Eze 18 | XteSC | STEP | Uda Allah er si Yahwehdi, ne Yeheskiel tep upepneu.

Ezekiel 18

“Dumsisipu kunge nesalada, gam kunkameng dinin, malipu kunge nengda depkamenge,” pepu upu

1 Uda Allah er si Yahwehdi, ne Yeheskiel tep upepneu. 2 Sun Israel yala nesalada, sun pe yala neng tep tenepmengedi, ware deiyo tep sundi tupa-tupa, adomon upu pepnung do? Menop taru di dipra, tupa penung domon upuda, ake. ‘Sun nai yapu wisi nengda, anggur tapu du mokon yunge jepmengopda, amenda taru, sundi deipmengepa, dadeipdanen bangepa kunkameng nyapu peda, sun sipyal pumbonda, matang tupa penkamre,’ penunge. Ware keca deiyo tep, adomon upu tupa penung do?

3 Ange tep nengeda, neda Allah, tupa gam deiyo ngebo kunune. Tonda, neda Allah Yahweh ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu ‘Adonay’ deiyo ngeda, jenek kupra sekmupu.} kunune. Nedi, akeca-keca talepra, deiki tara erepra, pio puto weik deiyo ngebo kunune. Ukununa cadi, ne tenenetopu kunune. Atep, nedi pedinkamken upuda, tek sisi nong kupkamre. Pumun taru perami domon upuda, sun ukutaru kurum Israel nesaladi, tupa men penkamrume, pepsene. 4 Tek sisi ne pepsene upuda, moupra gekepmumdi, kael kepkurume. Nimi nong cap, nimi gam kuna cap yumada, ne mawa kecapu kununge. Wisi neng pe, sundi derikamenge metek nyapu yuma peda, ne mawa kecapu kununge. Tonda, mali kunge nesalapuda denkamenge, yuk nesalada, gume.

5 Tek sisi pepsene. Ware ngebo do yuma, nimi tenpu ngebodi, pio dumsisi kurur ngeboda, ne Allahdi, ‘Ange kunkamrume, ange men kunkamrume,’ pene upu gekeredi, pio telep kupra kun kecapu kure ngeboda, gam kunkamre. 6 Ange utopu kure ngeboda, er kure kecada ake. Dumsisi kure ngeboda, isok si eremangedi, popmange bisam tu ton men jerure. Tonda, amutu kunge Israel nesaladi, ‘Nun nai yapu kungedi melimkamseng’ tenen, si eremenge isok cap, nimi urasin utopu kupra betaipmengedi, si eremenge keca cap tep, er asuru men diredi, ‘Akecada, ne tep melimkamnere,’ men tenerure. Tonda, angeboda, yuk neng sun domenge nerapu tep, upu moupredi, ‘Ne cap mapkuneme,’ pepra, mali men kudirure. Tonda, yuk nerapu pe, er domre ner peda, yapi embare taruda, sun damai men embarure. Ato ngeboda, telep kun kecapu kurure, pepne.

7 Tonda yuk nengdi, er co bo do, yuk keca do, ke tep dopramenge nge tep, dakuramenge taruda, erdi sun nong deiki ikin keca ton men derirure. Yuk neng tep, ikin pel men dimrure. Ke taru tep, er keca dopropmengedi, ‘Amenda taru tek sisi akeca tamupra karepkamneng ja, tenepkamser’ tenen, er keca yo pununa tep, kareamenge kecada, atelep kurur ngebodi, upula men dororure. Sundi er keca ke dopramenge nge, tamupra karepmengopda, erdi sun keca ke tep deiamrenge dopra, adipapu tamupra karerure. Tonda, atelep kure ngeboda, yuk neng keca tali upula men dororure. Tonda, yuk neng jen putare taruda, erdi makupra karerure. Yuk neng ton, opkal gum tep, nong bananga kuramenge nesala tep, makupra karerure. Autopu kure ngeboda, telep ngebo kurure.

8 Tonda, telep kurur ngebodi, yuk nesala sun putana tep, co bo karepre taruda, erdi ange men perure. “Ne co bo dopropmumdi, ne tep tamupra kapul men karepnemum taru neitamaida, co bo ton tapakra pepkamsentopu, co bo weik ton cap tapakra karenkamnerume. Sundi ne co bo dopropnemumngepu gume. Neda weik ton cap tapakra dorona tep, co bo ton tapakra weika di karenkamnerume,” pio men perure. Tonda, angebodi, ‘Mali kun keca kupnun’ tenen, kalekra didaredi, mali men kurure. Utopu angebodi, upu bongdina deiyo ngebo kure taruda, ton tara nengdi, ton tara neng tep, “Ukupra mali kupmasenge,” pepmenge ngeda, moupra gekepredi, pio tek sisipu upu bongdirure. Mok upu pena gum di, telep upupu perure.

