Eze 32 | XteSC | STEP | Babel mutu nengdi, nun Israel nesala popbisipseidi, ateng koupra, sun pe mutupu tamupra dubenamseipa, dakuramupkanen, keteng tamun 12 tahun konum kepupa, war 12 deiki dinin, awar gonga kemne tumi, tanggal 1 kepu tumida, Allah Yahwehdi, ne Yeheskiel damai yana peipneu.

Ezekiel 32

Mesir mutu taleamu Raja tep, ‘Ila me pumbon kuramre Banep bal deiki tep kunupe,’ tenepu upu

1 Babel mutu nengdi, nun Israel nesala popbisipseidi, ateng koupra, sun pe mutupu tamupra dubenamseipa, dakuramupkanen, keteng tamun 12 tahun konum kepupa, war 12 deiki dinin, awar gonga kemne tumi, tanggal 1 kepu tumida, Allah Yahwehdi, ne Yeheskiel damai yana peipneu.

2 Uo, kanda nimi sisadi deipkei ngebo kurume. Kandi Mesir mutu ila nimi deiyo ngebo, Raja Firaun tep, ‘Uo, Allahdi wenepra popkerepa, nimidi tu palipra peipkengedi, kange mun mut penkamkenga tep, kanda bicaue,’ pepra, upu puto di pepra wenepkurume. Ne upu peipken ngeda, kandi Raja Mesir damai bena pepkurume. Ada ake.

Firaun kandi, ‘Nesala ban-ban yuma dakungepa, sun kan-kan di, nepuda ila yu pus, er si singa puto weik kuramretopu ngebo kunune’ tenen, dipru eremdamemdi mutu ban-ban yuma kunge nesala tep, ‘Sunda ne amutarapu kunkamenge,’ tenerume. Dinino, ukupmantoda, kanda banep bal, laut mokon pirman kuramrenge, er sida buaya, mokon pum bon embaramretopu kurume. Kan yandi mokon pumbon yanipra bamempa, ayo me yuma buya kuramretopu, kanda ange utopu ngebo kurume.

3 Ne Allah Yahwehdi, akeca-keca yuma talepra, deiki tara erepra, ila puto deiyo ngebodi pepkene. Nesala ban-ban yuma bupra, wekmengedi dinkameng taruda, nedi sun tep, mekina yangna keca karepnepa, nimi weika di, ange doupmengepa, akeca pumbon wekromempa, ange di kan adipapu tomopkamkenge. Ataru nedi kan tep kaukepkenepa, acada nesala pio weik bulupmenge nesala yumadi, ne mekina yangna keca di, mokon pumbon dadi, kan nong erepra, dopropkengedi, douai bena deiptapkamkenge. 4 Ukupmengepa, nedi kan dopra, douai tara katuai tu deiki bena deiptapkamkene. Ada, nedi kan dopra katawai donokamkene. Ukupkene taruda, nedi pepnepa, ma yala-yala yumada, ‘Akeca nong jepkupe’ tenen, kan nong deiki bukmengedi, amupkamkenge. Tonda, tuai mutu ban-ban yuma neitamai, gam kunge keca yumadi, ‘Akeca nong jepra gawal dakamepe’ tenen, kan nong deiki bukra jepropmengedi, gawal dakamkenge.

5 Kan nong jekengedi, sekra bulukra tapkamkenge ngeda, nedi dopra mutu deiki yuma cap, mutu bukua pirman tara yuma capda, donokenepa, kan nong galemna sekropa dipapu dinipredi, amutu yumada lyunapu kunkamkere. 6 Kan yapida, mutu ban-ban yuma deiki diktapnepa saka embaramredi, welepbanmaryanen, mutu deiki ton embankamre. Tonda me pum bon sakredi, embaramre me yumada, kan yapipu kupredi, dinikamre.

7 Nedi kan popkenedi, gum kupra deipkamken taruda, im alau tara di singipdongopkamne. Tonda kuru yumada singipdongopnepa kunukredi, dirin ton men kupkamre. Nedi ketengda, dua weik karepnepa, dua di kepdongopkamre. War dirine peda, men kupkamra cadi, nimidi men dinkamenge. 8 Tek sisi ataruda, nedi im alau tara kapudi dirin kurur keca yumada, tapdongopnepa, dirin men kupkamre. Tonda, nedi kan kunkamrem tuai mutu ban-ban yumada, pio kunukmeteng pen kecapu karepkenepa, kuknapu kupkamkere. Neda Allah Yahweh, akeca-keca yuma talepra, deiki tara erepra kunedi, ila puto weik deiyo ngebodi, konum pepra deipsi.

