Eze 4 | XteSC | STEP | Allahdi Yeheskiel tep, ken mapka deiki di pepu. “Uo kanda nimi sisa dipapu deipkei ngebo kurume. Kanda boun gel tenpu dopropmemdi, kan urasin tara deipkurume. Tonda, ukupmem dingeda, Yerusalem mutu ila ati arum dominge, urasin akapmaretopu, agel urasin deiki gambar petupra deipkurume.

Ezekiel 4

Yeheskieldi, yu nengdi, Yerusalem mutu neitamai warekra uruptapkaminge tep seku upu

1 Allahdi Yeheskiel tep, ken mapka deiki di pepu.

“Uo kanda nimi sisa dipapu deipkei ngebo kurume. Kanda boun gel tenpu dopropmemdi, kan urasin tara deipkurume. Tonda, ukupmem dingeda, Yerusalem mutu ila ati arum dominge, urasin akapmaretopu, agel urasin deiki gambar petupra deipkurume. 2 Ukumem dingeda, Yerusalem mutu ila ati arum yuk mutu yu nengdi yana warekra poryakaminge tep, Yerusalem mutu yuma dana-dana tara ongopgenepra warekamenge. Atep, sun jen talena neng urasin utopu petupra agel deiki deipkurume. Tonda, Yerusalem mutu dana-dana tara wiami lyom gel beilya damai, tu weika di palipra deipkurume. Sun jen talena nengdi atu welepmengedi, abeilya deiki tara bisipra kwerepmengedi, Yerusalem mutu wekamenge nge tep pepne. Tonda, sun yankameng jen nengdi, keana tep dopra deipkameng tenda ati urasin utopunge cap, aboun gel urasin deiki gambar sekra deipkamrume. Tonda, Yerusalem mutu gel beilya buplan bongopra uruptapkamenge tep, lyom gat co keteneipkameng nge cap, urasin utopu petupra, agel deiki sekurume. Akeca yumada, apala boun gel urasin deiki, gambar sekmemdi, petupra deipkurume.

3 Ukukumem taruda, aboun gel ortara akwapmarepa, kanda atara tu deiki mapmem dingeda, gat besi keca di keteneipi pala weik mau, er si panci datar dopra, aneitamai di tu deiki deipkurume. Ada ukupmanto keca, petenkemna tep kupkurume. Ukupkamruma deiyoda, abesi keca di keteneipi panci datar ngeda, ila besi beilya utopu kurure. Kanda atara di tu deiki mapmem dingeda, ortara kupkamre besi panci cap, boun gel urasin deiki sekmarum gambarnge cap, kandi kupkamremnge cap, akeca pio weika di warekra dinkamrume. Ange ukupra kupkamruma deiyoda, ‘Sun Israel yala nesala yuma moupra tenepmengedi, kael kepkameng’ tenen, peten kemdeirina keca utopu kupkamrure.

4 – 5 Ange yuma ukupra deipmem dingeda, kanda kan tebalal tara gwalipra deipdamemdi, tu deiki mapkurume. Tu deiki mapmemnyopda, peten kemderina tep, nedi sun Israel nesaladi mali kurami keca yuma, wenemna tep nengeda, kan deikipu deipkamkene. Ukupra kan tebalal tara deiki mapkamrum taruda, ue denge pio weik, tiga ratus sembilan puluh (390) tumi deiki di, kandi mapkamrume. Tu deiki mapkamrum deiyoda, tenpu tumi deiki di ukupra mapkamrumtopu, keteng tamun tenpu kupkamre. Ada, sun Israel yala nesaladi, mali kuraminge wenemna tep, 390 keteng tamun deiki di, ikin keca dopra, sun nong deiki derinkamnada, utopu kupkamre. Atep nengeda, nedi Israel nesala tep wenepkamne taru, 390 keteng tamun utopu wenepkamne. Kanda 390 tumi neitamai di, tu deiki mapkamrum taruda, sun mali kuraminge kan nong deiki kupkamre. Akupkamrum ngeda, ‘Sun kael kepkameng’ tenen, peten kemna tep, kandi kupkamrume.

