenengamsi lyom opkal dopra, sun nong bol deiki banangapu kumum ngeda, kenekeipsisidi, galupra deipsisi. Ukupsa deiki di, nedi sun nerapu tep, ‘Neda, tek sisi sunpu dopkune’ tenen, mun pepra deipsisidi, dopropsisi. Ukupsa tep, teka ataruda, nimidi ner dopkamenga tep, mun peramenganen, doramengtopu konum kupsisi. Ange kupsisi deiki di, ne penge sisapu konum kepropsisi. Ne Allah ^{▼▼Allah – Acada, Ibrani upu di, ‘Yahweh Adonay’ pepra seki.} Yahweh, akeca-keca yuma talepra, deiki tara erepra, ila puto weik deiyo ngebo kunedi pepsena cadi, ange yumada, tek sisingepu pepsene.

10 Nedi sun konum dopropsisi dingeda, sun Yerusalem mutu kurum nesalada, ukupmantoda, isomka nengdi nerapu dopra kuramengtopu, nedi ukupsisi. Ada, isomka Israel nengda, nerapu doramengtopu kupsisi. Menmenada, urasin pio telep kunumna weik opkal ton karepsisipa, kenekrume. Tonda, urasin pio telep sapi bol, pio boun nge di betapra keteneipmenge yan kin keca, er si sandal ton karepsisipa, kenekrume. Tonda, sun giso galuna tep nengeda, pio telep boun opkal bol, er si kain lenan di koupdongopsisi. Tonda, sun nong bura tara kenengna tep, kunumna weik opkal, er si juba pio telepnge dopra kenekra deipsisi. 11 Ukupsi dingeda, sun nong deiki yumada, urasin pio telep kweirya keca ton karepsisi. Ada, sun buru deikida, bukep utopu keca er si gelang cap, kum damai garangna keca er si kalung rantai cap karepsisipa kenekrume.

12 Ange utopu, amol deiki dongon keca, er si cincin cap, ue bon neitamai dongon keca, er si anting hidung cap keteneipsisi. Ange-ange yuma tep nengeda, kunumna weik gat keca, emas cap, perak cap di cincin cap, gelang cap, rantai cap, ketenepra karepsisipa, kenekrume. Tonda, sun giso deikida, urasin telep keca, ila deiyo-deiyo nerapu kenengamengtopu, er si mahkota ton ketenepra karepsisipa, galupra kenekrume. 13 Tek sisi sun nong deikida, ware kuprap kunumna weik gat keca, er si emas cap, perak cap, sundi sun urasin telep kuna tep, akeca deiki telep kupra deiprume. Utopu sun pio telep boun opkal, er si kain lenan deiki dipapu ketekepsidi, karepsisipa, sun nong bol deiki kenekrume. Nedi karepsisi boun opkal yumada, pio kunumna weiknge ketekepra deipsisipa kenekrume. Sun jen kecada, pio telep terigu di dan roti kwaneng, pio telepngepu jeprume. Tonda, madu mong mokon cap, tonda minyak zaitun me mokon cappu jeramrume. Ukupra kuramrum taruda, sun nong urasin yumada, pio-pio telep kuprume. Ataruda, sunda ila nimi deiyo ngebo, Raja er ner, ratu kuramengtopu kuramrume.

14 Uda, sunda nimi deiyo nerapu, ratu-ratu utopu kepra kuramrumdi, sun nong urasin yumada, pio telep kupra kuramrum pangeda, sun dana-dana tara, yuk karen mutu neitamai kurami nesala yumadi, sun tep, ‘Uo, sun Yerusalem nerapu yumada, tek sisi pio urasin telep nerapu kununge,’ pepra, sun si pio eremamsie. Ange yumada tali tep gume. Deiyoda, nedi sun tep, pio telep kupra deriramsisipa, urasin pio telep kuramruma tep, yuk mutu nengdi, sun si eremami. Ada, neda Allah Yahweh, akeca-keca yuma talepra, deiki tara erepra kunedi, ila puto weik deiyo ngebo kununa cadi, tali men pepsene. Nedi ange yuma kareamsisi pepsene.

15 Dinino, sundi sun pe urasin pio telep kunange tep, moupra tenedaramrumdi, ‘Uo, nunda tek sisi urasin pio telep kunupe’ tenen, sundi sun pe telep kweirya keca kenengnange tep, teka tenedaramrumdi, sal nong-nongpu kuramrume. Sun Israel nerapudi, ‘Uo, nunda pio tek nerapu kunupe,’ tenedaramrume. Ukuprumu dingeda, ware nesala do yuma, tali daembarami neng yuma tep, ‘Nun kikiman upula maptepe’ tenen, dodaramrumdi, tali lupra kikiman maramrumdi, upula nyangdaramrume. Ukupmantoda, nerapudi sun domi neng tapmengedi, yuk neng cap tali-tali maramengtopu, sundi ne Allah tep tamamnerumdi, yuk keca deiki, sun kange deriamrume.

16 Ataruda, sun urasin pio telep opkal, kenengamarum ngeda, ton tara bokra doproprumdi, yuk neng tali upula nyangdana tep, co lase erepra domrumai deiki tara singipdongoprumdi, aneng cap kikiman maramrumdi, upula nyangdanapu kuprume. Uo, uo, sundi, ange kupruma yumada, menop taru men kurami dinin, sunda tek sisi pio malipu Kuramrume. Ange yumada, nimi men kupmanto keca, pio mem keca kuramruma cadi, ange men kupmatume! Tonda, amenda taru akeca utopu ton men kupkamrume!

