Eze 30 | XteSC | STEP | Allah er si Yahwehdi anesala damai yaudi, aupu pepneu.

Ezekiel 30

Allahdi Mesir mutu nesala, sun nong deiki ikin keca deipkamra tep, pepu upu

1 Allah er si Yahwehdi anesala damai yaudi, aupu pepneu.

2 Uo, kanda Yeheskiel, nimi sisadi deipkei ngebo kurume. Tonda, kandi amenda kupkamrenge tep lap pepkamrume. Ada, Mesir mutu nesala gekenmangaida, kandi upepkurume. Aupuda, Allah Yahweh akeca-keca yuma talepra, deiki tara erepra kuredi, ila puto weik deiyo ngebodi, pepmaser upuda ake.

“Ila kange mun kange doun tumi yankamra cadi, sun yumadi, ‘Uo,’ pepra, mali pena cap, engena cap, mambul kange douna cap, kupkamrume. Angeda kael kepkurume. 3 Sun moupra tenenkamrume. Ila kange mun tumi konum dam kupmare. Ada tali tumi gum dinino, Allah Yahwehdi teneamu tumi yankamra tep pepsene. Angeda moupra tenenkamrume. Ukuda, ila ikin keca deipkamre tumida, nesala ban-ban yuma, sun mali kuraminge tep, wenepra popkamra cadi, atumida, ‘Dua kunukmeteng,’ pepyopda, adipapu dua di pio kunukamre.

4 Mesir mutu nesala tep nengeda, nedi go karepnepa, sun mar podan neng yangedi, mar podan keca, nimi pona parang ya doupra warengyasengedi, nesala weik popmengepa, sundi epmumdi Mesir mutu neitamai kunkamrum nesala cap, Etiopia mutu nesala yuma capda, kware weik kuprepa, kange mun kange doupmengedi, sun yo berber pepkamsere. Ataruda, Mesir mutu neitamaida, Allahdi poptapyopda, nimi weika di depkamenge. Ukupmengopda, Mesir mutu neitamai talenkameng kunumna weik bung keca yumada, dalupra bendopkamenge. Tonda, sun amutu kunge nesaladi, sun ila ati arum neitamai dorami keca yumada, sun podan nengdi uruptapmengedi, sikke buktapkamenge. Akeca yuma, gum kupra deipkameng ja.

5 Ataruda, sun yuk mutu di yankameng nimi pona deiyo nengdi, Mesir mutu cap, sun melimna tep yankameng neng cap, popmengopda, nimi weika di depkamenge. Ada, Mesir jen talen neng melimna tep yankameng neng cap, Etiopia mutu jen talena neng cap, Put mutu jen talena neng cap, tonda Lut mutu jen talena neng cap, Arab mutu neitamai kunge neng, sun jen talena neng cap, Libia mutu jen talena neng yuma capda, go karepnepa amenda taru mar poryankameng neng, yuk mutu nengdi, amutu nesala yuma popmengopda, sun yuma kikiman depkamenge.

6 Ne Allah Yahwehdi pepsene. Ange ila nimi podan taruda, ware mutu neng do yuma, Mesir mutu neng tep melipkameng neng yumada, yu weik poryankameng nengdi aneng yuma popra gawal dakmengepa, depropkamenge. Depropmengopda, Mesir mutu nengdi, sun pe tep, ‘Nunda ila puto weik neng kunupe,’ pepra, gemepmengedi, sun pe si eremenge ngeda, gum kupra deipkamne. Ukupnyopda, Mesir mutu dana-dana tara mutu neitamai yumada, nimi weik depkamenge. Ada, dapu tara neitamai, Mikdol mutuda, arah utara di dipdongopra, Aswan mutu arah selatan tarada, iknapi dam tara cap, Mesir mutu neng cap yumada, popra gawal dakmengepa, depropkamenge. Ne Allah Yahweh, akeca-keca yuma talepra, deiki tara erepra kunedi, ila pio puto weik deiyo ngebodi, aupu pepsena cadi, ange yumada, tek sisi nong kupkamre ja pepne. 7 Ne Allah Yahwehdi go karepnyopda, yuk karen mutu yu neng yangedi, podanmanga deiki di, Mesir mutu nesala yuma cap, sun melimna neng yuma capda, gum kupra deipnepa, nimi upu ton pio men penkamenge. Amutu-mutu yuma, pio mali kupra deipsenyopda, sun mutuda dimbulung pepnapu kupkamre. Yuk mutu-mutu ton poptapkamne dinin, ayuk mutu yumada, yambul malipu kupkamre. Dinino, Mesir mutu ila ati arum dominge yumada, urupra sikke buktapkamenge. Mesir mutu neitamaida, nimi tenpu ton pio men kunkamenge. Yuk-yuk mutu mali kweipkamne ngeda, yambulpu malipu kupkamre.

