Eze 20 | XteSC | STEP | Keteng tamun yoneitam baringe dinin, ware pamubaringe konum kupu pangeda, tanggal sepulu deiki di, ataru dipapu Israel nesala sun nimi deiyo talepra kurami neng ton bokra, ne Yehekiel damai yana upu pepnei. Deiyoda, sundi, “Nun kabo, Allah Yahwehdi ware upu pepkuser do? Kandi lap peipsetume,” pepra, ne damai yana morona tep yai.

Ezekiel 20

Mesir mutu neitamai di mali kuraminge tep, pepu upu

1 Keteng tamun yoneitam baringe ^{▼▼yoneitam baringe – Ada, sun Babel mutu jen talena nengdi, Yerusalem mutu nesala konum popidi, Raja Yehoakin cap, Yeheskiel cap, yuk deiyo neng weika di tapakra, ateng koupdongopidi, Babel mutu dubena deipipa, ataru di nukra keteng tamun yoneitam bari konum kupupa, Allahdi Yeheskiel tep aupu pepu.} dinin, ware pamubaringe konum kupu pangeda, tanggal sepulu deiki di, ataru dipapu Israel nesala sun nimi deiyo talepra kurami neng ton bokra, ne Yehekiel damai yana upu pepnei. Deiyoda, sundi, “Nun kabo, Allah Yahwehdi ware upu pepkuser do? Kandi lap peipsetume,” pepra, ne damai yana morona tep yai. 2 Sunda ne damai konum bungyai pangeda, Allah Yahwehdi upepneupa, ne adipapu gekenmasi. Allahdi peipneu upuda ake.

3 “Kan Yehezkielda, nimi sisa dipapu deipkeipa kurum ngebo, kandi sun Israel yala nesala, sun nimi deiyo-deiyo neng tep, aupu pepra deipkurume. Ada, neda Allah Yahweh, akeca-keca yuma talepra, deiki tara erepra ila puto kure ngebodi pepsene. Sunda ware keca deiyo tep, ayana upu pepra moropmarum do? Sunda tali lupra ne damai yana, ‘Allah tep moropkupe’ tenen, yanmarum do? Gume, neda Allah, pio gampu kunun ngebodi, tek sisi pepsene. Sun yana moropmanerum upuda, gekepsenedi, pio men pepra deipkamasene! Neda Allah Yahweh, akeca-keca yuma talepra, deiki tara erepra ila puto kure ngebodi konum pepsena cadi, pio tek sisi pepne.

4 Atep, Yeheskiel kanda, nimi sisa dipapu deipkei ngebo, kan dipapu, sun mali-mali weik kuraminge tep, wenemna upu pepmemdi, ‘Allahda ila di wenepra popkamser ja!’ pepra, sun tep lap peipkurume. Ada, pumun taru nedi, ‘Angeda pio men kunkamrume. Akun kecada, pio meme,’ pepra deipsi dinin, Israel nesala yuma, sun apuyapu sisadi, akecapu pio mali-malipu kurami kecada, kandi ton cap tamakrapmemdi, sun gekena tep, moupra lap pepra deipkurume. 5 Tonda, upepkurume. Sun nai bo Allah Yahweh, akeca-keca yuma talepra, deiki tara erepra, ila puto kure ngebodi konum peipser upuda ake.

Ada, pumun taruda, nedi sun Israel nesala yuma tep, ‘Sunda ne mawa nesala kunkamrume’ tenen, wepra dopropsisidi, sun tep erepra deipsidi, tek sisi pedina upu deiki di, sun apu yapu neng tep upepsi. Ada, sun apu bo Yakupdi deiamupa, dadeipdanen yakarami nesalada, Mesir mutu neitamai ikin pio weik kuramupa kurami taruda, nedi sun kael kemna tep, pepsisi. Ada, ‘Neda Allah, ne si sisada, Yahweh ^{▼▼Yahweh – Aupu kael kemna tep, Keluaran pasal 3-4, 20; tonda Ulangan 5 deiki di epkurume.} kunune. Sunda ne mawa nesala kunkamruma cadi, neda sun nai bo Allah kunkamsene,’ pepra, pedina upu deiki di jenek kupra pepsisi. Cadi, nedi sun Israel nesala tepapu pepsi ngeda, ‘Tek sisi neda sun nai bo Allah Yahweh kunune,’ pepsi.

