Eze 3 | XteSC | STEP | Yeheskieldi pepu. Allahdi ne tep pepneu. “Uo, nimidi deipkei ngeboda, kan dinmarempa, nimi wenemna tep buku sekra getepsi ngeda, kan dopra jeprume. Kandi jepmemyopda, Israel yala nesala kunge mutu yuma bememdi, aupu perbenkamrume,” pepneu.

Ezekiel 3

1 Yeheskieldi pepu. Allahdi ne tep pepneu. “Uo, nimidi deipkei ngeboda, kan dinmarempa, nimi wenemna tep buku sekra getepsi ngeda, kan dopra jeprume. Kandi jepmemyopda, Israel yala nesala kunge mutu yuma bememdi, aupu perbenkamrume,” pepneu. 2 Upepneua tep, ‘Abuku jepkun’ tenen, si aktapteksipa, abuku dopra, ne sipyal pumbon dongopneupa, nedi agetepu buku jepsi.

3 Abuku karepkoneu taruda, aupu ton cap dukdongopra pepneu. “Uo, kanda tuai mutu ngebo kuruma cadi, abuku dopra jepo,” pepneu. Upepneu taruda, ‘Angeda men jepkun do?’ tenepsi dinin, akeca dopra jenmasi taruda, mong mokon telep peramretopu pepneu. Ne mundu pumbon konum marbeneu taruda, boupneue. Abuku dopra jepsi pangeda, mong mokon telep peramretopu pepneu.

4 Ukupsi pangeda, er Allahdi ne tep ton cap tamupra pepneu. “Nimidi deipkeipa, tuai mutu kurum ngebo, kandi kan kayapu Israel yala nesala kunge mutu yumada, apepkamaken upu yuma dopra, sun tep, ‘Allahdi upepneu,’ pepra peterep embankamrume. 5 Ne Allahdi, ‘Yuk karen mutu nesala tep perbenkamre’ tenen, wepra men dokotepkene. ‘Kanda, Israel nesala damai peterem benkamrum’ tenen, pepmakena cadi, anesalada, ikin upu, kan men gekepmanto upu men penunge. Sundi, penge upuda, kandi, ‘E, sundi penmaneng upu deiyoda, betapra men teneptene,’ men tenenkamrume. Sun penge upuda, kan upu sisa pua.

6 Ange tep nengeda, nedi kan wepra deipmakendi, dokotepkuken mutuda, kan walwal kupkerepa, men gekepmanto upu penge mutu nesala tepapu gume. Yuk mutu upu penge nesala gum dinin, kan pereme upupu penge nesala kununga cadi, nedi penkamken upu dopra, sun Israel yala nesala tep peterembenkamrume. Israel yala nesaladi, kan penkamrem upu men gekenkamkeng dinin, yuk karen mutu nesala damai dokotepketene teptoda, sun yuk mutu upu penge nengdi, ne upu moupra gekeptenge. Dinin, ne nyapu sisi, ne mawa nesaladi men gekenkamenge.

7 ‘Ne pene upu gekepnetenge,’ tenenkamrum dinin, kan kayapu Israel yala nesalada, kan penkamrum upu pio men gekenkamkenge. Ada mesum tep gume. Sunda, ne Allahdi pene upu peda, pio men gekenenunge. Sun Israel nesala yumada, giso yung gat kupupa, gel utopu kungedi, balila kupra dipru gat kupu nesala kungedi, ‘Nun songe,’ penunga tep, ne upu peda men gekepmanto kununge, pepkene.” Allahdi Yeheskiel tep lap pepu.

8 Upepu dingeda, aupu ton pepneu. “Israel nesala, sun dipruda, pio gat kupupa, gel giso deipra kununga cadi, ukutaruda nedi kan tep, kwar dangna pio gum di, balila weik ngebo kepra deipkene. Kan peda utopu balila kupra, pel men tapmanto ngebo kuna deiyo keca konum deipkenepa, ukupra kumemdi, sun tep pio puto di peterenkamrume. Sun balila kungetopu kupra kunkamrume. Kwar kuna gum dipapu, ne upu dopra, peteremnapu kunkamrume.

