Eze 24 | XteSC | STEP | Nun Israel nesalada, Babel mutu jen talen nengdi tomopseidi, ateng koupdongopra, sun pe mutu tamupra dubenamseidi ikin pel dimamseipa, dakuramepu taru di dipra, kuramupkanen, ataru neitamai dinin, keteng tamun topnebaringe (9), ware morokyonge (10), ue tanggal peda morokyongepu kepu. Atarupu Allah Yahwehdi, ne Yeheskiel damai yana peipneu.

Ezekiel 24

Allahdi Yerusalem mutu nesala tep, domon upu deiki di, pepu upu

1 Nun Israel nesalada, Babel mutu jen talen nengdi tomopseidi, ateng koupdongopra, sun pe mutu tamupra dubenamseidi ikin pel dimamseipa, dakuramepu taru di dipra, kuramupkanen, ataru neitamai dinin, keteng tamun topnebaringe (9), ware morokyonge (10), ue tanggal peda morokyongepu kepu. Atarupu Allah Yahwehdi, ne Yeheskiel damai yana peipneu.

2 Uo, kanda nimidi deipkei ngebo kurume. Atumi komuni kupmar tumida, Babel mutu yuma taleramre deiyo ngebo Rajadi Yerusalem mutu bena warekmardi, amutu nesala bisbisa kapra popkamare. Ange ukupkamar tumi tep, kandi awar cap, atanggal capda, adipapu lap pepra sekeipkurume. 3 Ne nyapu Israel nesalada, Babel mutu kurum dinin, sun tamamrumpa, Israel tara mutu neitamai tupa kunung nyapu tep, pepsene. Sundi ne upu men gekengedi, ne tep dabale kurepa, tamnenunge. Atep, kanda Yeheskiel, domon utopu upu tenpu ton, ne Allahdi kan tep pepkenepa, kandi sun Israel nesala tep perbenkurum upuda ake.

Ne Allah Yahweh, ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu deiyonge jenek kupra sekmupu.} akeca-keca yuma talepra, deiki tara erepra, pio puto weik deiyo ngebo kunedi sun tep, ukupmanto upu deiki di lap pepkusene. Ada, jen keca gamne mau pumbon, me gwepra dikdopnemumdi, ame mauda uku deiki deipkurume.

4 Pio telep domba bisam galemna tu, pio telep ngeda, agamne me mau pumbon dongopkurume. Ada domba bisam, yan galemna tu cap, teru galemna tu cap, tonda yo pio telepnge cap, ame mau pumbon dongopkurume. Adomba bisamda, malinge gum dinin, sundi peirum domba kankan neitamai di, nong pio telepngepu wepra deipkurume. 5 Domba bisam tu cap, yo cap ame mau pumbon dongopkurume. Tonda akeca yuma gamna tep, ame mau amutarada, uku deiki deipra gamna tep, co ton dopra dongopmemdi, aco deiki di, agamne me mau deipmemdi, gapmempa, me tultul pepredi, galemna tu cap, yo cap yumada, popkurure.

6 Ange yuma ukupkurma deiyoda ake. Ne Allah Yahweh, akeca-keca yuma talepra, deiki tara erepra, pio puto weik deiyo ngebodi pepsene. ‘Sun Yerusalem mutu kurum nesala kankan di, nimi weika di konum pomruma cadi, sunda bicaue. Uo, Uo sun kange moupso,’ pepsene. Sunda nimi pona nengpu kununge. Walito ikin kupre pepmasere! Amutu ati arum dopra kurum nengda, tu di telepra ketekemderinung me mau, sisilya kuramretopu kupseua cadi, asisilyada men geptaptenge. Domba bisam galemna tu ame mau pumbon dongopmamum ngeda, tu galemna tenpu-tenpu lukra doronmamumyanen, gawal dakra doropkurume. Amau pumbon ton men tapkurume. Dinino, ‘Agalemna tuda, ware ngebodi dopropkur do?’ tenena tep, nimi si sekra undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} keca men pel dopkamrume. Tali lupra lukropmumdi, bokra karepkurume.

