Ezekiel 23

Yerusalem mutu cap, Samaria tara cap, kurami nesaladi, mali weik kuramya tep, domon upu deiki di pepupa, seki upu

1Allahdi ne Yeheskiel damai aupu yana peipneu.

2Uo, kanda nimidi deipkei ngebo kurume. Yerusalem mutu kunge nesala cap, Samaria tara kunge nesala cap tep, domon upu pepkuken ngeda, gekepkurume. Menop taruda, tenpu nerdi deipu ner nyapu butene, du ner cap, weit ner cap deiamupa kurerunge. 3Anerapu buteneda, sun kaber taruda, Mesir mutu neitamai kuramrei. Amutu kuramrei taru, sunda tali-tali nyana nerapu kuramreiya cadi, nimi weika di kikiman maramrei. Adeiki di, sunda kaber nerapu kuramenga utopu men kuramreipa, nimidi sun moum talerami. Men di nimi cap kikiman men maramrei dinin, ataruda, nimi di sun moum taleramidi, kikiman nyandaramya deiki di mali pio weik kuramrei. 4Anerapu butene dinin, du ner er sida Ohola. Er du ner kuramu utopu ngeda, Samaria tara neitamai kurami nesala utopu kuramu. Er weit ner sida, Oholiba kuramu. Tonda, er weit ner mali pio weik kuramu. Ange utopu ngeda, Yerusalem mutu neitamai kurami nesala tepa. Ukupmantoda, nimidi nerapu dodaramengtopu, ne Allahdi amutu butene neitamai kurami nesala tep, ‘Ne mawange’ tenen, domsipa, sundi nyapu weika di deriramrei. Aner er si Oholada, ada domona tep pepman dinin, er nongda Samaria tara kurami nesala tep pepne. Tonda, Oholiba ner si pepmanada, er nong ada Yerusalem mutu neitamai kurami nesala tep pepsene.

5Uda, Oholada konum domsipapu, erda tali-tali nyangami ner kuramu. Anerda, Asyur mutu kurami neng tep pio putaramupa, mun peramu cadi, sun cap kikiman maramidi, nyangdarami. 6Sun Asyur mutu jen talena neng cap, ton tara deiyo-deiyo neng, Bupati-bupati neng cap, jen talen neng cap, sun deiki tara kurami deiyo neng cap, yuk jen neng dinin, kuda bisam bali deiki bukra embarami neng cap, aner cap kikiman marami. Ukuramidi sun opkalda, singkaluma atonun, warna biru opkal kemami. Sun aneng-aneng yumada, urasin pio telep kaber neng kurami. 7Adeiyo-deiyo neng tep, ‘Sun cap tonpa maptepe’ tenen, tupa putaramutopu, tek sisi kikiman marami. Animi kurami mutu neitamai di, atara nesala yumadi, ‘Uo, aneng yumada, ila mambule. Nun ton putaserure,’ tenenapu kurami Anerdi animi yuma pio putanapu kuramnga cadi, sun anengdi si eremami keca, aner peda isok-isok si eremamudi er nong deikipu mali kudidaramu.

8Anerda, Mesir mutu bena kuramu taru di dipra, ataru neitamai yumada, ‘Nimi tali nyangne ner kunkamne’ tenen, putaramutopu, tek sisi tali nyangna ner kuramudi men tamamu. Nerapu nyandangedi kurameng ngeda, tupa kuramu. Sun tali nyangdana tep, er yambul taru di, nimidi er cap kikiman marami taru di, aner er moum taleramidi, sun anengdi, ‘Uo, ukupkupe,’ teneramidi putaramutopu kuramya deiki di, aner mali kupra derirami. 9Ukuramya tep nengeda, ne Allahdi aner er si Ohalada, ‘Asyur mutu deiyo neng, sunpu doptenye’ tenen, mun peramutopu, aneng tep dopra karepsi.

10Ukupsipa, sun amutu nengdi, anerda yu deiki di bananga kepra tapidi, ya di dopra poptapipa depu. Depupa, er nyapu yumada, dalupra dopropidi ateng koupdongopi. Dan tara mutu do, dakurami nerapu yumadi, ange epra kael kepi. Kael kepyopda, sundi, ‘Uo, uo, anerdi kuramu keca kupmepyopda, tek sisi amenda taru ila ikin keca nun nong deiki kupkamsere’ tenen, kware weik kurami. 11Er weit ner Oholibadi kuramupa kupunge epu dinin, moupra men kael keamu. Er du nerda, ‘Nimi cap kikiman maptepe’ tenena kangeda, yambul dipapu putaramupa, mali kuramu dinin, er weit ner Oholibada, akeca yuma pio weika di putaramnga deiki di, ila di mali-mali pio weik kuramu.

