Ezekiel 28

Allahdi, “Tirus mutu talepra kuramu nimi deiyo Raja ngebo wenepkamne,” pepu upu

1Allah er si Yahwehdi, ne Yeheskiel damai yana pepneu.

2“Uo, kanda nimi sisadi deipkei ngebo, kandi Tirus mutu ila nimi deiyo ngebo tep, lap pepkurume. Ada, “Neda Allah Yahweh, akeca-keca yuma talepra, deiki tara erepra, ila puto kune ngebodi pepra deipkun upuda, nimi deiyo ngebo Tirus mutu Raja tep, aupu lap pepkurume.

Ada, Tirus mutu Raja kan dipru kange erepmuma deiki di, upepmume. ‘Neda, Allah utopu ngebo kunune. Nedi ila laut mokon neitamai, mokon dana-dana tara sekdongopu mutu, pulau deiki teknepa, tali nimidi, ne si eremkamnenge,’ tenepmumdi pepmum ngeda, tali upu deiki di pepmume. Dinino, tek sisi ngeda, kanda, Allah utopu ngebo pio gume, kanda tali tuai ngebopu kurume. Angeda moupra tenepkurume.

3Kanda, kange di ton cap, moupra tenepetepkurume. Tek sisi kanda ila kael kemna ngebo kureme. Pumun taru kuramu ngebo, nabi Daniel er kael keamngada, weik dinin, erda yambulanunto, dinin, kanda tek sisi ila di kael keamume. Yuk tali nengdi men kael keptenge keca, Allahdi inimrepa, men kael kemnung dinino, kanda yambulanun dewa-dewa (isok-isok) utopunge kuruma cadi, kandi akeca-keca yuma konum kael keamume. Akeca-keca yumada kan tep men inimrure. 4Ila kael keamum nge cap, ‘Telep kunada ake’ tenen, moupra teneamumdi, nong neitamainge ton kael keamruma deiki di, tuai keca yuma doromemdi, isomka ngebo konum kurume. Tonda, kunumna weik keca, er sida emas cap, perak cap, ‘Ange yumada, ne mawangepu kurure’ tenen, weika di dopropmumdi, akeca, er mawa derin ati neitamai konum deriramumpa, pio weika di kupmare.

5Angepu gum dinin, tonda ila kael keamruma cadi, akeca-keca yuma dopra, ange bulupra deipmum keca, kange di tamupra yuk mutu nesala tep, kunumemnya deiki di, ila isomka ngebo konum kurume. Ange yuma ukumemnya deiki di, ‘Neda ila isomka ngebo kunune’ tenen, kan dipru kange erepra gemerume. 6Ange tep nengeda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, pepkene. ‘Kanda, Tirus mutu yuma talepra, nimi deiyo Raja kepra talerum ngebodi, ‘Ne kange dipruda, Allah utopu ngebo kunune. Neda tek sisi ila kael keamsa tep, Allah er teneretopu, ne peda utopu tenenune,’ pepra, salnong-nong kurume. Ada, kandi, ‘Neda Allah utopu ngebo, ila kael ngebo kunune,’ teneruma tepa.

7Ukupra teneruma cadi, nedi tek sisi pepkene. Ne Allahdi yuk karen mutu nimi bo neng doupra yanepa, kan tep poryakankamkenge. Ton mutu nengda, yu weik neng kunung dinin, nedi kan deiki duyana deipkamkene mutu nengda, pio ila yu weik neng kungedi, yuk mutu nesala yuma tep nengeda, bicau pio men tenenunge. Yuk mutu neng tep, adipapu ila yu di, poptapra gawal dangmenge nengpu kununge. Ayu neng dopra, kan deiki deipkene pangeda, sun mar podana keca cap, nimi pon parang ya takke weik keca cap doupra yangedi, warekra popkamkenge. Ukupmengedi, kan ila kael kepmuma deiki di, urasin pio telep keca bulupra deriramum keca cap, kan ati neitamai bulupra deipmumdi kunuamum urasin telep keca yuma peda, sikke bukra tapmengedi, mali kupra deipkamenge.