9 Ataru nedi kan popkenedi, yawa poptapkamkene. Ateng koupra popkenedi, yuk-yuk mutu embana tep, doupra embankamken taruda, doupra yuk karen mutu nesala, kan kael kemna gum nesala, sun damai dubekenepa, epkengedi, ‘Uo, angeda kange mune’ tenepra, sun yuk mutu ban-ban yuma kunge nesala peda, sun dipru kange neitamaida, kwar dangmengedi, sun nong yuma yo berber penkamenge. 10 Tek sisi, nedi ange yuma kan tep kupkene taruda, nesala yala-yala yuma epkengedi, “Uo, angeboda er wenemna tep, kange mun keca dopropmar adano,” pepra, kware weik kupkamre. Tonda, mutu ban-ban yuma kunge Raja-Raja capda, nedi kan damai tep kupkamnenge epkamenge.

Nedi, ‘Anesala yuma epmengedi kael kepkameng’ tenen, nimi pon parang ya doupra, erepra embenkamken taruda, aneng yuma epkamkenge. Epmengopda, sun Raja-Raja cap, sun amutu nesala capda, nedi kan damai tep kupkamnenge epkamenge. Epmengedi, sundi, ‘Uo, angeboda er wenemna tep, kange mun keca dopropmar adano’ pepra, kware weik kupkamre. Tonda, mutu ban-ban yuma kunge Raja-Raja capda, kware kuprepa, sun yo moropsepkamenge. Nedi kan tep poptapra gawal dakamken taruda, sun anesala yumadi, ‘Uo, nun peda, wenepseredi, popserepa, depropkamep do?’ tenen, kware weik kunkamenge.

11 Ange yuma lap pepmakenada, tali tep men pepkene. Deiyoda, ake, neda Allah Yahwehdi, akeca-keca yuma talepra, deiki tara erepra, pio puto weik deiyo ngebodi pepsena cadi, nedi pepmasen keca yumada, tek sisi kupkamre ja! Kanda, Mesir mutu ila nimi deiyo kepra taleamum ngebo tep pepkene. Babel mutu taleamu nimi deiyo ngebodi, ‘Mesir mutu nimi deiyo ngebo poptapkamne’ tenen, er nimi pon ya doupredi, kan damai tarapu yana poptapkamkere! 12 Ne Allahdi, ‘Ukupkurume,’ pepnepa, Babel mutu ila yu weik kunung jen talena neng, pio mali neng tep yangedi, kanda Mesir mutu Raja cap, kan nyapsilip cap, kan tara nesala denge pio weik dakunge nesala cap, kan jen talena neng yuma capda, nimi pon ya dounge ngeda, yana dalupropkamsenge. Yuk mutu jen talen neng, sun yuda, yambulanunpu dinin, Babel mutu jen talena nengda, sun yu pio ila weik kununge. Ukupmengedi, kan taleamum nesala yuma popkamenge. Tonda sun Mesir mutu nesaladi, ‘Nunda ila isomka neng, puto weik neng kunupe,’ tenen, gemepra salnong-nong kuramrumdi, taleramrum keca yumada, anengdi akeca-keca yuma mali kweipmengedi, gum kupra deipmengedi, sikke buktapkamenge!

13 Tonda, sundi peiramrum gam keca yala-yala yumada, sun me jena tep, me pirimanai banunge yuma cap, dakunungai cap yuma dipapu, apeirum keca yuma nedi poptapnedi, gum kupra deipkamne. Akupkamna deiki di, nesala pe, tali gam kunung keca peda, ame damai ton cap bena, buya men kepkamenge. Nimi cap, nimidi peinung keca capda, gum kupkamra cadi, ame yumada, yo mepu kupkamre ja.

