Eze 34 | XteSC | STEP | Allah Yahweh, akeca-keca yuma talepra, deiki tara erepra, pio puto weik deiyo ngebodi, ne Yeheskiel damai yana peipneu. Peipneu upuda ake.

Ezekiel 34

Israel mutu neitamai peteremna neng tep, ukupmanto pepu upu

1 Allah Yahweh, akeca-keca yuma talepra, deiki tara erepra, pio puto weik deiyo ngebodi, ne Yeheskiel damai yana peipneu. Peipneu upuda ake.

2 “Uo, kanda nimi sisa dipapu deipkeipa kurum ngebo, Yeheskiel kandi sun Israel mutu neitamai kungedi nimi deiyo neng cap, ila neng cap, peteremna deiyo neng cap tep, upepkurume. Ada, ne Allah Yahweh, ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu deiyonge jenek kupra sekmupu.} akeca-keca yuma talepra, deiki tara erepra, pio puto weik deiyo ngebo kununrdi, aupu upepsene.

‘Uo, sun Israel mutu neitamai kumum nimi deiyo neng yumada, sun pe kange dipapu men tenedarum do? Sunda, domba peina deiyo neng utopu kurum dinin, sun dipapu, sun pe putan kecapu tenepra, sun pe jen kecapu ketenepra jerume.

Dinino, sun domba bisam utopu nesalada, sundi, ‘Dakwapye,’ tenerumudi tamrume. Atep, sun deiyo nengdi, sun domba bisam utopu nesala tepapu pio men tenerumudi, sun jen keca pio men karerume. Tek sisi telep kuna ngeda, domba peina deiyo nengdi, sun domba bisampu tenepra, sun putan keca karenunge.

3 Tonda, Israel nesaladi, domba karepmengepa, sun deiyo nengdi, adomba bisam galemna dopra, pio telepnge meta cap, tu telepnge cap, domba bisam bol cap, ‘Opkal wipkup’ tenen, domba potong dalupra dopromumdi, sun pe opkal bol kemnangepu dopra, opkal bol wipra kenengrume. Tonda, ukumumdi er adomba bisam telep kupra neramre ngeda, sun pe dipapu popra jerume. Amalinge yuma ukurum dinino, sunda domba bisam tep upu pepra pio moupra men peirumdi, jen keca ton men karerume. 4 Domba bisam puto boun ngeda, sundi moupra men peirumudi, ka di ton cap puto men kemdirume. Tonda, pu jenmare domba bisam pio men kweterume. Utopu, suse jeramre domba bisam, er suseda moupra men geterume. Tonda, saka yo copredi, pu jeramreyopda, telep kupra men getepra kwetemrume.

Angetopu ton, ‘Domba bisam embaredi, bisi tep wangaprur’ tenen, sundi, ‘Uo, nun domba bisam dan cei kurur do?’ tenen, dawangamre ngeda, moupra eprapmumdi, tamupra men duyakarume. Tonda, domba bisam dim pepmare ngeda, ‘Dan cei kupmar do?’ tenen, pio men dirbarume. Ange gum dinin, sun adomba bisam yuma tep nengeda, yu deiki cap, domba nong pona deiki cap, mali kange doupra kurumu dipapu, adomba bisam tep, mali kupra peirume.

5 Sun Israel yala nimi deiyo nengda, ukupra pio malipu kuramruma tep nengeda, Israel nesalada, sun domba bisam utopu kununga cadi, sun peina deiyo neng ton pio gum tep, sun adomba bisam utopu nesala yumada, sepdara bura tara saka, bura tara yuk-yuk dabendomi dingeda, adomba bisam yumada, tali bura tara dakuredi, yu pio weik kuramre gam kecadi, adombada, tali lupra popra jeramidi, gawal dakmanto kurami. Mangsa bisam utopu kurami. 6 Atep nengeda, ne domba bisam utopu nesala, Israel nesala yumada, bura saka, sepdaro ila lyom mutu-mutu dupai cap, mutu deiki cappu, bendomidi, dana-dana tara dakurami. Sun adomba utopu nesaladi, ‘Amutu-amutu benkup’ tenen, moupra tenena gum dipapu, tali kange doupra, amutu neitamai yumada, epra embaramipanen, amutu yumada lelekami. Atep, ukurami taruda, nimi tenpu ngebo peda, ton moupra men tenipetepudi, ‘Uo, adomba bisam utopu nesalada, dan cei kunung do?’ tenen, sun tep men erpetererami.

