Eze 22 | XteSC | STEP | Allahdi ne Yeheskiel damai aupu yana peipneu.

Ezekiel 22

“Yerusalemda, pio mali mutu kurure,” pepu upu

1 Allahdi ne Yeheskiel damai aupu yana peipneu.

2 Uo, kanda nimidi deipkei ngebo kurume. Kanda konum ketenepmarum do? Gum do? Ada, Yerusalem mutu neitamaida nimi pio weika di poramya tep, yapi mutu utopu kurure. Nimi pona neng amutu kunungai cadi, sun wenemna tep, upu bongdina tep pen upuda, konum ketenepmaremdi, pepkurem do? Kandi keteneiamemyopda, sun Yerusalem mutu neitamai mali kunung kecada, jenek kupra lap pepmem pangeda, adeiki di sundi sun mali kuraminge yuma, kange di ton cap tenepkamenge.

3 Upepmemyopda, kandi sun anesala tep bena pepkurume. “Aupuda, Allah ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu ‘Adonay’ deiyo ngeda, jenek kupra sekmupu.} Yahweh, akeca-keca yuma talepra, ila puto weik deiyo ngebodi peipseu. Aupuda ake.”

Sun Yerusalem mutu kurum nesala, sun kan-kan neitamai kunung neng dinin, sundi potamrume. Ukuruma tep nengeda, nedi poptapkamsene. Ange utopu ton, sundi tali keca tep, ‘Nun nai,’ teneprumdi, aisok keca tep, nimi urasin utopu petupra derirum keca, si eremruma deiki di, sun pe nongpu mali kupra deridarume. Ange tep ila di wenepkamsene. 4 Sun mutu neitamai di nimi tali potamrumnya cap, tonda tali keca petupra derirumdi, aisok si eremrumnya deiki capdi, sun pe nong deiki mali kudidarume. Atep ila di wenepkamsena deiki di, sun yumada depropkamrume. Sun gam kuna tep goda yambulanunpu kupkamsere. Sun gawal dakmanto tumida, konum dam kurure.

Sunda keteng tamun ware kuprap ton gam tupa kunkurum dinin, sun gam kunkamrum taruda, konum gawal dakmanto kupmare. Atep nedi wenepsenepa, ikin weik kupyopda, yuk mutu kunung nesala tep peipnepa, sun Yerusalem mutu kurum nesala tep, mali-mali pepra nalemengedi, autunkamsenge. Yuk mutu nesala yumadi, ‘Gume, sun Israel yala nesalada, mambule gume, dakwapye,’ pepra nalemkamsenge.

5 Sun damai kunung nesala cap, tonda sun damai men kunung dinin, karenai kunge nesala capdi, mali pepra autungedi, nalemkamsenge. Ada, sun Yerusalem mutu kurum nesala peda, sun pe sipu konum mali keipdanmaruma tepa. Tonda, yuk mutu nesala weika di konum gekepra kael keamsei. Sun kurum mutu Yerusalem neitamaida, mali kuna cap, upu deiki pangdana cap, nimi podana cappu konum kuruma tep pepsene. 6 Sun moupra dipetepkurume! Sun mutu yuma talepra kuramidi, Raja kepra taleami deiyo neng yumada, sun pe puto akuramutopu, sun puto deiki dipapu nimi weika di portamamitopu, ukutaru peda tupa angepu kununge.

7 Tonda, sun Yerusalem mutu kurum nesalada, sun pe nai yapu cap, sun pe nin yapu cap tep, ‘Telepe,’ pepra, sun upu men gekepmumdi, sun tep gispal men dorume. Tonda, nimi bo neng, yuk karen mutu di yana, sun mutu neitamai sun cap kikiman kurum neng tep, ikin keca weik sun nong deiki derirumpa, ‘Uo’ tenen, kange mun kange doupra kununge. Tonda solu nerapu cap, sun nai yapu depropidi tapipa, lyan kunung nyapu capda, sun damai kunung neng tep nengeda, tali upu peptaprumdi, men melimrume. Tamnapu kurume. 8 Tonda, ne Allah, ne si eremna tep, telep kupra ketenepra deipsi keca, ne mawa keca yumada, sundi, ‘Gume, akecada mambul gume, tali keca pua,’ teneprumudi, akeca moupra talepmumdi, ne tep gispal men dorume. Tonda, ne Allahdi, ‘Atumida tali pel dona gum dipapu, ne si eremna tep, beipye peikurume,’ pepra deiamsisi dinin, ‘Ne gispal don tumi,’ pepra, weipsi tumi, Sabat tumi peda, sun beipye peingna gum dipapu, atumi deiki di ne tep, men si eremnerume.

