Eze 36 | XteSC | STEP | Allah er si Yahwehdi, nabi Yeheskiel tep upepu. Uo, kanda nimi sisa di deiamkei ngebo kurume. Atep nedi peipken upu gekepmemdi, kandi sun Israel nesala kunung mutu yuma, sun damai perbenkurume. Ukupmem pangeda, sundi ne Allah Yahweh, akeca-keca yuma talepra, deiki tara erepra, pio puto weik deiyo ngebo, ne upupu gekepra kunkamenge. Neda, Ila Eremna Ngebo kunedi, aupu yuma pepkukene.

Ezekiel 36

“Allahdi Israel nesala tep melimredi, telep kudinkamre,” pepu upu

1 Allah er si Yahwehdi, nabi Yeheskiel tep upepu.

Uo, kanda nimi sisa di deiamkei ngebo kurume. Atep nedi peipken upu gekepmemdi, kandi sun Israel nesala kunung mutu yuma, sun damai perbenkurume. Ukupmem pangeda, sundi ne Allah Yahweh, akeca-keca yuma talepra, deiki tara erepra, pio puto weik deiyo ngebo, ne upupu gekepra kunkamenge. Neda, Ila Eremna Ngebo kunedi, aupu yuma pepkukene. 2 Amutu dana-dana tara kunung neng yuma yangedi, sun Israel yala nesala yuma tep, nyek-nyek pesenunge. Sundi upenunge, ‘Gume, nundi Israel yala nesala popbisipmepudi, pumun taru sun talepra kurami mutu yumada, konum dalupra dopropmapa tep, ukutaruda nun dipu amutu neitamai yuma talepra kunupe,’ pepra nyek-nyek pesenunge.

3 Ange tep nengeda, kan Yeheskieldi ne peipkene upu dopra, amenda kupkamrenge tep lap perbenkamrume. Ada ake. Uo, Allah Yahweh akeca-keca yuma talepra, deiki tara erepra, pio puto weik deiyo ngebodi, upepsere. Sun dana-dana tara kurami nesaladi, sun Israel yala nesala tep, tamna pio gum di, tupa-tupa poryakaramidi, sun taleramrum keca dalupra dororamidi, sun taleramrum keca yuma mali kudiramidi, sun Israel yala nesala kuramrum mutu cap, ati-ati arum yuma cap, dalupra dororami. Ukuramseipa, yuk mutu kunge nesala yumadi, sun Israel nesala tep, autungedi mali upu cap, minina upu cap, sun tep peramitopu tupa penunge.

4 Ange tep nengeda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, sun Israel yala nesala mutu-mutu yuma kurumai tep pepsene. Ukutaruda, mutu bukamngai cap, mutu buma yuma cap, me popra embendauai yuma cap, ban mutu cap, ati arum domidi kuramipane, nimi yuk neng yaidi popbisipipa, walangyopu tamami ati arum yuma capda, yuk mutu nengdi yan arapropsei. Sun taleramrum keca yuma dalupra doproamseipa, yuk nesala yumadi sun tep, autupra nyek-nyek peramsei.

5 Atep ne Allah Yahweh, akeca-keca yuma talepra, deiki tara erepra, pio puto weik deiyo ngebodi pepkusen upu gekepkurume. Ada, ne ila di tulum kupnerepa, sun Israel mutu dana-dana kunung nesala yuma cap, tonda Edom mutu kunung nesala yuma cap, sun yuma tep, yu kange tenepra pepsene. Ada, sun yuma wenepra popkamsene. Derepra popkamna deiyoda ake. Amutu nesala yuma cap, Edom mutu nesala capdi, ‘Israel yala nesala talenung mutu yumada, manmaning telep kupra paramre mutu cadi, nun kambing cap, nun domba capdi, akeca jenkamenga tep, sun Israel nesala bisbisa kapra popmepyopda, nun dipapu amutu yuma dopra talenkamepe’ tenen, kange deiamidi, upu sisingamyane, Israel nesala taleami mutu dalupra doproami.