7 Ange tep nengeda, uo sun Israel mutu neitamai, nimi deiyo neng kepra peteremna neng kurumu nengo, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, sun tep pepsene. 8 Neda, tek sisi pio gampu kununa utopu, ne pepkusen upuda, tek sisi nong kupkamre ja! Sunda, pio mounkamrume! Ada, ne domba bisam yumada, bura tara gam kuramre yu keca yumadi, yakangedi konum popra jedonunge. Ada, sun domba bisam moupra peina utopu deiyo nengda, pio gum tep, ne domba bisam utopu nesala yumada, dana-dana tara konum embandaramidi, sun bisi tep, ‘Dan bisi benkup do?’ tenen, wangamdarami.

Tonda, sun nimi deiyo neng yumada, ne mawa nesalada, domba bisam utopu nesala, sun bisi wangamupa, tali bisi lerekra embaraminge yumada, epra men duyakaramrume. Deiyoda, sunda sun penge tepapu tenedarumudi kurume. Sundi, sun pe tep, jen keca karedarum dinin, ne domba bisam utopu nesala tep, moupra men peirumudi, jen pio men karerume.

9 Ukupra mali weik kuramruma tep nengeda, uo sun Israel yala nesala nimi deiyo nengo, neda Allah, akeca-keca yuma talepra ila puto ngebodi pepkusen upuda, pio moupra gekepkurume. 10 Sun kange moupso! Ada, ne Allah Yahweh, akeca-keca yuma talepra, deiki tara erepra, ila puto kune deiyo ngebodi, sun tep pepsene. Ada, neda sun Israel nesala tep, nimi deiyo kepra kurum neng tep nengeda, neda sun mar pedana ngebo konum kununa cadi, sun tep wenepnedi, ila ikin keca sun deiki deipkamsene. Atep ne domba bisam yumada adipapu sun damai di tamupra dopropkamne. Tonda ukupnedi, ne domba bisam utopu nesalada, ware kuprap taru deiki di ikin kuramya cadi, sun nimi deiyo nengdi mali kuramrumnya deiki di ukupka cadi, sun menenga tep nengeda, wenepkamsene.

Sun Israel tara deiyo nengdi ton, ne domba bisam utopu nesala tupa men kalekra peinkamrume. Sun tep ton konum tapkamsene. Sun pedi, sun pe putan keca tep, men karedankamrume. Sun nimi deiyo nengdi, ne domba utopu nesala mali kweipruma cadi, nedi anesala lyepropnedi, ka di telep kupra deipkamne. Ukupne pangeda, sun nimi deiyo nengdi, sun ton jen keca utopu kupra, tupa men popra jenkamrume.

Ukupmantoda, Allahdi er domba bisam lyepropredi, ka di telep kweipkamre, pepu upu

11 Ange yuma pepmasenada, tali tep men pepsene. Deiyoda ake. Ne Allah Yahweh akeca-keca yuma talepra, deiki tara erepra, pio puto weik deiyo ngebodi, pepsene. Ada, ne pedipapu ne domba bisam utopu nesala yumada, eprapnedi dopra deriryankamne. Ukupnedi ne dipapu peinkamne. 12 Ukupmantoda, domba bisam deiyo ngebodi, er domba bisam bura saka dabena wangamredi, dim peprepanen, ‘Dan cei banmang do?’ tenen, eprapredi bulupra deipredi, ka di tamupra telep kupra peiramretopu, nedi ne mawa neng, Israel nesala tep ukupkamne.

Domba bisam utopu, ne dipapu sun tep peinkamne. Sun ne domba bisam utopu nesalada, sun dana-dana tara embaramidi, sun bisi wangamupa, dakunung mutu neitamai kunung nesala yumada, tamupra doupra yanedi, tenpu telepaipu yana deipkamne. Sun wangamupa, dana-dana tara kuramidi, dimpepnei taruda, dua weik cap, ila kunungna taru utopu neitamai cap, ila kange mun taru neitamai cap di, wangapupa, dim pepneiya tep pepne.