9 Tonda, ne Allahdi sun Israel nesala tep, ‘Ange kunkamrume, angeda men kunkamrume,’ pepra deiamsisi upuda, moupra gekerure. Nedi penun upu yumada, moupra teneredi, talepra dombarure. Tenpunge peda, men tamrure. Erdi, ‘Ukupkamne,’ peretopu, angepu tek sisi kurure. Mawa upu pio men perure. Ato kure ngeboda, tek sisi gam pio kunkamre, pepsene. Neda Allah Yahweh, akeca-keca yuma talepra, deiki tara erepra, pio puto weik deiyo ngebo kunedi, ‘Ukunkamne,’ tenepnyopda, ange yuma tek sisi nong kupkamre. Nedi aupu konum pepmasene.

10 Dinino, tenpu telep ngebodi deipkamre mi puda, balilapu kuredi, deiyo nengdi penge upu bisipra nimi poprepa, sun yapi embaryopda, amali kurya deiki di, ami tek sisi depkamre, pepne. 11 Angebo telep kurur dinin, erdi deipu midi mali kurur kecada, ake. Dumsisi men kurur dinin, erda, isok si eremangedi popmange bisam tu jerure. Tonda erdi aisok tep, ‘Ne nai yapu kungedi melimkamneng’ tenen, aisok si eremrure. Tonda, angebodi yuk neng, sun domenge nerapu tep upu moupredi, ‘Ne cap maptenemnye,’ pepra, aner kikiman mapyopda, aner tep mali kudirure. Ato ngeboda, er nai telep kuramre ngebo dinin, er mi puda malipu kurura cadi, ami tek sisi depkamre, pepne.

12 Tonda yuk kankan kunge nengdi, angebo er mi co bo do, yuk keca do, ke tep dopropmengedi, sun putan keca kunupropmengedi, dakuramenge taruda, erdi sun nong deiki ikin keca weik derirure. Tonda yuk neng tep, ikin pel dimrure. Ke tep, er keca dopropmengedi, ‘Amenda taru tek sisi akeca tamupra karepkamneng ja, tenepkamser’ tenen, er keca yo pununa tep, kareramenge ngeda, amali kurur ngebodi, upula dororure. Sundi er co bo ke tep dopramenge nge, ka tamupra karepmengopda, erdi sun keca tamupra men karerure.

Tonda, amali kure ngeboda, yuk neng sun keca tali upula dororure. Tonda, yuk neng jen putana cap, opkal bananga kuna cap kuramenge taruda, erdi melipra men karerure. Tonda, angeboda amutu kunge Israel nesaladi, isok si eremengedi, ‘Nun nai yapu kungedi melimkamseng’ tenen, aisok urasin utopu kupra ketkemdinge keca tep, er asuru diredi, ‘Akecada, ne tep melimkamnere,’ tenerure. Ato ngeboda, pio mali weik kurure. Atep, ne Allahdi, ‘Angeda ne pio songe,’ tenenun kecapu talepra kurure.

13 Tonda, amali kurur ngebodi, yuk nesala sun putana tep, co bo karepre taruda, erdi aupupu perure. “Ne co bo dopropmumdi, ne tep tamupra kapul men karepnemum taru neitamaida, ‘Co bo ton tapakra karenkamnerume,’ pepra moropkamsentopu, co bo ton cap tapakra, weika di karepkamnerume. Sundi ne co bo dopropnerumtopu gume. Neda weika di ton cap tapakra dorona tep, weika di karepkamnerume,” perure.

Atep nengeda, amali kuna ngebo gam pio kunkamre do? Gume, tek sisi gam pio men kunkamre. Ne Allahdi, ‘Akeca yumada, ne pio songe,’ tenenune. ‘Ange yumada pio mali,’ tenenedi, sun tep, “Ukuna meme,” peramsisi ngeda, erdi tali lupra kurura cadi, angebo tek sisi wenepra popnepa, depkamre. Depyopda, er yapida, er giso deiki kupkamre. Er yapida, er pe nong deikipu palepredi bapdankamre. Er mali kururya deiki di, wenepra popkamna cadi, er dena deiyoda, er pe pua.