6 Ataru adipapu nedi pedina upu deiki di konuma pepra deipsi. Ada, ‘Mesir mutu neitamai ikin weik kuramrumpanen, doupra nedi tenemsidi, keteneamsisi mutu neitamai dubesenedi, amutu karepkamsene. Amutu neitamaida, ware keca do yuma, pio telep keca yala-yala yuma akapmar mutu kurura cadi, pio telep isomka mutu kurure. Yuk-yuk mutu yumada, yambul telep kurur dinin, amutuda, pio ila telep mutu kurure. Sun dorona tep, amutu konum wepra keteneiamsisa cadi, amutu karepkamsene,’ pepsi. 7 Tonda, aupu ton pepsi. “Atep nengeda, sun Israel nesala yuma, sundi tali isok si eremumdi, akeca tep, kange deiprumudi, si eremrum patung-patung yumada, dopra doptapkamrume. Akeca yuma tep nengeda, pio mem keca cadi, akecada ne pio dabale, ne pio songe. Moupra tenipetepso! Sun Mesir mutu kunge nesaladi, tali keca, isok-isok si eremenge keca, sun ton melipra erepmumnyopda, ne damai ton pio men yana moropnetume! Tonda, nedi sun tep men melipkamsene. Neda sun deiyo ngebo Allah kunedi pepsene.”

8 Aupu yuma puto di pepsi dinino, sundi ne pepsi upu gekena pio gum di, ‘Allahdi pesere upu men kupkamepe’ tenen, ne tep tamamneie. Ukupne dingeda, sun kankan neitamai di, tenpu ngebo peda, sundi si eremami isok si patung-patung tep, pio mali kurami ngeda, men tapi. Tonda, sundi ‘Aisok si eremkamep’ tenen, kange deipra dirami patung-patung keca yuma peda, pio men tami. Sundi Mesir mutu neitamai kurami taru di, isok si eremami keca, er si berhala-hala yumada men tami. Atali keca men tamamya tep, nedi, ‘Uda, sun tupa Mesir mutu neitamai tupa kunmang taruda, nedi sun Israel yala nesala wenepra, pio ikin keca sun nong deiki deipkamne. Sun mali kunge keca tep, ne ila yu kunere ngeda, sun nong deiki deinedi, sun tep ila di wenepkamne,’ tenemsidi keteneamsi.

9 Dinino, ange yumada men kupsidi tapsi. Tapsinge deiyoda ake. Ada, ‘Gume, ne mawa nesala tep, ila yu di wenepnyopda, sun amutu neitamai kunge nesala cap, amutu dana-dana kunge nesala yuma cap, ange epmengedi, ne si mali-mali pepnengedi, nalemkamneng’ tenen tamsi. Mesir mutu nesala cap, amutu dana-dana tara kurami nesala capda, nedi ne mawa nesala, Israel nesala loptapsidi, Mesir mutu neitamai di doupra, dubenamsidi, telep kupra lyepra deipsi ngeda, epya deiki di, ‘Uo, Allada tek sisi ila mambul ngebo kurure’ tenemidi, ne tep kael keamnei. 10 ‘Ne tep kael kepnetenge’ tenen, sun Israel nesala lyepropsidi, Mesir mutu neitamai di doupra, nimi cap, me cap gumai, ila katawai ban mutu, er si padang pasir katuai mutu dubenamsi. 11 Israel nesala doupra, padang pasir neitamai derirbesi dingeda, ne dipapu sun tep, “Angeda kunkamrume, angeda pio men kunkamrume,” pepra, deipsidi upu karepsi. Tonda ange utopu, nedi, ‘Sunda ukupkurume, ukupkurume. Ange talepra kupmumnyopda, nedi melipsenepa, telep kupra tupa gam kunkamrume,’ pepra, deipsidi, upu ton jenek kupra pepsi.

12 Angepu gum dinin, tonda, sun kael kemna tep nengeda, sun Sabat tumi ton wepra karepsi. Ada, ‘Allah er dipapu, nun mali kun keca gum kupra deipseredi, pio telep kudinkamsere’ tenen, ‘Kael kemkamnunga’ tenena tep, ila mambul tumi, pel dona gum dipapu, beipye peikra, ne si eremna tumi, atumi si, Sabat tumi karepsi. Ada, pio ila mambul tumi, ‘Sabat tumida, mouprapmumdi angeda ne Yahwehdi, sun mali kunange daepnedi, sun telep kudina tep, sun petenkemna taru tepa’ tenen, “Sabat tumi moupra tenenkamrume,” pepra deipsi.

13 Ange-ange yuma upepra deipsi dinino, sun Israel nesala yumadi, aila katawai mutu padang pasir mutu neitamai di embarami taru yumada, ‘Allah pesere upu nun songe,’ teneramidi, ne upu moupra gekena gum di, yanitamnapu kurami. Tonda nedi, “Angeda kuna telepnge, angeda kuna mem nge,” pepra deipsi upu yumada, “Sun yumadi, aupu moupra taleprumudi, moupra teneprumnya deiki di, sun pio gam tupa kunkamrume,’ pepra deiamsi upu yumada, tapnapu kurami. Tonda, nedi, “Amambul tumi, Sabat tumi neitamaida, tali pel dona gum dipapu, beipye peikra ne sipu eremkamnerume,” pepra deipsi tumi tep nengeda, ‘Angeda mambul weik,’ tenena gum dipapu, atumi neitamai di mali-mali pio weik kuramidi, mali kudirami. Mali weik kuramya tep nengeda, nedi, ‘Uda konuma, akatuai mutu neitamai dipu, sun mali kunange tep, ila yu kunere ngeda, sun nong deiki deipnedi, sun tep ila di wenepra poptapnedi, gawal dakamne,’ tenemsidi konum ketenepsi.

