Eze 38 | XteSC | STEP | Allah er si Yahwehdi ne Yeheskiel damai yana, aupu peipneu.

Ezekiel 38

Magog mutu kuramu ngebo, er si Gog tep, Allahdi pepu upu

1 Allah er si Yahwehdi ne Yeheskiel damai yana, aupu peipneu.

2 Uo, kanda nimi sisadi deipkei ngebo kurume. Kan aso erepra Magog mutu ila nimi deiyo ngebo, er si Gog kururai dinkurume. Angebo tep, apepkene upu lap pepmemdi, wipdongopkurume. Angebo Gogda, ila nimi deiyo ngebo kepra, Mesek mutu cap, Tubal mutu cap talerure. Kanda Yeheskielo, er damai bememdi, “Allahdi peipkere. ‘Nedi karepnepa, ikin keca ton yakerepa, doropkamreme,’ pepra, lap pepmakere,” pepkurume. 3 Aupuda, Allah er si Yahweh, akeca-keca yuma talepra, deiki tara erepra, ila puto weik kurur ngebodi, Gog kan tep peipmaker upuda adano. Uo, kanda bicaue. Kanda ila nimi deiyo ngebo kepra, Mesek mutu cap, Tubal mutu cap talepra kurume. Neda, kan mar pena ngebo kukenune. Moupra gekepneo!

4 Nedi kan tep, ‘Er banmarai tapra, amnyo karikra, Israel nesala kunungaipu dinkamre’ tenen, kan banmarem tara tapkurema tep, besi takke keca, kan sipyal pumbon dongopkenedi, tapuda gerekdongoprapkenedi, kan cap kan jen talena neng cap, yuk neng cap, ‘Ne tenemsi mutu mar porbenkamenge’ tenen, gipra doua benkamsene. Ada, nimi porban taru, ‘Mar popserur’ tenen, jen talena nengdi kenengnung gat opkal kepraprumudi, kuda bisam cap, kuda bali deiki bukra, nimi porbana tep ketenepkameng jen talena neng cap, tali jen talena neng cap, denge weik ketenepkameng nge cap, kikiman benkamrume. Tonda sun yumadi, nimi pona keca cap, nimi pona parang ya cap, ‘Nimi popsenung’ tenen, sun nong kalengna keca er si perisai, lyomnge cap, meteknge cap, talepmengedi, akeca yuma ketenepra doupmengedi, sun yuma cap doupra dubenkamrume. Nedi mepra dubesenepa, sunda ne amnyo tara yankamrume.

5 Kan mutu jen talena nengpu men benkamenge. Sun cap, Persia ^{▼▼Persia mutu – Persia mutuda, ataruda Iran mutu penunge. Etiopia mutu seki ngeda, ukutaru Sudan penunge. Put mutu seki ngeda, ukutaruda Libia mutu penunge.} mutu jen talena neng cap, Etiopia mutu jen talena neng cap, tonda Put mutu jen talena neng cap, sunda giso galuna tep gat keca, er si topi baja cap, nimi pon parang ya cap, ketenepmengedi, kan cap, aneng yuma capdi, kan damai yana melipkengedi, sun yuma kikimanpu, ne tenemsi mutu mar porbankamrume. 6 Tonda, Gomer ^{▼▼Gomer mutu – Gomer mutu cap, Bet-Togarma tara mutu capda, ukutaruda Turki mutu penunge.} mutu yu nesala, sun tara jen talena neng cap, tonda Bet-Togarma tara mutu kunung nesala, sun jen talena neng cap, kan tara neng cap, kikiman mar porbenkamrume. Atep, kan cap kikiman benkamrum nengda, denge pio weika di, kan damai yana melipkengepa, mar porbenkamrume.

7 Kandi, ‘Yuk mutu nesala mar porbenkamepe’ tenen, kan cap kikiman mar porbenkamrum neng tep, upepmempa, kan cap, jen talena neng denge weika di bulupra kan tara kepropkengedi, melimkamkeng neng cap, sun yumadi, ‘Ataru dipapu porbenkup do, yuk taru do?’ tenen, tek sisi ketenepkurume. Tonda, kandi sun yuk mutu jen neng yuma tep, erepra kumemdi, sun deiyo ngebo kupmem dingeda, upu pemempa, sunda kan amutara neng kupkamenge.