17 Tonda, ataruda sun nong urasin pio telep kuna tep, kunumna weik gat keca, er si emas cap, perak cap, nedi sun tep kareamkesinge kankan di bokra, ton tarange dopra, sundi nimi urasin utopu keca patung-patung ketekepra deiprume. Ukupmumdi, animi urasin utopu keca si tepapu, tali isok si eremamruma cadi, ukupmantoda, tali nerapudi yuk neng upula nyangdaramenga utopu, ^{▼▼nyangdarameng utopu – Apasal 16 neitamai yumada, Allahdi ukupmanto upu, tonda domon upu deiki di pepu. Deiyoda, Israel nesaladi Allah tapra, tali isok tep si eremami. Tonda, sun podan neng yankoi taruda, Allah tep, teka tenepra, ‘Nun nai melipseo,’ pepra, men mororami dinin, yuk karen mutu nesala damai bena, ‘Melipseso!’ pepra mororami. Ukuramya deiki di, Allahda, “Sundi ne tapnerumdi, yuk tali keca tep si eremamrumdi, yuk mutu neng damai bena mororamrum ngeda, ada nerapudi sun domi neng tapra, tali-tali neng cap kikiman mapmengedi, nyangdaramengtopu kurume,” pepu.} sunda ange ton ukuramrume. 18 Angepu gum dinin, sundi animi urasin utopu patung-patung tep, sun deiki kenengna opkal, kunumna weik opkal, nedi sun tep kareamsisi ngepu, kwiriptaprumdi, aopkal dopra, sundi keteneiprum isok si eremna keca, er si patung deriramrumnge, ‘Mali kuprur’ tenen, singipdongoprume. Ange yuma ukupmum dingeda, amenda taru, ‘Tali keca isok si eremkamep’ tenen, akeca doupra katuai deipmumdi, sun minyak zaitun me mokon cap, nintong telep pena tep keca, er si dupa cap, dopra akeca damai deiprume. Ange yumada, tek sisi ne si eremna tep, kareamnetum dinin, sundi, tali isok si eremna tep, amambul keca duyana karepmumdi, isok sipu eremrume.

19 Ange utopu, ne dipapu sun jena tep, terigu pio telepnge cap, mong mokon cap, tonda minyak zaitun me mokon pio telepnge cap kareamsisi dinin, sundi akeca dopra sun tali isok si eremna tep, kareamrume. Akareamsisinge yumada, sundi isok-isok si eremna tep, berhala-hala keca, er si patung-patung damai, ‘Angeda, isok epredi nintong gekepyopda, nun tep kange deipkamser’ tenen, isok tep kareamume. Neda Allah Yahweh, akeca-keca yuma talepra, ila puto weik deiyo ngebodi pepsene. Sunda, ange yuma tek sisi mali weik kuprume.

20 Angepu gum dinin, tonda, nedi meliamsisipa, sun dipapu, sal nyapu cap, ner nyapu cap deriramrum ngeda, anyapu dopra, sun isok si eremna tep, popra kareramrume. Ada ne nyapu sisa utopu nyapuda, sundi anyapu yuma dopra, ‘Nun nai bo isokdi jepkur’ tenen, sun si eremamrum isok tep, anyapu dopra poprumdi, kareramrume. Apio mali keca kupmumnyada, ada sundi, ‘Gume, nundi yuk neng cap tali upula nyangdaramep ngeda, yambul mali kurur dinin, ila mali keca ton tapakra kuptepya deiki di, Allah yaniptaptepe,’ tenena deiki di, mali keca weik ton cap kuprum do? 21 Atep sunda tupa ne nyapu sisa yuma peda, upula dopropmumdi, ‘Nun isok si erepkup’ tenen, sun anyapu yuma, isok si eremna tep, berhala-hala tepai bena, konum poptapra kareamrume. 22 Sun ton tenipetepso! Mali kun nerapudi, yuk tali neng upula nyangdaramengtopu kuramrum taru cap, tonda sundi pio mali weik kun keca talepra mali-mali weik kuramrum taru cap neitamai yumada, yambula di peda, sun metek kaber taru, pumun kuramum ngeda, kange di ton cap, pio men teneramrume. Ada kange tenena gum dipapu, sun nong metek nyapu banangapu kupmengedi, sun meneng deipmange yapi me mokon gengamengtopu, sun Yerusalem nerapu peda, sun pe yapi mepu gengdaramrum ngeda, ka di ton cap men teneramrume.

Yerusalem mutu kurami nesaladi mali-mali weik kuramya tep, wenepu upu

23 Allah Yahweh, akeca-keca yuma talepra, deiki tara erepra, ila puto weik deiyo ngebo kunedi pepsene. “Sun Yerusalem mutu kurum nesalada, sunda bicaue! Uo, uo, ikin keca sun damai yankamre ja! Sunda wenepnedi, pio yawa popkamsene. Teka popkamsene! Ange deiyoda, sunda pio mali kun keca yala-yala yumada, weika di kuruma tepa.