14 Utenepra ketenepsi dinino, atenepsinge yumada, men kupsidi, tapsi. Ada, ‘Ne si mali kupra deipdanun’ tenen, yapsi. Ange yuma tapsi deiyoda ake. Ada, ‘Gume, ne mawa nesala tep, ila yu di wenepnyopda, sun Mesir mutu neitamai kikiman kunge nesala cap, amutu dana-dana kunge nesala yuma cap, ange epmengedi, ne si mali-mali pepnengedi, nalemkamneng’ tenen, tamsi. Mesir mutu nesala cap, amutu dana-dana tara kurami nesala capda, nedi ne mawa nesala, Israel nesala loptapnedi, Mesir mutu neitamai di doupra, dubenedi, telep kupra lyepra deipkamne ngeda, epmenga deiki di, ‘Uo, Allada tek sisi ila mambul ngebo kurure’ tenepmengedi, ne tep kael kepkamneng’ tenen, tapsi.

15 Tonda, ake. Akatuai mutu padang pasir neitamai embarami taru neitamai peda, nedi sun Israel nesala tep, aupu ton pepsi. Ada, “Gume, sun Israel nesalada, ‘Mesir mutu neitamai di doupra besenedi, pio telep mutu dubena karepkamsene,’ pepra pedina upu di peipsisi dinino, ukutaruda amutu dubena men karepkamsene. Sun pio telep kuna tep, amutu ketenepra deiamsi mutu tu damaida, karepsenepa men wekra kunkamrume. Aketenepra deiamsisi mutu neitamada, telep keca yala-yala yuma weik akapmara cadi, amutuda tek sisi isomka kun mutu kurura cadi pio telep mutu kurure. Yuk-yuk mutu yumada, yambul telep dinin, amutu ban-ban yumada pio ila telep mutu kurure.

16 Nedi, “Apio telep mutu men wekamrume,” pepsa deiyoda ake. Ada, sun Israel nesala yumadi, ‘Allah pesere upu nun songe,’ teneramidi, ne upu moupra gekena gum di, yanitamnapu kuramnei. Tonda nedi, “Ange kunada telepnge, ange kunada pio memnge,” peramsi ngeda, tonda, “Sun yumadi, aupu moupra taleprumudi, moupra teneprumnya deiki di, sun pio gam tupa kunkamrume,” pepra deiamsi upu yumada, tamnapu kurami. Tonda, nedi, “Amambul tumi, Sabat tumi neitamaida, tali pel dona gum dipapu, beipye peikra ne sipu eremkamnerume,” pepra, deipsi tumi tep nengeda, sundi, ‘Angeda mambul weik,’ tenena gum dipapu, atumi neitamai di, mali-mali pio weik kuramidi, mali kudirami. Ukuramya deiyoda, sun kange dipru neitamaida, tali keca isok si eremnapu teneramidi, akeca tepapu kange deipra, mali weik kuramya tepa.

17 Tek sisi pio mali-mali weik kurami dinino nedi tamupra, sun tep pio bicau kupneue. Ukupneupa, nedi sun Israel nesala yuma tep, ila katuai mutu, padang pasir mutu neitamai di, sun wenemna tep, nedi popra men gawal daksi.

18 Ange gum dinin, Israel nesala sun apu yapudi deiamipa, dadeipdanen yakarami nesala dinin, sun kaber neng tep nengeda, ila katuai mutu, padang pasir mutu tupa kurami taruda, awenemna upu pepra deipsi. Aupuda ake. “Uda, sun apuyapu cap, sun nai yapu cap, sun nin yapu capdi, pumun taru dordi dipra, aneitamai taru yuma, mali-mali weik kurami ngeda, sun kaber nesaladi, ‘Angeda nun peda ukunkamepe,’ tenepra, angepu talepra, pio men kunkamrume,” pepsi. Tonda sun apu yapudi, ‘Ukupkamepe, telep kunange ake, mali kunange ake,’ pepra, angepu talepra sundi kurami keca yumada, sun kaber kurum nesaladi, ange kunada pio meme. Tonda, sun apu yapudi, tali keca tep, si eremami isok si eremna keca, patung-patung dopra si eremrumudi, sun pe mali kudinkamrume. Angeda pio meme. 19 Deiyoda, neda sun nai bo Allah, Yahweh kunune. Nepu akununa cadi, nedi, “Angeda ukunkamrume, angeda pio men kunkamrume,” pepra deipsisi upu cap, “Telep kuna ngeda ake, mali kuna ngeda ake,” pepra deipsisi upu tepapu moupra talepmumdi kunkamrume.