8Ukupmenge dingeda, kan nong peda, popkengepa, depmemnyopda, yuk nengdi kan nong dopra popkengopda, konum deami nesala bei mutu, ila lyom pumbon neitamai bena kunkamrume. Ukupkenge pangeda, laut mokon deiki embana neng, nimi popmengepa, depmengedi kuramengai, ada laut mokon pumbon neitamaipu, bena kunkamrume. 9Ukupkamkenga tep nengeda, yuk karen mutu nengdi, kan popkukenge neng tep, kandi, ‘Gume, neda Allah utopu ngebo kunune pepkamrem do? Gume, sundi kan tep konum kael kepkeiya tep, kan tep poptapkamakeng neng tep, kandi, ‘Gume, neda Allah utopu kunune,’ peptuma peda, sun anengdi tek sisi konum kael kepkei. Ada, ‘Erda, Allah utopu ngebo gum dinin, tali tuai ngebopu kurure’ tenen, betapra konum kael kepkei.

10Tek sisi pepkene. Nimi bo nengdi, ‘Angeboda, Allah er mawa ngebo gum cadi, erda sun den bam bol deiki tara sengmenge neng utopu gume. Atep, erda tali lupra poptaptepe,’ tenepkengedi, kan nong popkengepa, depkamreme. Neda, Allah Yahweh, akeca-keca yuma talepra, deiki tara erepra, pio puto weik deiyo ngebodi, aupu pepra deipkena cadi, ange yumada, ne lap pepmakentopu, tek sisi kupkamre ja! Ada, ‘Ne Allah Yahwehdi pepkena tepa,’ pepne.

Tirus mutu talepra, nimi deiyo ngebo kuramu Raja, popi upu

11Ne Yeheskieldi pepsene, angepu gum dinin, Allah er si Yahwehdi, ne Yeheskiel damai tep yana, upepne upuda ake.

12Uo, kanda nimi sisa di deipkei ngebo kurume. Kandi, ‘Uo’ tenen, kange lon mut, Tirus mutu talepra, Raja nimi deiyo ngebo tep, tenepmemdi, engena deiki di mut pepkurume. Neda, Allah Yahweh, akeca-keca yuma talepra, deiki tara ila erepra, ila puto weik kune ngebodi pepra, deipkusen upuda, gekeprumudi, lap pepkurume. Ada, kan pumun taruda, pio telep ila nimi deiyo ngebo kuramume. Tonda kanda pio urasin telep ngebo kuramumdi, akeca-keca weika di kael keamrume. Ataruda, kanda pio-pio telep-telep tep, teleppu kuramume.

13Kan kuramum mutuda, Eden ban mutu kuramume. Ada, Allah erdi, pio telep paramre keca yala-yala yuma kouamngai kuramume. Kan opkal deikida, urasin pio telep kunumna weik gel di palepra wipra deipipa, ange kenengamume. Ada, Yaspis gel yapi binge cap, Krisolit gel cap, Yaspis gel poronge cap, Pirus gel permata cap, Krisopras gel cap, Nefrit gel cap, Lasurit gel cap, yapi bi gel cap, Tonda agel neitamai ongopdongopi ngeda, pio telep emaspu kwamu. Tonda, urasin telep keca dipapu petuprapidi, ketenepra deipi ngeda, pio teleppu kupu. Akeca yumada, kan ketekepra deipkeu taru, adipapu akeca ketekepra deipkei.

14Ne Allahdi, kan nong dopra, ila puto weik malaikat, er si Kerub utopu kupra deipkesi. Ada, ne Allah kun dam, mali keca pio men kururai, pio telep lengna mutu deiki deipkesi. Tonda, amutu deipkesipa, bisi embaramumai yumada, dirin pio weik gel deipsipa, er dirinda uku laramretopu, pio kunumna weik melang-melang peramu gel deipsaipu embaramume.

