Eze 31 | XteSC | STEP | Babel mutu nengdi, nun Israel nesala ponmaseidi, ateng kouprapseidi, sun pe karen mutu tamupra doupra benamseipa, sun amutara dakuramupkanen, keteng tamun 11 tahun konum kepupa, war weneringe deiki dinin, tanggal 1 kepu tumida, Allah Yahwehdi, ne Yeheskiel damai yana pepneu.

Ezekiel 31

Allahdi, ukupmanto upu deiki di, “Mesir mutu talepra nimi deiyo ngebo Firaun cap, er jen talena neng capda, Libanon mutu tengamre cemara co lyom utopu kurami,” pepu upu

1 Babel mutu nengdi, nun Israel nesala ponmaseidi, ateng kouprapseidi, sun pe karen mutu tamupra doupra benamseipa, sun amutara dakuramupkanen, keteng tamun 11 tahun konum kepupa, war weneringe deiki dinin, tanggal 1 kepu tumida, Allah Yahwehdi, ne Yeheskiel damai yana pepneu.

2 Uo, kanda nimi sisadi deipkei ngebo kurume. Mesir mutu talepra kure deiyo ngebo Firaun cap, er di talepupa kunge nesala cap yuma tep, upepkurume. Tek sisi kanda, puto weik ngebo kurume, yuk neng kan utopu neng ton pio men kununge. Dinino, kan ila puto weik kuruma deiki di, kan kange dipru erepra, salnong-nong kurume. Atep, ware ngebo ton, kandi kange erepra gemeramremtopu, kurur do? 3 Atep, Asyur mutu ton moupra tenipetepkurume. Ukupmantoda, kanda Libanon mutu tengamre co, ada cemara co utopu co teku. Aco er teruda, pio kamo telep kuredi, er bo peda, pio weik dourure. Cemara co er nong tengrur ngeda, ton gwalina gum di, pio dum sisi im dup neitamai, dua damaipu tengrure. 4 Acemara co tekuaida, me weik akupkai cadi, tuai amutu tara, ila me embaramredi, atu neitamai embeudi, aco er jen karepupa, aco er yaten yuma boun kupra deipudi, aco nongda, pio teleppu kuramu. Tonda, amedi yuk yambul co tekuai peda embaramu dinin, aco karepu meda, yambulanunpu kareamu cadi, acoda yambulanunpu telep kurure.

5 Cemara co damaida, me weik akupkai deiki di, aco er deiyoda, ila di nepudi, lyom weik teku. Ukupudi, er teru cap, bo capda, pio weik kupu. Amutu tengrur co yala yumada, yambul pua dinin, cemara co tenpuda, pio ila lyom co teku. 6 Ma yala-yala yuma, aco teru deikipu, ati dopra manunge. Tuai mutu gam kunge keca yumada, aco deiyo dampu wengmengedi, mi deipra kununge. Tonda, mutu ban-ban yuma kunge nesalada, keteng bupu weik kupyopda, ‘Kawai bukmepepa, bul kupkuser’ tenen, aco tekuai amu tarapu wengyakangedi, kange deipra bungyakanunge. Aco damai bungyakanung nesalada, mambul gum neng gume. Sunda tek sisi ila mambul neng kununge. 7 Cemara co tekuaida, nong pio weik nepudi, er kamo urasin pio telep gat co teku. Aco er teruda, lyom weik co teku. Er yatenda, tu amutara neitamai wekudi, me weik embeua neitamaipu embeupa, aco di me weik jerure.

8 Allahdi ketekeipu mutu, Eden ban mutu tekamu cemara coda, Libanon mutu teku cemara co utopu gume. Libanon mutu teku cemara coda, urasin pio-pio telep kupu. Tonda, yuk mutu teku co, er si sanobar coda, teru weik ton akurur dinin, er tep kunupeteptenga peda, pio telep cadi, men kunupmanto kurure. Libanon mutu teku cemara coda, er teru lyomda weik cadi, yuk co ton utopu men kurure. Eden ban mutu teku coda, Allahdi ketekeiamu dinino, Libanon mutu teku coda, er kamo urasin utopu co ton pio men kapu. Libanon mutu ngeda, urasin pio telepngepu kurure. 9 Nedi, ‘Libanon mutu cermara coda, er nong urasin cap, er bo douna cap, ukupra tekamre,’ tenemsitopu ketekeipsipa, pio telep kupra teku. Eden ban mutu teku co yumada, Allahdi ketekeiamudi, Eden ban mutu neitamaipu deiamu. Dinino, Libanon mutu tengamre coda, urasin pio-pio telep co tengrura cadi, Eden ban mutu tengamu co yumadi, Libanon mutu cermara co tep, ‘Uo, er urasin pio telep kuramretopu, nun ton kuptepe’ tenen, dipru pu jeramredi, pio mar penunge.