7 Ange deiyoda ake. Yerusalem mutu ati arum dopra kunung nesaladi, nimi weika di poramye. Dinino, aportamami neng sun yapida, amutu tu deiki men diktapye. Tonda, tu deiki saka men embeu. Tu deiki sakamtu teptoda, buta cap, tu capdi akeca konum singipdoptue. Ange gum dinin, sundi, ‘Ayapida, katuaipu kupkamre’ tenen, sundi gat gel deikipu dingtamamipa, tupa akurure. Atep, agel peda buta cap, tu cap di men singipdongopu. 8 Tek sisi ngeda, ne dinadi aporami neng, sun yapida acapu tamamsipa, katuai kupu. Ayapi singidongona gum di, ukuamya deiyoda, nedi, ‘Ayapi epnyopda, sun animi ponung nesala tep, amenda taru kwang dakra popkamne’ tenen, kaupu kemtamnune.

9 Ange tep nengeda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, upepsene. ‘Sun Yerusalem mutu kurum nesala kankan di, nimi weika di konum pomruma cadi, sunda bicaue. Uo, Uo, kange moupso,’ pepsene. Sunda nimi pon neng ati arum dopra kurum mutu nesala tep nengeda, walito ikin kupkamsere! Ukupmantoda, nedi, sun wenemna keca tep, uku dongonada, co weika di ton cap, ketenepra deipnedi, aco deiki deipra, uku dongopkamsene. 10 Ukupkamne taruda, weika di wenepkamsena tep, ukupmanto ngeda, kandi uku dongon co ton cap tapakra deipkurume! Ukupmem dingeda, uku pupdongopkurume! Ukupmumdi, atu galemna kecada, ‘Tau pepkamre’ tenen, tapakra dongon keca, bumbu cap, tau pen keca cap, dongopmumdi, akeca yumada telep kupra gapkurume! Gapmumnyopda, atu galemna gapmamem meda, diktapkurume! Adomba bisam yoda dopra, uku dongopkurume!

11 Ukupmum dingeda, domba tu konum lukra yukai deipmamem gamne me mauda, dopra uku bu deikipu deipkurume. Adeiptapmamempane, uku jenmaryanen, bupu pio weik konum kupyopda, lomlom pepkurure. Ada, ‘Ame mau deiki sisilya kuamrenge konum uku jepropyopda, agamne me mau tamupra urasin telep kupkamre’ tenen, kupkamrume. 12 Dinino, sisilya kupu ngeda, uku di yuma jeproprepa, men gum kupkamre. ‘Amali ngeda, uku bupu di gum kuptue,’ tenepsidi, pio piripetepsi dinin, men gum kupmanto kupka cadi, nedi, ‘Dakwapye,’ tenepsidi, tapsi.

13 Uda, adomon upu nong neitamai ngeda, pepkusene. Sunda moupra gekepneso! Yerusalem mutu kurum nesalao, sunda pio mali kun keca weik, mali kuramrumpanen, ‘Anesalada kange di telep kupra deipkamne,’ tenepsidi, pe deipra piripetepsipanen, sunda kika deipra kumumnya deiki di, sun nong deiki konum mali kudidamumpa, nedi sun tep men telep kupra deipsetene. ‘Ange men kupmanto,’ tenepsa tep yapropsi. Dinino, sun nong deiki tupa malipu kuserure. Ukuserura cadi, sun mali kurumnge tep, ne ila yu di, pio weika di wenemkamsene. Ikin deiki di wenemanyanen, ne yu di, ‘Ukupra anesala wenepkamne,’ tenemsinge, sun deiki deipsenepa, ayu keca konum gum kupyopda, siria tarada, nedi kange di ton cap, telep kupra deipkamsene.

