Ezekiel 33

Allahdi nesala kalengna neng tep, pepu upu

1Allah Yahwehdi ne Yeheskiel damai yana pepra deipneu. Aupuda ake.

2“Uo, kanda nimi sisadi deipkei ngebo kuruma cadi, kan pe mutu nesala tep upepkurume. Ware mutu do yuma, tenpu mutu neitamaida, ne Allahdi, ton mar podana yu neng doroipnepa, poryankameng taruda, amutu nengda ukupkamenge. Amutu nesaladi, ‘Nun mutu podan neng, poryankamsenung’ tenen, sun kan-kan di, kalengna deiyo ngebo ton wepra deipmengepa, akalengna ngebodi pio moupra dinapu kunkamre. 3Akalengna deiyo ngebodi, dinmarepanen, amutu nesala pona tep neng, yakanmangepa epyopda, er adipapu, ‘Anengo, nun poryasenge,’ pena tep, ila lelim pen keca, er si terompet di pung peprepa, amutu nesaladi gekepra kael kepmengedi, ‘Uda, nun pona tep nengda yakanmange’ tenen, moupra kalekamenge.

4Dinino, angebodi, aila lelim pen keca, pung perepa, amutu nesala kan-kan, ton neng dingeda, alelim gekepmenge dinin, sundi, ‘Dyo dakwapye, men ketenepkupe,’ tenepmengedi, tali kange doupra kungopda, sun pe dipapu mali kununge. Ada, lelim gekepmenge dinin, moupra men kunmange nengda, nimi pona tep yu neng yangedi popmengepa, amutu nesala depkamenge. Dinino aneng popkamenga deiyo cap, yapi capda, sun pe nong deikipu kupkamre. Deiyoda, ‘Yu podan neng poryasenge’ tenen, pung pena keca, terompetda, kalengna deiyo ngebodi konum pung pepupa, aneng gekepi dinin, sun pedi moupra men kupmaiya deiki di, anengdi amutu nesala popipa depya cadi, deiyoda, sun pe pua. Sun yapida, sun deikipu kupkamre.

5Ada tali tep gume. Kalengna ngebodi, terompet ila lelim perepa gekepi dinin, sunda moupra kuna gum deiki di, sun podan nengdi, anesala popye. Atep, sun yapida, sun pe deikipu kupkamre. Dinino, lelim gekepmengedi, moupra kunmange nesalada, kange moupmengedi, keteneptenge teptoda, nimi pona tep yu neng yangedi poptereptenga peda, men depkamenge. Anengda, tek sisi lyepropdankamenge.

6Dinino, amutu damai kalengna deiyo ngebodi, sun pona tep neng yakanmangepa epre dinin, er di ila lelim pena keca, terompet pung men pepredi, men lap pepre pangeda, amutu nesalada, gekepmengedi, kange men moupmengedi, tali kange doupra kunmangepanen, sun podan nengdi yana, amutu nesala kan-kan di nimi ton popkamenge. Popmengepa depkameng nengda, sun mali tupa kuramya neitamai dipu, popipa depi. Depkameng dinino, sun amutu nesala popkaminge deiyo cap, yapi capda, amutu kalengna deiyo ngebo deikipu deipkamne. Atep nengeda, amutu nesala poptapkameng neng, sun kwang dangna tep nengeda, ne Allahdi, amutu kalengna deiyo ngebo, upu men lap pepu ngebo, er deikipu deipkamne. Nedi er tep, ikin keca deipnepa dopropkamre. 7Ange utopu, uo, kanda Yeheskiel, nimi sisadi deipkei ngebo kurum dinin, nedi kan tep, ‘Israel yala nesala, sun kalengna deiyo ngebo kunkamre’ tenen, konum wepra deipkene. Dan taru do yuma, ne upu kan deiki yana, ‘Upepkurume,’ pepra, deipkenepa, gekepmem taruda, kan adipapu sun Israel nesala damai bememdi, ‘Allahdi aupu peipmasere,’ pepra, bena lap penkamrume.

