Eze 25 | XteSC | STEP | Allahdi ne Yeheskiel damai yana pepra deipneu.

Ezekiel 25

Amon mutu neitamai Allahdi ikin keca karepkamnga tep, pedina upu pepra deiamu upu

1 Allahdi ne Yeheskiel damai yana pepra deipneu.

2 Kanda nimidi deipkei ngebo kurume! Sun Amon mutu nesala tep diprepmemdi, sun damai kupkamrenge lap pepkurume. 3 Amon mutu nesala tep upepkurume.

Ne Allah Yahweh, akeca-keca yuma talepra, deiki tara erepra, pio puto weik deiyo ngebodi pepra deipsisi upuda, moupra gekepkunenunge. Aupu pepsene.

Sundi ne si eremna ati pumbon, Pio Telep Lengna Ati tep, yu nengdi Yerusalem mutu bisbisa kapra, ne ati mali kupra deipnei taruda, sundi, ‘E, angeda diso! Nun kange deipmepe, Walito kununge,’ pepra kange deiamrume. Tonda, ange utopu, yu nengdi Israel nesala kurami mutu neitamai yuma mali-mali kupra deipipa, amutu walangapu kupu taruda, sundi ange epra kange deiamrume. Utopu ton, Yehuda yala nesala bisbisa kapra, ateng koupdongopra, sun pe mutu tamupra wenemna ati dongombei taruda, sundi ange epra kange deiamrume.

4 Ukuamruma tep nengeda, ne Allahdi sun Amon tara nesala tep kaukepronepa, keteng yakan tara katawai mutu neitamai kunung nesala tep go karepnepa, sunda keteng yakan tara di yangedi, sun Amon tara nesala tep, bisbisa kapra popkamsenge. Sun ayange nengdi, sun Amon mutu nesala kurum mutu neitamai, ke dodina tenda ati dopra, acapu kunkamenge. Ukungedi, sun Amon mutu nesaladi konum kouamrum co du cap, sundi peiramrum keca, sapi do, kambing do, moum teyung kwamrenge capda, upula dopra jepkamenge.

5 Tonda, sun tara neitamai dinin, mutu si Raba mutuda, sun ati arum dopra kurum mutuda, tamupra dopropnedi, nedi unta bisam pein mutu keipkamne. Tonda Amon tara mutu yumada, nedi tamupra dopropnyopda, domba bisam pein mutu keipkamne. Ukupnepa, sundi ne tep, ‘Uo, Allahda, erpuda, ila puto weik deiyo ngebo kurure,’ teneprumudi, betapra kael kepkamnerume. 6 Ange yumada, tali tep men pepsene. Deiyoda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi pepsene. Menop taru pe, ataru peda, sun atara neitamai kurum nesaladi, Israel tara neitamai kunung nesala yuma tep, ‘Sunda tali nesala pua, dakwapye,’ tenerumudi, yanitamrume. Sundi, Israel tara nesala tep, ikin keca sun damai yaryopda, sun Amon tara kurumu nesala yumadi, ‘Walito’ tenen, kange deiprumdi, buru tang bongopra mut semrume. 7 Ukupra kuruma tep nengeda, ne Allahdi yuk mutu nesala yuma dopra, sun deiki di deipsenedi, go karepnepa, sun anesala yumadi, sun Amon mutu nesala, sundi taleramrum bung keca cap, sundi peiramrum keca cap yumada, dalupra dopropkamsenge. Nedi sun tep ukupnya deiki di, gum kupra deipkamsene. Ukupsenepa, sun yala neng ton gawal daknyopda, sun tupa men kunkamrume. Tonda, sun mutu tu ton, men kapkamsere. Sun cap, sun keca yuma cap, gum kupra deipnedi, gawal dakamsene. Ukupsenepa, sundi ne tep, ‘Uo, tek sisi Allahda, akeca-keca deiki tara erepra ila puto ngebo kurure, er pua’ tenen, moupra kael kemkamnerume.

“Moab mutu nesala tep, wenepkamne,” pepu upu

8 Ne Allah Yahwehdi, akeca-keca yuma talepra, deiki tara erepra, pio puto weik deiyo ngebodi, aupu pepsene.

Sun Moab tara kunge yala neng cap, Sier mutu kunge nesala cap tep aupu peipsene. Sundi, “Gume, Yehuda yala nesala peda mambul gum nesala kununge. Sunda, yuk-yuk mutu nesala yuma utotopu kununge. Nun kangeda, sun yumada mambul nesala guma tep, nun amutara neng utopu kununge,” pepra, mali pepra auturamrume. 9 Sundi ukupra Yehuda tara nesala tep mali upu peramya tep, ne Allahdi tek sisi pepne. Moab mutu tu wilimdonai, ila ati arum dopra, kunungai yumada, popnedi yawa popra tapkamne. Ada sundi, ‘Amutu-amutuda, pio telep mutu. Amutu kunge puto nengdi, kalengkamsenge. Nun Moab tara neitamai kunup nesala tep, ‘Yuk mutu yu nengdi yana popsenung’ tenen, kalengkamsenge,’ tenenunge. Tonda, sundi, ‘Nun tara neitamai, ila ati arum ton dopmepupa, amutu-amutu yumada, yambul mambul dinin, pio mambul mutuda, ange,’ tenenung mutuda, nedi uruptapra sikke buktapkamne. Ada, Bet-Yesimot mutu cap, Bahal-Meon mutu cap, tonda Kiryataim mutu capda, nedi amutu neitamai kunge nesala yuma popra yawaraptapkamne.