20 Tonda, pio ila mambul tumi, Sabat tumi tep nengeda, sundi, ‘Uo, atumida Allah er si eremna tumi cadi, ila mambul tumi kurure’ tenen, moupra teneprumudi, atumi neitamaida tali pel dona gum dipapu, ne tep gispal donkamnerume. Ange yuma akunkamruma deiyoda, ‘Ada ne cap, sun cap, kikiman telep kunkamep’ tenen, pedina upu pepra, deridana tep nengeda, atumida petenkamna tumi akunkamsere. Tonda, sundi, ‘Uo, Allah Yahwehda, tek sisi nun nai bo Allah kurure. Er sipu eremkamnupe,’ tenenkamrum tenena tep, aupu pepra deipsene. 21 Upepsi dinino, ataruda sun kaber nengdi kurami. Sun ataru kaber Israel nesala yumadi, aila katawai mutu neitamai, padang pasir mutu neitamai di tupa kurami taru yumada, ‘Allah pesere upu nun songe,’ teneramidi, ne upu moupra gekena gum di, yanitamnapu kurami.

Tonda nedi, “Angeda kuna telepnge, angeda kuna memnge,” pepra, deipsi upu yuma cap, “Sun yumadi, aupu moupra taleprumudi, moupra teneprumnya deiki di, sun pio gam tupa kunkamrume,’ pepra deiamsi upu yuma capda, tapnapu kurami. Tonda, nedi, “Amambul tumi, Sabat tumi neitamaida, tali pel dona gum dipapu, beipye peikra ne sipu eremkamnerume,” pepra deipsi tumi tep nengeda, ‘Angeda mambul weik,’ tenena gum dipapu, atumi neitamai di mali-mali pio weik kuramidi, mali kudirami. Mali weik kuramya tep nengeda, nedi, ‘Uda konuma, akatuai mutu neitamai dipu, sun mali kunange tep, ila yu kunere ngeda, sun nong deiki deipnedi, sun tep ila di wenepra poptapnedi, gawal dakamne,’ tenemsidi konum ketenepsi.

22 Ketenepsi dinino, atenemsinge yumada, men kupsidi tapsi. Deiyoda, ‘Ne si mali kupra deipdanun’ tenen, yapsi. Ange yuma tapsa deiyoda ada, ‘Gume, ne mawa nesala tep, ila yu di wenepnyopda, sun Mesir mutu neitamai kikiman kunge nesala cap, amutu dana-dana kunge nesala yuma cap, ange epmengedi, ne si mali-mali pepnengedi, nalemkamneng’ tenen, tamsi. Mesir mutu nesala cap, amutu dana-dana tara kurami nesala capda, nedi ne mawa nesala, Israel nesala loptapnedi, Mesir mutu neitamai di doupra, dubenedi, telep kupra lyepra deipkamne ngeda, epmenga deiki di, ‘Uo, Allada tek sisi ila mambul ngebo kurure’ tenepmengedi, ne tep kael kepkamneng’ tenen, tapsi.

23 Anesala popra, men gawal daksi dinin, sun amutu neitamaida, padang pasir mutu tupa kunmai taru di sun tep upepsi. Tek sisi ne si deiki di pedian upu di pepsi. Ada, “Gume, sun ataru kurum nesala yumada, enepra dopkotepnepa, mutu sirik, im sirik cap, mutu ban-ban yuma, dana-dana tara kunge nesala neitamai di bena, dakunkamrume. Yuk-yuk karen mutu nesala cap kikiman kunkamrume. Nedi dokotepra enepropsenyopda, sunda dana-dana tara mutu neitamaipu bena kunkamrume. Tenpaipu kikiman men kunkamrume,” pepra deipsi 24 Ada tali tep gume. Ange upepsa deiyoda, ake. Sun Israel nesala yumada, ‘Allahdi pesere upuda nun songe,’ teneramidi, ne upu moupra gekena gum di, yanitamnapu kuramnei. Tonda nedi, “Angeda kuna telepnge, angeda kuna mem nge,” pepra deipsi upu cap, “Sun yumadi, aupu moupra taleprumudi, moupra teneprumnya deiki di, sun pio gam tupa kunkamrume,’ pepra deiamsi upu yuma capda, tamnapu kurami. Tonda, nedi, “Amambul tumi, Sabat tumi neitamaida, tali pel dona gum dipapu, beipye peikra ne sipu eremkamnerume,” pepra deipsi tumi tep nengeda, ‘Angeda mambul weik,’ tenena gum dipapu, atumi neitamai di mali-mali pio weik kuramidi, mali kudirami. Tonda, sun apu yapudi, tali keca tep, si eremami isok si eremna keca, patung-patung dopra si eremaminge tepapu, sun pedi, ‘Aisok dipapu melipkamseng’ tenen, dinapu kuramidi, akeca sipu eremami.