9 Balila kuramengtopu, kan peda utopu kupra deipkene. Ukupra kunkamruma deiyoda, sun Israel nesaladi, kan upu yaniptapkamkenga tep, kandi gat gil si utopu kumem pangeda, sundi kan tep men bisipkamkenge. Atep, sundi balila deipra, yu kuprepa, kan tep pekengedi, pio mali kange doukenga peda, kandi, ‘Uo, ware kuptene do?’ tenen, kware men dangkamrume. Sun Israel yala nesalada, ne tep, ‘Nun songe’ tenen, ne upu yanipra kunenung nesala tep pepkene,” Allahdi ne Yeheskiel tep pepneu.

10 Ataru dipapu, Allahdi aupu ton cap dukdongopra pepneu. “Uo, kanda tuai nengdi deipkei ngebo kurume. Atep, apenkamken upu yumada, kan amul di gekepmemdi, pio moupra tenememnyopda, ‘Uo, angeda, Allahdi upepneu,’ tenepra kunkamrume. Ne penkamken upu yumada, kan dipru neitamai derinkamrume. Pio moupra konum talemem dingeda, amenda sun damai lap perbenkamrume.

11 Atep ukutaruda, kan yala neng cap, kan kayapu Israel yala nesala cap, Babel mutu jen talen nengdi, popbisipidi ateng koupra deribeipa, Babel mutu neitamai dakunge mutu bememdi, nedi kan tep pepra, karenkamken upu yumada, sun gekena tep, peterembenkamrume. Sun tep upenkamrume. ‘Allah ^{▼▼Allah – Aca cap, ayat 12 cap, 27 cap, 4.14; 5.5, 7-8, 11 capda, Ibrani upu deiki di, Allah er pe si sisa, ‘Yahweh’ cap, tonda, ‘Adonay’ cap, pepra sekya cadi, sun kael kemna tep, nundi aupu deiyonge jenek kupra sekmupu.} er si Yahweh, akeca-keca yuma talepra, ila puto weik deiyo ngebo kuredi, er teneretopu kurure. Angebodi pepneu upuda, ake,’ pepra peterembenkamrume. Ada, sundi kan upu gekenkamkeng taru pe, sundi kan upu men gekepmengedi, tamkamkeng taru peda, peteremnapu kunkamrume. ‘Men gekepmanenga tep, tapkune,’ pio men tenenkamrume.” Allahdi ne Yeheskiel tep pepneu.

12 Upedongou taru dipapu, Allah er Lek Sambaladi ne doupra ereipneue. Akupneu taru di, ne amnyo tara di, ila upu ton pepudi, lelim weik penmaupa gekepsi. Nun nai Allah, kanda im deiki tara kumem mutuda, ikunge malaikat yumadi, kan si eremengedi, ‘Allahda pio teleppu kurure,’ pepra, ‘Pio penkamkeng’ tenen, putanerure. ^{▼▼Ton Ibrani upu kael nengdi upenunge. Ayat 12 deiyoda, ake. ‘Allah kan im deiki kurum ngebo, kan sipu pio eremkamkepe penmai,’ penunge. Dinino, pumun taru sekami Ibrani upuda, ikin cadi, nun yambul walwal kuserure.} 13 Tonda, nedi ila lelim gekenmasi ngeda, ada sun gam kunge keca yumadi, pol bedanmaidi, ila lelim penmaupa gekepsi. Tonda, sun yan roda yuma peda, kulman lelim ila di peramretopu, penmaipa gekepsi. Ukupmantoda, mutu yuma bim longmaredi, mutu yuma ila lelim peramretopu kupupa, gekepsi.