8 Ware kuprap tumi cap, war cap, yambulanun ton konum mapmemnyopda, nedi kan tep ‘Ukutaru ukupkurume, yuk mutu bena anesala popkamrume,’ pepkamkene. Amenda dorkunkamre taruda, upepkenepa, ataru ton tenpu ila ati arum damai benkamrume. Ada, amutu kuramenge nesalada, menop taru, sun podan nengdi mar poramidi enepropidi, popra dubenamipa, karen mutu neitamai dakuramyanen, keteng tamun weik konum kupupa, loptapsipa, ka tamupra sun pe mutu yaipa, nedi telep kupra deipsi.

Ada dana-dana tara mutu neitamai, yuk neng cap wisipra, dakuramipane, nedi kange di sun ila ati arum walangpu kwamu dinin, tamupra yana akati doprapidi, Israel tarada, mutu-mutu neitamai dakuramidi, kange deipra dim pepra, teleppu kurami. Menop taru anesalada, sun pe mutu neitamai men kurami. Karen mutu neitamai yuk-yuk kuramipanen, sun mutu sisada, walangyopu kuramu dinin, nedi anesala doupra, sun pe mutu duyana deipsipa, sun ati arum lepsisikra doamidi dakuramyanen, ukutaru peda amutu neitamaipu tupa kungedi, tali kange deipra teleppu kununge. Ukutaruda, sun podan neng ton men yakanunge.

9 Amenda taru nedi, ‘Mar porberume,’ pepkenepa, kan cap, kan jen neng cap, tonda sun yuk mutu yu jen talena neng cap, ada kan damai yana melipkamkeng neng cap, sun yuma kikiman wisiprapmumdi, ila mungna yakaramretopu kupra, Israel nesala kunung mutu yamumdi popra benkamrume. Ukupmumdi, kan tara neng cap, sun tep melipkamseng nesala cap, sun jen talena neng yumada, denge pio weik, men nukmanto kupra benkamruma cadi, ukupmantoda, amutu yumada, dua bum topdoua yaredi, yana kiptaprepa, dekperamretopu kupra, amutu yuma dinikamrume. 10 Neda Allah, ne si Yahweh, akeca-keca yuma talepra, deiki tara erepra, pio puto weik deiyo ngebodi pepkene. Kan Gog tep pepkene. Ne Allahdi tenemsi taru konum kupyopda, Gog kanda, kan kange dipru neitamai di, ila yu tenepmemdi, ‘Ange pio mali kuna ngeda kupkune,’ tenepmemdi ketenepkamrem ngeda, pio malingepu tenepra ketenepkamreme.

11 Kan dipru neitamai di upepkamreme. “Ada, yuk mutu nesalada, ila ati arum doramidi, ataru dakunung mutu dinin, ‘Nun podan neng yana popsenung’ tenen, sun ila ati-ati arum ongopra dana-dana tara, lyom gel beilya wipdongopra men kunung mutuda, nedi bena wekra poptapkamane,” pepra, lap pepkamrume. Utenepmemdi, aupu ton pepdankamrume. “Uda amutuda, gel beilya wipdongopra kuna cap, buplan dekdongopra kuna cap, pio men kununga cadi, sun dingeda, ‘Gume nunda telep dipapu dim pepra kunupe. Tonda nun nimi pona tep keca yumada, konum ketenepra kunupe,’ tenenunge. Dinino, kandi anesalada, sun damai bena popkamreme.

12 Kandi, ukupra tenenkamrume. ‘Nunda, sun amutu neitamai kunung nesaladi derinung bung kecada, nun dipapu dalupra doropkamepe. Ukupmepepa, amutuda ati walangpu kuramu dinin, anesalada kange di yana, ati arum dopra kununge. Anesala, sun talenung keca yumada, doropkamrume. Amutu bulupra yana wekmengedi kunkameng nesalada, men taru amutu kurami dinin, yuk mutu yu nesala di, enepra donokamipa, yuk mutu nesala, dana-dana tara bena, sun kan-kan dabena kuramyanen, tamupra yaidi, bung keca cap, gam kuramre keca, sapi cap, domba bisam cap, peingedi amutupu kunkamenge. Dinino, amenda taruda, kan cap, kan melimna neng capdi, amutu neitamai kunge nesala poptapkamrume. Sun amutu kunge nesaladi, ‘Gume, nunda tuai mutu ban-ban yuma akure mutupu, nunda tek sisi amutu neitamai sisapu kunupe, tenenunge.