25 Ange pio ukuramya tep nengeda, nedi sun anesala tep, ‘Dakwapye,’ tenemsidi, sun tep tapsa deiki di, sun anesaladi, mem upu tali-tali ngepu talepra kurami. Ada, sundi sun pe tep, ‘Ukunkamepe, angeda men kunkamepe, telep kunange ake,’ peraminge dinin, tali-talingepu talepra kurami. Tali kecapu talepra kurami dinin, aupu yumada, telep kuna upu gume. Atali upu moupra taleamtenga peda, adeiki di gam men kupkamenge. 26 Tonda, sun anesala tep, ‘Dakwapye,’ tenepsidi tapsa deiki di, sun pedi, ‘Ukupkamepe,’ tenemi keca talepra kurami. Ukuramya deiki di, sun pedi, sun pe tep mali kudidarami. Ada, sun pedi menmena taru deiami nyapu dopra, tali isok si eremna tep, poprapidi, uku dongorami. Nedi go karepsipa, apio mali keca talepra kuraminge deiyoda ake.

Ada, ‘Nedi ila kange mun keca dopra, sun nong deiki deipnedi, ila yu di anesala wenepra poptapkamne,’ tenemsa tep, ukupsi. Ukupsi keca yuma deiyoda, ake. Ada, ‘Ila di sun anesala wenepra poptapnyopda, sun tupa gam kunkameng nesaladi, ‘Uo, Allahda tek sisi, Yahweh kurure, tenen, kael kepkamnenga,’ tenena tep, anesala tapsidi, go karepsipa, sun pe dipapu mali-mali weik kurami. Allahdi Yeheskiel tep lap pepu.

27 Upepu dingeda, aupu ton dukdongopra pepu.

Ange yuma tep nengeda, teka, Yehezkiel kanda, nimi sisadi deipkei ngebo kureme. Atep, kandi sun Israel yala nesala yuma tep, lap perbenkurume. Ada, kandi, ‘Sun nai bo Allah, er si Yahwehdi upepsere.’

Uda ne Allah Yahwehda, akeca-keca yuma talepra, deiki tara erepra, ila puto weik kunun ngebodi pepsene. Ada, sun Israel yala nesala, sun apu yapu nengdi kuraminge ton, ne tep, ‘Allahda nun songe, er pesere upu pio men gekenkamepe,’ pepra tamamneidi, mali upu weik peramnei. Sundi ne cap, ne upu cap tep, moupra men taleamidi, tamamnei. Ne si tep mali kweipneidi, ne sipu men eremamnei. Sundi mali weik kurami ngeda, ake. 28 Ada, nedi sun anesala tep, “Nedi sun doupra, pio telep mutu dubenkamsene,” pepra pedina upu deiki di pepra, deiamsi mutu tu neitamai doupra besi. Amutu neitamai di dubena deipsi pangeda, sundi, ne tenena gum dipapu, amutu neitamai di dinmaipa, ila lyom mutu-mutu buma bukamupa, epidi, adipapu isok si eremna tep, gam keca popra kareramipa, epsi dingeda, yu weik kuramneupa, ‘Ne pio dabale,’ tenemsi.

Tonda, angetopu, ware yala co do, tekamunge yumada, teru cap, bo cap, pio weika di kwamu co epi dingeda, sun adipapu amutu damaipu yapi keca popra, duyana uku dongopra, isok si eremami. Tonda, atali keca si eremna tep, siltong telep keca ton dopra uku dongoramidi, isok tep mororamidi, ‘Nun karenmap keca tep, ila di kange deipkamser’ tenen, anggur du di purupra keteneipi me ton dopra, akeca deiki dingtamami.

29 Mutu-mutu dup deiki isok tep, telep karen keca karerbaramipa, isok si eremamya tep, ne dingeda, ataru neitamai di sun tep, upepra asipetepsi. “Sunda dan ila lyom mutu dup deiki banmarum do?” pepra asimpetemamsi. Ukupra pepsa tep nengeda, ataru di dipra, ukutaru peda, sun upu deiki di, akeca kareraminge lyom mutu dup-dupai yuma tep, ‘Bama’ ^{▼▼Bama – Aupuda, Ibrani upu dinin, aupu deiyoda, lyom mutu dup tenena tep, ‘Bama’ penunge.} peramitopu, tupa aupu penunge.