14 Ne Allah Yahweh, akeca-keca yuma talepra, deiki tara erepra, pio puto weik deiyo ngebodi konum pepsene. Atep, ne pepmasentopu, tek sisi kupsenyopda, akeca nong tek sisi kupkamre ja. Ne tenemsi taru konum kepyopda, ange yuma kupkamne ja. Sun mali kumum ngeda, nedi men lupronkamsene. Tonda, sun wenemna neitamaida, ‘Uo, dakwapye, angeda konuma, tapkurume,’ pio men pepkamne. Tenpu mali kure ngebo peda, men taptene, sun yuma wenepkamsene. Tonda men daepropkamsene. Tonda, ‘Uo, sun tep nengeda, bicaue,’ men tenepkamsene. Sun mali kumum keca yala-yala yuma, akuramrumutopu, sun tep wenepra popkamsene. Neda, Allah Yahweh akeca-keca yuma deiki tara erepra, ila puto weik kunun ngebodi, konum pepsena cadi, ange yuma tek sisi nong kupkamre. Allahdi ne Yeheskiel tep pepneu.

Nabi Yeheskiel, er ner depu upu

15 Allah Yahwehdi, ne Yeheskiel damai yana peipneu.

16 “Uo, kanda nimidi deipkei ngebo, kan dopmumdi kange deipmum nerda, kael men kepmamempapu, nedi kange mun keca karepnya deiki di, kan ner dopropkamne. Dopropnepa, aner depyopda, kan mali pepra engena gume, tonda kan asi me peda, men sakamkerure. 17 Kandi, ‘Uo, bicaue’ tenen, kange dipapu tenepkurume dinin, yuk neng sun nyapsilip depmengopda, sundi ngolokra mali weik peramengtopu, men kunkamrume. Ange gume. Tonda kan giso getenada, kwiripra tapmemdi embana cap, tonda kan yan kemna keca, sandal bananga embana capda gume. Sun kayapu depmangepa, deipmangedi engerameng utopu kuna gume. Tonda, yuk nengdi, ‘Yuk neng epsengedi, bicau tenepkamseng’ tenen, galuna keca di, sun urasin utara kemdongona cap, nimi depmangepa, engenmangedi, atarupu jenge jen keca roti kwaneng jeramengtopu, kan jena gume.” Allahdi peipneu.

18 Upepneupa, ipna sisada, nedi sun amutu nesala, sun damai yana upu pepsi dinin, atumi idona taruda, ne ner depneu. Depupa, mapmasa, konum bereku pangeda, Allahdi ne tep, “Ukupkamrume,” pepra, deipmaneutopu, angepu kupsi. 19 Ukupsipa, sun amutu nesaladi ne tep, “Nun naio, kandi ware keca deiyo tep, angeda kupmarem do? Kandi domum ner, ukupu depmar dinin, engena gum di, tupa embanmareme. Atep, akupmaremnge deiyo warya tep do? Nun ton lap pepseo,” pepra yana asipnei. 20 Asipneipa, nedi sun tep upepsi, “Gume, angeda, Allah Yahwehdi ne damai yana, ‘Ukupkurume,’ peipmanerpa, ange tep kunmane,” pepsi.

21 Tonda, upepsi. “Allahdi, ‘Aupuda, sun Israel nesala damai pepkurume,’ pepra deipmanerpa, sun tep yana pepsene. Ada, Allahdi, “Neda Allah Yahweh, akeca-keca yuma talepra, deiki tara erepra, pio puto weik deiyo ngebodi pepsene. Sunda, Yerusalem mutu neitamai Allah ne si eremna tep, ila ati dopruma cadi, akati epra, salnong-nong keprumdi, ‘Uo, nun puto deiki di, pio urasin telep ati konum dopmupu,’ tenerumdi kange derirume. Sunda akati doprumnge dirbana tepapu, tupa putaserepa bena lolombarume. Dinino, ne Allahdi akati uruptapnedi, sikke utopu kupra, mali kweipkamne ja. Tonda, sunda Babel mutu duyanamsei taruda, sun metek nyapuda, Yerusalem mutu neitamai tapmumpa, tupa kunung nengda, sun nyapu cap, ner nyapu capda, yu nengdi mar deiki di pona cap, parang ya ponkamenga deiki di depkamenge.” Allahdi peipneua tep, lap pepmasene. 22 Atep, Allahdi go kareprepa, yu nengdi ukupsengopda, sun amutu kurum Israel yala nesaladi, ne ner depmaupa, ne ataru kunmanpa dinmarumtopu, sun peda ukupkamrume. Allahdi upepu. “Ada, giso galuna keca di, sun urasin amutara men singipdongopkamrume.