13 Syeba mutu cap, Dedan mutu cap, Spanyol mutu neitamai dinin, ila ati arum er si Tarsis mutu cap, amutu-amutu neitamai kunung nesala yuma cap, tonda Tarsis mutu dam bung keca yala-yala yuma kunumdanunga deiyo neng cap, tonda, akati-akati dana-dana tara kunge yambul mutu nesala capdi, yana asipetepkamkenge. “Uo sunda, jen talena neng denge pio weik buluprumudi, jen doupra benkamruma deiyoda, Israel nesala sun bung keca yuma upula dorona tep benmarum do? Tonda sun derinung kunumna weik deiyo keca, er si emas cap, perak cap, tonda sundi peinung keca, domba cap, sapi cap yumada, ‘Dalupra doropkamep’ tenen, benamarum do? Bung keca yala-yala yuma, pio weika di dalupra dopropkamrum do?” pepra asipkamkenge.

14 Ange tep nengeda, ne Allahdi, pepkene. Kanda nimi sisadi deipkei ngebo, Yeheskiel, kandi angebo er si Gog tep, er damai bememdi aupu lap perbenkurume. Allah Yahweh, akeca-keca yuma talepra, deiki tara erepra, pio puto weik deiyo ngebodi, kan Gog tep upepkere. “Gekepneso! Neda Allah, ne nyapu sisa, sun Israel nesalada, sun kware gum di, telep dipapu dim pepra kungedi, kange deipra kunge taru neitamaida, kan Gogdi, ketenepmemdi, sun damai porbenkamrume.

15 Ada, kanda pio karenai utara dapu tamna, arah utara neitamai kumemyai di, kan cap, kan jen talena neng, denge pio weik, men nukmanto neng cap, yuk-yuk mutu dakunge neng, kan tep melipkameng nimi weik ton cap, Israel nesala kunungai damai menmena bena popkamrume. Sun yumada, nimi pona ila kail nengdi melipkengepa, sun kikimanpu Israel nesala kunge mutu bena ponkamrume. Sun puto deiki di, sun yumada, kuda bisam bali deiki di bukra, ‘Israel nesala pona tep, menmena sepdaro embankamrume.

16 Kan Gog cap, kan tara jen talena neng capdi, ne nyapu sisa, sun Israel yala nesala damai bena pona tep, sun mutu bankamrume. Amutu benkamrumada, ukupmanto ila mungna cap, mo cap yankure taru, dua bum di, mutu yuma kemdongoryakaramretopu kupra, sun yuma yarumudi, Israel nesala damai yana popkamrume. Ne Allahdi tenemsi taru damai konum kepyopda, nedi kan cap, kan tara neng cap dopra deipnepa, ne mawa mutu cap, ne mawa nesala cap, sundi bena popkamrume. Nedi kan deiki, Israel nesala tep wenepnedi, popnyopda, sun dana-dana tara kunge nesala yala-yala yuma, nedi kupkamne keca kupnepa, epmengopda, ‘Uo, Allahda, tek sisi ila puto weik ngebo kurure. Erda, mali kunange pio gum, pio telep lengna ngebopu kurure. Angeda, konum epra kael kepmepe,’ tenepnengedi, ne Allah tep, moupra kael kepkamnenge.

17 Atep moupra tenipetepo! Pumun taruda, ne Allah Yahwehdi, ne upu lap peramya deiyo neng, sun nabi-nabi nengdi, Israel nesala kankan peramya deiki di, tenpu yankamu ngebo tep lap peramsi. Gog kanda, angebo konum kurum do, gum do? Sun Israel tara kurami nabi nengdi, Israel nesala kan-kan di, keteng tamun denge pio weik deiki di aupu tupa lap perami. Ada, ‘Allahdi, tenpu puto weik ngebo tep, go kareprepa, angebodi, sun Israel nesala tep, jen dopra poryankamsere. Aupuda, ne upu lap perami neng, sun nabi-nabi nengdi, ‘Ila puto weik yu ngebo, sun tep, poryankamsere,’ pepra, lap men pediramsi do? Gume, ne Allahdi konum pediramsi ngeda, “Doryankamre taruda, tenpu mutu ngebo ton, ne Allah di peipnepa yaredi Israel mutu nesala yana, popkamsere,” pepra deiamsi ngeda, konum lap peramipa gekeramrume. Ange yuma konum lap perami. Angeda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, “Ukupkamne,” pepra konum peiamsa cadi, angeda tek sisi nong kupkamre ja!