8Ange utopu ngeda, ne Allahdi sun pio ila mali kunung neng yuma tep, ‘Sun mali weik kurum nesalao, sunda popnepa depropkamrume,’ pepra deipsene dinino, kanda sun gekenai di, ‘Anengo, sun mali weik kurumnyada, adipapu taprumudi, tamupra telep kun bisipu benkamrume,’ pepra, lap men pepmumpa, sun mali kunge keca men tapmengopda, amenda yu podan neng dopreipnepa yangedi, amali kun neng popmengepa depmengopda, sun mali tupa kunkameng taru neitamai dipu depkamenge. Dinino, sun ukupkamenga deiyoda, kanca. Sun amutu nesala poptapkamenge nge pe, sun yapi sangamrenge peda, kan deiyo pua. Sun depkamenga kwang dangna tep nengeda, ne Allahdi, kan deikipu deipkamken ja. Nedi kan tep, ikin keca deipkenepa dopropkamrume.

9Dinino, kandi sun pio mali kuramenge nesala tep, ‘Anengo, kange moupso! Sun mali kuramumnge tapmumdi, ka di tapmupra Allah damai yamumdi, telep kun bisipu bamumpa, erdi lyemkamsere,’ pepra, lap pepmempane, amutu nesala men gekepmengedi, mali tupa kuramengopda, nimi pona neng dopreipnepa, yu neng yangedi popmengepa, depkamenge. Depmengopda deiyoda, sun yapi, sun deikipu kupkamre. Nedi ikin keca sun pe nong deikipu deipnepa akapkamre. Dinino, kan kalengna deiyo ngebo deiki ikin keca men deipkamkene. Kandi sun tep, ‘Sun kange moupso! Mali kunange yumada, tapso,’ pepra, lap pepmemnya deiki di, konum lyemdankamreme.

Allahdi Israel nesala tep, ‘Sun mali kuramrum kecada, sun pe deikipu ikin keca yaserepa, doropkamrume,’ pepu upu

10Uda, Allah Yahwehdi ne Yeheskiel tep yana pepra deipneu upuda ake.

Uo, kanda nimi sisadi deipkei ngebo cadi, sun Israel nesala tep upepkamrume. Aupuda ake. Sun Israel yala nesaladi, uperume. “Uo nunda, Allahdi, ‘Ukupkamrume, angeda men kupkamrume,’ pepra deipseu upuda, moupra men gekepmepudi, yanitamnapu kunupa cadi, nun kange dipru neitamaida ikinpu kuserure. Nunda, ‘Uo ware deiyo tep, mali-malipu kunup do?’ tenen, ikin kange doupra kunupe. Tonda adeiki di, nunda pio bol malipu doupra kunupa cadi, nunda pio ikinpu kuserur atep, ware kupra tupa gam kutepe do?’ pepra, sun pepu asimdankamrume,” pepkamrume.

11Upepmem dingeda, kan Yeheskieldi, sun tep, aupu ton tapakra pepkamrume. “Ne Allahda, tek sisi pio gam kunune. Angeda tek sisi kuramretopu, adeiki di, tek sisi upu ton pepsene. Ne Allah Yahweh, akeca-keca yuma talepra, deiki tara erepra kunedi, ila puto deiyo ngebodi pepsene. Sun mali kunge nesalada, sun tupa malipu kunge taru dipapu denung nesala tep nengeda, ne kange men derinune. Kange telep kunerur ngeda, ‘Sun mali kunung nesaladi, sun mali kuna ngeda taptengedi, tamupra ne damai yangedi, telep dipapu kutengedi, gam kunkamtenge’ tenen, kange deipra tenenune.

Atep nengeda, uo, sun Israel yala nesalao, sun tupa mali kurum ngeda, adipapu tapmumdi, tamupra ne damaipu yankurume! Ware keca deiyo tep, balilapu kupra kumumya deiki di, sunda depkamrum do?” Upepra lap pepkamrume.

