Ezekiel 39

Allahdi, “Mesek mutu cap, Tubal mutu cap nimi deiyo ngebo Gog, poptapkamne,” pepu upu

1Allahdi ne Yeheskiel tep upepneu. “Kanda nimi sisadi deipkei ngebo, Mesek mutu cap, Tubal mutu cap tep, ila nimi deiyo kepra, taleamu ngebo, er si Gog tep, ‘Kange mun keca kan damai kupkamkere,’ pepra, bena lap pepkurume. Tonda, Allah, er si Yahweh, akeca-keca yuma talepra, deiki tara erepra, pio puto weik deiyo ngebodi, upepkere. ‘Ne Allah Yahweh, kan pona ngebo konum kunune. Kanda, Mesek mutu cap, Tubal mutu cap tep, ila nimi deiyo kepra, taleamrum ngeboda, nedi kan tep wenepra popkamkene! 2Kanda, ‘Ukupkamne,’ tenemum dinin, ne Allahdi pel dopkamna deiki di, kan tenepmumnge tapmemdi, ‘Ne tenepsingepu kupkamnerem’ tenen, tamupra duyankamkene. Tonda kanda, pio karenai arah utara, dapu tara kurum dinin, nedi kan doupra, tamupkenedi, Israel nesala kunge tara neitamai buku mutu-mutu damaipu duyankamkene. Deiyoda, kandi sun Israel nesala tep poryankamrume!

3Ukupkamrum dinino, Israel nesala kunge mutu neitamai konum yamemnyopda, nedi, ‘Angeboda, tupa nimi men porbetu’ tenen, kan tebalal tara buru popkenepa, kan jen doupmamem ngeda, yamupra sakamkere. Tonda, nedi kan dumsisi buru popkenepa, kan mar doupmamemnge yuma peda, yamupra tu deiki sakamkere. 4Gog kan cap, kan jen neng cap, kan tep melipra tekturukra kupkamkeng neng cap, sun yumada, Israel mutu-mutu dup-dup neitamai dipapu, popmengepa depkamrume. Depmumpa, sun nong telep kupra men peipkamseng dinin, ‘Anengda pio malipu kurami neng’ tenen, tu deikipu tapmengepa, nedi sun nong dopra, lyupu tu jeramre ma yala-yala yuma cap, tali bura tara dagam kunung keca yuma cap, sun deiki deipsenepa, sun nong yuma jepropsengedi, gawal dakamsenge.

5Neda, Allah Yahweh, akeca-keca yuma talepra, deiki tara erepra, pio puto weik deiyo ngebodi, aupu konum peipmakena cadi, tek sisi nong kupkamre ja! Kan cap, kan tara kepronkameng jen talena neng cap yumada, yuk nengdi sun tep popsengepa, tuai sakamrume. Ada, nimidi wa peramengai do, tali dakuamre pala katuai mutu do, atu deikipu saka dourberumudi, deprumnyopda, nimidi men peipkamsenge. 6Tonda, sun pe mutu sisa, er si Magog mutu neitamaida, nedi sun Magog mutu cap, amutu kunung nesala cap, dapu tamna ila laut mokon pirman mutu kunge nesala yuma capda, sun deiki uku bu papra dinikdongopnepa, amutu-mutu cap, anesala cap jepropkamre. Sun amutu kunung nesaladi, ‘Nunda telep nesala kupedi, kange deipra, dim pepra kunupe,’ tenenung dinin, nedi kange mun keca karepkamne. Atep nengeda, ukupnepa sun amutu nesala yumadi, ‘Uo, Allah Yahwehda, erpu ila puto weik ngebo kurure’ tenen, kael kepkamnenge.

7Tonda, Israel nesala kankan neitamaida, ne cap, ne si capda, pio telep, lengnapu kunun ngeda, katawai kepra deipkamna deiki di, moupra kael kepkamnenge. Menop taru, Israel nesala mali kuramya deiki di, ne cap, ne si cap tep, mali kweipnei dinin, amenda taru, Gog tara yuma konum popra gawal daknyopda, ne cap, ne lengna si capda, ton cap mali men kweipkamnenge. Angepu gum dinin, ukupnepa, ware mutu nesala do yuma, sundi, ‘Uo, Israel yala nesala, sun si eremnung Allah er si Yahwehda, tek sisi pio lengna ngebo kurure. Er Yahwehda, akeca-keca yuma talepra, deiki tara erepra, ila puto weik ngebo kurure. Er cap, sun Israel nesala cap kikiman kununge’ tenen, ne si moupra kael kepkamnenge.