9 Sun Yerusalem mutu kurum nesala kan-kan di, ton tara nengdi, yuk neng tep, “Sunda mali kunung neng,” pepra, mok upu deiki di pepmengepa, sun mutu ila deiyo nengdi, aneng tep wenepra ponunge. Tonda, yuk neng dingeda, tali keca isok si eremna tep, gam keca poprapmengedi, bura mutu deiki welepmengedi, akeca tu ngeda, dopra jenunge. Tonda, yuk neng dingeda, ali dangna gum dipapu, nimi men kuptenge keca, pio mali kupmengedi, tali-tali nyadana kecapu kununge. 10 Ton nengda, Yerusalem mutu kunung nengda, sun pe nai yapudi doami nerapu dopra, kikiman mapmengedi, upula nyangdanunge. Tonda, samai kunmare nerapu cap, kikiman manunge. Akununga deiki di, sun pedi, sun nongpu mali kudidanunge.

11 Tonda, Yerusalem mutu kunung nengda, sun kayapu neng domenge nerapu cap, tonda sun deiamre ngebodi domre ner cap kikiman manunge. Ton nengda, sun nai bo sisadi, deiamre ner mi, sun weit nerapu sisa cap, tonda sun nai yapu tenpu nengdi deiamenge nerapu cap kikiman tonpa manunge. 12 Angepu gum dinin, yuk neng, sun Yerusalem mutu kurum nesala kankan di, “Nimi poipserume,” pepra, bul karena uang karepmengepa dopropmengedi, nimi ton ponunge. Tonda, yuk nengdi, co bo putana neng tep, “Sun co bo keana karepkusep, dinin, menmena taruda, ukupra co bo ton tapakra karepkamserume,” pepra karenunge. Ukuamenganen, angebo er uang men kwapmarepapu, tamupra kapul men kareptu taruda, kange di tamupra, sundi “Atep, ataru neitamai yumada, co bo ton cap, weika di tapakra karepseo,” pepra, puto di moronunge.

Tonda, sun pe yala neng tepapu, “Uang ton karepserume. Men karepsemumnyopda, ikin keca weik sun nong deiki karenkamsepe,” pepra, puto di moronunge. Ukuruma deiki di, sun yumadi ne Allah tep, konum lumdongonerume. Neda Allah Yahweh, akeca-keca yuma talepra, pio puto weik deiyo ngebo kunedi, aupu konum peipsene. 13 Atep, ukutaruda, sun epso! Sun mali kurumtopu kunumna popkamsene. Ne Allah buru erepra doupne. Ada amutu neitamai kunung nengda, sundi ponunga tep menengada, sunpu popkamna tepa.

Allahdi ne Yeheskiel tep pepneu.

Allahdi “Wenemna keca dopra, tek sisi Israel nesala deiki yana deipkamsene,” pepu upu