14 Tonda, ukupmantonge ton pepkusene. Ware ngebo do yuma, er nai yapudi mali kuramipane, kael kepredi, moupra tenepyopda, ‘Gume, amali kun keca yumada, ne tek sisi men kunkamne,’ tenepredi, dumsisipu kuryopda, angeboda tek sisi gam pio kunkamre. 15 Ato ngebodi, dumsisipu kurura cadi, erda isok si eremengedi, popmange bisam tu ton men jerure. Erda, amutu kunge Israel nesaladi, ‘Nun nai yapu kungedi melimkamseng’ tenen, si eremenge isok cap, aisok urasin utopu ketekemdinge keca cap tep, er asuru men diredi, ‘Akecada, ne tep melimkamnere’ tenen, teka men tenerure. Tonda, angebodi yuk neng, sun domenge nerapu tep, upu moupredi, ‘Ne cap mapkuneme,’ pepra, mali men kudirure. Ato ngeboda, teleppu kurure pepne.

16 Tonda angebodi yuk nesala yuma tep, mali men kudirure. Utopu, yuk nengdi, er co bo do, yuk keca do, ke tep dopropmengedi dakuramenge taruda, erdi sun tep aupu men perure. “Amenda taru, ‘Tek sisi, akeca tamupra karepkamneng’ tenen, ne keca yo pununa tep, sun mambul keca karepnerume. Gum dingeda, ne keca ke tep men doproptume.” Ange men perur dinin, sun keca dorona gum dipapu, yuk neng sun putan keca tep, tali lupra melimrure. Atelep kurur ngebodi, upula men dororure. Tonda, yuk neng jen putaprepa, erdi makupra karerure. Yuk nengda, opkal bananga kuramenge nesala tep, makupra karerure. Ato ngeboda, telep kurur ngebo kurure, pepne.

17 Tonda, atelep kurur ngebodi, ‘Mali kupnun’ tenen, pio moupra kalekra didaredi, mali keca tenpunge peda men kurure. Tonda, yuk nesala sun putana tep, co bo karepre taruda, erdi ange men perure. “Ne co bo dopropmumdi, ne tep tamupra kapul men karepnemum taru neitamaida, ‘Co bo ton cap tapakra karepkamnerume,’ pepkamsentopu, co bo ton tapakra karenkamnerume. Sundi ne co bo dopropmumnge utopu gume. Neda co bo weika di ton cap tapakra karenkamnerume,” pio men perure.

Tonda, ne Allahdi sun Israel nesala tep, ‘Ange kunkamrume, angeda men kunkamrume,’ pepra deiamsisi upuda, moupra gekerure. Nedi penun upu yumada, moupra teneredi, talepra dombarure. Tenpunge peda, men tamrure. Ato kure ngeboda, er nai yapudi, mali kuramya deiyo tep nengeda, tek sisi men wenepkamna cadi, men depkamre. Erda tek sisi gam pio kunkamre.

18 Dinino, angebo er nai bodi mok upu peramunge cap, yuk neng ikin kange dourami taru, sun co bo tapakra upula di dororamunge cap, er kayapu neng, sun keca upula dororamunge cap, er yala nesala kan-kan, yuk mali kun keca yala-yala yuma kuramunge yuma cap tep nengeda, ange deiyo tep depkamre. Angeboda, er pedi mali kuramya deiki di, wenepra popnepa depkamre. Ada mesum tep gume. Deiyoda, er pedi mali kuramnga tepa. Ne Allahdi pepsene, pepu.

19 Nedi pepsene. Sun mali kunge nengda, sun mali kunga deiki dipu depkamenge. Dinino, sun Israel nesaladi ne tep penerum ngeda, yuke. Sundi upenerume. ‘Mali kuramre ngebodi, er mi deipre pangeda, er nai bo tep wenepkamremtopu, er deipre mi peda wenepkamrume,’ penerume. Dinino, ne Allahdi ange utopu men pesenune. Ware ngebo do yuma, dumsisipu kuredi, ne Allahdi sun tep, ‘Ange kunkamrume, angeda, men kunkamrume,’ pepra deiamsi upu moupra gekepredi, telep kuryopda, angebo tek sisi gam pio kunkamre. Deiyoda, erda er nai bo mali kuramutopu men kurure. Mali kuramre ngebodi deipre mida, mali keca kuna gum di, dumsisi kecapu kurura deiki di, gam pio kunkamre, pepsene.