8Atep neda Allah Yahweh, akeca-keca yuma talepra, deiki tara erepra, pio puto weik deiyo ngebodi, aupu konum pepsena cadi, nedi tenemsi keca cap, ‘Dortaru yankamre,’ pemsisi taru cap, ne konum peipsidi tumi capda, tek sisi damai konum yanmar adano! 9Nedi Gog cap, er jen talena neng cap, sun tep melimkameng neng cap yuma konum poptapra gawal daknyopda, Israel mutu neitamaida, nimi podana ton men kunkamenge. Ataruda, Israel nesala sun domi ati arum kunungai di gupra, sun mutu-mutu dana-dana tara yuma dinin, bura tara embengedi, mar podaramengedi douamenge keca yala-yala yuma, poptapsipa sun podan nengdi konum tapmange ngeda, tu deiki di bulupra deipkamenge. Abulupra deipkameng nimi pon kecada ake. Ada, nimi pon parang ya cap, jen cap, mar cap, ‘Nimi popsenung’ tenen, nong kalengna keca er si lyom perisai cap, metek perisai cap, tonda nimi pon maca cap, nimi pon lyom co takke cap, ange yuma bulupra, uku dongona tep bupra deipyakankamenge. Akecada pio weik kupkamra cadi, ada yoneitam bari keteng tamun deiki di, akeca-keca yuma bupra deipmengedi, uku dongor yakankamenga tepa.

10Ange tep nengeda, sun Israel nesaladi uku dongona tep, coda bura men dorbenkamenge. Tonda, ‘Nun ati co putapser’ tenen, co palpal ton men kwepkamenge. Tonda, sun wai dam men erebankamenge. Sun podan nengdi, nimi pona tep douamenge keca yuma pio-pio weik akapkamra cadi, Israel nengdi akecapu bulupra, deipmenge nge deiki dipapu, sun ati co tep, uku dongonkamenge.

Tonda, God mutu neng cap, sun melimami neng capdi, Israel nesala, sun keca yuma dalupra dorominge, ada Israel nesala sun bung keca yuma upula doprominge tep, kwang dakamsenge. Ada, Gog cap, er jen neng cap, sun keca yumada doropkameng dinin, ataruda, Israel nesaladi, sun Gog tara nesala taleami keca yuma, tamupra dalupra dopropkamenge. Ne Allah Yahweh, akeca-keca yuma talepra, deiki tara erepra, pio puto weik deiyo ngebodi, konum peiamsa tep, akeca yuma tek sisi nong kupkamre ja!

Gok peipkamenge tep, pepu upu

11Allah er si Yahwehdi aupu ton pepu. ‘Angeda, tek sisi kupkamre,’ pepman taru konum damai kupyopda, Israel mutu neitamaida, nedi angebo Gog, er peinai tep tuda, keteng dangbaramre tara, ila laut mokon er si Mediterania ortara dinin, atarada keteng yakan tarada, ila mokon ton, er sida, Gam Kuna Gum Laut, mokon neitamaipu kupkamre. Amutu sida, ‘Ban Mutu Bisi Banunge,’ penungaipu karepkamne. Ada Gog cap, er jen talena neng yuma cap, sun melimami yuk mutu jen neng cap, konum pomipa, peipkamengaida, amutu ban neitamaipu bena peipkamenga cadi, apeipkamengaida, ila pala weik kupkamre. Atep, nimi bo nengdi, ‘Aban mutu neitamai lupra benkup’ tenen, piripeteptenge dinin, aca men benmanto kupkamenge. Anesala peipkamengai amutu si tep nengeda, ataru di dipra, dorkunkamre taru neitamaida, nimidi amutu tep, ‘Hamona mutu,’ penkamenge. Tonda, ‘Gog tara neng, sun Peiami Mutu banda, ake,’ penkamenge.

