Eze 35 | XteSC | STEP | Allah Yahweh, er upu dopra ne Yeheskiel damai yana peipneupa gekepsi. Aupuda ake.

Ezekiel 35

Allahdi Edom mutu nesala wenepkamrenge tep, pepu upu

1 Allah Yahweh, er upu dopra ne Yeheskiel damai yana peipneupa gekepsi. Aupuda ake.

2 Uo, kanda nimi sisadi deipkei ngebo kurume. Ange tep nengeda, kandi aso erepra, Sier ^{▼▼Sier – Sier mutu peramyada, ada ila mutu-mutu weik buku. Atarada, Yudea tara dinin, iknapi tara, arah selatan kwamu. Tonda, amutupu dinin, amenda taru, atara si tep nengeda, Edom mutu perami. Esaudi deiamupa, dadeipdanen yakaramyanen, deiamipa kurami nengdi, amutu neitamai kurami. Sundi Israel tara kurami neng tep, ‘Nun song’ tenepra podanapu kurami.} mutu-mutu buku tara dirbememdi, amutu-amutu neitamai kunge nesala yuma tep, ‘Allahdi sun mali kurum keca tep, amenda taru wenepra popkamser ja,’ pepra lap penkamrume. 3 Tonda, ne Allahdi, sun Edom tara, ila mutu-mutu neitamai kurum nesala tep, ne yu kupnerepa, sun tep wenepnedi, ikin keca sun deiki deipkamsene. Ne Allah Yahwehdi akeca-keca yuma talepra, deiki tara erepra, pio puto weik deiyo ngebodi pepsene. Neda sun mar podana utopu ngebo kunune. Uo, sunda bicaue! Sun Edom mutu neitamai kurum nesalada, ne puto buru di, sun kunkamruma damai tara, buru bupukra deipsenedi, wenepra popkamsene. Popsenedi, gum kupra deipsenepa, sun kurum mutuda, dimbulung pepkamre. Ukupredi, walangyopu kupkamre ja!

4 Pumun taru dadi dipdongopra, ataru neitamai yuma, sundi ila ati arum dopra kumum mutu yumada, ne Allahdi urupra tapkamsene. Ukupsenepa, sun mutu yumada, walangyopu kupredi, dimbulung pepkamre. Ukupsenya deiki di, sundi ne tep, ‘Uo, erda tek sisi Allah Yahweh, erpu kurure’ tenen, kael kepkamnerume. 5 Ada, men taru di gonga keamrumdi, sundi Israel tara nesala yuma tep, yu teneramrumdi, ‘Anengda, nun pio songe,’ tenepra kuramrume. Atenenada, pio tep, men tamamrume. Pio tenenapu kuramrume. Tonda, menop taruda, yuk mutu nesaladi, sun Israel nesala tep, ikin keca dopra, sun deiki deipipa, ‘Uo ware kuptepe do?’ tenen, dipru buluksangamupa, sepdaro bei taruda, sun Edom mutu nesaladi, Israel nesala men meliamrume. Sundi, sun podan neng tara keprorumpa, yuk karen mutu nengdi ^{▼▼karen mutu neng – Ada Babel mutu ila nimi deiyo ngebo, er si Nebukadnezar cap, er jen talena neng capdi, Yehuda tara damai yana anesala podaramidi, Israel yala nimi weik porami. Tupa gam kurami Israel nengda, ateng koupdongopidi, sun pe mutu dubenamipa, keteng tamun weik dakuramidi, kange mun kange dourami. Edom yala neng sun co puna ngeboda, Esau kuramu. Israel yala nengda, sun co puna ngeboda, Yakub kuramu. Sun butene ton, ‘Pio songe’ tenedaramrei. Ange yuma kael kemna tep, Kejadian pasal 25:19-34, tonda, 27:1-45 cap, tonda, 32:1–33 cap dinkurume.} nimi pon parang ya doprapidi, Israel nesala weika di poramipa, kange mun weik kurami. Ukuprumada, mali weike.