20 Dinino, ware ngebo do yuma, nimi ton mali kun kecapu weik kupbare ngeboda, wenepra popnepa, depkamre. Tonda, sun nai yapu cap, sun nin yapu cap, mali kuramipapu, sun nyapu telep kungopda, sun nai yapu cap, sun nin yapu cap, men di mali kuraminge tep, sun nyapuda men wenepkamne. Ukupnepa, sun men depkamenge. Ange utopu, ware ngebo do, ware ner do, sundi deipmenge nyapu, mali kupmengopda, amali kuna kunumna tep, sun nai yapu cap, sun nin yapu cap tep, men wenepkamne. Sun nyapu mali kunge keca tep nengeda, sun nai cap, sun nin capda, men depkamenge. Nedi tek sisi pepsene. Dumsisipu kunge nengda, sun dumsisi kun keca, sun deikipu kunkamre. Ange utopu, malipu kunge nengda, sun mali kunge kecada, sun deikipu kunkamre. Nimi yuma kuramengetopu, epnedi, upu bokeipkamsene. Ne Allahdi pepsene.

21 Dinino, sun mali kun kecapu kunge nengdi, ‘Uo, angeda mali kurura tep, tapkupe’ tenen, kael kepmengedi, sun mali kun keca yuma tapmengedi, dumsisipu kungopda, gam pio kunkamenge. Ada, ne Allahdi pediramsisitopu, ‘Ange kunkamrume, angeda men kunkamrume’ pepra, deiamsisi upu talengedi, tek sisi telep kun kecapu kupmengopda, angeda ne epnedi, upu bokeipkamsene. Mali kuraminge tapmengedi, dumsisipu kunge nesalada, men wenepkamne. Sunda gam pio kunkamenge. 22 Men di mali keca yala-yala yuma kuraminge, tapmengedi, dumsisipu kupmengopda, men di mali kuraminge deiyo tep, upu men bokeipkamne. Sun mali keca konum tek sisi tapmengopda, akeca tupa men tenenkamne. Ange gum dinin, sun dumsisipu kunkamenga deiki di, gam pio kunkamenge.

23 Tonda, er mali kecapu kuramyanen depre ngebo tep, ne Allahdi kange derinun do? Gume, mali kunge nesala depmengopda, ne kange men derinune. Angeda, ‘Uo sun bicaue,’ tenenune. Gume, nedi tenenunada ake. ‘Sun mali kunge nesala yumadi, sun mali keca tapmengedi, pio dumsisipu kupmengopda, gam kunkamenge,’ tenenune. Neda Allah Yahweh, akeca-keca yuma talepra, pio puto weik deiyo ngebo kununa cadi, nedi, ‘Ukupkamne,’ tenenetopu kununa cadi, ne pene upuda, nong tek sisi kurure. Neda, Ila Eremna Ngebodi pepsene.

24 Dinino, nimi ton telep kun kecapu kupbaramyane, amenda taru ange yuma tapra, malipu kupyopda, erda gam pio kunkamre do? Gume, erdi dumsisi kecapu kuramre dinin, ange yuma tapredi, erda pio mali-malipu kunge nesala kuramengtopu, pio kupbaryopda, tek sisi gam kunkamre do? Gume, erda gam men kunkamre. Telep kuramre dinin, ka di tamupra, mali kun kecapu gonga kepredi, tapakrap weika di mali kupbare pangeda, men di telep kuramu kecada, tupa men tenenkamne. Ange gum dinin, mali-mali kun keca yala-yala weik kupbankamre keca tep, wenepra popkamne. Ange utopu angebodi, ne tep, ‘Uo, ne nai bo, kan amutarapu pio kunkamkene,’ pepneu dinin, amenda taru tamkamnerenge tep, wenepra popnepa, depkamre.

25 Ange-ange yumada, lap pepmasenpa, sundi ne tep, ‘Uo, Allahda, akeca-keca yuma taleredi, pio puto weik deiyo ngebo kurura cadi, er dipapu kusere keca cap, upu bongdiserur keca capda, dumsisi men kurure. Atep nengeda, nun songe,’ penerume. Ukupra penerum dinin, sun Israel yala nesala tep nedi pepsene. Neda, mali kun keca tenpu peda men kunune. Dumsisipu kunune. Atep mali kurumu nesalada, sun ca! Uo, sun Israel nesalada, yuk neng tep, dumsisi kupra upu men bongdirume. 26 Arup taru di konum pepmasentopu, nimi ton telep kupra kurur ngebo dinin, ange tapra, ka di tamupra mali kun kecapu talepra kuryopda, adeiki di depkamre. Ada mesum tep gume. Deiyoda, tupa mali kun kecapu kurura cadi, adipapu depkamre, pepsene.

