Eze 21 | XteSC | STEP | Allah er si Yahwehdi, ne Yeheskiel damai yana peipneu upuda ake.

Ezekiel 21

Allahdi, “Ne ya doupnedi, Yerusalem mutu nesala wenepra popkamne,” pepu upu

1 Allah er si Yahwehdi, ne Yeheskiel damai yana peipneu upuda ake.

2 Uo, kanda nimidi deipkei ngebo kurume. Kandi Yerusalem mutu domi tara epmemdi, amutu tep, wenemna upu pepkurume. Ada, nedi sun tep, ikin keca karepnepa, Israel nesala cap, Israel nesala kunge tara yuma cap, ne si eremna tep domi ati cap tep, sun wenemna tep, mali kweipkamne ja. Ukupkamna tep, upu lap penkamrume. Atep nengeda, kandi upepkurume. ‘Allahdi wenepkamsere,’ pepra, lap peipkurume. Ukupmempa, sun Israel mutu neitamai kunge nesala yuma kael kepkamenge. 3 Tonda, sun Israel mutu neitamai kunge nesala tep, aupu pepkurume.

“Ne Allah Yahwehda, ukutaru sun podana utopu ngebo kupkusene. Ukupmantoda, ne nimi pon parang ya keteneipsi ngeda, gupropnedi doupra, mali kecapu talepra kunge nesala pe, pio dumsisi kunge nesala peda, sun yuma wenemna tep, sun yumada, popnapu kupkamsene. 4 Ada, tali tep men pepsene. Gume, Israel mutu kunung nesala yuma kankan di, mali kunung nesala pe, dumsisi kupra telep kunung nesala peda, weika di popkamne. Ukupmantoda, ukupkamna tep, ne nimi pon parang ya dopropnedi, arah utara, dapu tara kunung nesala di dipdongopra, arah selatan, iknapi tara mutu kunung nesala yumada, popnedi gawal dakamne. 5 Ukupne pangeda, adeiki di nesala ban-ban yumadi betapra kael kepkamenge. Ada, ne tep kael kepkamne ngeda ake. Ada, ‘Uo, Allah Yahwehda, er tenpu ngebopu kurure’ tenen, kael kemkamnenge. Tonda, ‘Allah er ya kina pumbon di, er parang ya dopropredi, gupropkamre ngeda, ayada tamupra, er ati kina keca pumbon, tamupra men kipdongopkamre. Nimi wenepra popnapu kupkamre ja’ tenen, betapra kael kemkamnenge.

6 Tonda, nimidi deipkei ngebo, kan Yeheskielda, ‘Uo,’ pepra, mali pepra ngolongkamrume. Ada ukupmanto, nimi ton ila kange mun kupmarya tep, dipru buluksakmarepa, ‘Uo, uo!” pepra, ngolongredi, mali peramre utopu, kan peda utopu ukupmemdi, sun damai mali pepra ngolomemdi, pio engenapu kupkurume. 7 Ukumempanen, adeiki di, sun Israel nesala wekmangedi, gekenmangai di, upu gekepmengopda, sundi kan tep asipetepkamkenge. Ada, ngolokra mali pepra engepmempa, Israel nesaladi, ‘Uo, ware keca deiyo tep, ngolokra mali penmarem do?’ pepra asipkengopda, kandi sun anesala tep, upepkurume. ‘Gume, dortaruda, kange mun upu ton duyasengepa, gekepkamepa tepa.

Aupu yuma yana pepmengepa, gekepkameng nesalada, ‘Uo, ware kuptepe do?’ tenen, ikin kange doupra, sun dipru bulungsangkamra tepa. Tonda, sun aneng yumada, buru puto boun kuprepa, depra sakamre. Sun telep kange doupra kunung ngeda, yuma gum kupkamre. Tonda sun aneng yo moropsemna deiki di, sun yo peda luk-luk kupkamre. Sun kange tenenange cap, sun giso yung capda, me utopu kuprepa, pio puto bounpu kupkamre. ‘Ila ikin keca yankamre,’ pepmasenada, pio tek sisi yankamre. Sun dinapu kunkamrume. Akeca yaryopda, ange yumada kupkamre. Angeda, ne Allah Yahweh, akeca-keca yuma talepra, deiki tara erepra, pio puto weik deiyo ngebo kunedi, aupu konum pepra deipsene.