12Ware yoneitam bari deiki di, sun Israel nesaladi, Gog cap, er jen neng cap, konum popipa, sun nong deipinge yuma, bulupra dopropmengedi, tu palipra peinkamsenge. Ukupmenga deiki di, Israel nesala kunge mutu tu neitamai yumada, kange di telep kweipkamenge. Ada pio mali keca gum kupra deipmengedi, mali kun keca ton cap men kapkamre. Teleppu kupkamre.

13Israel mutu neitamai kunung nesala yumadi, yana melipra, apoptami neng, sun nong yumada dopra peipkamenge. Apeinkamengenge tep, amenda taru nedi tenemsi tarupu, sun tep menenga kecada dopra karepnepa, yuk nesala yumadi sun tep, ‘Dyo, sun apel dorami ngeda, pio telepe, sunda telep neng kununge,’ pepra, Israel nesala yuma tep, gispal donkamenge. Ada, ne pio telep cap, puto weik cap, mambul weik kununa capda, ‘Nimi yuma epmengedi, kael kepkameng’ tenen, nedi ange yuma benbenepra peterepkamne. Tonda, neda Allah Yahweh, akeca-keca yuma talepra, deiki tara erepra, pio puto weik deiyo ngebodi, ‘Angeda kupkamne’ tenen, konum peipsena cadi, ange tek sisi nong kupkamre ja!

14Israel nesaladi, ware kuprap neng ton, sun tep pel karepnepa, Israel mutu neitamai dipetepra embangedi nimi poptamidi, tu deiki tami nengda, nongda ton tupa akapmar do, gum do?’ tenen, erbenkamenge. Ada, ‘Nun mutu yuma, mali keca gum kupra deipmepedi, ka di telep kweipkamep’ tenena tepa. Atu deikida, nimi deami nong akwamrepa epmengopda, sun nong dopra, bena adipapu tu pumbon peipkamenge. Ada, ‘Amutu tu neitamaida, kange di telep kweipkamep’ tenen, Gog cap, er tara keprami neng cap, sun yuma deami nong eprapmengedi, adipapu peipkamenge.

15Aepra embankameng taru neitamai tenpu tumida, ton tamna gum di, nimi yo tenpunge peda, men gum kupkamre. Tupa akwapmarepa, animi yo epmengopda, ayo kwamyaida, peten kemdinkamenge. Apeten keipmangepa, nimi peina nengdi, ange epmengedi, yana ayo dopra, adipapu tenpu mutu neitamaida, Hamona mutu, ada, ‘Gog tara neng, sun Pein Mutu banpu,’ peirbankamenge. 16Ange ukupmenga deiki di, mali keca ton Israel mutu tu deiki men kwapkamre. Teleppu kupra deipkamenge. Amutu ban neitamaida, ila ati arum tenpu, er si Hamona mutu, doamipa tupa akurure. Tonda, amutu ati arum tepnge, er sida, ‘Gok tara neng, sun Pein Mutu Ban,’ penkamenge.

17Neda Allah Yahwehdi, kanda nimi sisa di deipkei ngebo, kan tep upu ton pepkukene. Neda Allah Yahweh, akeca-keca yuma talepra, deiki tara erepra, pio puto weik deiyo ngebodi, pepkene. Kandi, tuai mutu kure ma yala-yala yuma cap, tali bura tarada, gam kuramre keca yala-yala yuma cap tep, ‘Sun yumada, dana-dana tara yuma di, bulupra aceipu yakaso!’ pepkamrume. Konum kong pepmempa, dan tara mutu kungenge yuma bulupra yangedi, Israel mutu neitamai sun jena tep, ne Allahdi nimi tu cap, nimi yapi cap, sun tep keteneipkamnenge yana jepkamenge. Ange keteneipkamsen ngeda, ukupmantoda Israel nesaladi, ne gispal dona tep, domba popnedi ne tep yana kareramneinge utopu kupkamre dinin, ila weiknge tep ketenepra karepkamne.

