Eze 19 | XteSC | STEP | Allah Yahwehdi ne Yeheskiel tep upepneu. Kanda Yeheskiel, Israel mutu nimi deiyo neng butene depreia tep, ange tenepmemdi engena deiki di apepkuken mut sekmemdi penkamrume.

Ezekiel 19

Nimi depmengepa, mambul kange doupra engena deiki di, mut penkamenge tep, lap pepu upu

1 Allah Yahwehdi ne Yeheskiel tep upepneu. Kanda Yeheskiel, Israel mutu nimi deiyo neng butene depreia tep, ange tenepmemdi engena deiki di apepkuken mut ^{▼▼mut – Pumun taruda, sun Israel nesaladi, nimi deami taruda, sun kayapu nengdi, ‘Uo’ tenen, mambul kange doamidi, ‘Aneng tupa tenenkamep’ tenen, mut sekidi, sun deami neng tep tupa teneramidi, engena deiki di amut perami.} sekmemdi penkamrume. 2 Ada, amut deiki di aupu penkamrume.

Uo ukupmantoda, sun Israel nesalao, sun apu ner, erda, pio telepe kuramu. Yuk nerapu yumada, yambul telep dinin, sun apu nerda pio telep ner kuramu. Ukupmantoda, bura tara gam kuramre yu pus, er si singa pus, ^{▼▼singa pus – Yeheskieldi, aupuda, ukupmanto upu, tonda domon upu utopunge tep pepra seku. Pumun taruda, sun Israel nesaladi, sun ila nimi deiyo neng tenena tep, domon upu deiki di, ‘Singa pus’ perami. Deiyoda, singa pusda, sun puto weik kuna cap, sun urasin telep kuna cap, tonda yuk gam kuna keca adipapu popra jeramya tep, Israel nengdi, sun puto weik kurami deiyo neng, Raja neng tep, ‘Sunda singa pus utopu kununge,’ pepra, gispal dorami. Atep nengeda, apasal neitamaida, ayat 1 sampai ayat 9 neitamaida, domon upu deiki di, nabi Yeheskieldi, ‘singa pus,’ pepra seku ngeda, ada Israel mutu taleami deiyo neng, sun Raja-Raja neng tep tenepudi, ‘Singa pus’ pepra seku. ARaja ngeboda, nun ataru kunup nengdi, yambulanun walwal kunup dinin, ada ‘Yeheskiel kuramu taru Israel mutu taleramu ngebo, Raja Zedekia tep aupu pepu do? Agum dingeda, Babel nengdi dubenami Raja ngebo, er si Raja Yehoiakin tep pepu do?’ tenenupe.} er nyapu telep kupra peiramretopu, kuramu. Tonda, asinga ner pusda, yuk singa pus weike damapmana neitamai maramu. Tonda, erdi deiamum metek nyapu singa pusda, pio yambul kabernge dinin, utopu yuk singa nyapu kunmana kan-kan neitamai di, er nyapu peiramupa, telep kupra neramidi, nong weik kupi.

3 Asinga pus, er mi tenpu ngeda, pio tupa moupra jen kareamudi peiramupa, nepudi, ukupu kabernge kuramudi, puto weik kupka cadi, erdi yuk bura gam kuramu keca ton popra jena kael keamu. Kael keamudi, er nin wisinge kuramutopu, er peda, ange yuma kael kepra kuramudi, telep kupu. Tali bura tara kuramu gam keca ton popra men jeramu. Angepu gum dinin, tonda er dipapu, nimi peda popra jeramu. 4 Ukupra kuramnga cadi, er kuramu mutu dana-dana tara kurami nesaladi, er akuramunge konum gekepra kael kepi dingeda, amutu-amutu nesala yumadi, “Uo, atara mutu neitamai kupe nesala yumada, ‘Erdi yawa popserur’ tenen, “Nun yumadi, er tomona tep bulupkamepe,” pepi. Upeprapidi, er tomona tep, tu pum bon ton palipra keteneipya cadi, er mankau kange doupra embanmaudi, atu pumbon saku pangeda, sundi er tep tomopi. Konum tomopi dingeda, akaber singa pus, adipapu tapu deiki di er nong getepra talepidi, ateng koupidi, ‘Sepdaro berur’ tenen, er nong tu neitamaida, takke keca dongopidi, tapu cap, atalen keca capda, tupa ataleputopu doupra, Israel tara di tapra, Mesir mutu dubenamidi, acapu deiptapi.