10 Ukupne dingeda, ne Allahdi asi pepman weneri mutu cap, tonda sun Amon yala nesala kunge mutu cap, popnedi, amutu yuma dopra, sun keteng yakan tara di, poryankameng mutu kunung neng tep, karepkamne ja. Sun Moab tara yuma dopra, sun keteng yakan tara kunge nesala, sun buru deiki deipnepa, sundi amutu doropmengedi, sundi, ‘Amutu-mutu yumada, ukutaru nun mutu sisa kepra deipmepe,’ tenepmengedi, sun mutu talepra kunkamenge. Ukupmenge pangeda, amenda taru, yuk mutu nesala ban-ban yumadi, Amon yala nesala tep, ton tupa men tenenkamenge. Lumdongonapu kunkamenge.

11 Ange utopu, ne Allah dipapu sun Moab yala nesala peda, sun wenemna tep, ikin keca dopra, sun deiki deipkamne. Wenepnya deiki di, sun Moab tara nesaladi ne tep, ‘Uo, tek sisi Allahda, akeca-keca deiki tara erepra, ila puto ngebo kurure. Ada, er pua’ tenen, moupra kael kepkamnenge.

Allahdi, “Edom mutu kunge nesala tep, wenepkamne,” pepu upu

12 Ne Allah Yahwehdi, akeca-keca yuma talepra, deiki tara erepra, pio puto weik deiyo ngebodi, aupu pepne. Menop taru, sun Edom tara kunge nesaladi, ‘Yehuda yala nesala tep, kwangdaktepe’ tenen, tupa teneramya di, Yehuda yala nesala tep Edom mutu nesaladi kwang dakya deiki di, konum mali kupye. Ne tepapu, pio mali keca kupipa, ne yu weik kupneu. 13 Sun Edom yala nengdi, ange kupya tep, ne Allah Yahwehdi, ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu ‘Adonay’ deiyo ngeda, jenek kupra sekmupu.} akeca-keca yuma talepra, deiki tara erepra, pio puto weik deiyo ngebodi, aupu ton pepsene. Ne buru di Edom mutu nesalada, popra wenepkamne. Nedi amutu kunung nesala cap, sundi peinung keca yuma capda, popra gum kupra deipnedi, gawal dakamne. Nedi amutu kunung nesala cap, sundi talepra peinung gam keca cap yumada, gum kupra deipnepa, ati walangpu kupkamre. Ada, nedi Moab tara neitamai, mutu si Teman mutu neitamai cap, adi dipdongopra Moab tara dinin, arah selatan, mutu si Dedan mutu cap yumada, anesala pe, sundi peinung keca peda, parang ya cap, mar cap di popnepa depropmenga deiki di, gum kupropkamre.

14 Ukupkamnada, ne mawa neng, Israel nesala, sun tep talepnedi, puto weik karepnepa, sundi Edom tara neitamai kunge nesala tep, kwang dakra popkamenge. Ne Allah pio ila yu kupneupa, sun Amon mutu nesala tep popra wenepkamnetopu, ne nyapu sisa, Israel nesala puto kepra deipnepa, sundi Edom mutu nesala popkamenge. Ukupmengepa, sun Moab mutu kunge nesala yumadi kael kepkamenge. Ada, sundi, ‘Uo, Allahdi nun tep konum kwangdakmasere’ tenen, betapra kael kepkamnenge. Ange yumada, ne Allah Yahwehdi, akeca-keca yuma talepra, deiki tara erepra, pio puto weik deiyo ngebodi, aupu pepmasena tep, ange yuma tek sisi kupkamre ja. Ne konum peipne. Allahdi pepu.

Allahdi, “Filistin mutu kunge nesala tep, wenepkamne,” pepu upu

15 Ne Allah Yahwehdi, akeca-keca yuma talepra, deiki tara erepra, pio puto weik deiyo ngebodi, aupu pepne. Sun Filistin mutu nesaladi, ‘Nun podana tep nesala, Yehuda tara kunge nesala tep, kange deipmepedi, tupa-tupa kwangdakra poryakankamnupe. Sun tep yu weik kupsera cadi, tamna gum di, pio poryakanapu kunkamepe,’ tenerami. Adeiki, sun Filistin nesaladi, Yehuda tara neitamai, Israel yala nesala tep, pio weik potamami. 16 Ukuramya tep nengeda, ne Allah Yahwehdi akeca-keca yuma talepra, deiki tara erepra, pio puto weik deiyo ngebodi, aupu pepne. Ne buru di, sun Filistin mutu nesalada, popra ila di wenepkamne. Sun Filistin nesala dinin, Keret mutu nesala tep, bena popnedi, gum kupra deipkamne. Tonda, dapu tara ila laut mokon, er si Laut Mediterania pirmanai mutu tupa gam kunmange nesala peda, ne dipapu popkamne. 17 Nedi sun tep, ila yu kupmanera cadi, sun wenemna tep nengeda, ila ikin keca, sun deiki deipkamne. Tonda nedi sun tep, ‘Anesala kwangdakamne,’ tenepsinge dopra, sun deiki deipnapu kupnyopda, kange telep kupkamnere. Ataru ne yu weik kupnerenge di, sun tep ila di wenepkamne. Ukupra kwangdaknyopda, sun Filistin nesala yumadi, ne tep, ‘Uo, tek sisi Allahda, akeca-keca deiki tara erepra, ila puto ngebo kurure. Ada, ‘Er pua’ tenen, betapra kael kepkamnenge. Ada, ne yu deiki di sun tepapu ila di wenepnedi kwangdaknyopda, adeiki di, ne Allah tep, ‘Uo, er pua’ tenen, betapra kael kepkamnenge.