6 Ange yuma konum kupmemnyopda, utopu dinin, kan nong dumsisi tara tu deiki mapkurume. Ange kupkamrumnge deiyoda, sun Yehuda yala nengdi mali kuraminge kunumna tep, kupkamrume. Tu deiki mapkamrum taruda, denge weik, 40 tumi deiki di mapkamrume. Ada, peten kemderina tep, 40 tumi nedi karepkene. Kan nong dumsisi tara tu deiki mapkamruma deiyoda ake. Ada, nedi Yehuda yala nesaladi mali kuraminge wenepkamne taruda, 40 keteng tamun kupkamre. Ange utopu, kanda 40 tumi neitamai di, tu deiki mapkamrume. Atep peten kemna tep, ataruda, sun mali kuraminge kan nong deiki deipkamkene. Akupkamrum ngeda, ‘Yehuda yala nesala kael kepkameng’ tenen, peten kemna tep, kandi kupkamrume.

7 Gel pala boun nge deiki, Yerusalem mutu ati arum, jen talena nengdi warekameng taru urasin utopu kupra deipkamrume. Ada, gambar sekra deipkamrumnge tara dinkurume. Ukupmem dingeda, jen talena nengdi, ‘Nimi porbenkup’ tenen, sun buru deiki kenengameng keca yuma tapmengedi, ketenemamengtopu, kan peda, kan buru deiki kenengrum opkal kwiripra tapkurume. Ukupmem dingeda, nedi sun amutu nesala yuma, sun wenemna tep kupkamne ngeda, kapul kupmane taru dinin, kanda, ‘Allahdi ukupra-ukupra wenepkamsere’ pepra, lap peipkamrume.

8 Atep kanda, tek sisi agel deiki sekamrum keca, kandi dinmamempa, kan nong utopu tamupra tebalal tara di, amenda taru dumsisi tara mapkamrum taruda, nedi tapu di koupdongopkamkene. Ukupkenyopda, kandi men tamuptume. Nedi, ‘Ataru neitamai di, yuk mutu jen talena neng, sun Yerusalem mutu warekra ongopdongopkameng taruda ake. Nedi, ‘Sun Israel yala nesala cap, Yehuda yala nesala cap tep wenepkamne taruda, ada ake,’ tenemsitopu, acapu kunkamrume. Atapuda, nedi men loptapkamne.

9 Keteng tamun weik taru acapu mapkamruma cadi, nedi apepkuken keca, kandi ketenepkamrume. Atep ukutaruda, ajen keca keteneipkurume. Ada, gandum sisa cap, jelai cap, kacang merah weiknge cap, tonda, kacang merah meteknge cap, gandum utopu keca er si jawan cap, er si ton kacang polong cap, sekoi cap, ketenepra ila mau dongopra deipkurume. Ukupmemdi, jen keca putapkamker taru, ange yuma wisipmemdi dongopra roti kwaneng utopu keca dapra jenkamrume. Adongopra dapkurum roti kwanengda, kanda tu deiki mapkamrum taru neitamai, kan tebalal tara mapmemdi, 390 tumi deiki di akecapu dapra jenkamrume. 10 Tenpu tumi deiki di, aroti kwaneng dana deiyo keca bokrapmemdi, dapkamrum ngeda, yambulanunpu 230 gram ketenepra dapkamrume. Konum dapmem dingeda, atumi-atumi yumada, ‘Aketeng-aketeng konum kupyopda, jepkamne,’ tenepmemtopu, kandi 230 grampu bokra jenkamrume. Ton ngeda, ange di deiki tarada, ton dopra, pio men jenkamrume.