14 Aila lelim gekepsi taruda, Allah er Lek Sambaladi ne nong dopra, welerbeneudi, yukai bena deipneupa, adipapu Allah Yahweh, er puto ne dipruai moupra talepneu. Dinino, ukupneu taruda, ne kange neitamaida, ‘Ware keca deiyo tep do?’ tenen, ne dipru kange bongtopnudi, mali kange doupra engepsidi, yambulanun ton tenimtonapu kupneu. 15 Akeca yuma ukupneu pangeda, dato-dato di, Babel mutu jen talen nengdi, Yudea mutu neitamai kurami nesala popbisipidi, doupra deribenamipa, kurami mutu, me sida Kebar me pirmanai dubeneupa kunmasi. Tonda amutu sida, Tel-Abib mutu perami mutu neitamai yana kunmasi. Amutu dubena deipneupa, dakunmasipane, amutu neitamaipu, ue yoneitam bari (7) tumi, anesala cap kikiman kuramepu.

Ataru neitamaida, mambul keca dinmasinge cap, Allah Sambaladi dubenmaneunge yuma cap tep, kange douna gum, ‘Ware kupmaner do?’ tenen, moupra men tenipmasa tep, tenimtonapu kunmasi. Ataruda, upu men penmasidi, talipu kunmapu.

Allah er si Yahwehdi, ‘Angeboda Israel nesala talepra kuredi kalengkamre’ tenen, Yeheskiel tep wepra deipu upu

16 Ue yoneitam bari (7) tumi akonum mapsi pangeda, Allah er si Yahwehdi, ne tep upu peryaneudi, upepneu. 17 Allah Yahwehdi pepneu upuda, ake.

Uo, kanda tuai nengdi deipkei ngebo kuruma cadi, nedi kan wepra deipmakenada, tali tep gume. Neda kan cap tonpa kikiman kunemedi, kanda Israel yala nesala, sun kalengna deiyo ngebo kunkamrume. Ada, nedi, pedinkamken upu gekepmemnyopda, adipapu aupu dopra, Israel nesala tep melimemdi penkamrume. Ada tali upu tep gume. Wareto upu do yuma, wenemna keca do, ikin keca do, kange mun keca do, nedi kan tep mambul upu pedikene taru, lap pepkenyopda, kan adipapu aupu dopra, sun Israel nesala tep lap penkamrume.

18 Mambul upu penkamruma cadi, ukupmantoda, nedi mali kuramenge nesala tep nengeda, nedi sun tep, “Mali tupa kumum pangeda, wenepra popsenepa, tek sisi depkamrum ja,” pepra, wenemna upu deiki di penkamne. Dinino, aupu pepnepa, kandi amali kunung nesalada, ‘Sun mali kunge keca taptenge’ tenen, sun tep lap men pepmemnyopda, sun mali kunge dipapu depmengepa, sun mali kuna tep wenepkamne. Dinino kandi, ‘Allahdi sun mali kunge nesala poprur’ tenen, aupu men lap pememnyopda, kan pe tep wenepkamkene. Sun mali kunge nesala, mangkau kange doupra depkamenga deiyoda, kan nong deikipu deipkamkene. “Sun depkamenga deiyo ngebo, kan pua,” pepra wenepkamken ja.

19 Dinino, sun mali kunge nesala tep nengeda, kandi moupra kalengkamrume. Amali kunge nesala tep, “Uo, ne kayapu, sundi tupa mali kuramumpane, Allahdi sun mali kumumnya tep, wenepra popkamsere,” pepra, sun tep melipra peterepmemdi wenepmemnyopda, telepe pua. Wenepra peterepmempane, sundi kan upu men gekepkengedi tapkengopda, nedi sun tep wenepra popkamne. Sun mali keca taptengetoda, gampu kutenge dinin, gum dingeda, depnapu kupkamenge.

Ukupra depkameng dinin, kan puda, gam kunkamrume. Ada mesum tep gume. Nedi peipkenetopu, amali kunge nesala tep, kalengmemdi, ‘Allahdi popserur’ tenen, konum wenepra peterememnyopda, aupu penkamrema deiki di, lyepdankamrume. Ada, nedi, “Ukupkamrume,” pedikene upupu gekepra, kunkamruma cadi, men depkamreme.

