Eze 26 | XteSC | STEP | Babel mutu doupra benamseipa dakuramupkanen, keteng tamun 11 tahun konum kepu taruda, tenpu war gonga kepu tumi, tanggal satu 1 kepu tumida, Allah Yahwehdi ne damai yana aupu pepneu.

Ezekiel 26

Tirus mutu neitamai, Allahdi amenda ikin keca karepkamoga tep, pedina upu pepu

1 Babel mutu doupra benamseipa dakuramupkanen, keteng tamun 11 tahun konum kepu taruda, tenpu war gonga kepu tumi, tanggal satu 1 kepu tumida, Allah Yahwehdi ne damai yana aupu pepneu.

2 Kanda, nimi tuai nengdi deipkei ngebo, moupra gekepkurume. Tirus mutu neitamai kunge nesala yumadi, ila kange deipmangdi, Yerusalam mutu tep upenmange. “Uo anesalao, sunda moupra diso! Nesala ban-ban yuma kunge nesaladi putaramu bung keca dopra, acei di yuk karen mutu weika di, dokotemamipa, dopromi. Yerusalemda, kunumna weik keca deiyoi di, yuk mutu-mutu weik dokotemamyai dinin, ukutaruda, yuk mutu yu jen nengdi, Yerusalem ila ati arum konum urupra tapmangpa, akati arum domi lyom beilya wengna abisi buplan deiami pintu gerbang ngeda, konum uruptapi. Atep, nun menmena di tali lupra, Yerusalem mutu wektepe. Tonda, ukutaruda, sun dana-dana tara mutu neitamai kunge nesaladi, nun Tirus mutu kunupaipu yangedi, akeca-keca yuma kunupmengopda, nunpuda isomka neng kunkamepe,’ pepi.

3 Ukupra pepruma tep nengeda, ne Allah Yahwehdi, akeca-keca yuma talepra, deiki tara erepra, pio puto weik deiyo ngebodi, aupu pepne. Sun Tirus mutu kurum nesala, sun tep ne yu weik kupmanera deiki di pepsene. Sunda ne pona tep nesala utopu kuruma tep, upepsene. Laut mokon deiki ombak puto weik yakaramre utopu di, nedi yuk mutu nesala ton dopra deipnepa, sun Tirus kurum mutu yuma warengyakankamsenge. Sun aneng yakankamengada, sun tep poryakankamsenge.

4 Sun yuk mutu neng poryange dingeda, sun Tirus mutu nengdi lyom gel beilya wiprumnge cap, ‘Yu neng poryankameng taru, telep kupra eptepe’ tenen, gel beilya deiki domrum ila lyom ati cap yumada, urupra sikke buktapkamsenge. Sundi ila ati arum domrumnge yumada, uruptapmengepa, sikke buktapkameng keca cap, sun tu capda, nedi gum kupra deipnepa, amutu yumada, gelpu katuai belepkamre. 5 Tirus mutuda, ila laut mokon pirmanai kwamu mutu cadi, sun ati arum yuma urupra sikke buktapkameng keca, nedi gum kupra deipnyopda, gelpu beleprepa, sun mekina yangne nengdi, sun mekina tomon keca, er si jalada, amutu gel belepya deiki kalapkamenge. Ne Allah Yahweh, akeca-keca yuma talepra, deiki tara erepra, pio puto weik deiyo ngebodi pepsena tep, apepmasen kecada, tek sisi kupkamre ja. Tirus mutu neitamai kapu keca cap, nimi cap yumada, nimi yuk mutu nengdi tali lupra dalupra dopropkamenge. 6 Tirus mutu mokon pirman dinin, yambul tuai tara ati arum domidi kunge nesala yumada, yuk mutu podan nengdi yu kuprepa, parang ya doupra, Tirus mutu nesala popmengepa depkamenge. Ukupmenge pangeda, sun Tirus mutu tupa gam kunkameng nesaladi, ‘Uo, tek sisi Allahda, ila puto weik ngebo kurure. Er pua,’ tenepmengedi, ne Allah tep moupra kael kepkamnenge.