14 Allahdi pepu. Nedi sun mali kunange yuma tep, konum wenepne taruda, sun puto kuna cap, sun buru puto kuna capda, ton cap men kupkamsere. Ne Allah Yahwehdi, akeca-keca yuma deiki tara erepra, ila puto kunun ngebodi, konum peipsena cadi, nedi sun wenemna tep, angeda tek sisi nong kupkamre. 15 Nedi Yerusalem mutu kurum nesalada, enepra donoksenepa, yuk mutu nesala kunungai bena kunkamrume. Tonda, nedi wenepkamsena deiki di, yuk mutu tara neitamaida, dana-dana tara nesala kunungai neitamai di, dabena kunkamrume. Ukupkamsena deiki di, nedi sun mali kurumnge yuma, yambul-yambula di, gum kupra deipbankamsene. 16 Ukupsenepanen, yuk mutu nesala yuma di, Yerusalem mutu tep nengeda, mali pepra, autungedi, nalemkamenge. Ukupmenge pangeda, sun Yerusalem mutu kurum nesalada ali weik dangkamrume. Ange epmumnyopda, betapra kael kepkamrume. Ne Allah Yahwehdi, “Ukupkamne,” pepra, pedina upu deiki di pepsene upu yumada, tek sisi ukupnepa, nong kupkamsere. Ange epra kael keprumnyopda, adeiki di, sundi ne tep, ‘Uo Allahda, ila puto weik ngebo kurura cadi, er teneretopu, angepu kurure’ tenen, betapra kael kepkamnerume. Allahdi pepu.

Uku di jepra, gawal dakamrenge tep, pepu upu

17 Allah Yahwehdi, ne Yeheskiel damai yana aupu peipneu.

18 “Uo, kanda nimi di deipkei ngebo kurume. Sun Israel nesala yala-yala yuma tep nengeda, nedi, ‘Gume, sun yumada, telep nesala men kununge,’ tenenune. Ukupmanto, nimidi, ‘Emas pio telepnge keteneipkamep,’ tenepmengedi, ‘Mali keca yuma cap tapakra kuramre ngeda, tembaga do, tima do, besi do, mirin tima do, gum kupra deipkamepe,’ tenepmengedi, aemas cap, mali keca cap tapakra kamrepane, uku dongopmengepa, uku di jeramrepanen, amali keca yuma jepropredi, katuai kupyopda, doupra dokotemnunge. Amalinge gum kupyopda, emas kamo pio telep kupra deriramenge. Ukuramengtopu, nedi sun Israel yala nesala tep, utopu kupkamsene. Sun wenemna tep, ikin keca sun nong deiki deiamsipane, adeiki di mali keca dokotepmanto ngepu kupbanunge.

19 – 20 Atep, ataruda, ne Allah Yahweh, akeca-keca yuma talepra, pio puto weik deiyo ngebo kunedi pepsene. Sun Israel nesalada, emas neitamai mali keca cap tapakra akamrepanen, uku jeproprepa, urasin telep gum keca ton, katuai kuramretopu kurume. Ukupmantoda, nimidi, ‘Emas pio telepngepu kuptue’ tenen, uku dongopmengepa, jepropre pangeda, amenda yuk mali keca paleamrenge yuma, perak cap, perunggu cap, besi cap, mirin tima cap, kurun tima cap yuma, katuai kuprepa, dopra dokotepmengetopu, nedi sun tep ukupkamsene. Ne ila yuda, uku bu jeramretopu kunerur ngeda, sun deiki deipkamsene. Nedi sun Israel nesala tep, yu weik kupmanera cadi, uku di mali keca jeroretopu, nedi sun tep bupra, Yerusalem mutu neitamai deipsenedi, ila ikin keca, sun nong deiki deipsenyopda, kange mun kange kupmumya deiki di, sun mali kurum keca yuma gum kupbankamre.

21 Tek sisa, nedi sun yumada, kange di bupra, Yerusalem mutupu deipnyopda, nedi sun tep yu kunerepa, uku bupu kuramretopu kunere ngeda, sun deiki deipra wenepkamsene. Ukupmantoda, gat keca dopra, uku dongopmengepa, mali kwamre keca jedoramre utopu kupra kupkamrume. 22 Emas do, perak do, ‘Mali keca paleamrenge gum kupkamre’ tenen, uku dongopmengepa, amali keca uku jedoramre utopu, sun Israel nesalada, Yerusalem mutu neitamai di, sun nong deiki ila ikin keca deipkamsene. Ukupsenepa, adeiki di sun mali kurum keca gum kupbaramre pangeda, adeiki di kael kepkamnerume. Ukupne pangeda, sun mali kurum ngeda, taprumudi, kange di teleppu kunkamrume. Adeiki sundi, ‘Uo, angeda mali weik kuramepupa, Allah Yahwehdi yu kupupa, ikin keca nun deiki deipseupa, dopropmepu’ tenen, betapra kael kepkamrume. Allahdi pepu.