20 Tonda, ware nesala do yuma, dumsisipu kuramenganen, ange tapmengedi, kange di tamupra mali kun kecapu kupmengopda, nedi, “Angeda, men kunkamrume,” pepra deipsi upupu, tupa kumumnyopda, “Tek sisi wenepra popkamsene,” pepnepane, ne upu tapra men gekepnengopda, sun tek sisi depkameng ja. Dinino, mali kupmengepa, nedi pedikenetopu, kandi, “Ne kayapu, sun mali kurum keca taptume. Gum dingeda, Allahdi wenepra popserure,” pepra, anesala men wenepra peterepmemnyopda, sun mali kunge keca neitamaipu mangkau kange doupra depkamenge. Sun mali kunge keca kunumna tep depkameng dinin, kandi, “Ange tapso,” men pepmemnyopda, sun depkameng ngeda, kan nong deiki deipkamkene.

Tonda menop taru, sundi telep kun keca kurami ngeda, kange di ton cap pio men tenenkamne. Ange deiki di, sun pedi sun pe tep, men melipdatenge. Dinino, kandi amali kunge nesala tep, ‘Allahdi wenepra popserur’ tenen, kalengmemdi, wenemna upu men pememnyopda, sun depkameng nesala yapi embenkamre ngeda, kan nong deikipu kupkamker ja. Ukupra wenepkamkena tep, tamna gum dipapu, Israel nesala tep pio wenepra peteremkamrume.

21 Dinino, kandi mali kunge nesala tep nengeda, ‘Sunda ton cap mali kupnung’ tenen, kandi moupra dimemdi, wenemkamrume. Ukupmempa, aupu gekepmengedi, sun mali kun keca yuma tapmengopda, anesala tek sisi gampu tupa kunkamenge. Ada, nedi pepra deipne upu gekepmenga deiki di, pio gam kunkamenge. Ton ngeda, kanda gampu kunkamrume. Ada mesum tep gume. Deiyoda, nedi pedikenetopu, aupu penkamrema deiki di, lyepdankamreme. Ada, nedi, “Ukupkamrume,” pedikenetopu, kupmemnyopda, men depkamreme. Allahdi Yeheskiel tep pepu.

Allahdi Yeheskiel dopra, nimi gum mutu ila banai dokotepupa, lup kupu upu

22 Yeheskieldi pepu. Ataruda, Allah er si Yahwehdi, er puto ne dipruai moupra talepneu. Ukupneu taruda, upepneu. “Ange tep nengeda, kan bukromemdi, ortara mutuda, ila pala ban kurur mutu berume. Ukupmem pangeda, nedi mambul upu ton pepkamakene.” Allahdi pepneu. 23 Upepneu pangeda, bukrosidi er pepmaneu mutu, ila pala ban mutu bena dinmasipa, tek sisi Allah Yahweh, er dirinda pio weik kupmaupa epsi. Ada, ne me si Kebar me pirmanai kunmasi taru kuputopu, ila dirine kupmaupa epsidi, er gispal dona tep, ‘Tali lupra men dinkun’ tenen, ne urasin yuma genepdongopra, tu deiki mapsi.

24 Ukupsi dinin, ataruda Allah er Lek Sambala, ne dipruai wekra dinipneua cadi, puto kupra tekeipneue. Ukuneu taruda, erdi ne tep pepneu upuda ake. “Kan pe mutupu tamupra bememdi, kan ati neitamaipu buplan dekdongopra, kunkamrume. Tali lupra bura embandana gume,” pepneu. 25 Tonda, erdi pepneu upuda ake.

Uo kanda tuai nesaladi deipkei ngebo cadi, yu nengdi, kan tomopra ateng koupkamkenge. Ukupkenge pangeda, kandi ton gupsaka yuk nesala damai men embandankamreme. Akati pumbonpu pio kunkamreme.