30 Atep kanda Yeheskieldi, sun Israel yala nesala yuma tep, aupu perbenkurume.

Sun nai bo Allah Yahweh, akeca-keca yuma talepra, deiki tara erepra, ila puto kure ngebodi, sun Israel nesala tep, upepsere. Ada, sun warya tep mali-mali kun kecada talepra kunkamrum do? Sun apu yapu nengdi, mali keca talepra mali weik kuramitopu, sun peda utopu kunkamrum do, gum do? Ada, ne Allahdi, ‘Akecada pio mem keca, ne pio dabale’ tenenun keca tep, ‘Akecada kuna meme,’ pemsi dinin, sun apu yapudi akecapu talepra mali kuramitopu, sun ataru kurum nesal peda, isok keca tep si eremkamrum do? Dumsisi bisi tapra, tali bisipu embandarumudi, isok-isok tepapu si erepra dombarumudi, angepu teneprumudi, ne si tep mali-mali kweipkamnerum do? 31 Angeda tali tep men pepsene. Sundi, ataru peda, isokpu talepra kunmarumdi, yapi keca popnedi, akeca doupra kareryakanmarumnge cap, tonda sun nyapupu doupra poprapmumdi, isok si eremna tep, uku dongopra kareramrum nge cap deiki di, pio mali kunmarume. Dor tarudi dipra uku taru peda, tupa ukurumnya deiki di, sundi mali kweipdanmaruma cadi, ne damai ton pio men yankamrume. Isok-isok talerumnya deiki di, mali kweipdaruma cadi, ne pio dabale. Atep nengeda, sun Israel yala nesalada, kware tenena gum dipapu, ‘Allahdi amenda kupkamser keca ton lap pepsetue’ tenen, ne damai yana moropnetuma peda, gekepkamsen do? Gume ada men kupmanto. Gume, neda Allah, pio gam kununa cadi, ne tek sisi pepsene. Neda, Allah Yahweh, akeca-keca yuma talepra, deiki tara erepra, ila puto kunun ngebodi, pepsene. Sunda, ne damai men yana moropnetume. Sundi, ‘Uo, erdi nun tep lap peipsetue’ tenen, moropnetuma peda, men gekenkamsene.

32 Sun kange dipru neitamai di, ‘Uo, nun dana-dana tara kunge nesala yuma cap, sun yuk-yuk yala nesala cap, yuk karen mutu neng cap yumadi, tali keca co cap, gel cap, isok cap tepapu, si eremamengtopu, nun peda kuptepye’ tenen, putapserepa penerum ngeda, tek sisi men kupkamre pepsene. Gume, sun atenepmarumdi kunmarumnge yumada, amenda taru tek sisi nong pio men kupkamre. Allahdi pepu.

Allahdi ikin keca derina cap, tonda kaukemna cap tep, pepu upu

33 Neda Allah pio gam tupa kunun ngebodi pepsene. Neda Allah Yahweh, akeca-keca yuma talepra, deiki tara erepra, ila puto kunun ngebodi, sun tep pepsene. Ada nedi sun wenemna tep, ne ila puto buru cap, ne ila yu kunerenge cap deiki di, sun Israel nesala tep, moupra talepsenedi, sun ila deiyo ngebo kunkamsene. Nimi deiyo taleprapnedi, sun deiki tara Raja ngebo kunkamsene. Sunda ne amutarapu kurumudi, ne upupu gekenkamnerume. 34 Ukutaruda, sun Israel nesalada yuk-yuk mutu nesala neitamai wisipra kurum dinino, amenda taruda, ne ila puto deiki di kupnepa, sun yuma bupra duyankamsene. Ada ne ila puto buru cap, ne ila yu kupnerenge deiki di, sun yuma bupra deipsenedi, ka tamupra doupra, sun pe mutu sisapu yana bupra deipkamsene.

35 Ukupsene dingeda, nedi sun adipapu doupra, nimi cap, me cap pio gumai, ila mutu katawai mutu dabena deipkamsene. Adoupra derirbenkamsen mutu dana-dana tarada, yuk yala nesala ton dakununge. Ukupkamsena deiyoda ake. Ada, sun mali weik kuramrumunge upu bongdina tep, nimi upu lepsisikra deipnedi, bokeipkamsene. Ada karenai dipu gume. Sun cap, ne cap mening damai bukmepedi, urasin didapedi, nedi upu bokeipsenedi, sun mali-mali kuramum keca yumada, katuai kepra deipsenedi, wenemna keca sun deiki deipkamsene. 36 Angeda, nedi sun apu yapu nengdi mali kuraminge tep, Mesir mutu damai dinin, nimi gumai, ila katuai mutu, Sinai mutu neitamai, sun nimi upu lepsisikra bokeipsitopu, sun pe tepapu upu bokeipsenedi, wenepkamsene. Neda, Allah Yahweh, akeca-keca yuma talepra, deiki tara erepra, ila puto kunun ngebodi pepsena cadi, ange yumada tek sisi nong kupkamre ja pepsene.

37 Ataruda, nedi sun tep nengeda, ne puto deiki di wepra yuk-yuk kepra bupra deipkamsene. Ada, domba peina deiyo nengdi, sun maca erepmengepa, sun domba bisam damai bangepa, deiyo ngegodi, ‘Angeda ne mawange, angeda doupra popnedi, uku dongopkamne, angeda poptapkamne,’ teneramengtopu, nedi sun yuma tep, wepra yuk-yuk bokra deipkamsene. Tonda, ne pe upu deiki di, ‘Ukupkamrume, ukupkamrume,’ penetopu ukupra kupmumnyopda, nedi sun tep ukupra melipkamsene. Ton nengda, ne upu moupra men kupmengopda, wenepkamsene,’ pepra bokeipkamsene. Ne upu amutarapu deipkamsene, Ada, nedi peiamsisi upu puto di, ‘Sunda, aupu moupra gekeprumudi, angepu talepra kunkamrume,’ pepra derinkamsene. Nedi penkamsen upu moupra tenepmumdi, angepu talenkamruma tep, pepsene.