14 Ange yuma kupkamna deiki di, kan mutu neitamai embarur me yumada, nedi buya gum kupra deipnepa, telep kupkamre. Tonda ame yumada, telep kupra deipnepa, minyak me lupra embaramretopu, sun me bouna di sepdaro embankamre. Angeda, ne Allah Yahweh akeca-keca yuma talepra, deiki tara erepra, pio puto weik deiyo ngebodi, aupu konum pepra deipsena cadi, tek sisi kupkamre. 15 Tek sisi pepne. Ataruda, nedi Mesir mutuda, ati walangyopu kupra deipkamne. Tonda, nedi Mesir mutu kunkameng nesala yuma peda, gum kupra deipkamne. Ukupnepa amutu neitamai kwamre telep keca, konum gum kupra deipnyopda, amutu yumada dim bulung pepkamre. Adeikida, sundi ne tep, ‘Uo, Allah Yahwehda, erpu puto weik kurura cadi, akeca yuma talerure’ tenen, kael kepkamnenge.

16 Ataru neitamaida, nimi depmengepa, sun kayapu nengdi kange mun kange doupra ila di engepmengedi, nimi peipmenge taru penge mut utopunge, ila puto deiki di mut penkamenge. Atep nengeda, amutu nerapu sun kikiman wisipmengedi, amutda penkamenge. Amutu nerapu, sun dipapu gum dinin, yuk-yuk mutu neitamai, dakunung nerapu yumadi amut kikiman wisipra penkamenge. Ada, Mesir mutu cap, Mesir mutu kunge nesala cap, sun jen talena neng denge pio weik cap tep, ‘Uo, bicaue,’ tenepmengedi, animi peina mut penkamenge.

Tonda, amutu-amutu neitamai kunkameng nerapu yumadi, Mesir mutu neitamai kunung neng tep nengeda, amut penkamenge. Uda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, aupuda pepra deipsena cadi, nong tek sisi kupkamre ja, pepsene.

Depra banung nesala kunung mutu tep, pepu upu

17 Nun tomopra Babel mutu derirbenamseipa, dakuramupupanen, keteng tamunda dua belas tahun mapmepu taru, wareda tenpunge neitamai, tanggal lima belas yau tumida, Allah Yahwehdi ne damai yana peipneu upuda ake.

18 Uo, Yeheskiel kanda nimi sisadi deipkei ngebo kurume. Kan cap, yuk ila mambul mutu kunung nesala, sun nerapu cap, sundi Mesir mutu nesala cap, sun jen talena neng denge men nukmantonge yuma cap tep, tenepmumdi engenkamrume. Ada, sun Mesir mutu nesala yuma tep, sun yuma peda, konum deamipa, tu pumbon periami mutu, er si Sheol mutu, wengbanung neng damaipu, dopra dokotepnepa, wengbenkamenga tep pepsene.

19 Kan Yeheskieldi, sun Mesir mutu nesala tep upepra asipetepkurume. Sun pedi, sun pe tep, ‘Nunda pio urasin telep neng kunupe,’ tenedarum do? Tek sisi, yuk mutu neitamaida, urasin telep neng ton dakunung dinin, sunda yambul pua. Sun Mesir mutu nesalada, urasin pio telep-telep kurume. Dinino, ukutaruda, nimi depmengepa, peirbanung tu pumbon embanung mutu, er si Sheol mutu ^{▼▼Sheol mutu – Aupu deiyoda, pumun taruda, sun Israel nesaladi, ‘Nimi konum depmengepa, sun kayapu nengdi konum peikmengopda, adepmenge nesala, sun sambalada, gam kepman, tu pumbon mutu, er si Sheol mutu bena, pio tep dakunkamenge,’ tenerami.}, acapu bena kunkamrume. Ukupmempa, Allah tep teka men tenenung neng, er damai men yanmanto kununga cadi, sun adeami neng kunungaida, sun Mesir mutu neng cap, teka men tenemi dinin, men di konum deami neng cap, kikiman kunungai bena kunkamrume. 20 Mesir mutu neitamai kunung nesala peda, yuk mutu nesala mar podanai di popmengepa, weika di depkamenge. Depkameng dinin, sun poptapkameng nengdi, adepkameng neng telep kupra men peipkamenge. Ange gum dinin, ‘Anengda nun song’ tenen, tu deikipu deiptapkamenge. Ne Allahdi go karepnepa, Mesir mutu nesala peda, mar podanai di popmengepa, sun Mesir mutu neng cap, yuk mutu neng cap, kikiman popmengepa depkamrume. Tek sisi pepsene. Nedi nimi pon parang ya konum ketenepra deipsa cadi, apepmasen upu yumada, tek sisi nong kupkamre ja! Mesir nesala mar podanaidi popmengepa, weika di depkamenge.