6 Ukuramya tep, kanda nabi Yeheskieldi upenkamrume.

Sun moupra gekepso. Israel yala nesala kurami mutu bukamngai cap, mutu buma yuma cap, me popra embendauai yuma cap, ban mutu cap, ati arum domidi, nimi dakuramyane, yuk nengdi popbisipipa, walangyopu kuamu ati arum yuma capda, yuk mutu nengdi yana arapropsei dinin, Allah Yahweh, akeca-keca yuma talepra, deiki tara erepra, pio puto weik deiyo ngebodi, er teneretopu tek sisi kurure. Allahdi upepmasere.

“Sun kurumai dana-dana tara kunge nesala, yuk mutu nesala yumadi sun taleramrum keca yuma dalupra doproamseidi, sun tep nyek-nyek pesenunga tep, ne Allahdi amutu nesala yuma tep, ila di yu kupnerepa, wenepra poptapkamne.

7 Angeda tali tep men pepsene. Ne Allah Yahweh kunune. Neda akeca-keca yuma talepra, deiki tara erepra, pio puto weik deiyo ngebodi, ne tenenetopu tek sisi kunune. Atep nengeda, ne Allah Yahweh si deiki di pepsene. Israel nesala, sun kunge mutu dana-dana tara kunung nesalada, wenepra poptapnepa, yuk mutu neng yumadi, sun tep nalemengedi malya pepra, nyek-nyek penkamenge.” Allahdi pepmasere.

“Allah er si Yahwehdi, sun Israel nesala kunge mutu tep, telep kudinkamre,” pepu upu

8 Dinino, sun Israel yala nesala tep nengeda, telep dakuramrumupane, amenda taru ne melimsenya deiki di, sun pe mutu tamupra yana kunkamrume. Atep nengeda, amutu neitamai kure mutu cap, mutu buma cap, ban mutu yuma cap, tonda sun co cap, tapu cap yala-yala yumada bongopredi gapu pakra, du pio weik mounkamrume. Ukunkamra deiyoda, ake. Ne mawa Israel yala nesala yumada, tamupra yangedi, amutu neitamaipu kunkamenga tep pepne. 9 Uo Israel nesala kunkameng mutu yumada, pio moupra tenenune. Israel nesala kunkameng mutu tu yumada, tek sisi ne melimkamna deiki di, nimidi atu yuma palipra yawa poptapmengedi, yal keca yala-yala yuma telep kupra bolokamenge.

10 Tonda ne nyapu sisa Israel yala nesala tep, nedi melimnepa, sun gung ton cap pio weik kepra tapakbankamenge. Nesala gung weik konum kuipsenepa, sun amutu weik kupra kungedi, ati uruptamipa walangyopu kwamudi, dimbulung pemngai yumada, kange di tamupra ati dopra kunkamenge.

11 Amutu-mutu cap, amutu buma cap neitamai yumada, nimi weik yana kunkamenge. Tonda, sundi peinkameng gam kun keca yala-yala yumada, nedi ton cap tapakra karenepa, pio weik kupbankamre. Ukupnepa, nimi cap, sundi peinkameng keca cap, pio weik kupbankamenge. Pumun taru yambul telep kuramrum dinin, amenda taruda, ange utopu dinin weik ton cap pio telep kupbankamrume. Ada nimidi nyapu deipbangepa, weik kupbankamenge. Ange utopu, sundi peinkameng keca peda, pio tapakra karepbanepa, weik kupbankamenge. Ange yuma konum kupnyopda, nimi yuk neng yumadi kael kepmengedi, ‘Uo, sun nai bo Allah er si Yahwehda, tek sisi ngebo kurure’ tenen, kael kemkamnenge.

12 Ne nyapu sisa Israel nesala yala-yala yumada, sunda sun pumun taru kuramrum mutupu, ka di tamupra dubenkamsene. Ukupsene pangeda, sundi amutu neitamaipu talepra kunkamrume. Ukunkamrum taru neitamai yumada, sundi derinkamrum nyapu yuma peda, jen putana deiki di, ton pio men denkamenge. Tonda yuk mutu nesaladi, sun nyapu men ponkamenge. Amutu karepsenepa, pio teleppu kupra kunkamrume.

