Eze 37 | XteSC | STEP | Allah er si Yahwehdi ne tep er puto karepneu. Ataru Allah er Lek Sambala puto, ne nong deiki yana bukudi, ne doupra nimi derami nesala yo bupra deribarami mutu banai bena dokotepneu. Dokotepneu taruda, dinmasipa, amutu ban yumada, nimi yo dipapu dekpemupa epsi.

Ezekiel 37

Israel nesala yo weik kwamu mutu tep, pepu upu

1 Allah er si Yahwehdi ne tep er puto karepneu. Ataru Allah er Lek Sambala puto, ne nong deiki yana bukudi, ne doupra nimi derami nesala yo bupra deribarami mutu banai bena dokotepneu. Dokotepneu taruda, dinmasipa, amutu ban yumada, nimi yo dipapu dekpemupa epsi. 2 Allah er Lek Sambaladi, melipra doupra embandanmaneupa, amutu ban yuma, embanmanemudi epsada, derami nesala yo gelal semungepu, pio weika di akuramupa, ne asuru di epsi.

3 Ataruda, Allah er si Yahwehdi ne tep pepneu. “Uo, kanda tuai nesaladi deipkei ngebo cadi, kandi tenipetepkurume. Agelal sere yo yumada, ‘Tamupra gam bukso,’ peptepepa, gam buktenge do, gum do?” pepra asipetepneu. Upepneupa, nedi tamupra pepsi. “Allah Yahweh akeca-keca yuma talepra, deiki tara erepra, pio puto weik deiyo ngebo kurumdi, ‘Ukupkamne,’ tenerumtopu kuruma cadi, kandi asipetepnerem ngeda, pio kanpuda tek sisi kaele. Ne walwale,” pepsi.

4 Upepsi pangeda, Allah Yahwehdi ne tep pepneu. “Upepmanerema tep, kanda ne upu lap pena deiyo ngebo kuruma cadi, ne upu doprapmemdi, sun yo gelal serenge yuma tep, ‘Allahdi peipser upu moupra gekepso,’ pepkurume,” pepneu. 5 Upepneudi, aupu peipneu. “Ne Allah Yahweh, akeca-keca yuma talepra, deiki tara erepra, pio puto weik deiyo ngebo kunedi, ‘Ukupkamne,’ tenenetopu kununa cadi, nedi agelal semudi kupu nimi yo tep upepne, ‘Sun isin pung pepdongopsenepa, sun yo yuma ka di tamupra gam bukra, gam kunkurume,’ peipmasene.

6 Tonda, nedi sun melmel cap, tu cap, tenpu dukdongopra getepdongopsenedi, sun bol kepdongopkamsene. Ukupsenyopda, ne puto di isin pung pepdongopsenepa, gam bukamrume. Ukupmum dingeda, sundi ne Allah Yahweh tep, kael kepkamnerume. Ada, ‘Uo, Allah Yahwehda, tek sisi kurure’ tenen, kael kemkamnerume.” Allah Yahwehdi, ne Yeheskiel tep peipneupa gekepsi.

7 Atep, ne Yeheskieldi gelal seramu yo yuma tep, Allah Yahwehdi peipmaneutopu pepsi. Ne aupu tupa penmasi taru dipapu, gekenmasipa, sun yo gelal seramunge yuk-yuk yuma, dakuamngai dipu gonga kepra, tenpu dungdongonkoua tep, ayo lelimda ila di dereng-dereng pepi. Ila di dereng-dereng pepidi, ka tamupra kikiman yana dungdongoudi nong kepdongop daepa, men di kuramitopu, nong yuk-yuk kepdongopmaidi, kunmaipa epsi. 8 Ukunmau taruda, nedi, ‘Ware kupkamar do?’ tenen, moupra dinmasipa, ayo yumada, melmel cap, tu cap tamupra dukdongopudi, nong yuma kepdongopu. Ukupu dinin, sun nong yumada, isin kapul men karepu.

9 Ukupra isin men karepmaua tep, Allahdi ne tep upepneu. “Uo, kanda nimi sisa di deipkei ngebo tep upepkene. Kandi kumanya tep pepkurume. Gelal semu nong yuma, isin dongona tep ngeda ukupkurume. Allah Yahweh akeca-keca yuma talepra, deiki tara erepra, pio puto weik deiyo ngebo kuredi, ‘Ukupkamne’ teneretopu kurure. Erdi upepsere. Ortara cap, itara cap, utara cap, akure kumanya yuma, dana-dana tara yumada, yarumudi, menop taru poptamami nesala sun gelal semu nong yana wekrume. Ukutaru, sun nong dukdongopra nong kepman deipmainge yuma, nong pumbon yana pung pepdongopmumpa, sun nong yuma bupu kuprepa, kange di tamupra gam bukamenge,” pepra deipneu.

10 Aupu pepra deipneua tep, Allah Yahwehdi, ‘Ukupkurume,’ peipmaneutopu, nedi kupsi. Akumanya yumadi, anesala sun nong pumbon yana pung pepupa, gam bukra teki. Gam buki dingeda, sun denge ton pio weik kupi. Ukupra konum kupyopda, nesala denge tenpu kepidi, nimi men nukmanto kupi. 11 Ukupi taruda, Allahdi ne tep pepneu.