12Oholibadi, Asyur neng tep pio tupa teneramudi, putaramu ngeda, sun Asyur mutu jen talena neng cap, jen talena neng, sun deiki tara deiyo-deiyo neng cap, Bupati-bupati neng cap, Gubenur neng cap, nimi porbana tep jen talen neng cap, nimi podan taru sun nong deiki gat keca kenengami neng cap, yuk jen neng dinin, kuda bisam bali deiki di bukra embarami neng cap, yuma di aner cap kikiman marami. Ukuramidi sun aneng-aneng yumada, kaber urasin telep neng utopu kurami. 13Ne Allah di diramsipanen, tek sisi er du ner Oholadi pio mali keca taleamudi kuramua utopu, Oholiba peda, angepu kuramu. Anerda, pio mali weik kudiramupa, eipsi.

14– 15Oholiba tupa pio malipu kupbaramudi, mali kunange ton tapakra kupbaramu. Er anerda nimi buru di, ati pumbon dela deiki petupra, sekra deiami keca ton diramudi, aneng peda er dipru gidoramu. Ada, Babel mutu nimi urasin utopu sekra deiaminge, sun kenengami opkalda, yapi bi keca utopunge di palepra deiaminge tep, diramudi, er dipru gipropupa tupa teneramu. Ada, Babel mutu jen talena deiyo nengdi kemami ikat pinggang (deiyo teng utopu) urasin telepnge cap, tonda giso kouna keca telepnge cap, er si serban kemaminge cap tep, utopu cet di sekra deiaminge tepapu, erdi pio tupa teneramu. 16Oholibadi cet di agambar sekra deiaminge konum epu taruda, er anerdi, ‘Uo, animi cap ton, antaptepedi kikiman maptepe,’ tenena kangeda, pio weik kupupa, sun Babel mutu jen talena deiyo neng tep, ‘Sunda ne damai yankamrume,’ pepra, surat doproipu.

17Ukupupa, sun Babel mutu tara neng yai pangeda, er cap kikiman mapi. Ukuramyanen, sun anengdi aner tep, mali kupra deipipa, anerdi sun aneng dinada, dabal pio weik kupka tep tapu. 18Anerda, sun Asyur mutu deiyo neng tep nengeda tapu dinin, yuk nimi cap tonpa manada tupa kupbaramu. Ange konum kupkopda, anerdi dorkupyakaramu ngeda, tali nyandana nerpu inipra kupyakaramu dinin, ataruda nimi yuma dinai di mali kupbaramu. Atep, ne Allahdi er du ner tep dabal kuramneutopu, er weit ner peda ne dina dabal kunerure. 19Dinino, er anerdi, ‘Uo, neda Mesir mutu kaber kuramsi taruda, nimi weika di, kikiman tali nyangna ner kuramsa cadi, ange kuna utopu, tupa tapakra, mali weik ton cap kupbankamne. Tali nyangtamna nerpu pio kunkamne,’ teneramudi, kuramu. 20Er anerdi, ‘Uo, neda Mesir mutu neitamai kuramsi taruda, ton nengda, sun den kwamu ngeda, lyom weik kwamu. Ada, keledai bisam utopu kupupa, nyangdaramepu taruda, den me yau ngeda, kuda bisamdi weik kuramretopu kupupa epsi. Atep nengeda, aneng utopu neng cap, kikiman mapteneme,’ pio teneramudi, pio putaramu.

21Ukuramnga tep nengeda, konum kael kepsi. Oholiba kanda kaber taru Mesir mutu kuramum taruda, kan putana cap, tenena cap, kuna cap yumada, pio mali weik kuramrumtopu, ataru peda tupa ukurume. Kandi, ‘Uo, sun Mesir mutu nengdi, ne moum taleramneipa, kikiman nyangdanapu kurameputopu, amutu neng peda, ne damai yatengepa, kikiman maptepe’ tenen, tupa tenerume. Angeda konum katuai kupre. Allahdi pepu.