38 Ange utopu, sun anesala yuma kankan neitamai di, ne upu tep, ‘Nun songe, nun dabale, ange men kupkamepe,’ tenenenung neng cap, ne upu yaniptapmenge yu neng cap yumada, sun nimi bo neng utopu kunungai kan-kan neitamai di wepra, duyanedi, Israel nesala kunkameng mutu damai deipkamne. Sundi ne tep, ‘Nun dabale,’ tenenung nengda, keana taru tep damai deipkamne dinin, sun anengda, Israel yala nesala amenda taru kunkameng mutu neitamaida, pio men wekra kunkamenge. Anengda wenepnedi, enepra donokamne ja. Ukupnyopda, sun tupa akunkamrum Israel yala nengdi, ne tep, ‘Uo, nun nai Allahda, tek sisi Yahweh kurure. Erda tek sisi tenpu pua’ tenen, kael kepkamnerume.

39 Uda, sun tupa mali-mali kurum Israel yala nesalada, moupra gekepneso! Neda Allah Yahweh, akeca-keca yuma talepra, deiki tara erepra ila puto kune ngebodi pepsene. Uo, sun Israel mutu neitamai tupa mali kurum nesalao, sun pe kange dipua. Ada, sundi tenepmumtopu, ‘Mali-mali kuna cap, isok si eremna cap, tupa kupkamepe,’ tenepmum dingeda, dakwapye, sunda tali lupra dukdongopra angepu kunkamrume! Dinino, ne upu tapmumdi, ton cap men gekepmumnyopda, tupa-tupa ne si yanipmumdi, ne nyapu sisa men kunkamruma cadi, ne si tupa mali men kweipkamnerume. Tonda, sundi isok si eremna tep, yapi keca popnedi, karenkamrumnge cap, isok si eremna tep patung keca petupra derinkamrumnge cap deiki di, ne mawa neng men kunkamruma cadi, ne pio telep lengna si tupa mali-mali pepra, mali men kweipkamnerume. Amenda taruda, nedi sun tep wenepra poptapkamsena tepa.

40 Angeda tali men pepsene. Deiyoda ake. Tek sisi ne mawa mutu, pio telep lengna mutu deikida, Israel mutu dup sisada, ne mutu kurura cadi, pio telep lengnapu kure mutu bukuai dupaida, sun Israel yala nesala dumsisi kunkameng nesala yumadi, ne tepapu si eremkamnenge. Ne amutarapu kungedi, ne pelpu donengedi, ne sipu eremkamnenge. Amutu neitamaida, nedi sun yuma tep, ‘Ne mawa nesala pio atep kunkameng’ tenen, sun tep kange pio derinkamsene. Tonda, sundi, ‘Allah er si eremkamep’ tenen taru yumada, nedi, “Ukupkurume,” pepsenepa, sundi sun pio telep karena keca doupra, ne si eremna tep kareryakankamnerume. Angetopu sun yapi keca popra, uku dongopra kareryakankamrum keca cap, sun pe kange dipapu, ‘Allah tep karepkupe,’ tenepmumdi ne tep kareryakankamnerum keca yumada, nedi doronkamsene. Ukupkamruma tep nengeda, nedi sun tep, kange deipnedi, ‘Pio telepe,’ tenenkamsene.

41 Nedi sun doupra pio telepai deipkamsen taruda, menop taru sun bura saka, yuk-yuk mutu dana-dana tara dabendomum mutu neitamai dipu dopra duyankamsene. Ukupkamsen taruda, sunda ware mutu ban-ban yuma neitamai di, yala yuk-yuk nesala cap wisipra kunkamruma neitamai di, sun dopra Israel tara sisa neitamai duyasenedi, bupra deipkamsene. Sun Israel nesala yuma bupra deipnepa, kunkamrum mutu neitamai konum kumumnyopda, ne kange deipkamsene.

Ukupmantoda, nimidi yapi keca popra, uku dongopmengepa, uku bo di meta cap, tu cap, uku dongopmengepa, jeredi, nintong telepnge weleprepa, nimi yuma gekepmengedi, ila di kange derinungtopu, nedi sun tepapu kange deipra doronkamsene.

Atep amutu dana-dana tara kunkameng nesala, yala-yala yuk-yuk yumadi, sun tep epmengedi, kael kepkamsenge. Ada, ‘Uo, Allah er pe pio telep kuryada, sun anesala sun dipru neitamai peda konum deipka cadi, sun peda pio telep konum deipu. Atep, Allah erda pio tek sisi telep ngebopu kurure. Erda ila telep lengna ngebo kurure,’ tenepnengedi, moupra kael kepkamnenge. 42 Tonda, menop taru, nedi sun apu yapu neng tep, pedina upu deiki di, “Pio telep mutu karepkamsene,” pepra, pedina upu deiki keteneiamsisi mutu neitamaipu konum duyasenedi, bupra deipsenyopda, sun Israel yala kurum nesala yumadi, ne tep kael kepkamnerume. Ada, ‘Uo, nun nai Allah, erda tek sisi Yahweh kurure,’ tenen, kael kepkamnerume.