24 Tenpu ngeda ake. Ada, sun dipapu amutu neitamai cap, amutu nesaladi, ‘Upu sisikamep’ tenen, nimi bulungnungai cap, bisi embaramengai cap yumada, sun dipapu isok si, berhala-hala eremna tepai dopembarume. Tonda, sun dipapu amutu neitamai yuma, tali nyangdanai ton, erepra deiamrume. 25 Ange ukumumnya deiki di, sun ati arum neitamai, nimi embaramengai yumada, sun pedipapu sun urasin telep kuna ngeda, mali kudidamumdi, yuk tali daembarami neng cap, upula nyangdaramrume. Ukupmumnya taruda, ware kuprap neng do yuma, sun pe nong tepapu, nimi ton aembanga epmum dingeda, bemumdi, ‘Kao, ne cap kikiman mapteneme do?” pepra, moropmumdi, aneng doupra embaramrume. Ukupmumnya deiki di, sun cap, tali dakurami neng cap, kikiman upula maramrum ngeda, tapakrumdi, pio weika di, mali kuramrume. Sun cap, tali neng cap nyangdanapu kuramrume.

26 Ukupmantoda, tali nerapudi yuk neng upula nyangdaramengtopu, sun Israel yala nesaladi, sun damai kurami nesala, sun Mesir mutu neitamai kurami nesaladi, ila kange welepnepa, salnong-nong kupra, mali kuramitopu, sun peda utopu kurume. Ada, ne tepapu, ‘Naio nun podan neng tep, kalekra melipseo,’ pepra mororamnetum dinin, sundi, ‘Mesir ^{▼▼Mesir mutu – Aupu deiyoda, sun Asyur mutu jena talena nengdi, Israel tara poryankoi taruda, Israel nengdi, sun Mesir mutu Raja neng tep, ‘Yana melipseso!’ pepra moropi.} mutu neng dipapu, melipra lyepropsetenge’ tenen, sun damai mororberume. Sundi ange kuprumnge deiki di, ne yu weik kupneupa, sun tep mali kange doupra kuramsi. Sunda dinopa di mali kumumdi, ne tepapu mali kweipnerume.

27 Sundi mali kupruma deiki di, yu kupneua cadi, men taruda ne adipapu sun wenemna tep, gonga kepsidi wenemamsisi. Tonda nedi sun tep, pio telep keca cap, tu cap, sun deiki dopra deiamsisinge yumada, adipapu tamupra dopropsisi. Ange ukupsa deiki di, go karepsipa, adipapu sun Filistin nengdi, yana popbisipseidi, sundi taleramrum tu ton upula dopropi. Sun Filistin nengda, sun Israel yala kurum nesaladi, tali nyangdana cap, pio mali-mali kuna cap, epya tep, ‘Uo, sunda nun songe,’ tenepidi, sun mali weik kurumnya tep, sun peda ali daki. Sun Israel nengdi pio mali kumumdi dukna-dukna utopu kumumnge yuma tep nengeda, ne Allahdi sun dopra, sun podan neng buru deiki deiptapsisipa, sun Filistin nengdi, ‘Ukupkupe,’ teneraminge yuma, tali lupra kupye. 28 Dinino mali nerapudi tali nyangdanapu kuramengedi, ‘Kapula, ton tupa-tupa angepu kupkamepe’ tenen, putaprepa, angepu tupa kuramengtopu, sun Israel nengdi ton, ange utopu konum kupmum dinin, sun kange men lopseue. Ange tep nengeda, sundi ne Allah tapnerumdi, ‘Asyur ^{▼▼Asyur mutu – Asyur mutu nengdi, keteng tamun 722 BC (Yesus Kristus kapul yau taru), sun Israel nesala kurami tara yana popbisipidi, Israel nesala 10 yala neng tep poprapidi, ton neng bokra ateng koupdongopidi, sun pe mutu dubenami.} mutu neng, sundi ton melipsetenge’ tenen, sundi tupa-tupa Asyur mutu neng tepapu, ‘Melipseso,’ pepra domamrume. Ukuamrumnya deiki di, sunda tali-tali nyangdana nerapu kuramengtopu konum kuramrume. Ukuprum dinino, sunda sun Asyur mutu neng tepapu, kange men lopseue. 29 Ange utopu amenda taruda, sundi ton cap Babel ^{▼▼Babel – Amutuda, er si butene, ton weneri akapu. Ton ngeda Babel mutu, tonda Kasdim mutu, tonda Kaldea mutu perami dinin, amutuda tenpua. Sun amutu kurami nesalada bung keca yala-yala yuma kunumna tep, ila kael keamidi apel dorami. Tonda, pumun taruda sundi Israel tara yana popbisipidi, Israel neng weika di dopra, sun pe mutu dubenamidi, ikin pel dimami.} mutu neng, sunda bung keca weika di kunuamenge neng tep, ‘Amutu neng peda, sun ton melipsetenge’ tenen, sundi amutu neng ton domamrume. Sundi ukuamrumnya deiki di, tali nyangdanapu kurameng nerapu kunge utopu kuramrume. Ukupra kuramrum dinino, sunda kange pio men lopseue.