21 Pio balila deipra, puto weika di, nimi poramya deiyo neng cap, sun tep meliami jen talena neng capdi, Mesir mutu nesala popmengepa, depra wengbanungai, er si Sheol mutu bengopda, ataruda sun epmengedi upu sisikamenge. Sundi pepkameng upuda ake. Ada, ‘Allah tep teka men tenerami nengda, mar podanai, parang ya di popipa, konum depmange nengda, ukutaru sunda acapu mapkamenge. Atep konuma. 22 – 23 Asyur mutu jen talen neng cap, sun amutu kurami nesala cap peda, men di depnepa peiramyai, acapu yaidi akununge. Aca manungai dana-dana tara ongopdongopra deipmai neng ton, acapu kununge. Sun aneng yumada, mar podanmankap popipa deami. Sun deami nengda, tu palipra peiami dinin, sunda pio mali-mali weik kurami nesala cadi, Sheol mutu pio amu neitamai bena deiami. Sun aneng gam tupa kurami taruda, amutu-amutu neitamai kuramidi, yuk dakurami nesala tep, yu kupupa, mali weik kuramya cadi, sun dana-dana tara kurami nesala yumada, sun aneng tep, kware pio weik kuramupa, sun nong yo moropsemamu.

24 – 25 Tonda, Elam mutu jen talen neng cap, sun amutu kurami nesala cap peda, men di nimi podanai di popipa, depnepa peiramyai, acapu yaidi akununge. Aca manungai dana-dana tara ongopdongopra deami neng ton, acapu deipmaipa kununge. Sun aneng yumada, mar podanmankap popipa deami. Sun yumada, Allah tep teka tenena gum nesala cadi, deamipa, aca Sheol mutupu yai. Sun Elam mutu deami nengda, tu palipra peiami dinin, sunda pio mali-mali weik kurami nesala cadi, Sheol mutu ^{▼▼Sheol – Aupu deiyoda, sun Israel nesaladi tenerami ngeda, ‘Nimi konum depmengepa, sun sambalada tu amu taru mutu, er si Sheol mutupu bena kununge,’ tenerami.} pio amu neitamai bena deiami. Sun aneng gam tupa kurami taruda, amutu-amutu neitamai kuramidi, yuk dakurami nesala tep, yu kupupa, mali weik kuramya cadi, sun dana-dana tara kurami nesala yumada, sun aneng tep, kware pio weik kuramupa, sun nong yo moropsemamu. Dinino, sun yuk neng mar podanai di popnepa, depnedi, wengbaramyaipu, Sheol mutu bei. Atep nengeda, Elam mutu neng cap, amutu konum men di yai neng cap, sun yuma peda ali daki.

26 Mesek mutu cap, Tubal mutu cap, sun jen talen neng cap, sun amutu butene kurami nesala cap peda, men di depnepa peiramipa, acapu yaidi akununge. Aca manungai dana-dana tara ongopdongopra deipmaiyaida, deami neng ton, acapu kununge. Sun aneng yumada, mar podanmankap popipa deami. Sun deami nengda, tu palipra peiami dinin, sunda Allah teka men teneramidi, pio mali-mali weik kurami nesala cadi, Sheol mutu pio amu neitamai bena deiami. Sun aneng gam tupa kurami taruda, amutu-amutu neitamai kuramidi, yuk dakurami nesala tep, yu kupupa, mali weik kuramya cadi, sun dana-dana tara kurami nesala yumada, sun aneng tep, kware pio weik kuramupa, sun nong yo moropsemamu.

27 Sun Elam mutu konum deami nengda, telep kupra men peipi. Ada, menop taru, ila puto weik jen talena neng, balila deipra, telep kupra kurami dinin, nimi podan taru yuk nengdi aneng popipa, depipa peipi taruda, telep neng kuramya cadi, sun jen taleamidi dourami keca, nimi pona parang ya cap, sun nong kalengna keca er si perisai cap, akeca kepman iripra deipidi peiami. Ukuamitopu, sun Elam mutu nengda, sundi angetopu kupra men kuramya tep, ila mambul jen talena neng cap, tenpaipu men peipi. Dinin, sun men taru ila mambul jen neng, sun peipkuyaida, sun dourami parang ya dopra, ajen neng sun giso erepra, giso amutara deipidi, sun perisaida, sun nong yo deiki moupra deiprapidi peiami. Sun Elam mutu jen nengdi, sun amu tara kurami nesala tep, sun gam tupa kurami taruda, pio balila neng kuramya cadi, ukuramipa sun tali dakurami nesala yumadi, ajen neng tep kwar kuramu. Atep sun peda, Sheol mutu amu tarapu peipipa akununge.