13 Ne Allah Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} akeca-keca yuma talepra, deiki tara erepra, pio puto weik deiyo ngebo kunune. Atep, nedi tenenetopu, tek sisi kunune. Nedi pepsene. Yuk mutu nesaladi, Israel yala nesala kurami mutu teppu penunge. ‘Gume, amutu neitamai kunge Israel nesalada, denapu kununge. Ange utopu podana cap, ikin kuna cap deiki di, amutu neitamaida nimi dena weik mutu kurure. Israel nesala amutu neitamai kunge taruda, depropnen bangepa, nesala gung pio metekpu kupbanunge,’ pepra mali penunge. 14 Ukupra penunga tep nengeda, ne Allah Yahweh akeca-keca yuma talepra, deiki tara erepra, pio puto weik deiyo ngebodi, ne tenenetopu kunedi pepsene. Ukutaru di dipra, dorkunkamre taru neitamai yumada, nimi do, nerapu do, nyapu do yuma, jen putana cap, podana cap, ikin kuna cap deiki di, Israel nesala men depkamenge. Amenda taru peda, pio men gum kupbankamenge. Ne si Allah Yahweh deiki tara erepra kune ngebodi pepsene.

15 Ataru di dipra doryankamre taru neitamai yumada, sun yuk mutu nengdi, amutu kunkamrum nesala tep, autupra nyek-nyek men penkamsenge. Yuk mutu nesaladi, ‘Uo, sun Israel nesala cap, sun kunge mutu capda, talipu kurure,’ pepra men nalimkamsenge. Autopu upu tupa pesengepa, men gekenkamrume. Amutu neitamai kunkamre keca deiki di, Israel nesala tep mali men kudinkamre. Tonda, melimsenepa, mali kunung nengdi amutu neitamai kunkamrum nesala tep, ton yana men ponkamsenge. Aupu yumada, ne Allah Yahweh, akeca-keca yuma talepra, deiki tara erepra, pio puto weik deiyo ngebo kununa cadi, nedi tenenetopu tek sisi kunune. Angeda, tek sisi nong kupkamra tep pepsene.

“Allah er si Yahwehdi, sun Israel nesala tep telep kudinkamre,” pepu upu

16 Allah Yahwehdi ne Yeheskiel tep upepneu.

17 Uo, kanda nimi sisa di deipkei ngebo kurume. Israel yala nesalada, sun pe mutu neitamai kurami taruda, sun mali kuraminge cap, sun mali pel doraminge cap deiki di, sun pedi, sun pe tepapu mali kudidarami. Aneng kurami keca yuma tep, nedi diramsidi, ‘Ne pio songe,’ teneramsi. Ada, nerapu sun yapi sangamre taruda, nimidi, ‘Uo, angeda nun song’ tenen, mali kange doramengtopu, nedi sun Israel yala nesala tep teneramsi.

18 Israel nesaladi pio mali-mali weik kuramya tep nengeda, ne tulum weik kuramneupa, ila wenemna keca dopra, sun aneng deiki dikra deriramsi. Ukupra wenemamsisi ngeda, tali tep gume. Ada, amutu neitamai kurami neng weika di podaraminge cap, yuk tali keca tep, ‘Nun nai bo’ tenen, isok-isok si eremaminge cap tep, nedi wenemna keca weika di kareramsi. Sun mali kuraminge kunumna tep, wenemamsi.

19 Nedi sun aneng popra wenemamsinge deiyoda ake. Sun pe mali pel doraminge tep, mali weik kuramitopu, ikin keca weik, sun nong deiki deriramsi. Atep, go kareamsipa, yuk mutu nesaladi, Israel nesala yana poryakarami. Tonda, Israel nesala tep bisbisa kamamidi, sun yuma ateng koupra, sun pe mutupu dubenamaipa, sunda amutu neitamai dakuramidi, karen mutu neitamai yuk-yuk kurami. Sun yuma yuk-yuk mutu neitamai dubenamipa, nimi bo neng utopu bena kurami.

20 Yuk karen mutu datengbenamipa, yuk-yuk mutu nesala yuma diramidi, uperami. “Uo, sun Israel yala nesalada, Allah Yahweh er pedi, ‘Anesalada ne mawa nesala kunkamenge’ tenen, wepra deiamu dinin, mali kecapu talepra kuramya tep nengeda, yuk mutu nengdi, porbisiramidi, ateng koupra yuk karen mutu dubenami,” pepra mali perami. Yuk mutu nesaladi, amali upu peramya deiki di, ne si yaniramneidi, mali kudiramnei.