30 Allah Yahweh ^{▼▼Yahweh – ‘Allah Yahweh’ adinin yambul ortara sekmepu ngeda, Ibrani upu deiki di, ‘Yahweh Adonay’ seki. Indonesia upu deiki di, ‘Allah yang Mahatinggi’ sengnunge. Tonda, ‘Tuhan Allah’, tonda, ‘TUHAN Allah’ sengnunge. Ibrani upu deiki di aupu ‘Yahweh’ ngeda, Allah er pe si ton akurur dinin, ‘Adonay’ sengaminge upu deiyo ngeda, ake. Ada, ‘akeca-keca yuma talepra, deiki tara erepra, ila puto weik deiyo ngebo kurure’ tenen sekya cadi, angepu jenek kupra sekmepu. Ukupra sekmupkada, ada, ‘Sun moupra kael kepkamrum’ tenena tep, sekmepu.} akeca-keca yuma talepra, deiki tara erepra, ila puto weik deiyo ngebodi pepsene. Sun dipapu pio mali-mali weik kurum keca yuma tep nengeda, ne yu weik kupnere. Ukupmantoda, sunda tali nyangdana nerapudi, ali dangna pio gum dipapu, pio mali weik kuramengtopu, sun peda utopu, pio mali weik kuramrume. Atep, ne yu weik kupnerure. 31 Sun mutu neitamai yumada, ali dangna gum dipapu, nimi embarameng bisi gonga kemnai cap, bisi antamnai capda, sun dipapu tali isok si eremnai cap, nimi nyangdanai ^{▼▼nyangdanai – Aupuda, domon upu gume. Sundi ange yuma tek sisi ukurami. Ada, isok si eremna cap, nerapudi tali neng cap nyangdana cap, kuramyada, pio mali weik kurami.} cap, erepra dopra deipembaramrume. Ukumumnya deiki di tali-tali nyangna nerapu kunge utopu kuramrume. Dinino, sun tali nyangameng nerapudi, co bo moropmenga deiki di nyangdarameng utopu men kurume.

Sunda yambul mali dinin, sun Israel nesala kuramrum ngeda, pio mali weik. Ada sun nyangdana nerapuda, ‘Co bo dipapu karepra kunupnetengedi, nyakdanetenge,’ penung dinin, sun Israel nesalada, ange tenena gum di, tali lupra nyangdaramrume. 32 Atep sunda nimidi dopra kuramenge ner dinin, anerdi er nenge tep, ‘Ne songe’ tenen, tamameng ner utopu kurume. Ukupmumdi, sun dipapu yuk neng, men kael keamrum neng dinin, sun damai bena, aneng dopra tali nyangdarume. Ada tali-tali nerapudi, men kael keami neng cap tali lupra marameng utopu konum kurume.

33 Tali nyangdana nerapudi moropmengepa, nimidi atali-tali nyangamenge nerapu tep nengeda, menenga co bo karenunge. Dinino sun Israel nesalada, ange utopu gume. Sundi, tamuprapmumdi, sundi pio, ‘Anengda ne dipru neng tep, pio putapnere’ tenen, pio tupa-tupa aneng tepapu menenga kecada karerume. Tonda, sun yuk-yuk mutu neng namna tep nengeda, sun dipapu co bo deiki di gipra namdomumpa, dana-dana tara karen mutu kunge neng yuma yaipa, sun cap kikiman marume. ^{▼▼marume – Aupuda, domona upu pepu. Aupu deiyoda, ada tek sisi Allah tapra, tali isok si eremna cap, yuk karen mutu neng tep, ‘Melipseso!’ pepra mororaminge cap, tonda nyangdana cap, tonda yuk mali kun keca yala-yala yuma, weika di talepra kuraminge tep, ‘nyangdaramrume’ pepu.} 34 Sundi kumum ngeda, yuke. Ada, ton nengdi kunge ngeda, yuk ngepu kununge. Sun damai ton yakaramidi, ‘Upula nyakamasepe,’ pepra palepidi pio men namsei. Tonda, sundi menenga ton men kareramsei. Ange gum dinin, sun dipapu menenga dopra, sun damai yakarami neng tep, kareramrume. Teka angeda, yuknge dinin, sundi ukumum ngeda, pio yuk-yuknge kuramrume.

Yerusalem mutu nesala tep, Allah yu deipkamra tep, pepu upu

35 Ange tep nengeda, ne Yahwehdi sun Israel yala nesalada, tali nyangdana utopu kurum nesala tep pepkusen upuda gekepneso! 36 “Uo, sun Yerusalem ^{▼▼Yerusalem – Yerusalem pepu dinin, ada Yerusalem mutu nesala cap, Yudea tara nesala cap, tonda sun Israel yala nesala yuma tenena tep pepu.} mutu kurum nesala yumada, ne pepne upu moupra gekepso! Ada neda Allah ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu deiyonge jenek kupra sekmupu.} Yahweh, akeca-keca yuma talepra, deiki tara erepra, pio puto weik deiyo ngebodi pepkusen upuda, moupra gekepkurume. Sun ali dangna gum di adipapu, ‘Nun cap, nun nyangdana neng cap kikiman mapkupe’ tenen, sun opkal yumada, kuriptapmumdi, ‘Angeda pio putapsere’ tenen, ataru-ataru yumada, sun konum ketenemnapu kuramrume. Tonda, sundi, ‘Uo aneng cap kikiman maptepe’ tenen, pio putaramu nimi bo neng cap, sundi tali keca isok si eremna tep, sundi petupra deiamrum patung berhala ^{▼▼berhala – Aupu ‘berhala’ deiyoda, ada, isok si eremna tep, patung petupra deiamidi, isok si eremami.} tepapu, si eremamrume. Angepu gum dinin, tonda sun nyapu weika di poprapmumdi, isok karena tep, uku dongopmumdi, isok berhala-hala, sun sipu eremamrume. Sun pe nyapu popra, isok kareamrumnya deiki di, ila mali keca kupmumnya utopu, nedi ila di wenepkamsen ja!