12Upepmem dingeda, kanda nimi sisadi deipkei ngebodi, aupu ton tapakra kan pe yala neng, Israel nesala tep upepkamrume. “Ne Allahdi, ‘Angeda kupkamrume, angeda pio men kupkamrume,’ pepra deipsisi upu, ton neng dingeda, angepu gekepmengedi, moupra talepmengedi, dumsisipu kununge. Dinino, anesaladi ne upu yanipmengedi, mali kupmengopda, sun men taru di telep kuraminge deiki di, tamupra men telep kweipdatengedi, men lyepropdatenge. Tonda, sun mali kuramenge nengda, ne upu yaniptapmengedi, mali kunung dinin, ange yuma tapmengedi, tamupra ne damai yankameng nengda, dumsisipu kunkamenge. Atep men di mali kuraminge tep nengeda, kau kepnedi, anesala wenepra men popkamne.

Angetopu, men di ton nesalada, ne upu taleamidi, dumsisipu kupyakarami dinin, amenda taru ange yuma tapmengedi, ka di ton cap mali-malipu kupmengopda, men di telep kuraminge deiki di, gam tupa men kunkamtenge. Anengda, wenepra popkamne ja. Tonda teleppu kupyakaramre ngebo dinin, amenda ka di ton cap mali kupkamre ngeboda, tamupra men telep kweipkamne.

13Atep, ne Allahdi pedina upu konum peipsi. ‘Ne upu gekepra talepmengedi, dumsisipu kuramenge nesalada, lyepropkamsene. Gam kunkamrume,’ pepsi. Dinino, men taru teleppu kupyakaramre ngeboda, amenda taru telepnge tapredi, kange di gonga kepra, mali kunangepu kupredi, ‘Gume, dakwapye, ne tupa mali-malipu kuptene. Men taru teleppu kuramsa deiki di, Allahdi ange tenepredi, lyepropkamnere,’ tenepra malipu kunkamre ngeboda, ne Allahdi tek sisi men lyepropkamne. Angepu tenenkamre ngeboda, er walwal di tenenkamre. Er angebo men taru telep kupyakaramu ngeda, nedi ton cap men tenepkamne. Angeboda, ne upu yaniptapra, amenda mali-malipu kupyopda, er mali tupa kunkamre taru neitamaida deprepa, er menengada, dena kecapu dopropkamre.

14Dinino, ‘Mali-malipu kuramre ngeboda, nedi wenepnepa, konum depkamre,’ pepsi ngeda, tek sisi depkamre! Dinin, amalipu kuramre ngeboda, amenda taru er mali kuramre keca yuma tapredi, tamupra ne damai yaredi, ne upu peretopu, dumsisi teleppu kuryopda, er angeboda gam pio kunkamre ja. 15Telep kuna ngeda, ukupmantonge ton pepkusene. Ada, angebo, ‘Men depkamne,’ tenepredi, dumsisi kunange kupkamre ngeda, ake. Erdi nimi yuk neng keca dalupra dopromrengeda, anesala tep ka tamupra karepkamre.

Tonda, akeca-keca putapre ngebodi, ‘Kao, co bo keana tep karepnetumpa, amenda taru ange yuma tamupra karepkamkene,’ pepmengepa, er angebodi, ‘Dyo, co bo keana tep karepketene dinin, ‘Ange yuma tamupra karepkamnerem’ tenen, er petenkemna keca tep nengeda, abung keca dopra, ne damai deipnememnyopda, amenda taru ne co bo karepnemempa, abung keca tamupra karepkamkene,’ pepra, pedina upu pepyopda, tek sisi abung keca dopra, akeca deiyo neng tep tamupra karepkamre. Tonda, nimi deiyo nengdi do, ne Allahdi do, ‘Ange kupkamrume, angeda pio men kupkamrume,’ pepra deipmepe upu, gekepredi, angepu talepra kupyakaramre ngeboda, ange tenepnedi, angebo tep gam kuna deiyonge karepnepa, depmarya peda, amenda taru tek sisi gam pio kunkamre.