13 Ange tek sisi ngeda, nedi sun amutu dana-dana tara neitamai yuma dakunge mutu nesala cap, yuk nimi bo neng mutu yuma cap, wisipra dakunge Israel nesala yumada, doupra tamupra duyankamne. Ukupne dingeda, bulupra deipnedi, sun pe mutupu tamupra dubenkamne. Ukupkamne taruda, nedi mutu dupai cap, Israel mutu pirman tara cap, dopra deipnedi, telep kupra peinkamne. Tonda, sun pio telep boun betei damai cap, yo me embaramre me damai cap, acapu dopra deipnepa kunkameng taruda, moupra peteremnedi, ‘Ukunkamrume,’ pepra derinkamne. 14 Tek sisi pepne. Ada, nedi sun anesala kunkamengai tep nengeda, pio betei telep kupra parur mutu neitamaipu, bena ketenepra deipkamne. Tonda iknapi dam tara cap, Israel mutu pirman tara cap, ketenepra deipkamne. Abena dopra deipkamne mutuda, telep kupra bouna di beipye peikra kunkamenge. Tonda, sun adomba bisamda, Israel mutuda, mutu buma, mutu buma deiki di, betei bo telep kupra, bouna di jenkamenge.

15 Ukunkameng taruda, ne pe dipapu, domba peina deiyo neng keprapnedi, adomba bisamda peinkamne. Ukupnedi, ‘Ukupso!’ peipnepa, sun bouna di beipye peikra kunkameng mutu yumada, ketenepra deipkamne. Atep, ne Allah Yahweh, akeca-keca yuma talepra, deiki tara erepra, pio puto weik deiyo ngebodi pepsena cadi, ange yumada, tek sisi nong kupkamre. 16 Ataruda, dabena wangamu domba bisam yumada, erbenkamne. Tonda, ‘Uo’ tenen, kange teneredi, dakurenge peda, duyankamne. Tonda, suse jereamre ngeda, duyanedi getepra kwetepkamne. Pu jeramrenge peda, doupra yanedi, kwetepkamne. Dinino, meta telep domba bisam cap, ila puto domba bisam cap yumada, poptapnedi, gum kupra derinkamne. ‘Ukupkamne,’ tenemsi ngeda, ne dipapu, adomba bisam peina deiyo ngebo kunedi, pio telep kupra peinkamne ja!

17 Moupra gekepneso, ne domba bisam utopu nesala yuma tep pepsene! Ne Allah Yahweh, akeca-keca yuma talepra, deiki tara erepra kunedi, ila puto deiyo ngebodi, sun tep pepsene. Ada, domba bisam peina deiyo nengdi, sun domba bisam yumada, jemnge cap, nernge cap, kambing bisam cap yumada, dipetepmengedi, telepnge wepra, mawa deipmengedi, mali ngeda poramengtopu, nedi sun Israel nesala yumada, yuk-yuk dipetepnedi, pio telepnge yuk wepra deipkamne. Malingea, yuk wepra deipkamne. Ada, ‘Telep kunung do, mali do?’ tenen, upu bokeipsenedi, yuk-yuk wepra deipkamsene.

18 Moupra tenenkamrume. Ada betei pio telepnge jerum ngeda, telep dinin, tonda, sun adipapu betei yambul telepnge peda, ware deiyo keca tep, sun puto di yanipra singirtamrumudi, abetei mali kupra derirum do? Angetopu, yo me bungnai di pio telep me jerumudi, gawal dakmanto kurum ngeda, yambul telep dinin, ame bungnai tupa akapmare telep me kwamyaida, ware keca deiyo tep, sundi me men jenkamrumnge peda, telep yo mepu akapmar dinin, sun yan me kudongoruma deiki di, mali kupra derirum do? Sun nimi deiyo nengdi, ange utopu kecada, tupa kurume!

