Eze 2 | XteSC | STEP | Allah er upu lap pena ngebo, nabi Yeheskieldi pepu. Allahdi ne Yeheskiel tep upepneu. “Uo kanda nimidi deipkei ngebo cadi, kanda teka gekemempa, nedi kan tep upu pedinkukene,” pepneu.

Ezekiel 2

Allahdi, ‘Angebo Yeheskielda, ne upu lap perbenkamre’ tenen, upupu upu

1 Allah er upu lap pena ngebo, nabi Yeheskieldi pepu. Allahdi ne Yeheskiel tep upepneu. “Uo kanda nimidi deipkei ngebo cadi, kanda teka gekemempa, nedi kan tep upu pedinkukene,” pepneu. 2 Uda Allahdi ne tep upu gonga kepra penmaneu taru dipapu, Allahdi er Lek Sambala karepneupa, ne dipru neitamai yana wekneudi, tekeipneu. Ukupneu taruda, Allahdi upu ton pepneupa, gekepsi ngeda, ake.

3 Kanda nimidi deipkei ngebo cadi, nedi wepra deipkenada, tali tep gume. Israel nesala yumadi ne upu yaniptapra balila kuramidi, mali weik kunge nesala tep, ‘Sun kan-kan kumemdi, ne upu dopra, sun tep penkamrum’ tenen, wepra deipkene. Tonda pumun taru di dipra, ataru yuma peda, sun apu yapudi, ne upu yaniptapra mali kupyakaramitopu, ataru kunge Israel nesala peda, angetopu tupa kunmange. Nedi pedisene upu yaniptapra kununge.

4 Tonda, dadeipdanen yakarami nesala, ukutaru kunge Israel nesala yumada, giso gat kupra kunung nesala cadi, ne tep si erepra gispal men donkamnenge. Atep, kandi ne pedikene upu douprapmemdi, anesala tep upenkamrume.

Allah ^{▼▼Allah – Acada, Ibrani upu di, Allah er si tep, ‘Yahweh Adonay’ pepra sekya cadi, nundi aupu ‘Adonay’ deiyo ngeda, jenek kupra sekmupu.} er si Yahweh, akeca-keca yuma taleredi, ila puto weik deiyo ngebo kurure. Erdi pesere upuda ake. Allahdi teneretopu, akeca-keca yuma talepra pel dorure. Allah Yahwehdi ^{▼▼Yahweh – Allah er pe si, tek sisi ngeda, ‘Yahweh’ kurure (Keluaran 3:14). Ibrani upu deiki di, asi er deiyoda, ‘Ne pio akunune,’ kurure. Ada, akeca-keca yuma kapul men ketekeipra deiamu taruda, Allah konum akuramu. Allahda, ataru pe kurure, tonda, ataru di dipra, pio dorkunkamre taru peda, Allah pio akurure, tonda apio kunkamra cadi, er si deiyoda akururtopu, nundi sekmupu. Tonda, akayat neitamaida, ‘Adonay’ ton pepra seki. Aupu ‘Adonay’ deiyo ngeda, ‘Akeca-keca yuma taleredi, ila puto weik deiyo ngebo kurura cadi, er teneretopu kurure’ tenen, seki. Atep nengeda, sun kael kemna tep, aupu deiyo ngepu katuai di sekmepu. Indonesia upu Allah upu buku neitamaida, ‘TUHAN Mahatinggi’ tonda, ‘Allah yang Mahakuasa’ pepra sengunge. Ange peda telep dinin, sun kael kemna tep, nundi aupu deiyongeda, konum katuai di sekmupu.} wepra deipkeua tep, ‘Er upu pepkusene,’ pepra, peterep embankamrume.

5 Kanda lumdongona gume. Sun Israel nesala yumada, dipru gat kununga cadi, ne upu yanitamnapu kunenunge. Atep nengeda, kandi peterep baramempane, sundi gekenkamkeng taru pe, kan upu men gekenkamkeng taru peda utopu, nedi melimkenedi, mambul pel donkamna deiki di, sun kael kemkamenge. ‘Uo, tek sisi, Allah er upu lap pena deiyo ngebo, nun kan-kanpu kuredi, Allah er upupu peserure’ tenen, kael kepkamkeng ja.

6 Upepra penkamrum dinin, men gekepkengedi, balila kupmengopda, kanda nimidi deipkei ngebopu kurema cadi, sun tep eprapmemdi, kware dangna gume. Kan upu gekepra tapkenga pe, sundi kan tep, ‘Kanda nun songe,’ pepra, mali upu penkamkenga peda, kwar dangna gume. Kan upuda bisinkamkeng nesala kununga tepa. Atep sun anesala kuramenga kan-kan, tali kange doupra, ne pelpu donkamrume. Ukupmanto ngeda, nimida sun kunge mutuda, takke keca cap, nimi si toramre po cap, nimi pon keca cap, weike akurura kan-kan kunge taruda, kware dangamengtopu, kanda ange men kunkamrume. Anesala cap, ikin keca kan nong deiki derinkamkeng keca cap tep, kware kuna gume. Balila deipra, kwar dangna gum dipapu kunkamrume. Lumdongona gume, sun Israel yala nesalada, upu bisipdanen yakan nesala kununga tep pepkene.

7 Atep nengeda, nedi pepra deipkuken upuda, Israel nesala kan-kan balila deipra, tali lupra peterepmempane, anengdi gekengkamkeng taru pe, men gekengkamkeng taru peda, ne upu peteremnapu kunkamrume. Anesalada, dipru gat kungedi, balila kapra, ne upu men gekepmanto nesala kununga tep, kandi penkamrum upuda, men gekenkamkenge, pepkene. Angeda lumdongona gume. Allahdi ne Yeheskiel tep pepneu.

8 Upepudi, aupu ton dukdongopra pepu. “Uo, nimidi deipkei ngebo Yeheskiel kanda, ne Allahdi pepken upu moupra gekepneo. Israel nesaladi, sun dipru erepra balila kungetopu, kanda pio men kunkamrume. Giso gat kuna meme. Nimidi sun nyapu jen keca karepkunge taruda, kange deipmengedi, menmena di nyape si akrap jeramengetopu, kunkamrume. Ada, nedi ne upu pepkenyopda, ne pepkene upu yuma adipapu gekepra, kange deipmemdi aupu dopropkamrume. Tenpunge peda, men tamkamrume.” Allahdi ne Yeheskiel tep pepneu.

9 Upepneu taru dipapu, nedi dinmasipa, buru ton ne damai tara dokotepmau. Aburu pumbonda, metek buku utopu keca geteramenge ngeda, er sida galungan ^{▼▼gulungan – Pumun taruda, surat cap, buku cap sengami ngeda, ataru sengnup buku kamo utopu gume. Gambar tep, Yesaya 29:18 dinkurume.} 10 Uda abuku utopu keca, getepmau ngeda, ne damai konum deipmaupa, nedi dinmasipa dan tara, dan tara yuma, urasin tara cap, iriamu tara cap, seknapu kupu. Asengna keca deiki sekamu upuda, ikin kupkamre keca upu cap, mambul kange doupra perameng upu cap, kange mun kange doupra engerameng upu cap, sekrap deiamu ngeda, katuai kunmaupa epsi.