16Atep apepman keca utopu kure ngebo, er men di mali kuramu keca yumada, ton cap men tenenkamne. Angebo er mali kuramrenge yuma tapra, telep dumsisipu kuryopda, gam tupa kunkamre. Tonda, deiyo nengdi do, ne Allahdi do, ‘Ange kunkamrume, angeda pio men kunkamrume,’ pepra deipne upu, moupra talepredi, dumsisipu kure ngeboda, er mali kuramunge, nedi gum kupra deipnepa, teleppu kunkamra deiki di, amenda taru gam pio kunkamre. 17Ange yuma lap pepmasen dinin, kan mutu neng, Israel nesaladi aupu penunge. “Gume, Allah Yahweh, akeca-keca yuma talepra, deiki tara erepra, pio puto weik deiyo ngebodi, nun tep perseretopu, men kurure. Angeda, telep kunange gume. Nundi kurameptopu tenepra, men wenemserure. Erdi teneretopu upu bokeipseredi, wenemserure,’ pepra mali penenune. Dinino, tek sisi telep men kure ngeda, sun Israel yala nesaladi kunung ngeda, tek sisinge men kununge. Malingepu kununge.

18Upenenung dinin, nedi tek sisi pepsene. Ware neng do yuma, ne pene upu talepra teleppu kupyakaramyanen, kange di ton cap tamupra, telepnge tapra, mali kunangepu talepra kunge nesalada, upu bokeipnedi wenepsenyopda, depkamenge. Ada, telepepu kupyakaramyanen, kange di tamupra, pio malingepu kupre ngeboda, er amali kupyakaramya deiki di wenepnepa, depkamre ja. Pio gam men kunkamre. 19Angetopu, mali-mali kun kecapu talepra, kupyakaramre ngebo, er pedi, ‘Uo, neda mali kunune,’ tenepredi, malinge yuma tapredi, tamupra telep dumsisingepu kuryopda, ange dumsisinge kupyakaramya deiki di, er angeboda gampu kunkamre ja. Deiyoda, er malinge yuma tapra, tamupra telep kunkamra deiki di, pio gam kunkamre.

20Ukupkamre dinino, sun Israel mutu neitamai kunung nesaladi, aupu penunge. “Gume, Allah Yahweh, akeca-keca yuma talepra, deiki tara erepra, pio puto weik deiyo ngebo kurur dinin, erdi upu bokeipseredi, wenepra poserur ngeda, ada telep kunange gume. Nun tenenupa utopunge men kuserure,” penenunge. Atep ne Allahdi, sun Israel nesala yuma tep, sun kuramrumnge utopu, moupra dipetepnedi, upu bokra deipnedi, wenepkamsene.

Ila ati arum dominge, ‘Yerusalem mutu loka sakmare,’ pepya tep, pepu upu

21Babel mutu nengdi, nun Israel nesala popbisipseidi, ateng koupdongopra, sun pe mutu tamupra doupra benamseipa, dakuramupkanen, keteng tamun 11 tahun konum kepupa, war 10 deiki dinin, awar gonga kemne taru neitamai, tanggal 5 kepu tumida, tenpu ngebodi, ne damai yana upu peipneu. Ada, yu weik podan neng, Raja Nebudkanezar er jen talena nengdi, Yerusalem mutu nesala popbisipipa, angebo tenpu men popipa, bura saka, sepdaro ne damai yanmaudi pepneu. Erdi pepneu upuda, ‘Uo, Uo, ila ati arum doramupkai, kota Yerusalemda, nun podan nengdi konum dakra tapmai adano!’ pepra lap pepneu. 22Uda, angebo kapul men yanmau tumi, aupu doupra men lap peryanmaneu taru, keteng ortara wengbenkou ketengda, lukunda kepkou taruda, Allah Yahweh er ila putoda, ne kange dipru deiki deipneupa, nedi, ‘Uo, angeda ware kupkuner do?’ tenen, kundenkap, Allahdi ne upu tamupra karepneu. Men di upu men pepmanto kunmasidi, dakunmasanen, alukunda yankou taruda, Allahdi, pel dopneua deiki di, ne upu tamupra pepmanto kupsi. Ataruda, Allah Yahwehdi, upu peipneu.

23Allah Yahwehdi ne damai yana peipneu upuda ake.