8 Ange yuma konum ukupnedi, Mesir mutu kwamre keca yuma uku dongopnepa, ila uku di jeproprepa, adeiki di sundi kael kepkamenge. Ada, ‘Uo Allah Yahweh, akeca-keca yuma talepra, deiki tara erepra, ila puto weik ngebo kurure’ tenen, ne tep kael kepkamnenge. Ada, Mesir mutu uku dongopnepa, jepkamrenge cap, Mesir mutu melimna neng cap, sun popra gawal dakamnenge capda, ange epmengopda, adeiki di kael kepkamnenge. 9 Ataru kange mun keca konum kupre pangeda, nedi upu perbana tep, nimi weik doproipnepa, ila di embaramre me deiki embaramre umpena, er sida gapung co, agapung co deiki di, Sudan mutu bengepa, sun Etiopia mutu nesala, aneng epmengedi, sun lap penkameng upu gekepmengopda, sunda, ‘Uo, amenda taru ware kupkamser do?’ tenen, kware pio weik kupkamre. Tonda, ne doproipkamne nengdi, ‘Mesir mutu kunge nesalada, konum poptapi di gawal daki,’ pepra lap pepmengopda, sun Sudan mutu kunge nesalada, ila kange mun kange doupmengedi, kware tep yo berber pepkamre. Sun gekepso! Apepsen upuda, tek sisi nong kupkamra cadi, sun moupra gekepkurume! Nedi ataru kupkamrenge, konum ketenepsa tep, ne tenepsi taru kupyopda, ange yuma tek sisi kupkamre ja pepsene.

10 Ne Allah Yahweh akeca-keca yuma talepra, deiki tara erepra, ila puto weik kune deiyo ngebodi pepne. Nedi, Babel mutu neitamai yuma talepra kure deiyo ngebo, Raja Nebukadnezar dopra deipnepa, Mesir mutu neitamai kunge nesala cap, sun jen talena neng cap yumada, poptapredi, gum kupra deipkamre. 11 Nebukadnezarda, yuk mutu nesala tep bicau tenena gum kuramretopu, er amutara kunge neng, Babel mutu nesala yumada, ila yu weik neng kununge. Yuk mutu nesala peda, yu weik neng kunung dinin, sunda yambulanun pua. Babel mutu nesalada, tek sisi yu pio weik kununga cadi, Nebukadnezardi nimi weik ton doproprepa, er cap sun tonpa yangedi, Mesir mutu kunge nesala yumada, sundi popra gawal dakamenga tep, yankamenge. Amutu yangedi, Mesir nesala yuma pona tep, nimi pon ya di popmengepa, amutu neitamai yumada, nimi weik popmengepa, depkamenge. Sundi poptapkameng nimi nongda, pio weik dana-dana tara, jenek kupra tali deiptapmengepa, amutuda pio weik dekpepkamre.

12 Nedi, pepnepa, Nil me yumada, cepra deipkamne. Ukupne pangeda, sun jen me cap, sun kourameng keca me dingdongonange capda, gum kupbankamre. Ukupyopda, sun jen keca peda, gum kupbankamre. Nedi ila yu neng dopra deipnepa, Nil me pirman neitamai kure wa tu yumada, dalupra dopropkamenge. Ukupnedi, Mesir mutu yuma cap, amutu neitamai kunge nesala capda, mali weik kupra deipnepa, Mesir mutu yumada, mali weik kupkamre. Neda, Allah Yahwehdi, aupu pepmasena cadi, ange yumada, tek sisi nong kupkamre ja!