7 Apepmasen upu yumada, tali tep men pepsene. Deiyoda, ake. Ne Allah Yahweh, akeca-keca yuma deiki tara erepra, ila puto weik ngebodi pepsene. Nedi, Babel mutu yuma talepra, nimi deiyo ngebo Raja Nebukadnezar, Babel mutu di doupra yanepa, sun Tirus mutu kurum neng tep yana warekamsenge. Ada Raja ila puto ngebodi, er jen talena neng cap, tonda Kuda bisam bali deiki bukra nimi pordarbanai jen talena neng cap, kereta perang deiki bukra porbana neng cap doupra, sun Tirus mutu neng tep, poryankamsere. Erdi jen talen neng pio weik doupra poryankamre. 8 Nimi gung weik, laut mokon pirmanai gum dinin, Tirus mutu ban tara, ila ati arum dopra kurum nesala yumada, popdankameng taru di, nimi weik popmengepa depkamrume. Sun pon nengdi amutu ongopgenepra domrum lyom beilya damaida, tu palipra deipmengedi, ange deiki welepmengedi, parang ya cap, mar cap di popkamsenge. Tonda, ila gel beilya wiamrumnge peda, tu palipra erepra deipmengedi, ange welepra popkamsenge. Tonda sun Babel mutu jen talena nengdi, ‘Mar dopmengepa, taramai bekserur’ tenen, lelimne keca, er sida perisai ketenepmengedi, dopkamenga cadi, sun Tirus nengdi, mar dopmumnya peda, men benkamre.

9 Nimi deiyo ngebo Raja Babel ngebodi peprepa, er jen talena nengdi, sun Tirus mutu ila lyom gel beilya wiprumnge yumada, agel beilya urumne keca, ila ikin keca di doupra bengedi, sun gel beilya damai bongopmengedi, urupra tapkamenge. Tonda, ‘Yu neng mar poryasengedi, menmena di epkamep’ tenen, sun beiyla deiki ila lyom gel ati ton doprumnge yumada, kapak ya cap, besi keca cap di urupra tapkamenge. 10 Sun nimi mar porbana tep ketenepkameng kuda bisam gungda, pio weik cadi, ataru mar porbangedi, sepdaro tu deiki bangepa, tu deiki bute welepredi, sun kunkamrum mutu yumada inipronkamre. Tonda, kuda bisam bali deiki bukra benkamenge neng cap, kereta perang deiki bukra podarbenkameng nengdi, sun Tirus mutu ila ati arum dopra, kumumyai wekunga tep, sepdaro bangepa, lelim pepya deiki di, ila gel beilya wipinge yumada, long-long pepkamre. Ange kupkamengada, sundi konum ila gel beilya wiamumnge cap, buplan potokeiamumnge cap, konum uruptapmangedi, amutu wekunga tep, lelim weik pepkamenge.

11 Kuda bisam bali deiki bukra embenkameng jen nengdi, sun mutu neitamai bisi embaramumnge yumada, mali kupra deipkamsenge. Tonda, amutu neitamai kunkameng neng yumada, jen talena nengdi parang ya cap, tema cap doupra embengedi, popmengepa, depkamenge. Tonda, sun ila lyom gel ati puto kemdongona tep, ila gat ayumnya di, ikra domrum ati yumada, urupra tapmengepa, alyom ayumna saka dourbenkamenge. 12 Tonda, sun Babel mutu neitamai podan nengdi, sun Tirus mutu nesaladi talepra deiprum kunumna weik bung keca cap, sundi, ‘Amenda kunupkamep’ tenen, mawa deiamrum keca yuma cap, dalupra dopropkamsenge. Tonda sun ila lyom gel beilya wiprumnge cap, pio urasin telep ati doprumnge cap yumada, urupra tapsengedi, sikke buktapkamenge. Ukupmenge dingeda, akati domenge gel cap, ati dela co cap, sikke buktapkameng keca cap yumada, dopra laut mokon neitamaipu donokamenge.

13 Ange yuma ukupkameng keca deiki di, nedi sun mut pemumnge cap, mut pena tep keca, bung-bung pena er si kecapi cap, upu seknepa, pio dimpepkamre. Nimidi ton men gekenkamenge. 14 Ne Allahdi, sun mutu keca yuma, gum kupra deipnedi tapkamne kecada, tali gelpu yopu belepredi, katuai kuprepa, mekina yangne nengdi, sun mekina yangne keca, er si jalada, agel deiki kalankamenge. Amutu ila ati arumda, kange di ton tamupra men dopkamenge. Apepmasen upuda, tek sisi kupkamre. Angeda tali men pepsene. Deiyoda, neda Allah, ila puto weik kunun ngebodi pepsene. Tonda, neda Allah Yahweh, akeca-keca yuma talepra, deiki tara erepra, pio puto weik deiyo ngebodi, konum pepmasena tep, ange yuma tek sisi nong kupkamre.

15 Allahdi, ange konum pepkopda, aupu ton dukdongopra pepu. Neda Allah Yahweh akeca-keca yuma talepra, deiki tara erepra, pio puto weik deiyo ngebodi, sun Tirus mutu nesala tep pepu. Sun Tirus mutu nesala, ila laut mokon pirman tara kunge nesala yumada, mambul kange doupra, ‘Uo, uo,’ tenepmengedi, kwar pio weik kuprepa, sun nong yuma moropsepkamenge. Tonda, Babel mutu jen talena nengdi, sun tara nimi weik popra bisbisa kapmengepa, epmengopda, mambul kange doupkamenge. Tonda, sun tara neng popmengedi tapmengepa, tupa gam kukameng nengdi, mali pepra, engenmangepa, alaut pirman tara kunge nesala gekepmengedi, ‘Uo, uo’ tenen, kware weik kunkamenge.