37 Ange tep nengeda, sun bicau tenedaramumpa, mali-mali kuna tep, kikiman maramrum nesala yumada, bupra deipkamne. Ukupkamne ngeda, sundi mun teneramum neng cap, tonda sundi, ‘Nun songe,’ teneramumpa, sun podana tep yakanmai neng cap yumada, kange di ton cap bupra sun damai deipkamne. Ataruda, sun damaipu tekmengedi ongopdongopkamsenge. Ukupsengepa, nedi sun opkal yumada, kuriptapkamsene. Ukupsenepa, sun aneng yumadi, sun nong banangapu kupmumpa dinkamsenge.

38 Ange tep nengeda, nedi sunda mali pio weik kumumdi, tali-tali neng cap nyangdanamumnge cap, sun nyapu weik poramumnge cap tep nengeda, nedi wenepra ikin keca deipkamsene. Ada nimi cap, nerapu cap, tali-tali nyangdana nesala cap, nimi potamna deiyo neng cap tep, ila di wenepra poramengtopu, nedi sun tep, ila di wenepra poptapkamsene. Ada, ne ila yu kupneunge cap, ‘Sunda ne mawa nesalapu kunung dinin, yuk keca tep si eremnunge’ tenena di, mali kange doupsa deiki di, sun tepapu adipapu wenepra popsenepa depkamrume.

39 Sun tep bicau tenen, sun dipru kareramseu neng tep, nedi sun deikipu dopra karepkamsene. Dinino, sun dopra aneng tep karepnepa, sun anesala yumadi, yu kuprepa, sun dopmumdi tali-tali nyangamseiai cap, tonda mutu buma deiki isok si eremamrumai cap yumada, uruptapkamenge. Tonda, sun urasin telep opkal yuma kuriptapsengedi, sun urasin telep kuna tep, kunumna weik kweirya keca yumada dalupra dopropkamenge. Ukupmengepa sunda bananga sisapu kunkamrume. 40 Sundi yuk nesala tep upupmengepa, gel buprapmengedi, sun nong deiki donkamsengepa, poptapkamsenge. Tonda sun nong yumada, pio yu parang ya di sesek-sesek penkamsenge.

41 Angepu gum dinin, tonda sun poryankamseng nengdi, sun ati-ati yumada, uku dongopkamsenge. Tonda sun dana-dana tara kunge nesala cap, amutu neitamai kunung nerapu yuma cap tep pepmengepa, yangedi, sun ikin keca deipkamseng nge tep, yana dinkamenge. Ukungedi, sun kael kemkamenge. Go karepnepa, sun podan neng yana ange yuma kupkamsenga deiki di, nedi sun tali nyangamrumnge tep, adipapu gum kupra deipkamne. Ange ukupkamne taruda, sunda ka di ton cap, sun mali kunange tep, menenga keca ton dopra, sun pio dipru neng tep, bokra-bokra pio men karenkamrume. Ange yuma gum kupra deipkamsen ja!

42 Ange-ange yuma konum ukupsenyopda, nedi sun mali kuramrumnge wenemna tep, ila yu kupneuada adipapu puto boun kupkamnere. Konum wenepra popsenyopda, ataruda ne kange di tamupra, tali kange deipnedi, dim pepra bouna dipu kunkamne. Atep ataruda, nedi sun tep, yu kupneunge cap, ‘Uo, sunda me mawa nesalapu kununge dinin, ware deiyo tep, yuk tali keca si eremnung do?’ tenen, mali kange doupsisinge capda, gum kupnerepa, ange ton cap pio men kunkamne. 43 Dinino, ukutaruda aupu pepsene. Nedi sun ikin keca deipra wenepkamsene ngeda, deiyo tali tep gume. Ada, sun pumun taru kaber kuramum taru neitamai di, ‘Nun nai Allahdi weika di meliamseu,’ tenena gum di, pio mali-mali kecapu talepra, pio weika di kuramrumnge tep nengeda, ne ila yu di wenepkamsene.

Sundi moupra tenena gum cap, pio mali kun kecapu talepra kuramruma deiki di wenemamsisi. Sundi mali weik kuramruma utopu, nedi, ila ikin keca sun deiki deipkamsene. Neda Allah Yahweh, akeca-keca talepra, deiki tara erepra, pio puto weik deiyo ngebodi pepsena cadi, angeda tek sisi nong kupkamre! Uo, sun ton tenipetepso! Sun pio mali kun kecapu talepra kuramumnge yumada, akapmar dinin, angepu gume! Tonda, sundi ton tapakra tali nyangdana weik kuramrume! Ange-ange yumada, nedi pio songe’ tenen, dabal weik kunerure. Akeca yumada, pio mali kun keca tep, ne pio songe. Allahdi sun Israel nesala tep pepu.