Allahdi ne Yeheskiel tep upepneu. Upepneu dingeda, upu ton cap dukdongopra pepneu.

8 Allah, er si Yahwehdi, ne Yeheskiel damai yana pepneu ngeda ake.

9 Kanda nimidi deipkei ngebo kurume. Dortaru kupkamrenge tep, kandi sun Israel nesala damai lap pepkurume. Apepkurum upuda adano. Aupuda, ne Allahdi, akeca-keca yuma talenedi, pio puto weik deiyo ngebo kunedi, aupu peipsene.
Sun yuma dikurume! Nimi pon ya konum keteneipne. Alyom parang yada, konum ketepra si ketenepra deipsi.
‘Er urasin perenglang pepredi, lang-lang pepkamre’ tenen, konum pel dopsi.
10 Ayada konum ketepra deipsinge di, nedi atara nesala yuma popkamne.
Tonda, nedi ayada konum ketepra deipsi cadi, aya doropne pangeda, er sida perenglang pepredi, lang-lang peramra utopu kupkamre.

Ne nyapu yuma, wenemna keca yankamrenge tep, sunda telep kange men doupra kunkamrume. Pumun taruda, sun mali kuramrumnge tep, ukupmantoda, tali co teru ^{▼▼co teru – Co teru pepkada, ada domon upu tepa. “Co teru di bongopsisi,” pepunge deiyoda, ‘Pumun taru sun mali kuraminge wenemna tep nengeda, yambul ikin keca kareamsi’ tenen, pepu. Dinino, ‘Nimi pon lyom parang ya keteneipsi,’ pepu ngeda, ada ‘Sun wenemna tep, ila kange mun keca karepkamne’ tenen, pepka. Atep, ‘Angeda kael keptengedi, sun mali kunge keca tapkameng’ tenen, ila kange mun keca karepnepa, adeiki di sun mali kunung ngeda, sundi yaniptapmengedi, tamupra telep kupkamnung’ tenen, pepu.} di bongopra wenepsi si dinin, ukupsipa sunda, ‘Dyo angeda mambule gume, dakwapye,’ teneramrumdi, kaukemnapu kuramrume. Ange deiki di, betapra men kael keamrume. 11 Sun wenemna tep nengeda, nedi lyom parang yada, konum ketepra deipsidi, ‘Perenglang pepredi, lang-lang pepkamre’ tenen, konum pel dopsi. Apel dopsi deiyoda, ‘Yu nengdi, aparang ya doroprapmengedi, Israel nesala sun wenemna tep, nimi weika di ponkamenge’ tenen, aya konum ketenepra deipsi. Aparang ya ketepra si konum kupra deipsidi, nedi aya dopra, Israel yala neng tep, popkameng yu neng tep, konum karepsi.

12 Ange tep nengeda, nimidi deipkei ngebo Yeheskiel kanda, ngolokra mali pememdi, ila di engenkamrume. Ada, aparang yada, ne nyapu sisa, Israel nesala cap, sun talena tep, nimi deiyo talepra kunung deiyo-deiyo neng cap, sun yuma pona tep, aparang ya konum ketenepsi. Israel nesala talepra kunung deiyo neng cap, sun amutara talenung nesala ayuma capda, sun yu nengdi aya di lukra popmengepa, depkamenge. Atep Yeheskielo, kanda ‘Uo’ tenen, mali kange doupmemdi, petenkemna tep, sun Israel nesala kuramrumtopu, kan kail deikipu buru di bongopdankurume. Ukupmempa, nimi yuma epkengedi, ‘Uo, kange mun keca yankamsera cadi, er peda kange mun kange dopra engenmare,’ tenepra, kael kepkamkenge. 13 Angeda, tali tep men pepsene. Deiyoda, ake. Sun moupra tenipkamrume! Ukupmanto ngeda, tali co teru di bongopra wenepsene dinin, ‘Angeda dakwapye, nun mali kun keca men tapkupe,’ teneprumudi, kaukepnerumnyopda, ange deiki di amenda taruda, sun wenemna tep, ila kange mun keca ton, tapakra men karepkamsen do? Gume, tek sisi nedi ne mawa nesala, ne nyapu sisa kurum dinin, sun Israel nesala tep, ila ikin keca di kupetepkusene. Nedi sun deiki, ila ikin keca deipnepa, doropkamrume. Angeda, ne Allah Yahweh, akeca-keca yuma talepra, deiki tara erepra, pio puto weik deiyo ngebo kunedi, aupu konum pepra deipsena tep, akecada tek sisi kupkamre ja.

