Ezekiel 17

Allahdi, anggur tapke co cap, Rajawali ma yala-yala cap yuma tep, ukupmanto upu di pepu

1Allah Yahwehdi ne Yeheskiel damai yana peipneu.

2“Uo, Yeheskiel kanda nimi sisa dipapu deipkeu ngebo kurume. Nedi peipkenepa, kandi sun Israel mutu neitamai kunge nesala yuma tep, domon upu deiki di perbenkurume. Ada, tali nengdi, ‘Deiyo ake,’ tenen, tali lupra men teneptenge upu cap, tonda, mambul keca deiyo upu lap penange cap, lap perbenkurume. Ada, nedi aupu, ukupmanto upu pepra deipkenepa, kan dipapu anesala tep, nungbenkurume.

3Atep, nedi nukeipkuken upuda ake. Neda Allah Yahweh, akeca-keca yuma talepra, deiki tara erepra, ila puto weik ngebo kunedi, sun anesala yuma tep, aupu pepra deipsene. Angeda ake. Ila ma yala tenpu, er si Raja wali mada, pio ila deiyo ma kurure. Er potongda, pio telep kupu ma cap, tonda er polda ila pala cap, ila lyoma di puto kurure. Ama er polda, warna-warna weik, urasin pio telepnge kurure. Amada lakra embenmauanen, Libanon mutu dupai lakra beu. Libanon mutu dupai lakra benmauanen, amutu dupai di ila lyom cemara co deiki bena, tenpu co teru ton, pio telep nge sekropu.

4Uda, aRaja wali ma konum cemara co teru deiki tarange sekropu dingeda, adipapu amutu neitamai kurami nengdi, bung keca deipra kunumdaramyai doupra duyau. Aila ati arum domyaida, kunumna kael neng weik dakurami. 5Aco teru acapu deipu dingeda, amutu neitamai kurami nesala sundi kourami ukupu co teru ton dopropu. ‘ARaja wali madi, ange ukupu co koupkamre’ tenen, konum ketenepra deiamyaipu yana, ukupu co koupu. Ada pio tu telep kwamngaipu yana koupu. Akoupkaida, me ton pio cena gume, embanapu kuramu. 6Aco teru sekra yana koupu ngeda, anggur tapke kepudi tuai amutara papnedi, acapu teku dinin, lyoma di gume. Bumanunpu tekudi, amutu yuma er tapkeda weika di belekra embanapu kepu. Akoupu anggur tapke teruda, konum nepu dingeda, er boda, Raja wali ma damai itara welepra teku. Tonda, er yaten pulpula yuma peda, tu neitamai puto di wekudi, talepu. Anggur tapke konum nepu dingeda, er teru yuma ukupu ngepu kupu.

7Ange konum kupu taruda, ton yuk Raja wali ma ton, er pol pala weik ma cap, tonda er nong potongda, pio bukam weik kwamu ma yau. Ukupra yau dingeda, arup taru akouamu anggur tapke yaten pulpula cap, er teru-teru cap, ukupu yau Raja wali ma damai embeu. Ada, ‘Amadi me gwepra dingdongonkamner’ tenen, keteneipu. Menmena Raja wali madi, atapke koupka wai dam di, atapke doupra, yuk wai damai koupu. 8ARaja wali madi, anggur tapke co doupra, tu pio telep sukun tu damai cap, telep embaramu me cap kwamngai bena koupunge deiyoda, ada, ‘Anggur tapu di, er teru cap, tapke cap, er bo cap, er du moupkamrenge capda, pio teleppu kunkamre’ tenen, tu telepai koupu. Tonda, ‘Er duda pio telep kupra tupa-tupa mounapu kunkamre’ tenen, anggur tapke doupra, tu cap, me cap kwamngaipu koupu. Allahdi ne Yeheskiel tep peipne.

9Upepu dingeda, aupu dukdongopra peipneu.

Atep, neda Allah Yahweh, akeca-keca yuma talepra, deiki tara erepra, pio puto weik deiyo ngebodi, asipetepkene. Tenipetepkurume. Akoupu anggur tapuda, pio gam kuptudi, weik kuptu do, gum do? Ange gum dingeda, menmena taru yanamu Raja wali madi, aco er yaten pulpula yuma, men kuneproptu do? Ange utopu, kuneproptuopda, anggur du peda, men gelal sepkamre do? Tonda ange utopu, er tapke teru cap, bo cap peda, men coptaptudi taptupa, nunuptudi men koluptu do? Ataruda, anggur tapke yaten kuneprona tep nengeda, nimi puto neng ton men putaptue. Tonda ila puto jen talena neng ton men putaptue. Tali neng dipapu er yaten pulpula kunepra taptenge.

