Ezekiel 29

Mesir mutu neitamai yumada, Allahdi ikin keca karepka deiki di, wenepra poptapu upu

1Babel mutu nengdi popbisipseidi, ateng kouprapseidi, doupra beseipa, keteng tamunda, morokyo neitamai kupupa, war peda morokyo warpu kepupa, tanggal dua belas tumi, konum yauopda, ataruda, Allah Yahwehdi ne Yeheskiel damai yana upepneu.

2Uo, Yeheskiel, kanda nimi sisadi deipkei ngebo kurume. Kandi nimi deiyo ngebo Mesir mutu yuma talepra, ila nimi deiyo ngebo, Raja kure ngebo tep, upepkurume.

“Allahdi, ‘Ila ikin keca, kan cap, Mesir mutu kunge nesala yuma cap tep, sun nong deiki deipkamsere,’ pepkurume,” pepu. Tonda upepkamrume. 3“Allah er si Yahweh, akeca-keca yuma talepra, deiki tara erepra, pio puto weik deiyo ngebodi, aupu ton pepkere. ‘Ada, ila nimi deiyo ngebo Raja Mesir tep, aupu bena pepkurume,’ peipmanere. Kan Firaunda, kan pe kange dipru neitamaida, utenerume. ‘Gume, ne ila puto weik ngebo kununa cadi, ila laut mokon pumbon kuramre puto weik kecada, Nil me pumbon maramre yu weik buaya bal utopu, neda ukunune.’ Neda angepu tenepra penune. ‘Gume, ila di embaramre me, er si Nil meda, ne dipapu ketekepra deipsi. Ne pe kange deipdasidi, Nil me ketekepra deipsi. Nil me deiyo ngeboda ne ca,’ pepra, kandi upepra, kan kange dipru eremdarume.

4Uperum dinino, ne Allahda, ila di wenepkamkena cadi, ukupmanto upu pepkene. Nimidi mekina tomoramengtopu, neda, mekin tomon keca, er si mata pancingda, kan sipyal neitamai deipkamkene. Ukupkenepa, mekina yambulnge yumada, ila Nil me embaramra neitamai di embanung dinin, ange dopra, kan bol deikida, gat kwamre keca, er sida, mekina kasbala deikipu paleryankamkenge. Ukupkengopda, nedi kan nong me pumbon di gipra, douai tara duyana, katuaipu deiptapkamkene. Ukupkene taruda, Nil me pumbon embaramre yambul mekinada, kan nong mekin kasbala deiki palepkamkenge nge cap, kan nong cap, yumada doupra, douai tarapu duyana deipkamkene. 5Ukupkenyopda, kan nong cap, amekina cap yuma dopra, me pio gumai, padan gurun katawai mutu neitamaipu donokamsene. Ukupsene pangeda, kan cap, amekina capda, nimi kuna gum mutu neitamai di saka kunkamrume. Nimi yuk nengdi ton, sun tep, ‘Sun Mesir nengda, pio mali weik nesala,’ tenen, sun nong ka di bulupra, tu palipsengedi, telep kupra men peipkamsenge. Sun nong yuma yanina tep, nedi dopra karepsenepa, sun nong yuma yanina tep, tuai tali bura tara gam kure keca cap, tali lakra embaramre ma capdi, sun nong yumada, jepropkamsenge.

6Uda, ange kupnya deiki di, ataru sun Mesir mutu neitamai tupa kunkameng nesala yumadi, ne Allah tep, ‘Uo, Allah Yahweh erda akeca-keca talepra, deiki tara erepra, ila puto weik ngebo kurure’ tenen, ne tep kael kepkamnenge. Ada tali tep gume. Deiyoda, Israel nesaladi, sun Mesir mutu nesala tep, ‘Nun podan neng poryasenge taruda, Mesir mutu nengdi yana nun tep kalekra melipkamsenge,’ teneramsei dinin, sunda men meliamrume. Ukupmantoda, nimidi, maca putapne taruda, gat co douna gum dinin, pio boun keca, mar pina utopu keca doupmengedi, embaramengepa, saka popdatenge utopu, sunda ato nesala kuramruma tepa. Sun puto boun nesalapu cadi, Israel nesala pio men meliamruma tep pepsene.

7Ukupmantoda, Israel nesala, sun mar podan neng yakarami taruda, sun puto boun tep, ‘Yuk mutu nengdi melipsetenge,’ teneramidi, ‘Melipkusenge’ tenen, sun buri talepterepi dinino, sun Mesir nesala, sun buruda, copu. Israel nesala sakipa, sun morokyo cap, buru capda, mali kupu. Tonda, Israel nesaladi, ‘Saka dourbena popdakupe’ tenen, sun Mesir mutu nesala damai baripra talepterepi dinin, sun yan coptaprumpa, Israel nesala sun yane boun kupupa, long-long peramupa, sakmanto kurami. Atep, ukupmanto sun kamoda, nimidi pio boun maca doupmangepa, copra poramra utopu neng kurume.