14 Ange tep nengeda, kanda nimidi deipkei ngebo Yeheskiel, kandi dortaru kupkamrenge tep, ne upu dopra, lap perbenkamrume. Kan buru tang bongopmempa, nimi yumadi, ‘E, nun podan nengdi popkusenga cadi, er kange deipmare,’ tenenkameng tenena tep, petenkemna tep, angeda lap pepkurume. Sundi, ‘Uo, ila ikin keca yankusere, tenepkameng’ tenen, ukupmempa, ataru dipapu, ne ketenepsi lyom parang ya di dopra, nimi pona gonga kepkamre ja. Nedi go karepnepa, yu nesaladi, ayada ue buteneto, wenerito angepu gum dinin, tupa-tupa doprapmengedi, Israel nesala pio weik poptapkamnge. Angeda, tenpu tara neitamai dipapu gume, dana-dana tara di, yu nengdi, aparang ya doprapmengedi, Israel nesala weik popkamenge.

15 Nimi pon nengdi, sun ongopgenepra yangopda, aparang ya di ne nyapu sisa gonga kepra popbanmangopda, sun Israel mutu kunung nesala puto-puto kunung ngeda, boun kupra deiprepa, dipruai buluksakamre. Ataruda, nimi weika di popmengepa, tuai saka dourbengedi, depkamenge. Sun yuma diso! Sun kurum mutu yumada, sun ila ati arum wengbana tep bisi, lyom gel beilya buplan damaida, nedi yu jen neng deipnepa, nimi pon neng ketenepkamenge. Amutu nesala weika di popkamna tep, sun jen nengdi, ne nimi pon ya erepra doupmengepa, aya sida perenglang-lang peramretopu kupkamre. Ada, aparang yada, nedi ketenepra deipnepa, perenglang-lang perur ngeda, nimi popkamna tep, kupsi.

16 Ukupmantoda, nedi aparang ya dopmengedi popkameng jen neng tep, upepkamne. ‘Aparang ya, yu si pio kupserur yada, sun tenepmarumtopu, dumsisi tara cap, tebalal tara cap, uda dana-dana tara yuma tamuptopmumdi, nimi weik popmumdi, doua embentopkurume!’ pepkamne. 17 Nimi weik konum popmengopda, ne Allah peda, kange deipnedi, ne buru tang bongopkamne. Ukupkamnada, ne yu gum kupkamnera tepa. Sun mali kurum nesala weika di, konum wenepra popnyopda, ne dipruai di yu weik tenenun ngeda, gum kupkamnere. Ange yumada, pio tek sisi nong kupkamre ja! Ne Allah Yahweh, akeca-keca deiki tara erepra puto weik kununa cadi, aupu konum peipsena tep, tek sisi ange yumada, nong kupkamre ja pepsene.

Allahdi ne Yeheskiel tep, aupu yuma pepneu.