10Tonda, tenipetepkurume. Ada Raja wali ma butene ngedi, anggur tapke kunepropredi, yuk wai dam neitamai koupyopda, acapu tek sisi er yaten pulpula di, tu neitamai wektudi talepra puto kupkamre do? Telep kupra papredi, adipapu gam kuptudi, nepra weik kupkamre do, gum do? Tonda, dapu tara di, ila bupu kumanyada, keteng yakan tara di pung peprepa, nunuptudi koluproptu do? Atapke men daksaktu do? Gume, anggur tapuda, er koupyai dipu, adipapu koluptudi gum kuptue. Ange yumada sun walwale, dinino, ne Allahdi, ne kaele.

Allahdi, Raja wali ma cap, anggur tapke cap tep ukupmanto pepu ngeda, deiyo lap pena tep, pepu upu

11Allah Yahwehdi ne Yeheskiel damai yana, ne tep lap peipneu.

12Ada ake. Kandi sun Israel yala nesala tep pepkurume. Sunda, ne tep teka tenena gum dipapu, tali lupra mali-malipu kungedi, ne tep yanitamnenung nesala tep asipetepkurume. Ada, sun akurum nesala yumadi, tek sisi aukupmanto upu pepmasen upu yumada, ‘E, aupu deiyo neitamai ngeda ake’ tenen, konum tenepra kael keprum do, gum do?’ pepra asipetepkurume. Ukupra pepmemdi anesala yuma tep lap pepkurume. Ada Babel mutu talepra ila deiyo ngebo Raja Babelda, konum Yerusalem mutu yanamu di, sun tep popbisipu. Ukupu dingeda, Yehuda tara neitamai yuma, Israel yala nimi deiyo kepra, talepudi kuramu Raja ngebo cap, er amutara pel dorami deiyo neng yuma capda, adipapu ateng koupdongopudi, aneng doupra, er pe mutu, Babel mutu tamupra dubenamu.

13Ukupu dinin, tonda er dipapu Yehuda tara kurami nengdi deiamipa, dadeipdanen yakaramya yana deipi ngebo tenpu ton, gam tupa kuramu ngebo dopra, ‘Amutu talepra nimi deiyo ngebo kunkamre’ tenen, wepra ereipu. Ukupu dingeda, erdi angebo tep, “Konuma, kandi ne tep, ‘Ne nai, kan upupu gekenkamkene,’ pepnemempa, nedi peipkamsen keca yumada, adipapu angepu kupkamrume. Yuknge ton gume,” pepra, nimi deiyo karepudi, erepra deipu. Ukupudi er adipapu, “Ukunkamrume,” pepra deipu. Ukupu pangeda, er angebo Zedekiadi, “Dyo, angeda ukupkamne,” pepra, sun butenedi pedina upu pepdarei. Raja Babeldi, aupu peipdarei taruda, erdi sun Israel yala nesala talerami deiyo-deiyo neng cap, mambul neng cap, ila kael neng capda, konum ateng koupdongopra, dopropudi dubenamu.

14Amutu deiyo-deiyo neng cap, ila kael neng cap, dubenamu deiyoda, ada ‘Amutu nesala kange di puto kupmengedi, ne upu yaniptapmengedi, ne pel ton men donkamneng’ tenen, kupu. Tonda, ‘Ne upu gekepra, ne amutarapu pio kunkamenge. Ne upu moupra gekepmengedi, dim peprappu kupmengopda, gam tupa kunkamenge’ tenen, kupu.

15Raja Babel ngebodi, ukupu dinino, Israel tara, arah utara neitamai di erepra deipu nimi deiyo ngebo, er si Zedekia, sun butenedi peipdaprei pedina upu ngeda, moupra men talepudi, tapu. Tapudi, ‘Ukupkamepe,’ tenepudi, wepra doproipu nengdi Mesir mutu mororbei. Ange deiyoda, ‘Mesir mutu nimi deiyo Rajadi, er mutu kuda bisam cap, jen talena neng cap, pio weika di karepnetupa, aneng melipnetengedi, nun kikiman kepmepyopda, Babel mutu neng tep, tapra popbisiptepye’ tenen, kupu. Ukupu dinino, sun ton tenipetepso! Israel tara deiyo ngebodi, akupu ngeda, tek sisi nong kupkamre do, gum do?