19 Tonda, ne domba bisam yuk-yuk nge yumada, pio yanitamamrum beteida, jenapu kunkamenge ngeda, telep do, mali do? Ange utopu, telep yo me dinin, sundi yo me pumbon sun yan dongopra, sun yan me kudongorumudi, mali kudongorumu ngeda, ne domba bisamdi jenkamenge ngeda, ange peda telep kurum do? Gume, ange peda malipu kurume! 20 Ange tep nengeda, ne pedipapu, Allah Yahweh akeca-keca yuma talepra, deiki tara erepra, pio puto weik deiyo ngebodi, sun tep pepne. Uo, domba bisam pio telep ngeda, ne adipapu yanedi bokra deipnedi, domba bisam nong telep puto ngeda yuk, puto boun di, nong bol mali kwamre ngeda, wepropnedi, yuk-yuk deipkamne.

21 Ukupkamna deiyoda ake. Nong pio telep domba bisamdi, puto boun domba bisam tep, dokra ortara-atara donkamre. Ada sun morokyo ortara-atara dipdongopra dodankamre. Ukuramrum taruda, sun giso deiki tengamre keca, er sida eku di, puto boun bisam lungrure. Ukurya deiki di, sun puto boun domba bisam yumada, yuk-yuk mutu dana-dana tara sepra bendopya deiki di, dimpepi. 22 Ukupra mali kuprum dinino, ne pedipapu, ne domba bisam yumada, lyepropnedi, tamupra duyanopda, ka di telep kupra deipkamne. Ukupnepa, sun puto domba utopu kurumu deiyo nengdi, aputo boun domba bisam utopu nesala yuma tep nengeda, yu kange doupra, mali-mali kuramrum ngeda, ton cap pio men kunkamrume. Deiyoda, nedi ne domba bisam yumada, moupra dipetepnedi, yu pio weik mali kunange yuk wepra deipnedi, telep ngeda, yuk wepra bokra, telepaipu deipkamne. Sun yuma tep, moupra dipetepnedi, sun kuramrumutopu, upu bokeipkamsena tep pepsene. Ukunkamna deiki di, ne domba utopu nesalada, amenda taru ka di ton cap, mali men kweipkamrume. Teleppu kunkamenge.

23 Ange yuma ukupkamne taruda, nedi nimi deiyo ngebo Raja tenpupu, ‘Sun anesala yuma talepredi, upu penkamre’ tenen, ne amu tara pel telep kupra dorur ngebo, er si Daud, domba deiyo ngebo utopu kweipnedi, er tep wepra sun damai deipnyopda, er dipapu, ne mawa nesala, Israel yala nesala talepra, Raja kepredi, upu penkamre. Domba bisam peina deiyo ngebo teleppu kuramretopu, Daud peda, ne mawa nesala, Israel yala nesala yuma talepredi, sun jen keca telepngepu karenkamre. Karepredi, ‘Adomba teleppu kunkameng’ tenen, anesala tep, telep kupra kalengkamrure. Er tep wepra deipnepa, Raja Daud, er dipapu, ne domba bisam utopu nesala yumada, nimi deiyo kepredi, telep kupra peinkamre. 24 Ataruda, neda Allah, ne si Yahwehda, sun nai bo Allah kunkamne. Tonda, nimi deiyo ngebo Raja Daud, ne amutara pel donerur ngeboda, wepra sun deiki deipnepa, erda ila nimi deiyo ngebo kuredi, anesala yuma talepra, sun upu pena deiyo ngebo pio tep kunkamrure. Ange yumada, ne Yahwehdi, ila puto weik kune ngebodi akonum pepmasena tep, ange yuma, tek sisi nong kupkamre ja! Angeda ne Allah Yahwehdi, aupu konum pepra deipsene.

25 Ange tep nengeda, neda ila puto weik ngebodi, sunda ne amutara puto boun nesala kununga cadi, ne kange dipapu sun kalekra makuna tep, ‘Ukupkamsene,’ pepra, pedina upu deiki di, sun tep telep kweipkamsene. Ukupnyopda, sunda podana gum dipapu, kange deipra pio telep kupra kunkamenge. Ada, amutu neitamai sundi talepra kunkamenge nge yuma tep, telep kupra deipkamne. Tonda, amutu neitamai bura tara yu kunge gam keca yuma, gum kupra derina utopu, nedi sun podan neng, dana-dana tara yuma enepra dokotepnedi, gum kupra deipnyopda, sun ne mawa nesalada, dan mutu do yuma, bura tara do, katawai mutu neitamai do, ila ati arum dam tara do, kange deipra pio teleppu kunkamenge. Amutu-amutu neitamai yuma peda, kwar kuna gum dipapu, telep dipapu mankamenge.