15Nedi, kan ketekepra deipkesipa, menmena taru kuramum taru yumada, kan kange di tenepra, mali kunange ton men kwamume. Pio telep ngepu kuramume. Dinino, amenda taruda, kan kange di malinge ton teneamuma deiki di mali kuramumpa, epra kael kepkesi. 16Kan Raja cap, kan tara neng cap, sun bunga weik bulupra deipmarumdi kunupmaruma deiki di, mali kun keca weik kupmarumdi, sun amutara kunge nesala tep, yaniptapra ikin keca sun nong deiki deiamrume. Ukuruma tep nengeda, kan dumsisi kuna gum tep, ne Allah kun dam men yanmanto kuramrume. Sundipu ukupra deipdanmaruma tepa. Atep, nedi kan tep, ‘Angeboda, pio mali cadi, ne songe,’ tenepsidi ne kun dam, pio lengnai di enepra donokesi.

Men taruda, pio telep mutu kalengna tep ketenepra deiamkesipa kuramum ngeda, konum gum kupra deipkenedi, nedi peipsipa, im deiki malaikat, er si Kerubdi, kan tep enepra bura tara dokotepkeupa, urasin telep kunumna weik melang-melang peramre gel damaida, ton cap tupa pio men kunkamreme. 17Kan nong bolda, urasin pio telep kupkeua deiki di, dipru kange erepra gemepmume. Tonda kan dipru kange erepra gemepmuma deiki di, ‘Pio urasin tapakra telep ton kupkamne ja,’ teneamum dinin, mali kweipdamumnya deiki di, kan pio betapra kael keamum keca yumada konum pio mali kweipmume. Ange tep nengeda, nedi kan nong tuai mutu dokotepkesipa sakmumpa, sun ban-ban yuma kunge Raja nimi deiyo neng, sun asuru dinai di ukupkesipa, sun yumadi kan mali kuramum ngeda, konum epra kael kepkeie.

18Kan cap, kan tara neng capdi, mali pel weik dopra, mali kun keca kuprumnge cap, tonda, bung keca kunumumdi, kange tenena di, tali mok upu peramrumnge cap, inipra kururnge cap, tonda ange yuma ukurumnya deiki di, sun isok si eremna tep, keteneiprumai yumada, mali kupra deiamrume. Ange tep nengeda, sun wenemna tep, nedi uku dokotepsipa, sun ila ati arum dopra kuramrum mutu yumada, uku di jepra gawal dakudi, sun ati-ati cap, sun nong yuma cap jepropupa, sikke utopu kupseupa, nimi dana-dana tara nesala yumadi epsei. 19Sun dana-dana tara kunge nesala ban-ban yuma, sun Tirus mutu nesala tep kael kepsei nengda, ange kupupa, epseidi lukdana, yo berber pepupa, sun kange mun weik kununge. Sun Tirus mutu nesalada, sun gam kuramrumnya sirya taruda, kange mun ngepu, sun damai konum yana kupmasere. Atep, kanda Raja ngebo cap, kan amutara kunge neng capda, ton cap pio men kunkamrume. Pio atep, gum kupra deipmasene.

Allahdi Sidon mutu nesala tep, amenda taru ikin keca deipkamunge tep, pepu upu

20Amenda taruda, Allah er si Yahwehdi, ne Yeheskiel damai yana, upepneu.

21Uo, Yeheskiel kanda, nimi sisadi deipkei ngebo, kan urasinda, Sidon mutu tara dimemdi, amenda taruda ikin keca sun nong deiki deipkamsen nge tep, nedi peipkenetopu, kandi tamupra, ‘Sun tep wipdongopkamsere,’ peipkurume. 22Tonda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, apepkene upuda, kandi, Sidon mutu neng tep peipkurume. Ada, Sun Sidon mutu nesalada, neda sun mar podan ngebo kununa cadi, sun kael kepkunenunge. Sun damai yana katuai kepnedi, sun wenemna keca dopra, sun nong deiki deipkamsene. Ukupkamna deiki di, tek sisi sundi kael kepnengedi, ‘Uo, Allahda, tek sisi akeca-keca yumada, er puto deiki di talerura cadi, er dipapu nimi ban-ban yuma, sun ila deiyo ngebo kurure. Tonda, amutu kunung nesala yumadi, ne puto weik kununa cap, ne mali kuna pio gum di, pio telep lengna ngebo kunun nge capda, betapra kael kepkamnenge. Ada, nedi sun damai ila kange mun keca deipkamna deiki di, ataru di kael kepkamnenge.