28 Atep nengeda, sun Mesir mutu nesala tep nengeda, sun aneng telep kupra men peiamitopu kupra, Sheol amu tarapu peipkamsenge. Tonda sun peda, Allah tep teka tenena gum nesala kuramruma cadi, teka tenena gum nesala peiramenga kan-kanpu, peipsengepa, acapu bena kunkamrume. Tonda, acapu, sun mar podanai di popseidi, telep kupra peina gum dinin, tu deiki katuaipu deiptapseiya cadi, peipsengepa, sunda tu amu tara, Sheol mutu pumbonpu bena kunkamrume. 29 Edom mutu nesala cap, tonda sun mutu nimi deiyo kepra taleami Raja neng cap, sun amutara pel dona tep, deiyo kemami neng cap, sun yuma peda peiramipa, aca Sheol mutupu bena kununge. Men taru sunda pio ila puto jen talena neng kurami dinin, puto kuramya peda, nimi podan taru, yuk nengdi aila neng popipa, ukutaruda depidi, nimi dena neng kunungai, Sheol mutu beipa, sun cap, Allah teka tenena gum neng cap, sun tonpa Sheol mutu pumbon, tenpaipu kununge.

30 Acapu, dapu tarada, arah utara mutu kuramidi, nimi deiyo kepra talerami neng cap, tonda Sidon mutu kurami neng cap, sundi talepra kuramipa, men taru sun yu weik kurami neng cadi, sun puto deiki di mali kuraminge tep, yuk nesala yumadi kwar kuramu. Dinino ukutaruda, sun peda acapu kununga tep, sun peda ali weik dangnunge. Ada, Allah tep teka tenena gum neng cap, nimi podan taru, nimi pon parang ya di, poptapidi, tu deiki derirtamami neng cap, sun tonpa kungedi ali dangnunge. 31 Mesir mutu taleamu deiyo ngebo, Firaun cap, er jen talena neng cap yumada, mar podanai di popipa, konum deami neng kununga, Sheol mutu damai bengepa, menop taru di, yuk-yuk mutu kurami ila puto weik deiyo neng cap, jen talen neng cap, podan taru konum popipa, depmengedi, acapu wengbanung neng cap, tonpa epdankamenge.

Ataruda, Firaundi ange epyopda, er kange deipdankamre. Ada Firaun cap, er jen talena neng yuma cap, er tara nesala cap, men di konum pomipa, depropi nesala yuma tep nengeda, ‘Uo, nunpuda gume, yuk mutu neng ton, amali mutuda, Sheol mutupu, sun peda aca wengamya cadi, dakwapye’ tenen, er kange dipruda, kwadipdankamre. Aupuda, ne Allah Yahweh, akeca-keca yuma talepra, deiki tara erepra kunedi, ila puto deiyo ngebodi, konum upepra deipepsena cadi, angeda tek sisi nong kupkamre ja.

32 Ne Allahdi, Mesir mutu talepra kuramu ngebo tep, wenepnedi, Sheol mutu dongopkamna deiyoda ake. Ada, er Firaundi, er mutu dana-dana tara kurami nesala yuma tep, erdi yu weik kuramupa, sun yumadi er tep, kware weik kurami. Atep, nedi er tep kwangdakamne. Ange tep nengeda, er cap, er jen talena neng denge pio weik cap, er mutu nesala cap, yuk mutu yu nengdi, sun yuma mar podanai di popmengepa depkamenge.

Depmengopda, Allah teka men tenerami neng cap, yuk mutu nengdi mar podarami taru, jen talen neng poramidi, ‘Anengda, nun songe,’ teneramya cadi, ‘Sun tara nengdi ali dangkamenge’ tenen, sun galemna peina gum dipapu, tu deikipu deritamami neng cap, konum depra wengbaramyaipu, Sheol mutu bengepa, Firaun cap, er amutara kurami Mesir mutu neng denge pio weik cap, acapu tonpa kunkamenge. Aupuda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, aupu tek sisi konum pepra deipna tep, nong kupkamre ja.