18Ama cap, abura tara gam kuramre keca cap, yuma yangedi ila mambul kurami neng, sun nong jenkamenge. Ada mar pona ila kael neng cap, ila puto weik kurami jen talena neng cap, tuai mutu ila nimi deiyo keamidi, nesala yuk-yuk talerami deiyo neng cap, sun deami neng, sun tu cap, tonda aneng sun yapi cap, yana jepkamenge. Ukupmantoda, adeami neng sun nong jenkameng ngeda, jem kambing bisam cap, domba bisam nyapu cap, kambing bisam cap, sapi bisam cap, tonda, Basan mutu pio betei telepai di peinung dombada, galemna weik kunge nge utopu kupra jenkamenge. 19Nedi sun ma cap, bura tara tali gam kure keca cap, yangedi jenkameng kecada, ne dipapu keteneipkamsene. Ukupnedi karepsenepa, sundi meta weika di jenkamenge. Meta weik jepmengepa, ila di bounkamre. Ange utopu, nimi yapi peda dopra jepropkamenge. Ajepmenga deiki di bouprepa, dukmanto kunkamenge. Tonda, sun yapi dopra jepmengepa, sun kangeda yawarapkamre. (Ada nimidi kange yawaramne anggur yu me jepmengepa, kange yawaramamretopu kunkamenge.) Akunkameng ngeda, nedi ne gispal dona cap, si eremna cap tep, ila kailya kalemna tumi utopu, jen keca weika di keteneipkamsen taru tep pepsene.

20Nedi sun ma cap, bura tara tali gam kuramre keca cap tep, jen keteneipkamnenge yuma jepmengedi, ila di boupkamre. Ada, kuda bisam cap, kuda bisamdi tapu di gerekra gipropmangepa, tu deiki embaramre jen talena neng cap, mar podana ila kael neng cap, jen talen neng yala-yala yuma cap, Israel nesaladi poptapmangenge, sun nong dopra jepkamenge. Ange yumada, neda Allah, ne si Yahwehdi, akeca-keca yuma talepra, deiki tara erepra, pio puto weik deiyo ngebodi pepmasena cadi, angeda tek sisi nong kupkamre ja! Aupu konum pepra deipsene. Allah er si Yahwehdi upu pepu.

Israel nesala tamupra telep kweipkamre, pepu upu

21Ne pio telep kunun nge cap, ila puto weik kunun nge cap, ataruda tuai nesala sun kan-kan neitamai di katuai keipnepa, tuai mutu neitamai kunge nesala yala yuk-yuk, dana-dana tara kunge nesala yumadi epkamenge. Tonda, ne Allahdi, nimi sun mali kununge tep, pio dumsisi kupra, upu bokeipnedi, sun malinge tep wenepkamne ngeda, pel dopnepa, nimi yumadi epmengedi, kael kepkamnenge. Tonda, ne puto buru di, sun deiki ikin keca karenkamne nge yuma peda, sundi katuai kuprepa, epmengedi, kael kepkamnenge. 22Ataruda, sun Israel nesala, sun co puna ngebo Israeldi deiamupa, dadeipdanen yakaramyanen, ataru gam tupa kunkameng Israel yala nesalada, ne tep moupra kael kepkamnenge. Ada, ne pel donkamne ning epmengedi, ‘Uo, Allah Yahweh, erda puto weik kurure. Er tep nengeda, er sipu eremkamepe’ tenen, kael kepnengedi, ataru di dipra dorkunkamre taru neitamai yumada, ne tep moupra kael kemkamnenge. Sundi, ‘E, nun nai bo Allah Yahwehda, er tenpu kurure’ tenen, kael kemkamnenge.

23Tonda, sun tuai nesala yala yuk-yuk nesala yumadi, moupra kael kepkamenge. ‘Ada, yu nengdi Israel nesala popidi, ateng koupra yuk karen mutu dubenaminge deiyo ngeda, yuknge ton gume. Israel nesala, sun pe kange dipapu, Allah damai mali-mali weik kuramidi, nedi pediramsi upu yanitamamidi, mali kun kecapu talepra kuramya tep, kange mun keca sun deiki yaue.’ Nesala yala-yala yumadi, akwamunge tenepmengedi, kael kemkamenge. Sun Israel nesaladi mali kuramya cadi, nedi sun wenemna tep akonum batakamsirye. Sun tep kaukeptamsidi, men kalengamsi. Atep, sun podan nengdi yana popra yanipdongomidi, sun podan nengdi yana pomi. 24Sun pedi mali kuna nge cap, tonda pio ali dangnange cap, kuramya deiki di, angeda ikin keca deiamsi. Ada, mali weik kuramipa, tonda nedi sun mali keca cap kuramya menengada, sundi mali kuramitopu, ikin keca dopra kareamsi. Ukupsidi, sun tep konum tapronamsi.