6 Ange tep nengeda, neda pio tek sisi gam kununa cadi, apepkusen upuda tek sisi nong kupkamre ja! Neda Allah Yahweh, akeca-keca yuma talepra, deiki tara erepra, ila puto weik ngebo kunune. Nedi go karepnepa, yuk mutu nengdi, sun tara neng tep weika di poryakankamenge. Sun mutu neitamai cap, sun nong deiki capda, yapi weik embankamre. Deiyoda, sundi mali-mali kumumnya tep, ‘Nimi popmepepa, yapi embankamrada, telepe pua’ tenen, kange deipra kuramruma cadi, amenda taruda, aembarur yapida, sun domembaserepa, sun nong deikipu embankamre ja! 7 Ne Allahdi, sun ila mutu-mutu neitamai, Sier mutu neitamaida, iknapi dam tara, arah selatan Edom mutuda, nedi sun douamrum keca cap, sun amutu kurum nesala cap, gum kupra deipkamne. Ukupnepa dim bulung pepkamre. Tonda amutu kunkameng nesalada, gum kupra deipkamne. Sun mutu neitamaida, amenda taru nimi ton, atara di, ortara embana tep, pio men embankamenge. Sun mutuda walangyopu kupkamre ja!

8 Ada metekanunpu gume! Nedi go karepnepa, yu nengdi, sun mutu nesala yuma popmengepa sun mutu deike, mutu deiki yumada, nimi gemna bulupra deiptapkamenge. Tonda, mutu buma deiki cap, sun mutu me embaramrai cap, mutu amutara damai, ban mutu yuma cap, me almanai cap yumada, nimi pon parang ya di, sun tara neng yuma poptapmengedi, deiptapmengepa, acada sun anesala gemnapu dinikamre ja! Sun kurumu mutu-mutu yumada, nedi poptapra gawal daknyopda, pio walangyopu kupkamre. Amenda taru peda, nimi ton amutu neitamai pio men yana kunkamenge. Sun men di doramrum ila ati arum neitamaida, nimi ton tupa men kunkamenge. Dim bulung pepnapu kupkamre ja! Ange yuma ukupkamna deiki di, sun Edom mutu nesaladi, ‘Uo, tek sisi, erda Allah Yahweh kurure. Erda tenpu kurure’ tenen, kael kepkamnerume.

9 Nedi kan kumem mutuda, gum kupra deipkenepa, amutu pio dimbulung pepkamre. Tonda, kan ila ati arum dopra deipmum mutu neitamaida, nesala ton pio men kunkamenge. Nedi, akupnya deiki di, sundi, ‘Uo teka, Allah erpu kurura’ tenen, kael kepkamnerume. Ne Allah Yahwehdi pepra deipne.

10 Sun yu nengdi, Israel tara cap, Yudea tara cap, popra gawal dangbarami taruda, sun Edom mutu neitamai kurum nesaladi, upeprume. ‘Gume, atara buteneda, sun Israel yala nesala cap, Yehuda yala nesala cap, sun kunung mutu tuda, yuk mutu yu nengdi konum popya cadi, nun dipapu, amutu tu yuma dalupra dopropkamepe. Atep, nun ormutu bena kunkamepe,’ tenepra peprume. Uperamrum dinino, sundi men teneprum ngeda, sundi, ‘Amutu butene talepra kunkamep,’ teneprum mutuda, neda Allah Yahweh, amutu neitamai tupa kuramsidi, ‘Amutuda ne mawange,’ tenemsi dinin, sundi ne tep men teneramnerume.