Tonda, ware nesala do yuma, sun deiki tara ila deiyo kunge neng tep, tapmengedi, sun upu yanipmengedi, ‘Nun talesenung neng popkamepe’ tenen, adeiyo neng tep warekra ketenepmengopda, er podan neng yumada, ato keca epmengedi, tali kaukepkameng do, gum do? Tonda, sundi pedina upu pepdareinge yumada, tapmengedi, bura saka bendoptenga peda, gam tupa kunkameng do? Sun talenung deiyo nengdi, yana popra gawal dakameng do? Konum kupkameng do? Angeda pio gume. Angebodi, sun pedina upu deiki di pepdareinge yaniptaptuopda, er talerur ila deiyo ngebodi, yana ila wenemna kecapu karepkamre!

16Ne Allahdi pepsene. Tek sisi, neda pio gam kuna deiyo ngebo kununa cadi, nedi pepsene upuda, ‘Pio tek sisi,’ tenenkamrume. Ne Allah Yahweh, akeca-keca yuma talepra deiki tara erepra, pio puto weik deiyo ngebo kunedi, pepsena cadi, ne pepne upuda, nong tek sisi kupkamre ja! Ada, nimi deiyo ngebo Raja Yudea, erda Babel mutu neitamaipu tek sisi depkamre ja! Ange deiyoda, ake. Babel mutu ila nimi deiyo ngebo Rajadi, angebo erepra, ‘Nimi deiyo ngebo kepra, amutu keana taru tep talenkamre’ tenen, erepra deipudi bendopu dinin, Yudea tara ngeboda, sun butenedi pedina upu pepdarei ngeda, konum yaniptapka tep, amenda taru nimi deiyo ngebo Raja Babelda, angebo doupra dubena deiprepa, dakunmaryanen, amenda taru Babel mutu neitamaipu dadepkamre ja!

17Uda, Yudea tara keana taru taleramre ngebodi nimi doproipupa, sundi Mesir mutu talepra, nimi deiyo ngebo Raja Firaun damai, er tep, ‘Melipneso!’ pepra bena moropteng dinin, Firaun cap, er jen talena neng, denge pio weika di kuptenga peda, sun Yudea tara nesala tep, yana men melipkamenge. Ange gum dinin, Babel mutu ila nimi deiyo ngebo Raja cap, er jen talena neng capdi, ‘Yudea tara nesala yuma popbisipkamep’ tenen, yangedi, Yudea tara ila ati arum Yerusalem mutu warekra popkameng taruda, Firaun cap, er tara neng capdi yana men melipkamenge. Babel tara nengdi, ‘Akati-akati yuma urupra gawal dakmepedi, amutu nesala yuma poptapkamep’ tenen, Yerusalem mutu dana-dana ongopdongopra domi lyom gel beilya damai yana, sundi, ‘Abeilya damai tu palipra deipmepedi, ange welepra akati arum wekamep’ tenen, pel dopkameng taru cap, tonda, ‘Alyom gel beilya deiki tara mar marapmepepa, amutu neng popkamep’ tenen, lyom ati ton dopkameng taruda, sun Mesir mutu nengdi yana, Yudea tara neng tep, men melipkamenge.

18Gume, Yudea tara talerur deiyo ngeboda, bura saka, bendoptudi men lyepdatue! Ange deiyoda, erdi, “Ne si deiki pepkene,” pepra, deiamu upu yuma cap, tonda, “Angeda ukupkamneme, ukupnememnyopda, nedi kan upupu gekenkamne,” pepra, Raja Babel tep, pedina upu deiki di pedanamrei upu cap yumada, Yudea tara deiyo ngebodi konum yanipka tep, er pe dipapu, er pe nong men lyepdatue. Babel mutu neitamaipu dadepkamre ja!

19Ange tep nengeda, neda Allah Yahweh, akeca-keca yuma talepra, deiki tara erepra, ila puto kunun ngebodi, pepsene. Neda, tek sisi pio gampu kununa cadi, nedi pepsene upuda, tek sisi nong kupkamre. Ada ake. Nedi nimi deiyo ngebo Raja Yehuda tep, “Nedi ukupra melipkamkene, ukupkenyopda, kandi ne upu moupra gekepmemdi, pio tep domyankamnerume. Tonda, telep kuna ngeda ake, mali ngeda ake,” pepra pedina upu deiki deipsi upu yumada, erdi, ‘Ange upuda, ne songe. Aupu men gekepkamepe,’ pepra, nundi pepdanemunge yumada, yaniptapneua cadi, nedi er nong deiki ila ikin keca deipnedi wenepkamne ja! Deiyoda, erdi, ‘Angeda ukunkamrume,’ pepra, pedina upu deiki di, Babel mutu nimi deiyo ngebo cap tep peiamrei ngeda, pio moupra men taleamudi, konum yaniptapka tep, ange yuma tep, er nong deiki ikin keca deipnedi wenepkamne.