Ukupmanto upu deiki di, “Er nin kuramutopu erdi deiamu ner mi peda utopu kuramnga tep,” pepu upu

44 Allah Yahwehdi ukupmanto upu deiki di pepu.

Uo sun Yerusalem kurum nesala yuma tep, ukupmanto upu deiki di pepkusena cadi, gekepneso! Ukupmanto upu penge nengdi, sun tep aupu ton pesenunge. Ada, “Er nin kuramutopu, er ner mi peda utopu kurure,” penunge. Ukupmanto penge nengdi, sun Yerusalem mutu kurum nesala tep, aupupu dopra sun tep penkamsenge. 45 Angeda teka, “Kanda, kan ^{▼▼kan – Aupu neitamaida, ‘kan’ pepkada ada Yerusalem mutu kurami nesala cap, Israel yala nesala yuma cap tep pepu.} nindi deipkeu ner kuruma cadi, er kuramutopu kan peda utopu kurume. Kan ninda, er dopu ngebo tep, ‘Ne songe,’ teneramu utopu, er pedipapu deiamu nyapu yuma pe tep nengeda, ‘Ne pio dabale,’ teneramu. Ange utopu, kan peda, kan domne ngebo tep, ‘Ne songe,’ tenerume. Tonda, kan pedi deiamum nyapu yuma tep, ‘Ne pio dabale,’ tenerume. Kan cap, kan kayapu nerapu ^{▼▼kayapu nerapu – Aupu deiyoda, Yerusalem dana-dana tara yuk ila ati arum doamidi kurami nesala tep pepu.} yuma cap utopu kurume. Ada, kan kayapu nerapudi, sun domne neng cap, sundi deiami nyapu yuma cap tep, ‘Nun pio songe,’ teneramitopu, kan peda utopu, kan domkeu ngebo ^{▼▼domkeu ngebo – Aupu deiyoda, Allah tep pepu.} cap, kandi deiamrum nyapu cap tep, ‘Ne pio songe,’ tenerume. Tonda kan deiamkeu ner, kan nin sisada, Het yala ner kuramu. Tonda, kan deiamkeu ngeboda, kan nai bo sisada, Amori ^{▼▼Amori – Aupu deiyoda, sun Het yala neng cap, Amori yala neng cap, pio mali-mali weik kuramitopu, Israel yala nesala peda utopu kurami.} yala ngebo kuramu.

46 Kan du ner cap, erdi deipu ner nyapu cap utopu ngeda, sun Samaria ^{▼▼Samaria – Aupu deiyoda, sun Samaria mutu cap, Sodom mutu cap, neitamai kurami nesaladi, pio mali weik kuramitopu, Israel yala nesala peda utopu, pio mali weik kurami. Samariada, Israel tara dinin, bokra arah utara kurami neng, sun mutu deiyoi tep, ila ati arum dopi. Sodomda, Laut Mati damai kwamu mutu. Anengdi, pio mali weik kuramya tep, Allahdi im deiki uku dokotepupa, sun yuma popra gawal daku (Kejadian 19:23-29).} tara kurami nesala, kan damai dinin, dapu tara (arah utara) kurami nesala tepa. Tonda, ange utopu, kan weit ner cap, erdi deipu ner nyapu cap utopu ngeda, sun Sodom mutu kurami nesala, kan damai dinin, iknapi dam tara (arah selatan) neitamai kurami nesala tepa.

47 Amutu butene neitamai kurami nesaladi, pio mali keca talepra, mali-mali weik kuramipanen, kan epmumdi, ataruda kanda, ‘E, sundi kungetopu, ne peda utopu kunkamne’ tenen, konum kange deipkeua cadi, sundi urasin yuk kepra deipnedi, mali-mali weik kurami ngeda, kael keamumdi, ange utopu mali kurume. Dinino, kanda yambul tara gum dinin, weik tara ngeda, adipapu pio mali weika di, sun anerapudi mali kuraminge peda, kandi kan kuramrum keca yala-yala yumada, pio weika di mali kurume. Ukupmantoda, sunda yambul mali dinin, kanda pio ila mali-mali weik kurume.

48 Neda pio tek sisi upu pepsene. Ne Allah Yahweh ^{▼▼Allah Yahweh – Aupu kalimat yumada, Ibrani upu deiki di, ‘Yahweh Adonay’ seki. ‘Aupu deiyoda, moupra kael kepkamrum’ tenen, aupu deiyo jenek kupra sekmepu.}, akeca-keca yuma talepra, deiki tara erepra, pio puto weik deiyo ngebodi pepsene. Ada, kan kayapu nerapu utopu nesala, sun Sodom mutu kurami neng cap, sundi deiami nesala yuma cap, pio ila mali-mali kuramitopu, kan peda ange utopu kurume. Tonda, sundi men kunung ngeda, kan cap, kandi deiamrum nesala cap, sun dipapu mali weik ton cap tapakra kurume.