8Ange tep nengeda, Ne Allah Yahweh, akeca-keca yuma talepra, deiki tara erepra, pio puto weik deiyo ngebodi, sun Mesir nesala tep upepsene. Nedi yuk mutu jen talena neng dopra deipnepa, mar podana keca, parang ya takkenge doupra, sun mutu neitamai kunge nesala cap, sun Mesir nengdi talepra peinge gam keca cap, ayumada poptapra gawal dakamenge. 9Ange kupnepa, sun amutu nengdi, sun keca yuma konum gum kupra deipsengopda, sun Mesir mutu neitamai yumada, nimi upu ton men gekepkamenge. Pio dimbulung pepnapu kupkamre. Ukuprepa, Mesir mutu nengdi, ne Allah Yahweh tep, ‘Uo, Allah Yahweh erda akeca-keca yuma talepra, deiki tara erepra, ila puto weik ngebo kurure’ tenen, ne tep kael kepkamnenge. Angeda tali tep gume. Deiyoda, kan Mesir mutu nimi deiyo ngebo Firaun cap, kan amutara kurami nesala capdi, ‘Gume ila embaramre me, er si Nil meda, ne dipapu ketekepra deipsi. Ameda nengepu kurure, ne dipapu ame talenune,’ pepra gemepmuma tep, ila di wenepra poptapkamsene.

10Ange tep nengeda, ne Allahda, kan mar podan ngebo utopu kunune. Tonda Nil me embarmre me yuma pe tep, ne yu tenepsidi, wenepkamsene. Nedi sun tep wenepra poptapnedi, gawal daknyopda, ange yuma gum kupra deipkamne. Mesir mutu neitamai akwamre keca yumada, gum kupra deipnepa, dim bulung pepkamre. Nimi ton amutu neitamai men kunkamenge. Ukupnyopda, nimi yumadi, ‘Uo, Allah Yahweh, erda akeca-keca yuma talepra, deiki tara erepra, ila puto weik ngebo kurure’ tenen, ne tep kael kepkamnenge. Tek sisi Mesir mutu wilimdonai dana-dana tara di neitamai yumada, mali kweipkamne. Ada, pio dapu tara, arah utara Migdol mutu kwamngai di dipra, adinin dipdongopra, iknapi tara, arah selatan Aswan mutu kwamngai peda, tonda Sudan mutu dorce-dace neitamai bongdona tara yumada, mali kweipnedi, gum kupra deipnepa, amutuda walang yopu kupkamre. 11Amutu-amutu neitamai yumada, nimi pe, yuk tali gam kuramre keca peda, ton men embankamenge. Ada, ue denge pio weik, keteng tamun 40 tahun neitamai yumada, amutu neitamai, nimi cap, yuk keca cap ton, pio men embankamenge. Tonda, pio men kunkamenge. Amutuda, walang yopu kunkamre.

12Uda, yuk-yuk mutu ton, mali kweipnepa, walang yopu kupkameng dinino, nedi Mesir mutu yumada, ange kupkamna deiki di, dimbulung pepkamre. Yuk mutuda, yambulanunpu ukupkamne dinino, Mesir mutuda, pio kange mun kuprepa, dimbulung pepkamre. Tonda, Mesir mutu neitamaida, menop taru ila ati arum doamidi, nesala weik dakurami dinin, keteng tamun 40 tahun neitamai yumada, pio gum kupra deipkamne. Yuk mutu ila ati arum domngai ton, mali kweipnepa, yambulanun ton dimbulung pepkamre dinino, Mesir mutu neitamaida, ila kange mun kupkamre. Tonda ukupnyopda, go ton karepnedi, donoknepa, yuk mutu nengdi, Mesir mutu kunge nesala yuma tamopmengedi, dana-dana tara mutu, pio karenai ton dubenkamenge. Sun mutu sisada, pio gum kupkamre ja.

13Allah Yahweh akeca-keca yuma talepra, deiki tara erepra, pio puto weik deiyo ngebodi, ange ton pepsene. Keteng tamun 40 tahun konum kupre taruda, Mesir mutu nesala yuma enepronkamsene. Yuk-yuk karen mutu neitamai donokamsi nengda, amenda taru kange di ton cap, nedi anesala buluprapnedi doupra, sun pe mutu, ila mambul mutupu tamupra deriryankamsene. 14Ukupnedi, sun kunkamrumai yuma, tamupra telep kupra deipkamsene. Tonda, sun kunkamrum tarada, sun pe mutu sisa pepsenepa, Mesir mutupu kunkamrumada, itara iknapi dam tara, arah selatan, sun pe kuramrum mutu neitamai, ka di kunkamrume. Ada ila ati arum deiyo kepra kunkamrumada, Patros mutu kunkamrum dinin, ataruda, sunda puto boun nengpu, amutara kunkamrume. Ila mambul mutu nesala men kunkamrume. Angeda gume.