16 Ange yuma kuprepa, epra kael kepsengedi, mokon pirman talepra kunge deiyo neng, sun laut pirmanai kunge Raja-Raja neng yumada, sun ila bungne keca deiki di tapra, kwerepmengedi, sun nimi deiyo neng kenengne opkal, urasin pio telep juba kwiripra tapkamenge. Tonda, sun opkal urasin telep kupra wiamenge ngeda, kwiripra donokmengedi, sun nong yuma moropsepra, tu deiki bukamenge. Ataruda, sun kware pio weik kuprepa, upu pena gum dipapu, tali dimpepra bukmengedi, sun Tirus nesala ikin weik kupkamrum ngeda, dinapu kungedi, ‘Uo, uo’ tenenkamenge.

17 Ange kupre pangeda, sun Raja-Raja nengdi nimi depmangepa, deipmangedi, mali kange doupra perameng mut, sun Tirus mutu nesala tep upenkamenge.
Uo, uo, Sunda, ila laut mokon deiki embaramrum nengdi, laut pirmanai, ila telep ati arum domrumpa, yuk mutu nesala yumadi, kael keamidi, ‘Uo, sunda ila mambul mutu nenge. Amutuda pio telepe,’ teneramsei dinino, sun kuramrum mutu cap, domrum ati cap, peiramrum keca yuma capda, konum gum kupmare.
Sun ila laut mokon deiki di, gapung co, er si ila kapal laut domrumnge yuma wekra, laut mokon neitamai di embaramrumpa, yuk mutu nesaladi sun tep kware tenerami. Ada, sundi laut mokon deiki embaramruma deiki di, sun yuk mutu-mutu dakurami nesala yumada, sun Tirus tara nesala tep, kware weik kurami.
18 Dinino, ukutaruda, sundi talepra puto weik kuramrum keca yumada, konum gum kupmare. Sun Babel mutu jen talena nengdi, sun tep konum bisbisa kapseidi, sun keca yumada, konum sikke buktapseidi, gum kupra deipsei.
Ukupseia cadi, ukutaru, laut mokon pirman kunge nesala yumada, kwar weik kupre. Atumi di, mokon pirman kunge nesala yumada, ange kuprepa, kael kepmangdi, ila kware weik tep, sun nong moropsemare. Tonda, ila kange mun kange dopmangdi, lukdanmange. Tonda, sun nong yuma moropsemare.

19 Neda Allah Yahweh, akeca-keca yuma talepra, deiki tara erepra, pio puto weik deiyo ngebodi, pepsene. Nedi Tirus tara mutu neitamai yuma, gum kupra deipne pangeda, sun mutuda nimi men kuramenge mutu utopu dim bulung pepkamre. Sun mutu yumada, ati walangapu kupkamre. Tonda, nedi ila laut mokon me dopra, sun deiki deipsenyopda, laut mokon neitamai di dopra deipsenepa, sun mutu keca yumada, laut mokon di singipronkamsere. 20 Ataruda, nedi ukupkamne. Sun nongda doproipsenepa, pumun taru konum derami neng, sun sambala bena kuramyaipu deipsenepa, kunkamrume. Nedi sun nong dopra, nimi dena neng sun mutu, pio tu pumbon bena taprosenepa, acapu pio dakunkamrume. Sun mutuda, nimidi ati urupra tapmengepa, pio belelemamra utopu mutu kupkamre. Sundi talepra kurarum mutuda, kange di tamupra, lepsisikra men dopkamenge. Sunda, kange di tamupra, men yana gam kunkamrume. Tonda gam tupa kunkameng nengdi, sun urasin ton, pio men epkamsenge.

21 Sun Tirus mutu neitamai kunung nesala, sun wenemna tep, nedi ange yuma kupkamsen ngeda, ila kange mun nge, men tenipmanto ikin nge, sun deiki deipsenepa, yuk gam kunkameng nesalada, kael kepkamenge. Kael kepkameng dinin, sunda, ton cap pio men epkamenge. Tonda amutu tupa gam kunkameng nesaladi, ‘Uo, sun Tirus mutu kurami nengda, dan cei kunung do?’ tenen, sun tep epetepkamkeng dinino, pio men epkamsenge. Neda Allah Yahweh, akeca-keca yuma talepra, deiki tara erepra, pio puto weik deiyo ngebodi pepsena cadi, ange yumada tek sisi nong kupkamre ja.

Allah Yahwehdi pepu.