49 Sun Sodom mutu neitamai kurami nesala yumadi, mali kuraminge deiyoda ake. Ada, gemenapu kurami. Tonda, sun jen keca yala-yala yumada, pio ila di ketenepra deiamidi jeramidi, salnong-nong kuramidi, bouna di, tali dim pepra, kange deipra, telep dipapu pio dukdongopra kikiman kurami. Dinino, sun akeca-keca yuma gum kwamu nesala, sun pio kan-kan nesala cap, akeca-keca men kwamupa, pio putanapu kurami nesala cap tep, ‘Sun anengda dakwapye’ teneramidi, tamamidi, pio men melimami. 50 Ukupra pio mali kuramidi, sunda gemena cap, salnong-nong kemna cappu kurami. Tonda sun anesala yumada, gel giso gat deipra kuramidi, neda, ‘Angeda pio men kunkamrume. Akunada, ne pio song cadi, ada mem keca,’ pepra deiamsisinge tepapu, ange tali lupra kurami. Ange yuma mali weik kuraminge tep nengeda, ne epsi dingeda, ^{▼▼epsi – Kejadian 18:21} ne adipapu sun Sodom mutu kurami nesala yuma, gum kupra deipsidi, sikke bukra tapsi.

51 Teka ukutaruda, Samaria kunge nesalada, mali weik kunung dinino, sun mali kunung ngeda, yambulanun utopu kununge. Dinino, sun Israel yala nesaladi, pio ila mali-mali keca talepra kurume. Ukupmantoda, sundi ton tara di bokra mali kunung dinin, sunda, akeca-keca yuma pio ila mali-malipu kurume. Kan kumumtopu, sundi men kununge.

Deiyoda kan pio mali kuramum ngeda, pio weike. Atep nengeda, kandi mali weik kumumnge cap, sun Samaria mutu nesala mali kuraminge cap, ‘Dan nge pio mali weik kurur do?’ tenen, dipetepmepe pangeda, tek sisi sun Israel nesala pio mali weik kurum ngeda, ikin pio weik kurure. Sunda yambulanun utopu.

52 Kanpuda, pio ila mali kuramuma cadi, kanda kware pio tenena cap, ali dangna cap, kunkamrume. Sundi pio ila mali kuramrum ngeda, pio weik cadi, yuk nengdi epmengopda, adeiki di, ‘Uo, sun Samaria mutu nesaladi mali kurami ngeda, yambulanun pua,’ tenenunge.

Atep, teka, sun Israel nesalada, ali weik dangkamrume! Yuk nesala yumadi, sun tep, ‘Sunda pio mali weik kununge,’ tenepmengedi, nyek-nyek penkamsengada, tali gekeprumudi, dim peprappu kunkamrume! Upu tamupra pena gume. Allahdi pepu.

“Sodom mutu cap, Samaria mutu cap, Israel mutu cap, kange di tamupra telep kweipkamsene,” pepra, pedina upu deiki di pepu upu

53 Allah Yahwehdi Yerusalem mutu nesala tep pepu, “Ada Sodom cap, Samaria cap, amutu neitamai kunung nesala yuma capda, nedi tamupra pio telep kupra deipkamne. Ukupne dingeda, kan pe, kan mutu kunge nesala peda, adipapu tamupra pio telep kupra deipkamsene. 54 Nedi kan Yerusalem mutu nesala yuma tep, tampra telep kweipkamsena deiyoda, ake. Ada, kan pe nongpu kware kupkerepa, ila di ali dakamrume. Tonda, sun Samaria mutu nesala cap, Sodom mutu nesala cap, sun Yerusalem mutu nesala epmengedi, ‘Uo, nunda yambul mali kuramepu dinin, sun Yerusalem mutu nesalada, tek sisi ila mali weik kecapu talepra kurami. Nunda yambulanun pua,’ tenepmengedi, sun tep yanipra nalepsengepa, sunda, pio ali dangkamrume.

55 Ton cap pepsene. Nedi, Sodom cap, Samaria cap, amutu neitamai kunung nesala yuma capda, wenepra poptapra sikke tapsi dinin, sun yuma menop taru telep kuramitopu, nedi tamupra pio telep kupra deipkamne. Ukupne dingeda, kan Yerusalem pe, kan mutu kunge nesala peda, adipapu tamupra pio teleppu kweipkamsene. 56 Sunda ton cap tenipetepso! Sun Yerusalem mutu kurum nesala pio mali weik kuramrumnge, kapul jenek kupra deipsisipa, nimi yumadi kapul men kael kepsei taruda, sundi, sun kayapu neng, Sodom mutu neitamai kurami nesala yuma tep nengeda, aupu ton men tamrum do? Tonda, pumun taru sundi, sun kayapu neng, sun Sodom mutu nesala tep, gemenapu men kuramrum do? Gume, menop taruda, sundi, sun Sodom mutu nesala tep, salnong-nong keamrumdi, ‘Uo, sun Sodom mutu nesalada tek sisi pio mali nengpu,’ pepra, autupra nyek-nyek peramrume.