Israel nesala talepra kurami nengdi, mali kuramya tep, seki upu

23 Allahdi ne Yeheskiel damai yana aupu peipneu.

24 Uo, kanda nimidi deipkei ngebo kurume. Kandi sun Israel neng tep, aupu pepkurume. Sun kunung mutu neitamaida, malipu kunge nesala kununga tep, ne yu kunerura cadi, sun wenemna tep, sun kurum mutu neitamaida, mo ton pio men cemkamre. 25 Sun mutu neitamai, deiyo kepra talenung nengdi, mali kuna ngeda ake. Sun kange dipapu, ‘Angeda kuptepe,’ tenenge ngepu, sun Israel yala nesala neitamaida, angepu tali lupra kununge. Sun adeiyo nengda ukupmanto, ila yu singa pusdi, er jena popra, si topra doupredi, ila upu peramra utopu kununge. Deiyoda, sun Israel yala nimi deiyo nengdi, sun pe tara nesala ton ponunge. Poptamengedi sun apopmenge nesaladi taleramenge bung keca yumada, upula dalupra doronunge. Ukunge pangeda, sun popmenge neng domenge nerapuda, solupu kununge.

26 Tonda, Israel mutu neitamai talepra, ne si eremna pel donung imam-imamda, nedi, “Ange kunkamrume, angeda pio men kunkamrume,” pepra, deiamsi ngeda, sundi moupra men talenunge. Nedi peiamsi upu utopu, men peteremnung dinin, ange yaniptapra yuk ngepu peteremnunge. Tonda, ne si eremna ati pumbon neitamai kuna tep, ‘Angeda ne mawange’ tenen, wepra peiamsi telep keca yumada, mali kupra derinunge. Sun aimam-imam nengdi, ‘Angeda malinge, angeda telepnge,’ pepra, telep kupra katuai di men peteremnunge. Yuk-yuk wepra men derinunge. Tonda sun anengdi, Israel neng sun tep, ‘Allah er kangeda, akuna ngeda mali kudiserure, dinin, ange kunada, telep kudiserure,’ pepra men peteremnunga cadi, sun Israel nesalada walwalpu kununge. Tonda, sun imam nengdi, ‘Atumida, Allah er si eremna tumi, Sabat tumi konum yanmasera tep, tali pel men dopkupe. Beipye peikmepedi, Allah tepapu tenenkamepe,’ moupra men tenepmengedi tamnunge. Ukunga deiki di, sun anesala cap, sun dakunge Israel yala nesala yuma peda, ne Allah tep, gispal men donenunge. Tonda, mali kupra derinenunge.

27 Angepu gum dinin, sun Israel nesala kunge mutu neitamai, nimi deiyo kepra, taleamidi kuramitopu tupa kunung nimi deiyo neng peda, pio mali weik kununge. Ukupmanto, bura tara kuramre yu kamdi, gam kuramre keca popra, si topra jeramretopu kununge. Ada, sundi, ‘E, nunda co bo pio weik ton doproptepe’ tenen, mali kuna cap, mok upu pena cap, nimi pona cap, ikin keca dopra yuk neng nong deiki derina cap kununga deiki di, upula dorongedi isomka neng kununge. 28 Tonda, sun amali kunge deiyo neng makuna tep, Israel tara neitamai kunge nabi-nabi nengdi, mok upu cap, tali pertamna upu cap weika di penunge. Ada, sun deiyo kepra talenung neng, mali kupmange ngeda, tupa akapmarepapu, sun makuna tep mok upu penunge.