11 Kan me yuma peda, pio weik gume. Tenpu tumi neitamai di, yambulanun 0.6 literpu gwepra jenkamrume. Tonda, sukropnapu kunkamkere. Ange tep nengeda, kandi, ‘Aketeng-aketeng konum kupyopda, jepkamne,’ tenepmemtopu, kandi dopra jenkamrume. 12 Atep nengeda, tumi-tumi yuma kan tenepmem keteng konum kupyopda, yuk nesala yuma dinmangaipu, nimidi dei lengtamenge keca, konum kalapunge dopra adeiki di uku sekmemdi, akeca roti kwaneng dapkamrume. Kandi ketekepra dankamrum roti kwaneng bum tenpu, auku deiki di dapmemdi aroti kwanengpu dopra jenkamrume. Roti kwaneng sisa, er si jelai di dapra jeramrumtopu, akeca dapra jenkamrume.

13 Ukupkamrum keca yumada, ‘Sun Israel nesala kael kepkameng’ tenen, peten kemdina tep kupkamrum dinin, ange deiyoda ake. Ne Allah Yahwehdi, “Israel nesala, sundi akecada jenkamrum dinin, akecapuda pio men jenkamrume. Angeda, ne pio song cadi, angeda mem kecapu kurure. Atep, ange jepmumnyopda, ne damai ton yana, ne si ton men erepnetume,” pepsisi. Ange pepsisi dinino, amenda taru nedi Israel nesala wenemna tep, sun mutu sisa di dokotepsenepa, yuk-yuk mutu nengdi, anesala tomopmengedi, yuk karen mutu dubena dakunkameng taruda, sun Israel yala nesaladi, amem keca utopu keca ton pio men jenkamenge.

14 Allahdi ne Yeheskiel tep upepneupa, nedi tamupra pepsi. Ada, “Uo, ne nai bo Allah ^{▼▼Allah – Acada, Ibrani upu di, ‘Yahweh Adonay’ pepra seki. ‘Adonay’ deiyo ngeda, katuai sekmepu.} Yahweh, kanda akeca-keca yuma talememdi, ila puto weik deiyo ngebo kuruma tep, moropkene! Naio, ne pio yambul metek taru di dipdongopra, ataru peda, nedi mali kuna deiki di, mali men kweipdasi. Ada, gam kure keca tali depmarenge cap, tonda yuk yu gam keca, nimidi peirameng gam keca poptapinge capda, akeca tu cap, er galemna capda, pio men jeramsidi, ukupepa tupa men jenune. Allaho, kandi, ‘Akeca yumada, pio men jenkamrume,’ pepsemum ngeda, pio men jeramsitopu, tupa men jenune.” Ne Yeheskieldi Allah tep, upepra moropsi.

15 Upepsi pangeda, Allahdi ne tep upepneu, “Telepe, sapi bisam erdi jen jeramredi, dei tamamrenge, konum kalapunge dopra, kandi akeca dopra uku sekmemdi, apepmaken roti kwaneng dapra jenkamrume. Nimidi tamenge dei kalapunge dopra, uku sekmemdi, akeca men dapra jenkamrume,” pepneu. 16 Upepu dingeda, erdi aupu ton pepne.

“Kanda nimi sisa dipapu deipkei ngebo kurume. Nedi Yerusalem mutu nesala jenkameng jen keca yumada, gum kupra gawal dakeipkamne. Ukupra konum deipnepa, sun jen keca yala-yala yumada, sukropkamre. Ukuprepa, sundi, ‘Uo,’ tenena cap, kwar kuna cap kungedi, sun jen cap, me cap yumada, gum kupra deipnepa, sukropre pangeda, ‘Uo, depkamep’ tenen, yambul-yambula di bokra, jenkamenge. Ataruda, sun jen putana weik kupkamenge.

17 Sun anesala yumada, jen keca yuma cap, me cap gum kupkamrenge tep, sun yuma bol malipu kupmengopda, sun epdangedi, ‘Uo’ tenen, kware kuprepa, sun kange dipru yuma buluksakrepa, kange mun kange doupra kunkamenge. Dinino, ukupkamenga deiyoda, sun mali kurami keca cap, tupa mali kunge keca cap deiki di, sun amutu nesala yumada wenepnedi ikin keca sun nong deiki deipnepa, sun depra gawal dakamenge.