57 Ukupra peramrum dinin, angeda sun pio mali weik kuramrumnge kapul men jenek kupra deipsisipa, katuai kupupa, sun yuk-yuk mutu nesala yumadi epra kapul men kael keamsei taru tep pepsene. Dinino, ukutaru sun yumadi, sun Yerusalem nesala ila mali weik kuramrum ngeda, konum kael keamsei. Ukutaruda, sun peda utopu kupmarume. Atep sun Edom ^{▼▼Edom – Edom mutuda, Yerusalem mutu dipra, iknapi dan tara, arah selatan cap, tonda keteng yakan tara, arah timur capda, ila katuai mutu kwamu. (Yeheskiel 25:12-14; 35:2-15)} mutu neitamai kunung nesala cap, sun dana-dana tara kunge nesala cap, tonda sun Filistin ^{▼▼Filistin – Filistin mutuda, Yerusalem mutu dipra, arah selatan dan barat kurami. Ada, ila katuai mutu kwamu. (Yeheskiel 25:12-14; 35:2-15)} yala nesala cap, tonda sun kayapu neng dana-dana tara kunge nesala cap, kungedi kan tep er sun Yerusalem mutu nesala tep nengeda, ‘Uo, sunda tek sisi pio mali weik kurami,’ tenepsengedi, nalemsengedi, ‘Nun songe,’ tenesenunge. 58 Ukupra tenesenunga tep nengeda, sunda pio pu jena utopu kuramserepa, pio mali kange doupra kunkamrume. Angeda ikin weik kunkamsere. Ada, sundi pio mali keca talepra kuramrumnge cap, nedi, ‘Ukunada ne pio songe, ne dabale,’ tenemsidi, ‘Angeda meme,’ pemsi keca dinin, sundi ange kuramrumnge tep, wenepkamsene. Neda, Allah, akeca-keca talepra, deiki tara erepra, ila puto ngebodi pepsena cadi, ange yumada tek sisi nong kupkamre.

Allahdi Israel nesala tep, “Wenepsenyopda, ali dangkamrume,” pepu upu

59 Allahdi sun Israel yala nesala tep pepu.

Uda tek sisi pepsene. Neda Allah Yahweh, akeca-keca yuma talepra, deiki tara erepra, pio puto weik deiyo ngebodi pepsene. “Ada sun Yerusalem mutu kurum nesala, sun wenemna tep, ila ikin keca doupra, sun deiki deipkamsene. Akecada, sun pe dipapu, pio mali kuramrum keca deiki dipapu, wenepkamsene. Sunda, pio ila mali kuramrumtopu, nedi pio ila ikin keca deipkamsena deiki di wenepkamsene. Pumun taruda, nedi sun Israel yala nesala yuma tep, ‘Ukupra melipkamsene.

Tonda, nedi, ‘Angeda ukupkamrume, angeda pio men kupkamrume,’ pepra deipsenyopda, angepu talepra kupmumnyopda, weika di ton melimkamsene,’ pepra, pedina upu deiki di deiamsisi. Upepra deiamsisi dinin, sun pe dipapu ange yumada tapnemume. Nedi pedina upu di upepra deiamsisi ngeda, sundi, ‘Angeda nun songe, ange yuma men talepra kunkamepe,’ peprumdi, yaniramnemumnya deiki di, mali weik kuprume.

60 Ukupra mali kuprum dinino, sun kaber utopu kuramum taru di, ne pe kange dipapu, sun tep, ‘Ukupkamsene, ukupnyopda, sunda ukunkamrume,’ pepra, deiamsidi, ketenepra deiamsingepu, tupa tenenkamne. Angeda, ne lumdongona gum dipapu, ange yumada, pio akunkamrenge pua. Pio men gum kupkamre. 61 Sunda, kange di tamupra, sun pumun taru mali-mali kuramrum ngepu tenepkamrume. Tenepmumnyopda, sun kware kupserepa, ali weik dangkamrume. Ada ukupmanto, sun kayapu nerapu utopu kunge nesalada, weit nerapu cap, du nerapu cap, nedi tamupra sun damaipu duyanepa kan adipapu kware kupkamkere.

Ange ukupne pangeda, amutu butene kunge nesala, sunda sun kayapu nerapu utopu kupra kweipnedi, sun amutara deipnyopda, kunkamenge. Nedi, ‘Sun Israel nesala cap, ne cap antapra telep kupra kikiman kunkamep’ tenen, pedina upu deiki peipsisi ngeda, sundi aupu talepra, dumsisipu kuramruma deiki di gume. Tampupra telep kweipkamsena deiyoda, ne kange dipapu kupkamsene.

62 Ataruda, ne kange dipapu, ‘Ukupkamsene, ukupnyopda, sundi ange ton kupkamrume,’ pepra, pedina upu deiki di pepsenedi, konum telep kweipsenyopda, sun yumadi, ne tep kael kepkamnerume. Ada sundi, ‘Uo, nun nai boda, tek sisi Allah Yahweh kurure’ tenepnerumdi, kael kepkamnerume. 63 Atep nedi sun mali-mali weik kuramrumnge tep nengeda, nedi, ‘Telepe dakwapye. Kaukepkamsene,’ pepra, sun mali kunange gum kupra deipsenyopda, sundi kange di ton cap, ‘Uo, nunda pio mali-mali weik kuramepu,’ teneprumudi, ali weik dangkamrume. Sun mali kuramrum ngeda, pio men lupronkamruma tep, sunda pio kware kupserepa, ali dangkamruma cadi, amenda dorkunkamre taru neitamaida, wareto upu do yuma, sundi upu ton cap, pio men penkamrume.

Ange yumada, neda Allah Yahweh, akeca-keca yuma talepra, deiki tara erepra, pio puto weik deiyo ngebo kunune. Atep nengeda, nedi aupu yuma pepmasena cadi, ange yumada, tek sisi nong kupkamre ja!

Allahdi sun Israel nesala tep pepu.