23Angeda, tali tep men pepne. Deiyoda, sun damaida, ila kange mun pu ton dopra deipkamna tepa. Tonda, sun mar podan nengda, dana-dana tara di yangedi, popsengepa, sun yapida, bisai-bisaipu saka kunkamsere. Nimida, mar podan kecada pio yu weik tema di popmengepa, nimi weika di sun ila ati arum neitamai depkamenge. Ange yuma ukupkamna deiki di, neda Allah Yahweh, ne puto dipapu nimi ban-ban yuma, sun ila deiyo ngebo kunune. Angeda, sundi kael kepkamnenge.

Allahdi, “Israel neng tamupra telep kupra deipkamne,” pepu upu

24Amenda taruda, Israel yala neng tep nengeda, sun damai dana-dana tara kunkameng nesala yumadi, sun tep men mar penkamenge. Ukupmantoda, takke keca nong neitamai wekmaredi, lep-lep peramre utopu, sun dana-dana tara kunge nesaladi, ton cap mar pepmengepa, kwar weik kupnepa, dipru pu jeramu ngeda, tupa ton cap pu men jenkamsere. Men di, sun dana-dana tara kurami nesaladi, ‘Sun Israel nesalada, mali nengpu kununge,’ tenepra, nyek-nyek pepra, mali weik kuramipa, ne mawa neng ikinpu kurami dinino, nedi ange yuma ukupkamna deiki di, sundi, ‘Uo, tek sisi Allah Yahweh, er puto dipapu, nimi ban-ban yuma, sun ila deiyo ngebo kurure,’ tenen, kael kepkamnenge.

25Neda Allah, ne si Yahwehdi pepsene. Neda akeca-keca yuma talepra, deiki tara erepra, pio puto weik deiyo ngebo kununa cadi, nedi pepsene. Menop taru, nedi Israel nesala yuk-yuk mutu donoksipa, sun mar podan nengdi, ateng koupra dubenami dinin, nedi sun bei nesala bulupra, sun pe mutupu duyana kange di acapu deipnedi, ne pio telep lengna keca cap, teleppu kunange cap, sun dipru kange neitamai deipnepa, telep-teleppu kupmengopda, yuk-yuk yala nesala dana-dana taru yuma neitamai di, epmengedi, kael kepkamenge. Ne putoda, sun damai konum pel dopkamna deiki di kael kepkamnenge. Tonda, ukupne pangeda, ne si erepra, ne amutara pel dona ngebo Yakub tep, ‘Amutu dopra karepkamkene,’ pepra, pedina upu deiki er tep karepsi mutupu, erdi deiamupa, dadeipdanen yakaramyanen, ataru kunge Israel nesala tep, amutu yuma karepnyopda, ka di tamupra sun pe mutupu yana kunkamenge.

26Israel nesala amutu kunkameng taru yumada, podana gum dipapu, kange deipmengedi pio teleppu kungedi, sun pe ati dopra kungedi, sun anggur wa pepra kunkamenge. Menop taru, sun tep, ‘Israel yala nesalada, mali nengpu kununga cadi, dakwapye,’ pepra, amutu dana-dana tara kuramidi, mar poryakarami neng yuma tep nengeda, nedi wenepra poptapkamne. Ukupkamna tep, Israel nesala sun amutu kunkameng taru yumada, nimi tep kwardanga gum dipapu, kange deipra pio teleppu kunkamenge. Ataruda, Israel yala nesala yumadi, ne tep, ‘Uo, tek sisi Allah er si Yahwehda, pio tek sisi er puto deiki di akeca-keca yuma talepra, er ila puto deiki di, nun ila nimi deiyo ngebo kurure,’ tenenkamnenge. Utenepnengedi, ‘Allah er akonuma’ tenen, kael kepkamnenge.