26 Tonda, kanda ne upu yanitamna nesala kan-kan kunkamruma tep, ne im deiki di, lup kuna deiyo keca, kan ul deiki deipkenepa, lup kupkamkere. Ukupkere pangeda, upu ton pio men penkamreme. Kan lyemuda, kan sipyal pumbon deiki tara, palepdongopkerepa, upu men pepmanto kunkamkere. Ada tali tep gume. Israel nesaladi mali kuramenge nge tep, kandi, “Ukuna meme,” pepra, ‘Wenemna upu ton pepmemdi, sun mali kunge keca tapkameng’ tenen, ‘Ne Allah tep moropnerum’ tenen, lup keca karepkenepa, upu men pepmanto kunkamreme. Sun Israel yala nesalada, ne upu yanipra bisbisa kamengedi, ila balila nesala kununga tep pepkene.

27 Ukupra lup kupkamker dinino, yuk taruda, nedi upu pena deiyo keca, ka di ton cap karepkenepa, ka tamupra upu pepmanto kupbaramemnyane, nedi mambul upu ton karepkenepa, kandi awenemna upu dopra, sun Israel nesala tep pedinkamrume. Sun tep upenkamrume.

Allah ^{▼▼Allah – Acada, Ibrani upu deiki di, ‘Yahweh Adonay’ pepra sekya tep, aupu deiyo ngeda, konum jenek kupra sekmepu.} er si Yahweh, ^{▼▼Yahweh – Allah er pe si, tek sisi ngeda, ‘Yahweh’ kurure. Ibrani upu deiki di, asi er deiyoda, ‘Ne pio akunune,’ kurure. Ada, akeca-keca yuma kapul men ketekeipra deiamu taruda, Allah konum akuramu. Tonda, ataru di dipra, pio dorkunkamre taru peda, Allah pio akunkamre. Allahdi Musa tep, er si katuai di lap pepudi, ‘Ne pe si kael keprumudi, angepu erepra gispal donkamnerume,’ pepka tep (Keluaran 3:14), Allah er pe si Yahweh penada, telepe pua. Atep, nundi asipu sekmupu. Ibrani upu deiki di, ahuruf ‘YHWH’ apu sengnunge. Deiyoda, sun Yahudi nesaladi, ‘Allah er pe si sisa katuai di men peptepe’ tenen, kware kununga cadi, sundi ahuruf YHWH, angepu sengnunge. Dinino, nundi, ‘Angepu sekmepyopda, aupu penada, iriwarye kupsurur’ tenen, nundi, ‘Yahweh’ katuai di sengnupe. Indonesia Alkitab neitamaida, ‘Yahweh’ men sengnunge. Sunda, ‘TUHAN’ pepra sengnunge. Atep, Indonesia Alkitab neitamai yuma, ‘TUHAN’ epmumyopda, ‘E, ada Allah er pe si sisa, Yahweh kwamngai,’ tenenkamrume. Tonda, lap pena upu nomor 49 dirume.} akeca-keca yuma talepra, deiki tara ila eremna cap, puto weik cap, deiyo ngebo kurura cadi, erdi, ‘Ukupkamne,’ teneretopu kurure. ‘Angebodi pepneu upuda, atepa,’ pepra peteremkamrume.

Aupu penkamrum dinin, sun Israel yala nesala yumada, pio balila deipra, dipru gat neng kungedi, ne upu yanitamna nesalapu kununge. Atep, ton tara nesalada, kandi penkamrum upu moupra gekenkamenge.

Dinino, ton tara nesalada, ne Allahdi pedikenepa penkamrem upu, moupra men gekenkamkenge. Ukupmenge pangeda, kandi, ‘Sun balila kunmarum ngeda tapso. Allah er upu gekepso,’ puto di pena gume. Sun kange dipapu tenepmengedi kunkameng ngeda, sun pe dakunkamenge. Sunda balila nesala kununga cadi, dakunkameng. Ne Allahdi kan Yeheskiel tep pepkene. Allahdi pepneu.