Raja Babel, er lyom parang ya tep, pepu upu

18 Allah Yahwehdi ne Yeheskiel damai yana peipneu upuda, yuknge ton ake.

19 Yeheskiel, kanda nimidi deipkei ngebo kurume. Raja Babeldi, ‘Israel nesala popkamne’ tenen, nimi pon parang ya doupra yankamre. Er cap, er jen neng capda, tenpu mutu di tapra, amutu yankameng dinin, kanda sun aneng yankamenga tep, bisi butene ketenepra deipkamrume. Dana tara di, bisi butene kwadarapnaipu, petenkemna keca tep, ‘Atara ila ati arum ban bisida, ake. Ortara ila ati arum ban bisida ake,’ pepra, co lase deiki, lap pena upu sekmemdi, ikamrume. 20 Tenpu bisida, ortara ila ati arum sida, Raba mutu tara di, Amon mutu nesala kunungai, dourbana bankamre. Tonda, yuk tara ban bisida, Yehuda mutu tara neitamai dinin, Yerusalem ila ati arum dourbana bankamre. Yerusalem mutu dana-dana tarada, ‘Yuk mutu nengdi poryasenung’ tenen, sundi ila lyom gel beilya wipdongopra, ongomgenepra deipyai neitamai, Yerusalem ila ati arum tep pepne. Atep kandi co lase deiki di, bisi butene keteneipmemdi, apetupmem ngeda, abisi kwadarapnaipu, peten kemna tep, yana ikra deipkurume.

21 Angeda tali tep gume. Deiyoda, Babel mutu ila nimi deiyo ngebo, Raja Babelda, abisi cap, ortara bisi cap kwadarapnaida, tekra ketenenepmare. Raja Babelda abisi butene kwa darapnai bena tekredi, er si eremamre keca si tenipetepredi, ‘Dan tara bisi benkun do? Peterepnetu’ tenen, meri pepra moropkamre. Raja er mar doupmare ngeda, ‘Ware kupra tuai ton boksakur do?’ tenen, bena diredi, mar lelektopkamre. Tonda, Raja Babeldi, nimi kamo utopu kupra petueipudi, si eremrur isok tep, “Ne benkun bisida, lape peterepneo,” pepra moropkamre. Amoropkureya tep nengeda, gam keca popredi nong neitamai kwamrengeda, dipru dopra tapredi, moupra diprepredi, ‘E, ukupkamne,’ tenepra, betapra kael kepkamre.

22 Adeiki di Yerusalem mutu tara tep, dumsisi buru di bok talepmare keca deiki peten kepkamre! Akupkamre ngeda, Raja Babeldi Yerusalem mutu porbenkure atepa. Ukuprepa, Rajadi, “Mar podarbenkupe,” peprepa, sun yankamenga yan lelimda weik pepmengepa, gekepkamenge. Ataruda, Rajadi er jen talena neng tep, sunda, akati dopra kungedi, bura tara besi di domi buplan (pintu gerbang) dekdongopinge, bena dakra donongna keca cap, lyom beilya deiki welena tep, lyom co welen keca cap, abeilya damai tu palipra derinkamenge nge cap tep, “Sunda akeca-keca betapra keteneipkurume,” pepkamre. Ukuprepa, sun anengdi akati arum domengedi, lyom gel beilya wipdongoamengada, tupa lipra yana deipmengepa, dekpepreya deiki di, agel beilya deiki welepra bengedi, nimi porbenkamenge.

23 Dinino, sun Yerusalem mutu kunkameng nesaladi, ange yuma epmengopda, ‘Gume, angeda, mok kecapu kurure. Ada, kange mun keca yankamsera tep gume. Raja Babeldi er si eremna isok asipetepmarenge cap, erdi meri penmarenge cap, adeiki di kupmarpa, er deiki peten kepmar ngeda, tali kurure,’ tenenkamenge. Tonda, sundi, ‘Gume, nun cap, Raja Babel cap, pio puto pedina upu konum peipdaramupu deiki di konuma, Raja Babeldi nun tep, men yana popkusetue. Ila ikin kecada, nun damai ton men yasetue,’ tenenkamenge. Dinino, ne Allahdi, sun di mali-mali weik kuraminge tep, kange di ton cap lap pepkamna deiki di, kange di ton cap tenepmengedi, betapra kael kepkamenge. ‘Uo, tek sisi, nun mali weik kuramupupanen, ukutaruda, Allahdi walito wenepra popkusere,’ tenen, betapra kael kepkamenge. Sundi, ‘Uo, ange yumada, Allahdi nun wenemna tep, konum kupmasere,’ tenen, betapra kael kemkamenge. Ange yuma ukupre pangeda, Babel mutu Raja ngebodi, Yerusalem mutu beredi, amutu nesala yuma bisbisa kapre dingeda, bena tomopyopda, erdi sun tep, ateng koupdongopredi, er pe mutu dubena deiprepa, ikin keca weik, sun nong deiki derinkamre.