25Atep nengeda, neda Allah Yahweh, akeca-keca yuma talepra, deiki tara erepra, pio puto weik deiyo ngebodi, aupuda pepsene. Ukutaruda, nedi sun Israel yala nesala, sun co puna ngebo Yakubdi deipupa, dadeipdanen yakaramyanen, deipipa akunung nesala tep, bicau tenepkamne. Ukupra tenepne dingeda, anesala men di pio telep kuramitopu, kange di ton cap telep kweipkamsene. Tonda, Israel yala nesala yuma tep nengeda, sun mali kuraminge tep, adipapu sun menenga tep, wenepra poptaptenedi, gawal dakmatene dinin, ange gum di, bicau tenepnedi, sun tep, ka di teleppu kweipkamne. Sun yumada, teleppu kunkamenge. Tonda, ‘Tuai nesaladi ne cap, ne si cap tep, mali pepnenung’ tenen, ne pio telep kunun nge cap, ne pio lengna si cap tep, moupra tenepnedi, kalekne pangeda, sundi ne si tep mali men penkamnenge. Ne sipu pio eremkamnenge.

26Ange yuma konum kupne pangeda, sun Israel nesala yala-yala yumada, sun telep dipapu, nimi podana gum di, dim pepra, sun pe mutu neitamaipu, kange deipra kunkameng taruda, tenpu ngebo peda, sun damai yaredi, sun deiki ikin keca ton men deipkamre! Ange yuma deiki di, sun Israel nesaladi, menop taru ne damai mali kuraminge cap, sun pedi sun pe tepapu, ali kweipdainge capda, luprongepa, nedi akeca yuma gum kupra deipkamne ja! Tonda yuk mutu nengdi sun damai, kware men kweipkamenge. Telep kange deipra kunkamenge.

27Akunkameng ngeda, ake. Ada, ne Allahdi sun Israel nesala dopra, yuk mutu podan nesala cap, yuk yala nesala, karen mutu kunge nesala cap, sun kan-kan donokamsipa, bena ikin kange doupra dakurami Israel nesala yumada, tamupra sun pe mutupu duyankamne. Israel nesala loptapra, tamupra duyanedi, ka di ton telep kweipkamsena deiki di, neda Allah, ne pio telep cap, puto weik cap, ila lengnange capda, yuk mutu nesala yuma epmengedi, ‘Uo’ tenen, moupra kael kemkamnenge. Ange yumada, nedi sun damaipu katuai keipkamne. Uda, ange yuma kupnya deiki di, Israel nesala, sun mali kuramidi, ali dangaminge yumada, adipapu lupronkamenge.

28Ukupne pangeda, ne nyapu sisa, sun Israel nesaladi, ‘Uo, nun nai bo Allah Yahwehda, akeca-keca talepra, deiki tara erepra, ila puto weik ngebo kurure’ tenen, kael kemkamnenge. Ataruda, ne sipu eremkamnenge. Ange deiyoda, nedi sun dopra, yuk karen mutu nesala kuramya kan-kan donokamsi. Dinino ukutaruda, nedi sun anesala tamupra sun pe mutupu duyana deipkamne. Sun anesalada, tenpu ngebo peda, yuk mutu nesala kankan, tapnepa men kunkamenge. 29Ange ukupkamne taru di dipra, dorkunkamre taru neitamai yumada, nedi sun Israel yala nesalada, pio men tamkamne. Ange gum dinin, ne damai kunerur Lek Sambalada, sun Israel nesala deiki dopra deipnepa, erdi sun tep tupa melimnapu kunkamre. Tonda, erdi men tamkamre. Ange yumada, ne Allah Yahweh, akeca-keca yuma talepra, deiki tara erepra, pio puto weik deiyo ngebodi konum peipsene. Atep, ange yumada, tek sisi nong kupkamre ja!

Allahdi Yeheskiel damai tep yana peipu.