24Uo, kanda nimi sisa dipapu deipkei ngebo kureme. Sun Israel mutu neitamai, ila ati arum cap, yambul ati arum cap, dopra kuramrumu mutu atida, walang kupkai dinin, amali mutu tupa kunung nesaladi upenenunge. Sundi, ‘Gume, Abrahamda, tenpu ngebopu kuramu dinino, erdi amutu tu neitamai yumada, dopramudi amutu neitamai kuramu. Akuramu taruda, erda tenpu ngebopu kuramu dinin, amutu-amutu yuma dopramudi, amutu neitamaipu kuramu. Dinino, ne kangeda, ataru kunup nesala, nunda nesala pio weik kunupa cadi, tek sisi ngeda, kandi nun tep, amutu karepsemempa, amutu pio talepra kupedi, nun pe mutu sisapu kepropkamepe,’ penenunge.

25Atep nengeda, kandi sun Israel nesala tep upepkamarume. “Ne Allah Yahweh, akeca-keca yuma talepra, deiki tara erepra, pio puto weik deiyo ngebodi pepkena cadi, ne upu pepra deipkene upuda, kandi doupra, sun damai lap perbenkurume. Aupuda, ake. Nedi, ‘Angeda ne songe,’ pemsisi dinin, sundi tupa mali weik kurum ngeda, lap pepkusene. Ada, sunda yapi tupa kunmare kecapu, galepmumdi, yapi kepmanpu dopra jerume. Tonda, ‘Nun naidi melipkamser’ tenen, sunda isok-isok sipu eremrumudi, nimi pon neng kurume. Ukupyakaramruma deiki dipapu, pio balila kepra kurumudi, ‘Amutu yumada, nun mutu sisa kepkamsere’ tenen, Allahdi amutu tu dopra nun tep karepkamsere,’ penenunge.

26Sunda, nimi pon parang ya doupra, aya di nimi porume. Tonda, isok si eremrumu taruda, pio mali-mali kun keca ton kurume. Akun keca yuma tep nengeda, ne Allahda, ‘Akeca yumada, ne pio songe,’ tenenuna cadi, “Ange yumada, kuna meme,” pepsisi! Dinino, sundi apio mali kun keca tupa kurume! Angepu gum dinin, sun nimi yumadi, sun kayapu nengdi konum domi nerapu, inipra upula tali-talipu nyangdarume. Atep, sun moupra tenipetepso! Ange pio mali kun keca yuma kumumnya deiki di, ne Allahdi, amutu tu yuma karepsenepa, doronkamrum do? Gume, ada men kupmanto pepsene.

27Ange tep nengeda, kanda Yeheskieldi, sun Israel nesala tep upepkamrume. “Ne Allah Yahweh, akeca-keca yuma talepra, deiki tara erepra, pio puto weik deiyo ngebodi pepsene. Neda Allah, tek sisi gam pio kunune. Ange tek kuramretopu, nedi pepkusen upuda, ‘Uo, tek sisi upupu pepmasere’ tenen, gekepkunerume. Ada, dan mutu do yuma, ila-ila ati arum cap, yambul ati doramyai cap yumada, ukutaru walangyopu kupu mutu kunung nesala yumada, yu neng yangedi poptapsengepa, depkamenge. Tonda, nimi katuai mutu kunung nengda, nimi weik gum dinin, karen katuai mutu kunung nesala yumada, bura tara tali gam kure yu keca dopreipnepa, sun damai yana, sun yumada popra jepropkamsenge. Tonda, mutu dup buku mutu cap, gel imir pumbon dainimbei nesala cap yumada, nedi ila kange mun pu jena deiyo keca karepnepa, anesala pu jeryopda, sun yuma depkamenge.

28Amutu neitamai yumada, ne Allahdi katauaipu keipnepa, nesala ton men kunkamenge. Amutu-amutu yumada, pio dimbulung pepkamre. Ukupkamna deiki di, menop taru sundi, ‘Nun ila puto di amutu yuma talepra kunupa,’ tenepra, salnong-nong kuramrum ngeda, nedi gum kupra deipkamne. Gemepmanto deiyo keca yumada, gawal dakra, gum kupra deipkamne. Ange konum kupnyopda, Israel mutu gon bukua damai yumada, dim bulung peprepa, nesala ton amutu bisi balila deipra, men embankamenge. 29Nedi, ‘Angeda ne pio song tenene keca cadi, ukunada pio meme,’ peipsi keca dinin, amalingepu talepra kuramya tep, adeiki di sun mutu neitamai kunung nesala cap, amutu telep keca cap, sun ati-ati cap yumada, popra gawal daknyopda, walangyopu kupra deipnepa, dimbulung pepkamre. Ukupnya deiki di, amutu nesala yuma wenepkamne taruda, sun yumadi, ‘Uo, ange yumada, tek sisi Allah Yahweh, er dipapu kupka’ tenen, ne tep kael kepkamnenge.