24 Ange tep nengeda, neda Allah ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu ‘Adonay’ deiyo ngeda, jenek kupra sekmupu.} Yahweh, akeca-keca yuma talepra, pio puto weik deiyo ngebo kununadi, sundi si eremrumu Allah, akeca-keca yuma deiki tara erepra kununa cadi, nedi sun tep upepsene upu moupra gekepkurume. Ada, ake.

“Sundi mali-mali weika di kuramrum keca yumada, konum katawai kurepa, sun pe kange di tenepmarumdi, yuk nesala yuma peda, amali kuramumnge yumada, kael kemnunge. Sun kurum keca neitamai yumada, tek sisi ila mali kun kecapu konum katuai kupmarepa, nimi yumadi kael kemnunge. Sundi mali weik kuramrum keca, ukutaruda kange di ton cap konum betapra tenepmaruma cadi, ukutaruda ne tenepsi taru konum kupmara cadi, sun wenemna tep, nedi dopra, sun podandam nesala tep go karepnepa, sundi bisbisa kapra konum popmasengdi, gawal dakmasenge. Sunda ateng koupdongopsengedi, sun pe mutu dubena deipkamsenge.” 25 Uo, kanda Israel mutu yuma talepra kunmarem ila nimi deiyo ngebo Rajada, kanda pio mali kecapu talepra kuruma cadi, kanda ‘Ne songe,’ tenekenune. Kanda ne upu moupra men talepra kumemdi, tamnerema cadi, kan wenemna tumi konum yanmare. Kan pio mali kumem kecada, weik konum kupka tep, kan ila wenemna tumida konum yare. Atep atumida, wenepkenedi, siria gawal dakamkene.

26 Ange tep nengeda, ne Allah Yahweh kunune. Neda akeca-keca yuma deiki tara erepra, ila puto ngebo kunedi, aupu pepsene. “Sun Babel mutu jen talena nengdi, Israel mutu nesala tep, Raja kepra talerur ngebo, er giso lyom kain di koudongomnung ngeda, kwiripra donokurume. Tonda, ‘Angebo Raja kuserur’ tenen, er giso deiki kunumna weik keca emas di betaipmengedi, deiaminge keca er sida mahkota peda, kwiripra donokurume. Ware keca do yuma, men di akuramutopu tupa men kupkamre. Ukutaruda, akure keca yumada, pio yuk keipkamsene. Atep ataruda, sun amutara kunung nesalada, erepra deipnepa, ila nimi deiyo neng kunkamenge. Tonda ukutaru erepra deiamipa, ila nimi deiyo kemnung nengda, nedi amutara kupra deipkamsene. 27 Ne dipapu, Yerusalem ati arum dopra kunge mutu yumada, dakra tapnedi, sikke buktapkamne. Amutu dana-dana yumada, urupra daktapnopda, sikke utopu kupra deipnepa, ati walangpu kupkamre ja. Ange ukupkamrada, menop taru di dipra, neitam taru pe, ukutaru yuma peda, uruptapmengepa, ati walangpu kupkamre ngeda, pio men di men kupke. Nedi amutu tep pio mali kweine pangeda, dapio akunmaryanen, amenda taruda, nedi teneamsi ngebo yankamre ja. Angeboda, ‘Amutu yuma talenkamre’ tenen, konum men di wepra deiamsa cadi, er yaryopda, nedi er teppu karepkamne. Ne dipapu, Yerusalem mutuda doprapnedi, awepra deiamsi ngebo, er deikipu deipkamne.” Allah Yahwehdi pepu.