43 Amutu neitamai bena deipsenepa, dakunkamrum taruda, sun Israel yala nesala men taru pio mali-mali kuramumnge tepapu, tamupra tenenkamrume. Tenepmum dingeda, sunda, ‘Uo, nundi mali-mali weik kuramepunge cap, isok si eremamepunge cap, mem keca talepra mali kuramepunge cap deiki di, nun pedi, nun pe tepapu mali weik kudidaramupudi, Allah er damai men yanmanto kuramepu. Atep nunda, ataru neitamaida, tek sisi pio mali nesala kuramepu,’ tenenkamrume.

44 Dinino, nedi ne pe si telep kudina tep nengeda, sun mali kuramrumnge tep kaukepnedi, sun mali kun keca daepsenedi, kange di tamupra telep kweipsenyopda, sundi ne tep moupra kael kepkamnerume. Ada, sundi, ‘Uo erda, tek sisi Yahweh kurure’ tenen, kael kepkamnerume. Sun pio mali kuramrumnge cap, mali kweipdanamrumnge cap tep, adipapu wenepra poptapra gawal dangamsetene dinin, ange men kupsisi. Ne si telep kudina tep nengeda, sun tep konum kaukepsenedi, kange di ton cap telep kweipkamsene. Ukupsenyopda, sun Israel yala nesala yumadi, ne tep moupra kael kepkamnerume. Uda, sun Israel mutu neitamai kunkamrum nesala yumadi, ‘Uo konuma, nun nai bo Allah Yahwehda, akeca-keca yuma talepra, deiki tara erepra, ila puto weik kure ngebo kurure! Erda tenpua,’ teneprumudi, moupra kael kepkamnerume. Ne Allah Yahwehdi konum pepmasena tep, ange yumada, tek sisi nong kupkamre ja pepsene.

Alladi Yeheskiel tep, aupu yuma pepu.

45 Uda, amenda taruda, Allah Yahwehdi ne Yehezkiel damai yana peipneu upu ton ake.

46 Allah Yahwehdi peipneu. Uo Yehezkiel kanda, nimi sisadi deipkei ngebo kureme. Kanda kan nong tamupra iknapi dam tara, arah selatan dinkurume. Ukupmemdi, sun iknapi dam tara arah selatan tara kunge nesala tep, ne peipkuken upu dopra, ila upu deiki di peipkurume. Ada amenda kupkamre keca tep lap pepra peipkurume. Tonda, meda metekanunpu kwamu mutu, er si Negeb mutu neitamai kunge nesala tep, ne wenemna upu dopra, lap peipkurume.

47 Amutu Negeb mutu, bura kunge nesala tep pepkurume. Ada, ne Allah Yahweh akeca-keca yuma talepra, deiki tara erepra, ila puto kune ngebodi pepsen upu moupra gekepkurume! Moupra gekepneso! Ada nedi amutu neitamai uku seknepa, uku bu pio weika di jenkamre. Uku ila di jenkamre taruda, amutu neitamai akupu co yumada uku bu di jepra gawal dangkamre. Ada konum kolupu co cap, telep kupra tupa teku embek co cap yumada, jenapu kunkamre. Auku bu pio puto di tupa-tupa jenkamre ngeda, nimidi pio men tapmanto kunkamre. Apio jenapu kuramredi, auku buda jepra lelekredi, amutu neitamai iknapi dam tara di gonga kepra, jeprapredi, dapu tara mutu utara yumada, jenkamre. Ukuramrepa, amutu neitamai kunkameng nesala yumada, sun urasinda uku bu di, jepropkamre.

48 Ataruda, sun tuai nesala ban-ban yumadi epmengedi, kael kepkamenge. Ada, anesala yumadi ne tep nengeda, ‘Uo, Allah Yahweh, er dipapu aukuda upra dinikmaue,’ tenenkamenge. Tonda yuk nesaladi auku bu jenkamre ngeda, pio men tapkamenge.

Allahdi ne Yeheskiel tep upepneupa gekepsi.

49 Upepneupa, ne Yeheskieldi ikin kange doupsidi nedi tamupra pepsi. “Uo, ne nai bo Allah Yahweh, kanda akeca-keca yuma talepmemdi, deiki tara erepra, ila puto weik kurum ngebo, yuk nengdi ne tep, ‘Uo,’ tenenmangedi, upenenunge. Sundi, ‘Kanda angeda ukupo penada meme! Er angebo Yeheskielda, ukupmanto upu deiki dipapu tupa peserure! Aupu deiyoda, nun men teneptepye, atep dakwapye,’ pepra, nyek-nyek penenunge naio. Yeheskieldi, Allah tep pepu.