21 Yuk mutu nesala yumadi, Israel nesala mali weik kuraminge diramidi, ne pe si mali kudidiramneiya tep nengeda, mambul kange doupra kuramsi. Ada, ‘Uo, Israel nesala, sun mali kununga deiki di, ne Allah lekpu ^{▼▼Lekpu pepka deiyoda ake. Ada, ‘Mali kun keca tenpunge peda, pio men kurure’ tenen, pepke. Indonesia upu deiki di ‘suci’ penunge.} kunun ngebo dinin, yuk mutu nesala yumadi, ne si tep, mali-mali weik penenunge,’ tenen, mambul kange doupra kuramsi.

22 Ange tep nengeda, kan nabi Yeheskiel tep, kan deiki pepkuken upu doupra, sun Israel nesala tep perbenkamrume. Ne Allah Yahweh akeca-keca yuma talepra, deiki tara erepra, pio puto weik deiyo ngebo kununa cadi, ne tenenetopu kunune. Nedi sun damai ton kupkamne kecada, sun Israel neng makuna tep men kupkamne. Sun Israel nesalada, sun embaramrumu mutu neitamai yuma, mali weik kuramrumupa, yuk mutu nesala diramidi, ne lek ngebo si tep, mali upu pepra mali kudinenunge. Ne si tep mali penenunga tep, sun yumadi, ‘Uo, Allah erda ila mambul ngebo,’ tenepmengedi, ‘Kael kemkamnenga’ tenena tep, nedi ila mambul pel donkamne.

23 Tonda, ne Allah ila sipen ngebo, pio telep sipu kunerur dinin, sun Israel nesaladi, nimi yuk mutu neng kan-kan kumumdi, mali weik kumumpa, sun yuk mutu nengdi ne Allah si tep, mali upu pepra mali kemdinenunge. Atep, nedi ila mambul pel dopnepa epmengopda, sun yumadi, ne si tep, ‘Uo, tek sisi Allah erda, ila telep ngebo cadi, er sida ila mambule’ tenen, kael kemkamnenge. Tonda, sun Israel nesala melimkamsena deiki di, sun damai ila mambul keca ton kupnepa, nimi yuk mutu nesala yuma epmengedi, ‘Uo, tek sisi Allah ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu ‘Adonay’ deiyo ngeda, jenek kupra sekmupu.} er tenpu kurure. Erda akeca-keca yuma talepra, deiki tara kuredi, er teneretopu kurure. Erda, Allah Yahweh kurure’ tenen, kael kemkamnenge.

Aupuda, ne si Allah Yahwehdi pepsene. Neda akeca-keca yuma talepra, deiki tara erepra, pio puto weik deiyo ngebo kununa cadi, ne tenenetopu, tek sisi kunune. Nedi pepsene. Atep, nedi sun damai mambul weik pel dopnedi jenek keipnepa, yuk mutu nesala yumadi, ‘Uo, Allahda ila mambul ngebo kurure. Er sida, pio lekpu kurure’ tenen, kael kemkamnenge.

24 Ne Allahdi mambul pel donkamnada ake. Sun yuk mutu nengdi, sun Israel nesala ateng koupra, yuk-yuk dadubenamipa, nimi bo neng utopu kuramrum dinin, ukutaruda, nedi sun dopra, sun pe mutu tamupra duyakankamsene. Dan mutu do yuma, dabena kuramumnya pe, nedi bulupra sun pe mutu ka tamupra deipsenedi, sun pe mutu sisapu duyakankamsene. 25 Konum duyasenyopda, sun nong yumada, nedi pio yo me sisa di, sun yuma me kupra telep kupra deipkamsene. Ukupsene pangeda, sun mali kumumdi isok si eremum keca yuma tapmumdi, teleppu kunkamrume. Ada, nedi yo me bupra sun nong deiki gege pepra deipsenya deiki di, sun dipru neitamai mali kurumunge cap, isok si eremrumunge cap yumada, gum kupra deipkamsene.