Ukupmantoda, ati pumbonda, mali keca weik akwamrepapu, nimidi, ‘Akatida urasin telep kupkamre’ tenen, bura tara dela deiki di, kurun cet palepra deipmengedi, lelimdongoramengtopu kupra, sundi lelimtamnunge. Adeiyo nengdi mali kupmange keca singitamna tep, sun nabi neng, mok upu deiki di, ‘Gume, Allahdi karepseupa, nun ken mapmupka deiki di, ange kunmaupa epmape.

Tonda, Allah er Sambaladi upepmasera cadi, ukupkamepe,’ pepra, mok upupu penunge. Dinino, sundi penge upu yumada, tali upupu pertamnunge. Sun anengdi, “Allah Yahweh, akeca-keca yuma talepra, deiki tara erepra, ila puto weik deiyo ngebo kuredi, upeipseua cadi, er si deiki di, ‘Angeda kupkamre, angeda men kupkamre,’ pepra, tali pertamnunge.

Dinino, nedi tek sisi pepsene. Aupuda, ne Allahdi, ^{▼▼Allah – Aca cap, ayat 31 capda, Ibrani upu di, ‘Adonay’ pepra sekya cadi, nundi aupu ‘Adonay’ deiyo ngeda, jenek kupra sekmupu.} akeca-keca yuma talepra, deiki tara erepra, pio puto weik deiyo ngebo kunedi, pio men pepsi. Tonda, sun aneng damai, nedi men peipmasi upupu, tali pertamnunge.

29 Tonda, sun Israel mutu neitamai kurum nesaladi, amali kun keca ton kurume. Ada, ton nengdi, ‘Isomka kunkamep’ tenepmengedi, yuk neng tep, ‘Sun adipapu co bo weik karepserume. Gum dingeda, ikin keca weik sun nong deiki derinkamsepe,’ pepra upula dipapu uang weik doronunge. Tonda, sun anengda, tali upu deiki peptapmengedi, yuk neng talenge keca upula doronunge. Sundi, bunga pio men talenge neng, tali kankan kunge nesala tep, meliptenge dinin, ange gum dipapu, sun deiki ikin keca deipra daramdongona deiki di, co bo ton upula doronunge. Tonda, karen mutu di yana, nimi bo nengda, sun Israel mutu neitamai kunung neng tep, ‘Sun adipapu co bo weik karepserume. Gum dingeda, ikin keca weik sun nong deiki derinkamsepe,’ pepra upula dipapu uang weik doronunge. Sun anengda, nimi bo nengpu kununga cadi, ware upu ton peptengepa, sun keca tamupra doproptenge do? Gume, angeda pio men kupmanto.

30 Ne Allahdi, ‘Israel nesala sun kankan neitamaida, tenpu telep ngebo ton akaptupa, angebo di amutu dana-dana tara ongopgenepra wiami lyom gel beilya, yu nengdi urumtamami ngeda, upu petupa, atara nengdi ange lepsikra doptenge. Tonda, erdi upu peptupa, sun mali kunung ngeda taptengedi, teleppu kutengepa, men wenepkamne’ tenenune. Dinino, atopu ngeboda, pio ton men kurepa men epsi. Ukupmantoda, ‘Angebo wepra deiptenepa, er di men di wiamenge lyom gel beilya dakra sakamrepa, tamupra wipredi puto kepra deriramretopu, er angebodi amutu taleptudi, telep kupra kuptuopda, nedi amutu yuma tep, ila ikin keca karena gum di, poptapra gawal men daktene,’ tenenune. Dinino, ato ngebo pio men kurure.

31 Atep ukutaruda, nedi sun Israel tara kurum nesala tep, yu kunerur ngeda dopra, sun deiki dipapu tek sisi deipkamne. Ukupmantoda, sun anesala kunung nge yuma tep, ne yu uku bu jeramre utopu kunere ngeda, sun deiki deipnepa jeryopda, sun yuma gum kupkamenge. Sun mali-mali weik kuramya utopu kupra, ikin keca weika di sun giso deiki deipkamne ja. Neda Allah Yahweh, akeca-keca yuma talepra, deiki tara erepra, pio puto weik deiyo ngebo kununa tep, ne dipapu aupu konum pepmasena cadi, ange yumada, tek sisi nong kupkamre ja.