Uo, kanda nimi sisa di deipkei ngebo ne upu gekepneo. Angeda kandi moupra kael kepkurume. Agelal semu nimi yo yumada, kan kayapu Israel yala nesala yuma utopu dakununge. Israel nesala yala-yala yuma kunge nesaladi upenunge. “Uo, nun yoda konum gelal sepseu. Allahdi konum luproseua tep, dorkupbankamre taru yumada, ware ngebo lyepsetudi loptapsetu do? Guma tep, nunda talipu kunkamepe. Co deiyo kwemtamamengtopu kunkamepe. Ton cap, ‘Ware ngebodi lyepkamser do?’ tenen, pio men tenenkamepe.” Israel nesaladi upenunge.

12 Utenepra penunga tep, nedi peipkuken upu doupra, ne mawa nesala, sun Israel nesala tep lap pepkamrume. Upepkamrume. “Ne Allah Yahweh, akeca-keca yuma talepra, deiki tara erepra, pio puto weik deiyo ngebo kunedi, ‘Ukupkamne,’ tenenetopu kununa cadi, sun deramrumpa, tu palipra peiramseiyai yumada, buplan paktapnedi, gam bukeipkamsene. Ne Allahdi, ne mawa nesala tep akununga neitamai di doupra, sun tep kareramsisi mutu neitamai, ka tamupra dubensenedi, dadeipkamsene. Amutu ka tamupra karepsenepa, sun amutu neitamaipu kunkamrume.”

13 “Nedi ange yuma ukupsenepa, ne mawa nesala, sun Israel nesala yuma kael kepkamrume. Ada, tu paliramseiai di buplan pakeipnedi, gam bukeipsenepa, gam bukrumudi, ange yuma epmumdi, ‘Uo, nun nai bo Allah Yahwehda, tek sisi kurure’ tenen, ne tep kael kemkamnerume. 14 Tonda, nedi sun nong neitamai pung pepnepa, ne Lek Sambala sun nong neitamai wekserepa, isin kupseredi gam bukronkamrume. Ukupsenedi, sun pe mutupu tamupra dubesenepa, bena kunkamrume. Ukupsenyopda, sundi ne Allah Yahweh tep kael kemkamnerume. Ada, uo, nun nai Allah Yahwehda, tek sisi, ‘Ukupkamsene,’ peipseutopu, konum kunmasera cadi, ‘Amenda taru peda, nun melimna tep, pel donkamsere,’ tenen, kael kemkamnerume.” Allahdi pepu.

‘Yehuda yala nesala cap, Israel yala nesala cap, dukdongopra tenpu kunkameng’ tenen, pepu upu

15 Allah er si Yahwehdi, ne Yeheskiel tep upepneu.

16 Kanda nimi tuai nengdi deipkei ngeboda, ukupkurume. Maca tenpu doprapmemdi, aco deikida aupu sekurume. Ada, “Yehudadi deiamupa dadeipdanen, yakarami nesala cap, tonda ukutaru anesala cap, kikiman kunge nesala ake,” pepra sekra deipkurume. Ukupmemdi, yuk maca ton dopra, aco deikida aupu sekrume. Ada, “Efraim yala nesala sun maca ake. Yusupdi deiamupa, dadeipdanen, yakarami nesala cap, tonda ukutaru sun kikiman kunge nesala cap ake,” pepra sekra deipkurume. 17 Konum sekmemdi, amaca butene dopra, tenpu buru di talepkurume. 18 Ukupmempa, kan kayapu, sun kikiman kumum neng epmengedi, “Ange kupmuma deiyoda, ware keca tep kupmum do?” pepra asipetepkamkenge.

19 Asipetepkengopda, upepkamrume. “Gume, Allah er si Yahweh, akeca-keca yuma talepra, deiki tara erepra, pio puto weik deiyo ngebo kuredi, ‘Ukupkamne,’ teneretopu kurure. Erdi upeserure. ‘Ne Allahdi ukupkamsene. Efraim er maca cap, Yehuda er maca cap, kikiman deipkamne. Deiyoda, Efraim yala nesala cap, Yusupdi deiamupa dadeipdanen yakaramipa, sun cap kikiman kunge nesala yuma cap dopropnedi, Yehuda yala nesala cap, sun cap kikiman kunge nesala cap, tenpu yala kupra deipkamsene. Ada, Yehuda cap, Israel cap tenpu yala kupra deipkamsena tep pepsene.’ Allahdi upepmasere, pepra lap pepkamrume.” Allahdi ne Yeheskiel tep peipneu. Upepneudi, aupu ton pepneu.

20 Amaca butene deiki tara, aupu konum sekmemdi, tenpu buru talepmemnyopda, aupu ton pepkamrume. 21 Allah er si Yahwehdi, akeca-keca yuma talepra, deiki tara erepra, pio puto weik deiyo ngebodi upeserure. Ne nyapu Israel yala nesala yumada, yuk-yuk mutu nesala kan-kan dabena kuramengepane, anesala yuma tenpai bulupra deipnedi, sun pe kareramsisi mutupu tamupra deriyankamsene. Tenpu mutu neitamaipu kunkamrume.