5 Asinga ner pus, akabernge er nindi, ‘Uo, ne mida dan taru di Mesir mutu tapra tamupra nun mutu sisa tamupra yankamre do?’ tenen, dinapu kuramupanen, siriyada, tamupra men yau taruda, er nindi, ‘Uo, ne mida, konum gum kupneu adano. Tamupra men yanmanto kurure,’ tenepudi, er teneramu ngeda, konum wangapudi gum kupu. Ukupupa, er dipru buluksakupa, mali kange dopra kuramu. Mali kange doupra kuramu dinin, er aner singa pusdi, erdi deiamu singa pus ton, ‘Yuknge singa mi ton puto di neptudi, er ton kael kepkamre’ tenen, ami ton dopra telep kupra peiramupa, er peda, puto kabernge ton nepudi telep kuramu. 6 Asinga mi ton konum neramudi, konum wisi deipkopda, er kayapu neng, yuk-yuk singa cap kikiman wisipi. Wisipkopda, puto konum kurami taruda, sun jen keca tep, yuk tali gam kuramu keca, bura kikiman epra jepembaramidi, tonda angepu gum dinin, aputo weik kaber ngeda, nimi peda popra jeproamu.

7 Uda, ila puto jem singa pusda, yu kupupa, upu ila di penmaua ngeda, atara neitamai kurami nesala yumada, gekeprapidi, kware weik kurami. Ada tali tep guma. Asinga pusdi, amutu-amutu neitamai yumada, nimidi domi puto gel ati arumda, er si benteng-benteng dominge yumada, animi deiyo ngebodi, adipapu sun gel di doami ati uruptapudi, ila ati arum konum uruptapupa, amutu-amutu dana-dana tara, yambul ati arum neitamai kurami nesala peda, ‘Uo’ tenen, kange mun kange doupra kuramipa, angebodi, sun yambul ati arum peda, yawa poptapra uruptapnapu kuramudi, sikke buktamamu. Ange tep nengeda, atara mutu neitamai kurami nesala yumada, kware weik kupupa, sun yo moropsemamu.

8 Asing pusda, yu weik kupupa, mali weik kuramnga cadi, amutu neitamai ongopra kurami mutu neng, dana-dana tara kurami nesala yumadi, ayu singa pus utopu kuramu nimi deiyo ngebo tep, warekra tomopi. Ada amutu-amutu nesala yumadi, ayu singa pus utopu kuramu ngeboda, tomona tep keca, lyom tapu dokoteprapidi wareki. Ukupi dingeda, mekina tomona tep keca, er si jaring pio lyom tapu dokoteprapidi, adipapu atapu dokotepra, adipapu akaber singa pus konum tu pumbon tomopi. 9 Konum tomopya cadi, ange yuma konum kupi dingeda adipapu er dopra singa dongomyai pumbon dokotepi dingeda, adipapu doupra Babel mutu dubeidi, Babel mutu talepra nimi deiyo ngebo Raja damai dubena deipi. Abena dopra deipidi, sundi, ‘Gume, er upu penkamre ngeda, puto di kalengami. Ukuraminge deiyoda ake. Ada, ‘Angebo er upu pena ngeda, dakunge nesala gekepmengedi, ‘E, ada tek sisi upupu penmare, tenepnung’ tenen, wenemna ati pumbonpu angebo ateng koupra dongopi. Ukupya tep nengeda, sun Israel mutu neitamai buku ila mutu buma-buma yuma deikida, Israel tara nesaladi, er upu ton pio men gekerami. Allahdi peipupa, Yeheskieldi seku.

10 Allahdi ange konum pepkopda, aupu ton dukdongopra pepu.

Uda ukutaruda, yuk domon upu deiki di pepkusene. Ada ake. Sun Israel nesala, sun apu nerda, anggur tapu ^{▼▼anggur tapu – Aupuda, ukupmanto upu, tonda domon upu utopunge tep pepra seku. Pumun taruda, sun Israel nesaladi, sun ila nimi deiyo neng, Raja-Raja neng tenena tep, domon upu deiki di, ‘Anggur tapu’ perami. Ada, anggur tapuda, sun menmena di neramrenge cap, lyoma di neramunge cap, du weika di deriramrenge cap tep, sun puto weik kurami deiyo neng, Raja-Raja neng tep, ‘Sunda anggur tapu utopu kununge,’ pepra, gispal dorami. Atep nengeda, apasal neitamaida, ayat 10 sampai 14 neitamai di, Allahdi peipupa, nabi Yeheskieldi, ‘anggur tapu’ seku ngeda, ada Israel mutu taleami deiyo neng, sun Raja-Raja neng tep tenepka cadi, Allahda, domon upu deiki di, ‘Anggur tapu,’ peipu ngeda, ada Israel tara Raja-Raja neng tep upeipupa, Yeheskieldi, angepu seku.} kuramretopu kuramu. Ada, yambulanunpu neramu dinin, nimidi, ‘Anggur tapu palipmepedi, ange dubena yuk telepaipu koupkamepe’ tenen, atapu palipidi, dubena yambul me bungna bukra embaramngai pirman, yambul wa ton pepya neitamai di koupipa tengamu. Uda, atapuda, ame damai koupya tep nengeda, anggur tapu coda pio telep kupra neramudi, teru kwakudi, anggur tapu du pio mounapu kuramu. Ukupra pio telep mouramnga deiyoda, ame akupka deiki di du telep kupra mouramu. Ukuramupa, er teru cap, du capda, pio weika di yamupra kareramu.