Allahdi Oholiba tep, wenepu upu

22Atep nengeda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi pepkene. “Uo, kanda Oholiba, menop taru kandi, ‘Uo anengda pio putanerure,’ teneramum neng dinin, amenda taru kandi, ‘Gume anengda ne songe’ tenen, dabal kupkeupa, tapmum nengda, nedi sun aneng tep, ‘Ukupso,’ pepnepa, sundi kan tep, dana-dana tara yuma di, kan damai yana warekrapmengedi, ‘Aner popkamepe,’ penkamkenge. 23Nedi kan men di mun peramum neng, Babel mutu neng cap, Pekod mutu neng cap, Soa mutu neng cap, Koa mutu neng cap, Asyur mutu neng cap, Kaeldea mutu neng cap, yana popkamkenge. Tonda sun yumada, urasin telep kaber neng kungedi, sun ila pel dona deiyo neng cap, Bupati-Bupati cap, Gubenur cap, kuda bisam bali deiki bukra emban jen neng cap, sun deiyo neng cap yumada, nedi bupra, kan damai duyankamkene.

24Sun jen talena neng gung weik kan damai yana warekra pona tep kunkamenge. Ada, arah utara tamna di, Kuda bisam ipra dubange kereta perang cap, tonda jen talen neng sun bung keca kipra deipmengepa, doupra tu deiki embaramre keca deiki bukra yankamenge. Nimi podan taru, sun nong deiki lelimna tep keca, ilange cap, yambulnge cap doupra yangedi, nimi pon parang cap, giso lelimna gat keca cap kenekmengedi, mutu dana-dana tara di, kan damai yana warekamkenge. Nedi sun aneng tep kaukeptapnepa, sundi kan tep, ‘Ange-ange kuptepe,’ tenenung ngepu, yana kupkamkenge.

25Neda yu weik kupnerepa, nedi kan tep deramnada, kan deiki deipkamkene. Sun aneng tep kaukepnepa, sundi kan tep yu weik tenekengedi, ‘Ukuptepe,’ tenekenung ngeda, kan deiki dopra deipkamkenge. Tonda, kan amul cap, kan ue capda, sektapkamkenge. Tonda kan nyapuda tomopra, ateng koupdongopmengedi, sun pe mutu dubenkamenge. Ukupmengedi, popnapu kupkengopda, sun tara neng tupa gam kurum nesalada, doroprapkengedi, gam kepman uku dongopkamkenge. 26Ukupmengopda kan nong banangapu kepra deipkamkenge. Ukupkengedi, kandi nong deiki kwerya tep kemem keca yumada, kwiriptapmengedi, dalupra doropkamkenge.

27Ange yuma ukupkamkena deiki, kan Mesir mutu kuramum taru di, ‘Uo, angeda kuptene’ tenen, pio putaramkeunge cap, tonda kan tali nyangamkeinge yuma capda, nedi gum kupra deipkamkene. Yuk tali keca yuma tep ton, kandi, ‘Akeca yana melipkamner ja’ men tenenkamrume. Tonda kan Mesir mutu kuramum taru di, kuramumnge tep, ton cap men putapkerepa, pio men tenimkamrume.

28Allah Yahweh akeca-keca yuma talepra, deiki tara erepra, pio puto weik deiyo ngebo kunedi, aupu pepne. Moupra epmemdi kael kepo! Men taru kandi, aneng cap kikiman tali nyangdararum dinin, amenda taruda, sun tep, ‘Ne dabale,’ tenepmumdi, yu kupkeupa, aneng tapmume. Dinino, nedi kan dopra, anengpu sun deikipu deipkamkene. 29Sun deiki karepkenepa, sun anengdi kan tep, pio yu tenekenunga cadi, adeiki di kan puto di pe deipra, pel domemdi derirum bung keca yumada, upula dopropkamkenge. Adeiki kanda, tali nyangna ner nong bana kemtapmengepa kuramretopu kunkamreme. Ukumempa, nesala yumadi diramkengedi, kael kemkamkenge. Akupkamkeng ngeda, kan pedi ‘Dana-dana tara mutu neitamai di, yuk mutu nimi cap maptepe’ tenen, pio putaramkeupa, kikiman kuramruma cadi, ange er menenga di kupkamkenge.

30Pio ali kuna ngeda, kan damai yarepa doropkamreme. Kanda nimi-nimi yuma cap tali nyangdaramruma deiki di, kanda sun amutu nesala, sun si eremami isok, si eremamume. Adeiki di, kan damai mali kudidaramume. 31Kanda, kan du ner, pio mali kuna bisi embaramutopu, kan peda abisipu dombemume. Atep, nedi kan wenemna tep nengeda, kan du ner, er wenemna tep, er deiki ikin keca deiamsitopu, aikin kecada dopra, kan deiki deipkamkene.