27 Dinino, nimi ton mali kuramre dinin, ange tapra ka di tamupra, ‘Uo, ne mali kununada tapnepa, Allahdi lyepnetue’ tenen, er mali kun keca tapra, teka tenepredi, dumsisipu kure pangeda, er nong neitamai kure sambalada, ne mawa keca dopropkamna tep, telep kupra pio gampu kunkamre. 28 Ada mesum tep men pepsene. Deiyoda, er mali kuramre keca yuma tapredi, teka tenepneryopda, yuk taru peda, pio dumsisipu kunkamra cadi, angebo men depkamre. Er mali kun keca tapra, telep kun kecapu kunkamra deiki di, gam pio kunkamre.

29 Ange yumada, nedi sun Israel nesala tep lap pesenun dinin, sun Israel yala nesaladi, ne tep upenerume. ‘Uo, Allahda, akeca-keca yuma taleredi, ila puto weik deiyo ngebo kurur dinin, erdi peserur upu cap, upu bongdiserur keca capda, nun songe. Angeda, dumsisi kuna gume tenenupe,’ pepra, mali penerume. Upenerum dinin, nedi pepsene. Neda, mali kun keca tenpunge peda men kunune. Pio dumsisipu kunune. Mali kurumu nesalada, sun ca! Uo, sun Israel nesalada, yuk neng tep, dumsisi kupra upu men bongdirume.

30 Ange tep nengeda, ne Allah ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu deiyonge jenek kupra sekmupu.} Yahweh, akeca yuma talepra, pio puto weik deiyo ngebo kunune. Neda Ila Eremna Ngebodi, ‘Ukupkamne,’ tenenetopu kununa cadi, nedi pepsene. Uo, sun Israel yala nesala yuma tep, nedi upu bokeipnedi wenepkamsene. Nedi dipterepsenedi, sun mali kuramrum keca akapseretopu wenepkamsene. Dumsisipu kuramrum keca akapseretopu, telep kupra deipkamsene. Ware ngebo, ware ner do yuma, sun kuramrumtopu, upu bokeipkamsene. Sunda, ‘Uo nun mali kunup keca tep wenepseredi, popserur’ tenen, sun mali kurumu keca yumada, taprumdi amnyo karekra yuk telep bisipu bankamrume. Ukupmanto ngeda, gel yan giso dukredi popserepa, kot sakamengtopu, sun mali kurum keca kunumna tep, ‘Wenepra popsenun’ tenen, pepsene.

31 Atep nengeda, uo sun Israel yala nesalao. Sun mali kumum keca yuma tapmumdi, ‘Allahdi nun kange cap, dipru cap, ukupunge karepsetue’ tenen, ne tepapu moronkamnerume. Ukupra mororamnemumpane, ukupu kange cap, dipru cap, punupra karepsenyopda, gam pio kutume. Gum dingeda, ware keca deiyo tep, ‘Dakwapye, nun dena peda telepe pua,’ tenerum do? Sun Israel yala nesala, denada, ne dabale pepsene.

32 Aupu pepmasenada, mesum tep gume. Neda, Allah Yahweh, akeca-keca yuma tenenetopu kunune. Neda ila eremna cap, puto weik cap ngebo kunedi, ‘Ukupkamne,’ tenenetopu kununa cadi, nedi pepsene. Ware ngebo, ware ner do? Tuai mutu nesala mali kumengepane, wenepra popnepa, depmengopda, ange tep ne kange men derinune. ‘Angeda, ne dabale,’ tenenune. Telep ngeda, tuai nesala yumadi, sun mali kunge keca taptengedi, dumsisipu kupra kutengopda, gam pio kunkamtenge. Ange utopu, sun Israel nesala peda, sun mali kumum keca tapmumdi, dumsisipu kupmumnyopda, men depkamrume. Gam pio kunkamrume. Neda Allah Yahweh akeca-keca talepra, im deiki tara erepra, pio puto weik deiyo ngebo kunedi, aupu pepra deipsene.