11 Anggur tapu coda, telep kupra neramudi, er teru tenpu ngeda, pio lyom cap, puto weik cap kwamu. Ukupka cadi, ateruda bouna di copmanto men kwamu. Ukupra kuramnga tep, aco teruda, pio ila nimi deiyo ngebo, Raja dipapu, ‘Neda amutu yuma talenuna cadi, aco teru gatnge dopropnedi, ne telep maca ^{▼▼maca – Pumun taruda, Israel mutu neitamai kurami nimi deiyo neng yumada, sun puto petenkemna tep, pio telep maca ton talerami. Akuraminge deiyoda, ake. Ada, ‘Yuk nengdi amaca epmengedi, ‘E, angeboda, tek sisi pio ila nimi deiyo ngebo kurure,’ tenepmengedi, kael kepkamnenge’ tenen, sun puto peten kemna tep (tanda keRajaan), telep maca ketenepra talerami.} tep keteneipkamnenge,’ tenepudi dopropu. Anggur co teru tenpu nepra lyoma di tekamngada, pio lyom weik cap, yambul teru ton weik cap pangamupa, akwamunge katuai kupka cadi, amutu nesala yumadi dirami. 12 Animi deiyo ngebodi, er mambul maca dopra kuramu dinino, ange anggur tapu yumada, Allah er yu weik kupupa, er dipapu ange anggur tapu taleprapudi, tu pumbon di anggur tapu cap, er yaten cap kweneprapudi, erepra tu deiki siptapu. Tu deiki siptapudi dokotepupa, ataruda ila bupu kumanya, keteng yakan tara di pung pepupanen, ukupka deiki di anggur tapu co deiyo cap, er du pio telepnge yuma capda, kolupupa, tu saku. Ukupu taruda, anggur tapu co er teru yuma cap, er du cap yumada koloptapu. Ukupu pangeda, anggur tapu co cap, du capda kolupu ngeda, uku di yana jepropupa gawal daku. Allahdi Yeheskiel tep pepu.

13 Upepupa, Yeheskieldi dukdongopra sun Israel nesala tep pepu.

Ukutaru peda, ange utopu, tonda ange anggur tapu ^{▼▼anggur tapu – Aupu pepu ngeda, domon upu cadi, aupu deiyoda, ada sun Israel nesala cap, sun nimi deiyo-deiyo neng cap, tenena tep pepu.} coda, kange di ton cap konum kweneprapudi, me pio men embarurai, acada padan gurun ^{▼▼padan gurun – ‘Padan gurun’ pepu ngeda, ada nimi cap, me cap pio men kururai tep penunge. Dinino, aupu pepu ngeda, domon upu cadi, aupu ‘padan gurun’ pepunge nong neitamai deiyoda, ada Babel mutu nengdi sun Israel nesala tep, poprapidi, ateng koupra sun pe mutu, Babel mutu tamupra dubenamipa, ikin dipapu dakuramya tep pepu. Tonda, ‘me putanapu kununge’ pepkada, ada Israel nesaladi, ‘Uo, Allahdi kange di telep deipsetupa, teleppu kutepe’ tenen, putanapu kuramya tep pepu.} neitamaipu konum koupdongopupa, akurure. Ada gel wenenga pasir cap, tonda tu pio kalkal peramngai ton Allahdi atapu konum kouamu. Amutu neitamaida, nimi yumadi pio me putanapu kununge. 14 Tonda, uku di anggur tapu jeramu taruda, anggur tapu co gutam di gonga keap, ukudi jepra embaramudi lulangamu. Ukuramu taruda, anggur tapu deiyo cap, gutam cap, teru cap, er du yuma cap yumada, uku di jepra gawal daku. Ukupka tep nengeda, ukutaruda, sun nimi deiyo nengdi, telep maca ton men ketenepra taleptenge. Ada, telep gat co di maca keteneiptengepa, Raja taleptupa, nimi epmengedi, ‘E, er aRaja ngeboda, ila pala mutu talerura cadi, er keRajaan talepra kurur nge peten kemna tep, amaca dopmar adano,’ men peptenge. Deiyo nengdi sun maca doupra embana tep maca ton men ketenepmanto kununge.

Ange tep nengeda, apepmasen upu yumada, amutu neitamai kurum Israel nesala yumadi, nimi depmenge taru engeramrumtopu, ukutaru peda, engena cap, kange mun kange doupra kuna cap deiki di, kange mun mut pio tupa-tupa penkamrume.

Yeheskieldi sun Israel nesala tep pepu.