10 Ange tep nengeda, ne Allah Yahweh, ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu ‘Adonay’ deiyo ngeda, jenek kupra sekmupu.} akeca-keca yuma talepra, deiki tara erepra, pio puto weik deiyo ngebodi, pepne. Libanon mutu tengamre cemara co, er nong ila di neramra deiki di, er nong deiki tarada dua kan-kan cap, deiki tara cap, tengrure. Er kamo telep kupredi, er lyomda, ila lyom weik kurura cadi, aco er kange dipru erepredi, aco deikipu salnong-nong kamredi gemerure. 11 Er kange dipru erepredi, gemerura cadi, ange tep nengeda, nedi, ‘Angeda ne song’ tenepra tapnedi, tenpu mutu ila nimi deiyo ngebo, yuk mutu-mutu yuma talepra, deiki tara kupre ngebo, er damai dopra karepne. Ukupnepa, er kuramya menenga utopu wenemna tep, ikin keca er nong deiki deipkamre. Ne pe dingeda, acemara coda, konum tapsi. 12 Jen talena neng, yu weik neng, amutu men kunung neng dinin, orkaren mutu neng ada, bicau tenena gum neng yangedi, acoda kwepra tamnunge. Ada ukupmanto, nimidi ila mutu deiki welepmengedi, ila di nemre co kwepra tapmengepa, tali dourbaramre utopu kupkamre. Ila mutu amngai peda, lyom co kwepmengepa, aco teruda, aban mutu deiki dourberedi, me ban kuamyai berepa tamnunge. Tonda, dan mutu do yuma, ila me embaramraida, alyom co kweptapmengepa, aco teruda touptapra dourbaramretopu, ame neitamai saka dourbenkamre. Ange utopu kupkamre. Ukuprepa, tuai nesala ban-ban yuma, aco er damai wengyakaramenge nesalada, ‘Aco kauaida, men bukupe,’ tenepmengedi, aca tapra bendopkamenge.

13 Ma yala-yala yuma yangedi, aco kwepmangepa, co deiyo dourbenmarya deikida, yana bukamenge. Tonda, aco kwepmangepa, er teru dourbenmaryai deikida, tali tuai gam kuramre keca yumadi, aco teru neitamai, sun ati dopmengedi, acapu manunge. 14 Ange yuma ukupkamra deiki di, amenda taruda, aco er nong weik neamudi, ila lyomda, im dup tekamnga utopu, yuk co ton amenda taru utopu men tekamre. Tonda, me weik akapkamre dinin, autopu co ton, ame damai ila di men nepkamre. Aco sun deiki tarada, dua kan-kan neitamai welepra pio men kupkamre. Ange men kupkamra deiyoda, ake. Ada, aco yumada, tali tuai nengda, nimidi popmengepa, depmengedi, tuai durbarameng utopu, tu pumbonpu kwereprepa, wengbankamre. Tonda nimi depmengedi, dena neng kunungai, er si Sheol, acapu banunga utopu kunkamenge.