26 Tonda, nedi sun tep ukupu dipru cap, ukupu kange tenenange cap punupra karepkamsene. Pumun taruda, sun dipru gat gel utopu kuamseu ngeda, dopropnedi, dipru boun kupra kweipsenedi, pio ukupungepu punupra karepkamsene. 27 Ukupra telep kweipsenepa, ne upu gekepra teka tenepmumdi, ne amutarapu kunkamrume. Ada, ne sambala sun dipru neitamai dongopkamsene. Dongopsenepa, ne Lek Sambala melimkamserya deiki di, sundi, ‘Uo, nun nai bo Allahdi pesere upu yuma moupra gekenkamepe.’ Allahdi, ‘Ukunkamrume, angeda men kunkamrume,’ pepra derisere upupu, ‘Pio moupra dombankamepe’ tenen, bouna di teleppu kunkamrume.

28 Ukupmumnyopda, nedi sun co puna neng tep kareamsi mutupu, talepra kunkamrume. Ataru di dipra, doryankamre taru neitamai yumada, sunda ne nyapu sisa, ne mawa nesala kumumpa, neda sun nai bo Allah, sun ila deiyo ngebo kunkamsene.

29 Nedi sun mali kurumu keca yumada, gum kupra deipsenedi, telep kupra kun nesalapu kweipkamsene. Ukupsenyopda, sun wa pepra kounkamrum keca, jagung utopu keca, er si gandumda, nedi peipnepa, pio telep kupra bongopredi, du weik mouprepa, weika di kipra jenkamrume. Du pio teleppu mounkamra tep nengeda, ne nyapu sunda jen keca ton pio men putankamsere. Jen putana taru ton men karenkamsene.

30 Tonda, ne dipapu sun kunkamrumai tep, telep tu ton cap tapakra karenkamsene. Ukupsene pangeda, sun wa pepra kounkamrum keca yala-yala yumada, telep bongopredi du weik mounkamre. Tonda, sundi du mouramre co yala-yala yuma koupmumpa, telep kupra bongopredi, du weika di mounkamre.

Ada ne melimkamsena deiki di, nong kepra deipnepa, bongopredi du mounkamre. Ukupra melimkamsena deiki di, jen keca kange mun nge ton, pio men putankamsere. Nedi ukunkamsena tep, sun amutu-amutu yuma kunkameng nesala yumadi, sun tep ka di ton cap mali upu men penkamsenge. Sun tep kange di ton cap, nyek-nyek men penkamsenge.

31 Ataru neitamai pio teleppu kupmumnyopda, sun pumun taru mali pel doramrumnge cap, mali kuramrumnge cap, mali teneramrumnge cap, tamupra tenepmumdi, ‘Uo, nunda tek sisi mali kuramepu,’ tenenkamrume. Ukuprumu dingeda, sun akuramrumnge yuma tep, ‘Uo, tek sisi nunda pio mali weik kuramupka deiki di, dipru mali nengpu kuramepu’ tenen, kael kepmumdi, ikin kange doupra tenedankamrume.

32 Uo, Israel nesala yala-yala yuma, nedi mambul pel donkamsenada, sun tep men kupkamne. Sundi moupra tenenkamrume. Nedi akunkamnenge yumada, ne mengne lek si tep kunkamne. Sun adipapu moupra tenepmumdi, kwar kunkamsere. Ada sun mali-mali weik kurumnge cap, mali tenerumnge cap tep, ali dakdamumdi kware kunkamrume. Ne Allahdi sun Israel yala nesala yuma tep pepsene. Neda tali ngebo gume. Neda, akeca-keca yuma talepra, deiki tara erepra, pio puto weik deiyo ngebo kununa cadi, ne tenenetopu kunune. Atep, nedi aupu pepmansenada, tek sisi nong kupkamre. Ne Allah Yahwehdi pepsene.

33 Ne Allah Yahweh akeca-keca yuma talepra, deiki tara erepra, pio puto weik deiyo ngebodi pepsene. Nedi tenenetopu kunune. Sun Israel nesaladi, mali kurumunge yumada, konum gum kupra deipnedi lyepropsenyopda, ukupkamsene. Nedi peipnepa, sun pumun taru kuramrum mutupu, tamupra bena kunkamrume. Tonda, yuk mutu nengdi, sun ati uruptamipa walang kuamu mutupu tamupra bemumdi, kange di ton cap sun ati punupra dopmumdi, sun pe mutu neitamaipu telep kupra kunkamrume.