13 Angeda, ne Allah Yahweh, akeca-keca yuma talepra, deiki tara erepra kunedi, ila puto weik deiyo ngebodi, aupu pepsene. Mesir mutu neitamai ila mambul ati arum dominge, er si Memfis mutu neitamai kunge nesaladi, isok si eremnunge. Isok si eremna tep, nimi urasin utopu keca petupra deipmengedi, aisok si eremenge keca cap, tonda aisok cap peda, ange yuma gum kupra deipkamne. Ukupnyopda, Mesir mutu neitamaida, nimi deiyo neng, Raja neng ton, gum kupra deipnepa, nimi deiyo neng peda, pio men kunkamenge. Ange ukupnya deiki di, Mesir mutu neitamai kunge nesala yumada, kael kepmengedi, sun kwar pio weik kunkamre.

14 Angetopu, ne Allahdi, Mesir mutuda, arah selatan, iknapi dam tarada, Nil me pirman kwamre mutu, er sida Patros mutu neitamai kwamre keca yumada, gum kupra depkamne. Ukupnepa, walang yopu kupkamre. Tonda, Nil me dinin, keteng yakan tara, ila ati arum dominge, er si Soan mutuda, uku dongopnepa, amutu jepra gawal dakamre. Utopu, ila ati arum dominge, er sida kota Tebe mutuda, amutu kunge nesaladi mali kurami ngeda, sun wenemna tep, ikin keca dopra, sun nong deiki deipkamne. Tonda, Tebe mutu taleramenge bung keca yuma peda, gum kupra deipkamne.

15 Ukupnedi, ne ila yu tenenun ngeda dopra, Pelusium mutu nesala deiki deipkamne. Amutuda, sun Mesir mutu nesaladi, ‘Nun podan neng poryankamseng taruda, Pelusium mutu jen talena neng epmengedi, menmena di lap penkamsenge’ teneramidi, akati arum, Mesir mutu dinin, ila laut mokon er si Laut Mediterania mutu damai dorami. Ada, Mesir mutu sun kalengna tep dorami. Tonda, Tebes mutu nimi denge weik kunung dinin, weika di popnepa, sun peda gum kupkamenge.

16 Tek sisi ne Allahdi, ukupmantoda, ila uku jeramretopu, nedi ila kange mun keca, Mesir mutu neitamai yuma deipnyopda, Pelusium mutu kunge nesalada, mali pepra, engepmengedi, donkamenge. Mesir mutu neitamaida, Tebe mutu ila gel di beilya wipinge yumada, sun mar podana neng yangedi, akeca er si benteng urupra tapkamenge. Ukupmengepa, ila ati arum er si, Memfis mutu kunge nesalada, keteng komuni taru peda, ‘Nimi podan neng yana, popkup’ tenen, yakangopda, Memfis mutu nesala kwar pio weik kupkamre. 17 On mutu cap, Pi-Beset mutu cap, sun deiyo nengdi, kaber neng, puto weik jen talena neng wepra deiami nengda, Nebukadnezardi, amutu poryare pangeda, akaber neng yumada, popmengepa depropkamenge. Ukupmengedi, akati arum butene neitamai tupa gam kunkameng neng cap, nerapu cap yumada, Babel mutu nengdi, anesala ateng kouprapmengedi, sun pe karen mutu tamupra dubena, wenemna atipu deipkamenge.

18 Mesir mutu nengdi, ‘Asia tara di, nun podan neng mar poryankamseng’ tenen, Nil me pirman dinin, keteng yakan tara domi ila ati arum, er si Tapanes mutu, keteng komuni taru neitamai dinin, ila dua karepnepa yaryopda, amutu yuma kunukamre. Mesir mutu nesalada, puto weik kunung dinin, nedi sun puto gum kupra deipnepa, puto boun nesalapu kunkamenge. Ataru di dipra dorkunkamre taruda, Mesir mutu nengda, ila puto neng tupa men kunkamenge. Sun puto kuramya tep, kange deiamidi, salnong-nong kupra kurami dinino, nedi sun puto gum kupra deipkamne. Tapanes mutuda, mirin dua di kunukmeteng peruraida, ne Allahdi karepnepa, ipdongopkamre.

Ange kupre taruda, sun mar podana neng yangedi, akati arum dana-dana tara dopra kuramenge nesala yumada, popmengedi, tapmengepa, amutu-amutu tupa gam kunge nimi cap, nerapu cap yumada, tomopmengedi ateng kouprapmengedi, sun pe karen mutu dubena, pio wenemnaipu derirbenkamenge. 19 Ange yuma konum pepmasentopu, ne Allahdi Mesir mutu nesala mali kuraminge wenemna tep, pio ila ikin keca dopra, sun deiki deipnepa, epkamenga deiki di, sundi, ‘Uo, tek sisi Allahda, Yahweh kurure,’ tenepmengedi, ne tep kael kepkamnenge.