Allah er nimi pon ya dopra, sun Amon nesala tep, popkamre upu

28 Allahdi pepu. “Uo, Ezra kanda, nimidi deipkei ngebo kurume. Nedi peipkuken upuda, dopra yuk dakunung nesala tep, lap pepbankamrume. Kandi sun Amon tara kunge nesala yuma tep, lap pepkamrum upuda ake. ‘Nun nai bo Allah Yahweh, erda akeca-keca yuma deiki tara erepra, ila puto weik ngebodi, upepsere. Sun Amon yala nengdi, Yerusalem mutu kunung nesala tep, pio mali-mali daemna upu weik peramrumdi, sun nong deiki ikin weik keca deriramrume. Atep nengeda, Allahdi sun tep nimi pon parang yada konum keteipka adano! Erdi, nimi pona tep parang yada, konum gupropre. Aparang yada, erdi nimi popkamra tep, konum ketepra deipupa, aparang ya er si yuda, perelang pepredi lang-lang peramretopu kurure. Ayadi nimi pio weika di poptapkamre!

29 Tonda, sun Israel mutu neng, mok upu penge nengdi, sun tep, tali upu weika di peipsei. Ada, sun nabi falsu nengdi, ‘Gume, apenmap upuda, Allah dipapu karepseupa, ken mapmapua deiki di konum peipmaserpa gekepmape. Israel nesala tep nengeda, ukupra-ukupra kupkamsere,’ pepra, lap perami dinino, sundi perami upu yumada, nong men kupkamre. Ange utopu ton, sun nabi falsu nengda, isok-isok cap upu taledanung nesalao, isok meri pena deiyo neng do, sun damai bena, asipetepipa, aneng sun isok puto deiki di, ‘Ange ton, ange ton tek sisi kupkamsere,’ perami dinino, aneng peda, tali mok upu deiki dipapu perami.

Ange tep nengeda, Allahdi, go kareprepa, sun podan tara nengdi, nimi pon parang ya dopmengedi yana, sun mok upu perami neng cap, mok upu gekerami neng cap tep, poptapkamenge. Ataruda, Allahdi go kareprepa, sun podan nengdi, parang ya douprapmengedi, sun pio mali-mali weik kunung nesalada, kum sekra tapkamenge. Sun pio mali weik kunge keca tep, ila wenemna tumida konum yare. Atep atumi deikida, Allahdi amali weik kunge nesala tep, wenepredi, siria gawal dakamre. Allahdi sun tep siryange wenepkamre.

30 Uo, sun Israel yala jen talen nengda, sun nimi pon parang yada, tamupra kidongona pumbonpu kipdongopkurume! Sundi yuk mutu nesala tep popmanto taruda, konum gum kupmare. Deiyoda, ne Allahdi, sun apu yapudi deiamsei mutu kunge nesala tep, adipapu popra wenepkamne. 31 Ne Allahdi sun amutu kunge nesala tep, pio yu weik kunerepa, uku bu jeramretopu kunerura cadi, sun wenemna tep, ila kange mun keca, sun menenga keca karepkamsen ngeda, dopra sun deiki deipsenepa, ikin weik kunkamsere. Tonda, nedi sun dopra, pio ila yu neng deiki deipkamsene. Ada nimi pona walwal neng gume. Sunda men di nimi pona tep ila kael keami neng deiki dopra karepsnepa, popnapu kupkamsenge. 32 Sun wenemna tep, ukupkamsena tep nengeda, ukupmantoda ukudi kouluamu co jepra gawal dangrurtopu, ayu weik nengdi, sun tep popnapu kunkamsenge. Popsengopda, sun yapida, sun pe mutu neitamaipu sakamsere. Popsengedi, gawal daksengopda, amenda taru tenpu ngebo peda, sun tep ton tupa men tenenkamsenge. Ange pepmasen upu yumada, tek sisi nong kupkamre ja. Neda, Allah Yahweh, akeca-keca deiki tara erepra, ila puto ngebodi aupu konum peipmasena tep, apeipmasentopu tek sisi nong kupkamre.