11 Ange tep nengeda, ne tek sisi gam tupa kunetopu, ne pepkusen upuda, tek sisi kupkamre ja! Ne Allah Yahweh, akeca-keca yuma talepra, deiki tara erepra, ila puto weik deiyo ngebodi, aupu pepra deipsene. Pumun taru, sun Edom mutu nengdi, ne mawa nesala, sun Israel tara kunge nesala cap, Yehuda tara kunge nesala cap tep, ila yu kuramseupa, mali weik kuprume. Tonda, sun talerami keca yuma tep, ‘Nunpu akeca yuma dalupra doproptepe,’ teneramrumdi, yap-yap pepra, luludiramumnge cap tep, sundi ange mali weik kuprumtopu, nedi ila yu deiki di, sun tep wenepra poptapsenedi, ikin keca sun deiki derinkamsene!

Sundi, amutu nesala butene tep, ‘Nunda anesala pio songe,’ teneamruma tep pepsene. Atep nengeda, nedi sun Edom mutu-mutu neitamai kurum nesala tep nengeda, upu bokeipsenedi, wenepkamsenya deiki di, ila kange mun keca karepkamsene. Ukupkamsenya deiki di, sun Edom mutu nesala yumadi, ‘Uo, Allah erda tek sisi ila puto weik ngebo kurure. Nun deiki ikin keca deipra wenemamseuada, nun deiyo,’ teneprumudi, sundi ne tep moupra kael kepkamnerume. Sun kwangdangna tep, wenepsenedi, tupa tenenkamne.

12 Tonda, ange yuma, nedi ukupsenepa, sundi kael kepkamnerume. Ada, ne Allah Yahwehdi, sun menop taru mali peramrum upuda, nedi konum gekepra kael keamsisi. Atep, sundi Israel yala nesala cap, Yehuda yala nesala cap tep, mali upu weika di pepra nalemamrumnge yumada, ne konum gekepsi. Ada, sundi, ‘Gume, Israel mutu kurami nesala yumada, yuk mutu nengdi konum poptapra gawal dakmanga cadi, dimbulung pepmara tep, sun talerami keca cap, sun mutu tu cap yumada, nun dipapu, tali lupra dalupra doproptepe,’ peramrume. 13 Angepu gum dinin, tonda, sun Edom mutu nesalada, sun dipru eremna deiki di pio salnong-nong upu, ne Allah deiki pepra deriramnerume. Aperamrum upu yumada, pio weikanun tapakra mali upuda, ne Allah tep, peramnerumpa, konum gekeramsisi.

14 Sundi ne Allah tep, mali peramnerum upu tep nengeda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, aupu pepsene. Nedi Edom mutu yumada, gum kupra deipnedi, walangyopu kupkamre. Ada, ‘Nimi yuk mutu ban-ban yumadi, ange epmengedi kange deipkameng’ tenen, sun Edom tara nesala tep, wenepra popkamsene. 15 Ada, sun kwangdana tep kupkamsene. Sun Edom mutu nesaladi, Israel yala nesala talerami keca yuma tep, ‘Gume nun dipapu akeca dalupra dopropmepedi, nun dipapu akeca talepmepedi, kange deipra kunkamepe,’ teneramrume. Ange yumada, ne Allahdi sun Israel tara neng cap, Yehuda tara neng cap tep, bokra karepsi ngeda, ‘Angeda, sun dipapu pio talenkamenge. Amutuda, sun mawangepu kunkamre’ tenen, karepsi. Dinino, sun Edom mutu nesaladi, ne nyapu Israel nesala, sun mutu dalupra doroprumpa, konum gum kupudi, dimbulung pepu pangeda, sundi kange deiamrume.

Atep, Israel nesala cap, sun mutu cap, pio dimbulung pemutopu, nedi sun Edom mutu nesala tep wenepra popsenyopda, sun pe, sun mutu neitamai peda, pio gum kupra deipsenyopda, walangyopu kupkamre. Dimbulung pepnapu kupkamre ja! Nedi gum kupra deipsenepa, dim bulung pepseryopda, Sier mutuda, mutu-mutu neitamai cap, Edom mutu neitamai cap, kunge nesala yumadi, ‘Uo, tek sisi Allah Yahwehda, erpu ila puto weik ngebo kurura’ tenen, ne pe si sisapu Yahweh, kael kepkamnenge.