Mesir mutu akeca-keca deiyo talepra kuraminge yuma, gum kupkamunge tep, lap pepu upu

20 Babel mutu nengdi, nun Israel nesala ponmaseidi, ton nengda, ateng koupra, sun pe karen mutu tamupra doupra benamseipa, dakuramupkanen, keteng tamun 11 tahun konum kepupa, war tenpunge deiki dinin, tanggal 7 kepu tumida, Allah Yahwehdi, ne Yeheskiel damai yana pepneu.

21 Uo, kanda nimi sisadi deipkei ngebo kurume. Mesir mutu talepra kuramu deiyo ngebo Firaun, er puto buru yoda, nedi, konum yo copra deipsidi, er puto gum kupra deipsi. Tonda dipetepkurume, nimi yuk nengdi er meliptengepa, tamupra men telep kuptue. Ukupmanto ngeda, nimi buru copmatupa, yuk nengdi aburu geteptengepa, amenda kaektudi, konum telep kuptuopda, er nimi pon ya ka di douptue. Dinino, ne Allahdi, Firaun, er puto yumada, konum gum kupra deipsa tep, kange di tamupra puto ngebo pio men kunkamre.

22 Ange tep nengeda, ne Allah Yahweh, akeca-keca yuma talepra, deiki tara erepra, ila puto kune deiyo ngebodi, pepsene. Moupra gekepkunerume. Mesir mutu taleamu ngebo, er si Firaun tep, ne Allahdi, ‘Angebo ne song’ tenen, yu tenepsi. Ukupra tenepsa tep, angebo ila di wenepra poptapkamne. Ukupmantoda, er buru yo buteneda, copra tapkamne. Ada kip kurur buru cap, men di coptapsi buru cap peda, butene copkamne. Ukupnepa, angebo er nimi pona tep taleamu parang yada, taprepa, tuaipu sakamre. Deiyoda, angebo er puto kwamunge yumada, nedi pio gum kupra deipkamna tepa. 23 Mesir mutu nesala yumada, nedi enepra donoknepa, yuk dana-dana tara mutu neng kuramenge mutu neitamaipu bena kunkamenge. Tonda Mesir mutu nesala yuma bokra deipnepa, yuk neng kunge mutu, yuk-yuk mutu, dabena, nimi bo neng utopu dakunkamenge.

24 Ukupkamna tep nengeda, Babel mutu deiyo talepra kure ngebo tep, nedi puto weik kepra deipkamne. Ne ila puto nimi pon yada, Babel mutu nimi deiyo ngebo karepkamne. Dinino, Mesir mutu talepra kure deiyo ngebo Firaun, er putoda, gum kupra deipkamne. Ukupnepa, nimi ila pona popredi susu jerepa, ati aibukmengedi, bisi men embaramenga utopu, Firaunda mali pepra ngolokra engenkamre. Babel mutu nimi deiyo ngebo damaipu mali pepra engepra kunkamre. 25 Tek sisi pepne. Babel mutu neitamaida, nimi deiyo kepra talepu Raja ngebo tep, nedi puto kepra deipkamne. Dinino, Mesir mutu neitamaida, nimi deiyo kepra talepu ngebo Firaunda, er puto boun kepra deipkamne. Ukupne dingeda, ne ila puto nimi pon yada, Babel mutu nimi deiyo ngebo karepnepa, erdi aparang ya doupra, Mesir mutu neng yuma poptapkamra tepa. Ukupne pangeda, Mesir mutu nesaladi, ‘Uo, er Allahda, tek sisi Yahweh kurure’ tenen, ne tep kael kepkamnenge.

26 Mesir mutu nesala yumada, nedi enepra donoknepa, sun pe mutu neitamai di, sun yuk nesala yala-yala yuma, yuk-yuk mutu kununga neitamai di, bena kunkamenge. Angetopu, yuk mutu neng kuramenge mutu-mutu yuma, dabena, nimi bo neng utopu kupra, kikiman kunkamenge. Mesir mutu nengda, sun pe mutu neitamaipu tupa men kunkamenge. Ukupkamna deiki di, sun Mesir mutu nesaladi, ‘Uo, er Allahda, tek sisi Yahweh kurure’ tenen, ne tep kael kepkamnenge.