26 Atep nengeda, nedi sun amutu kunkameng nesala cap, sun kunkamengai capda, pio telep kupra deipkamne. Ukupnedi adipapu nedi, ‘Acapu kunkamne,’ tenemsi mutu dupaida, pio telep kupra deipkamne. Amutu kunkameng taru di, me putapyopda, nedi mo li karepnepa, mo weika di cemkamre. Ukupkamna deiki di, sun cap, sun mutu capda, teleppu kunkamre.

27 Nedi mo karepne pangeda, mo ceprepa, amutu neitamai tengkamre co yala-yala yumada, du mounapu kunkamre. Sundi wa pepra kounung keca yumada, bongopra paramredi, telep kupra nongpu kunkamre. Ukure pangeda, sun anesala yuma bouna di dakra, kware kuna gum dipapu, telep kange deipra, sun pe mutu tu neitamai kunkamenge. Ukuramengepanen, ne nyapu sisa Israel nesala, nimidi ateng kouna tep tapu, er si rantai tapu dulung tamamengtopu, nedi sun yuk nimi bo neng mutu bena deiamengepa, adipapu lopra tapnepa, kange pio deipkamenge. Sun podan neng popra gawal dangkamna tepa. Ukupkamna deiki di, konum kupne pangeda, sun anesala yumadi ne tep, ‘Uo, teka erda tek sisi Allah Yahweh kurure’ tenen, kael kepkamnenge.

28 Ukupkamne taruda, dana-dana tara mutu neitamai, ne tep walwal tenengedi, ne tep teka men tenepmengedi, ne men kael kemnenung nengda, ka di ton cap, ne mawa nesala damai yangedi, popmengedi, sun bung keca yuma dalupra men dopropkamenge. Angepu gum dinin, tonda, yuk tali bura tarada, yu weik gam kure keca di, yana men popra, ne mawa nesala men jenkamenge. Ataruda, ne mawa nesala yumada, pio telep kangepu doupra kunkamenge. Ton nimidi, ton nimi tep, pio kware men kudinkamenge. Kange deipra, kikimanpu kunkamenge.

29 Tonda, ‘Sun yumada, jen keca putanapu pio men kunkameng’ tenen, nedi sun wa pena tep tu neitamai yuma, pio sukun tu neitamai karepkamne. Ukupnepa, sun wa keca koupmengepa, nong weik kupkamre ja. Sun tep, jen putana taru ton, pio sun damai amutu neitamai men yakankamre. Ange utopu, dana-dana tara nesala, sun yuk mutu neitamai dakunge nesala ton yangedi, ‘Israel nesalada, nun songe. Sunda mali nesalapu kununga cadi, bung keca putnanapu kununge,’ pepra, nyek-nyek pepra, mali upu ton pio men penkamenge. 30 Ange yuma ukupkamna deiki di, ne mawa nesala, Israel nesala yumadi kael kepkamenge. Ada, sun Israel nesala yuma, ne mawa nesala yumadi ne tep moupra kael kepkamnenunge. Ada, ‘E tek sisi, Allah er si Yahwehda, nun nai bo Allah kurure. Er dipapu nun tep pio melipra kalengserure. Nunda, nun apu bo Israeldi deiamupa, dadeipdanen yakaramyanen, yana deipseipa, ataru kunup nesalada, Allah Yahweh, er mawa nesala kunupe. Er dipapu nun tep pio melipra kalengkamserure,’ tenepmengedi, kael kepkamnenge. Atep neda, Allah Yahweh, akeca-keca yuma talepra, deiki tara erepra, pio puto weik deiyo ngebodi, sun tep konum pepsena cadi, ange yumada, tek sisi nong kupkamre ja, pepsene.

31 Ne Allahdi pepsene. Teka, sunda ne domba bisam utopu nesala kuruma cadi, ne nyapu sisa kurume. Ukumumpa nedi sun putan keca yuma karesenune. Atep sunda tek sisi, aca di neda sun nai bo Allah kunune. Atep neda, Allah Yahweh, akeca-keca yuma talepra, deiki tara erepra, pio puto weik deiyo ngebodi, sun tep aupu konum pepra deipsene.