22 Ukupkamne taruda, sun yumada tenpu yala utopu kungedi, Israel mutu neitamaipu kunkamenge. Atep, sun anesala deiyo talepra kuna tep, ila nimi deiyo ngebo Raja, wepra deipnepa, atenpu ngebo dipapu Israel yala nesala yuma talenkamre. Sun anesalapu bokmengedi, mutu yuk-yuk talepra men kunkamenge. Israel yala nesala cap, Yehuda yala nesala cap, men di bokra yuk-yuk kurami dinin, amenda doryankamre taru neitamaida, tenpu mutu neitamaipu, tenpu yala kupra kunkamenge. Sun Rajada, tenpu ngebo dipu talenkamsere.

23 Tonda, menop taruda, isok si eremamidi, mali kun keca weika di, kurami dinin, ataru di dipra dorkunkamre taru neitamai yumada, ange yuma ka di ton cap men kunkamenge. Isok si erepmengedi, mali kun keca ton cap men kungedi, mali men kudidankamenge. Ne Allahdi, ‘Song,’ tenenun keca yuma men kunkamenge. Utopu tali keca upu pena cap, kange douna gum keca, nimidi ketekepra deipmengedi, si eremamenge ngeda, sundi ton cap si men eremkamenge. Tonda, ne Allah tep, tamdongoramneidi, pio mali-mali weik kurami ngeda, ton cap men kunkamenge. Dinin, akeca yumada, nedi gum kupra deipnedi, anesala yuma telep kupra deipnedi, sun tep lyepropkamne. Ukupne pangeda, sunda ne nyapu sisa kunkamenge. Neda, sun nai bo Allah kunkamne.

24 Tonda, ne pel don ngebo Daud, er yala ngebo wepra deipnepa, sun yuma talepra ila nimi deiyo ngebo kunkamre. Ukupmantoda, domba bisam weik kunung dinin, sun domba peina deiyo ngebo tenpu kuredi, er domba yuma tep bupra, tenpu kepra deipredi, telep kupra peiramretopu, Israel nesala yala-yala yumada, sun deiyo ngebo tenpupu kunkamre. Erdi Israel nesala yuma talenkamre taruda, sundi telep kun kecapu kunkamenge. Ada ne Allahdi, “Angeda ukunkamrume, angeda men kunkamrume,” pepra deiamsingepu, talepra kunkamenge. Ne upu yuma moupra gekenkamenge.

25 Pumun taru nedi ne pel don ngebo Yakub tep kareramsipa, erdi deipupa dadeipdanen, barami nesala kurami mutupu, pio tep bena kunkamenge. Ada sun apu yapu kurami mutupu, bena kunkamenge. Sundi deipmengepa dadeipdanen bankameng nesala yuma peda, amutupu talepra, pio akunkamenge. Ada ukutaru kurum nesala cap, amenda taru sun nyapu cap, tonda sun nyapudi deipbankameng nyapu cap, dorkunkamre taru deipmengepa, dadeipdanen bankameng nesala yuma cap, sun yuma amutu neitamaipu, telep kupra kunkamenge. Ukunkameng taruda, Daud er yala ngebodi, nimi deiyo kepra tekredi anesala tep pio talenkamre. Sun Raja ngeboda, er tenpu kunkamre.

26 Ne Allah cap, sun Israel nesala yuma cap, antapra teleppu kuna tep, pedina upu tenpunge pepra deipkamne. Aupuda, pio men gum kupmanto upu cadi, pio akunkamre. Ukupne dingeda, nedi sun tep pio melipra kalengamnepane, pio teleppu kunkamenge. Neda sun damai kunedi, sun tep melimkamsena deiki di, sun denge weika di ton cap tapakra kupbankamenge. Akunkameng mutu neitamaipu, ne si eremna ati acei dopra deipnepa, pio tupa akunkamre. Ne sipu pio eremkamnenge.

27 Ukupne dingeda, neda sun cap tonpa pio kunkamepe. Neda, sun nai bo Allah kunkamne. Sunda, ne nyapu sisa, ne mawa nesala pio kunkamenge. 28 Ne si eremna tep, Pio Telep Lengna ^{▼▼Lengna Lengna pepkada, Indonesia upu deiki di, ‘suci’ penunge. Ada, ‘Mali keca pio gum kurur ati’ tenen, pepke.} Atida, ne nyapu Israel nesala sun kunkameng mutu neitamai akunkamre. Ada pio tep akunkamre. Ne pepsenetopu konum kupnyopda, sun yuk-yuk mutu kunge nesala yuma ange epmengedi, ne Allah Yahweh tep kael kemkamnenge. Ada, ‘Uo, Israel nesala sun mali kunge keca gum kupra deipredi, sun tep telep kupra derirur Allahda, Allah Yahweh er dipapu telep kupra derirure,’ tenepmengedi, kael kemkamnenge. Allahdi ne Yeheskiel tep upepneu.