20Ukupmanmtoda, nimidi ma tomona tep keca er si jala, dopmengedi, ma tomoramengtopu, nedi angebo tep, konum tomopnyopda, douprapnedi Babel mutu dubenkamenge. Ukupkamenge taruda, er wenemna tep, er dopra Babel mutu neitamai konum deipnyopda, nedi er tep puto di wenemkamne. Deiyoda, erdi ne tep, pio telepe men teneramneua tep, ne pemsi upu konum yaniptapneua cadi, angebo ila di wenepkamne ja! 21Angebo wenepra popkamne taruda, nedi go karepnepa, sun Babel mutu jen talena nengdi, er damai yangedi, er jen talena pio telep neng peda, yu parang ya di poptapkamenge. Nimi weik tara ngeda, poptapmengepa, tupa gam kunkameng nengda, bura saka bendopmengedi, im sirik, mutu sirikda, yuk-yukai bendopkamenge. Ange yuma konum kupyopda, sun yumadi ne tep, jenek kupra kael kepkamnerume. Ada, ‘E teka, nun nai bo Allah, akeca-keca talepra, deiki tara erepra ila puto weik ngebodi, ‘Ukupkamne,’ peipseutopu, konum kupmar adano,’ tenepmumdi, betapra kael kepkamnerume. Aupuda konum pepra deipsene.

Allahdi tenepra, ‘Ukupkamsene,’ pepra, deipu upu

22Neda Allah Yahweh, akeca-keca yuma talepra, deiki tara erepra, pio puto weik deiyo ngebo kununa cadi, nedi upepra deipkusen domon upuda adano. Ada ake.

Ne dipapu, cemara co koupipa, ila di nepra, ila lyoma di deiki tara welepu cemara co damai yana, ukupu telep co dup ngeda, nedi dakamne. Konum pio ukupu co teru, urupai telepnge copnyopda, adingeda pio telep ukupu teru ngeda, ne dipapu ukupra coptapkamne ngeda, doupra bena kange di tamupra koupkamne ja. Ada aco teru dopra, tenpu ila di weleamu mutu dupu deiki, kange di tamupra konum koupnepa, nepbaramyanen, im deiki tara pio ila di welepkamre. 23Israel mutu neitamai buku mutu dup, ila mambul lyom mutuda, aco urupai kange di tamupra, nedi koupnepa pakredi, er bo cap, teru capda, pio weika di kupkamre. Ukupredi er teru peda weika di kwakredi, embendankamre. Embendaredi, er du pio telep kupra mounkamre. Ukure pangeda, acemara coda, pio urasin telep lyom co kunkamre. Ukunkamre taruda, aco dup yumada, ma yala-yala yumadi, aco duppu, sun ma ati donkamenge. Tonda aco konum nepre taruda, aco ila lyoma di tekamrepa, aco teru deiki tara yumada, sun ama yala-yala yuma, men nukmanto yana kunkamenge.

24Ange tep nengeda, dan mutu do yuma, amutu-amutu neitamai kupkamre co yala-yala yumadi, ne tep kael kepra tenenkamnenge. Ada tek sisi ne tep nengeda, sundi, ‘Uo, Allah erda, tek sisi Yahweh akurure,’ tenepmengedi, ne tep moupra kael kepkamnenge. Atep ne dipapu, ila lyomadi nepra tekamre co yumada, ne dipapu kwepra amutara deipkamne. Tonda, ware co do yuma, er buma di nepbaramre coda, ne dipapu dopropnedi, ila lyom co kepra deipkamne. Tonda, telep kupra tekamredi neramre coda, nuptapmengepa, nunupredi koluramre co utopu kupra deipkamne. Tonda, ne dipapu koluamre co yumada, kange di tamupra koupnepa, telep kupra pangkamre. Ara tali upu men pepsene. Neda, Allah Yahwehdi, aupuda konum pepmasena tep nengeda, aupu yala-yala yuma pepra, deipman ngeda, tek sisi kupnapu kupkamne. Ton pio men tapkamna tep aupuda, konum pepra deipsene.

Allah Yahwehdi peipupa, Yeheskiel gekepudi sekra deipu.