32Neda Allah Yahweh, akeca-keca yuma, talepra, deiki tara erepra, pio puto weik deiyo ngebo kunedi pepkena cadi, ange yuma tek sisi nong kupkamre, pepkene. Ada, ukupmantoda, kan du ner cangkir me mau di gwepra jeamu ngeda, kan peda utopu jepkamreme. Acangkir ilange, tonda buknge di kipra deipu ngeda, kan wenemna keca tep pepkena cadi, wenepkenyopda, yuk mutu nesala yumadi kan tep, nalepra autunange kupka cadi, kandi ange dopropkamreme. Ukupmem dingeda, ali weik dangkamrume.

33– 34Kan du ner, Samaria mutu nerda, cangkir me mau pumbon deipupa, akupunge konum dopra jepmemnyopda, kange yawaramna cap, tonda kwar kuna cap, dipru pu jena cap kupkamkere. Ange konum jepmemnyopda, kange yawarapkeredi ikin kupkamkere. Ada kan du ner, Samaria mutu nesala kuramitopu kupkamkere. Tonda, ame jenmau copredi er copropadi, kan taram deiki yuma lukra popkamkere. Neda Allah Yahweh, akeca-keca yuma talepra, deiki tara erepra, pio puto weik deiyo ngebo kunedi, angeda konum kupkamre peipsi.

35Atep, neda Allah Yahweh, akeca-keca yuma talepra, deiki tara erepra, pio puto weik deiyo ngebo kunedi pepne. Kandi ne cap, ne si cap tep, amenda keipnemumdi, tapra lupronemume. Kandi konum tapnemuma cadi, kanda ‘Nimi cap maptepe’ tenena cap, pio mali-mali weik kuna cap, mali kun keca putana cap kuramuma cadi, adeiki di kan pe dipapu ikin keipdamume.

Allahdi mali kuramrei nerapu, du ner cap, er weit cap sun deiki di ikin keca deipka tep, seki upu

36Allahdi ne Yeheskiel damai yana, aupu pepneu.

“Uo, kanda nimidi deipkei ngebo kurume. Kandi aner Ohola cap, Oholiba cap, sun wenemna tep, konum keteneipmumdi, upu bongdinkamrume do? Tonda, sun abutene nerapudi, pio mali kun keca weik kuramrei ngeda, nedi, ‘Akecada pio meme, ne songe,’ peramsi dinin, angeda ukuprei. Atep, kandi sun tep, ‘Ange yumada, pio mali kun keca cadi, ada mali pel donada, meme. Angeda gume,’ pepra wenepkurume. 37Sun tep ikin di wenepkamnada, tali tep gume. Deiyoda, sunda konum nimi yuk tali neng cap, kikiman manunge. Tonda, yuk nerapudi konum domi neng cap, kikiman maramreia deiki di, upula nyangdarami. Tonda, nimi porerunge. Tonda, ne si eremna gum di, ne tapra, yuk mutu nimi cap tonpa kunge di, isok si eremrerunge. Adeiki di, ne tep nyapu derirnenung nge yumada, popra tamrerunge. Apopra taprenge nyapuda dopra, sun si eremnung isok tep, ‘Nundi poptapmap nyapuda, aisokdi jenkamenge’ tenen, karerbarerunge.

38Tonda, sundi angepu men kurerunge. Sundi ne Allah si eremna ati cap, ne si eremna tep ketenepra deipsi beipye peingna tumi, Sabat tumi cap tep, sundi mali kupra derinerenunge. Ange yumada, ne si eremna ati pumbon dipapu mali kupra deiprei. 39Sun anerapudi, sundi deiamrei nyapu dopra, sun isok si eremna tep, popra uku dongoprei taruda, sun aweitap duapda, ne si eremna ati pumbon dinin, pio telepai yareidi, akati peda mali kupra derinererunge. Amalinge yumada, ne pe si eremna ati pumbonpu mali kupnerei.

40Angepu gum dinin, sun mutu nengdi, ‘Anerapu buteneda, yuk mutu neng cap kikiman maptengedi, upula nyangdanapu kupkamnupe,’ tenena tep, sundi yuk karen mutu neng tep surat sekra dokotepreipa, asurat dubena karepipa, ange epidi, apepmareitopu kupra yanmai. Sun aneng yaiopda, atumi dipapu, sun anerapuda, ‘Aneng cap antapmepedi, kange deipkamseng’ tenen, me gekra, asuru lingna keca likra deipreidi, urasin telep kuna tep, kweirya telep keca yuma kupra, ketenemdinmarei. 41Sun karen mutu neng konum, yaiyopda, sun anerapudi mana telepaipu bena bungamrei. Abena bukreiai, urasin tarada, meja ton deiamreinge, adeikida, jen keca yala yuma ketenepra deipreidi, ton ngeda, siltong telep pen keca cap, pio telep minyak me, er sida minyak saitun cap, ameja deiki deiprei. Dinino, akeca yumada, ne dipapu sun tep karepsisi. Ange yumada, ne gispal dona tep, ne mawangepu kwamu dinin, sundi akeca upula dopra deiprei.