15Tuai mutu neitamai, yuk-yuk mutu nengdi, ila deiyo talepra, puto kunkamenga yumada, Mesir mutu neng sunda, puto boun nengpu kepra deipsenepa, pio amutara utopu kunkamrume. Tonda, sundi deiyo kepra, yuk mutu neng tep, men bisbisa kapra talepkamrume. Ange utopu, sun pe dipru erepra gememumdi, sun yuk mutu neng tep, pio men talenkamrume. Ada metek kweipsenyopda, yuk mutu nesala men talepra kunkamrume. Amutarapu deipsenyopda, pio akunkamrume. 16Israel mutu nesalada, amenda taru ikin kupre pangeda, ‘Uo, sun Mesir mutu neng, sun dipapu nun ton yana melipsetengedi, lyepropsetenge,’ pepra, ka di ton cap pio men moronkamenge. Deiyoda, amenda taruda, Israel nesaladi, tamupra tenepmengedi, ‘Uo, nun podan neng yakarami taruda, nundi, ‘Uo, Mesir mutu neng dipapu, melipra lyepropsetenge,’ tenepmepu taruda, mali weik kupmupka cadi, angeda ton cap men kunkamepe. Ataruda, ware keca deiyo tep, ‘Mesir neng sundi nun ton yana melipseso,’ pepra, mororamepu do? Angeda walwal di kupmupke,’ tenenkamenge. Ataruda Israel nesaladi, ‘Gume, Allah Yahweh erda akeca-keca yuma talepra, deiki tara erepra, pio puto weik deiyo ngebo kurure’ tenen, ne tep, pio moupra kael kepkamnenge.

Raja Nebukadnezardi, Mesir mutu popkamnga tep, pepu upu

17Babel mutu nengdi, nun Israel nesala popseidi, nun doupra benamseipa, kikiman kuramupkanen, keteng tamun 27 tahun konum kepu taru dinin, war tenpunge, tanggal 1 deiki di, atumi kepu taruda, Allah Yahwehdi, ne Yeheskiel damai yana upepneu.

18Kanda, nimi sisadi deipkei ngebo kurume. Aupu pepkene. Babel mutu ila nimi deiyo ngebo Raja Nebukadnezardi, er jen talena neng, Tirus mutu wareng yakana tep, puto weik neng dopra deipmarpa, Tirus mutu bena ikin pel weik dorami. Ada, ‘Tirus mutu neng tep, popbisipkamep’ tenen, ikin pel weik doramidi piripeterami. Ukuramya deiki di, ajen talena neng, mar podana weik cadi, sun giso deiki gat galuna kemamya di, sun giso potong yuma gum kupudi, delaupu kupu. Tonda, ikin keca weika di, doupra dubenamya cadi, sun morokyo deikida, ikin keca topra yakanga deiki di, sun morokyo deiki bol koupu. Ukurami dinino, Babel mutu Raja ngebo cap, er jen talena neng capdi, Tirus mutu neitamai pel weik dorami dinin, sun pe doronada, kunumna telep keca ton men dopropi. Tali pelpu dorami.

19Ange tep nengeda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, pepne. Nedi Mesir mutu yumada, dalupra dopropnedi, Raja Nebukadnezar tep karepnepa, amutu nesaladi, talenung bung keca yumada, dalupra dubenkamre. Ada er jen talena nengdi, sun menenga keca karena utopu tep dopropkamenge. Mesir mutu nesaladi talepra kunge telep keca yumada, tenpu ton men tapkamenge. Ton ngeda, dalupra dopropkamenge. Ton ngeda, mali kweipmengedi, acapu tapkamenge. Akeca-keca yala-yala yumada, dalupra doropkamenga deiki di, Nebukadnezar, er jen talena neng, sun menenga keca utopu kupkamra tep, aneng tep karepkamre ja.

20Deiyoda, ne Allahdi, Raja Nebukadnezar tep, ‘Mesir mutu yuma popbisipredi, mali kweipkamre’ tenen, er tep wepra deipsipa, Mesir mutu wenemna tep, ne tenepsi ngeda, er Nebukadnezar cap, er jen neng cap, sun dipapu pel doramnei. Sundi ila pel doramneiya tep, sun menenga kecada, Nebukadnezar karepkamne. Neda, Allah Yahweh, akeca-keca yuma talepra, deiki tara erepra, pio puto weik deiyo ngebodi pepsena cadi, ange yumada, tek sisi nong kupkamre ja.

21Ange yuma konum kupkamne taruda, ataru damai kupyopda, ne pel dopkamna deiki di, Israel nesala yumada, puto kepra deipkamne. Ukupmantoda, sapi bisam giso deiki takke keca beleramredi, lyom nepbaramretopu, Israel nesala tep kange di tamupra puto keipkamne. Tonda nedi melipkenepa, Yeheskiel kanda, Israel nesala damai, upu tali lupra pemempa, sundi kan upu gekenkamkenge. Ange yuma ukupnya deiki di, sun anesala yumadi, ‘Uo, tek sisi, akeca-keca yuma talepra, deiki tara erepra kuredi, ila puto weik kurur ngeboda, ada Allah Yahweh er pua,’ tenepnengedi, ne tep moupra kael kepkamnenge.