15 Nedi Allah Yahweh, akeca-keca yuma talepra, deiki tara erepra, ila puto weik kune deiyo ngebodi pepsene. Aco kweptamipa, tuai dourbenamudi, tu pumbon dinin, nimi depmengedi, dena neng kunungai, er si Sheol, acapu benamu taruda, ne Allahdi tu amutara embaramre me, dekdongopsipa, cepropupa, tuai nesala yumadi, ‘Uo’ tenen, mali kange doupidi, engerami. Tonda, tu pumbon embeu me yumada, buplan dekdongopsipa, ame embaramngai kwamu keca cap, amutu kwamu keca yuma peda engepi. Ukupra konum kupsidi, metek me embeua bisi yumada, dekdongopsipa, cepropka cadi, ame ton cap men embarure. Acemara co kwepipa, tuai dourbenamnga deiki di, Libanon mutu neitamai buku mutu gonai yumada, ‘Uo’ tenen, mali kange doupidi, engepipa, nedi amutu deiki yumada, kunungna keca karepsipa, pio kunuku. Ukupupa, amutu co palpal neitamai tengamu keca yumada, nunupropudi gum kupu.

16 Tonda, aco kwepipa, nimi deramenga utopu kupudi dourbenamu taruda, tuai nesala ban-ban yumadi, acemara co er tuai saku taru lelim pepupa, gekepidi, ‘Uo’ tenen, yo berber pepu. Ada, nedi nimi konum depmengepa, depmenge neng, tu pumbon kunungai, er si Sheol neitamaida, aco cap, konum deami neng cap, atu pumbon dongopsipa kikiman kurami. Tonda, Eden ban mutu neitamai tekamu co cap, Libanon mutu tekamu co cap yumada, me weik akwapka deiki di, teleppu kurami dinin, sun peda nimi deramenga utopu kupra, tuai dourbenamyai di, cemara co konum gum kupka cadi, engeramipa, nedi sun dipru kwa dipsipa, ka di ton cap kange deipi. 17 Cemara co dopra, Sheol mutu donokra dongopsi taruda, yuk neng cap kikiman tu pumbon weki. Ada, nimidi mar podan taru neitamai di, portamami nengda, er kupka utopu, nimi depnedi bange mutupu, Sheol mutu bena kurami. Tonda, men taruda, nesala ban-ban yuma ila cemara co damaipu bulupra wengyakarami neng peda, tu pumbon nimi depnedi bange mutupu, Sheol mutu bena kurami. Anengda, menop taru, sundi, ‘E, aila co cap, nun cap, kikimanpu benapna, yanapna kemnedi, acapu kikiman telep kupra kunkamepe,’ tenerami neng kuramya cadi, sun peda Sheol mutupu bena kurami.

18 Uo, kanda ila lyom cemara co utopu kurum ngebo Firaunda, ware yuk neng ton, kan pio puto weik kuramumtopu kurami do? Gume, kan tenpu pio puto cap, urasin telep kuramumtopu, yuk neng ton men kurami. Ukupmantoda, aila cemara coda, er tenpu, pio lyom cap, urasin pio telep cap, gat cap kuramutopu, Eden ban mutu neitamai peda, aco utopunge ton men kwamu. Eden ban mutu kwamu co yala-yala yumada, yambulanun telep kwamu dinin, Libanon mutu ila lyom cemara co utopu ngeda, men kwamu.

Dinino, ukutaruda, kanda kweptapkengepa, nimi depnedi bange mutupu, Sheol mutupu bena pio tep dakunkamrume. Eden ban mutu neitamai kwamu co peda, konum gum kupka cadi, aco peda, Sheol mutupu akurure. Tonda, acada, Allah tep teka tenena gum neng, sunda Allah cap kikiman men kuptenge nesala cadi, konum deamipa, sun peda Sheol mutupu kunkamenga cadi, sun cap, kan cap, kikiman amutupu kunkamrume.

Tonda, nimi podarami taruda, ton jen talen neng portamamipa, ‘Anengda nun song’ tenen, sun nongda men peirami dinin, tali derirami nengda, sun peda, Sheol mutu amutarapu pio kununga cadi, aderami neng cap, kan cap kikiman kunkamrume.

Uda, ne Allah Yahweh, akeca-keca yuma talepra, deiki tara erepra kunedi, ila puto deiyo ngebodi, pepne. Ukupmanto upu ila lyom Libanon mutu cermara co pepmanada, nong neitamai ngeda, ada Mesir mutu ila nimi deiyo kuramu ngebo cap, er jen talena neng denge men nukmanto neng cap tep pepsene. Sun yumada nimi depnedi, bena kunung mutu, Sheol mutupu pio tep dakunkamenge. Ne Allah Yahwehdi aupu konum pepra deipsene.