42Akeca yuma ketenepra deiprei pangeda, akati bura tara di nimi upu weik gekenmangepa, ati boda kange pinng-pinga deiki di, aner dana-dana tara nimi weik bulupra yanmaidi, nimi upu weik penmaipa, gekenmai. Sun anengda, me pio gum mutu, karen mutu, katawai mutu kuramipa, ‘Yankurume,’ pepra, kongpemreipa, yanmaidi, sun anerapu butene tep, urasin telep kuna tep, kum garangna keca cap, yan dama peten kemna tep koudongon keca cap doupra, anerapu butene tep karepi. Tonda, anerapu sun giso deikida, ila neng kemdirameng galun keca, er si mahkota, ila telepngepu kepra deipmai. 43Ukupra konum karepyopda, nedi sun ayanmai neng tep pepsi. “Sunda anerapu cap kikiman upula maramrumyanen, konum mali kuptaprum nerapu butene kurunga tep, sunda, ‘Gume, yuk mutu neng ton cap kikiman upula mapteneme’ tenerung nerapu cadi, sun yuk-yuk mutu nengdi anerapu butene dopra, tali lupra nyangdanapu tupa kununge,” pepsi.

44Upepsipa, sun yanmai nimi yumadi, anerapu butene dopra kikiman maramidi nyangdarami. Ada, mali nengdi, tali-tali nyangdana nerapu cap kikiman maramengtopu kupi. Atep, sun nyangamka, pio mali kuptami nerapu, Ohola cap, Oholiba cap, sun damai yakana tep nengeda, tupa-tupa punudanapu kunmai. 45Dinino, amenda taruda, teka tenepra dumsisi kunung nengdi, anerapu butene, Ohola cap, Oholiba cap, sunda nimi yuk neng cap tali-tali nyanada cap, nimi pona cap, kuramreinge tep, ila di wenepra popkamenge. Ada tali tep gume. Sun anerapu buteneda, tek sisi yuk nerapudi domi neng, upula nyangdaramya cadi, mali weik kuramrei. Tonda, nimi yuk neng pio weika di portamamreia cadi, mali kudidaramrei. Atep walito popkamenge.

46Allah Yahweh, akeca-keca yuma talepra, deiki tara erepra, pio puto weik deiyo ngebo kuredi uperure. “Nimi yuk neng ton pepnepa, gung weik yangedi, sun tali nyangna nerapu butene, Ohola cap, Oholiba cap tep, sun deiki ikin keca yana deipmengepa, kware weik kupyopda, sun anerapu taleramrei keca yuma, upula dopropkamenge. 47Tapnepa, agung weik yankameng nesaladi, sun anerapu tep, gel dopra, anerapu sun nong deiki dopra popkamenge. Tonda, nimi pon parang ya di, dopra popkamenge. Tonda sun abutene nerapudi deiamrei nyapu yumada, adipapu popra tapkamenge. Tonda, sun domrei ati yumada, uku dongopkamenge.

48Atep, ne Allahdi pepne. Ange yuma konum kupnyopda, ange deiki di, pio mali kunange cap, mali-mali nyangdanange cap, tonda, amutu neitamai yuma, ali dangna pel donung ngeda, nedi gum kupra deipkamne. Nedi aweitap duap tep wenemnange, sun nong deiki deipkamnada, amutu nerapu dinin, yuk nerapu yuma cap, yuk mutu nerapu yuma cap, sun yuma ange epmengedi, kael kepkamenge. Ada, kael kepmengedi, ‘Sun tali-tali nyangami utopu, yuk nerapu ton pio men kunkameng’ tenen, petenkemna tep kupkamne. 49Uo, sun Ohola cap, Oholiba cap, sunda nimi tali-tali nyangdaramrumnge cap, ne tapra tali isok si eremamrumnge cap, yuk mali kunange cap yumada, ukuramreruma deiki, ne Allahdi sun tep wenepkamsene. Sun mali kunange menenga keca tep, ila di wenepkamsene. Ukupra konum kupsene pangeda, adeiki di, sundi ne tep, ‘Uo, erda, Allah Yahweh, akeca-keca yuma talepra, deiki tara erepra, pio puto weik deiyo ngebo, tek sisi kurure’ tenen, moupra kael kepkamnererume. Ne Allahdi pepsene.