34 Tonda, pumun taru, yuk karen mutu nengdi, sun tep ateng koupra dubenamseipa, dakuramrum taru neitamaida, sun pe mutuda tali gopu kuramu. Ataruda, nimi yuk neng abisi embaramidi diramipa, nimi men kuramenge mutu utopu kuamu. Ukuamudi amutu tu yuma mali kwamupa dirami dinin, ne Allahdi amutu tuda kange di tamupra telep kweipnepa, sundi wa pepra, telep koun keca kounkamrume.

35 Ukupne pangeda, nimi yuk neng yuma epmengedi, lolomkamsenge. Sundi upenkamenge. “Uo, anengo. Amutu neitamai tuda, pumun taru mali kwamupane, ukutaruda er urasin yuk kupmare. Akeca-keca yuma men bongopmanto tu kuamu dinin, ukutaruda, pio telep kupra bongorure. Ada Allahdi akeca-keca ketekepra deiamu taru, Eden ban mutu neitamai kuamutopu kupra deipkamre,” penkamenge. “Tonda pumun taru, yu nengdi Israel nesala popbisipidi, ati yuma uruptamipa, ati walangpu kuamu mutu yumada, ukutaru kange di punupra dopmengedi, nimipu weika di dekpepra kununge. Akunkamenga deiki di, puto weik kupbankamenge,” pepra, pio kange deipmengedi lolomkamenge.

36 Atep, ne Allah Yahwehdi sun Israel nesala cap, sun mutu cap, sun ati cap, sun wa cap yuma, kange di tamupra konum telep kupra deipnyopda, sun dana-dana tara kunkameng nesala, yuk-yuk mutu neng cap, sun tonpa kunkamrum neng capdi, ange yuma epmengedi kael kepkamenge. Ada, ‘Uo, teka sun si eremenge Allah er si Yahwehda, pio tek sisi akurure. Pumun taru konum dakra tamipa amutu yuma walangpu kwamupane ukutaruda, Allah er dipapu ka tamupra lepsisikra dopmare. Tonda, tu gelal semupa wa pena pio gum tami mutupu, tamupra telep kupra deipmara cadi, ukutarada wa penunge’ tenen, kael kepmengedi, ne sipu eremkamnenge. Apepmasen upu yumada, tek sisi ne Allah Yahwehdi pepmasena tep, tek sisi nedi ukupkamne. Tali tep men pepsene.

37 Ne Allah Yahwehdi akeca-keca yuma talepra, deiki tara erepra, pio puto weik deiyo ngebo kununa cadi, ne tenenetopu kunune. Nedi, “Uo ne nyapu sisa Israel nesalao,” peramsisi. Sundi ne tep, ‘Uo nun nai bo Allah, nun tep melipseo,’ pepra moronerum ngeda, gekesenuna cadi, nedi melimkamsene. Nedi sun tep pepsene. Ada upu peipnedi, sun denge ton cap tapakrap karepbasenepa, domba bisam beilya pumbon dongopmengepa, men nukmanto pio weik kuramretopu kupbankamsere. Nedi melipsenepa sundi nyapu deipmumpa, dadeipdanen bankameng nesala yumada, pio weik kupbankamenge.

38 Ukupmantoda, pumun taru ne si eremna tep, ila tumi kuamupa, ne si eremna tep nimi yuk-yuk dadi, domba bisam pio weik doupra, Yerusalem mutu uku dongoryakaramipa, domba bisam men nukmanto pio weik kuramitopu, nedi Israel nesala gung pio weika kupra deipkamsene. Nesala gung weik konum kupmengedi, pumun taru yuk mutu yu jen talen nengdi, sun ati arum yuma uruptamamipa, walangpu kuramu dinin, ukutaruda amutu-amutu yuma, kange di ati punupra dopmengedi kunkamenge. Ada nimi gung weik, men nukmanto kupra kungepa, amutu ati-ati yuma nimi dipapu dinipkamenge. Ukupne pangeda, ware mutu nesala do yuma, tek sisi ne Allah Yahweh tep, kael kemkamnenge. Allahdi pepu.