Allahdi amenda taru, Gog popkamrenge tep, pepu upu

18 Ne Allah Yahweh, akeca-keca yuma talepra, deiki tara erepra, pio puto weik deiyo ngebodi, pepsene. Ne tenepsi taru konum kupyopda, Gog dopra deipnedi, go karepnepa, Gogdi Israel nesala kununga damai yana, Israel nesala weika di popkamre. Ukupkamre dinin, ataruda, ne yu weik kupnerepa, nedi tamupra Gog er kwangdangna tep, weika di wenepra popkamne. 19 Ne pio ila yu deiki di, ‘Uo, ne mawa nesalada bicaue. Sunda ne dipru nesala cadi, sun tep kange derinune. Atep, warya tep, Gogdi, poptapmar do?’ tenen, Gog er tep, mar pepnedi wenepkamne. Ada, ataruda, ila mutu longna cap, kange mun kupkamrenge cap, sun Israel mutu neitamai kunung nesala kan-kan di kupkamre.

20 Israel nesala ila di wenepra popkamne taruda, tali bura tara gam kurameng keca cap, laut mokon pumbon kure ikan yuma cap, im neitamai lakra embaramre ma yala yuma cap, bura tara tali gam kurameng keca cap, yambul keca po do, yan di embaramre bal do, yan bal do, ayala keca yuma cap, tonda mutu-mutu yuma neitamai kunkameng nesala yuma peda, ne yana kunkamnai epnengedi, ne damai yakana tep, ila kwar weik kuprepa, yo moropberber pepkamenge. Tonda mutu dup yuma pe topra sakamre. Mutu asi taram peda, teno pakra sakamre. Tonda nimidi gat gel beilya wiraminge peda dakra sakamre.

21 Ne Allah Yahweh, akeca-keca yuma talepra, deiki tara erepra, ila puto weik deiyo ngebodi, aupu konum pepra deipsena cadi, angeda tek sisi kupkamre ja! Ada, Israel tara dinin, ila buku mutu-mutu yuma neitamaida, nedi peipnepa, yu weik jen talena neng yangedi, sun nimi pon ya doupra, er Gog tep, poryankamenge. Gog er damaida, nedi ila kange mun keca yala yuma karepne pangeda, er epredi kwar pio weik kupkamre. Tonda, Gog er jen talen neng yumada, sun pedipapu doupmange mar dipapu, sun kayapu nengpu popdankamenge.

22 Tonda, nedi Gog er kwang dangna tep, er mali kuramunge tep upu bokeipnedi, wenepkamna deiki di, ila kange mun pu jena deiyo keca karepkamne. Tonda, nimi weik popdangepa, sun yapi weik embenkamre. Tonda ila mul duduya mo cap, ila uku bu cap, uku jeramredi gel but tong weik peramrenge, er sida belerang cap, ne Allahdi dopra, er Gog cap, er jen talena neng cap, er melimnung neng, yuk-yuk mutu neng cap, yana tekturukmangedi, er cap kikiman ponmange neng cap, sun deiki deipkamne.

23 Ange yuma ukupnya deiki di, ‘Yuk-yuk mutu nesala ban-ban yuma tep, ne ila puto cap, mambul pel donung nge cap, mali kun keca gum di, pio telep, lengnapu kunun nge cap, sun yuma kael kepkameng’ tenen, akeca yuma sun tep benbenepnedi, peterepkamne. Adeiki di, sundi ne tep, ‘Uo, Allah Yahwehda, tek sisi erpu kurure’ tenen, moupra kael kepkamnenge.

Aupu yumada, Allahdi, nabi Yeheskiel damai yana peipupa, gekepudi, lap pepra seku.