Tonda, sun yan kemna kecada tamna gum di, sun sandal kenekra embankamrume. Tonda, nimi depmangepa deipmamumdi, engenkamrum taru dapmarum roti kwaneng capda, pio men jepkamrume. 23 Sun giso galunada, kwiripra bananga embana cap, tonda sun sandal tapra, yan bananga embana capda, men kupkamrume. Tonda, sun nyapu popmengopda, sundi mali pepra ngolongmamumdi, men engenkamrume. Ange gum dinin, sun pe mali kuramumnya, menenga di sun nongda bol mali kupkamsere. Ton ngebodi, yuk ngebo tep, ‘Uo, nun kange mun kupsere,’ pepra, engeprumudi upu pedankamrume.

24 Apepman nge yumada, kupkamsera tep, nabi Yeheskieldi ukupmantonge sun damai konum deipmasenpa, epmarume. Ataru kurpetena tep, sun damai kupmasen ngeda, doryankamre taru sun damai yaserepa kupkamrume. Atep, apepmasen keca yuma konum damai kupyopda, adeiki di sunda betapra kael kepkamnerume. Ada, ne Allahdi sun tep upepra deipsene. Ange yuma ukuprepa, sun aca kurum Israel nesaladi, ‘Uo, angeda, Allahdi yana peiamseua utopu konum kupmasere,’ tenenkamrume. Tonda, ‘Uo, Allah Yahwehdi, akeca-keca yuma talepra, deiki tara erepra, pio puto weik deiyo ngebo kurure,’ tenen, betapra kael kepkamnerume.” Allahdi pepu.

25 Tonda, Allahdi ne Yeheskiel tep pepneu. “Uda, kanda nimidi deipkei ngebo kurume. Sunda, Yerusalem mutu neitamai ne Allah, ne si eremna tep, ila ati dopruma cadi, akati epra, salnong-nongpu kumumdi, ‘Uo, nun puto deiki di, pio urasin telep ati konum dopmupu. Yuk neng yumadi, akati epmengopda, nun tep gispal dosenunge,’ tenerumudi, kange derirume. Sunda akati doprumnge dirbana tepapu, tupa putaserepa bena lolombarume. Dinino, akati uruptapkamne. Angepu gum dinin, sun pe nyapu cap, ner nyapu cap tep nengeda, yu neng tep go karepnepa, mar cap, parang ya cap di popkamenga cadi, nedi nyapu yuma doropropkamne.” Allahdi sun Israel nesala tep pepu.

26 Upepu dingeda, ne Yeheskiel tep Allahdi pepneu. “Nedi ange kupkamne tumida, nedi men dopropnedi, tapne ngeboda, Yeheskiel kan damai yaredi, ange kunmarepa, er asuru di eprenge yumada, kan damai yana lap pepkamkere. 27 Atumi pe, kanda upu dim pepra men kupkamrem dinin, atumida kandi tamupra, erdi kan damai yankamre ngebo tep, upu pepkamreme. Akupkamrema deiki di, sun Israel nesala yuma tep, peten keipkamreme. Ukupmempa, sun Israel nesaladi, ne tep, utenenkamnenge. ‘Uo, Allah Yahwehda, akeca-keca deiki tara erepra ila puto weik ngebo kurure, er pua,’ tenepmengedi, betapra kael kepkamnenge.” Allahdi upeipneupa, ne Yeheskieldi gekepsi.