Amenda taruda, sun Israel nesala yumadi, ‘Uo, nun kankan peramseu ngeboda, tek sisi nabi ngebo kuramu,’ tenepkamenga tep, pepu upu

30Allah Yahwehdi, ne Yeheskiel tep pepneu.

Uo, kanda nimi sisadi deipkei ngebo kurume. Kan mutu nesaladi, kan tep upu sisikmenge taruda, upedanunge. Ada sun mutu neitamai, ila ati arum dopra kungedi, bura tara beilya dam, ada ila lyom gel beilya tembok ongopdongopra wipinge damai cap, tonda sun pe ati-ati yuk-yuk donunga damai cap, bulupra antapmengedi, kan tep upedanunge. Ton ngebodi ton ngebo tep, sun pedi upedanunge, “Ukuda yakaso. Atumida, nun nai bo Allah Yahwehdi peipseu upu, gekena tep, nabi Yeheskiel damai bena gekenkupe,” pedanunge. 31Dan mutu do yuma, ukuramengtopu, amutu kunung nesala peda, ‘Ila mambul upu gekepkup’ tenen, nimi weika di bulupmengedi, anengdi sepdaro, kan damai yana bungnunge. Ukunungada, ne Allah, ne nyapu sisa utopu kupmengedi, weika di kan damai yangedi, kan upu penkamrem ngeda, pio moupra gekenkamenge. Amul deiki di gekenung dinino, kandi, “Angeda kupkurume, angeda men kupkurume,’ pepra, pepmem ngeda, sundi moupra talepmengedi, men dombankamenge. Deiyoda, sun anesalada, sun sipyal deiki di, ‘Er kange deipkamaser’ tenen, gekena telep upu penkameng dinin, sun dipru neitamai di tenenkameng ngeda pio yuke. Ada, sundi, ‘Nun tenena deiki di, mok upu pepmepepa, yuk nengdi karepsengepa, nun pepu telep kweipdatepe. Nun dipapu telep keca doronkamepe,’ tenenunge.

32Ukupmantoda ake. Sundi kan tep tenekenungada, ‘Angebo Yeheskielda, mut pena ila kael ngebo cadi, nimi cap, nerapu cap, kange deipdangedi, pio kange telep mut pepdanunge. Atep, sundi kan tep, ‘Gume, erda pio kange lon ngepu perure,’ tenekenunge. Tonda, ‘Erda mut pena tep, er upu lelimda gekena pio telepnge peserure. Tonda, mut pena tep, bung-bung pena douna kael ngebo kurure,’ tenenkamkenge. Atep nengeda, kandi penkamrem upuda, sundi amul deikipu gekenkamkeng dinin, moupra men tenepmengedi, ange men kupbankamenge.

33Ange tep nengeda, nedi kan tep, ‘Ukupkamne, anesala poptapra gawal dakamne. Amutu yuma mali kweipnepa, walangaipu kupkamre,’ apepmakenpa penkamarem upu yumada, tek sisi nong kupkamre ja! Moupra gekepkurume. Ne Allahdi apepmaken upu yumada, tek sisi yana, sun deiki deipkamne! Atep, ange yuma konum nong kupredi, sun deiki deipnyopda, ataru di, sun amutu nesala yumadi, ‘Uo, ukutaru nun kael kepmepe. Angebo Yeheskielda, nun kan-kan neitamai kuramu dinin, erda tek sisi nabi ngebo kurure. Allahdi, ‘Upepkurume,’ peprepa, angebodi, lap peryakaserure. Nun damai kuramudi peramu upuda, konum kupra cadi, erda tek sisi nabi ngebo kurure,’ tenepmengedi, kael kepkamkenge. Ne Allahdi pepkene, pepu.